Kolua Fakamaʼuhigaʼi Ia Sehova ʼi Tokolua ʼAho ʼOhoana

1-2. Kotea ʼae ʼe fakaʼamu e Sehova ʼo ʼuhiga mo tokolua ʼaho ʼohoana?

ʼE KE teuteu ʼohoana koa? Kapau koia, ko he lakaga fakafiafia ʼaia ʼi tou maʼuli! ʼE mahino ia ʼe ke maʼumaʼua anai ki te ʼu teuteu ʼo tou ʼohoana.a ʼE loto e Sehova ke kolua manatuʼi tuʼumaʼu tokolua ʼaho ʼohoana pea ke fua manuʼia ki ʼamuli tokolua maʼuli fakataumatuʼa.​—Taag. 5:18; Hiva 3:11.

² ʼE tuha mo Sehova ke fakamaʼuhigaʼi ia ia ʼi te ʼaho ʼo tokolua ʼohoana. He koʼe ʼe tonu ke fakamaʼuhiga ai ia Sehova? Pea ʼe feafeaʼi hakolua fakamaʼuhigaʼi ia Sehova? Logo la ʼe fakahagahaga tafito te alatike ʼaeni kia natou ʼae ʼe teuteu ʼohoana, kae ʼe toe ʼaoga pe kia tatou te ʼu pelesepeto ʼae ka tou vakaʼi ai. ʼE ʼaoga mai anai mo kapau la ʼe tou kau ki he faiʼohoana peʼe kole tokoni mai naua ʼae ʼe teuteu ʼohoana ʼo ʼuhiga mo tonā ʼohoana.

HE KOʼE ʼE TONU KE FAKAMAʼUHIGAʼI IA SEHOVA?

3. Kotea ʼae ʼe tonu ke fai e te tehina mo te tuagaʼane ʼae ʼe nā teuteuʼi tonā ʼohoana, pea kotea tona tupuʼaga?

³ ʼE lahi anai te ʼu tonu ʼe maʼua anai ke toʼo e te tehina mo te tuagaʼane ʼae ʼe nā teuteuʼi tonā ʼohoana. ʼE tonu ke nā mulimuli ki te ʼu pelesepeto ʼa Sehova ʼae ʼe tuʼu ʼi tana Folafola. Kotea tona tupuʼaga? Koteʼuhi ko Sehova ʼae neʼe ina fai te ʼuluaki ʼohoana. Neʼe ina ʼaumai kia Atama ia Eva, tona ʼohoana. (Sen. 1:28; 2:24) Koia ko te tehina mo te tuagaʼane ʼae ʼe nā teuteu tonā ʼohoana ʼe nā tokagaʼi muʼa ia te manatu ʼa te ʼAtua.

4. Kotea te tahi tupuʼaga ʼae ʼe tonu ai kia naua ʼae ʼe teuteu ʼohoana ke fakamaʼuhigaʼi ia Sehova ʼi tonā ʼaho ʼohoana?

⁴ Koʼeni te tahi tupuʼaga tafito ke kolua tokagaʼi ai te manatu ʼa Sehova ʼi takolua teuteuʼi tokolua ʼohoana: ʼE ko takolua Tamai ʼae ʼi selo pea mo tokolua Kaumeʼa lelei. (Hep. 12:9) Pea ʼe kolua fakaʼamu ke kolua taupau takolua felogoi lelei ʼaia mo ia. ʼE mahino ia ʼe mole kolua loto ke hoko he aluʼaga ʼe mamahi ai tokolua Kaumeʼa ʼi tokolua ʼaho ʼohoana peʼe ko he tahi age ʼaho. (Pes. 25:14) Neʼe tokoni tuʼumaʼu atu pe ia Sehova kia koulua pea mo hoko atu pe anai ia tana tokoni atu. Koia, kapau ʼe kolua fakakaukauʼi te faʼahi ʼaia, ʼe mole tuha koa la mo ia ke fakamaʼuhigaʼi ʼi te ʼaho ʼaia?​—Pes. 116:12.

