Girdi’ Rok Jehovah Ni Kar Sulod Nga Rogon E Yad Ma Yog E Sorok Ngak U Fayleng Iyan
“Gu ra thilyeg e thin rok e girdi’ ya nge machalbog e thin rorad ni fan e nge yog rorad ni ngar pininged e ngochol rok Jehovah.”—ZEPHANIAH 3:9.
1. Mang fan ni ke lebug fare pufthin u daken yu Judah nge yugu boch e nam?
RIB GEL e pufthin rok Jehovah ni i thagthag nga laniyan’ Zephaniah ni nge yoloy nga but’! I lebug e pi thin nem u daken e nam nu Judah nge tochuch rok ni Jerusalem ni bochan e de rin’ e pi tolang nge pi girdi’ e pi n’en nib m’agan’ Jehovah ngay ni ngan rin’. Ki damumuw Got ngak e pi nam nu Filistia nge Moab nge Ammon. Mang fan? Bochan e ur togopuluwgad ni bokum miriay e duw ngak e girdi’ rok Jehovah. Ma ku aram fan ni ngan gothey Assyria ma dabi for biyay.
2. Kan non ngak mini’ u Zephaniah 3:8?
2 Machane ka bay boch e girdi’ ni yad mmat’aw u Judah kakrom. I l’agan’rad ko fare gechig nra aw ngak e piin nib kireb. Kan non ngak e pi girdi’ nib kireb nem ni gaar: “Ba aray e thin rok Jehovah ni gaar: “Mu sonnaged gag ya gu ra yib ko chirofen ni ngan kunuy e chugum, ya kug turguy ni nggu kunuy e pi nam, ma gu ra kunuy e pi am ni fan e gu ra puog nga dakenrad e pufthin rog, ara urngin e damumuw rog; ya bay nthang e fayleng nga nifiyen e pasigan’ rog.””—Zephaniah 3:8.
“Thin Nib Machalbog” Ni Fan Ngak Mini’?
3. Mang thin nib fel’ ni ka nog ngak Zephaniah ni nge weliy?
3 Arrogon, i weliy Zephaniah e thin rok Jehovah u morngaagen e mogothgoth. Machane ki weliy fare profet ban’en ni ngan athapeg—reb e thin ni ra fl’eg laniyan’ e piin nib yul’yul’ ku Jehovah. I yog Jehovah u Zephaniah 3:9 ni gaar: “Gu ra thilyeg e thin rok e girdi’ ya nge machalbog e thin rorad ni fan e ngar pininged e ngochol rok Jehovah ni yad gubin, ma ngar pigpiggad ngak u taabang.”
4, 5. (a) Mang e ra buch rok e piin nde mat’aw? (b) Mini’ e ra fel’ rogorad ni bochan, ma mang fan?
4 Ra moy boch e girdi’ ni dab ni pi’ fare thin nib machalbog ngorad. I weliy fare profet u morngaagrad ni gaar: “Gu ra chuweg u fithik’med e piin nib tolangan’rad.” (Zephaniah 3:11) Ere bay ni chuweg e piin nib tolangan’ ni dubrad e pi motochiyel rok Got ma yad ma rin’ e tin nde mat’aw. Ma chon mini’ e ra fel’ rogorad riy? I gaar Zephaniah 3:12, 13: “I gag Jehovah e gu ra pag ni nge par u fithik’med e piin nib sobut’an mi yad manab nga fithngan Jehovah. Ma piin ni yad ra magay rok piyu Israel e dab ra rin’ e tin nde mat’aw, maku dab ra lifith l’iginrad ma dab ra uned ko sasalap; ya yad ra abich ma yad ra mol ma dariy be’ nra k’aring e marus ngorad.”
5 Ra flaab e piin ni yad ra magay u Judah kakrom. Mang fan? Ya kar folgad ko fare thin ni gaar: “Mu gaweged Jehovah, gimed e piin nib sobut’an’ nu fayleng, ni gimed ma fol ko pi motochiyel rok. Mu gaweged e tin nib mat’aw ban’en, mu gaweged e sobut’an’. Sana ngan mithagmed ko chirofen ni damumuw rok Jehovah.”—Zephaniah 2:3.
