¿Abʼanon chik jontir ri nkʼatzin loman xtbʼeqä ri qʼij ri kʼo más ruqʼij chpan ri junaʼ?

1. ¿Achkë rma kan kowan ruqʼij chqawäch röj nqanataj rukamik Jesús? (Lucas 22:19, 20).

CHQAWÄCH jontir röj, ri rusamajelaʼ Jehová, ri qʼij ri kʼo más ruqʼij chpan jun junaʼ ya riʼ ri qʼij taq nqanataj rukamik Jesús. Ryä xuʼij qa chkë rutzeqelbʼëy chë kan nkʼatzin nkiʼän riʼ (taskʼij ruwäch Lucas 22:19, 20). ¡Röj kʼo ta nqajoʼ chë nbʼeqä yän ri qʼij riʼ! ¿Achkë rma? Tqatzʼetaʼ.

2. ¿Achkë jojun rma nqajoʼ chë nbʼeqä yän ri qʼij taq nqanataj rukamik Jesús?

² Ri qʼij taq nqanataj rukamik Jesús nqrtoʼ rchë nqchʼobʼon chrij ri xkiʼän Jehová chqä Jesús pa qawiʼ. Chqä nunataj chqë achkë jojun rubʼanik nqkowin nqakʼüt chë nqtyoxin chkë ryeʼ (2 Cor. 5:14, 15). Y, nuʼän chë junan nqjeʼ kikʼë qachʼalal chqä nqakʼuqbʼalaʼ qakʼuʼx chqawäch (Rom. 1:12). Ronojel junaʼ kʼïy chkë qachʼalal ri ye kanajnäq qa yeʼapon qkʼë rchë nqanataj rukamik Jesús, y ye kʼo jojun yetzolin pä rkʼë Jehová taq nkitzʼët achkë kikʼulik nbʼan kimä qachʼalal pa congregación. Chqä, kan ye kʼïy winäq nqä chkiwäch ri nkitzʼët ri qʼij riʼ chqä ri nkikʼoxaj, y rma riʼ nkajoʼ nkitjoj kiʼ chrij le Biblia. Kantzij na wä chë jontir reʼ nuʼän chë kan kowan ruqʼij chqawäch röj ri qʼij taq nqanataj rukamik Jesús.

3. ¿Achkë rubʼanik nqrtoʼ ri qʼij taq nqanataj rukamik Jesús rchë nqatzʼët achkë rubʼanik kan junan rubʼanon qawäch? (Tatzʼetaʼ chqä ri achbʼäl).

³ Röj chqä nqajoʼ chë nbʼeqä yän ri qʼij taq nqanataj rukamik Jesús rma nqajoʼ nqatzʼët achkë rubʼanik kan junan rubʼanon qawäch chpan rutinamit Jehová. Chwäch jontir le Ruwachʼlew, ri testigos de Jehová nkimöl kiʼ taq nqä qa ri Qʼij chpan kitinamit. Jontir ri nqamöl qiʼ nqakʼoxaj jun qachʼalal ri nukʼüt chqawäch chë rukʼaslemal xyaʼ Jesús pa kamïk kan kowan ruqʼij. Chqä nqabʼixaj kaʼiʼ bʼix, nqaqʼaxaj ri kaxlanwäy chqä ri vino chqawäch y kan pa qan ntel wä pä nqaʼij «amén» taq kajiʼ qachʼalal yechʼö rkʼë Dios. Xa pa jun qʼij, jontir ri congregaciones nkinataj rukamik Jesús. ¿Achkë komä nkinaʼ Jehová chqä Jesús taq nkitzʼët chë qamolon qiʼ chwäch jontir le Ruwachʼlew rchë nqtyoxin chkë?

4. ¿Achkë xtqatzʼët chpan re tjonïk reʼ?

⁴ Chpan re tjonïk reʼ xtqatzjoj kij re kʼutunïk reʼ: ¿achkë ütz nqaʼän komä loman xtbʼeqä ri qʼij taq xtqanataj rukamik Jesús?, ¿achkë rubʼanik yeqatoʼ ri nkʼaj chik rchë kan kʼo xtkitamaj qa ri qʼij riʼ? y ¿achkë rubʼanik yeqatoʼ qachʼalal ri ye kanajnäq qa? Ri nqaquʼ rij riʼ xtqrtoʼ rchë xtqatamaj achkë xtqaʼän taq xtbʼeqä ri qʼij riʼ.

¿ACHKË ÜTZ NQAʼÄN KOMÄ LOMAN XTBʼEQÄ RI QʼIJ TAQ XTQANATAJ RUKAMIK JESÚS?

