Nge Fel’ U Wan’um Mat’awun Jehovah

“Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.”​—1 JOHN 5:3.

1, 2. (a) Mang fan ni fare n’en ni ngan fol ko piin ni bay mat’awrad e ban’en ni ke yoor e girdi’ ni ke dabuy e ngiyal’ ney? (b) Gur piin ndubrad ni ngar ted fan e liw e riyul’ ni lem rorad e yad be fol riy? Mu weliy.

“BOOR e girdi’ e ngiyal’ ney ndubrad ni nge yog be’ e n’en ni ngar rin’ed.” Girdi’ ni dubrad ni ngar tayed fan e liw rok be’ e yad ma gaar u lanin’rad, “Dariy be’ ni nge yog e n’en ni nggu rin’.” Machane, riyul’ ni picha’ ney e kemus ni lem rorad e yad baadag ni ngar folgad riy? Ri danga’! Yooren i yad e kemus ni yad be fol ko n’en ni ma rin’ boch e girdi’ nge “ngongol ni yibe rin’ u roy u fayleng.” (Rom. 12:2) Gathi yad be rin’ ban’en ni yad rorad, ya ra ngan fanay e thin ni yog apostal Peter ni ir reb e Kristiano ma “kar manged sib ko ngongol ni ma kirebnigey.” (2 Pet. 2:19) Yad be yan u ‘kanawoen e kireb nu fayleng; yad be fol rok e en ni ir e pilung rok e pi kan nu lan e lang,’ ni aram Satan ni Moonyan’.​—Efe. 2:2.

² Reb e ta yol babyor e yog u fithik’ e ufanthin ni gaar: “Dagur pi’ mat’awun e gallabthir rog ara be’ nib prist ara tamachib ara Bible ni ngar dugliyed e n’en ni nggu rin’.” Tin riyul’ riy, e boch e girdi’ e sana yad ma kirebnag i fanay mat’awrad ma sana ra dabkiyog ni ngad folgad rorad. Machane, gur fulweg riy e ngad siyeged ndabi gagiyegnagdad be’? Yig gad ra sap ko shimbung ma gad nang e fulweg riy. Rib gel e kireb riy ni bochan e aray ba ngiyal’ nib t’uf ni ngan pow’iy e girdi’, ma buchuuw e piin ni yad baadag ni ngar folgad riy.

Rogon ni Gad Ma Sap Ngak e Piin ni Bay Mat’awrad

3. Uw rogon ni ke dag e Kristiano ko bin nsom’on e chibog ni yug dar posgad mar folgad u mat’awun e girdi’?

³ Gad e Kristiano e ba thil e n’en ni gad ma rin’ ko n’en ni ma rin’ e girdi’ nu fayleng. Re n’ey e gathi yig gad ma rin’ e n’en ni ka nog ngodad ndab da lemgad ko som’on. Ba thil, ya yu ngiyal’ ma thingarda siyeged ndab da folgad ko n’en ni baadag boch e girdi’ ni ngad rin’ed ni yugu aram rogon ni yad bay u reb e liw ni bay mat’awrad nrayog ni nga rogned e n’en ni ngad rin’ed. Arrogon e n’en ni buch ko pi Kristiano ko bin nsom’on e chibog. Bod ni nap’an ni yog e pi tolang ko prist nge ku boch e girdi’ ni bay mat’awrad ni yad bang ko Sanhedrin ngak e pi apostal ni ngar talgad ko machib, ma dar folgad ko n’en nrogned. Dar paged e ngongol nib fel’ ni fan e ngar folgad u mat’awun e girdi’.​—Mu beeg e Acts 5:27-29.

4. Mang e pi n’en ni bay ko fare Hebrew Scriptures ni be dag ni boor e girdi’ rok Got nranod u reb e kanawo’ ndar ma yan oren e girdi’ riy?

⁴ Ku boor e pi tapigpig rok Got u m’on ko ngiyal’ ni immoy Jesus riy ni kur ngongolgad ni aray rogon. Bod rogon Moses ni “dabuy ni nga nog ni ir e fak be’ ni ppin ni fak Farao. Ya ka ba adag ni nge un ngak girdien Got ko gafgow,” ni yugu aram rogon ni n’en ni rin’ e k’aring e ‘damumuw ngak fare pilung.’ (Heb. 11:24, 25, 27) Yugu aram rogon ni manang Josef ni bay mat’awun leengin Potifar ni nge gafgownag ma de pag ir ngak u nap’an ni gay fare pin rogon ni ngar parew. (Gen. 39:7-9) Daniel e dugliy u wan’ “ndabi kay e ggan ma dabi unum e wain ni yibe pi’ ngorad u tafen e en ni pilung,” ni yugu aram rogon ni gin ni bay riy ko fare magawon e ba mo’maw’ ni nge fel’ u wan’ e piin nib ga’ u lan tafen e puf oloboch u Babylon. (Dan. 1:8-14) Pi n’ey e be dag rogon ni ke par e girdi’ rok Got ni yad mudugil ni fan ko tin nib fel’, ndemtrug e n’en nra buch rorad. Der rin’ed e n’en ni baadag boch e girdi’ ni ngar rin’ed ni bochan e ngar fel’gad u wan’rad; ma ku arrogodad.