6. Mang e buch ko yay nsomm’on ni ke lebug e thin rok Zephaniah?
6 Yay ni somm’on ni ke lebug e thin rok Zephaniah ni profet, i gechignag Got e piin nde yul’yul’ nu Judah me pag piyu Babylon ni ngar gelgad ngak mar feked nib kalbus ko 607 B.C.E. Boch i yad e kar magaygad nib fas ni bod Jeremiah, ma boch i yad e ur yul’yul’gad ngak Jehovah ni yad ba kalbus u Babylon. Nap’an fare duw ni 539 B.C.E. ke gel piyu Mede nge piyu Persia u tan Cyrus ni pilung ngak yu Babylon. Gonapan l’agruw e duw nga tomren me pi’ Cyrus e thin ni nge sul yu Jew nga taferad. Munmun min toy e tempel u Jerusalem biyay, me yog rok e pi prist ni ngar machibnaged e Motochiyel ngak e girdi’. (Malachi 2:7) I flaabnag Jehovah e girdi’—faanra ur yul’yul’gad.
7, 8. I riyul’ fare thin u Zephaniah 3:14-17 u daken chon mini’, ma mang fan ni kam fulweg ni aram rogon?
7 I weliy Zephaniah u morngaagen e piin ni yad ra flaab u nap’an nsulweg e nam nga rogon. I gaar: “Mu tolul u fithik’ e falfalan’, i gur fare rugod ni fak Zion! Mu tolulnaged e falfalan’, O Israel! Mu falfalan’ u fithik’ gumerchaem, i gur fare rugod ni fak Jerusalem! I chuweg Jehovah fare gechig u dakenam. Ke tuluf e toogor rom. Jehovah ni pilung rom e ma par u fithik’med. Dabku mu rusnag e riya’ biyay. Chirofen nem e yira gaar ngak yu Jerusalem: “Dabku mu rus, O Zion. Dabi war pa’med. Jehovah ni Got rom e bay u fithik’med. Ra ayuwegem ya ir e Ani Ga’. Ra falfalan’ ngom. Ra t’ufegem ni dariy bugithin ni be yog. Ra falfalan’ ngom ni be non u fithik’ e falfalan’.”—Zephaniah 3:14-17.
8 Ke riyul’ e thin ko profet u daken e piin ni kar chuwgad ko kalbus u Babylon mar sulod ko binaw rorad. Ke tamilang ni aram rogon ko Zephaniah 3:18-20 ni gaar: “Piin ni ke kireban’rad ni dar uned ko pi madenom rom, i gag Jehovah e gu ra kunuyrad nga taabang, dar moyed u fithik’am ni bochan e gafgow ni gechig rok. Ma chiney e gu ra ayuwegem rok urngin e piin ni be gafgownagem; ma gu ra ayuweg e ani ba mugutgut, ma ani kan wereg e gu ra kunuy nga taabang. Yira yog e sorok ngak ma ra fel’ fithngan u lan e binaw ni ke tamra’ riy. Ngiyal’ i n’em e gu ra kunuymed nga taabang. Ya gu ra taymed ni ngan nog e sorok ngomed u fithik’ e pi nam nu fayleng u nap’an ni gu ra kunuy nga p’eowchem e girdi’ rom ni kan kalbusnagrad.” Aray rogon e thin rok Jehovah.”
9. Uw rogon ni kan pining e sorok ngak Jehovah ni bochan e n’en ni buch rok yu Judah?
9 Amu lemnag fene gin e pi nam ni yad e toogor rok e girdi’ rok Got! Kan fek e girdi’ nu Judah nib kalbus nga Babylon ni dariy e athap rorad ni ngan pithigrad. Me par e binaw rorad ni dakuriy e girdi’ riy. Machane min sulwegrad nga taferad u tomren 70 e duw u gelngin Got, machane pi nam ni toogor rorad e bay ni thangrad. Ka nog e sorok ngak Jehovah ni bochan e n’en ni rin’ ni fan ngak e girdi’ rok ni yad ba yul’yul’! Ke “tayrad ni ngan nog e sorok ngorad u fithik’ e pi nam nu fayleng.” Ka nog e sorok ngak Jehovah nge fapi girdi’ ni bay e ngochol rok u dakenrad ni bochan e kan sulwegrad nga rogon!
Kan Tolangnag E Liyor Ngak Jehovah
10, 11. Wuin e ra lebug e thin rok Zephaniah u morngaagen e piin ni ngan sulwegrad nga rogon, ma uw rogon ni gad manang ni aram rogon?
10 Kun sulweg e girdi’ rok Got nga rogon u nap’an e bin somm’on e chibog ni ka nap’an Jesus u nap’an ni i kunuy Jesus Kristus boch e girdi’ nu Israel ni ngar liyorgad ngak Jehovah nga rogon. N’en ni buch e ngiyal’ nem e be yip’ fan ban’en ni ra buch ba ngiyal’, ya ra lebug e thin rok profet ko ngiyal’ ni bay nga m’on. I yog Micah ni profet ni gaar: “Tin ni bay fini yib e rran e fare burey ni bay e tempel riy e bayi par ni ir e th’abi tolang u fithik’ e burey. Girdien pire’ e nam e bay ra thelepgad ngay.”—Micah 4:1.
