¿Achkë utzil nqïl rma Jehová kowan nqrajoʼ?

1. ¿Achkë rbʼanik nqaʼän chë Jehová kiʼ rkʼuʼx nuʼän?

TQABʼANAʼ che rä chë kʼo jun nqaspaj che rä jun qamigo rchë nuksaj. ¿Achkë xtqanaʼ we ryä xa xtkʼöl chqä xtmestaj ri xqayaʼ che rä? Kantzij na wä chë kan xtqbʼison. Ye kʼa, kan kiʼ qakʼuʼx xtqaʼän we ryä nutyoxij chqë chqä nuksaj ri xqayaʼ che rä. Ke riʼ chqä Jehová, ryä xyaʼ Rkʼajol pa kamïk xa qmä röj. ¿Achkë komä nunaʼ ryä taq röj nqakʼüt chwäch chë nqatyoxij ri spanïk riʼ che rä chqä nqatyoxij chë kowan nqrajoʼ? Kantzij na wä chë ryä kan kiʼ rkʼuʼx nuʼän (Juan 3:16; Rom. 5:7, 8).

2. ¿Achkë xtqatzʼët chpan re tjonïk reʼ?

² Ye kʼa taq yeqʼax ri jnaʼ, rkʼë jbʼaʼ xa nqamestaj ri xkiʼän Jehová chqä Jesús qmä röj. Röj kan nqatyoxij ri xkiʼän ryeʼ, ye kʼa taq nqamestaj, ya riʼ xa achiʼel ta najin nqakʼöl qa ri spanïk riʼ. Rchë ma nqaʼän ta riʼ chqä rchë ronojel mul nqtyoxin che rä Jehová, chaq taqïl nkʼatzin nqaquʼ rij ri xuʼän ryä chqä Rkʼajol pa qawiʼ. Re tjonïk reʼ xtqrtoʼ rchë xtqaʼän riʼ. Xtqatzʼët achkë utzil nqïl komä rma rkʼaslemal xyaʼ Jesús pa kamïk y achkë utzil xtqïl chqawäch apü. Chqä xtqatzʼët achkë rbʼanik nqakʼüt chwäch Jehová chë nqtyoxin che rä rma kowan nqrajoʼ, y más taq nbʼeqä ri qʼij taq nqanataj rkamik Jesús.

RI UTZIL NQÏL KOMÄ

3. ¿Achkë jun utzil qlon komä rma rkʼaslemal xyaʼ Jesús pa kamïk?

³ Komä ya najin chik nqïl utzil rma rkʼaslemal xyaʼ Jesús pa kamïk. Jun chkë ri utzil riʼ ya riʼ chë Jehová nuküy qamak. Ryä ma nuʼän ta riʼ xa rma nunaʼ chë ya riʼ kʼo chë nuʼän, Jehová nuʼän riʼ rma kan ya riʼ nrajoʼ nuʼän. David xtyoxij ya riʼ che rä Dios chpan jun bʼix. Ryä xuʼij ya reʼ che rä: «Nimaläj Jehová, rït kan ütz anaʼoj chqä ma nakʼewaj ta yakyun» (Sal. 86:5; 103:3, 10-13).

4. ¿Achoq kimä xtäq pä Jehová Rkʼajol? (Lucas 5:32; 1 Timoteo 1:15).

⁴ Ye kʼo jojun nkinaʼ chë ma taqäl ta chkij nkuy kimak rma Jehová. Ye kʼa nqkowin nqaʼij chë majun ta jun chqë röj taqäl chrij nkuy rmak rma Dios. Ri apóstol Pablo kan ke riʼ chqä xnaʼ. Ryä xuʼij ya reʼ: «Ma taqäl ta chwij nbʼix apóstol chwä». Ye kʼa chrij riʼ xuʼij: «Ye kʼa rma ri rtzil Dios ri ma taqäl ta chwij nkʼül, yikowin nbʼän ri najin nbʼän» (1 Cor. 15:9, 10). Taq röj nqatzolij qiʼ che rä qamak, Jehová kan nqrküy. ¿Achkë rma ryä nuʼän riʼ? Ma rma ta chë taqäl chqij, xa rma kowan nqrajoʼ. Rma riʼ, we nqanaʼ chë ma taqäl ta chqij nkuy qamak rma Jehová, ma tqamestaj ta chë ryä ma xtäq ta pä Rkʼajol kimä winäq ri majun ta kimak, ryä xtäq pä Rkʼajol kimä winäq ri kʼo qa mak chkij chqä nkitzolij kiʼ che rä kimak (taskʼij Lucas 5:32; 1 Timoteo 1:15).

