Japta 6

?From Wanem Ol Stret Brata Mo Sista Oli Raorao?

STAT long Ken mo Ebel, ol stret brata mo sista oli stap raorao. Hemia i no from we yu yu no laekem nating brata no sista blong yu. No gat. Wan yangfala i talem se: “Ating long hat blong mi, mi laekem brata blong mi. Be, mi no save harem filing ya naoia. Maet mi laekem hem smol nomo.”

?From wanem plante stret brata mo sista oli no save joengud oltaem? Harriet Webster we i stap raetem ol buk, i talemaot tok blong Claudia Schweitzer, wan woman we i stap givim advaes long ol famle, i se: “Long evri famle ol pikinini oli wantem kasem lav blong papa mama blong olgeta no oli wantem kasem mane mo klos.” Webster i gohed se: “Taswe, klosap oltaem ol brata mo sista oli raorao from ol samting ya nao.” Gel ya Camille wetem ol faef brata mo sista blong hem, oli stap serem tri rum. Camille i talem se: “Sam samtaem mi mi wantem stap mi wan, mo mi wantem satem doa blong oli stap afsaed, be no gat, oltaem oli mas stap raon long mi.”

Rao i save kamaot tu, from sam gudfala samting we papa mama i givim long ol pikinini, no from sam wok we tufala i givim. Maet ol fasbon pikinini oli no glad se oli mas mekem bighaf blong ol wok. Maet ol smosmol pikinini oli no wantem we bigfala brata no sista blong olgeta i stap bos long olgeta oltaem, no maet oli jalus from sam gudfala samting we hem i kasem. Wan gel long Inglan i talem se: ‘Sista blong mi i stap lanem blong draevem trak, be papa mama i no letem mi mi lanem. Mi mi harem i kros mo mi traem blong spolem sista blong mi.’

Sam stret brata mo sista oli no joengud from we prapa fasin blong olgeta wanwan i defdefren. Diane, we i gat 17 yia, i tokbaot ol brata mo sista blong hem, i se: “Sipos yu stap wetem ol semfala man evri dei, . . . nao wan long olgeta i stap mekem semfala fasin oltaem we yu no laekem nating, bambae yu save kam kros.” Yangfala Andre i talem se: “Taem yu stap long haos . . . , prapa fasin blong yu i stap long klia ples.” Mo sore tumas, ‘prapa fasin blong yu’ i save minim se yu no mekem i gud long narafala, yu no gat kaen fasin, mo yu no lukaotgud long ol toktok blong yu.

Wan narafala samting we oltaem i mekem ol stret brata mo sista oli raorao, hemia sipos papa mama i laekem wan pikinini moa long ol narafala (‘!Mama i laekem yu moa!’). Wan tija we i stadi long tingting blong man Lee Salk i talem se: “Olgeta pikinini wanwan oli defdefren, mo oli mekem ol defdefren fasin oli kamaot [long ol papa mama blong olgeta]. From samting ya, ol papa mama oli no save laekem olgeta pikinini blong olgeta long sem fasin nomo.” Sem mak long taem blong Baebol. Olfala Jekob (Isrel) “i lavem [Josef] moa, i winim we i lavem ol narafala brata ya blong hem.” (Jenesis 37:3) From samting ya, ol brata blong Josef oli jalus tumas.

Kilim Faea Blong Kros

“Sipos i no moa gat faeawud, bambae faea i ded.” Hemia tok blong Ol Proveb 26:20. Blong blokem ol faea long bus, plante taem ol man oli katemaot sam wud blong mekem wan klia ples. Sipos wan faea i stat, bambae hem i bonem bus go kasem klia ples ya nomo, nao bambae i ded. Long sem fasin, i gat rod blong blokem—no blong daonem—ol rao. Wan rod, hemia blong storian tugeta blong traem stretem trabol bifo we rao i kamaot.

Tingbaot: ?Trabol i stap kamaot from we wanwan memba blong famle i no gat janis blong stap hem wan nomo blong smoltaem long wan kwaet ples? Sipos i olsem, jusum wan taem we evriwan i glad blong storian, nao traem sidaon tugeta mo mekem wan plan. (‘Bambae mi mi stap mi wan long ol dei ya [no aoa ya], mo yu yu save stap yu wan long ol taem olsem.’) Nao “sipos yu talem se ‘Yes,’ yu mas talem ‘Yes’ nomo. Mo sipos yu talem se ‘No,’ yu mas talem ‘No’ nomo.” Hemia i min se yu mas folem plan ya we yufala i agri long hem. (Matiu 5:37) Sipos i nidim we plan ya i jenis, yu mas talem long ol narafala fastaem, i nogud yu jes gohed blong jenisim plan ya, yu wan.