5. Uw rogon ni gad ba thil ko fayleng u rogon ni gad ma sap nga mat’awun e girdi’?

⁵ Bochan ni gad be par nib mudugil ndarur da rusgad ma gathi aram e be yip’ fan ni gad ba gelan’; ara gad bod e piin ni yad ma togopuluw ni bochan e de puluw u wan’rad e n’en ni be rin’ e am. Ya, ke mudugil u wan’dad ni ngad folgad rok Jehovah ma gathi liw ko girdi’. Ra be togopuluw e motochiyel ko girdi’ ko motochiyel rok Got, ma de mo’maw’ e n’en ni ngad dugliyed ni ngad rin’ed. Gad ra fol rok Got ko bin ni ngad folgad rok e girdi’ ni bod e pi apostal ko bin nsom’on e chibog.

6. Mang fan nib fel’ ni ngaud folgad ko motochiyel rok Jehovah?

⁶ Mang e ke ayuwegdad ni nge fel’ mat’awun Got u wan’dad? Ba puluw u wan’dad e n’en ni bay ko Proverbs 3:5, 6 ni be gaar: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.” Ba mich u wan’dad ni gubin ban’en ni baadag Got ni ngad rin’ed ma ban’en nra yib angin ngodad. (Mu beeg e Deuteronomy 10:12, 13.) Arrogon, i weliy Jehovah murung’agen ngak piyu Israel ni gaar, ‘gag e En ni gu be skulnagem ni nge fel’ ngom, me gag e En ni ke k’aring ni ngam man ko kanawo’ ni thingar man riy.” Miki ulul ngay ni gaar: “O faan gomanga ga ra tiyan’um ko pi motochiyel rog! Ma ra yib e gapas ngom ni bod ba lul’, ma tin nib mat’aw rom e ra bod e n’ew nu maday.” (Isa. 48:17, 18, NW) Be pagan’dad ko pi thin nem. Ke mudugil u wan’dad nra yib angin ngodad nfaan gad ra fol ko pi motochiyel rok Got.

7. Mang e susun e ngad rin’ed ni faanra gathi ri gad manang fan reb e motochiyel ko Thin rok Got?

⁷ Ba fel’ u wan’dad mat’awun Jehovah ma gad ma fol rok nyugu aram rogon ni gathi rib tamilang u wan’dad boch ban’en ni ke yog ko Thin rok ni ngad rin’ed. Gathi ireray e michan’ nde tamilangan’uy u ban’en; ya ireray e pagan’. Be dag nib pagan’dad ni manang Jehovah e n’en nib fel’ ngodad. Fol ni gad be tay e be m’ug u daken e t’ufeg rodad, ya yoloy apostal John ni gaar: “Baaray fan ni nge t’uf Got rodad: fan e ngad folgad ko tin ni ke yog ni ngad rin’ed.” (1 John 5:3) Machane ku bay bang ko fol ni gad ma tay nsusun e dab da feked owchedad riy.

Ngad Skulnaged Gelngin e Nangan’ Rodad

8. Uw rogon ma ngada “filed rogon ko nangan’ rodad” ni nge nang e tin nib fel’ nge tin nib kireb e bay rogon nga mat’awun Jehovah?

⁸ Bible e be yog ngodad ni susun e ngad “filed rogon ko nangan’ rodad ni nge yog ni nang e tin nib fel’ nge tin nib kireb.” (Heb. 5:14) Ere, n’en ni gad be nameg e gathi ngad folgad ko motochiyel rok Got ndab da lemgad; ya, gad baadag ni nge yog nda “nanged e tin nib fel’ nge tin nib kireb” nib puluw ko tin baadag Jehovah ni ngad rin’ed. Gad baadag ni ngad guyed e gonop ko kanawo’ rok Jehovah, ya nge yog ndogned e thin ni yog fare psalmist ni gaar: “Thin rom e be par u fithik’ i lanin’ug.”​—Ps. 40:8.

