Ukuzikhandla Ekwenzeni Intando KaNkulunkulu
1 Ukuzikhandla okunenjongo okuba nemiphumela efiselekayo kwanelisa kakhulu. (UmSh. 3:13) Yimuphi umsebenzi owenziwayo namuhla onethuba elikhulu lokuletha injabulo manje kuze kube sesikhathini esizayo esingenamkhawulo? Kunempendulo eyodwa vó—ukwenza intando kaNkulunkulu. Izizathu zalokhu zizohlolisiswa ngezinkulumo, imiboniso, nokuhlangenwe nakho esimisweni somhlangano wethu okhethekile wosuku olulodwa sonyaka wenkonzo ka-1992. Isihloko sesimiso siyothi “Ukuzikhandla Ekwenzeni Intando KaNkulunkulu.”—Efe. 6:6; 1 Thim. 4:10.
2 Abaningi namuhla abanelisekile nhlobo futhi bakhungathekile ngenxa yesabelo sabo ekuphileni, ingxenye yaso enkulu egcwaliswe umsebenzi abangawujabuleli. Ngokuphambene, ukwenza intando kaJehova ekulingiseni uKristu kwenza ukuphila kwethu kube nenjongo futhi kusenza sikwazi ngisho nokwenza imisebenzi yethu yokuziphilisa sinombono oqondile. Yini ehilelekile ekuzikhandleni ekwenzeni intando kaNkulunkulu? Yiziphi ezinye izinto okumelwe siziqaphele ukuze siqhubeke siphilela intando kaNkulunkulu? Ngokuqondene nomsebenzi wokushumayela nokufundisa, kubaluleke kangakanani ukulandela iziqondiso nokusikisela okunikezwa yinhlangano kaJehova? Yimaphi amathuba ayingqayizivele avulekele intsha egxila ekwenzeni intando kaNkulunkulu?
3 Lemibuzo iyophendulwa ngendlela eyanelisayo yisimiso, esihlanganisa izinkulumo ezimbili ezivelele ethi “Ingabe Intando KaNkulunkulu Iyakubusa Ukuphila Kwakho?” nethi “Injongo Yethu Ekuphileni—Ukwenza Intando KaNkulunkulu.” Hlela manje ukuba ube khona futhi usijabulele ngokugcwele lesimiso esikhethekile.