ʼE FEAFEAʼI HAKOLUA FAKAMAʼUHIGAʼI IA SEHOVA?

5. ʼE tokoni feafeaʼi te Tohi-Tapu kia naua ʼae ʼe teu ʼohoana ke nā fai ni tonu ʼe lelei ʼo ʼuhiga mo tonā ʼaho ʼohoana?

⁵ ʼE mole ʼi ai ni lao ʼi te Tohi-Tapu ʼo ʼuhiga mo te ʼu faiʼohoana peʼe ko te ʼu kiʼi temi fakafiafia ʼi te ʼosi ʼo tonā ʼohoana. Koia ʼe lahi te ʼu tonu ʼe feala ke fai e naua ka ʼohoana ʼo mulimuli ki tanā agaʼi fenua, peʼe ko te ʼu meʼa ʼae ʼe nā leleiʼia. Pea ʼe toe fakalogo te kau Kilisitiano moʼoni ki te ʼu lao ʼo te puleʼaga ʼo ʼuhiga mo te ʼohoana. (Mat. 22:21) Koia, kotea pe te tonu ʼae ʼe toʼo e naua ʼae ʼe teu ʼohoana ʼo ʼuhiga mo tonā ʼohoana, kae kapau ʼe nā mulimuli ki te ʼu pelesepeto, ʼe nā fakamaʼuhigaʼi anai mo fakafiafia ai ia Sehova. Kotea te ʼu pelesepeto ʼaia?

6. He koʼe ʼe tonu ke fakalogo ia naua ʼae ʼe teu ʼohoana ki te ʼu lao ʼo te puleʼaga ʼo ʼuhiga mo te ʼohoana?

⁶ Kolua fakalogo ki te ʼu lao ʼo te puleʼaga. (Loma 13:​1, 2) ʼE lahi te ʼu fenua ʼe tonu ai kia natou ʼae ʼe teu ʼohoana ke natou fakalogo ki ʼihi lao ʼo te puleʼaga ʼi muʼa ʼo tonatou ʼohoana. Koia ʼe tonu ai ki te tehina mo te tuagaʼane ʼae ʼe teu ʼohoana ke nā iloʼi te ʼu lao ʼaia ʼi te fenua ʼae ʼe nā maʼuʼuli ai. Kapau ʼe mole kolua iloʼi,ʼe feala ke kolua kole tokoni ki te kau tagata ʼafea.b

7. Kotea ʼae ʼe tonu ke ha ʼi te ʼaho ʼo tokolua ʼohoana?

⁷ Kolua faiga ke maui malie tokolua ʼaho ʼohoana. (1 Ko. 10:​31, 32) ʼE kolua loto ke ha lelei ʼi tokolua ʼaho ʼohoana ia te fua ʼo te laumalie ʼo te ʼAtua, kae mole ko te ʼu aga ʼe mole lelei ʼa te hahaʼi ʼo te malama. (Kal. 5:​19-26) ʼE liliu anai te tehina ʼae ʼe teu ʼohoana ko he pule famili ohage ko tona fakaha ʼi te pelesepeto ʼi te Tohi-Tapu ʼo ʼuhiga mo te pule. Koia ʼe tonu anai ke faiga ke liliu tonā ʼaho ʼohoana ʼo fiafia pea mo fakamaʼuhigaʼi ai ia Sehova. ʼO feafeaʼi? Kapau ʼe fai he akonaki Tohi-Tapu mo ha ai te ʼofa mo te fakaʼapaʼapa ʼa te tehina faiakonaki, ʼe mahino ai anai te nofoʼaki ko te ʼohoana ʼe ko he meʼa ʼofa mai ia Sehova. Pea ʼe toe tokoni anai kia natou ke natou iloʼi ʼe maʼuhiga ʼaupito te ʼohoana. Koia la ʼae, tokolahi te ʼu tehina mo tuagaʼane ʼe natou kole pe feala ke fai te akonaki ʼi te Fale Fono. Kapau ko he faʼahi ʼe kolua loto ki ai, pea kolua faitohi fakatomuʼa ʼo kole ki te kolesi ʼo te kau tagata ʼafea.