9. Uw rogon ni ngad puluwniged e nangan’ rodad ko motochiyel rok Jehovah, ma mang fan nib ga’ fan ni ngad rin’ed ere n’ey?

⁹ Ba t’uf ni ngad fal’eged i lemnag e n’en ni gad be beeg u lan e Bible nfaanra nge fel’ u wan’dad e pi motochiyel rok Got. Bod ni nap’an ni gad ra fil ban’en ni baadag Jehovah ni ngad rin’ed, ma rayog ni ngad fithed ni lungudad: ‘Mang fan nib gonop ere motochiyel ara kenggin e motochiyel ney? Mang fan ni nggu fol riy? Mang e ke buch rok e piin ndar folgad ko fonow rok Got u murung’agen ere n’ey?’ Nap’an nra puluw e nangan’ rodad ko pi kanawo’ rok Jehovah, ma aram e rayog ni ngad dugliyed ban’en u rogon nib puluw ko n’en nib m’agan’ ngay. Rayog ni ngad “nanged e n’en nib m’agan’ Somol ngay” ma gad fol riy. (Efe. 5:17) Gathi gubin ngiyal’ nib mom ere n’ey.

Be Gay Satan Rogon ni Nge Kirebnag e Liw rok Got

10. Mang reb e kanawo’ ni ke kirebnag Satan mat’awun Got riy?

¹⁰ Ke n’uw nap’an ni be gay Satan rogon ni nge kirebnag e liw rok Got. Lem rok ndabun ni nge fol e boor e kanawo’ ni ke m’ug riy. Bod rogon, e yaram rok Got u murung’agen e mabgol ndanir tayfan. Boch e girdi’ e yad ma dugliy ni ngar pired nga taabang ndawor ni mabgol, ma boch e girdi’ e yad ma lemnag ni ngar dargad e mabgol rorad. Pi cha’ney e sana ba m’agan’rad ko n’en ni yog reb e ppin ni ma fal’eg e kachido ni gaar: “Ba mo’maw’ rok be’ nib pumoon ara be’ nib ppin ni nge par ni kemus ni taabe’ e ngaur pirew ni bod e mabgol.” Miki ulul ngay ni gaar: “Dag nang be’ nib yul’yul’ ara baadag ni nge par nib yul’yul’.” Ku be’ nib moon ni ku ma fal’eg e kachido ni boor e girdi’ ni manang e lemnag murung’agen e mabgol ni ka i un ngay kafram me gaar: “Der mich u wan’ug nni ngongliydad ni taabe’ e ngaud pired u nap’an e yafas rodad.” Machane ba fel’ nfaanra ngad fithed gadad ni nge lungudad, ‘Ba fel’ u wan’ug mat’awun Jehovah u murung’agen e mabgol, fa ke rin’ e lem ko girdi’ u murung’agen e mabgol ban’en ko lem rog, fa?’

11, 12. (a) Mang fan nib mo’maw’ ko piin fel’ yangaren ni nge fel’ u wan’rad mat’awun Jehovah? (b) Mu weliy ban’en ni ke buch rok be’ ni be dag wenegan nfaanra dab ni fol ko pi kenggin e motochiyel rok Jehovah.

¹¹ Gur reb e fel’ yangaren u lan e ulung rok Jehovah, fa? Faanra gur reb, ma Satan e baadag ni ngam lemnag ni mat’awun Jehovah e dabi yib angin ngom. “Tin ni ma ar’arnag e piin ni pagel” nge chagil ko towasar ko pi taab yangar rom e rayog ni k’aringem ngam lemnag nib mo’maw’ ni ngan fol ko pi motochiyel rok Got. (2 Tim. 2:22) Dab mu pag ni nge buch ere n’em rom. Mu athamgiliy ngam guy e gonop ko motochiyel rok Got. Bod ni, Bible e be yog ngom ni ngam “guy rogon nge dab mu ngongliy e ngongol ko darngal.” (1 Kor. 6:18) Ere bayay, mu fithem ko pi deer ni baaray ni gaar: ‘Mang fan nib gonop ere motochiyel nem? Faanra gu fol ko re n’ey, ma uw rogon nra yib angin ngog?’ Sana ga manang boch e piin ndar folgad ko fonow rok Got me yib wenegan nib kireb ngorad. Gur yad ba felfelan’ e chiney? Ba fel’ e yafas rorad e chiney ko kafram ni ur chaggad ko ulung rok Jehovah, fa? Kar pirieged reb i kanawoen e felfelan’ nde nang e tin ni ka bay e pi tapigpig rok Got, fa?​—Mu beeg e Isaiah 65:14.

