Uw Rogon Ni Ngad Pared Ni ‘Ke L’agan’dad Ngak Got Ma Gad Be Sonnag’?

1. Mang fan nrayog ni nge mo’maw’ ni ngad gum’an’gad?

NAP’AN ni tabab Gil’ilungun fare Messiah ko gagiyeg ko duw ni 1914, ma aram e ngiyal’ ni tabab e tin tomuren e rran ko re m’ag rok Satan ney. Ma nap’an nni mahl u tharmiy, me yon’ Jesus Moonyan’ nge pi engel rok nga fayleng. (Mu beeg e Revelation 12:7-9.) Manang Satan “ndaki n’uw nap’an ni nge par.” (Rev. 12:12) Machane, ke yoor e duw ni ke “par” Satan, ere sana bay boch i gadad ni be lemnag ni ke pag nap’an ni ngan thang e re m’ag ney. Mang fan nrayog ni nge mo’maw’ ni ngad gum’an’gad u nap’an ni gad be sonnag e ngiyal’ nra thang Jehovah e re m’ag rok Satan ney?

2. Mang e gad ra weliy ko re article ney?

² Faanra dab ud gum’an’gad ma rayog ni ngad rin’ed boch ban’en ndad lemnaged nib fel’ rogon. Ere, uw rogon nrayog ni ngad pared ni ke l’agan’dad ngak Got ma gad be sonnag? Re article ney e be weliy e fulweg ko pi deer ni baaray, ma ireray e pi n’en nra ayuwegdad. (1) Mang e gad ra fil u murung’agen e gum’an’ ko n’en ni rin’ Mikah ni profet? (2) Mang boch ban’en nra buch ni nge m’ug riy ni ke chugur e tomur? (3) Uw rogon ni ngad daged ni gad be pining e magar ngak Jehovah ni ka be gum’an’ u puluwdad?

MANG E GAD RA FIL KO N’EN NI RIN’ MIKAH?

3. Mang boch ban’en ni i buch u Israel u nap’an Mikah?

³ Mu beeg e Mikah 7:2-6. I guy Mikah ni ir reb e profet ndaki yul’yul’ piyu Israel ngak Jehovah, ma nap’an e gagiyeg rok Ahaz ni Pilung mi ri gel e kireb rorad. I taarebrogonnagrad Mikah nga “nochi ke gek’iy nib sug ko rachangal.” Rib gel e gafgow ni ur ted ko girdi’, ere aram fan ni yad bod nochi ke gek’iy nib sug ko rachangal nrayog ni ngan maad’ad ngay. Ki mada’ ko girdi’ u lan e tabinaw ma dakurur t’ufeged yad. Nap’an ni nang Mikah ndakuriy ban’en nrayog ni nge rin’ ni nge ayuwegrad, ma aram me meybil ngak Jehovah nge weliy laniyan’ ngak. Ngemu’ me sonnag ni nge rin’ e tin nib t’uf ni nge rin’. Ba pagan’ Mikah nra taleg Jehovah e pi n’em ni be buch ko ngiyal’ ni ke dugliy.

