Ẹ Máa Fi Ìrẹ̀lẹ̀ Tẹrí Ba Fáwọn Olùṣọ́ Àgùntàn Onífẹ̀ẹ́

“Ẹ jẹ́ onígbọràn sí àwọn tí ń mú ipò iwájú láàárín yín, kí ẹ sì jẹ́ ẹni tí ń tẹrí ba.”—HÉBÉRÙ 13:17.

1, 2. Àwọn ẹsẹ Ìwé Mímọ́ wo ló fi hàn pé Jèhófà àti Jésù jẹ́ Olùṣọ́ Àgùntàn onífẹ̀ẹ́?

JÈHÓFÀ ỌLỌ́RUN àti Ọmọ rẹ̀, Jésù Kristi, jẹ́ Olùṣọ́ Àgùntàn onífẹ̀ẹ́. Aísáyà sọ àsọtẹ́lẹ̀ pé: “Wò ó! Jèhófà Olúwa Ọba Aláṣẹ tìkára rẹ̀ yóò wá, àní gẹ́gẹ́ bí alágbára, apá rẹ̀ yóò sì máa ṣàkóso fún un. . . . Bí olùṣọ́ àgùntàn ni yóò ṣe olùṣọ́ àgùntàn agbo ẹran ọ̀sìn rẹ̀. Apá rẹ̀ ni yóò fi kó àwọn ọ̀dọ́ àgùntàn jọpọ̀; oókan àyà rẹ̀ sì ni yóò gbé wọn sí. Àwọn tí ń fọ́mọ lọ́mú ni yóò máa rọra dà.”—Aísáyà 40:10, 11.

² Àsọtẹ́lẹ̀ ìmúpadàbọ̀sípò yẹn kọ́kọ́ nímùúṣẹ nígbà táwọn Júù tó ṣẹ́ kù padà wá sílẹ̀ Júdà lọ́dún 537 ṣáájú Sànmánì Kristẹni. (2 Kíróníkà 36:22, 23) Ó tún nímùúṣẹ nígbà tí Kírúsì Títóbi Ju, ìyẹn Jésù Kristi, dá ìyókù àwọn ẹni àmì òróró nídè kúrò ní “Bábílónì Ńlá” lọ́dún 1919. (Ìṣípayá 18:2; Aísáyà 44:28) Òun ni “apá” Jèhófà tó ń ṣàkóso, ó ń kó àwọn àgùntàn jọ, ó sì rọra ń dà wọ́n. Jésù fúnra rẹ̀ sọ pé: “Èmi ni olùṣọ́ àgùntàn àtàtà, mo sì mọ àwọn àgùntàn mi, àwọn àgùntàn mi sì mọ̀ mí.”—Jòhánù 10:14.

3. Báwo ni Jèhófà ṣe fi hàn pé òun bìkítà nípa ohun táwọn alábòójútó ń ṣe sáwọn àgùntàn òun?

³ Àsọtẹ́lẹ̀ inú Aísáyà 40:10, 11 jẹ́ ká rí i pé tìfẹ́tìfẹ́ ni Jèhófà ń ṣe olùṣọ́ àgùntàn àwọn èèyàn rẹ̀. (Sáàmù 23:1-6) Nígbà tí Jésù wà lẹ́nu iṣẹ́ òjíṣẹ́ rẹ̀ lórí ilẹ̀ ayé, òun náà fìfẹ́ bá àwọn ọmọ ẹ̀yìn rẹ̀ lò àtàwọn èèyàn lápapọ̀. (Mátíù 11:28-30; Máàkù 6:34) Jèhófà àti Jésù kórìíra ìwà àìláàánú àwọn olùṣọ́ àgùntàn, ìyẹn àwọn aṣáájú Ísírẹ́lì, tí wọ́n ń hùwà lọ́nà tó tini lójú nípa pípa àgbò wọn tì, tí wọ́n sì máa ń yàn wọ́n jẹ. (Ìsíkíẹ́lì 34:2-10; Mátíù 23:3, 4, 15) Jèhófà ṣèlérí pé: “Èmi yóò gba àwọn àgùntàn mi là, wọn kì yóò di ohun ìpiyẹ́ mọ́; ṣe ni èmi yóò sì ṣe ìdájọ́ láàárín àgùntàn àti àgùntàn. Ṣe ni èmi yóò gbé olùṣọ́ àgùntàn kan dìde sórí wọn, òun yóò sì máa bọ́ wọn, àní ìránṣẹ́ mi Dáfídì. Òun fúnra rẹ̀ yóò máa bọ́ wọn, òun fúnra rẹ̀ yóò sì di olùṣọ́ àgùntàn wọn.” (Ìsíkíẹ́lì 34:22, 23) Ní àkókò òpin yìí, Jésù Kristi, tó jẹ́ Dáfídì Títóbi Jù, ni “olùṣọ́ àgùntàn” tí Jèhófà ti yàn sórí gbogbo àwọn ìránṣẹ́ Rẹ̀ lórí ilẹ̀ ayé, ìyẹn àwọn Kristẹni tá a fẹ̀mí yàn àtàwọn “àgùntàn mìíràn.”—Jòhánù 10:16.

