Fare Kanawo’ Ko T’ufeg E Dabi Siy Nra Gel
“Mm’oneged u wun’med e tin ni ka ba ga’ fan e tow’ath ni ma pi’ Got. Machane bin th’abi fel’ e kanawo’ e baaray.”—1 KORINTH 12:31.
1-3. (a) Uw rogon ma rogon ni ngan fil ni ngan dag e t’ufeg e taareb rogon ni ngan fil e thin nu bang? (b) Mang boch ban’en nrayog ni nge n’igin nge mo’maw ni ngan dag e t’ufeg?
KAAMU guy rogon ni ngam fil yugu reb e thin? Rib mo’maw e re n’em! Machane bitir e rayog ni nge fil e thin u nap’an ni be rung’ag. Ya man’ey rok e ma girngiy lingan nge fan e pi thin ni ke rung’ag, ere dabi n’uw nap’an ma rayog ni nge non nib fel’ rogon, ma sana gubin ngiyal’ ma yugu be non. Gathi arrogon e piin nib ilal. Gad ma gayiy e thin u lan e dictionary nthin nu bang, ni fan ni nge mit ngodad boch e thin. Ma munmun e gad ra non ko thin nu bang ma aram me mom boch ni ngan non.
2 Ngan fil rogon ni ngan dag e t’ufeg e bod rogon ni yibe fil e thin nu bang. Rriyul, ni kan sunmegdad ni bay e t’ufeg u lanin’ad. (Genesis 1:27; mu taarebnag ko 1 John 4:8.) Machane, ba t’uf e athamgil nib gel ni ngan fil rogon ni ngan dag e t’ufeg—ma baga’ ni aram rogon ko ngiyal’ ney ya ke war e t’ufeg ko girdi’. (2 Timothy 3:1-5) Aram rogon u boch e tabinaw. Arrogon, boor e girdi’ ni kar ilalgad u lan e tabinaw ni yima yog e thin nib gel ma ri buch uw e thin nib sumunguy ni yima yog—ma boch e der ma non ni be dag e runguy. (Efesus 4:29-31; 6:4) Ere uw rogon nrayog ni ngad filed rogon ni ngad daged e t’ufeg—ni mus ni gathi aram rogon nni kan rin’ ngodad?
3 Bible e rayog ni nge ayuwegdad riy. U 1 Korinth 13:4-8, ma gathi ke mus ni weliy Paul ko mang fan e re bugithin nem ma ke tamilangnag ko uw rogon e ngongol ko t’ufeg. Gad ra lemnag e pi verse nem ma ra ayuwegdad ngad nanged fan e re felngin nem ni yib rok Got ma aram e rayog ni ngad daged ko ngongol rodad. Ngad lemnaged boch ban’en ni weliy Paul u morngaagen e t’ufeg. Gad ra tay e pi thin nem ko dalip guruy: ngongol rodad; rogon thildad e girdi’; nge bin tomur, k’adan’ ni gad ma tay.
T’ufeg e Ma Ayuwegey Ngan Gel ko Tolangan’
4. (a) Ra diin ma ba puluw ni ngan awan’? (b) Miti mang awan’ e ma kirebnagey, ma uw rogon?
4 Tomren ni weliy Paul boch u morngaagen e t’ufeg me yoloy ngak piyu Korinth ni gaar: “T’ufeg e der ma awan’.” (1 Korinth 13:4, New World Translation) Rayog ni nge m’ug e awan’ ya ke taliyeg be’ ni bochan ni ke yib e flaab ngak be’ fa ke yan be’ ko liw nib tolang. Re mit i awan’ nem e ma kirebnag—fithik’ i dowey, nge lanin’uy, nge rogon ni ngan par ko tirok Got ban’en.—Proverbs 14:30; Roma 13:13; James 3:14-16.
5. Uw rogon nrayog ni nge ayuwegdad e t’ufeg ngad gelgad ko awan’ u nap’an ni be m’ug riy ni kan siyegdad ko taw’ath ko maruwel ara liw u lan e ulung?