?Yufala i stap raorao from olting blong yufala? Wan yangfala i talem se: “Oltaem sista blong mi i stap yusum olting blong mi we hem i no askem fastaem. !Hem i bin yusum ol krim we mi pem blong fes blong mi, mo biaen, hem i no sem blong talem long mi se krim ya i nogud!” Maet yu yu save askem long papa no mama blong yu blong jajem ol trabol olsem. Be, i moa gud blong toktok stret wetem brata no sista blong yu long wan taem we tingting blong yutufala i kwaet. Stap rere blong ‘serem ol samting,’ i bitim we yu rao from olting we yu yu gat “raet” long olgeta. (1 Timoti 6:18) Yufala i save putumap sam rul we yufala i mas folem taem wan i wantem yusum samting blong narafala. Maet wan long ol rul ya se, oltaem yufala i mas askem fastaem. Traem blong lego sam strong tingting we yu yu gat blong yu save agri wetem narafala. !Nao bambae yu luk se “faea i ded” bifo we hem i stat!

?Be, olsem wanem sipos prapa fasin blong brata no sista blong yu i mekem yu yu harem nogud oltaem? Yu yu no save jenisim samting ya. “Yufala i mas lavlavem yufala, blong yufala i no raorao long yufala.” (Efesas 4:2) Bitim we yu mekem ol smosmol mastik mo slak fasin blong hem oli kam wan bigfala trabol, i moa gud blong soem Kristin lav, we i “save kavremap fulap sin.” (1 Pita 4:8, NW) Bitim we yu tok kros mo strong, i moagud we ‘yu no moa kros. Bambae yu no moa faerap. Bambae yufala i no moa stap badfren long yufala. Bambae yu no moa tok agens long narafala man mo yu no moa yusum ol doti tok.’ ‘Yu mas toktok gud long olgeta, long ol tok we olgeta oli save glad long hem.’—Kolosi 3:8; 4:6.

‘!I No Stret!’

Wan yangfala i harem nogud i se: “Sista blong mi i stap kasem evri samting we hem i wantem. Be mi, mi neva kasem wan samting.” ?Yu tu yu harem olsemia? Makem tufala tok ya, “evri samting” mo “neva.” ?I rili tru se, trabol i bigwan olsemia? Ating nogat. ?Be sipos i tru, i stret blong ting se papa mama blong yu oli mas mekem i sem mak long tufala pikinini we tufala i defdefren? !Nogat! Maet papa mama blong yu oli stap givim ol samting we yufala wanwan i nidim, folem fasin blong yufala wanwan.

?Be, ating i no stret we ol papa mama oli laekem wan pikinini moa long ol narawan? Si, i stret nomo. Tingbaot Jekob we hem i laekem moa boe blong hem Josef. ?From wanem i olsem? From we woman blong hem Rejel, we i ded finis, mo we Jekob i laekem hem tumas, hem nao i bonem Josef. Taswe, i stret nomo we Jekob i laekem moa pikinini ya blong hem be, lav we Jekob i gat long Josef, i no blokem hem blong laekem ol narafala boe blong hem. Hem i soemaot se hem i rili tingbaot olgeta. (Jenesis 37:13, 14) !Taswe i no stret we ol brata blong Josef oli jalus!

Maet papa mama blong yu oli laekem brata no sista blong yu moa, from we oli intres long ol semfala samting, no oli gat semfala fasin, no maet from wan narafala samting bakegen. Be hemia i no min se tufala i no laekem yu. Sipos yu harem se yu kros no yu jalus, yu mas luksave se hat blong yu we i fulap long sin, i stap trikim yu. Traehad blong winim filing ya. Sipos yu yu stap kasem evri samting we yu nidim blong laef, yu no nid blong kam kros long brata no sista blong yu we papa mama blong yu i mekem i moagud lelebet long hem.

Ol Brata Mo Sista—Oli Wan Blesing

Ating i hadwok blong bilivim samting ya—antap moa sipos ol brata mo sista blong yu oli stap mekem yu yu harem nogud. Be gel ya Diane, we i gat seven brata mo sista, i talem se: “I gud tumas blong gat ol brata mo sista. Oli olsem ol fren we yu save toktok wetem olgeta mo mekem ol samting tugeta.”

