Ipakitang Ikaw Nagatagad Pinaagig Paghimog mga Balikduaw
1 Ang pagkaplag sa interesadong mga tawo diha sa mga ganghaan nagapasundayag sa imong tinguha sa paghatag sa uban sa kahigayonang makapatalinghog sa mensahe sa Gingharian. Busa seguroang makabalik sa imong mga napahimutang nga basahon sa Enero, sanglit kini maoy usa ka maayong paagi sa pagpakita nga ikaw nagatagad sa uban.
2 Kon nabilin nimo ang librong “Pagpangita sa Diyos,” sulaying ipadayon ang inyong panaghisgot niining paagiha:
◼ “Sa miagi atong nahisgotan kon sa unsang paagi ang daghang tawo nagapanunod lamang sa ilang relihiyon gikan sa ilang mga ginikanan. Apan nahibulong ka ba kon nganong daghan kaayong relihiyon nga nagaangkong Kristohanon? [Tugoting mokomento.] Ang librong akong gikabilin kanimo nagahatag ug kompletong pagpatin-aw sa kapitulo 11, sugod sa panid 261. Mahimo bang kuhaon nimo ang imong libro ug mahimong tan-awon nato ang pipila ka parapo?” Hisgoti ang unang tulo ka parapo ug hikayang makabalik aron ipadayon ang pagtuon.
3 Ania ang lain pang sugyot nga imong masulayan:
◼ “Sa miagi atong nahisgotan ang pipila sa nagapailang mga timaan sa matuod nga relihiyon. Usa sa labing hinungdanon gihisgotan dinhi sa Juan 13:34, 35. [Basaha.] Gihunahuna ba nimong ang tanang relihiyon nagapakita niining matanga sa gugma sa usag usa? Ang libro nga akong nabilin kanimo nagahisgot mismo niining ulohana sa kapitulo 15, dinhi sa panid 344. Buot nakong ipakita kanimo ang pipila ka puntos nga akong napahimuslan nianang kapituloha.” Hisgoting pipila ka parapo ug unya hikayang umaabot nga panaghisgot.
4 Mahimong paloapon nimo ang napahimutang nga librong “Matuod nga Kalinaw ug Kasegurohan—Sa Unsang Paagi Imong Makaplagan?” uban sa usa ka mubong presentasyon nga sama niini:
◼ “Ang mga pangulo sa kalibotan karon wala makapahinabog kalinaw ug kasegurohan. Si Jehova nga Diyos mao lamang ang usa nga makahimo niana. Ang Bibliya nagapakita kanato kon unsa ang kinahanglan natong buhaton. [Hisgoting mga puntos sa mga parapo 1 ug 2 sa panid 175, ug dayon basaha ang Isaias 26:4.] Buot nakong ipakita kanimo kon sa unsang paagi kining libroha makatabang kanimo.”
5 Ang usa ka pagtuon mahimong sugdan sa bisan haing kapitulo sa librong Pagpangita sa Diyos, apan kasagaran buot natong tultolan sila sa mga kapitulo 15 ug 16. Unya, human sa pipila ka pagtuon, hayan buot na natong ibalhin ngadto sa librong Mabuhing Walay Kataposan.
6 Si Jehova nagpahilunag usa ka hingpit nga panig-ingnan ingong usa ka mahigugmaong Magbalantay nga nagatagad sa iyang mga karnero. (Ezeq. 34:11-14) Ang atong sinserong panikaysikay sa pagsundog sa iyang mahigugmaong pagtagad magapahimuot kaniya, magapakita sa atong gugma, ug magadalag mga panalangin sa uban.