5. ¿Achkë rma majun ta jun winäq nkowin nuʼij chë taqäl chrij nkuy rmak rma Jehová?

⁵ Tapeʼ kan kʼïy chik jnaʼ qayaʼon pä rqʼij Jehová, ma ütz ta nqaquʼ chë rma riʼ kan taqäl chqij nkuy qamak rma ryä. Kantzij na wä chë Jehová kan nuloqʼoqʼej jontir ri qabʼanon pä chuyaʼik rqʼij (Heb. 6:10). Ye kʼa taq xtäq pä Rkʼajol qmä röj, ma xtäq ta pä rchë nutöj chqë ri najin nqaʼän rma ryä. Ya riʼ kan jun spanïk xyaʼ ryä chqë. We röj nqaquʼ chë kan taqäl chqij chë Dios nuküy qamak, ya riʼ xa achiʼel ta najin nqaʼij chë ma xkʼatzin ta chë Jesús xkäm qmä röj (tajnamaj rkʼë Gálatas 2:21).

6. ¿Achkë rma Pablo xtäj rqʼij rchë xyaʼ rqʼij Jehová?

⁶ Pablo rtaman wä chë, tapeʼ xtuʼän jontir ri kʼo pa rqʼaʼ rchë xtyaʼ rqʼij Jehová, ryä majun bʼëy xtkowin ta xtuʼij chë taqäl chrij nkuy rmak rma Dios. ¿Achkë kʼa rma xtäj rqʼij rchë xyaʼ rqʼij Jehová? Rma nrajoʼ wä nutyoxij che rä Dios chë xküy rmak (Efes. 3:7). Ke riʼ chqä röj, nqatäj qaqʼij rchë nqayaʼ rqʼij Jehová, ma rma ta chë nqajoʼ nqaʼij chë taqäl chqij chë ryä nuküy qamak, xa rma nqajoʼ nqtyoxin che rä rma nqrküy.

7. ¿Achkë chik jun utzil qlon rma rkʼaslemal xyaʼ Jesús pa kamïk? (Romanos 5:1; Santiago 2:23).

⁷ Jun chik utzil qlon komä rma rkʼaslemal xyaʼ Jesús pa kamïk, ya riʼ chë nqkowin jnan nuʼän qawäch rkʼë Jehová.a Achiʼel xqatzʼët qa chpan ri jun qa tjonïk, taq nqaläx, röj ma jnan ta rbʼanon qawäch rkʼë Dios. Ye kʼa rma rkʼaslemal xyaʼ Jesús pa kamïk, nqkowin jnan nuʼän qawäch rkʼë Dios chqä nqjelun rkʼë ryä (taskʼij Romanos 5:1; Santiago 2:23).

8. ¿Achkë rma kʼo ta chë nqtyoxin che rä Jehová rma ryaʼon qʼij chqë nqchʼö rkʼë?

⁸ Tqaquʼ rij jun ri nqkowin nqaʼän rma jnan rbʼanon qawäch rkʼë Jehová. Röj nqkowin nqchʼö rkʼë. Jehová ma xa xuʼ ta nukʼoxaj ri oraciones yebʼan pa qamoloj, ryä chqä nukʼoxaj taq nqchʼö rkʼë chqajujnal. Kantzij na wä chë kan ütz nqanaʼ taq nqchʼö rkʼë Dios, ye kʼa ri utzil más nüm nqïl taq nqaʼän riʼ, ya riʼ chë nqrtoʼ rchë más jnan nuʼän qawäch rkʼë ryä (Sal. 65:2; Sant. 4:8; 1 Juan 5:14). Taq Jesús xjeʼ chwäch Rwachʼlew, ryä chaq taqïl xchʼö rkʼë Jehová, rma rtaman wä chë Rtat najin wä nukʼoxaj chqä chë ya riʼ xttoʼ rchë más jnan xtuʼän rwäch rkʼë Rtat (Luc. 5:16). Kan kowan nqtyoxin chë Jesús xyaʼ rkʼaslemal pa kamïk qmä röj. Rma ryä xuʼän riʼ, röj nqkowin nq·ok ramigos Jehová chqä nqkowin nqchʼö rkʼë.