5. a) ¿Achkë rma nkʼatzin nqaquʼ rij rukʼaslemal xyaʼ Jesús pa kamïk? (Salmo 49:7, 8). b) Tatzjoj achkë xatamaj qa chpan ri video ¿Achkë rma xkäm Jesús?

⁵ Jun ri ütz nqaʼän komä loman xtbʼeqä ri qʼij taq xtqanataj rukamik Jesús, ya riʼ nqaquʼ rij rukʼaslemal xyaʼ ryä pa kamïk. Qayonïl röj ma ta xqkowin xqkolotäj qa pa ruqʼaʼ ri mak chqä ri kamïk (taskʼij ruwäch Salmo 49:7, 8; tatzʼetaʼ chqä ri video ¿Achkë rma xkäm Jesús?).a Rma riʼ Jehová xyaʼ qʼij chë Rukʼajol xkäm xa qmä röj; ri xkiʼän ryeʼ kan jun nüm sacrificio (Rom. 6:23). Taq más nqchʼobʼon chrij ri xkiʼän Jehová chqä Jesús pa qawiʼ, más xtqaloqʼoqʼej ri xkiʼän ryeʼ. Komä xtqatzʼët achkë xkiʼän Jehová chqä Jesús xa xuʼ rchë röj xqkolotäj qa. Ye kʼa naʼäy xtqatzʼët achkë rma Jesús xkʼatzin xyaʼ rukʼaslemal pa kamïk.

6. ¿Achkë rma Jesús xkʼatzin xyaʼ rukʼaslemal pa kamïk?

⁶ Le Biblia nuʼij chë Jesús xkʼatzin xyaʼ rukʼaslemal pa kamïk rchë xqrköl pa ruqʼaʼ ri mak chqä ri kamïk. ¿Achkë rma ryä xkʼatzin xuʼän riʼ? Tqaquʼ rij ya reʼ: Adán, ri naʼäy achï, majun ta wä mak chrij taq xbʼan rma Dios. Ye kʼa taq xmakun chwäch Dios, ryä xok ajmak y rma riʼ ryä chqä ralkʼwal ma xyaʼöx ta chik kikʼaslemal ri ma nkʼis ta. Rchë xtöj rumak Adán, Jesús, ri majun ta wä mak chrij, xyaʼ rukʼaslemal pa kamïk. Chkipan ri junaʼ ri xjeʼ Jesús chwäch le Ruwachʼlew, «ryä majun ta mak xuʼän chqä majun ta jun tzʼukün tzij xel pa ruchiʼ» (1 Ped. 2:22). Jesús majun ta wä mak chrij taq xkamsäx, rma riʼ rukʼaslemal ri xyaʼ pa kamïk kan junan rkʼë ri kʼaslemal ri xtzʼlaʼ Adán (1 Cor. 15:45; 1 Tim. 2:6).

7. Tatzjoj jojun kʼayewal ri xeruqʼaxaj Jesús.

⁷ Taq Jesús xjeʼ chwäch le Ruwachʼlew, ryä xnmaj rutzij Jehová tapeʼ xeruqʼaxaj kʼayewal. Taq kʼa koʼöl na, ryä chqä xnmaj kitzij ruteʼ rutataʼ, ri xa kʼo qa mak chkij, tapeʼ ryä majun ta wä mak chrij (Luc. 2:51). Y taq xok kʼajol, rkʼë jbʼaʼ ye kʼo chik jojun kʼojolaʼ xkitäj kiqʼij chrij rchë ma nunmaj ta kitzij ruteʼ rutataʼ o rchë nuyaʼ qa Jehová. Y, taq ya enter achï chik, xkʼatzin xpabʼaʼ riʼ chwäch Satanás, ri xtäj ruqʼij chrij rchë nuqʼäj rutzij Jehová chqä rchë nuyaʼ qa (Mat. 4:1-11). Satanás xtäj ruqʼij rchë Jesús nuqʼäj rutzij Jehová, rchë ke riʼ ma xtkowin ta xkeruköl ri winäq.

8. ¿Achkë nkʼaj chik kʼayewal xeruköchʼ Jesús?