4. Mang boch e magawon ni gad ma mada’nag?

⁴ Taareb rogodad ngak Mikah, ya ku gad be par u fithik’ bogi girdi’ ni yigoo yad e yad be lemnaged yad. Boor e girdi’ ni ‘dakurur pininged e magar ngak be’ u lanin’rad, ma dakurur liyorgad ngak Got; ma dakurur golgad.’ (2 Tim. 3:2, 3) Ma mochuch lanin’dad u nap’an ni gad ra guy e piin ni gadad nga maruwel, nge skul, nge pi buguli yoror rodad ni yigoo yad e yad be lemnaged yad. Ku bay boch e tapigpig rok Got ni ku yad ma mada’nag boch e magawon ni kab gel e mo’maw’ riy ko tiney. I yog Jesus nra mada’nag pi gachalpen e togopuluw u lan e tabinaw. N’en ni yog e taareb rogon ko fapi thin ni bay ko Mikah 7:6. I yog ni gaar: “Ku gub ni nggu pingeg e bitir ni pumoon ngar togopluwgad ngak e chitamangirad, ma ku er rogon e bitir ni ppin ni ngar togopluwgad ngak e chitiningrad, nge leengin be’ ngak e chitiningin figirngin; pi toogor rok be’ nth’abi ga’ e ra yan i aw ni girdi’ nu lan e tabinaw rok.” (Matt. 10:35, 36) Rib mo’maw’ ni ngad k’adedan’dad ko moning nge togopuluw ni ma tay chon e tabinaw rodad ngodad nde taareb e michan’ rodad. Faanra gad be mada’nag e mit ney e skeng, ma susun dabi mulan’dad, ya ngad pared ni gad ba yul’yul’ ngak Jehovah ma gad gum’an’niged gadad ngad sonnaged e ngiyal’ nra chuweg e magawon rodad. Faan gad ra ning e ayuw ngak ni gubin ngiyal’, ma ra pi’ gelngidad miki pi’ e gonop ngodad nge yag nda athamgilgad.

5, 6. Uw rogon ni ke tow’athnag Jehovah Mikah, ma mang boch ban’en nde guy ni lebug?

⁵ I tow’athnag Jehovah Mikah ni bochan e i par ni be gum’an’. Immoy Mikah u nap’an ni yim’ Ahaz ni Pilung ngu nap’an ni mus e gagiyeg rok. Ku immoy u nap’an ni yan Hezekiah ni fak Ahaz nga lon me sulweg e bin riyul’ e liyor nga rogon. Ki guy Mikah rogon ni lebug e n’en ni yoloy u murung’agen piyu Samaria u nap’an ni cham piyu Assyria ko fare ganong nu Israel ni bay ko lel’uch.​—Mik. 1:6.

⁶ Machane, bay boch e yiiy ni thagthagnag Jehovah nga laniyan’ Mikah nde guy ni lebug. Bod ni, yoloy ni gaar: “Tin ni bay fini yib e rran e fare burey ni bay e tempel riy e bayi par ni ir e th’abi tolang u fithik’ e burey. Girdien pire’ e nam e bay ra thelepgad ngay ma bayi lungurad, ‘Nga darod nga daken fare burey rok Somol.’” (Mik. 4:1, 2) I yim’ Mikah u m’on ni nge lebug e re yiiy ney. Yugu aram rogon ma ke dugliy u wan’ ni yugu demtrug e n’en nra i rin’ e girdi’ u tooben ma ra par nib yul’yul’ ngak Jehovah nge mada’ ko ngiyal’ nra yim’. I yoloy ni gaar: “Ra reb e nam ma yad be meybil ma yad be fol rok e birorad e kan, machane gadad e bay ud meybilgad ngak Somol ni Got rodad ma gadad be fol rok ndariy n’umngin nap’an.” (Mik. 4:5) Bochan ni ke pagan’ Mikah ngak Jehovah nra lebguy urngin e tin ni ke micheg, ma aram fan ni ke yag rok ni nge gum’an’nag ir nge son ni yugu aram rogon nib mo’maw’ e par e ngiyal’ nem. I par ni be pagan’ ngak Jehovah.

7, 8. (a) Mang fan nrayog ni nge pagan’dad? (b) Mang e ngad rin’ed me yan e tayim nib papey?

⁷ Ma pagan’dad ngak Jehovah ni bod rogon Mikah, fa? Bay fan ni nge pagan’dad ngak, ya kad guyed ni ke lebug e yiiy rok Mikah. Bokum milyon e girdi’ ni kar bad u gubin e nam, nge ganong, nge thin e ‘ka ranod nga daken fare burey rok Somol’ ko ngiyal’ ney ko tin tomuren e rran. Yugu aram rogon ni kar bad u boch e nam ni yad ba tathil, ma kar pirdiiyed e pi sayden rorad kar “ngongliyed talin e maruwel riy ni ma gi’ e but’,” ma dakurur “fal’eged rogorad bayay ni ngar mahlgad.” (Mik. 4:3) Ri gad ba tow’ath ni gad ba muun ko girdi’ rok Jehovah ni bay e gapas u thilrad.