RI UTZIL XTQÏL CHQAWÄCH APÜ

9. ¿Achkë utzil xtkïl ri winäq ri nkiyaʼ rqʼij Jehová?

⁹ Ri winäq ri nkiyaʼ rqʼij Dios kan kʼïy utzil xtkïl rma rkʼaslemal xyaʼ Jesús pa kamïk. Jehová xtyaʼ kikʼaslemal ri ma xtkʼis ta. Ye kʼïy winäq ma nkinmaj ta chë röj nqkowin nqkʼaseʼ chqä majun bʼëy nqkäm ta, rma chpan jontir ri tiempo qʼaxnäq pä kan pa mil winäq ye kamnäq äl. Ye kʼa taq Jehová xeruʼän ri winäq, ryä xrajoʼ chë majun bʼëy yekäm ta. Tapeʼ ri winäq pa qaqʼij komä ma nkinmaj ta chë nqkowin nqïl qakʼaslemal ri ma nkʼis ta, röj ütz nqayaʼ chwäch qan chë xtqïl ri kʼaslemal riʼ, rma qataman chë Jehová xyaʼ yän Rkʼajol pa kamïk rchë röj nqkowin nqkʼaseʼ chqä majun bʼëy chik nqkäm ta (Rom. 8:32).

10. ¿Achkë kan kirayin chik qachʼalal ri yechaʼon rchë yebʼä chkaj chqä ri xtyaʼöx kikʼaslemal chwäch Rwachʼlew?

¹⁰ Tapeʼ kʼa chqawäch apü xtyaʼöx qakʼaslemal ri ma xtkʼis ta, Jehová nrajoʼ chë nqaquʼ apü rij ri jaʼäl kʼaslemal riʼ. Ri qachʼalal ri yechaʼon rchë yebʼä chkaj, kʼo ta nkajoʼ ye kʼo chik chkaj rchë nkiqʼät tzij pa rwiʼ Rwachʼlew rkʼë Jesús (Apoc. 20:6). Y ri xtyaʼöx kikʼaslemal chwäch Rwachʼlew, kiyoʼen chik ri qʼij taq ma xtkitäj ta chik poqän chqä taq xkejeʼ chwäch jun Rwachʼlew ri rbʼanon chik jun Paraíso (Apoc. 21:3, 4). ¿Ayoʼen rït xtyaʼöx akʼaslemal chwäch Rwachʼlew? We ke riʼ, ma taquʼ ta chë ri kʼaslemal riʼ ma más ta ütz chwäch ri kʼaslemal xtkïl ri yebʼä chkaj. Ma tamestaj ta chë ri winäq xebʼan rchë yejeʼ chwäch Rwachʼlew chqä majun bʼëy yekäm ta. Rma riʼ, taq xtqïl ri kʼaslemal riʼ, kan kiʼ qakʼuʼx xtqaʼän.

11, 12. ¿Achkë utzil qayoʼen chik chë xkebʼanatäj? (Keʼatzʼetaʼ chqä ri achbʼäl).

¹¹ Taquʼ apü rij achkë xtuʼän akʼaslemal chwäch ri kʼakʼakʼ Rwachʼlew. Taq xtbʼeqä ri qʼij riʼ, majun ta chik xtaquʼ ta chë xkayawäj o chë xkakäm (Is. 25:8; 33:24). Jehová xtyaʼ chawä jontir ri narayij rït. ¿Achkë nawajoʼ natamaj? ¿Nawajoʼ natamaj más chkij ri chköp? ¿Nawajoʼ natamaj naʼän tocar jun instrumento? ¿Nawajoʼ natamaj yabʼixan o yabʼä chpan nkʼaj chik tinamït? Kantzij na wä chë ri qʼij riʼ xkekʼatzin winäq ri kitaman nkiyäk jay, nkiʼän tkoʼn, yekiʼän rkïl taq wäy, nkijosqʼij jardín, yekiʼän jalajöj chpobʼäl (herramientas) chqä nkiyaʼ chik nkʼaj toʼïk (Is. 35:1; 65:21). ¡Xtjeʼ kʼïy tiempo chawäch rchë xtatamaj ri nawajoʼ!