5 Ere mu fithem, ‘Gu ma awan’ u nap’an ni dan pi’ reb e maruwel are liw ngog u lan e ulung fa?’ Faanra er rogon, ma dabi magafan’um ngay. Ya be yog James ni gad gubin ni dad flontgad me ere bay e “awan’ u fithik’dad”. (James 4:5) Nge t’uf walagem rom ma ra ayuwegem ngam par nib thabthabel e lem rom. Rayog ni nge ayuwegem ngam un ko falfalan’ ko piin ni kar falfalan’gad ma gathi nge kireb lanin’um u nap’an ni kan flaabnag ara kan pining e sorok ngak yugu be’.—Mu taarebnag ko 1 Samuel 18:7-9.
6. Mang ban’en nib ubchiya’ ni ke buch u lan e ulung nu Korinth u nap’an e bin som’on e chibog?
6 Miki yog Paul ni t’ufeg e “de uf, ma de tolangan’’.” (1 Korinth 13:4) Faanra bay ban’en ni gad ba salap riy, ma dabda ufgad ni bochan. Be m’ug riy ni aram e magawon ko boch e pumoon u lan e ulung nu Korinth kakrom. Sana yad ba salap i weliy ara fl’eg ban’en. Ma bochan ni kar ufgad ngay ma ke yu raba’ fare ulung. (1 Korinth 3:3, 4; 2 Korinth 12:20) Kari ubchiya fare magawon ma aram thingari fonownag Paul piyu Korinth ya yad be pag e ‘piin ni balyang,’ ngar pared me yog Paul ni pi cha’ nem e yad e pi “apostel nib sororad.”—2 Korinth 11:5, 19, 20.
7, 8. Mu weliy e thin ko Bible ni be dag ko uw rogon nrayog ni ngad fanayed e tin ni gad ba cheg riy ni ngan mon’ognag e taareb lanin’uy.
7 Ku aram e n’en nrayog ni nge buch ko ngiyal’ ney. Susun, boch e girdi’ e ra uf ko pi n’en ni kar rin’ed ko machib ara boch e taw’ath ara liw rorad u lan e ulung rok Got. Machane mus ni bay ban’en ni gad ba salap riy ni dariy ko yugu girdi’ u lan e ulung, ma aram e bay rogodad ni ngad ufgad ngay fa? Susun ni ngad fanayed felngidad ni ngan mon’ognag nge taareb lanin’uy—ma gathi ni ngan nog e sorok ngodad.—Matthew 23:12; 1 Peter 5:6.
8 I yoloy Paul ni yugu aram rogon ni boor e girdi’ u lan e ulung, machane “i Got e ke chamey dowdad.” (1 Korinth 12:19-26) Fare bugithin nu Greek ni “chamey” e ma sor fan ko tay u taabang nib puluw reb nga reb, ni bod ni ngan athkuy raen e machaw. Ere dariy be’ u lan e ulung e susun nge uf ni bochan nib salap ku ban’en ara nge guy rogon ni nge gel ngak yugu boch e girdi’. Tolangan’ nge ufanthin e dariy rogon ko ulung rok Got.—Proverbs 16:19; 1 Korinth 14:12; 1 Peter 5:2, 3.
