Mu Lek Kristus ma Ngam Pired nib Fel’ e Ngongol Romed
1. Uw rogon nib m’ag kenggin e convention ko ngongol nib fel’?
1 Be weliy e Bible u murung’agen Jehovah ni ir fare Pilung ko palpal th’ib ma rogon nib fel’ e ngongol rok e ke mang madan. (Ps. 104:1) Gubin ngiyal’ ma ke non Jesus ma ke ngongol u rogon nra n’uf Chitamangin nge tin ni ma pi’. (John 17:4) Gad gubin ma rayog ni ngad folwokgad rok Jesus ma ngad n’ufed Jehovah u nap’an fare District Convention ni “Mu Lek Kristus!”
2. Uw rogon ma gad be n’uf Jehovah u nap’an ni gad be fl’eg rogon ni ngad uned ko ra reb e muulung?
2 Liyor nib M’ag ko Ngongol nib Fel’: Rayog ni ngad n’ufed Jehovah ni faan gad ra un ko mur nib spiritual ni kan fl’eg rogon ni fan ngodad. Kam weliy ko ani ga’ ko maruwel rom ma kam yarmiy ni ngam un ko convention u ra reb e rran? Kam turguy ni ngam mub nib pay ni rayog ni ngam gayiy e chiya ni ngam par riy ma ngam un ko tang nge meybil? Kam tafinaynag rogon ni ga ra fl’eg e ggan ya ngam abichgad u taabang pi walagem u nap’an e convention? U tabolngin ra reb e muulung ma fare chairman e ra piningdad ni ngad pared ko chiya rodad u m’on nra tabab e musik ma susun ni ngad talgad ko sabethin ma ngad pared ko chiya rodad.
3. Uw rogon ma faan gad ra tiyan’ ko muulung ma gad be n’uf e liyor rodad?
3 Maku faan gad ra tiyan’ ko welthin ma gad be n’uf e Chitamangidad nu tharmiy. Bay reb e reporter ni ke guy fare district convention ma tomur riy me yog ni piin nra guy e re muulung nem e yad ra ngat nga rogon “fene fel’ e ngongol ko piin ni be un ngay ya yad be tiyan’ ko n’en ni yibe weliy ma yad be tay fan.” Miki weliy u murung’agen e “pi bitir ni yad boor. . . , ma yad gubin e yad be par nib llowan’ ma yad be pithig e Bible rorad.” Nap’an e muulung ma gathi aram e ngiyal’ ni ngan nonnon fa ngan text message, fa ngan yanyan. Susun ni nge par e pi fel’ yangaren u charen e gallabthir rorad ya aram rogon nrayog ko pi gallabthir ni ngar ayuweged e bitir rorad nge yib angin ngorad. (Deut. 31:12; Prov. 29:15) Athamgil ni aram rogon e be dag e tay fan ko yugu boch e girdi’ nge tay fan ko ggan nib spiritual ni yibe pi’.
4. Mang fan ni susun ni ngad don’ed e mad nrogon yalen e munmad ko Kristiano u nap’an e convention?
4 Munmad nib Yalen: Boor e girdi’ ma kar pininged e magar ko fare welthin ko district convention ko fa binem e duw ni “Gubin Ngiyal’ ma Ngam Dag e Ngongol ko Kristiano nib Fel’,” ya kan tamilangnag ni pi tapigpig rok Got ma susun ni ngar athamgilgad ni ngar ron’ed e mad nib puluw ko Kristiano. Re duw ney ma susun ni ngad tedan’dad ko re n’ey. Yaadad e be dag ko uw rogon Jehovah u wan’dad ma gad be lemnag ni gad ba taw’ath ni gad e Pi Mich Rok. Susun ni ngad don’ed e mad nib “m’ag ngak e piin ni yad be dag ni yad girdien Got.”—1 Tim. 2:9, 10.
5. Uw rogon nrayog ni ngad pared nib yalen yaadad u nap’an ni gad be un ko fafel u lan e mach ni bay e convention riy?
5 Ke mus u nap’an ni gad be un ko muulung ma susun ni ngad don’ed e mad nib yalen? Dabda paged talin ni boor e girdi’ e ra guydad ni bay e convention badge ko mad rodad. Susun ni gad ba lingagil u fithik’ e girdi’ ni bochan yaadad nib yalen. Ere mus u nap’an ni gad be fafel ma susun ni ngad don’ed e mad ni be dag ni gad e tapigpig rok Got ma kad uned ko milekag ni bochan e convention ko Kristiano ma susun ndabda chuwgad ko jean, ara shorts, ara T-shirt. Re n’ey e ra pi’ e mich ko girdien e binaw! Ma felan’ Jehovah ni ngad don’ed e mad ni be dag ni gad e tapigpig rok.
6. Mang angin ni yib ko ngongol ko Kristiano?
6 Angin ni Yib Riy: Ngongol ko Kristiano nib fel’ u nap’an e pi convention rodad e be pithig e kanawo’ ni ngan machib u fithik’ e sabethin ma ma felan’ e girdi’ ngay. Tomren reb e convention ma ke yog be’ ni official ni gaar: “Rib fel’ e ngongol ko pi girdi’ ney. Aram rogon ni ba adag Got ni ngad pared.” Gad ra ngongol nib fel’ ma be dag e tay fan ko girdi’ ma be n’uf Jehovah. (1 Pet. 2:12) Ma be dag ni bay madgun Got u wan’dad ma gad be tay fan e taw’ath ni be skulnagdad e Chitamangidad. (Heb. 12:27, 28) Ngad athamgilgad ni ngad pared nib fel’ e ngongol rodad u nap’an ni gad be sonnag fare District Convention ko re duw ney ni “Mu Lek Kristus!”
[Kahol ko page 5]
Pi N’en ni Fan ko Convention
◼ Seat Saving: Ke mus ni ngan savenag e seat ara chiya ko piin ni gimed be milekag u taabang ara girdi’ ko tabinaw rom.
◼ Abich ko Misiw: Amu feked e ggan romed iyib ko convention ma dabmu chuwgad ni ngam abichgad u bang u nap’an ni kan tal ko muulung ko misiw.
◼ Ngan Pi’ e Ayuw: Tolang puluwon ni ngan tay e district convention. Rayog ni ngad daged ni gad be tay fan u daken e ayuw ni gad ma pi’.