8. Kapau ʼe kolua fakatuʼutuʼu he fakafiafia, kotea ʼae ʼe feala ke kolua fai ke mole ha ai te ʼu aga ʼae ʼe mole lelei ʼo te malama? (Loma 13:13)

⁸ Lau ia Loma 13:13. Kapau ʼe kolua fakatuʼutuʼu he fakafiafia, kotea ʼae ʼe feala ke kolua fai ke mole ha ai te ʼu aga ʼae ʼe mole lelei ʼo te malama? Ko te kupu Fakakeleka ʼae neʼe fakaliliu ʼaki te kupu “fakafiafia fakavalevale,” ʼe fakaʼuhiga ki he ʼu fakatahitahi ʼe inu fakavalevale ai te hahaʼi pea ʼe tagi ai te musika ki te ʼaho. Kapau ʼe kolua fakatuʼutuʼu ke fakaʼaogaʼi ai te kava, ke kolua fakakaukauʼi fakatomuʼa pe kotea ʼae ʼe feala ke kolua fai ke ʼaua naʼa inu fakavale he tahi.c Pea kapau ʼe ʼi ai he musika, kolua tokakaga naʼa malohi fau, ke feala he felogoi ʼa takolua ʼu fakaafe. Kolua filifili lelei te musika pea mo vakaʼi te ʼu kupu ʼo te ʼu hiva naʼa fakatupu tukia ai ki he tahi.

9. Kapau neʼe kolua fakatuʼutuʼu ke palalau ʼihi ʼi ʼokolua famili peʼe kaumeʼa lolotoga te fakafiafia, kotea ʼae ʼe tonu ke kolua tokakaga ki ai?

⁹ Neʼe kolua fakatuʼutuʼu koa ke palalau ʼihi ʼi ʼokolua famili peʼe kaumeʼa lolotoga te fakafiafia? ʼE fakahaha ai anai koa he ʼu pāki, he ʼu kiʼi ʼata, he ʼu kiʼi meʼe peʼe ko he ʼu kiʼi hiva? ʼE toe lahi age anai tokolua fiafia ʼi takolua manatuʼi te ʼaho ʼaia. Kae kolua tokakaga ke mole fakatupu lotovaivai te ʼu meʼa fuli ʼae ka fai ʼi te fakafiafia. (Flp. 4:8) Kolua fai te ʼu fehuʼi ʼaeni: “ ʼE fakaʼapaʼapaʼi ai anai koa ia natou ʼae ka kau ki ai? ʼE fakaʼapaʼapaʼi ai koa te ʼohoana?” Kae ko te fehuʼi maʼuhiga ʼaeni ʼe tonu ke kolua fai: “ ʼE fakamaʼuhigaʼi koa ia Sehova ʼi te ʼu faʼahi fuli ʼaia?” Logo la ʼe mole kovi te fai ʼo he ʼu palalau fakahuahua, kae kolua tokakaga ke mole fakaʼuhiga ki he ʼu aga heʼe ʼaoga. (Efe. 5:3) Koia kapau ʼe fia palalau ʼihi ʼi ʼokolua famili peʼe kaumeʼa, kolua vakaʼi ke natou fakaʼapaʼapa ki te ʼu faʼahi ʼae ʼe kolua loto ki ai.