9. Mang boch e thin u lan e Bible ni be ginangdad ko girdi’ ni ke mus ni goo yad e ur lemnaged yad?
9 T’ufeg e gathi “ke mus ni ir e ma lemnag ir.” (1 Korinth 13:5) Be’ ni ma t’ufeg e girdi’ e dabi suwey laniyan’ e girdi’ ni fan e ngar rin’ed e n’en ni ba adag. Bay boch e thin ko Bible ni be ginangdad ko re n’ey. Susun: Gad ma poy u morngaagen Delilah, nge Jezebel, nge Athaliah—pi ppin ni ur suweyed laniyan’ e yugu girdi’ ni fan ni nge yog ban’en ngorad. (Judges 16:16; 1 Kings 21:25; 2 Kronicles 22:10-12) Ku aram rogon Absalom ni fak David ni Pilung. Ra non ngak e piin ni ur bad nga Jerusalem ko puf oloboch ma ra suwey lanin’rad me yog ni de adag fare pilung ni nge ayuwegrad ko magawon rorad. Ma aram e ra yog ni ba t’uf be’ ni bod ir ni ra runguy e girdi’ nra mang pilung! (2 Samuel 15:2-4) Ma gathi ba adag Absalom ni nge ayuweg e piin nib gafgow, ya kari mus ni goo ir e be lemnag ir. Ke yan nga luwan e pilung ni ir e dugliy ir, me suwey laniyan’ e girdi’ ni boor. Machane munmun ma ke war Absalom. Ngiyal’ ni kem’ ma dan lemnag ni bay rogon ni ngan fl’eg e gum’eyag ni fan ngak.—2 Samuel 18:6-17.
10. Uw rogon nrayog ni ngad daged ni gad be lemnag e yugu girdi’?
10 Aram ban’en ni be ginang e pi Kristiano ko ngiyal’ ney. Demtrug ko gad e pumoon ara ppin ma sana gad ba salap i suwey laniyan’ e girdi’. Sana ba mom ni ngad k’aringed e girdi’ ngar rin’ed e n’en ni gad ba adag, ma ngad gelgad ko sabethin ara nguud luaged thin ban’en ma gad gel ngay. Machane faanra ri ba t’uf e girdi’ rodad ma gad ra lemnag e yugu girdi’. (Filippi 2:2-4) Dabda gelgad ngak yugu boch e girdi’ ara ngad m’oneged e lem rodad ni bochan e liw rodad u lan e ulung rok Got ara bochan ni gad ba salap u ban’en, ma gad lemnag ni kari mus ni lem rodad e ba ga’ fan. Ya gad ra lemnag fare thin ko Proverb ni be gaar: “Be’ nib tolangan’ e ra gafgow ma be’ nib ufanthin e ra sobut’.”—Proverbs 16:18, NW.
T’ufeg e ma Ayuweg nge Fel’ Thilin e Girdi’
11. (a) Uw rogon nrayog ni ngad daged ni t’ufeg e ba gol mab yalen? (b) Uw rogon nrayog ni ngad daged ni dabda falfalan’gad ko tin nde mat’aw?
11 Ki yoloy Paul ni t’ufeg e ba “gol” ma “de kireb daken.” (1 Korinth 13:4, 5) Arrogon, t’ufeg e dabi pag ni ngad ngongolgad u rogon nib kireb, ara puwlag, ma dabi pag ni ngad dariy fannaged e girdi’. Ya gad ra lemnag e yugu boch e girdi’. Susun, be’ nib t’uf e girdi’ rok e ra siyeg i rin’ ban’en nra kirebnag e nangan’ ko yugu girdi’. (Mu taarebnag ko 1 Korinth 8:13.) T’ufeg e “de fel’ u wan’ e ngongol nib kireb, machane ba felfelan’ ko tin nib riyul’.” (1 Korinth 13:6) Faanra ba t’uf rodad e motochiyel rok Jehovah ma dabda paged ni dariy fan u wan’dad ni ngan un ko ngongol ndarngal ara ngan un ko boch ban’en ni ma fanenikay Got. (Psalm 119:97) T’ufeg e ra ayuwegdad ngad pirieged e falfalan’ ko tin nra ubungey ma gathi tin nra kirebnagey.—Roma 15:2; 1 Korinth 10:23, 24; 14:26.
12, 13. (a) Susun mang e ngad rin’ed u nap’an ni ra kirebnag be’ an’dad? (b) Mu weliy boch e thin ko Bible ni be dag ni mus ko damumuw ni bay tapgin e rayog ni nge suruydad ngad ngongolgad u rogon nde gonop.