Àwọn Ẹ̀bùn Tí Ọlọ́run fún Ìjọ

4, 5. (a) Ẹ̀bùn ṣíṣeyebíye wo ni Jèhófà fún àwọn èèyàn rẹ̀ lórí ilẹ̀ ayé? (b) Ẹ̀bùn wo ni Jésù fún ìjọ rẹ̀?

⁴ Jèhófà fún ìjọ Kristẹni ní ẹ̀bùn ṣíṣeyebíye kan, ó gbé “olùṣọ́ àgùntàn kan,” ìyẹn Jésù Kristi dìde láti bójú tó àwọn ìránṣẹ́ Rẹ̀ lórí ilẹ̀ ayé. Aṣáájú tí Ọlọ́run fúnni yìí ni ìwé Aísáyà 55:4 sọ àsọtẹ́lẹ̀ nípa rẹ̀ pé: “Wò ó! Mo ti fi í fún àwọn àwùjọ orílẹ̀-èdè gẹ́gẹ́ bí ẹlẹ́rìí, gẹ́gẹ́ bí aṣáájú àti aláṣẹ fún àwọn àwùjọ orílẹ̀-èdè.” Àtinú gbogbo àwọn orílẹ̀-èdè, ẹ̀yà, ènìyàn àti ahọ́n la ti kó àwọn Kristẹni ẹni àmì òróró àti “ogunlọ́gọ̀ ńlá” jọ. (Ìṣípayá 5:9, 10; 7:9) Wọ́n para pọ̀ jẹ́ ìjọ kan tó kárí ayé, ìyẹn “agbo kan,” lábẹ́ ìdarí “olùṣọ́ àgùntàn kan,” ìyẹn Kristi Jésù.

⁵ Jésù náà tún fi ẹ̀bùn ṣíṣeyebíye kan fún ìjọ rẹ̀ tó wà lórí ilẹ̀ ayé. Ó ti pèsè àwọn olùṣọ́ àgùntàn tí wọ́n jẹ́ olóòótọ́ tí wọ́n sì ń fara wé Jèhófà àti Jésù nípa ṣíṣe olùṣọ́ àgùntàn agbo tìyọ́nútìyọ́nú. Àpọ́sítélì Pọ́ọ̀lù sọ̀rọ̀ nípa ẹ̀bùn onífẹ̀ẹ́ yìí nínú lẹ́tà tó kọ sáwọn Kristẹni ní Éfésù. Ó kọ̀wé pé: “‘Nígbà tí ó gòkè lọ sí ibi gíga lókè, ó kó àwọn òǹdè lọ; ó fúnni ní àwọn ẹ̀bùn tí ó jẹ́ ènìyàn.’ Ó sì fúnni ní àwọn kan gẹ́gẹ́ bí àpọ́sítélì, àwọn kan gẹ́gẹ́ bí wòlíì, àwọn kan gẹ́gẹ́ bí ajíhìnrere, àwọn kan gẹ́gẹ́ bí olùṣọ́ àgùntàn àti olùkọ́, láti lè ṣe ìtọ́sọ́nàpadà àwọn ẹni mímọ́, fún iṣẹ́ òjíṣẹ́, fún gbígbé ara Kristi ró.”—Éfésù 4:8, 11, 12.