10. Ka teuteuʼi e he tokolua tonā ʼohoana, he koʼe ʼe lelei ke nā mulimuli ki ʼonā fealagia? (1 Soane 2:​15-17)

¹⁰ Kolua mulimuli ki ʼokolua fealagia (Lau ia 1 Soane 2:​15-​17.) ʼE fiafia ia Sehova moka faiga ʼana kaugana ke natou fakamaʼuhiga ia ia kae mole ko natou totonu. Koia ko te ʼu tehina mo tuagaʼane ʼae ʼe natou mulimuli ki ʼonatou fealagia ʼe mole natou puli falā anai moʼo fakahaha ʼonatou koloa. He koʼe ʼe lelei age ke kolua faigaʼi ke fakafaigafua tokolua ʼohoana? ʼE ui fenei e Mika, te tehina mai Norvège: “Neʼe feala ke hoko atu tamā pionie he neʼe mole ma tuʼu maʼua. Neʼe faigafua pe toma ʼohoana kae neʼe matalelei mo fakagalo gataʼa.” ʼE ui fenei e te tuagaʼane ko Tabitha, ʼe maʼuli ʼi Initia: “ ʼI tamā faiga ʼae ke faigafua toma ʼohoana neʼe mole lahi te ʼu faʼahi neʼe tonu ke teuteuʼi pea siʼisiʼi ai tamā fetokakoviʼaki. Neʼe mole lahi ai toma hoha.”

11. Ka filifili e he tokolua tonā ʼu teu ʼohoana, ʼe nā fakaha feafeaʼi tanā fakapoipoi? (Vakaʼi mo te ʼu pāki.)

¹¹ Kua kolua filifili koa ʼokolua teu ʼohoana? ʼE mahino ia ʼe kolua loto ke kolua talavou mo finemui ʼi te ʼaho ʼaia. Maʼia pe la ʼi te temi muʼa, ka neʼe ʼohoana he tagata mo he fafine neʼe maʼuhiga kia naua tanā faiteuteu. (Esa. 61:10) ʼE moʼoni, ko ʼokolua teu ʼohoana ʼe mole hage anai ko ʼae ka kolua ʼai ʼi he tahi age lakaga. Kae ʼe tonu pe ke fakapoipoi. (1 Tim. 2:9) ʼAua naʼa maʼuhiga fau kia koulua tokolua ʼu teu ʼohoana, peʼe ko ʼihi atu aluʼaga.​—1 Pet. 3:​3, 4.

12. He koʼe ʼe mole tonu ke tali e he tokolua ʼe teuteu ʼohoana ni agaʼi fenua ʼe fakafeagai ki te Tohi-Tapu?

¹² ʼAua naʼa kolua tali ni agaʼi fenua ʼe fakafeagai ki te Tohi-Tapu. (Fkha. 18:4) ʼI te ʼu faiʼohoana ia ʼaho nei, kua lahi te ʼu agaʼi fenua ʼe pipiki ki te lotu hala mo te faifakalauʼakau. ʼE ui lelei mai e Sehova ke tou fakamamaʼo mai te ʼu aga heʼe maʼa ʼaia. (2 Ko. 6:​14-17) Kapau ʼi te koga meʼa ʼae ʼe kolua maʼuʼuli ai ʼe ʼi ai ni agaʼi fenua ʼe mole kolua mahino lelei ki ai, kolua fakalavelave tona haʼuʼaga. Pea kolua vakavakaʼi te ʼu pelesepeto Fakatohi-tapu ka tokoni atu ke kolua iloʼi te ʼu agaʼi fenua ʼae ka kolua mulimuli ki ai ʼi tokolua ʼohoana.

13. ʼE faʼifaʼitakiʼi feafeaʼi e naua ʼae ʼe ʼohoana te manatu ʼa Sehova ʼo ʼuhiga mo te ʼu meʼa ʼofa ka foaki age kia naua?

¹³ ʼI te potu ʼae ʼe kolua maʼuʼuli ai, ʼe ko he aga mahani koa te foaki e te kau fakaafe he meʼa ʼofa kia naua ʼae ʼe ʼohoana? ʼE fakalogo anai te meʼa ʼofa ʼae ʼe foaki e he tahi ki te foʼi falā ʼae ʼe ina maʼu. ʼE moʼoni ʼe fakalotomalohiʼi te kau Kilisitiano ke natou foaki. Pea ʼe natou fiafia ʼi te foaki. (Taag. 11:25; Gaue 20:35) Kae ʼe mole loto anai e naua ʼae ʼe ʼohoana ke manatu e ʼana kau fakaafe ʼe tonu ke natou foaki age he meʼa ʼofa. Pea ʼe mole nā loto ke natou ufiufi kapau ʼe mole feala ke natou foaki age he meʼa ʼofa ʼe totogi kovi. ʼE nā faʼifaʼitakiʼi ia Sehova moka nā lotofakafetaʼi ki he meʼa ʼofa pe ʼe foaki age e he tahi ʼaki he lotolelei kae neʼe mole fakakinauʼi.​—2 Ko. 9:7.