⁸ Jesús chqä xeruqʼaxaj kʼayewal taq xtzjoj ruchʼaʼäl Dios. Jun tzʼetbʼäl, ri winäq ri itzel xkinaʼ che rä xkajoʼ xkikamsaj (Luc. 4:28, 29; 13:31). Xkʼatzin xköchʼ ri xkiʼän rutzeqelbʼëy, ri xa kʼo qa mak chkij (Mar. 9:33, 34). Taq xqʼat tzij pa ruwiʼ, xchʼay chqä xetzeʼen chrij. Chrij riʼ, xkibʼajij chwäch jun cheʼ chqä xkiʼän che rä chë xtäj poqän (Heb. 12:1-3). Y taq ya nkäm, ryä ruyonïl xkʼatzin xköchʼ ri kʼayewal riʼ rma ma xchajïx ta chik rma Jehová (Mat. 27:46).b

9. ¿Achkë nqanaʼ taq nqaquʼ rij ri xuʼän Jesús pa qawiʼ? (1 Pedro 1:8).

⁹ Rkʼë ya reʼ nqatzʼët chë Jesús kowan xtäj poqän rchë xqrköl pa ruqʼaʼ ri mak chqä ri kamïk. Taq nqaquʼ rij jontir ri xuʼän ryä xa qmä röj, ya riʼ nbʼanö chqë chë más nqajoʼ ryä (taskʼij ruwäch 1 Pedro 1:8).

10. ¿Achkë sacrificio xuʼän Jehová rchë xqrköl?

¹⁰ ¿Achkë sacrificio xuʼän Jehová rchë Jesús xkowin xqrköl pa ruqʼaʼ ri mak chqä ri kamïk? Achiʼel qataman, Jehová kan junan rubʼanon ruwäch rkʼë Jesús (Prov. 8:30). Rma riʼ tqaquʼ achkë xnaʼ ryä taq xtzʼët chë Jesús najin wä nutäj poqän chwäch le Ruwachʼlew. Kantzij na wä chë ryä kan poqän xnaʼ ran taq xtzʼët chë ri winäq itzel kinaʼoj xkiʼän rkʼë Rukʼajol, xkitzelaj chqä xkiʼän che rä chë xtäj poqän.

11. ¿Achkë tzʼetbʼäl nukʼüt chqawäch achkë xnaʼ Jehová taq xkamsäx Rukʼajol?

¹¹ Ri teʼej tataʼaj ri kamnäq jun kalkʼwal kitaman achkë nanaʼ taq nbʼanatäj riʼ. Tapeʼ röj qataman chë kʼo jun qʼij xkekʼastäj na pä ri kamnaqiʼ, ya riʼ ma nuʼän ta chë röj ma ta nqatäj poqän taq nkäm jun qachʼalal. Re tzʼetbʼäl reʼ nukʼüt chqawäch achkë xnaʼ Jehová chpan ri junaʼ 33 taq xtzʼët chë Rukʼajol xtäj poqän chqä xkamsäx (Mat. 3:17).c

12. ¿Achkë ütz nqaʼän komä loman xtbʼeqä ri qʼij taq xtqanataj rukamik Jesús?

¹² Loman xtbʼeqä ri qʼij taq xtqanataj rukamik Jesús, jun ri ütz naʼän ya riʼ najäm awäch rchë naquʼ rij ri xkiʼän Jehová chqä Jesús pa qawiʼ. Ütz naʼän riʼ taq xtatjoj awiʼ chrij le Biblia pan ayonïl o rkʼë afamilia. Rchë naʼän riʼ, rït ütz naksaj ri Guía de estudio para los testigos de Jehová o nkʼaj chik qapublicaciones rchë xtatamaj más chrij reʼ.d Chqä, taskʼij ri textos ri yeskʼïx chpan ri semana ri nnatäx rukamik Jesús ri kʼo chpan ri Wuj rchë ri qamoloj Qakʼaslemal chqä Qasamaj röj ri Cristianos. Y ma tamestaj ta natzʼët ri video ri nuʼij pä rutinamit Jehová chë nkʼatzin nqatzʼët ri qʼij taq nqanataj rukamik Jesús. We röj xtqaʼän jontir ri xqatzjoj qa, xtqkowin chqä xkeqatoʼ ri nkʼaj chik (Esd. 7:10).

KEQATOʼ RI NKʼAJ CHIK RCHË KʼO XTKITAMAJ QA TAQ XTQANATAJ RUKAMIK JESÚS

13. ¿Achkë ütz nqaʼän naʼäy rchë xtqkowin xkeqatoʼ ri nkʼaj chik?