6. Kí ni ìwé Ìṣípayá 1:16, 20 pe àwọn alábòójútó tó jẹ́ ẹni àmì òróró tí wọ́n wà nínú ìgbìmọ̀ àwọn alàgbà nígbà yẹn lọ́hùn-ún, kí la sì lè sọ nípa àwọn alàgbà tó jẹ́ ara àgùntàn mìíràn?

⁶ Àwọn “ẹ̀bùn tí ó jẹ́ ènìyàn” wọ̀nyí ni àwọn alábòójútó, ìyẹn àwọn alàgbà tí Jèhófà àti Ọmọ rẹ̀ yàn nípasẹ̀ ẹ̀mí mímọ́, láti máa ṣe olùṣọ́ àwọn àgùntàn tìrẹ̀lẹ̀tìrẹ̀lẹ̀. (Ìṣe 20:28, 29) Níbẹ̀rẹ̀, Kristẹni ẹni àmì òróró ni gbogbo àwọn alábòójútó wọ̀nyí. Nínú ìwé Ìṣípayá 1:16, 20, Bíbélì pe àwọn tó para pọ̀ jẹ́ ìgbìmọ̀ àwọn alàgbà nínú àwọn ìjọ àwọn ẹni àmì òróró ní “ìràwọ̀” tàbí “àwọn áńgẹ́lì” ní ọwọ́ ọ̀tún Kristi, ìyẹn ni pé òun ló ń darí wọn. Àmọ́ ní àkókò òpin yìí, pẹ̀lú bí iye àwọn alábòójútó tó jẹ́ ẹni àmì òróró tó wà lórí ilẹ̀ ayé ṣe ń dín kù, èyí tó pọ̀ jù lára àwọn alàgbà tó wà nínú àwọn ìjọ báyìí ló jẹ́ ara àwọn àgùntàn mìíràn. Níwọ̀n bó ti jẹ́ pé àwọn aṣojú Ìgbìmọ̀ Olùdarí ló yan àwọn wọ̀nyí lábẹ́ ìtọ́sọ́nà ẹ̀mí mímọ́, a lè sọ pé àwọn náà wà lábẹ́ ọwọ́ ọ̀tún (tàbí, lábẹ́ ìdarí) Olùṣọ́ Àgùntàn Àtàtà náà, Jésù Kristi. (Aísáyà 61:5, 6) Níwọ̀n bí àwọn alàgbà tó wà nínú ìjọ wa sì ti ń tẹrí ba fún Kristi tó jẹ́ Orí ìjọ, ó yẹ káwa náà fọwọ́ sowọ́ pọ̀ pẹ̀lú wọn dáadáa.—Kólósè 1:18.

Ìgbọràn àti Ìtẹríba

7. Ìmọ̀ràn wo ni àpọ́sítélì Pọ́ọ̀lù fún wa nípa bó ṣe yẹ ká máa ṣe sáwọn Kristẹni tó jẹ́ alábòójútó?

⁷ Àwọn Olùṣọ́ Àgùntàn wa tó wà lọ́run, ìyẹn Jèhófà Ọlọ́run àti Jésù Kristi, fẹ́ ká jẹ́ onígbọràn ká si máa tẹrí ba fáwọn olùṣọ́ àgùntàn tí wọ́n gbé iṣẹ́ lé lọ́wọ́ nínú ìjọ. (1 Pétérù 5:5) Ọlọ́run mí sí àpọ́sítélì Pọ́ọ̀lù láti kọ̀wé pé: “Ẹ máa rántí àwọn tí ń mú ipò iwájú láàárín yín, tí wọ́n ti sọ ọ̀rọ̀ Ọlọ́run fún yín, bí ẹ sì ti ń fẹ̀sọ̀ ṣàgbéyẹ̀wò bí ìwà wọ́n ti rí, ẹ máa fara wé ìgbàgbọ́ wọn. Ẹ jẹ́ onígbọràn sí àwọn tí ń mú ipò iwájú láàárín yín, kí ẹ sì jẹ́ ẹni tí ń tẹrí ba, nítorí wọ́n ń ṣọ́ ẹ̀ṣọ́ lórí ọkàn yín bí àwọn tí yóò ṣe ìjíhìn; kí wọ́n lè ṣe èyí pẹ̀lú ìdùnnú, kì í sì í ṣe pẹ̀lú ìmí ẹ̀dùn, nítorí èyí yóò ṣe ìpalára fún yín.”—Hébérù 13:7, 17.