ʼE FEAFEAʼI HAKOLUA TEKEʼI MO TAUʼI HE ʼU FIHIFIHIA?

14. Kotea ʼihi fihifihia ʼe tau mo naua ʼae ka ʼohoana?

¹⁴ ʼE mole ko he meʼa faigafua te teuteuʼi ʼo he ʼohoana ʼe fakamaʼuhigaʼi ai ia Sehova. Ohage la, ʼe lagi faigataʼa te mulimuli ki takolua loto ʼae ke faigafua ia tokolua ʼohoana. ʼE ui fenei e Charlie ʼae ʼe maʼuli ʼi te ʼu Motu ʼo Salomone: “Neʼe faigataʼa tamā filifili pe ko ai ʼae ka ma fakaafe anai ki toma ʼohoana. ʼE kaugamalie ʼoma kaumeʼa pea ʼi heni ʼe fakaʼamu e te hahaʼi fuli ke fakaafe natou.” ʼE ui fenei e Tabitha, ʼae kua tou ʼosi talanoa ki ai: “ ʼI te potu ʼae ʼe au maʼuli ai, ka fai he ʼohoana ʼe ko he agamahani te fakaafe ʼo he kaugamalie. Koia neʼe ʼaoga ai he temi ki ʼama ʼu matuʼā ke natou tali tamā loto ʼae ke fakaafe pe te toko 100.” Pea ʼe ui fenei e Sarah, ʼae ʼe toe maʼuli ʼi Initia: “Ko ʼihi ʼe natou fia fakahaha ʼe natou maʼu falā pea mo natou tuʼania te manatu ʼa te hahaʼi. Neʼe ʼohoana ʼihi ʼo toku famili pea neʼe ko te toe paʼaga lahi neʼe natou fakaʼaogaʼi ki ai. Koia neʼe fakaneke ai au ke toe maʼuhiga age toku ʼaho ʼohoana ia natou.” Kotea ka tokoni atu ke kolua tauʼi te ʼu fihifihia ʼaia pea mo ʼihi atu?

15. He koʼe ʼe maʼuhiga ke kolua faikole ʼo ʼuhiga mo te ʼu faʼahi ʼe kolua teuteu ki tokolua ʼohoana?

¹⁵ Kolua faikole ʼo ʼuhiga mo te ʼu faʼahi ʼe kolua teuteu ki tokolua ʼohoana. ʼE feala ke kolua palalau kia Sehova ʼo ʼuhiga mo te ʼu tonu ʼae ʼe maʼua ke kolua fai pea mo fakaha age te ʼu meʼa ʼae ʼe kolua logoʼi. (Flp. 4:​6, 7) ʼE feala ke kolua kole kia Sehova ke tokoni atu ke kolua fai ni tonu ʼe lelei, ke kolua tokalelei moka kolua hoha, pea mo lototoʼa moka ʼe ʼaoga. (1 Pet. 5:7) Pea ka kolua sio ki tana tali ki ʼakolua faikole, ʼe toe lahi age anai takolua falala kia te ia. ʼE ui fenei e Tabitha, ʼae kua tou ʼosi talanoa ki ai: “Ko au mo te tuagaʼane ʼae neʼe ma teu ʼohoana neʼe ma tuʼania naʼa ma fetokakoviʼaki pea naʼa ma tokakovi mo ʼoma famili. Koia ka neʼe matou palalau ki te ʼu faʼahi ʼae neʼe tonu ke teuteuʼi, neʼe matou kamata tuʼumaʼu pe ʼaki he faikole. Neʼe matou logoʼi ai te tokoni ʼa Sehova he neʼe matou felogoi tuʼumaʼu pe ʼi te tokalelei.”

