Шәзықәгәыӷуа ахь шәыгәрахаҵара шәырӷәӷәала

1, 2. а) Излеиԥшымзеи ҳара иҳамоу иссиру агәыӷреи ари адунеи аҿы ауаа ирымоу агәыӷреи? б) Иарбан ихадоу зҵаарақәоу еилҳарго?

ИИАШАҴӘҞЬОУ ақьырсианцәа зегьы иссиру агәыӷра рымоуп. Анцәа идоуҳала иалху ақьырсианцәа реиԥш «егьырҭ ауасақәагьы» ргәы хыҭ-хыҭуа иазыԥшуп Анцәа раԥхьатәи игәҭакы анынагӡахо, насгьы ихьӡ аныҳаракхо аамҭа (Иоанн 10:16; Матф. 6:9, 10). Ари ауаа ирымазар алшо иреиӷьу, насгьы иџьашьахәу гәыӷроуп. Иара убас ҳара иҳаурц ҳҭахуп иссиру аҳамҭа — наӡаӡатәи аԥсҭазаара ажәҩан аҿы, ма адгьыл аҿы (2 Пиотр 3:13). Убри адагьы, ҳаамҭазы Анцәа ижәлар еиҳа доуҳала еизҳалоит ҳәа ҳазыԥшуп.

² Ҳәарада, ари адунеи аҿы инхо ауаагьы агәыӷрақәа рымоуп, аха урҭ ргәыӷрақәа еснагь изынаӡом. Иаҳҳәап, миллионҩыла ауаа алотереиа иаиааирц рҭахуп, аха ргәыӷрақәа лассы-лассы инаӡом. Ииашаҵәҟьоу агәрахаҵара акәзар — ари ақьырсианцәа гәыӷрала иззыԥшу анаӡара ауп (Аур. 11:1). Аха иҟалап уеизгьы шәхы шәазҵаауазар: иҟаҵатәузеи ҳгәыӷрақәа рышьаҭа еиҳагьы иӷәӷәахарц азы? Насгьы ишԥаҳацхраар алшо ҳзықәгәыӷуа ахь иҳамоу агәрахаҵара ӷәӷәа?

3. Иарбан ҵабыргу ақьырсиантә гәрахаҵара шьаҭас иамоу?

³ Агәнаҳа иаҵоу ауаа агәрахаҵара шрымоу ииӡом, насгьы уи ахала еизҳауам. Агәрахаҵара ҳаурц азы, Анцәа иԥшьоу идоуҳа ҳгәы ианырларц алҳаршалар ауп (Гал. 5:22). Абиблиаҿы ианӡам Иегова агәрахаҵара имоуп, ма уи иҭахуп ҳәа, избанзар Иегова зегь зымчу, Жәҩантәылаҿы зегь раасҭа иҟәыӷоу иоуп. Иара игәҭакқәа рынагӡара иаԥырхагоу ҳәа акгьы ыҟам. Жәҩантәи Ҳаб иқәыргәыӷрақәа шынаӡо аҵыхәтәанынӡа агәра ганы дыҟоуп аҟынтә, урҭ ирызкны иҳәоит: «Инаӡеит, иҟалараны иҟаз ҟалеит!» (Уаԥхьа Аатра 21:3—6.) Ақьырсиантә гәрахаҵара шьаҭас иамоуп Иегова «ииашоу Анцәа» шиакәу иазку аҵабырг, иара еснагь иажәа наигӡоит (Ҩынтә. [Втор.] 7:9).

АЖӘЫТӘАН АГӘРАХАҴАРА ААЗЫРԤШУАЗ ҲАРҾЫԤШЛАП

4. Иарбан гәыӷроу ирымаз Иисус Христос адгьыл ахь даанӡа инхоз ииашаз аҳәсеи ахацәеи?