¹³ ¿Achkë rubʼanik yeqatoʼ ri nkʼaj chik rchë kʼo xtkitamaj qa taq xtqanataj rukamik Jesús? Naʼäy, röj nkʼatzin yeqaʼän invitar. Röj nqajäch invitaciones chkë ri winäq taq nq·el chiʼ taq jay, ye kʼa ütz chqä nqatzʼibʼaj kibʼiʼ jojun winäq ri nqajoʼ yeqaʼän invitar, achiʼel ri qafamiliares, ri qachiʼil pa samaj o pan escuela, o nkʼaj chik winäq ri qataman kiwäch. We nkʼis qaʼinvitaciones, ütz nqatäq äl ri enlace rchë ri invitación ri kʼo pa qasitio. Rkʼë jbʼaʼ kan xttel qakʼuʼx taq xtqatzʼët jaruʼ xkeʼapon (Ecl. 11:6).

14. ¿Achkë tzʼetbʼäl nkʼutü chqawäch achkë rkʼë jbʼaʼ xtbʼanatäj taq nqaʼän invitar jun winäq?

¹⁴ Majun bʼëy tqaquʼ ta chë majun nkʼatzin wä yeqajäch invitaciones. Kʼo jun qʼij, ri rachjil jun qachʼalal ixöq xuʼij che rä chë xtbʼä rkʼë rchë xtkinataj rukamik Jesús. Ri qachʼalal riʼ kan ma xnmaj ta ri xuʼij rachjil che rä. ¿Achkë rma? Rma ryä kan kʼïy chik mul rubʼin che rä chë tbʼä rkʼë, ye kʼa ryä ma nrajoʼ ta. ¿Achkë rma komä xrajoʼ xbʼä? Rma jun ukʼwäy bʼey xbʼanö invitar. Ryä ma xa xuʼ ta ri junaʼ riʼ xbʼä rkʼë rixjayil rchë xkinataj rukamik Jesús, xa kan xbʼä chqä ri nkʼaj chik junaʼ.

15. ¿Achkë nkʼatzin nnatäj chqë taq nqaʼän invitar jun winäq?

¹⁵ Tnatäj chqë chë taq röj nqaʼän invitar jun winäq rchë napon qkʼë rchë nqanataj rukamik Jesús, rkʼë jbʼaʼ ryä kʼo jojun ri xtrajoʼ xttamaj, y más we majun bʼëy bʼenäq ta pa qaSalón. Rma riʼ ütz nqaquʼ achkë xtrajoʼ xttamaj ryä y achkë rubʼanik xtqaqʼalajsaj chwäch (Col. 4:6). Jojun tzʼetbʼäl, rkʼë jbʼaʼ ri winäq riʼ xtrajoʼ xttamaj achkë xtbʼan akuchï xtqamöl wä qiʼ, jaruʼ xtyalöj ri moloj, achkë tzyäq ütz nuksaj al, nkʼatzin nutöj rchë ntok apü o nmol päq pa Salón. Rma riʼ ütz nqakʼutuj che rä ri winäq ri xqaʼän invitar we kʼo jun nrajoʼ nutamaj y nqaqʼalajsaj apü chwäch. Chqä ütz nqaksaj ri videos Tqanataj rukamik Jesús chqä ¿Achkë yebʼan pa qamoloj? Jun chik ri ütz nqaʼän, ya riʼ nqatzjoj che rä ri winäq riʼ ri naʼoj ye kʼo chpan ri tjonïk 28 rchë ri libro Nawajoʼ rït yakʼaseʼ.

16. ¿Achkë nkʼaj chik xtrajoʼ xttamaj jun winäq ri napon qkʼë rchë nqanataj rukamik Jesús?

¹⁶ Taq xtkʼis ri moloj ri nbʼan rchë nqanataj rukamik Jesús, rkʼë jbʼaʼ ri winäq kʼo xtrajoʼ xttamaj. Rkʼë jbʼaʼ xtkʼutuj achkë rma xa ye jojun (o kan majun ta) xetjö ri kaxlanwäy chqä ri vino. Rkʼë jbʼaʼ xtkʼutuj chqä jaruʼ mul nqanataj rukamik Jesús pa jun junaʼ. Y rkʼë jbʼaʼ xtrajoʼ xttamaj we ya riʼ chqä nqaʼän ronojel mul taq nqamöl qiʼ pa qaSalón. Tapeʼ chpan ri tzijonem ri xtyaʼöx ri aqʼaʼ riʼ xttzjöx jojun chkë ri naʼoj riʼ, rkʼë jbʼaʼ ri winäq riʼ xtkʼatzin xkeqʼalajsäx más ri naʼoj riʼ chwäch. Rchë nqaqʼalajsaj jojun chkë ri nrajoʼ nutamaj, ütz nqaksaj re peraj reʼ ri kʼo chpan jw.org: «¿Achkë rma ri testigos de Jehová ma junan ta rubʼanik nkinataj rukamik Jesús kikʼë ri nkʼaj chik religiones?». Röj nqajoʼ nqaʼän jontir ri kʼo pa qaqʼaʼ rchë yeqatoʼ ri winäq ri ütz kan rchë kʼo xtkitamaj qa taq xtqanataj rukamik Jesús. Nqajoʼ nqaʼän riʼ taq majanä tqaʼän ri moloj riʼ, taq najin chik nqaʼän o taq ya xkʼis (Hech. 13:48).