16-17. He koʼe ʼe ʼaoga he ʼu felogoi lelei moka kolua teuteuʼi takolua ʼohoana?

¹⁶ Kolua fakaʼapaʼapa moka kolua felogoi ʼateaina ʼo feia pe moka ko kolua mo ʼokolua famili. (Taag. 15:22) ʼE lahi te ʼu tonu ka kolua toʼo moka kolua teuteu tokolua ʼohoana. Ohage la ʼe tonu ke kolua taʼofi te ʼaho ʼae ka kolua ʼohoana ai, mo fakatuʼutuʼu te falā ʼae ka kolua fakaʼaogaʼi pea mo tohi te ʼu higoa ʼo ʼakolua fakaafe. ʼI muʼa ʼo hakolua fai he tonu, kolua vakaʼi fakatahi te ʼu aluʼaga kehekehe ʼe feala ke kolua filifili, mo te ʼu pelesepeto Fakatohi-tapu ʼae ʼe tonu ke kolua mulimuli ki ai, pea mo he ʼu tokoni neʼe foaki atu e he ʼu tehina mo tuagaʼane kua fakapotopoto. Ka kolua fefakahaʼaki te ʼu meʼa ʼae ʼe kolua loto ki ai, kolua fai ʼaki he agalelei mo aga fakapotopoto. Pea kolua toe fai feia moka kolua felogoi mo ʼokolua famili. Ohage la, kapau ʼe kole atu e ʼakolua matuʼā he koga ʼe natou loto ke fai ʼi tokolua ʼohoana, kolua tali mo kapau ʼe feala. ʼE toe maʼuhiga foki kia natou tokolua ʼaho ʼohoana! Kae kapau ʼe mole feala, kolua fakamahino lelei age tona tupuʼaga ʼaki he fakaʼapaʼapa. (Kol. 4:6) Kolua fakamahino ki ʼokolua famili ʼe kolua loto tafito ke liliu tokolua ʼaho ʼohoana ko he lakaga fakafiafia ʼe fakamaʼuhigaʼi ai ia Sehova.

¹⁷ Kapau ʼe mole tauhi ʼakolua matuʼā kia Sehova, ʼe feala ke faigataʼa takolua fakamahino age te ʼu tonu ʼae kua kolua fai. Kae ʼe feala pe. ʼE ui fenei e te tehina ʼe higoa ko Saniod ʼe maʼuli ʼi Initia: “Neʼe loto ʼe ʼoma famili ke fai ʼi toma ʼaho ʼohoana he ʼu toʼotoʼoga ʼo te lotu Inituisi. Neʼe lahi ʼosi toma temi neʼe ma fakamahino age te ʼu tonu ʼae neʼe kua ma fai. Kae neʼe ma lotolelei pe ke ma fai he ʼu meʼa neʼe natou loto ki ai he neʼe mole fakafeagai ki te manatu ʼa Sehova. Ohage la neʼe ma fetogi te meʼa kai, ʼo ma filifili he ʼu meʼa kai ʼe natou leleiʼia. Neʼe ma toe toʼo te tonu ʼae ke mole fai ni hiva mo ni meʼe he neʼe mole natou mahani ki ai.”

18. Kotea ʼae ʼe feala ke kolua fai ke to lelei ʼakolua fakatuʼutuʼu ʼi te ʼaho ʼo tokolua ʼohoana? (1 Kolonito 14:40) (Vakaʼi mo te pāki.)

