T’ufeg Rok Got E Ma M’ug U Daken E T’ufeg Rok Ba Matin — LIBRARY U ONLINE ni fan ko Wulyang ko Damit

T’ufeg Rok Got E Ma M’ug U Daken E T’ufeg Rok Ba Matin

“Gur rayog rok be’ ni ppin ni nge pag talin fak ni kabran ma dabi t’uf rok e re tir nem ni ir e gargeleg? Gomanga ra pag be’ ni ppin talin fak, machane gag e dab gu pag talimed.”—ISAIAH 49:15.

BA BITIR ni kafin ni gargelnag e ma par u pa’ e chitiningin u nap’an ni yibe tathuthnag. Be m’ug nrib gel e t’ufeg ni bay u thilrow. Reb e matin ni Pam fithingan e gaar: “Th’abi som’on nug kol fakag ma kar gu thamiy gelngin e t’ufeg rog ngak fakag ni kafin gu gargeleg ma kug thamiy rog ni bay ban’en nib milfan ngog ni fan ngak.”

Yugu aram rogon ni be m’ug nib riyul’ e re n’ey, machane rogon ni kan pirieg e t’ufeg rok ba matin ngak fak e bay rogon ko ilal nra tay fare tir. Bangi babyor ni yoloy fare World Health Organization Programme on Mental Health e yog ni gaar: “Boch ban’en ni kan fil e ke m’ug riy ni bitir ni yow ma dar e chitiningin u nap’an ni kab achig e ba kireban’rad ma yu ngiyal’ e ma k’aring e marus ngorad.” Ku re gi babyor ney e ki yog ban’en ni kun pirieg u murung’agen e bitir ni yima dag e t’ufeg ngorad ma ku yima tiyan’uy ngorad u nap’an ni ka yad ba achig, e ma yan i aw nib ga’ e llowan’ rorad ko bitir ni yima digeyrad.

Alan Schore ni ir reb e sensey u reb e skul ko Togta u UCLA u Meriken e yog ni gaar: “Bin nsom’on e tha’ ni ma sum u thilin reb e bitir nge chitiningin e aram ban’en ni ma ayuweg me fal’eg rogon fare tir ko tha’ nra sum u thilrad boch e girdi’ u nap’an ni ke ilal.”

Ba kireban’ ya mochuch, nge m’ar, nge ku boch ban’en e rayog ni nge k’aring reb e matin nge dabi tiyan’ ngak fak ara “pag talin fak ni kabran.” (Isaiah 49:15) Machane dabiyog ni nge dabi tiyan’ reb e matin ngak fak ara pag talin fak ni kabran. Tin riyul’ riy e, pi matin e ka aram rogorad ni yad ma t’ufeg pi fakrad. Boch e girdi’ ni yad ma fal’eg i gay ban’en e kar pirieged ni nap’an e gargel, ma pi matin e ma yoor e hormone rorad ni ka nog e oxytocin ngay, ni ir e ra k’aring e amith ko gargel ngak, ma ireray e n’en ni ma k’aring ni nge yoor logwen e thuth ko fare matin. Ku re hormone ney, ni ma sum rok e pumoon nge ppin, e yibe lemnag ni ma k’aring e t’ufeg.

Uw e Sum e T’ufeg Riy?

Piin ni yad ma machibnag murung’agen e evolution ara fare machib ni girdi’ e sum ko gamanman e yad ma fil ni t’ufeg ndariy e lem ni fel’ ngak riy ni bod e t’ufeg u thilin ba matin ngak fak e yigi sum rok ma kan ayuweg ya ra fel’ rogoy riy. Bod ni, fare babyor ni Mothering Magazine e yog ni gaar: “Man’ey rodad e sum ko man’ey ko gamanman ni bod rogon e galuf, ni aram e gin ni ma sum gelngin e lem rodad riy. Gin’ey ko man’ey e aray e gin ni ma k’aring e matin nge bitir nge chugur e tha’ u thilrow.”

Riyul’, ni kan gay murung’agen ma kan pirieg ni gin ni ma sum gelngin e lem rodad riy e bay ban’en ni ma rin’ nga rogon e lem ni yima tay. Machane, gur ba puluw u lanin’um ni t’ufeg rok ba matin ngak fak e sum ko man’ey ko galuf?