12 I yoloy Paul ni t’ufeg e de “papey e damumuw ngak.” (1 Korinth 13:5) Rriyul’ nib mom ni ngad damumuwgad u nap’an ni ke rin’ be’ ban’en nib kireb ngodad ya dad flontgad. Machane, ra kireb ni ngad pared nib damumuw nib n’uw nap’an ma dabda n’aged fan. (Psalm 4:4; Efesus 4:26) Faanra dabda gelgad ko damumuw ma mus ni bay rogon ni ngad damumuwgad machane rayog ni ngad rin’ed ban’en nde gonop, ma thingarda dum’gad ku Jehovah ni bochan.—Genesis 34:1-31; 49:5-7; Numbers 12:3; 20:10-12; Psalm 106:32, 33.
13 Boch e girdi’ e ur paged thibngin e yugu girdi’ ni nge talegrad ndabkur uned ko pi muulung ko Kristiano ara machib. Boch e pi girdi’ ney e ur pared nib yul’yul’ u fithik’ e gafgow ni ba ga’, sana ke togopuluw e tabinaw rorad ngorad, ara kan moningnagrad u tabon e maruwel, ara boch ban’en. Ur k’adedan’rad u fithik’ e pi magawon nem ya kar nanged ni aram e skeng ko yul’yul’ rorad. Machane uw rogon faani yog reb e Kristiano ban’en ni dariy e t’ufeg riy? Ku aram e skeng ko yul’yul’ fa? Ri er rogon, ya faanra ngad pared nib damumuw, ma kad “binged e kanawo’ ngak Moonyan’.”—Efesus 4:27.
14, 15. (a) Mang fare thin ni “der ma aw nga laniyan’ e n’en nib kireb ni kan rin’ ngak”? (b) Uw rogon nrayog ni ngad folwokgad rok Jehovah rogon ni ma n’ag fan e kireb rok e girdi’?
14 Ere bay fan ni yog Paul ni t’ufeg e “der ma aw nga laniyan’ e n’en nib kireb ni kan rin’ ngak.” (1 Korinth 13:5) Ke fanay reb e thin ni ma sor fan ko accounting ara theeg salpiy, ni nge tamilangnag e ngongol ni ngan tay e kireb ku be’ nga but’ ko babyor ni dabni pag talin. Bay e t’ufeg riy ni ngan n’igin nge mit nga laniyan’uy e thin ara ngongol nib kireb ni rin’ be’, ni fan ni ngan sul nga daken ba ngiyal’ nga m’on fa? Ri gad ma falfalan’ ya gathi aram rogon ni ma rin’ Jehovah ngodad! (Psalm 130:3) Arrogon, nap’an ni kad kalgadngan’dad, ma ma chuweg e oloboch rodad u laniyan’.—Acts 3:19.
15 Rayog ni ngad folwokgad rok Jehovah ko re n’ey. Susun ndabda pared nib papey ni nge kireban’dad u nap’an ni be m’ug riy ni ke rin’ be’ ban’en nib kireb ngodad. Faanra gad ra damumuw nib papey ma gad ra kirebnagdad ni kab gel ko n’en nib kireb ni ke rin’ facha’ ngodad. (Eklesiastes 7:9, 22) Ya ba t’uf ni dabda paged talin ni t’ufeg e “dabiyog ni nge pag ir ndabki michan’.” (1 Korinth 13:7) Gathi urngin ban’en ma goo ke michan’dad ngay, machane ku dabi maruwaran’dad ko pi walagdad. Gubin ngiyal’ nib m’ag ma dabda lemnaged ni ke rin’ be’ ban’en nib kireb ngodad ni pumon.—Kolose 3:13.
