Ukushumayela Izindaba Ezinhle—Ngokufakaza Emgwaqweni
1 IzAga 1:20 zithi: “Ukuhlakanipha kuyamemeza emigwaqweni, kuyezwakalisa izwi lakho ezigcawini.” Lamazwi ayiqiniso ikakhulukazi namuhla njengoba izinceku zikaJehova zishumayela ngentshiseko izindaba ezinhle zoMbuso nomaphi lapho zingathola khona abantu. NjengoJesu nabaprofethi bangaphambi kwenkathi yobuKristu, uthando lwethu lwangempela ngabantu lusishukumisela ekunikezeni iqiniso kubo bonke, nomaphi.—Jer. 11:6; Marku 6:56; Luka 13:22, 26.
2 Nakuba ikhaya lomuntu ngokuvamile liyindawo efiseleka kakhulu yokukhuluma naye ngeqiniso, ababaningi abantu esibathola emakhaya lapho senza ukuhambela kwendlu ngendlu. Lapho abaninikhaya besemakhaya, ngokuvamile umuntu ovula umnyango kusuke kuwumuntu ofanayo esake sakhuluma naye ngaphambili, futhi amanye amalungu omkhaya awafinyeleleki. Ngaleyondlela, ukufakaza emgwaqweni kumelwe kube nendawo eqondile enkonzweni yethu. Ungase uthole ukuthi ukufakaza emigwaqweni, njengoba elinye iphayona lakuchaza, “kuyinsimu ejabulisayo, eqabulayo, nejwayeleka kalula.”
ISIMO SENGQONDO ESIQONDILE ESIFUDUMELE
3 Kungani ungazami ukwenza ukufakaza kwakho emgwaqweni endaweni efanayo njalo? Omunye udade okwenzayo lokhu uthi uye wajwayelana nabaningi babanini-zitolo nabanye abantu abadlula njalo esitaladini “sakhe.” Kuye kwakheka ubuhlobo obuhle, obuye baholela ezingxoxweni eziningi zeBhayibheli ezikhiqizayo. Iphayona elisizayo elikujabulela kakhulu ukufakaza emigwaqweni lathi liyazama ukufinyelela abantu ababuka okuthengiswayo, abantu abahlezi ezimotweni zabo, abantu abalinde amabhasi, ngisho nalabo abaye benqaba ezikhathini ezidlule. Isibindi nokwahlulela okuhle kuyadingeka ukuze siqine futhi sifinyelele izinhliziyo, nokho singaphikeleli ngokweqile.
4 Isihluthulelo sokufakaza ngokuphumelelayo emgwaqweni siwukuba nesingeniso esifudumele, sokujabula, nesiqotho. Momotheka. Zama ukudonsa ukunaka kwalowomuntu uma ungase ukwazi, kodwa uma ungenakukwazi, qhubeka futhi wenze isingeniso sobungane. Qaphela izimo, futhi uzisebenzise. Omunye udade ubona abesifazane bethwele izikhwama zokudla abese ethi, “Ngiyabona ukuthi ubuyothenga ukudla. Akuve kudula kulezinsuku. Ungakuthanda ukudla okukhuthazayo kwengqondo nenhliziyo? Ngasijabulela lesihloko . . . .” Kothile onabantwana uthi, “Ngiyabona ukuthi unabantwana ababili abahle. Ingabe bewazi ukuthi iBhayibheli lithi abantwana bayisibusiso esivela kuNkulunkulu? Ake ngikubonise lapha . . . .” Lapho ekhuluma nomuntu obonakala ecabanga ngokujulile, uthi, “Ngiyabona ukuthi kukhona okucabangayo. Izwe alive ligcwele izinkathazo namuhla, akunjalo? Ingabe ucabanga ukuthi siyoke sifike isikhathi lapho . . . ?”
5 Uma umuntu ejahile emgwaqweni, ungase umnikeze nje ipheshana bese uthi, “Nazi izindaba ezinhle ongazifunda uma uthola isikhathi.” Uma abantu bengabonakali bejahile, hambisa omagazini. Kuhle ukwenza abantu baziphathe ngezandla zabo izincwadi lapho kunokwenzeka.
6 Abamemezeli abaningi ababenamahloni ekuqaleni ngokufakaza emgwaqweni manje bakubheka njengohlobo lokushumayela abaluthanda kakhulu. Yebo, kumelwe kusetshenziswe ukuqapha lapho kusetshenzwa ezindaweni eziyingozi noma ngezikhathi eziyingozi. Ngisho nasemadolobheni amancane, ngokuvamile kunezindawo ezimatasa, eziteshini zezinto zokuhamba zomphakathi, noma izindawo zokupaka zomphakathi lapho abantu bengafinyelelwa khona nezindaba ezinhle. Bamba ithuba, futhi ngokuhlakanipha yenza ukuba izwi lakho likhiphe izindaba ezinhle emigwaqweni nasezigcawini, kube yisibusiso kwabezwayo futhi kube udumo kuJehova.—IzAga 1:20.