¹² ¡Kantzij na wä chë kan xttel qakʼuʼx xkeqakʼül ri winäq ri xkekʼasöx pä! (Hech. 24:15). Chqä, kan kiʼ qakʼuʼx xtqaʼän taq xtqatamaj más chrij Jehová chqä chrij jontir ri rbʼanon qa (Sal. 104:24; Is. 11:9). Ye kʼa ri más jaʼäl ya riʼ chë xtqkowin xtqayaʼ rqʼij Jehová rkʼë jun chʼajchʼöj conciencia, rma ma xttiʼon ta qan chë kʼo jun ma ütz ta xqaʼän. ¿Tapeʼ chë rït nawajoʼ nawïl jontir ri utzil riʼ? Ma tayaʼ ta kʼa qʼij chë ri narayij komä xtuʼän chë ma xtawïl ta ri jaʼäl kʼaslemal riʼ (Heb. 11:25). Xa bʼa achkë nkʼatzin nqaʼän komä o nqayaʼ qa rbʼanik, ma njunmatäj ta rkʼë jontir ri utzil xkeqïl. Tnatäj chawä chë xtbʼeqä ri qʼij taq xtqjeʼ chwäch ri kʼakʼakʼ Rwachʼlew y ma xtkʼatzin ta chik xtayoʼej ri qʼij riʼ. Jontir ya reʼ xtbʼanatäj rma Jehová kowan nqrajoʼ chqä xtäq pä Rkʼajol rchë xkäm qmä röj.

TQAKʼUTUʼ CHWÄCH JEHOVÁ CHË NQTYOXIN CHE RÄ RMA NQRAJOʼ

13. ¿Achkë rbʼanik nqakʼüt chwäch Jehová chë nqtyoxin che rä rma nqrajoʼ? (2 Corintios 6:1).

¹³ ¿Achkë rbʼanik nqakʼüt chwäch Jehová chë nqtyoxin che rä rma xyaʼ Rkʼajol pa kamïk qmä röj? Taq nqaʼän chë ryaʼik rqʼij ryä njeʼ más rqʼij pa qakʼaslemal (Mat. 6:33). Chqä, ma tqamestaj ta chë Jesús xkäm «rchë chë ri ye kʼäs ma tkiʼän ta chik chë ri kikʼaslemal kʼa kichë na ryeʼ, xa rchë chik ri xkäm pa kiwiʼ chqä xkʼasöx pä rma Dios» (2 Cor. 5:15). Majun bʼëy nqajoʼ ta nqamestaj achkë rma Jehová xyaʼ Rkʼajol pa kamïk (taskʼij 2 Corintios 6:1).

14. ¿Achkë rbʼanik nqakʼüt chë qakʼuqbʼan qakʼuʼx chrij ri nuʼij pä Jehová chqë?

¹⁴ Jun chik rbʼanik nqakʼüt chwäch Jehová chë nqtyoxin che rä, ya riʼ taq nqakʼuqbʼaʼ qakʼuʼx chrij ri nuʼij pä chqë. ¿Achkë rbʼanik nqaʼän riʼ? Nqaʼän riʼ taq nqatzʼët na achkë nrajoʼ Jehová rchë nqaʼän, achiʼel taq najin nqatzʼët achkë xtqaʼän estudiar o achkë samaj xtqakʼän (1 Cor. 10:31; 2 Cor. 5:7). Taq nqakʼüt rkʼë ri yeqaʼän chë qakʼuqbʼan qakʼuʼx chrij Dios, nbʼanatäj ya reʼ qkʼë: más nqakʼuqbʼaʼ qakʼuʼx chrij ryä, más jnan nuʼän qawäch rkʼë y más nqayaʼ chwäch qan chë ryä kan xtuʼän ri rtzjun chqë (Rom. 5:3-5; Sant. 2:21, 22).

