Madonong na Paggamit kan Kinakaipuhan na mga Instrumento
1 Mientras na kamo nagpapatotoo sa harong-harong, an saindong pasohan maninigo na ikaayon an kada kagharong sa Makakasuratan na pag-orolay paagi sa paggamit kan Biblia asin iba pang kinakaipuhan na instrumento. (Ikomparar an 2 Corinto 6:1; 2 Timoteo 2:15.) Ano an ikinahahadit kan mga tawo sa saindong teritoryo sa mga aldaw na ini? Nahahadit daw sinda manongod sa kamugtakan sa ekonomiya asin sa pagbaba kan kuwalidad nin buhay pampamilya? Puwedeng gumiya sa marahay na pag-orolay sa Biblia an nagkapirang introduksion sa arin man sa mga topikong ini.
2 Puwede kamong magsabi:
◼ “Sa masakit na mga panahon na ini, kadakol na tawo an nadidepisilan sa paghanapbuhay. Sa paghona daw nindo mariresolberan nin mga gobyerno nin tawo an satuyang pinansial na mga problema? [Dangogon an simbag.] Ako mismo napakosog nanggad kan puntong ini . . . ”
3 Dangan puwede nindong basahon an Salmo 72:12-14 asin pilion man an dugang pang teksto sa pahina 154-5 kan librong Reasoning. O pakabasa nin sarong kasuratan, puwede kamong bumasa nin sarong parapo sa tract na Life in a Peaceful New World. An kadakol na parahayag—kaiba na an mga hobenes—mapangganang nakapopoon nin mga pag-adal sa Biblia sa mga tract paagi sa pagbasa nin sarong parapo dangan paghapot sa kagharong kan saiyang opinyon sa binasa.
4 Sa ibang komunidad tibaad boot nindong gamiton an pag-atubang na ini:
◼ “Kadakol kan gusto na maheling an pagbabalik sa tradisyonal na buhay pampamilya. Sa paghona daw nindo kaipuhan na magdesisyon an kada indibiduwal kun anong mga prinsipyo an maninigong kuyogon, o kaipuhan daw na magkaigwa nin sarong pamantayan para sa gabos? [Pasimbagon.] Dakol an minaoyon na kun kukuyogon an sadol kan Biblia, magkakaigwa nin dakulang pag-oswag sa kuwalidad kan buhay pampamilya.”
5 Sa puntong ini tibaad boot nindong gumamit nin mga punto sa subtemang “Arin an Dalan Pasiring sa Kapangganahan?” sa bagong tract na Maogma sa Buhay Pampamilya tanganing makapoon nin pag-adal sa Biblia, o puwede nindong buksan an kapitulo 29 kan librong Mabuhay Sagkod Lamang asin ipaheling an mga punto sa pahina 243-6.
6 Kun kamo nakapoon nin pag-adal sa Biblia sa enot na pagdalaw, gumibo nin depinidong areglo tanganing ikapadagos an pag-orolay sa masunod. Puwede nindong ibugtak an pundasyon para sa saindong masunod na pagdalaw paagi sa pagsabi sa kagharong na pagbalik nindo boot nindong ihiras an simbag sa parateng ihinahapot na: “Taano daw ta tinotogotan nin Dios an karatan?” An kasunod na artikulo isusuherir kun paano iaatubang an tema sa pagdalaw liwat.