¹² Mu lemnag e n’en ni yog reb e Kristiano boch kafram ni gaar: “Bochan ni dag fol ko motochiyel rok Jehovah, ma ke yib e AIDS ngog. Ba ga’ ni ma yib ngan’ug e pi duw ni baaram ni i yib e felfelan’ ngog riy ko pigpig ni ug tay ngak Jehovah.” Ke nang nde gonop ni ngan th’ab e motochiyel rok Jehovah ma susun e ngari tayfan. Pi motochiyel rok Jehovah e fan e nge ayuwegdad. Kemus ni medlip e wik nga tomren ni yoloy e ngi babyor nem me yim’. Rogon ni ke dag e n’en ni ke buch rok e dariy ban’en nib fel’ nrayog ni nge ognag Satan ngak e piin ni yad ra mang bang ko re m’ag nib kireb ney. Bochan e ir “chitamangin urngin e malulfith” ma boor ban’en ni ma micheg, machane dariy angin, ni bod e n’en ni micheg ngak Efa. (John 8:44) Riyul’ ni bin nth’abi fel’ e nge fel’ u wan’dad mat’awun Jehovah.

Mu Siyeg e Lem Ndabuy ni Ngan Fol

13. Mang reb e kanawo’ nrayog ni ngad siyeged e lem riy ndabuy ni ngan fol?

¹³ Ba t’uf ni ngad siyeged e lem ndabuy ni ngan fol nfaanra nge fel’ u wan’dad mat’awun Jehovah. Ngongol u fithik’ e tolangan’ e rayog ni k’aringdad ngad lemnaged nde t’uf ni nge pow’iydad be’. Bod nrayog ni ngad siyeged ndab da folgad ko fonow rok e piin ni yad be yog e thin rok e girdi’ rok Got. Ke fal’eg Got reb e yaram ni pi tapigpig nib yul’yul’ mab gonop e ngar pied e ggan ni machib ko ngiyal’ nib t’uf riy. (Matt. 24:45-47) Susun e ngad nanged u fithik’ e sobut’an’ ni ireray e kanawo’ ni ma ayuweg Jehovah e girdi’ rok riy e ngiyal’ ney. Ngad boded e pi apostal ni yad ba yul’yul’. Nap’an ni ke magawon laniyan’ boch pi gachalpen, me fith Jesus ngak e pi apostal rok ni gaar: “Ma gimed - gimed ba adag ni ngkum paged gag ngam marod?” Me fulweg Peter ni gaar: “Somol, i mini’ e gamad ra yan ngak? Yi gur e bay fapi thin rom ni ir e ma pi’ e yafos ndariy n’umngin nap’an ngak e girdi’.”​—John 6:66-68.

14, 15. Mang fan ni ngad folgad ko fonow ko Bible u fithik’ e sobut’an’?

¹⁴ Nge fel’ u wan’uy mat’awun Jehovah e ba muun ngay e fol ni ngad tayed ko fonow ni bay ko Thin rok. Bod ni fare tapigpig nib yul’yul’ mab gonop e ka aram nap’an i yib ni be fonownagdad ni nguud “pired ni gadad be od ma ba tamilangan’dad.” (1 Thess. 5:6) Biney e fonow e ba puluw ko ngiyal’ ney ko tin tomren e rran ni boor e girdi’ ni “ke mus ni yad e yad be lemnagrad, ma kari gel e chogow rorad.” (2 Tim. 3:1, 2) Rayog ni nge kirebnagdad e mit ney e ngongol ni ke garer? Arrogon. Gad ra nameg e tin ndariy rogon ko tirok Got ban’en ma rayog ni k’aringdad nge dab kud tedan’dad ko tha’ u thildad Got, ara rayog ni af ngodad ngongolen chogowen e chugum. (Luke 12:16-21) Ere, rib gonop ni nge fel’ u wan’dad e fonow ko Bible ma gad siyeg e bin baaray e kanawo’ ko yafas ni fel’ ngak ni ir e ke garer u lan e fayleng rok Satan!​—1 John 2:16.

