Unsa May Imong Isulti sa Panahong Mobalik Ka?
1 Ang pagkaepektibo sa ministeryo nagakinahanglan sa pagpangandam aron sa panahong kita mobalik niadtong sa sinugdan nagpakitag interes, kita makaarang sa paghaling sa ilang interes ug makapadayon sa atong panaghisgot. Sa unsang paagi man nga atong mahimo kini?
2 Sanglit kay ang matuod nga mga Kristohanon tim-os mang interesado sa uban, mahimong puntingon mog una ang butang nga nakat-onan mo bahin sa tagbalay sa miaging duaw.
Ngadto sa tawo nga nabalaka bahin sa krimen, ikaw makaingon:
◼ “Sa kataposang panahong naghisgot ta ikaw miingon nga nabalaka ka sa pag-uswag sa krimen. Sa hunahuna mo ang pagsuhol bag dugang mga polis magpasulbad sa problema?”
Kon ang usa ka tawo nabalaka tungod sa karong mga hitabo sa kalibotan, ikaw makaingon:
◼ “Sa kataposang panahon nga kita naghisgotay ikaw mihimog makapainteres nga punto bahin sa kakulang sa kalinaw sa kalibotan. Sa hunahuna mo ang mga lider ba sa kalibotan makapatunghag usa ka bag-ong kalibotang kahikayan?”
Ngadto sa tawo nga nabalaka sa pagkahakog sa uban, ikaw makaingon:
◼ “Sa kataposang panahong kita nagkahisgot ikaw mihimog ekselenteng punto maylabot sa pagkahakog nga atong makita sa katawhan sa kasagaran. Unsa sa hunahuna mo ang panglantaw sa Diyos sa dalo nga mga tawo? [Patubaga.] Mao kini ang giingon sa Bibliya sa Efeso 5:5.”
3 Ubang mga ekspresyon nga epektibong nagamit nagalakip sa:
◼ “Nalipay ko kaayo sa atong kataposang panaghisgot, mao nga nagdukiduki ko niining mubong punto aron ipakita kanimo kon sa unsang paagi si Jehova nagaila sa kahimtang sa mga walay puy-anan. Matikdi ang Isaias 65:21-23.”
◼ “Nalipay ko sa imong komento nga ang katawhan nagakinahanglag mas maayong gobyerno.”
◼ “Misukna kag makapainteres nga pangutana kon ang tanang relihiyon ba nakakab-ot sa pag-uyon sa Diyos.”
Ang mga pasiuna sama niini nagapakita nga kita nagpabili sa atong unang panaghisgot ug nga kita interesado sa pagpakigsulti sa tagbalay pag-usab.
4 Sa dili ka pa mohimog balikduaw, hunahunaa kon unsa ang imong isulti. Ipasibo ang imong presentasyon ngadto sa matag tawo.
5 Kon ang tawo nga atong ginaduaw maoy puliki, sa gihapon kita mahimong epektibo pinaagig pag-ingon:
◼ “Sayod ko nga ikaw may pipila lang ka minutos, apan aniay butang nga imong mahunahuna samtang ginahuman mo ang imong trabaho. [Basahang Mateo 5:3.]”
O ikaw makaingon:
◼ “Gisulat ko kining tulo ka teksto alang kanimo. Sanglit kay dili man maayong panahon sa paghisgotay, akong ibilin kini, ug sa mobalik ako, buot ko nga makagahin ug lima ka minutos aron hisgotan kini uban kanimo.”
6 Negatibong mga Paagi nga Likayan: Ang mga pangutana nga magpatunghag negatibong sanong o kaha makapakaulaw sa tagbalay sagad dili magpatunghag maayong mga resulta. Kini nagaapil sa: “Nabasa mo ba ang materyal nga akong gibilin kanimo?” “Aduna ka bay bisan unsang pangutana?” “Nahinumdoman mo ba ako?” “Miduaw ko sa pagsukna kon ikaw ba interesado gihapon sa pagpakighisgot bahin sa mga katuyoan sa Diyos sa yuta.”
7 Kita maikag sa pagduaw sa mga tawo nga sa miagi nagpakitag interes kon kita mangandam nga abante sa panahon aron hatagan silag tabang nga tinuod nga makahuloganon.