⁴ Ауриацәа рахь 11-тәи ахаҿы еиқәыԥхьаӡоуп агәрахаҵара ӷәӷәа аазырԥшуаз 16-ҩык аҳәсеи ахацәеи рыхьӡқәа. Урҭ, насгьы егьырҭ Иегова имаҵзуҩцәа аӡәырҩы ирызкны ари асаламшәҟәаҿы автор Анцәа идоуҳала иҩит дара ирымаз агәрахаҵаразы шаҳаҭра роуит ҳәа (Аур. 11:39). Урҭ зегьы Анцәа иқәыргәыӷра инақәыршәаны «ахылҵшьҭра» данааиуа иазыԥшын. Дара ирдыруан уи «ахылҵшьҭра» Аҩсҭаа ишьҭихыз аҿагылара аҵыхәтәа шԥиҵәо, насгьы Иегова раԥхьатәи игәҭакы шынаигӡо (Аҟаз. [Быт.] 3:15). Урҭ ииашаз Анцәа имаҵзуҩцәа ԥсит ауаа ажәҩан аҿы анхаразы алшара рзаазыртыз изқәыргәыӷыз «ахылҵшьҭра», Иисус Христос, дааиаанӡа (Гал. 3:16). Аха Иегова иқәыргәыӷрақәа рыбзоурала, урҭ анаӡара ахьроуа џьанаҭ дгьыл аҿы рыԥсы ҭаҵахоит (Аԥсал. 36:11 [37:11, АдҾ]; Ис. [Ис.] 26:19; Ос. [Ос.] 13:14).

5, 6. Иарбан гәыӷроу Авраам иҭаацәеи иареи ирымаз, насгьы ирыцхраазеи дара рыгәрахаҵара ӷәӷәаны ахьчара? (Шәахәаԥш астатиа алагамҭаҿы иаагоу асахьа.)

⁵ Ауриацәа рахь 11:13 аҿы иануп Христос дааиаанӡа инхоз Анцәа имаҵзуҩцәа шьоукы рыӡбахә: «Убарҭ зегьы агәрахаҵара шрымаз иԥсит, изқәыргәыӷыз абла аҭаԥшра иахьымӡаӡакәа, изқәыргәыӷыз акәзар, уи харантә инахьыԥшуан, иеигәырӷьон». Руаӡәк Авраам иакәын. Игәалашәозма иара еснагь изқәыргәыӷыз «ахылҵшьҭра» инапхгара аҵаҟа анхаразы имаз агәыӷра? Иисус иҿагылаҩцәа иреиҳәеит: «Авраам, шәара шәаб, Сара сбарамш дазгәырӷьон: иагьибеит, дагьеигәырӷьеит» (Иоанн 8:56). Убас уҳәар алшоит Сарра, Исаак, Иаков, насгьы егьырҭ Анцәа имаҵзуҩцәагьы ирызкны. Дара еснагь иргәалашәон Аҳра иадҳәалоу агәыӷра, насгьы уи «ргылаҩыс, шаҩыс» иамоу Анцәа шиакәу (Аур. 11:8—11).

⁶ Ирыцхраазеи Авраам иҭаацәеи иареи рыгәрахаҵара ӷәӷәаны ахьчара? Дара Иегова иӡбахә еилыркаауан. Зны-зынла Анцәа амаалықьцәеи, абарақәеи, аԥхыӡқәеи рыла драцәажәон. Иҟалап иара убас дара Анцәа деилыркаауазҭгьы ииашаз, зықәрахь инеихьаз Иегова имаҵзуҩцәа ирзеиҭарҳәоз, мамзаргьы зыгәра агара иаԥсаз ажәытә документқәа рҟынтәи. Аха еиҳа ихадоу, дара ироуаз адыррақәа рыхә ҳаракны иршьон, иара убас Анцәа иқәыргәыӷрақәеи иҭахрақәеи ргәалашәон, насгьы урҭ ирызхәыцуан. Ргәыӷра убриаҟара иӷәӷәан, Анцәа изиашаны иаанхарц азы еиуеиԥшым ауадаҩрақәа рыхгара иазхиан.