Anne Marie mo brata blong hem Andre tufala i talem se: “I tru se, yu save go wokbaot long plante ples wetem ol fren blong yu. Be ol brata mo sista oli defren, oli stap oltaem nomo. Enitaem we yu wantem pleplei no yu wantem go wokbaot samples, oli stap blong go wetem yu.” Donna i luk wan narafala gudfala samting, i se: “Oli save givhan long yu blong mekem ol wok long haos.” Sam narafala yangfala oli tokbaot ol brata mo sista blong olgeta olsem “ol man blong givim advaes mo blong lesin long olgeta” mo “we oli kasem save long olgeta.”

Long ol yia we oli kam, bambae yu mas kasem sam traem mo trabol wetem ol narafala man. Ol trabol ya oli sem mak long hemia we yu stap kasem wetem ol brata mo sista blong yu. Jalus, serem olting blong yu, mekem i gud moa long wan i bitim narawan, no save faenem wan kwaet ples blong stap yu wan, man i tingbaot hem wan nomo, mo ol defdefren fasin blong ol narafala man—olgeta trabol ya oli stap kamaot oltaem long laef. Taswe, sipos yu winim ol trabol we yu gat wetem ol brata mo sista blong yu naoia, samting ya i save tijim yu blong joengud wetem ol narafala man biaen.

Andre we i gat 17 yia, i talem klosap semfala tok olsem Baebol i talem long 1 Jon 4:20. Hem i se: “?Sipos yu no save joengud wetem ol man we yu save luk olgeta, olsem wanem bambae yu save joengud wetem God we yu no save luk hem?” Ol smosmol rao wetem ol brata sista blong yu, bambae oli mas kamaot sam samtaem. Be, yu save lanem blong serem ol samting, storian gud tugeta, mo lego prapa tingting blong yu blong agri wetem narafala. ?Wanem frut i save kamaot? Maet bambae yu luksave se, i gud tumas blong gat ol brata mo sista.

Ol Kwestin Blong Tokbaot

◻ ?From wanem plante stret brata mo sista oli raorao?

◻ ?Olsem wanem yu save blokem ol rao we oli kamaot taem yu wantem stap yu wan blong smoltaem, mo taem oli wantem yusum olting blong yu?

◻ ?From wanem sam papa mama oli laekem moa wan pikinini i bitim ol narawan? ?Yu ting se i stret olsem?

◻ ?Wan pikinini we i no gat brata no sista i mestem wan bigfala samting?

◻ ?Olsem wanem ol brata mo sista blong yu oli wan blesing?

[Tok blong makem poen long pej 52]

“Olgeta pikinini wanwan oli defdefren, . . . from samting ya, ol papa mama oli no save laekem olgeta pikinini blong olgeta long sem fasin nomo.”—Lee Salk, wan tija we i stadi long tingting blong man

[Bokis blong pija long pej 54]

‘Mi Mi No Gat Brata Sista’

Sipos yu yu no gat brata sista, yu no mas ting se hemia samting we i nogud olgeta. Tingbaot, ol narafala yangfala oli save faenem i had blong joengud wetem ol brata mo sista blong olgeta, be yu yu save jusum ol fren blong yu (we papa mama blong yu i agri long olgeta). Maet yu yu gat moa taem blong stadi, tingting dip, mo lanem blong gat gudhan long sam wok.—Lukluk Japta 14 long saed blong harem nogud blong stap yu wan.

Yangfala Thomas i tokbaot wan gudfala saed blong bisnes ya, i se: “From we mi mi no gat wan stret brata no sista, papa mama blong mi tufala i givim olgeta taem blong tufala long mi nomo.” I tru, samting ya i save mekem yangfala ya i tingbaot hem wan nomo. Be sipos papa mama i skelemgud taem we tufala i spenem wetem yu, tufala i save givhan long yu blong kam bigman long tingting blong yu kwiktaem, mo blong no fraet blong joen wetem ol narafala bigman.

Be, from we yu yu no gat brata mo sista we yu mas serem ol samting blong yu wetem hem, yu yu save kam olsem we yu wantem holem ol samting i blong yu nomo. Jisas i givim advaes ya se: “Yufala i mas givim ol samting i go long narafala man.” (Luk 6:38) Traem serem ol samting blong yu wetem ol fren mo famle blong yu. Traem luksave wanem samting narafala i nidim, mo soem se yu glad blong givhan long narafala. Bambae oli glad long fasin ya blong yu blong givim wetem gladhat. Maet bambae yu luk se, nating we yu no gat wan stret brata no sista, be yu no harem nogud blong stap yu wan.

[Tok blong pija long pej 53]

Plante taem mi harem nogud from we mi no gat wan sista. Be i gat sam gudfala saed blong bisnes ya tu