¹⁸ Ke kolua fai he ʼu fakatuʼutuʼu ʼe lelei. Ka kolua fai ia meʼa fuli ʼi te fakatokatoka, ʼe veliveli anai takolua hoha ʼi te ʼaho ʼo tokolua ʼohoana. (Lau ia 1 Kolonito14:40.) ʼE ui fenei e Wayne, ʼae ʼe maʼuli ʼi Taiwan: “ ʼI ni kiʼi ʼaho ʼi muʼa ʼo toma ʼohoana, neʼe fai te kiʼi fono mo natou ʼae neʼe fia tokoni mai ki te teuteuʼi ʼo toma ʼaho ʼohoana. Neʼe matou vakaʼi te ʼu fakatuʼutuʼu ʼae neʼe kua ma fai, pea mo faʼifaʼitakiʼi ʼihi koga ʼo te ʼaho ʼaia, ke vakaʼi ai ke to lelei ia meʼa fuli.” ʼE kolua fakaha anai ʼe kolua fakaʼapaʼapa ki ʼakolua fakaafe moka kolua fai ia meʼa fuli ke hoko ʼi tona hola totonu.

19. Kotea ʼae ka tokoni atu ke fakaalualu lelei takolua ʼu fakatuʼutuʼu ʼo tokolua ʼaho ʼohoana?

¹⁹ ʼE lahi anai te ʼu fihifihia ʼe feala hakolua tekeʼi mo kapau ʼe kolua fakakaukau fakatomuʼa he ʼu aluʼaga ʼe feala ke hoko. (Taag. 22:3) Ohage la, kapau ʼi te faʼahi ʼae ʼe kolua maʼuʼuli ai ko te agamahani te ʼomai ʼa ʼihi ki te fakafiafia kae neʼe mole fakaafe, kolua fakakaukauʼi pe kotea ʼae ʼe feala ke kolua fai ke ʼaua naʼa hoko te aluʼaga ʼaia. Kolua fakaha age ki ʼokolua famili ʼae ʼe mole tauhi kia Sehova ke natou iloʼi pe kotea ʼae ʼe feala ke hoko moka natou olo age. Kolua fakamahino age takolua manatu ʼo ʼuhiga mo ni agaʼi fenua ʼe fai ʼi te faiʼohoana. Pea ʼe feala ke kolua fakaha age te alatike “Comment se passe un mariage chez les Témoins de Jéhovah?” (ʼE Feafeaʼi Te ʼu ʼOhoana ʼa Te Kau Fakamoʼoni ʼa Sehova?) ʼi te jw.org. ʼE lelei ke kolua filifili he “pule ʼo te kaitahi” ko he tehina ʼe kolua falala ki ai, ke tokaga ke fakaalualu lelei te fakafiafia. (Soa. 2:8) Kapau ʼe kua ina iloʼi ʼakolua fakatuʼutuʼu ʼo ʼuhiga mo tokolua ʼohoana, ʼe tokaga anai ke fakamaʼuhigaʼi ia Sehova ʼi te ʼaho ʼaia pea ke to lelei ia meʼa fuli.

20. Kotea ʼae ʼe tonu ke manatuʼi e naua ʼae ʼe teu ʼohoana ʼo ʼuhiga mo tonā ʼaho ʼohoana?

²⁰ ʼE lagi lahi takolua hoha moka kolua fakakaukauʼi ia meʼa fuli ʼe tonu ke kolua teuteuʼi ki tokolua ʼaho ʼohoana. Kae kolua manatuʼi ko tokolua ʼaho ʼohoana, ʼe ko he ʼaho pe ʼe tahi ʼi tokolua maʼuli. ʼE ko te kamataʼaga pe ʼaia ʼo he maʼuli fiafia ʼi takolua tauhi ʼae kia Sehova. Kolua fai ia meʼa fuli ke faigafua pe takolua ʼohoana, pea ke fakamaʼuhigaʼi ai ia Sehova. Kolua falala kia te ia. Kapau ʼe kolua fakaʼaogaʼi ʼana tokoni, ʼe to lelei pe anai te ʼu teuteu ʼae ʼe kolua fai. ʼE kolua fiafia anai moka kolua manatuʼi te ʼaho ʼaia pea ʼe mole kolua fakahemala anai.​—Pes. 37:​3, 4.