7. Дышԥеиҷаҳаи бзиабарала Иегова ҳагәрахаҵара арӷәӷәара ҳалшарц, насгьы иҟаҳҵалар акәзеи ҳхаҭа?

⁷ Ҳагәрахаҵара ӷәӷәаны иаанхарц азы, Иегова бзиабарала иара Иажәа, Абиблиа, ҳаиҭеит. Ҳара анасыԥи ақәҿиарақәеи ҳамазарц азы, иааиԥмырҟьаӡакәа есыҽны Анцәа Иажәа ҳаԥхьалар ауп (Аԥсал. 1:1—3 [1:1—3, АдҾ]; уаԥхьа Аусқәа 17:11). Уи адагьы, ажәытәан инхоз Иегова имаҵзуҩцәа реиԥш, ҳаргьы Анцәа иқәыргәыӷрақәа еснагь ҳрызхәыцлар, насгьы иҭахрақәа наҳагӡалар ауп. Игәрагоу, иҟәышу атәы ила Иегова меигӡарахда адоуҳатә фатәы ҳаиҭоит (Матф. 24:45). Еилаҳкаауа ахә ҳаракны иаҳшьозар, ажәытәан инхоз Анцәа изиашаз имаҵзуҩцәа ҳреиԥшхоит, дара Аҳра иадҳәалаз ргәыӷра шынаӡо агәра ргон.

8. Ишԥалшо анцәаиҳәара ҳагәрахаҵара арӷәӷәар?

⁸ Ажәытәан инхоз Анцәа имаҵзуҩцәа рыгәрахаҵара арӷәӷәаразы Анцәа иҳәон. Анцәа рыҳәарақәа рҭак шыҟаиҵоз анырбоз, рыгәрахаҵара еиҳа иӷәӷәахон (Неем. [Неем.] 1:4, 11; Аԥсал. 33:5, 16, 18 [34:4, 15, 17, АдҾ]; Дан. [Дан.] 9:19—21). Ҳаргьы гәык-ԥсык ала Анцәа ҳиҳәалар ҳалшоит, насгьы дшаҳзыӡырҩуа, агәырӷьара мырӡкәа зегь рыхгаразы амч шҳаиҭо агәра ганы ҳаҟазар ауеит. Ҳаҳәарақәа рҭак анҳауа, ҳагәрахаҵара ӷәӷәахоит. (Уаԥхьа 1 Иоанн 5:14, 15.) Агәрахаҵара Анцәа идоуҳа иалҵшәоу аҟазшьақәа ируакуп аҟынтә, идоуҳа ҳаиҭаларц азы Анцәа ҳиҳәалар ауп. Иисусгьы уи аҟаҵара ҳгәазҭеиҵон (Лука 11:9, 13).

9. Ҳзызиҳәалар ҳахәҭоузеи ҳара еиҭа Анцәа?

⁹ Аха ҳаҳәарақәа рҿы ацхыраара мацара акәӡам Анцәа ҳзызиҳәо. Ҳара иара убас есыҽны Анцәа иҭабуп ҳәа иаҳҳәалар, насгьы дҳарҽхәалар ҳахәҭоуп, избанзар иара иус џьашьахәқәа даара ирацәоуп (Аԥсал. 39:6 [40:5, АдҾ]). Ҳаҳәарақәа рҿы иаҳхаҳмыршҭлар ауп «абахҭа иҭаку, ирбаандаҩу», ҳхаҭақәа убарҭ ирыцҭаку ҳакәушәа. Иара убас ҳара адунеи ахьынӡа-наӡааӡо инхо ҳашьцәа, еиҳарак аҭакԥхықәра зхахьы изго, рзы Анцәа ҳиҳәалар ауп. Иегова ҳаҳәарақәа рҭак шыҟаиҵо анаҳбо, ҳгәы ҭгәырӷьаауеит (Аур. 13:3, 7).

