MÁA HÙWÀ TÓ YẸ KRISTẸNI

Ṣé O Ti Múra Sílẹ̀ De Ìgbà Tí Ọrọ̀ Ajé Máa Dẹnu Kọlẹ̀?

Kì í yà wá lẹ́nu nígbà táwọn ohun tó ń ṣẹlẹ̀ láyé bá mú kí ọrọ̀ ajé dẹnu kọlẹ̀. Kí nìdí? Torí pé apá tó gbẹ̀yìn nínú ètò àwọn nǹkan la wà báyìí, àti pé Bíbélì ti kìlọ̀ fún wa pé ká má ṣe gbẹ́kẹ̀ lé “ọrọ̀ tí kò dáni lójú.” (1Ti 6:17; 2Ti 3:1) Kí la lè kọ́ lára Ọba Jèhóṣáfátì tá a bá fẹ́ múra sílẹ̀ de ìgbà tí ọrọ̀ ajé bá dẹnu kọlẹ̀?

Nígbà táwọn ọ̀tá ń halẹ̀ mọ́ àwọn èèyàn Ọlọ́run, Jèhóṣáfátì gbẹ́kẹ̀ lé Jèhófà. (2Kr 20:9-12) Ó ṣètò láti dáàbò bo àwọn ìlú náà kí ogun tó bẹ̀rẹ̀, ó kọ́ àwọn odi ìlú, ó sì ṣètò àwọn ibùdó fáwọn ọmọ ogun. (2Kr 17:1, 2, 12, 13) Bíi ti Jèhóṣáfátì, ó yẹ káwa náà gbẹ́kẹ̀ lé Jèhófà, ká sì ṣe àwọn nǹkan táá fi hàn pé a múra sílẹ̀ de àkókò tí nǹkan máa nira.

BÁWO LA ṢE LÈ MÚRA SÍLẸ̀ DE ÌGBÀ TÍ ỌRỌ̀ AJÉ MÁA DẸNU KỌLẸ̀?

Múra sílẹ̀ nípa tẹ̀mí: Jẹ́ kí ohun tó o ní tẹ́ ẹ lọ́rùn, kó o sì jẹ́ kó túbọ̀ dá ẹ lójú pé Jèhófà máa pèsè ohun tó o nílò lọ́jọ́ kọ̀ọ̀kan. (Mt 6:26; 1Ti 6:8) Pinnu pé o ò ní ṣe ohun tó máa ta ko àwọn ìlànà Bíbélì torí àtijẹ-àtimu. (Ro 2:21) Tó bá ṣẹlẹ̀ pé kò sí iná tàbí Íńtánẹ́ẹ̀tì, ṣètò bí wàá ṣe máa ka Bíbélì àtàwọn ìtẹ̀jáde tó dá lórí Bíbélì. Tọ́jú àwọn ìtẹ̀jáde díẹ̀ tá a tẹ̀ sórí ìwé, tàbí kó o wa àwọn ìtẹ̀jáde tá a máa lò lọ́jọ́ iwájú sórí fóònù rẹ.

Múra sílẹ̀ nípa tara: Máa ṣọ́wó ná, tó o bá sì jẹ gbèsè, tètè wá bó o ṣe máa san án kó tó di pé ọrọ̀ ajé dẹnu kọlẹ̀. (Owe 22:7) Tó bá ṣeé ṣe, ra oúnjẹ àtàwọn ohun kòṣeémánìí míì pa mọ́. O sì tún lè gbin àwọn nǹkan tó ṣeé jẹ sí àyíká ilé rẹ, ìyẹn á jẹ́ kó o lè máa ṣọ́wó ná.

Ẹ WO FÍDÍÒ NÁÀ ṢÉ O TI MÚRA SÍLẸ̀ DE ÀJÁLÙ? KẸ́ Ẹ SÌ DÁHÙN ÀWỌN ÌBÉÈRÈ YÌÍ:

Apá kan nínú fídíò “Ṣé O ti Múra Sílẹ̀ De Àjálù?” Àwòrán Bíbélì, báàgì pàjáwìrì, fóònù àtàwọn tó ń kọ́lé wà níbẹ̀.

Kí la lè ṣe láti múra sílẹ̀ de àjálù?

Ìdáhùn rẹ

Apá kan nínú fídíò “Ṣé O ti Múra Sílẹ̀ De Àjálù?” Àwọn ará tó lọ ṣèrànwọ́ nígbà àjálù ń kọ́lé, wọ́n sì ń kẹ́rù jáde nínú ọkọ̀ akẹ́rù kan.

Báwo la ṣe lè ran àwọn míì lọ́wọ́?

Ìdáhùn rẹ