Kum lemnag reb i rogon. Be yog e Bible ni girdi’ e ni sunumiy ni bod yaan Got, ni aram e rayog ni ngar daged fel’ngin Got. (Genesis 1:27) Bin nth’abi ga’ e fel’ngin ni bay rok Got e aram e t’ufeg. I yoloy apostal John ni gaar: “En nde t’uf Got rok nge girdi’ e be’ nde nang Got.” Mang fan? “Ni bochan e Got e t’ufeg.” (1 John 4:8, NW) Mu tay fanam i yan riy nre thin nu Bible ney e der yog ni kemus ni bay e t’ufeg rok Got. Ya be yog ni Got e t’ufeg. Ir Tabolngin e t’ufeg.

Be weliy e Bible murung’agen e t’ufeg ni aray rogon: “En nib t’uf Got rok nge girdi’ e ba gum’an’ ma ba gol; ma en nib t’uf Got rok nge girdi’ e der ma awan’, ma de uf, ma de tolangan’; en nib t’uf Got rok nge girdi’ e de kireb daken, ara ke mus ni ir e ma lemnag ir, ara ba papey e damumuw ngak; ma en nib t’uf Got rok nge girdi’ e der ma aw nga laniyan’ e n’en nib kireb ni kan rin’ ngak; en nib tuf Got rok nge girdi’ e de fel’ u wan’ e ngongol nib kireb, machane ba felfelan’ ko tin nib riyul’. Be’ nib t’uf Got rok nge girdi’ e dabiyog ni nge pag ir ndab ki michan’, ma dab ki l’agan’, ma dab ki gum’an’. Rogon ni gadad ba t’uf rok Got nge rogon nib t’uf Got rodad nge girdi’ e ban’en nra par ndariy n’umngin nap’an.” (1 Korinth 13:4-8) Gur ba puluw ni ngan lemnag nre fel’ngin ney nrib ga’ angin e yigi sum rok?

Uw Rogon ni Ke Rin’ Ban’en Ngom?

Nap’an ni kam beeg murung’agen e t’ufeg ko fare paragraph i er nga lang, ma gur, ga baadag ni nge dag be’ e re mit i t’ufeg ney ngom? Ka ban’en ni yima rin’ ni aray rogon ni ngam adag ban’en ni aray rogon. Mang fan? Ni bochan e “gadad pi fak” Got. (Acts 17:29) Kan ngongliydad ni ngan dag e t’ufeg ngodad maku gad dag e t’ufeg. Ma rayog ni nge mudugil u wan’dad nri gad ba t’uf rok Got. (John 3:16; 1 Peter 5:6, 7) Fare thin nu Bible ni bay u tabolngin e re article ney e be weliy ni t’ufeg rok Got ngodad e ba gel gelngin, ma kab gel ko t’ufeg rok ba matin ngak fak!

Ere, sana ra lungum: ‘Faanra ba gonop Got, mab gel gelngin, ma ma t’ufegey, ma mang fan ndar chuweg e gafgow? Mang fan ni ma pag ni nga i yim’ e piin ni bitir, ma be ulul e togopuluw, nge fayleng ni yibe kirebnag ni bochan e der fel’ rogon ni yibe ayuweg nge bochan e chogow?’ Ireray boch e deer nib fel’ ni ngan gay e fulweg riy.

Demtrug e n’en nra yog e piin ni be maruwar Got u wan’rad, machane rayog ni ngan pirieg e fulweg ko pi deer ney nra fal’eg lanin’uy. Bokum milyon e girdi’ u lan bokum miriay e nam ni kar pirieged e fulweg ko pi deer ney u nap’an ni kar filed e Pi Mich Rok Jehovah e Bible u taabang. Piin ni kar ngongliyed e re babyor ney e ka yad be piningem ni ngam rin’ e re n’em. Nap’an nra ga’ e tamilangan’ rom ngak Got u daken e fol Bible ni ga ra tay nge rogon ni ga be fal’eg i fil murung’agen e tin ni ke sunmiy, ma ga ra guy nde palog rodad ara be’ ndariy murung’agen. Ya ra riyul’ u wan’um ni “dariy bagadad nib mal’af Got rok nga orel.”—Acts 17:27.

[Blurb on page 7]

T’ufeg rok Got ngodad e kab gel ko t’ufeg rok ba matin ngak fak