8. Kí ni Pọ́ọ̀lù rọ̀ wá pé ká “fẹ̀sọ̀ ṣàgbéyẹ̀wò” rẹ̀, ọ̀nà wo ló sì yẹ ká gbà “jẹ́ onígbọràn”?

⁸ Kíyè sí i pé àpọ́sítélì Pọ́ọ̀lù ní ká “fẹ̀sọ̀ ṣàgbéyẹ̀wò,” tàbí ká fara balẹ̀ kíyè sí ìṣòtítọ́ àwọn alàgbà wọ̀nyí ká sì fara wé ìgbàgbọ́ irú àwọn alàgbà bẹ́ẹ̀. Yàtọ̀ síyẹn, ó tún ní ká ṣègbọràn ká sì máa tẹ̀ lé ìtọ́sọ́nà àwọn ọkùnrin tá a yàn sípò wọ̀nyí. Ọ̀gbẹ́ni R. T. France tó ń ṣèwádìí nípa Bíbélì ṣàlàyé pé nínú èdè Gíríìkì ìpilẹ̀ṣẹ̀, ọ̀rọ̀ tá a tú sí “jẹ́ onígbọràn” níbí yìí kọ́ ni “wọ́n sábà máa ń lò fún ìgbọràn, kàkà bẹ́ẹ̀ ohun tí ọ̀rọ̀ ìpilẹ̀ṣẹ̀ náà túmọ̀ sí ní olówuuru ni ‘kéèyàn yí èrò rẹ̀ padà,’ kó jẹ́ pé tinútinú ló fi fara mọ́ ìtọ́sọ́nà.” Kì í ṣe nítorí pé Ọ̀rọ̀ Ọlọ́run ní ká ṣègbọràn sáwọn alàgbà nìkan la ṣe ń ṣe bẹ́ẹ̀, àmọ́ ìdí tá a tún fi ń ṣe bẹ́ẹ̀ ni pé wọ́n ti jẹ́ ká mọ̀ pé àwọn ohun tó ní í ṣe pẹ̀lú Ìjọba Ọlọ́run àtàwọn ohun tó máa ṣe wá láǹfààní ló jẹ àwọn lọ́kàn. Dájúdájú, inú wa yóò dùn tó bá jẹ́ pé tinútinú la fi fara mọ́ bí wọ́n ṣe ń darí wa.

9. Kí nìdí tá a fi gbọ́dọ̀ jẹ́ “ẹni tí ń tẹrí ba” ní àfikún sí jíjẹ́ onígbọràn?

⁹ Àmọ́, kí la ó ṣe tí kò bá dá wa lójú pé bó ṣe yẹ káwọn alàgbà bójú tó ọ̀ràn kan ni wọ́n ṣe bójú tó o? Ibi tó ti yẹ ká tẹrí ba gan-an nìyẹn. Ó rọrùn láti ṣègbọràn nígbà tí gbogbo nǹkan bá ṣe kedere sí wa tá a sì fara mọ́ ìpinnu wọn, àmọ́ a ó fi hàn pé lóòótọ́ la jẹ́ onítẹríba tá a bá gbà láti fara mọ́ ohun kan, kódà bá ò tiẹ̀ lóye ìdí tó fi rí bẹ́ẹ̀. Pétérù tó wá di àpọ́sítélì níkẹyìn fi irú ìtẹríba yìí hàn.—Lúùkù 5:4, 5.

Ìdí Mẹ́rin Tó Fi Yẹ Ká Bá Àwọn Alábòójútó Fọwọ́ Sowọ́ Pọ̀ Tinútinú

10, 11. Ọ̀nà wo làwọn alábòójútó gbà “sọ ọ̀rọ̀ Ọlọ́run” fún àwọn Kristẹni ní ọ̀rúndún kìíní àti lóde òní?