ДАРА АНЦӘА ИЗИАШАНЫ ИААНХЕИТ

10. Изусҭцәада Анцәа изиашаны иаанхаз, насгьы ирызҭози дара амч?

¹⁰ Ауриацәа рахь 11-тәи ахаҿы апостол Павел зыхьӡ ҳәам Анцәа имаҵзуҩцәа аӡәырҩы ирхыргоз ауадаҩрақәа рыӡбахә иҩит. Убас, Павел агәрахаҵара ӷәӷәа аазырԥшуаз, ииашаз аҳәсақәа рыӡбахә иҳәеит. Дара рԥацәа рцәыԥсуан, аха аԥсҭалара абзоурала урҭ еиҭа ирзыгьежьуан. Анаҩс Павел егьырҭ ирызкны иҩуан «ироуаз ахақәиҭра мап ацәыркуан... нас аԥсҭазаара ҿыц азы ԥсҭалара роуразы» ҳәа (Аур. 11:35). Павел урҭ рыхьӡ имҳәаӡеит, аха иҟалап иара Навуфеии Захариеи реиԥш иҟаз Анцәа имаҵзуҩцәа рыӡбахә имазҭгьы. Дара Анцәа иахьизыӡырҩуаз, насгьы игәҭакы ахьынарыгӡоз азы ахаҳә ргәыдҵаны иршьит (1 Аҳ. [1 Цар.] 21:3, 15; 2 Аш. [2 Лет.] 24:20, 21). Даниил иҩызцәеи иареи Анцәа изиашаны иаанымхазҭгьы, ахақәиҭра роур ауан. Аха дара Анцәа имч дуӡӡала дрыцхраар шилшо агәра ргон, уи абзоурала «алымқәа рсаса ршәаҳауан, амцабз-еилацәқәырԥа дырцәон» (Аур. 11:33, 34; Дан. [Дан.] 3:16—18, 20, 28; 6:13, 16, 21—23).

11. Иарбан ԥышәарақәоу аԥааимбарцәа шьоукы рыгәрахаҵара абзоурала ирхыргаз?

¹¹ Аԥааимбарцәа Михеии Иеремиеи рыгәрахаҵаразы ирхыччон, иҭаркуан. Егьырҭ Анцәа имаҵзуҩцәа, иаҳҳәап, аԥааимбар Илиа иеиԥш иҟаз, «ацәҳәырақәа, ашьхақәа ирықәын, аҳаԥқәа ирыҵан, аԥсҭақәа ирҭан». Урҭ зегьы Анцәа изиашаны иаанхеит, избанзар гәыӷрала иззыԥшыз шынаӡо агәра ргон (Аур. 11:1, 36—38; 1 Аҳ. [1 Цар.] 18:13; 22:24—27; Иер. [Иер.] 20:1, 2; 28:10, 11; 32:2).

12. Иҳазҭада ахачҳара аарԥшраҿы аҿырԥш дуӡӡа, насгьы ицхраазеи иара?

