“Mthandeni UYehova, Nonke Nina Banyanisekileyo”
Isikhumbuzo Sokufa KukaYesu Siza Kuba NgoAprili 4
1 Kwiminyaka ethile eyadlulayo, xa iUkraine yayisephantsi kolawulo lwamaKomanisi, abasemagunyeni babebabek’ esweni abazalwana—ngokukodwa xa kusondela usuku lweSidlo SeNkosi Sangokuhlwa—benethemba lokufumana indawo abahlanganisana kuyo. Oku kwakusoloko kuyingxaki, kuba abasemagunyeni babewazi owona mhla sasiza kuqhutywa ngawo isikhumbuzo. Babefane bathini ke abazalwana? Ikhaya lomnye udade lalinegumbi elingaphantsi komhlaba elinamanzi. Ekubeni abasemagunyeni babengenakulindela ukuba abantu bahlanganisane apho, abazalwana bakha iqonga lavela kuloo manzi awayesima emadolweni. Nangona kwakufuneka bachophe eqongeni ngenxa yokuba bekufutshane nesilingi, akukho mntu wabaphazamisayo, ibe ibandla lakuvuyela ukuqhuba iSikhumbuzo.
2 Ukuzimisela kwabazalwana bethu baseUkraine ukuthobela umyalelo wokukhumbula ukufa kukaYesu kwakuyimbonakaliso entle yothando lwabo ngoThixo. (Luka 22:19; 1 Yoh. 5:3) Nanini na sijamelana nemiqobo kubomi bethu, ngamana singakhuthazwa yimizekelo efana nale size sizimisele ukubakho kwiSidlo SeNkosi Sangokuhlwa ngoAprili 4. Xa sisenjenjalo, siyabonisa ukuba siyavumelana nomdumisi owavuma ingoma esithi: “Mthandeni uYehova, nonke nina banyanisekileyo bakhe.”—INdu. 31:23.
3 Nceda Abanye Bamthande Ngakumbi UThixo: Ukuthanda uThixo kukwasishukumisela ukuba simeme abanye babe kunye nathi kwesi sikhumbuzo. Isihlomelo soBulungiseleli Bethu BoBukumkani bukaFebruwari sikhuthaze ngamnye wethu ukuba enze uludwe lwabantu aceba ukubamema eSikhumbuzweni. Ngaba ke ukukhuthalele ukumema umntu ngamnye kwabo bakuludwe lwakho? Ziphe ixesha lokubacacisela ukubaluleka kwesi sihlandlo kubo. Ukubakhumbuza ngobubele ngosuku nexesha leSikhumbuzo uze, ukuba kuyimfuneko, ubachazele ukuba unokuza kubalanda kunokubakhuthaza ukuba beze.
4 ESikhumbuzweni, yenza umgudu okhethekileyo wokubabulisa abo bamkele isimemo sethu, uze ubenze bazive bamkelekile. Unokubanceda njani ukuba baluhlakulele uthando lwabo ngoYehova? Kulungele ukuphendula imibuzo abanayo. Kulungele ukucela isifundo seBhayibhile ukuba iimeko ziyavuma. Bameme ukuba beze kwiintlanganiso zebandla zeveki nganye. Abadala baya kufuna ukunikela ingqalelo ekhethekileyo kwabapholileyo abezileyo. Banokulungiselela ukuba baye kubatyelela baze babakhuthaze ukuba babuye ebandleni, mhlawumbi besongezelela kwiingongoma eziye zanikelwa kwintetho yeSikhumbuzo.—Roma 5:6-8.
5 Ukulwenza Nzulu Uthando Lwethu NgoYehova: Ukucinga ngesipho sentlawulelo kunokulwenza nzulu uthando lwethu ngoYehova nangoNyana wakhe. (2 Kor. 5:14, 15) Elinye iNgqina ekukudala lisiya eSikhumbuzweni lathi: “Sisilindela ngolangazelelo iSikhumbuzo. Siya sisiba yinto ekhethekileyo minyaka le. Ndikhumbula ndimi kumzi wabangcwabi kwiminyaka engama-20 eyadlulayo, ndijonge umzimba katata endimthandayo kwaye ngaphakathi entliziyweni ndicinga ngendlela elixabiseke ngayo ilungiselelo lentlawulelo. Lalikade liyinto ethethekayo nje ngaphambili. Kaloku ndandizazi zonke izibhalo nendlela yokuzicacisa! Kodwa ndithe ndakuluva ulwamvila lokufa, intliziyo yam yakuxabisa ngokwenene oko siya kukwenzelwa yiloo ntlawulelo ixabisekileyo.”—Yoh. 5:28, 29.
6 Njengoko usondela umhla wesikhumbuzo salo nyaka, ziphe ixesha lokulungisa intliziyo yakho ukuze ilungele esi sihlandlo. (2 Kron. 19:3) Camngca ngofundo lweBhayibhile olukhethekileyo lweSikhumbuzo, oluboniswe kwincwadi ethi Ukuhlolisisa IZibhalo Imihla Ngemihla—2004 nakwiKhalenda Yowama-2004. Abanye baye bakuvuyela ukuphinda bahlole isahluko 112-16 zencwadi ethi Umntu Obalaseleyo ebudeni besifundo sentsapho. Ukanti abanye benza uphando olongezelelekileyo besebenzisa iincwadi ezinceda ekufundisiseni ezilungiselelwe ludidi lwekhoboka elithembekileyo neliyingqondi. (Mat. 24:45-47) Sonke sinako ukusikhankanya esi sipho sentlawulelo kwimithandazo yethu enyanisekileyo. (INdu. 50:14, 23) Ewe, ebudeni beSikhumbuzo salo nyaka, ngamana singaqhubeka sicinga ngendlela uYehova asithanda ngayo size sifune iindlela zokubonisa thando lwethu kuye.—Marko 12:30; 1 Yoh. 4:10.