⁸ Gad gubin ni gad baadag ni nge thang Jehovah e re m’ag nib kireb ney. Machane, faanra ngad gum’an’gad ngad sonnaged Jehovah, mab t’uf ni ngaud lemgad ni bod rogon ni ma lem. Ke dugliy e rofen nra pufthinnag urngin e girdi’ u daken Jesus Kristus ni “be’ nib moon ni ir e ke dugliy.” (Acts 17:31) Machane, chiney ni ka dawori taw ko re rran nem e ka be ayuweg Got gubin mit e girdi’ ni “ngar nanged e tin nib riyul’,” mi yad fol riy, mi yad thap ngak. Dab da paged talin ni yafas ko girdi’ e bay u tayoyowol. (Mu beeg e 1 Timothy 2:3, 4.) Faan gad ra tedan’dad ngad ayuweged e girdi’ ngar nanged murung’agen Got, ma ra bod nib papey ni gad be chugur i yan ko fare rran ko pufthin rok Jehovah. Ma nap’an nra yib e tomur ma gad ra felfelan’ ni kad tedan’dad ko machib.

MANG BOCH BAN’EN NRA BUCH NI NGE DAG NI KE CHUGUR KO TOMUR?

9-11. Ke lebug fare thin ni bay ko 1 Thessalonika 5:3, fa? Mu weliy fan.

⁹ Mu beeg e 1 Thessalonika 5:1-3. Dab ki n’uw nap’an me yog e pi nam ni “Ke gapas ndariy ban’en nra buch!” Faanra dubdad ni ngan bannagdad ko re bugithin ney, mab t’uf ni “nguud pired ni gadad be od ma ba tamilangan’dad.” (1 Thess. 5:6) Chiney e ngad weliyed boch ban’en ni ke buch ni be dag ndab ki n’uw nap’an ma gad rung’ag ni ka nog e re thin ney.

¹⁰ Tomuren fa gal nsom’on e mahl nni tay u fayleng, ma baadag e pi nam u fayleng ni nge yib e gapas. Tomuren e bin som’on e mahl, me sum fare League of Nation ni bochan ni yibe athapeg nre ulung ney e ra yibnag e gapas nga fayleng. Boch nga tomuren u nap’an ni ke m’ay e bin l’agruw e mahl me lemnag e girdi’ nra yibnag e United Nation e gapas nga fayleng. Kab kafram i yib ni ma pagan’ e pi am nge pi tayugang’ ko pi yurba’ i teliw ko gal ulung ney. Bod nnap’an e duw ni 1986 me dugliy e United Nation ni aram e re duw ni nge par Ga’ngin Yang e Fayleng nib Gapas. Nap’an e re duw nem ma boor e tayugang’ ko am nge pi yurba’ i teliw nra mada’gad e en nib ga’ ko teliw ko Katolik nga Assisi u Italy ni ngar yibilayed e gapas.

¹¹ Machane, re n’ey e de lebguy fare thin ni bay ko 1Thessalonika 5:3 ni be weliy murung’agen e ngiyal’ ni ke gapas ndariy ban’en nra buch. Mang fan? Ya dawori “taw e riya’” ngodad.

12. Mang e gad manang u murung’agen fare thin ni “ke gapas ndariy ban’en nra buch”?

¹² Mini’ e ra yog ni “Ke gapas ndariy ban’en nra buch”? Uw rogon nib l’ag e pi tayugang’ ko Pi Yurba’ i Teliw ko Kristiano ni Googsur nge ku boch e teliw ko re n’ey? Ma uw rogon nib l’ag e pi am ngay? Der yog e Bible. Kemus ni n’en ni gad manang e demtrug rogon ni yira yog e re bugithin ney nge rogon nra mich u wan’ e girdi’, machane de riyul’. Ra taw ko ngiyal’ nem ma Satan e ir e ka be gagiyegnag e re fayleng ney. Ke gel e kireb ko re fayleng ney, ma gad manang ni dabi thil. Ere, rib gel e kireban’ riy ni faanra dab da pared u mathilin ngongolen e am, me mich e pi ban rok Satan u wan’dad.

