Ca dxi guietenaláʼdxinu guendaguti stiʼ Jesús: ca dxi jma raca dxiiñaʼ
1. Ximodo ucané ca saa que ca israelita ni bidxibi Dios que.
1 Dxiqué ca israelita que bíʼnicaʼ «ca saa stiʼ Jiobá ni maca nexheʼ padxí gaca» lu ti iza (Lev. 23:2). Ra uleecabe tiempu para uníʼ íquecabe de endanachaʼhuiʼ stiʼ Dios que nabé bidiini laacabe endanayecheʼ ne bicaani laacabe cadi usaanacabe de guni adorárcabe Jiobá jneza (2 Cró. 30:21–31:2).
2, 3. Xiñee naquiiñeʼ gúnirunu jma xhiiñaʼ Jiobá ca dxi guietenaláʼdxinu guendaguti stiʼ Jesús, ne padxí ácani iza riʼ.
2 Ca dxi stinu riʼ, dxiiñaʼ ni rúninu stiʼ Jiobá ne endanayecheʼ jma stale rúninu ni cada iza ora rietenaláʼdxinu guendaguti stiʼ Jesús. Ca dxi riʼ riníʼ íquenu pabiáʼ nga risaca ni bisigaʼdeʼ Dios laanu: tobi lucha Xiiñibe (Juan 3:16; 1 Ped. 1:18, 19). Ora iníʼ íquenu de endarannaxhii ni biluíʼ Dios ne Xiiñiʼ laanu la? rucaa nga laanu usisácanu Jiobá ne gúninu stipa pur gúninu ni nabe (2 Cor. 5:14, 15).
3 Iza riʼ Guendaroxhi stiʼ Señor zácani jueves 24 stiʼ marzo guiaaziʼ si Gubidxa. Ximodo zanda gúnirunu jma dxiiñaʼ de endarucheeche diidxaʼ lu ca beeu marzo, abril ne mayo yaʼ.
4, 5. 1) Xi huayuni caadxi para ucheechecaʼ ca diidxaʼ nacubi ne galán ca ra nuu jma binni. 2) Xii nga ni huayacané lii ucheecheluʼ diidxaʼ ra nuu jma binni.
4 Uyúbinu modo idxélarunu jma binni. Biyubi ximodo idxélaluʼ jma binni ora ireeluʼ lu guidxi. Ñee zanda quixhe íqueluʼ cheluʼ de yoo pur yoo ora jma nuu binni ralidxi casi ca huadxí ca o pacaa ora maʼ zixhinni la? Pa tuuxa ni rié lade ti grupu ni ruundaʼ libru racalaʼdxiʼ iree lu guidxi ante uzulú ni la? binnigola ni rusiidiʼ racá zanda quíxhebe ti hora para idagulisaatu ti chigucheechetu diidxaʼ gaxha de raqué.
5 Ucheechenu diidxaʼ ra nabé nuu binni nga sti modo para idxélanu laacaʼ. Ti bizánanu de Japón nápabe gana ácabe precursora auxiliar neca rúnibe dxiiñaʼ idubi dxi. Ti binnigola gudxi laabe de que ante chebe dxiiñaʼ la? iráʼ dxi zanda iníʼnebe binni ndaaniʼ ca neza ni nuu gaxha ra ruzuhuaa tren. Udiʼdiʼ si endanatuí stibe que ne ra maʼ qué nulábibe ca burla stiʼ ca binni rié ndaaniʼ tren que la? bizulú yesaanabe revista ra nuu biaʼ cuarenta binni, ládecabe nuu ni nabé rié viaje, cani runi dxiiñaʼ ra ruzuhuaa tren ne cani rutoo ladu que. Rusaanabe biaʼ 235 revista lu ti beeu. Gunda bizulú biindanebe xhoopaʼ binni ra ruíʼnebe laacaʼ de Biblia chupa chonna minutu iráʼ dxi.