¹⁰ Nínú ìwé Hébérù 13:7, 17 tá a fa ọ̀rọ̀ inú rẹ̀ yọ níṣàájú, àpọ́sítélì Pọ́ọ̀lù fún wa ní ìdí mẹ́rin ọ̀tọ̀ọ̀tọ̀ tó fi yẹ ká jẹ́ onígbọràn sáwọn alábòójútó ká sì máa tẹrí ba fún wọn. Ìdí àkọ́kọ́ ni pé wọ́n “ti sọ ọ̀rọ̀ Ọlọ́run” fún wa. Rántí pé ohun tí “àwọn ẹ̀bùn tó jẹ́ ènìyàn” tí Jésù fún ìjọ wà fún ni “ìtọ́sọ́nàpadà àwọn ẹni mímọ́.” (Éfésù 4:11, 12) Jésù tọ́ èrò àwọn Kristẹni ọ̀rúndún kìíní sọ́nà, ó sì mú kí wọ́n tún ìwà wọn ṣe nípasẹ̀ àwọn olùṣọ́ àgùntàn tó jẹ́ olóòótọ́, ìyẹn àwọn tí Ọlọ́run mí sí díẹ̀ lára wọn láti kọ lẹ́tà sáwọn ìjọ. Ó lo àwọn alábòójútó tá a fẹ̀mí yàn yìí láti tọ́ àwọn Kristẹni ìjímìjí sọ́nà àti láti gbé wọn ró.—1 Kọ́ríńtì 16:15-18; 2 Tímótì 2:2; Títù 1:5.

¹¹ Lóde òní, Jésù ń darí wa nípasẹ̀ “ẹrú olóòótọ́ àti olóye,” tí Ìgbìmọ̀ Olùdarí àtàwọn alàgbà tá a yàn sípò ń ṣojú fún. (Mátíù 24:45) Nítorí ọ̀wọ̀ tá a ní fún “olórí olùṣọ́ àgùntàn” wa, Jésù Kristi, la ṣe ń fi ìmọ̀ràn Pọ́ọ̀lù yẹn sílò pé: “Kí ẹ ní ẹ̀mí ìkanisí fún àwọn tí ń ṣiṣẹ́ kára láàárín yín, tí wọ́n ń ṣe àbójútó yín nínú Olúwa, tí wọ́n sì ń ṣí yín létí.”—1 Pétérù 5:4; 1 Tẹsalóníkà 5:12; 1 Tímótì 5:17.

12. Báwo ni àwọn alábòójútó ṣe “ń ṣọ́ ẹ̀ṣọ́ lórí ọkàn [wa]”?

¹² Ìdí kejì tó fi yẹ ká fọwọ́ sowọ́ pọ̀ pẹ̀lú àwọn alábòójútó ni pé “wọ́n ń ṣọ́ ẹ̀ṣọ́ lórí ọkàn [wa].” Tí wọ́n bá rí i pé à ń ṣe ohunkóhun tó lè ba àjọṣe àárín àwa àti Jèhófà jẹ́, kíá ni wọ́n máa ń fún wa ní ìmọ̀ràn tá a nílò kí wọ́n lè tọ́ wa sọ́nà padà. (Gálátíà 6:1) Ọ̀rọ̀ Gíríìkì tá a tú sí “ṣọ́ ẹ̀ṣọ́” ní olówuuru túmọ̀ sí kéèyàn “má ṣe sùn.” Ọ̀jọ̀gbọ́n kan nínú ẹ̀kọ́ Bíbélì sọ pé ó “ní í ṣe pẹ̀lú wíwà tí olùṣọ́ àgùntàn kan máa ń wà lójúfò ní gbogbo ìgbà.” Yàtọ̀ sí pé àwọn alàgbà máa ń wà lójúfò nípa tẹ̀mí, wọn tiẹ̀ lè má rí oorun sùn lóru nígbà míì nítorí àníyàn tí wọ́n máa ń ṣe lórí ìlera wa nípa tẹ̀mí. Ǹjẹ́ kò yẹ ká máa fọwọ́ sowọ́ pọ̀ tinútinú pẹ̀lú irú àwọn olùṣọ́ àgùntàn onífẹ̀ẹ́ bẹ́ẹ̀, tí wọ́n ń sa gbogbo ipá wọn láti fara wé àbójútó onífẹ̀ẹ́ ti Jésù Kristi, ẹni tó jẹ́ “olùṣọ́ àgùntàn ńlá ti àwọn àgùntàn”?—Hébérù 13:20.

