“Pagtudlo . . . sa mga Butang nga Akong Gisugo Kaninyo”
1 Ang paghimog mga tinun-an nagalangkit ug pagtudlo. Una pa ang usa ka tawo mahimong usa ka tinun-an ni Kristo, siya kinahanglang matudloan “sa pagtuman sa tanang mga butang” nga gisugo ni Jesus. (Mat. 28:19, 20) Ang labing maayo sa pagpalampos niini maoy pinaagig usa ka pagtuon sa Bibliya.
2 Dili kanunayng sayon ang pagsugod ug mga pagtuon sa Bibliya, apan ayawg kaluya. Ang kalamposan sa pagsugod ug mga pagtuon sa Bibliya nagakinahanglag determinasyon ug sinserong tinguha sa pagpaambit sa kamatuoran ngadto sa uban.—Gal. 6:9.
3 Pag-ugmad sa Interes: Sa imong unang duaw, depende sa mga kahimtang, ang usa ka tract, usa ka brosyur, o mga magasin mahimong mabilin sa tagbalay. Ikaw mahimong makagamit sa usa niini sa pagsugod ug pagtuon sa Bibliya. Kon ang tagbalay dugang pang magapakitag interes sa mensahe, mahimong matultolan siya sa laing tukmang basahon sa ulahing duaw.
4 Ang pagpangandam mao ang yawi sa kalamposan. Nganong dili magpili nga abante sa panahon ug usa ka teksto sa Kasulatan nga gikutlo diha sa tract, brosyur, o magasin nga imong giplanong gamiton sa imong pagbalikduaw? Nianang paagiha mahimo mo ang pagsumpay sa mga komento gikan sa basahon uban sa imong paghisgot. Mahimo pa gani nimong basahon ang usa o duha ka parapo nga diretso gikan sa basahon.
5 Makaingon ka niini:
◼ “Kami nagapaambit ug pipila ka impormasyon bahin sa talagsaong tagna nga nagakatuman na karon mismo.” Basahang Mateo 24:3, unya ilambigit ang hulagway ug ang mga komento sa panid 24 sa brosyur nga “Tan-awa!” Ang susamang paagi mahimong magamit sa dihang nagapresentar sa tract nga Molungtad ba Kining Kalibotana?
6 Sa dihang ang tiunay nga interes igapakita, kinahanglang paloapon dayon kana. Sulaying makabalik sulod sa usa ka semana aron nga ang kataposang panaghisgot lab-as pa sa hunahuna sa tagbalay. Sa matag higayon nga ikaw moduaw, tagda ang pipila ka parapo diha sa basahon nga imong gibilin. Unya, sa usa ka tukmang panahon, imong ikapaila ang librong Mabuhing Walay Kataposan, nga nagapadayon sa samang paagi.
7 Karong adlawa aduna pay daghang buluhaton nga pagabuhaton diha sa dakong pag-ani nga gitagna ni Jesus. (Mat. 9:37, 38) Samtang magapadayon ta sa pagtudlo sa mga mabuot ug kasingkasing, mabatonan nato ang makapalig-ong pasalig ni Jesus nga siya ‘magauban kanato sa tanang adlaw hangtod sa kataposan sa sistema sa mga butang.’