6. Ximodo zándaruʼ guni cani nahuiiniʼ ca jma dxiiñaʼ de endarucheeche diidxaʼ.
6 Ra zanda ucheechenu diidxaʼ. Stale de cani rucheeche diidxaʼ ni riecaʼ scuela zanda iquiiñecabe ca vacación ni rápacabe para ácacabe precursor auxiliar. Cani nahuiiniʼ ca jma zucheechecabe diidxaʼ pa gúnicabe ni ra scuela. Zadxagayaaluʼ gúʼyaluʼ de que cani rineluʼ scuela zándaca chuláʼdxicaʼ gánnacaʼ de cani runi creluʼ. Xiñee qué ucheecheluʼ diidxaʼ ora tiidiluʼ lu clase stiluʼ ne ora inábacabe lii ucaaluʼ xiixa para ra scuela yaʼ. Nuu tu huaquiiñeʼ ca videu ni nápanu ca para gúnicaʼ ni. Xcaadxi huazulú guʼndané ca compañeru stiʼ ne huayacanecaʼ laacabe iniisicabe jma lu stiidxaʼ Dios dede udiicabe laacabe Jiobá ne chuʼ nísacabe. Ca ndiʼ nga modo zanda usisácanu «lá Jiobá» jnézapeʼ (Sal. 148:12, 13).
7. 1) Ximodo biʼniʼ ti bíchinu para ucheeche diidxaʼ ra nuu xcaadxi binni. 2) Ñee huayuʼnuʼ zacá gá la?
7 Pa ra rieluʼ o ra nuuluʼ ridxaaguʼ xcaadxi binni la? biyubi modo iníʼneluʼ laacabe de Dios ne de ca endaridxagayaa ni chiguni. Ti bíchinu ni riguiʼbaʼ laca ca tren queca iráʼ dxi riníʼnebe cani runinebe viaje ora randa. Laga cabézabe sti tren tobi de ca ra ruzuhuaa cani la? iráʼ dxi riníʼnebe ti hombrehuiiniʼ. Ne ni uleendube nga, hombrehuiiniʼ riʼ ne compañeru stiʼ uyuláʼdxicaʼ gúʼndanebe laacaʼ Biblia laga maʼ zécabe ndaaniʼ tren que. Udiʼdiʼ si caadxi dxi, ti gunaa maʼ huaniisi ni huacaadiaga laabe bidxiña ne unabaʼ gúʼndanebe laa, ruundacabe ora rié gunaa riʼ viaje. Ne zacá maʼ chii binni ruundanebe de Biblia ndaaniʼ tren.
8. Xi zacané cani maʼ qué ganda iree lu guidxi pur endayooxho o pur endahuará ti ganda ucheechecaʼ diidxaʼ jma yaʼ.
8 Peru, pa endayooxho o endahuará cucá lii yaʼ. Nuuruʼ modo zanda usisácaluʼ Jiobá jma. Huayuʼnuʼ pur ucheecheluʼ diidxaʼ pur teléfono la? Pa qué ganna chaahuiluʼ modo gúniluʼ ni la? gudxi ni binnigola ni rusiidiʼ ra riuundaʼ libru ra rieluʼ, purtiʼ laabe zanda uyúbibe cani rucheeche diidxaʼ ni maʼ huayuni ni zacá ti acané lii. Ra ucheecheluʼ diidxaʼ ne cani acané lii ca la? zusiidisaatu laatu ne zucheechetu diidxaʼ jneza. Ndaaniʼ Nuestro Ministerio del Reino stiʼ febrero 2001 yaza 5 ne 6 zadxélatu ximodo ucheechetu diidxaʼ pur teléfono.
9. Ximodo zanda acanenu cani nacubi ca chuʼcaʼ listu para chigucheechecaʼ diidxaʼ ne ca binni ridagulisaa.
9 Ra guietenaláʼdxinu guendaguti stiʼ Jesús ca zándaca ucaani stale nacubi ni cheʼ chuláʼdxicaʼ usisácacaʼ Jiobá jma. Para cadi idxíbicabe ucheechecabe diidxaʼ la? zanda gábinu laacabe iráʼ ni galán huazaacanu ora rireʼnu lu guidxi ne zanda usíʼdinu laacabe chaahuiʼ chaahuiʼ ximodo usiénecabe cani rusiidiʼ Biblia ne iníʼcabe pur fe stícabe (1 Ped. 3:15). Pa tuuxa ni cayuundanetu Biblia iníʼ de que maʼ racalaʼdxiʼ ucheeche diidxaʼ la? lagabi ni binnigola ni rapa iráʼ stiʼ binni ridagulisaa. Binnigola riʼ zuyubi tu iniʼné laabe ti guʼyaʼ pa maʼ zanda ireebe lu guidxi ne ca binni ridagulisaa. ¡Pabiáʼ nga riecheʼ Jiobá guʼyaʼ cani nacubi ca ora nuucaʼ pur laabe, ne iniʼcaʼ de que laasibe nga nápabe derechu guni mandarbe lu idubi naca Guidxilayú! (Pro. 27:11.)