KEQATOʼ QACHʼALAL RI YE KANAJNÄQ QA

17. ¿Achkë ütz nkiʼän ri ukʼwäy taq bʼey rchë yekitoʼ qachʼalal ri ye kanajnäq qa? (Ezequiel 34:12, 16).

¹⁷ ¿Achkë ütz nkiʼän ri ukʼwäy taq bʼey rchë yekitoʼ qachʼalal ri ye kanajnäq qa taq nbʼeqä ri qʼij rchë nqanataj rukamik Jesús? Ütz nkikʼüt chkiwäch chë yeqajoʼ chqä chë nkajoʼ yekitoʼ (taskʼij ruwäch Ezequiel 34:12, 16). Ukʼwäy taq bʼey, titjaʼ iqʼij rchë yixtzjon kikʼë xa bʼa jaruʼ qachʼalal ri ye kanajnäq qa. Tiʼij chkë chë niwajoʼ niʼän jontir ri nkʼatzin rchë yeʼitoʼ. Keʼibʼanaʼ invitar rchë yeʼapon qkʼë rchë nqanataj rukamik Jesús, y we ryeʼ xkeʼapon, kan ütz kikʼulik tibʼanaʼ. Ma keʼimestaj ri qachʼalal riʼ tapeʼ ya xqʼax yän ri qʼij ri xqanataj rukamik Jesús, y tiyaʼ jontir ri toʼïk ri nkʼatzin chkë rchë yetzolin pä rkʼë Jehová (1 Ped. 2:25).

18. ¿Achkë rubʼanik nqkowin yeqatoʼ qachʼalal ri ye kanajnäq qa? (Romanos 12:10).

¹⁸ Jontir röj ri yoj kʼo chpan ri congregación, nqkowin yeqatoʼ ri ye kanajnäq qa taq yeʼapon qkʼë rchë nqanataj rukamik Jesús. ¿Achkë rubʼanik nqaʼän riʼ? Taq ütz qanaʼoj nqaʼän kikʼë, ma nqaqasaj ta kiqʼij chqä nqakʼüt chkiwäch chë yeqajoʼ (taskʼij ruwäch Romanos 12:10). Tnatäj chqë chë ryeʼ ye achiʼel ta rukarneʼl Jehová y rkʼë jbʼaʼ kʼayewal rubʼanon chkiwäch nkimöl chik jmul kiʼ qkʼë. Rkʼë jbʼaʼ ryeʼ kowan nkiquʼ achkë kinaʼoj xtkiʼän qachʼalal kikʼë.e Rma riʼ ma tqakʼutuj ta chkë ri xa nkiʼän chkë chë xa yekʼïx y ma tqaʼij ta xa bʼa achkë jun chkë ri xa nuʼän chë ma ütz ta xtkinaʼ (1 Tes. 5:11). Ryeʼ ye qachʼalal y röj kan kiʼ qakʼuʼx nqayaʼ ruqʼij Jehová kikʼë (Sal. 119:176; Hech. 20:35).

19. ¿Achkë utzil nqïl taq nqanataj rukamik Jesús?

¹⁹ Rkʼë jontir ri xqatzʼët qa, nqʼalajin chqawäch achkë rma Jesús xuʼij chë nkʼatzin nqanataj rukamik ronojel junaʼ. Taq nqaʼän riʼ, nqïl qa utzil röj chqä ri nkʼaj chik winäq (Is. 48:17, 18). Nqaʼij riʼ rma nqrtoʼ rchë nqajoʼ más Jehová chqä Jesús, rchë nqakʼüt chkiwäch ryeʼ chë nqtyoxin chkë rma ri xkiʼän pa qawiʼ, rchë más junan nuʼän qawäch kikʼë qachʼalal chqä rchë nqakʼüt chkiwäch nkʼaj chik winäq achkë nkʼatzin nkiʼän rchë nkïl ri utzil ri nukʼäm pä rukamik Jesús. Rma riʼ tqabʼanaʼ jontir ri nkʼatzin loman xtbʼeqä ri qʼij taq xtqanataj rukamik Jesús, ri qʼij ri kʼo más ruqʼij chpan ri junaʼ.