13. Ta làwọn alábòójútó àti gbogbo Kristẹni máa jíhìn fún, àwọn ọ̀nà wo ni wọ́n sì máa gbà jíhìn?

¹³ Ìdí kẹta tó fi yẹ ká bá àwọn alábòójútó fọwọ́ sowọ́ pọ̀ tinútinú ni pé, wọ́n ń ṣọ́ ẹ̀ṣọ́ lórí wa “bí ẹni tí yóò ṣe ìjíhìn.” Àwọn alábòójútó máa ń rántí pé àwọn jẹ́ olùṣọ́ àgùntàn tó ń sìn lábẹ́ àwọn Olùṣọ́ Àgùntàn tó wà lọ́run, ìyẹn Jèhófà Ọlọ́run àti Jésù Kristi. (Ìsíkíẹ́lì 34:22-24) Jèhófà ni Ẹni tó ni àwọn àgùntàn, tí “ó fi ẹ̀jẹ̀ Ọmọ òun fúnra rẹ̀ rà,” ó sì máa mú káwọn alàgbà tá a yàn sípò jíhìn fún ọ̀nà tí wọ́n ń gbà bójú tó agbo Rẹ̀, èyí tó gbọ́dọ̀ jẹ́ pẹ̀lú “ọwọ́ pẹ̀lẹ́tù.” (Ìṣe 20:28, 29) Nípa bẹ́ẹ̀, gbogbo wa la máa jíhìn fún Jèhófà nípa bá a ṣe tẹ̀ lé ìtọ́sọ́nà rẹ̀ sí. (Róòmù 14:10-12) Tá a bá ń ṣègbọràn sáwọn alàgbà tá a yàn sípò, ó fi hàn pé à ń tẹrí ba fún Kristi tó jẹ́ Orí ìjọ nìyẹn.—Kólósè 2:19.

14. Kí ló lè mú káwọn alábòójútó máa ṣe iṣẹ́ ìsìn wọn “pẹ̀lú ìmí ẹ̀dùn,” kí nìyẹn sì máa yọrí sí?

¹⁴ Pọ́ọ̀lù mẹ́nu kan ìdí kẹrin tó fi yẹ ká fi ìrẹ̀lẹ̀ tẹrí ba fún àwọn alábòójútó. Ó kọ̀wé pé: “Kí wọ́n lè ṣe èyí pẹ̀lú ìdùnnú, kì í sì í ṣe pẹ̀lú ìmí ẹ̀dùn, nítorí èyí yóò ṣe ìpalára fún yín.” (Hébérù 13:17) Tá a bá wo iṣẹ́ bàǹtàbanta táwọn alàgbà ń ṣe nínú kíkọ́ni, ṣíṣe ìbẹ̀wò olùṣọ́ àgùntàn, mímú ipò iwájú nínú iṣẹ́ ìwàásù, bíbójú tó ìdílé wọn, àti yíyanjú àwọn ìṣòro nínú ìjọ, a ó rí i pé iṣẹ́ ńlá ni wọ́n ń ṣe. (2 Kọ́ríńtì 11:28, 29) Tá a bá kọ̀ láti bá wọn fọwọ́ sowọ́ pọ̀, ńṣe la wulẹ̀ ń dá kún iṣẹ́ wọn. Èyí sì lè mú kí wọ́n máa mí “ìmí ẹ̀dùn.” Tá ò bá fọwọ́ sowọ́ pọ̀ pẹ̀lú wọn, inú Jèhófà ò ní dùn sí wa, ìyẹn yóò sì ṣe ìpalára fún wa. Kàkà bẹ́ẹ̀, tá a bá fi ọ̀wọ̀ tó jinlẹ̀ hàn sáwọn alàgbà tá a sì fọwọ́ sowọ́ pọ̀ pẹ̀lú wọn, wọ́n á máa fi ayọ̀ ṣe iṣẹ́ wọn, èyí yóò sì mú kí ìṣọ̀kan wà ká sì máa fayọ̀ kópa nínú iṣẹ́ ìwàásù Ìjọba Ọlọ́run.—Róòmù 15:5, 6.