15. Taq nbʼeqä ri qʼij ri nqanataj rkamik Jesús, ¿achkë rbʼanik nqakʼüt chwäch Jehová chë nqtyoxin che rä?

¹⁵ Jun chik rbʼanik nqtyoxin che rä Jehová rma nqrajoʼ chqä rma xtäq pä Rkʼajol rchë xkäm qmä röj, ya riʼ taq nqaʼän jontir ri kʼo pa qaqʼaʼ rchë nqanataj rkamik Jesús. Tapeʼ röj qachʼobʼon chik nqjeʼ chpan ri moloj xtbʼan rchë xtqanataj rkamik Jesús, ütz chqä yeqaʼän invitar nkʼaj chik winäq (1 Tim. 2:4). Taq xtqaʼän riʼ, tqakʼutuʼ chkiwäch ri winäq achkë xtbʼan chpan ri moloj riʼ ri kan kowan rqʼij. Ütz nqakʼüt chkiwäch re videos reʼ ri ye kʼo pa jw.org: ¿Achkë rma xkäm Jesús? Chqä Tqanataj rukamik Jesús. Ri ukʼwäy taq bʼey xtkikanuj rbʼanik rchë yekiʼän invitar ri qachʼalal ri ye kanajnäq qa. ¿Achkë komä xtkinaʼ ri ye kʼo chkaj, o achkë xtqanaʼ röj we jojun chkë rkarneʼl Jehová ri ye sachnäq äl xketzolin pä chpan rtinamit? ¡Kantzij na wä chë ri ye kʼo chkaj kan kiʼ kikʼuʼx xtkiʼän, y röj chqä! (Luc. 15:4-7). Ütz chqä nqayaʼ chqawäch chë taq xtbʼeqä ri qʼij ri xtqanataj rkamik Jesús, ma xa xuʼ ta nqachʼaʼej qiʼ ri ya qataman chik qawäch, ütz chqä yeqachʼaʼej ri kʼa riʼ naʼäy mul yeʼapon o ri ya kʼo chik tiempo ye kanajnäq qa. ¡Tqabʼanaʼ chë jontir ütz nkinaʼ yejeʼ qkʼë! (Rom. 12:13).

16. ¿Achkë rma ütz nqaquʼ nqayaʼ más rqʼij Jehová taq nbʼeqä ri qʼij ri nqanataj rkamik Jesús?

¹⁶ ¿Nqkowin komä nqayaʼ más rqʼij Jehová taq nbʼeqä ri qʼij taq nqanataj rkamik Jesús? Jaʼ, nqkowin. Y ya riʼ jun rbʼanik nqkowin nqakʼüt chwäch Jehová chqä Jesús chë nqtyoxin chkë rma ri xkiʼän qmä röj. Taq más xtqatzjoj le Biblia ri qʼij riʼ, más xtqatzʼët achkë rbʼanik nqrtoʼ pä Jehová y más xtqakʼuqbʼaʼ qakʼuʼx chrij ryä (1 Cor. 3:9). Chqä, ma tqamestaj ta nqaskʼij ri peraj chpan le Biblia ri kikʼwan kiʼ rkʼë rkamik Jesús. Ya riʼ nqïl chpan ri folleto Tqanukʼuj ruwäch ri Ruchʼaʼäl Dios Ronojel qʼij chqä chpan jun peraj chpan ri Wuj rchë qamoloj. Ri textos riʼ ütz chqä yeqaksaj taq nqatjoj qiʼ chrij le Biblia pa qayonïl, rchë ke riʼ xtqkowin xtqatamaj nkʼaj chik naʼoj.

17. ¿Achkë nbʼanö chë Jehová kiʼ rkʼuʼx nuʼän qkʼë? (Tatzʼetaʼ chqä ri recuadro «Jojun rbʼanik ri nqkowin nqtyoxin che rä Jehová rma nqrajoʼ»).

¹⁷ ¿Y si ma yakowin ta naʼän jontir ri xqatzʼët qa chpan re tjonïk reʼ? Majun taquʼ ta. Tnatäj chawä chë Jehová ma nujnamaj ta ri naʼän rït rkʼë ri nkiʼän nkʼaj chik. Ryä nutzʼët achkë kʼo pan awan, y kan kiʼ rkʼuʼx rma rtaman chë rït kan natyoxij rkʼaslemal xyaʼ Jesús pa kamïk (1 Sam. 16:7; Mar. 12:41-44).

18. ¿Achkë rma kan kowan nqtyoxin che rä Jehová chqä che rä Jesús?

¹⁸ Rma rkʼaslemal xyaʼ Jesús pa kamïk, röj nqkowin nkuy qamak, nq·ok ramigos Jehová chqä nqkowin nqïl qakʼaslemal ri ma xtkʼis ta. Rma riʼ, ronojel mul tqakʼutuʼ chë nqtyoxin che rä Jehová rma kowan nqrajoʼ, rma ya riʼ xbʼanö che rä chë xyaʼ re utzil reʼ chqë (1 Juan 4:19). Y tqakʼutuʼ chqä chë nqtyoxin che rä Jesús rma kowan nqrajoʼ y rma xyaʼ rkʼaslemal pa kamïk qmä röj (Juan 15:13).