T’ufeg e Ma Ayuwegdad Ngad K’adedan’dad
16. Uw rogon ma rayog ni nge ayuwegdad e t’ufeg ngad gum’an’gad?
16 Ki yog Paul ni t’ufeg e “ba gum’an.” (1 Korinth 13:4) Ma ayuwegdad ngad k’adedan’dad u fithik’ e magawon, ndemtrug fene n’uw nap’an. Susun, boor e Kristiano e boor e duw ni kar pared u lan e tabinaw ni ke ruw raba’ ni fan ko teliw. Ma yugu boch e dar uned ko mabgol ni gathi bochan ni aram rogon ni yad ba adag ya bochan e dar pirieged be’ ni ngan leengiy ara ngan figirngiy ni ra aw “nrogon e mabgol ni ma tay e piin ni girdien Kristus.” (1 Korinth 7:39; 2 Korinth 6:14) Maku bay boch ni yad ba magawon ko m’ar. (Galatia 4:13, 14; Filippi 2:25-30) Rriyul’ dariy be’ u lan e re m’ag nib kireb ney e de t’uf ni nge k’adan’ u ban’en.—Matthew 10:22; James 1:12.
17. Mang e ra ayuwegdad ngad athamgilgad u fithik’ urngin ban’en?
17 Yog Paul ni t’ufeg e ma “athamgil u fithik’ urngin ban’en, . . . ma ma athapeg urngin ban’en, ma ma k’adan’ u fithik’ urngin ban’en.” (1 Korinth 13:7, NW) Rogon nib t’uf Jehovah rodad e ra ayuwegdad ngad k’adedan’dad u fithik’ e gafgow ni fan ko tin mat’aw ban’en. (Matthew 16:24; 1 Korinth 10:13) Gathi gad ba adag ni ngad m’ad ni bochan e thin nib fel’. Ya gad ma guy rogon ni ngad pared nib gapas ma dabda wageygad. (Roma 12:18; 1 Thessalonika 4:11, 12) Machane nap’an ni yib e skeng ko michan’ rodad ma gad ma k’adan’ u fithik’ e falfalan’ ya gad manang ni aram rogon nran rin’ ko pi gachalpen Kristus. (Luke 14:28-33) Ma nap’an ni gad be k’adan’ ma gad ma par nib fel’ e lem rodad, mu fithik’ e magawon ma gad athapeg nra yan i aw nib fel’ rarogodad.
18. Uw rogon ni ba t’uf e k’adan’ ni mus ko ngiyal’ ndariy e magawon?
18 Gafgow e gathi ke mus e n’en nib t’uf ni ngan k’adan’uy riy. Ya yu ngiyal’ ma rogon e k’adan’ ni thingarda ted e nguuda pared nib yul’yul’ ko kanawo’ nib mudugil ndemtrug ko bay e magawon fa danga’. Rogon ni ngan k’adan’ e ngan par ni yibe fol ko schedule ko tirok Got ban’en. Susun, ga ma un ko machib u rogon nrayog rom fa? Ga ma poy ma ga ma fl’eg i lemnag e Thin Rok Got ma ga ma non ku Chitamangim nu tharmiy u fithik’ e meybil fa? Ga ma un ko muulung u gubin ngiyal’, ma be yib angin ngom ni bochan e ga be chag ko pi walag ko ulung fa? Faanra er rogon ma demtrug ko ga bay ko magawon fa danga’ machane ga be k’adan’. Dab mu pagem, “ya faanra dab da paged gadad, ma ba’ nap’an ni bayi taw ngay ma gadad t’ar wom’engin.”—Galatia 6:9.
T’ufeg—“Bin Th’abi Fel’ e Kanawo’”