13. Mang fan ni ka be taleg e pi engel fa aningeg i nifeng ko magothgoth?

¹³ Mu beeg e Revelation 7:1-4. Chiney ni ka gad be sonnag e ngiyal’ nra lebug fare thin ni bay ko 1 Thessalonika 5:3, e ka be taleg e pi engel fa aningeg i nifeng ko magothgoth ni fan ko fare gafgow nib ga’. Mang e yad be sonnag? Ke yog apostal John nsom’on e thingar ni tay e pow nga peri’ urngin e “pi tapigpig rok e Got rodad.”a Nap’an ni yira mu’ i tay e pow nga peri’ urngin e piin ni kan dugliyrad, ma aram me pag fapi engel e re aningeg i nifeng ney. Mang e ra buch ko ngiyal’ nem?

14. Mang e be dag ni ke chugur ni ngan thang fare Babylon nib Gilbuguwan?

¹⁴ Yira thang fare Babylon nib Gilbuguwan ni aram e pi yurba’ i teliw ni googsur. “Gubin mit e girdi’, nge yu ulung i girdi’ ni pire’, nge girdi’ ni yib ko pi nam, nge gubin e thin” e dariy bagayad nrayog ni nge ayuweg ko magothgoth ni yira tay ngak. Chiney e gad be guy e pow riy ni ke chugur ni ngan thang. (Rev. 16:12; 17:15-18; 18:7, 8, 21) Bin riyul’ riy, e ngiyal’ ney e ma gathibthibnag girdien e news e pi yurba’ i teliw nge pi tayugang’ riy. Yugu aram rogon ma be lemnag e pi tayugang’ ko pi yurba’ i teliw ni kab fel’ rogorad ndariy ban’en nra buch rorad. Machane, ri yad be oloboch! Tomuren ni yira yog ni “Ke gapas ndariy ban’en nra buch!” ma ra chel e pi am nge thang e pi yurba’ i teliw ni googsur, me chuw ndakuriy biid nra sum bayay. Ere, riyul’ ni bay rogon ni ngad gum’an’gad ngad sonnaged e pi n’ey ni nge buch.​—Rev. 18:8, 10.

UW ROGON NI NGAD DAGED NI GAD BE PINING E MAGAR NGAK JEHOVAH NI KA BE GUM’AN’ U PULUWDAD?

15. Mang fan ni be gum’an’ Jehovah u puluwdad?

¹⁵ Yugu aram rogon ni be darifannag e girdi’ fithingan Jehovah, machane be sonnag e ngiyal’ nib puluw ni nge thang e piin nib kireb. Dabun Jehovah ni nge thang e piin ni yad baadag ni ngar nanged e tin riyul’. (2 Pet. 3:9, 10) Aram rogon e lem rodad, fa? U m’on ni nge yib fare rran rok Jehovah, ma baaray boch e kanawo’ nrayog ni ngad daged riy ni gad be pining e magar ngak ko gum’an’ ni be tay u puluwdad.

16, 17. (a) Mang fan ni ngad ayuweged e piin ni kar talgad ni dakurur uned ko muulung nge machib? (b) Mang nrib ga’ fan ni nge sul e pi girdi’ ney ngak Jehovah?

¹⁶ Ngan ayuweg e piin ni kar talgad ni dakurur uned ko muulung nge machib. I yog Jesus nib ga’ e felfelan’ ni yira tay u tharmiy ni bochan taab saf ni kan pirieg. (Matt. 18:14; Luke 15:3-7) Ere, ba tamilang nri ma lemnag Jehovah e piin ni kar daged ni yad ma tayfan fithingan ni yugu aram rogon ni dakurur uned ko muulung nge machib e chiney. Ra felfelan’ Jehovah nge pi engel rok ni faan gad ra ayuweg e pi girdi’ ney ngar sulod ko ulung bayay.