¹⁵ Ggan ko tirok Got ban’en ni ma yib rok fare tapigpig nib yul’yul’ mab gonop e yima pi’ ko pi ulung i yan u daken e pi piilal ni kan dugliyrad. Be fonownagdad e Bible ni gaar: “Mu folgad ko thin rok e piin ni yad be yog e thin romed. Ya yad be matanagiy lanin’med ndarir talgad, ni bochan e thingar rogned ngak Got rogon e maruwel rok ni ur ngongliyed. Ya faan gimed ra fol rorad ma ra ur ngongliyed e maruwel rorad nib felan’rad ngay; ya faanra dangay ma bay ur ngongliyed nib taganan’rad, ma aram e dabi fel’ rogomed riy.” (Heb. 13:17) Gur, re n’ey e be yip’ fan ni pi piilal ko ulung e dabiyog ni ngar olobochgad? Ri danga’! Rib tamilang rogon ni ma guy Got e meewar rorad nib thil nga rogon nrayog ni guy e girdi’. Machane, ka baadag ni ngad folgad. Gad ra fol ko piin piilal ni yugu aram rogon ndawora flontgad, ma aram e mich riy nib fel’ u wan’dad mat’awun Jehovah.

Feni Ga’ Fan e Sobut’an’

16. Uw rogon ni ngad daged ni gad be tayfan Jesus ni ir Lolugen e ulung ko Kristiano?

¹⁶ Gubin ngiyal’ nthingar ud lemnaged ni Jesus e ir Lolugen e ulung. (Kol. 1:18) Aram reb i fan ni gad ma fol u rogon ni ma pow’iydad e pi piilal ni kan dugliyrad, ma gad “t’ufegrad ni bochan e maruwel ni yad be rin’.” (1 Thess. 5:12, 13) Arrogon, rayog ni nge dag e piin piilal ko ulung ni mus ngorad ma ka yad be fol u rogon ni yad be pi’ e thin rok Got ngak e ulung ni gathi yad e lem rorad. Darur “ranod nga wuru’ e tin ni kan yoloy” ni fan e ngar rin’ed e tin ni yad be lemnag.​—1 Kor. 4:6, NW.

17. Mang fan ni bay e riya’ riy nfaanra gad baadag ni nga unog e sorok ngodad?

¹⁷ Gubin e piin ni gothon e ulung e thingar ra kol ayuwgad ndab ra gayed rogon ni nga u nog e sorok ngorad. (Prov. 25:27) Ba tamilang ni aram e wup ni aw reb i gachalpen Jesus ngay ni mada’nag apostal John. I yoloy ni gaar: “Diotrefes, ni be’ ni ba adag ni ir e nge yog e thin rorad e dabun ni nge fol ko thin ni ku gog. Bay gub mu gu weliy ngomed urngin ban’en ni ke rin’: ni pi n’en nib kireb ni ke yog ni murung’agmad nge urngin e tin ni be yog nde riyul’!” (3 John 9, 10) Bay ban’en nrayog ni ngan fil ko re n’em ni ki mus ngodad ko ngiyal’ ney. Bay fan nib fel’ nfaanra bay e mit ney e lem rodad mab fel’ ni ngad chuweged. Be yog e Bible ngodad ni gaar: “Be’ nib tolangan’ e ra gafgow ma be’ nib ufanthin e ra sobut’.” Piin nib fel’ u wan’rad mat’awun Got e thingar ra digeyed fare wup ni ngan rin’ ban’en ndan pi’ mat’awuy ni ngan rin’.​—Prov. 11:2; 16:18, NW.

18. Mang e ra ayuwegdad nge fel’ mat’awun Jehovah u wan’dad?

¹⁸ Arrogon, mu nameg ni ngam siyeg e lem ko fayleng ndab ni fol me fel’ u wan’um mat’awun Jehovah. Gubin ngiyal’ mag fal’eg i lemnag fare tow’ath ni bay rom ni aram e pigpig ni ga be tay ku Jehovah. Fare n’en ni ga bay u fithik’ e girdi’ rok Got e mich riy ni ir e ke pow’iyem u daken e kan ni thothup rok. (John 6:44) Dab mu lemnag ndariy fan e tha’ u thilmew Got. Mu rin’ e tin nrayog u lan e yafas rom ngam dag ni ga be siyeg e lem dar ma fol mag dag nib fel’ u wan’um mat’awun Jehovah.

Ka Ga Manang?

• Mang e ba muun ko nge fel’ mat’awun Jehovah u wun’dad?

• Uw rogon nib l’ag rogon ni gad ma skulnag e nangan’ rodad ko nge fel’ mat’awun Jehovah u wan’dad?

• Mang boch e kanawo’ ni ma gay Satan rogon ni nge kirebnag mat’awun Got riy?

• Mang nib ga’ fan e sobut’an’ nfaanra nge fel’ u wan’dad mat’awun Jehovah?

[Picture on page 18]

“Thingar gu folgad rok Got ko bin ni nggu folgad rok e girdi’”

[Picture on page 20]

Gubin ngiyal’ nib gonop ni ngan fol ko pi motochiyel rok Got