11 Wuin e ra riyul’ e re thin ney? I yog e profet ni ra riyul’ ko “tin ni bay fini yib e rran”—arrogon “tin tomren e rran” ney. (2 Timothy 3:1) Ra riyul’ u m’on ni ra m’ay e re m’ag nib kireb ney u nap’an ni be meybil e pi nam ngak e pi got rorad ni yugu ban’en. Be gaar Micah 4:5: “Ra reb e nam ma yad be meybil ma yad be fol rok e birorad e kan.” Ma uw rogon e piin ni yad ma meybil ngak Got nrogon? Be gaar Micah: “Machane gadad e bay uda meybilgad ngak Somol ni Got rodad ma gad be fol rok ndariy n’umngin nap’an.”
12. Uw rogon ni kan tolangnag e bin riyul’ e liyor ngak Got e ngiyal’ ney ko tomur?
12 Nap’an e tin tomren e rran ney ma “fare burey ni bay e tempel riy e bayi par ni ir e th’abi tolang u fithik’ e pi burey.” Bin riyul’ e liyor ngak Got e kan sulweg nga rogon, kan duguliy, ma kan tolangnag nib tolang u fithik’ urngin e pi yurba’ i teliw. I yog Micah ni “pire’ e nam e bay ra thelepgad ngay.” Ma piin ni yad be fol ko bin riyul’ e teliw e yad “ra yan u fithngan Jehovah ni Got rorad ni dariy n’umngin nap’an ara manemus.”
13, 14. Wuin e ke tabab e “tin tomren e rran” ko re fayleng ney, ma uw rarogon e bin riyul’ e liyor ngak Got ni ka nap’an e ngiyal’ nem?
13 Pi n’en ni ke buch nrogon ni yog e profet u Bible e ma micheg ni be par e fayleng to “tin tomren e rran” ni ka nap’an e 1914. (Mark 13:4-10) Chep ko girdi’ e be dag ni ke tabab Jehovah i kunuy e tin ni ke magay e girdi’ ni kan duguliyrad ko kan ni thothup ni ngar pared u tharmiy. Ma aram e kan kunuy fare “ulung ni baga’ . . . nra bad u gubin e nam nge ganong nge gubin mit e girdi’, ngu gubin e thin” ni yad e piin ni yad be athapeg e yafas ni manemus u fayleng.—Revelation 7:9.
14 Ka nap’an e World War I nge mada’ ko chiney ma ke mon’og e liyor ku Jehovah ma ir e ke ayuweg e piin ni bay e ngochol rok u dakenrad. In biyu’ urngirad u tomren e World War I, machane chiney e gonapan nel’ million urngin e piin ni ma liyor ku Jehovah ma bay 91,000 e ulung rorad u lan 235 e nam. Gubin e duw ma ke pag reb e billion e awa ni yad ma machibnag Gil’ilungun Got. Rib tamilang ni Pi Mich Rok Jehovah e yad e piin ni be lebguy fare thin rok Jesus ni gaar: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.”—Matthew 24:14.
15. Uw rogon ni ke lebug e thin u Zephaniah 2:3 e ngiyal’ ney?
15 Be gaar Zephaniah 3:17: “Jehovah ni Got romed e bay u fithik’med. Ir e Ani Ga’, ma ir e ra ayuwegmed.” Ba fel’ rogon e pi tapigpig rok Jehovah e ngiyal’ ney ni bochan e “bay Jehovah u fithik’rad” ma ir e Got rorad ni th’abi gel. Riyul’ e re thin ney e ngiyal’ ney ni bod rogon ni ba riyul’ u Judah kakrom nap’an ni kan sulwegrad nga rogon ko duw ni 537 B.C.E. Ere kada filed rogon ni ke lebug fare thin u Zephaniah 2:3 ko ngiyal’ ney faani gaar: “Mu gaweged Jehovah gimed e piin nib sobut’an u fayleng.” Nap’an fare duw ni 537 B.C.E. fare bugithin ni “gimed” e be yip’ fan urngin e girdi’ ni Jew ni kar chuwgad u Babylon mar sulod nga Israel. Ngiyal’ ney e yad be yip’ fan e piin nib sobut’an ko urngin e nam u ga’ngin e fayleng ni yad be fol ko fare machib u morngaagen Gil’ilungun Got ma yad be yan ko “fare burey ni bay tafen Jehovah riy.”