19. Uw rogon ma t’ufeg e ir e “bin th’abi fel’ e kanawo’”?
19 I tamilangnag Paul fene ga’ fan ni ngan dag e t’ufeg ya ke yog ko re felngin ney ni aram e “bin th’abi fel’ e kanawo’.” (1 Korinth 12:31) “Bin th’abi fel’” ni uw rogon? U m’on riy me weliy Paul u morngaagen e taw’ath ko kan ni thothup, ni yib ko pi Kristiano u nap’an e bin som’on e chibog. Ke yog ko boch i yad ni ngar yiiygad, ma boch e ke yog ni ngar golnaged e m’ar ko girdi’, ma boor i yad e ke yog ni ngar nonad nlungun yugu boch e nam. Rib fel’ e pi taw’ath ney! Machane yog Paul ko yu Korinth ni gaar: “Faan mang e rayog ni gu non nthin ko girdi’ nge thin ko pi engel, machane faanra de t’uf Got rog nge girdi’, ma thin ni gu be weliy e ke mus ni bod lingan bangi wasey ni kan tining nga lang yibe pirdiiy ara bel ni yibe chubeg. Ra ke pi’ Got gelngig ni gub salap i machibnag e thin rok ngak e girdi’, ma urngin ban’en ni gu manang fan, ma gu manang fan urngin e tin nde nang e girdi’, ma gelngin nib michan’ug ngak Kristus e rayog ni chuweg e burey u tagil’, machane faanra de t’uf Got rog nge girdi’, ma dariy rogog.” (1 Korinth 13:1, 2) Arrogon, mus ni pi n’en nib ga’ fan e rayog ni nge yan ni aw ni aram e “tin ndariy fan e ngongol” nfaanra gathi bochan e ba t’uf Got nge girdi’ rodad ni gad be rin’ e pi n’en nem.—Hebrews 6:1.
20. Mang fan nib t’uf ni nguun athamgil iyan ni ngan dag e t’ufeg?
20 Ki yog Jesus reb i fan ni susun ni ngad athamgilgad nge yog e re felngin nem ni t’ufeg ngodad. Ye gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Fare bugithin ni “faanra” e ma tay ni ra reb e Kristiano ma ir rok ni nge athamgil ni nge t’ufeg e girdi’ fa danga’. Ya bod rogon ni gad be par u yugu reb e binaw ma gathi yira towarsariydad ngad filed e thin ko re binaw nem. Ma gathi ke mus ni bochan ni gad ma un ko pi muulung u lan e Kingdom Hall ma gad chag ko pi Kristiano ma aram e yigura m’ug e t’ufeg rodad. Ya ba t’uf ni nguun athamgiliy ni ngan fil e re “thin” ney.
21, 22. (a) Susun mang e ngad rin’ed nfaanra bay ban’en nde gaman rodad ko pi n’en ni ke weliy Paul u morngaagen e t’ufeg? (b) Uw rogon nrayog ni ngan nog ni “t’ufeg e dabi siy nra gel”?
21 Yu ngiyal’ ma dabi gaman rom reb e pi n’en nib bang ko t’ufeg ni weliy Paul morngaagen. Machane dabi mulan’um ni bochan. Mu t’ar lanin’um ma ga athamgiliy. Nguum fil e Bible ma ga fol ko thin riy ko ngongol rom ngak e girdi’. Dabda paged talin e kanawo’ ni dag Jehovah ngodad. Yog Paul ko piyu Efesus ni gaar: “Um golgad ngomed, me bigimed be munguy ngak bigimed, mu um n’iged fan u wun’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.”—Efesus 4:32.
22 Bod rogon ni ra mom boch iyan ni ngam fil yugu reb e thin, maku ga ra pirieg ni munmun ma ra mom iyan ni ngam dag e t’ufeg. I micheg Paul ni “t’ufeg e ra gel.” (1 Korinth 13:8) Gathi bod e pi taw’ath ko kan ni thothup, ya dabi m’ay e t’ufeg. Ere nguum fil rogon ni ngam dag e re felngin ney ni yib rok Got. Ya rogon ni yog Paul ma ri ir e “bin th’abi fel’ e kanawo’.”
Rayog ni Ngam Weliy?
◻ Uw rogon nrayog ni nge ayuwegdad e t’ufeg ngad gelgad ko tolangan’?
◻ Uw rogon nrayog ni nge ayuwegdad e t’ufeg ngad mon’ognaged e t’ufeg u lan e ulung?
◻ Uw rogon nrayog ni nge ayuwegdad e t’ufeg ngad k’adedan’dad?
◻ Uw rogon ma t’ufeg e ir e “bin th’abi fel’ e kanawo’”?
[Sasing ko page 25]
T’ufeg e ra ayuwegdad ndabda lemnaged e kireb ko pi walagdad
[Sasing ko page 29]
K’adan’ e bay rogon ko par ni yibe fol ko schedule ni fan ko tirok Got ban’en