An Paghuhulit Bilang Grupo Nagtatao nin Kagayagayahan
1 Kan sugoon na maghulit an 70 disipulo, tinokdoan sinda ni Jesus kun ano an sasabihon, inorganisar sinda nin manduwaduwa, asin itinao an teritoryo na kokobrehan ninda. Ini nagkontribwir sa kagayagayahan na naeksperyensiahan ninda. (Luc. 10:1-17) Siring man ngonyan, an paghuhulit bilang grupo nakakatabang na andamon, organisaron, asin enkaminaron an banwaan nin Dios para sa paghuhulit.
2 Nangengenot an Kamagurangan: An kamagurangan may mahalagang papel sa pagtabang sa gabos na regular na makikabtang sa paghuhulit. Nangengenot an paraataman sa paglilingkod sa pag-areglo para sa paglilingkod sa laog kan semana. Paninimbagan kan lambang paraataman sa pag-adal sa libro an pag-organisar kan aktibidad para sa saiyang grupo, nangorogna sa katapusan kan semana. May mga beses na kun an bilog na kongregasyon nagtitiripon bago lumuwas sa paglilingkod sa langtad, siring baga pagkatapos kan Pag-adal sa Torrengbantayan, maninigong asikasohon kan lambang paraataman sa pag-adal sa libro an mga pangangaipo kan saiyang sadiring grupo.
3 “Sa Disente Asin Aregladong Paagi”: An saro na naasignaran na mamayo sa pagtiripon bago lumuwas sa paglilingkod sa langtad maninigong magpoon nin tama sa oras asin limitaran an pagtiripon sa 10 o 15 minutos. Pinakamarahay na areglohon nia an mga paghuhulit bilang grupo asin mag-asignar nin teritoryo (apuera sana kun an mga paraataman sa pag-adal sa libro an mag-aasikaso kaini, siring kan sinabi kasubago) bago magtapos paagi sa pamibi. Iniinaan kaini an pangangaipo kan mga parahayag na magtiripontipon sa teritoryo, na makababawas sa dignidad kan satong gibohon. Iyan kaoyon man kan hatol ni Pablo: “Pabayaan na an gabos na bagay mangyari sa disente asin aregladong paagi.” (1 Cor. 14:40) An gabos na nag-aatender sa mga pagtiripon na ini bago lumuwas maninigong magkontribwir sa kapangganahan kan areglo paagi sa pag-abot nin tama sa oras, lubos na pakikikooperar sa saro na nangengenot, asin pagpasiring tolos-tolos sa teritoryo oras na pahaleon an grupo.
4 Nagkakasararo: An mga areglo nin paghuhulit bilang grupo nagtatao nin ekselenteng oportunidad na mamidbid niato an iba sa kongregasyon. Mantang mayo man nin kontra sa pakipag-areglo nin patienot na makaiba an saro, magigin kapakipakinabang man na kita mag-atender sa mga pagtiripon bago lumuwas sa paglilingkod sa langtad na dai nin patienot na mga areglo. Tibaad iasignar kita na makiiba sa saro na bako pa niato gayong kamidbid, sa siring pinangyayari kita na ‘humiwas’ sa satong pagkamoot.—2 Cor. 6:11-13.
5 An paghuhulit bilang grupo nag-eenkaminar sa sato asin pinagsasararo kita bilang “mga kapwa trabahador sa katotoohan.” (3 Juan 8) Logod na lubos kitang makikabtang dian!