Ke Fel’ Rogon E Bin Riyul’ E Liyor
16. Uw rogon laniyan’ e pi toogor rodad ni yad be guy e fel’ rogon ko pi tapigpig rok Jehovah e ngiyal’ ney?
16 Nap’an fare duw ni 537 B.C.E. ma ke gin e pi nam u charen piyu Israel ni ke sul e pi tapigpig rok Got nga taferad ni ngar liyorgad ngak e Got rorad. Machane flaab ni yib ngorad e gathi ri baga’ yang. Rayog ni ngam lemnag e n’en ni be yog e girdi’—nib muun e pi toogor rok e girdi’ rok Got ngay—u nap’an ni yad be guy e mon’og nge fel’ rogon rok e pi tapigpig rok Jehovah e ngiyal’ ney? Dabi siy ni taareb rogon e thin rorad ko thin rok e Farise ni yad be guy e girdi’ ni boor ni yad be yib ngak Jesus. I lungurad: “Amu guyed, ke thum e girdi’ nu fayleng yad be lek!”—John 12:19.
17. Mang e i yog be’ u morngaagen e Pi Mich Rok Jehovah, ma uw rogon ni kar mon’oggad?
17 U lan e babyor rok ni These Also Believe, I yog Charles S. Braden ni gaar: “Be machib e Pi Mich Rok Jehovah u fayleng iyan. Dariy barba’ i teliw ni be machib nib pasigan’rad ngay ma yad be athamgil ngay ni bod rogon e Pi Mich Rok Jehovah ni yad be wereg fare thin nib fel’ u morngaagen Gil’ilungun Got. Rib gel e raba’ i teliw ney ma ku ra gel iyan.” Rib puluw e thin rok! Ya i yoloy e re thin nem ni 50 e duw faram u nap’an ni ke mus ni 300,000 e Pi Mich Rok Jehovah ni yad be machib u fayleng iyan. Mang e ra yog e chiney ni ke mun 20 yay urngirad—ni yad nel’ million—ni yad be machibnag fare thin nib fel’?
18. Mang fare thin nib machalbog, ma chon mini’ e ke pi’ Got fare thin nib machalbog ngorad?
18 I micheg Got u daken e profet rok ni gaar: “Gu ra thilyeg e thin rok e girdi’ nge machalbog e thin rorad ni fan e ngar pininged e ngochol rok Jehovah ma ngar pigpiggad ngak u taabang.” (Zephaniah 3:9) Ngiyal’ ney ke mus ni Pi Mich Rok Jehovah ni yad ma pining e ngochol rok Jehovah ma yad ma pigpig ngak u taabang ni ba taareban’rad ma t’ufeg e ma chagiyrad nga taabang. Yad e piin ni ke thilyeg Jehovah e thin rorad nge machalbog. Ba muun e tamilangan’ u morngaagen Got nge tin nib m’agan’ ngay ko re thin nib machalbog ney. Ke mus ni Jehovah ni rayog rok ni nge pi’ e re tamilangan’ ney u daken e kan ni thothup rok. (1 Korinth 2:10) Ke pi’ Got e kan ni thothup ngak mini’? Ke pi’ ngak e “piin ni yad ma fol rok Got.” (Acts 5:32) Ke mus ni Pi Mich Rok Jehovah ni yad ma fol rok Got u gubin ban’en. Aram fan ni kan pi’ e kan ni thothup rok Got ngorad ma yad manang fare thin nib machalbog ni thin nib riyul’ u morngaagen Jehovah nge tin nib m’agan’ ngay. Yad ma fanay fare thin nib machalbog ni ngar pininged e sorok ngak Jehovah u ga’ngin yang e fayleng.
19. Mang e kub muun ko fare thin nib machalbog?
19 Ngan non ko fare thin nib machalbog e gathi goo nge mich fare machib nriyul’ u wan’uy ma ngan weliy fare machib ngak yugu boch e girdi’, ya kub muun ngay ni nge puluw e ngongol ko pi motochiyel rok Got. Pi Kristiano ni kan duguliyrad ko kan ni thothup e yad ma gaweg Jehovah mi yad non ko fare thin nib machalbog. Amu lemnag urngin ban’en ni rin’ e pi girdi’ ney! Yugu aram rogon ni ke lich e piin ni kan duguliyrad ko kan ni thothup, ni yad ba lich ko 8,700, machane bay nel’ million e girdi’ ni yad be fol wok rorad ni ku yad be gaweg Jehovah mi yad non ko fare thin nib machalbog. Pi girdi’ ney e yad girdien fare ulung ni baga’ ni kar bad ko urngin e nam ni ke mich e biyul rok u wan’rad, ma yad ma pigpig ngak u fayleng u lan e tempel rok Got nib spiritual, ma yad ra magay nib fas ko fare “gafgow ni baga’ ” ni ra yib ni dabi n’uw nap’an u daken e re m’ag nib kireb ney.—Revelation 7:9, 14, 15.