Bá A Ṣe Lè Fi Hàn Pé À Ń Tẹrí Ba Fáwọn Alàgbà

15. Báwo la ṣe lè fi hàn pé à ń ṣègbọràn sáwọn alàgbà a sì ń tẹrí ba fún wọn?

¹⁵ Ọ̀pọ̀ ọ̀nà la lè gbà fọwọ́ sowọ́ pọ̀ pẹ̀lú àwọn alábòójútó tá a yàn sípò. Bí ipò nǹkan bá yí padà ní ìpínlẹ̀ wa, táwọn alàgbà sì ṣètò pé ká máa pàdé pọ̀ láti lọ sóde ẹ̀rí láwọn ọjọ́ tàbí àkókò tó máa gba pé ká ṣe àwọn ìyípadà kan ńkọ́? Ẹ jẹ́ ká sa gbogbo ipá wa láti bá wọn fọwọ́ sowọ́ pọ̀ lórí ètò tí wọ́n ṣẹ̀ṣẹ̀ ṣe náà. Tá a bá ṣe bẹ́ẹ̀, a ó gba ọ̀pọ̀ ìbùkún tí a kò retí. Bí alábòójútó iṣẹ́ ìsìn bá ṣèbẹ̀wò sí Ìkẹ́kọ̀ọ́ Ìwé Ìjọ tá a wà ńkọ́? Ẹ jẹ́ ká kópa nínú iṣẹ́ ìwàásù dáadáa láàárín ọ̀sẹ̀ yẹn. Tí wọ́n bá fún wa níṣẹ́ ní Ilé Ẹ̀kọ́ Ìjọba Ọlọ́run ńkọ́? A gbọ́dọ̀ rí i dájú pé a wá sípàdé lọ́jọ́ yẹn, a sì ṣe iṣẹ́ tí wọ́n yàn fún wa. Bí alábòójútó Ìkẹ́kọ̀ọ́ Ìwé Ìjọ wa bá ṣèfilọ̀ pé àwa ló kàn láti tún àyíká Gbọ̀ngàn Ìjọba ṣe ká sì gbá inú rẹ̀ ńkọ́? Ẹ jẹ́ ká fọwọ́ sowọ́ pọ̀ pẹ̀lú rẹ̀, ká ṣe gbogbo ohun tá a bá lè ṣe débi tí ìlera àti okun wa bá gbé e dé. Àwọn ọ̀nà wọ̀nyí àti ọ̀pọ̀ ọ̀nà mìíràn là ń gbà fi hàn pé à ń tẹrí ba fáwọn ọkùnrin tí Jèhófà àti Ọmọ rẹ̀ yàn láti bójú tó agbo.

16. Bí alàgbà kan kò bá ṣe àwọn nǹkan bí wọ́n ṣe ní kó ṣe é, kí nìdí tíyẹn ò fi ní ká ṣàìgbọràn?

¹⁶ Nígbà mìíràn, alàgbà kan lè ṣàìṣe àwọn nǹkan bí ẹgbẹ́ ẹrú náà àti Ìgbìmọ̀ Olùdarí tó ń ṣojú ẹgbẹ́ ẹrú náà ṣe ní kó ṣe é. Tó bá ń bá a lọ bẹ́ẹ̀, yóò jíhìn fún Jèhófà, tó jẹ́ “olùṣọ́ àgùntàn àti alábòójútó ọkàn [wa].” (1 Pétérù 2:25) Àmọ́ àṣìṣe èyíkéyìí táwọn alàgbà kan ì báà ṣe, ìyẹn ò ní ká ṣàìgbọràn sí wọn. Inú Jèhófà kì í dùn sáwọn aláìgbọràn àti ọlọ̀tẹ̀.—Númérì 12:1, 2, 9-11.