¹² Павел агәрахаҵара ӷәӷәа аазырԥшуаз аҳәсеи ахацәеи рыӡбахә аниҩы ашьҭахь, уи аҿы аҿырԥш дуӡӡа ҳазҭаз Иҳақәиҭу Иисус Христос иӡбахә иҳәеит. Ауриацәа рахь 12:2 иануп иара иаҭәаз агәырӷьаразы «аџьар [«ашьаҟа», АдҾ] дахәхеит, убри ала дларҟәын, ицәа ԥҽын, аха уажәы Анцәа иарӷьараҿ дтәоуп» ҳәа. Иисус зегь реиҳа ицәгьаз аԥышәара аан иааирԥшыз агәрахаҵара ӷәӷәа инарҵауланы ҳазхәыцлар ауп. (Уаԥхьа Ауриацәа рахь 12:3.) Иисус иеиԥш, идыргәаҟуаз раԥхьатәи ақьырсианцәа, иаҳҳәап, аҵаҩы Антипа иеиԥш иҟаз, аҵыхәтәанынӡа Анцәа изиашаны иаанхеит (Аат. 2:13). Урҭ ирзыԥшын аҳамҭа — ажәҩан аҿы анхаразы аԥсҭалара, уи ажәытәан инхоз Анцәа имаҵзуҩцәа ззыԥшыз еиӷьу аԥсҭалара аасҭа еиҳауп (Аур. 11:35). 1914 шықәсазы Анцәа Иаҳра анышьақәгыла ашьҭахь, иԥсхьаз Анцәа идоуҳала иалхыз урҭ аҳәсеи ахацәеи зегьы Христос анапхгара ицруларц азы жәҩантәи аԥсҭалара роуит (Аат. 20:4).

ҲААМҬАЗЫ АГӘРАХАҴАРА ӶӘӶӘА ААЗЫРԤШУА РҾЫРԤШТӘЫ

13, 14. Иарбан ԥышәарақәоу дзықәшәаз Рудольф Граихен, насгьы ицхраазеи иара?

¹³ Иахьа миллионҩыла ауаа Христос иҿыԥшны ирымоу агәыӷра еснагь иазхәыцуеит, насгьы аԥышәарақәа рыгәрахаҵара дырԥсыҽыртә алдыршом. Еилҳаргап 1925 шықәса Германиа ииз Рудольф Граихен иҿырԥштәы. Данхәыҷыз иҩны аҭӡамц аҿы абиблиатә сахьақәа кнаҳан. Иара игәалашәон: «Руак аҿы ақәыџьмеи асыси, аӡыси абжьаси, аҳәыси алыми шеицу, урҭ зегьы аҷкәын хәыҷы дышрыцыз анын. [...] Урҭ асахьақәа схаҿы наӡаӡа иаанхеит» (Ис. [Ис.] 11:6—9). Рудольф акыршықәса гәымбылџьбарала ишьҭашәарыцон — раԥхьа анацисттә гестапо, анаҩс ГДР иҟаз Штази, аха џьанаҭ дгьыл иадҳәалаз игәыӷра шыӷәӷәаз иаанхеит.

¹⁴ Рудольф иԥсҭазаараҿы ицәгьаз егьырҭ ауадаҩрақәагьы ыҟан. Бзиа иибоз иан Равенсбриук алагер аҿы атиф лыхьны дыԥсит, зыгәрахаҵара ԥсыҽхаз иаб Иегова ишаҳаҭ иакәны уаҳа дшыҟам ала ақьаад инапы аҵеиҩит. Рудольф абахҭа данҭыҵ, раионтә хылаԥшҩыс амаҵ аура далагеит, насгьы Галаад ашкол аҿы аҵаразы ааԥхьара ирҭеит. Уи миссионерс амаҵ аура дрышьҭит, иара Чили раионтә хылаԥшҩыс имаҵзура иациҵеит. Аха уи аԥышәара ҿыцқәа изыԥшын. Рудольф ԥҳәысс дигеит Петси зыхьӡыз миссионерс амаҵ зуаз аиаҳәшьа, аха рчара ашьҭахь шықәсык анҵы арыцҳара ду иақәшәеит — рыԥҳа ԥшқа дыԥсит. Ԥыҭрак ашьҭахь Петсигьы дыԥсит, уи 43 шықәса ракәын илхыҵуаз. Рудольф арҭ агәаҟрақәа ахачҳара аарԥшны ихигеит. Август 1, 1997 шықәсазы иҭыҵыз «Сторожевая башня» (адаҟьақәа 20—25) аҿы ибиографиа анын. Уи аамҭазы Рудольф иқәрахь дышнеихьазгьы, дшычмазаҩызгьы, аизара еиҳабыс, насгьы пионерс амаҵ иуан¹.