20. Mang e ka bay nga m’on rok e piin ni kan duguliyrad ko kan ni thothup nge girdien fare ulung ni baga’?
20 Ra un e re ulung ni baga’ ney nga lan fare m’ag rok Got nib biech mab mat’aw. (2 Peter 3:13) Jesus Kristus nge fare 144,000 e piin ni kan duguliyrad ni kan fasegrad ko yam’ mi yad un nga tharmiy ni ngar manged pilung nge prist u taabang rok Kristus e yad ra mang e am ko fayleng. (Roma 8:16, 17; Revelation 7:4; 20:6) Ma piin ni yad ra magay nib fas ko fare gafgow ni baga’ e yad ra paradisnag e fayleng ma yad ra i non ko fare thin nib machalbog ni ke pi’ Got ngorad. Rayog ni ngan fanay fare thin ngorad ni gaar: “I gag e bay gu machibnag e girdi’ rom, mu gu pi’ e fel’ rogon nge gapas ngorad. Ngongol nib yal’uw ma mmat’aw e bayi gelnigem.”—Isaiah 54:13, 14.
Bin Th’abi Gel E Machib Ni Kan Tay Ni Ka Nap’an E Girdi’
21, 22. (a) Rogon e thin ni bay ko Acts 24:15, mini’ e thingar ni machibnag fare thin nib machalbog ngorad? (b) Mang e bin th’abi ga’ e machib ni yira tay ni ka nap’an e girdi’ u fayleng u tan Gil’ilungun Got?
21 Bay ba ulung e girdi’ ni baga’ ni rayog rorad ni ngar filed fare thin nib machalbog u lan fare m’ag nib biech. I weliy Acts 24:15 u morngaagrad ni gaar: “Bayi faseg Got e girdi’ ko yam’ ni tin nib mat’aw nge tin nde mat’aw.” Bokum billion e girdi’ kakrom ni kar m’ad ma dar nanged Jehovah. Ra faseg Got e pi girdi’ ney nrogon ni ba yaram. Ma thingar ni fil fare thin nib machalbog ngak e piin ni kan fasegrad.
22 Rib taw’ath e piin nra un ko re maruwel nib gel nem ni ngan machibnag e pi girdi’ nem! Aram e bin th’abi ga’ e skul ni yira tay ni ka nap’an e girdi’. Ma ngan rin’ e re machib ney u daken e gagiyeg rok Kristus Jesus u Gil’ilungun. Ma aram e ra guy e girdi’ fare thin u Isaiah 11:9 ni ke lebug ni gaar: “Girdi’ nu fayleng e ri bayi tamilangan’rad u murung’agen Somol ni bod rogon lan e yungi day nib sug ko day.”
23. Mang fan ni gad ba taw’ath ni gad e girdi’ rok Jehovah?
23 Ri gad ba taw’ath ni gad be par ko tin tomren e rran ni gad be fl’eg rogodad ko ngiyal’ i n’em ni yira nang Jehovah u ga’ngin yang e fayleng. Ma ri gad ba taw’ath e chiney ni gad e girdi’ rok Got ma gad be guy ni ke lebug fare thin u Zephaniah 3:20! I micheg Jehovah ni gaar: “Gu ra gilnag bugumed u fithik’ e girdi’ nu fayleng mi yira yog e sorok ngomed.”
Uw Rogon Ni Ga Ra Fulweg?
• Uw rogon ni ke lebug e thin rok Zephaniah u rogon ni nge sul e girdi’ rok Got nga rogon?
• Uw rogon ni ke fel’ rogon e bin riyul’ e liyor ngak Got e ngiyal’ ney ko tomur?
• Mang machib ni baga’ ni yira tay u lan fare m’ag nib biech?
[Picture on page 18]
Kan sulweg e girdi’ rok Jehovah nga taferad ni ngar liyorgad ngak nrogon. Ga manang ko mang e be yip’ fan e ngiyal’ ney?
[Pictures on page 20]
Ma non e Pi Mich Rok Jehovah ko fare “thin nib machalbog” mi yad ayuweg e girdi’ ko thin nib fel’ u Bible