Jèhófà Máa Ń Bù Kún Àwọn Tó Bá Ń Fọwọ́ Sowọ́ Pọ̀ Tinútinú

17. Báwo ló ṣe yẹ ká máa ṣe sáwọn alábòójútó wa?

¹⁷ Jèhófà Ọlọ́run mọ̀ pé aláìpé làwọn tóun yàn sípò alábòójútó. Síbẹ̀, ó ń lò wọ́n, ó sì ń ṣe olùṣọ́ àgùntàn àwọn èèyàn rẹ̀ lórí ilẹ̀ ayé nípasẹ̀ ẹ̀mí rẹ̀. Gbogbo àwọn alàgbà àtàwa náà la mọ̀ pé ‘agbára tí ó ré kọjá ìwọ̀n ti ẹ̀dá jẹ́ ti Ọlọ́run, kì í ṣe èyí tí ó ti ọ̀dọ̀ àwa fúnra wa jáde.’ (2 Kọ́ríńtì 4:7) Nítorí náà, ẹ jẹ́ ká máa dúpẹ́ lọ́wọ́ Jèhófà fún àwọn ohun tó ń ṣe fún wa nípasẹ̀ àwọn alábòójútó tí wọ́n jẹ́ olóòótọ́, ká sì máa fọwọ́ sowọ́ pọ̀ pẹ̀lú wọn tinútinú.

18. Tá a bá ń tẹrí ba fáwọn alábòójútó wa, kí là ń ṣe yẹn?

¹⁸ Àwọn alábòójútó máa ń sa gbogbo ipá wọn láti rí i pé àwọn ń ṣe ohun tí Jèhófà sọ nípa àwọn olùṣọ́ àgùntàn tó yàn láti bójú tó agbo rẹ̀ láwọn ọjọ́ ìkẹyìn yìí, bá a ṣe rí i nínú Jeremáyà 3:15, tó kà pé: “Èmi yóò fi àwọn olùṣọ́ àgùntàn fún yín ní ìbámu pẹ̀lú ọkàn-àyà mi, wọn yóò sì fi ìmọ̀ àti ìjìnlẹ̀ òye bọ́ yín dájúdájú.” Ó dájú pé àwọn alàgbà tó wà láàárín wa ń ṣe iṣẹ́ àtàtà nínú kíkọ́ni àti dídáàbò bo àwọn àgùntàn Jèhófà. Ẹ jẹ́ ká túbọ̀ máa fi ìmọrírì hàn fún iṣẹ́ àṣekára tí wọ́n ń ṣe nípa fífọwọ́ sowọ́ pọ̀ pẹ̀lú wọn tinútinú, àti nípa gbígbọ́ràn sí wọn lẹ́nu, ká sì máa tẹrí ba fún wọn. Tá a bá ṣe bẹ́ẹ̀, a ó fi hàn pé a mọrírì àwọn Olùṣọ́ Àgùntàn wa tó wà lọ́run, ìyẹn Jèhófà Ọlọ́run àti Jésù Kristi.

Àtúnyẹ̀wò

• Báwo ni Jèhófà àti Jésù Kristi ṣe fi hàn pé Olùṣọ́ Àgùntàn tó nífẹ̀ẹ́ làwọn?

• Kí nìdí tá a fi gbọ́dọ̀ jẹ́ ẹni tí ń tẹrí ba ní àfikún sí jíjẹ́ onígbọràn?

• Àwọn ọ̀nà wo la lè gbà fi hàn pé a ń tẹrí ba fáwọn alàgbà?

[Àwòrán tó wà ní ojú ìwé 27]

Àwọn alàgbà ń tẹ̀ lé ìtọ́sọ́nà Kristi

[Àwọn àwòrán tó wà ní ojú ìwé 29]

Ọ̀pọ̀ ọnà la lè gbà fi hàn pé à ń tẹrí ba fáwọn olùṣọ́ àgùntàn tí Jèhófà yàn sípò