¹⁷ Gur bagayad e pi girdi’ nem, fa? Sana bay be’ u lan e ulung ni ke rin’ ban’en ni dabum ma kam tal ni dakumur un ko muulung. Sana ke n’uw nap’an ni kam tal ko muulung, ere ngam fithem ni nge lungum: ‘Ke fel’ boch e par rog e chiney ko kafram, fa? Ba gel e felfelan’ ni gu be tay e chiney ko kafram, fa? Mini’ e ke rin’ ban’en ni dabug, Jehovah fa be’ ndawori flont? Bay bayay ni ke rin’ Jehovah Got ban’en nib kireb ngog, fa?’ Bin riyul’ riy e gubin ngiyal’ ni ma rin’ Jehovah e tin nib fel’ ngodad. Yugu aram rogon ni bay boch i gadad ni dakir pigpig ngak e chiney, ma ka be pagrad ni ngar felfelan’gad ko tin nib fel’ ni ma pi’. (Jas. 1:16, 17) Dabki n’uw nap’an me yib fare rran rok Jehovah. Ere, ireray e ngiyal’ ni ngan sul ngak Jehovah ni ir e Chitamangidad nge ulung rok, ya kemus e gin rayog ni ngad pared riy ndabi buch ban’en rodad e ngiyal’ ney ko tin tomuren e rran.​—Deut. 33:27; Heb. 10:24, 25.

18. Mang fan ni ngaud folgad ko piin ni yad be yog e thin rodad?

¹⁸ Ngan fol ko piin ni yad be yog e thin rodad. Jehovah e bod Be’ ni Ma Gafaliy e Saf, ni ma t’ufeg e pi saf rok. Ma pow’iydad ma ma ayuwegdad. Ke dugliy Fak ni nge mang e Cha’ ni ir Pilungen e piin ni yad ma gafaliy e saf. (1 Pet. 5:4) Ke pag 100,000 e ulung rok Got u fayleng i yan, ma pi piilal riy e yad ma tay e tayim ni ngar ayuweged e girdi’ riy. (Acts 20:28) Faanra ud folgad ko piin ni kan tayrad ni nga u rogned e thin rodad, ma aram e gad be dag ngak Jehovah nge Jesus ni gad be pining e magar ngorow ko pi n’en ni kar rin’ew ni fan ngodad.

19. Uw rogon ni ngad chuchugurgad nga taabang?

¹⁹ Nge gel e tha’ u thildad pi walagdad. Mang e be yip’ fan e re n’ey? Nap’an nra yib e toogor ni nge cham ngak barba’ e salthaw, ma n’en ni ma rin’ fapi salthaw e yad ma chuchugur nga taabang ya nge mo’maw’ ni nge yib e toogor rorad nga fithik’rad ni nge cham. Ngiyal’ ney e ri be cham Satan ko pi tapigpig rok Got. Ere, gathi ireray e ngiyal’ ni ngaud chamgad pi walagdad, ya ireray e ngiyal’ ni nge gel e tha’ u thildad, ma dab kud sapgad ko pi meewar rorad, me pagan’dad ngak Jehovah.

20. Mang e susun ni ngad rin’ed e chiney?

²⁰ Ere, ngaud pared nib gel e tha’ u thildad Jehovah ma ud gum’an’gad u nap’an ni gad be sonnag. Ngad gum’an’naged gadad ngad sonnaged e ngiyal’ ni yira yog ni “Ke gapas ndariy ban’en nra buch!” nge ngiyal’ ni yira mu’ i tay e pow nga peri’ e piin ni kan dugliyrad. Tomuren e re n’ey, ma aram e ngiyal’ nra pag fa aningeg i engel fa aningeg i nifeng ko magothgoth, ma aram e ngiyal’ ni yira thang fare Babylon nib Gilbuguwan. Ere, nap’an ni gad be sonnag e pi n’ey ni nge buch ma ngad ululgad ngad folgad ko piin ni yad ma yog e thin u lan e ulung rok Jehovah, ma gad par ni gad ba chuchugur nga taabang, ya nge yag nda togopuluwgad ngak Moonyan’ nge pi engel rok. Ireray e ngiyal’ ni ngad folgad ko fonow ni pi’ fare psalmist ni gaar: “Mu gelniged gimed, me muthan’med, gimed gubin e piin ni ke l’agan’med ngak Somol.”​—Ps. 31:24, BT.