10. 1) Ximodo zanda acané laanu quixhe chaahuinu ca hora stinu para ganda ácanu precursor auxiliar. 2) Ñee úcaluʼ precursor auxiliar iza udiʼdiʼ ca la? Ximodo gunda bíʼniluʼ ni.
10 Ñee zanda ácaluʼ precursor auxiliar la? Cincuenta hora ni naquiiñeʼ guni ti precursor auxiliar cadi endariguite diʼ ni (Mat. 5:37). Para usaʼnu cani la? naquiiñeʼ ucheechenu diidxaʼ biaʼ doce hora lu ti semana. Ñee zanda iquiiñeluʼ tobi de ca hora ni cá lu yaza 5 ca para ácaluʼ precursor auxiliar la? Pa nin tobi de laacani qué zanda iquiiñeluʼ, ñee zanda quíxheluʼ pora zanda ireeluʼ lu ca beeu marzo, abril o mayo la? Qué chigusiaanduʼ inabuʼ Jiobá cuʼ ndaayaʼ ca stipa guʼnuʼ pur ucheecheluʼ stiidxabe (Pro. 16:3).
11. Ximodo zanda acané ca binnigola ne ca siervu ministerial cani ácacaʼ precursor auxiliar.
11 Ca binnigola ne ca siervu ministerial zacanécabe laatu lu stipa ni gúnitu ti usisácatu Jiobá jma ca dxi guietenaláʼdxinu guendaguti stiʼ Jesús. Zándaca stale de laacabe laaca zaca precursor auxiliar. Ca binnigola ca zaguíxhecabe pora idagulisaatu para ireetu ca huadxí ca, ora maʼ zixhinni ndaaniʼ semana ne ra iluxe semana, ne ra zanda ácani zacá la? laguni ni. Para gánnacabe paraa ne pora aca cani ne tu guni cani la? naquiiñeʼ iniʼnécabe cani maʼ uniʼcaʼ ácacaʼ precursor o cani maʼ caníʼ íquecaʼ ni. Ca binnigola ca zúnicabe stipa pur quixhe chaahuicabe ca hora ca para chigucheechetu diidxaʼ ti ganda ireenetu xcaadxi de cani rucheeche diidxaʼ lu ca hora ni maca naguíxhetu para ireetu lu guidxi. Zacá nga zabeendutu ni galán purtiʼ maʼ nexheʼ chaahuiʼ ni maca cá íquetu aca (Pro. 20:18).
12. Xi rucaa laanu usisácanu Jiobá iráʼ ora.
12 Biʼniʼ stipa dede ra ganda. Pa pur modo nuuluʼ qué zanda ácaluʼ precursor auxiliar la? bietenalaʼdxiʼ de que Jiobá ricaa iráʼ xixé stipa guʼnuʼ purtiʼ «nanna be pabiáʼ napa binni, ne qué zanaba be laa ni qué gapa» (2 Cor. 8:12). Stale nga razón nápanu para udiʼnu xquíxepeʼ Jiobá. Nga runi David bicaa: «Dxandipeʼ zusisacaʼ Jiobá iráʼ ora; ruaa qué zusaana de gusisaca laabe» (Sal. 34:1). Zacaca nga naquiiñeʼ iníʼ íquenu gúninu ca dxi guietenaláʼdxinu guendaguti stiʼ Jesús.
[Box on page 3]
Ximodo guʼnuʼ jma dxiiñaʼ
◼ Bicheeche diidxaʼ ora nuu binni yoo
◼ Bicheeche diidxaʼ ra riuu stale binni
◼ Uníʼ de Biblia ra dxiiñaʼ o ra scuela
◼ Bicheeche diidxaʼ pur teléfono
◼ Uca precursor auxiliar