15. Иаажәга Иегова ишаҳаҭцәа иахьа ашьҭашәарыцарақәа раан агәырӷьара шырцәымӡуа узырбо аҿырԥштәқәа.

¹⁵ Иегова ишаҳаҭцәа инымҵәаӡо, даара иуадаҩу аԥышәарақәа раангьы агәырӷьареи агәыӷреи рцәыӡӡом. Иаҳҳәап, Сингапур, Еритреа, Аладатәи Кореа ҳашьцәеи ҳаҳәшьцәеи аӡәырҩы абахҭа иҭакуп, еиҳарак Иисус иажәақәа инарықәыршәаны абџьар ашьҭыхра мап ахьацәыркыз азы (Матф. 26:52). Шәҩыла иҭаку рыбжьара иҟоуп Еритреиа иҭаку аишьцәа Исаак, Негеде, Паулос, урҭ ҭакуижьҭеи 20 шықәса иреиҳауп! Зықәрахь инеиз рҭаацәа рхылаԥшразы, насгьы аҭаацәара аԥҵаразы алшара шрымамгьы, уи адагьы, гәымбылџьбарала ишрызныҟәогьы, урҭ Анцәа изиашаны иаанхоит. Иегова ишаҳаҭцәа рофициалтә саит аҿы урҭ аишьцәа рпотреҭқәа ыҟоуп. Аҭынчра зныԥшуа, иҿаԥха-ҿаччо рхаҿсахьақәа агәрахаҵара ӷәӷәа шрымоу рнубаалоит. Абахҭа ахьчаҩцәагьы урҭ пату рықәырҵо иалагеит.

16. Шәышԥахьчар алшо агәрахаҵара ӷәӷәа?

¹⁶ Иегова ишаҳаҭцәа реиҳараҩык игәымбылџьбароу ашьҭашәарыцарақәа ахаангьы ирықәымшәацт. Аха уеизгьы дара даҽа ԥышәарақәак рымоуп. Аӡәырҩы ӷарны инхоит, ма ртәылаҿы аибашьрақәа цоит, егьырҭ аԥсабаратә рыцҳарақәа ирықәшәоит. Шьоукы Моисеии егьырҭ апатриархцәеи реиԥш, аԥсҭазаара бзиа аанрыжьит, ма ахьӡ-аԥша мап ацәыркит. Дара ирылшо зегь ҟарҵоит рхазы мацара анхара агәаҳәара ихнамхырц азы. Изларылшозеи уи? Дара Иегова бзиа дырбоит, насгьы аиашамра шықәиго, иара убас изиашоу имаҵзуҩцәа аҳамҭа — аиашара ахьыҟало адунеи ҿыц аҿы наӡаӡа анхара — шриҭо ала иқәыргәыӷра агәра ргоит. (Уаԥхьа Аԥсалом 36:5, 7, 9, 29 [37:5, 7, 9, 29, АдҾ].)

17. Шәзызхиоузеи шәара, насгьы еилҳаргозеи анаҩстәи астатиаҿы?

¹⁷ Ари астатиаҿы ҳара еилаҳкааит Анцәа иқәыргәыӷрақәа рызхәыцреи есыҽнытәи анцәаиҳәарақәеи ҳагәрахаҵара арӷәӷәара ишҳацхраауа. Уи ҳгәыӷра еснагь азхәыцра, насгьы гәыӷрала ҳаззыԥшу шынаӡо агәра го ҳзықәшәо аԥышәарақәа зегьы рыхгара иҳацхраауеит. Аха Абиблиаҿы агәрахаҵара иаанаго «гәыӷрала ҳаззыԥшу» аасҭа еиҳауп. Уи анаҩстәи астатиаҿы еилҳаргоит.