ভাগ ১২-ত কি শিকিম

যীচুৱে লোকসকলক স্বৰ্গৰাজ্যৰ বিষয়ে শিকালে। লগতে ঈশ্বৰৰ নাম পবিত্ৰ কৰিবলৈ, তেওঁৰ ৰাজ্য আহিবলৈ আৰু তেওঁৰ ইচ্ছা পৃথিৱীত পূৰ হোৱাৰ বিষয়েও প্ৰাৰ্থনা কৰিবলৈ শিকালে। যদি আপোনাৰ লʼৰা-ছোৱালী আছে, তেনেহʼলে এই প্ৰাৰ্থনা আমাৰ কাৰণে কিমান গুৰুত্বপূৰ্ণ, সেয়া বুজিবলৈ সহায় কৰক। যীচুৱে চয়তানৰ প্ৰলোভনত নাহিলে আৰু ঈশ্বৰৰ বিশ্বাসী হৈ থাকিল। যীচুৱে পাঁচনিসকলক বাছনি কৰিলে আৰু তেওঁলোক ঈশ্বৰৰ ৰাজ্যৰ প্ৰথম সদস্য হৈ পৰিল। মন কৰক যে যীচুৰ সত্য উপাসনাৰ প্ৰতি কিমান উৎসাহ আছিল। তেওঁ লোকসকলক সহায় কৰিব বিচাৰিছিল। সেইবাবে, তেওঁ বেমাৰী লোকসকলক সুস্থ কৰিলে, ভোকত থকা লোকসকলক আহাৰ খোৱালে আৰু মৃত লোকবিলাকক আকৌ জীয়াই তুলিলে। এই সকলো চমৎকাৰ কৰি যীচুৱে দেখুৱালে যে ঈশ্বৰৰ ৰাজ্যই মানুহৰ বাবে কি কৰিব।