Moambit Ka ba sa Impormal nga Pagpamatuod Niining Bulana?
1 Ang atong regular nga rotina sa kinabuhi nagalakip sa tinong mga panahon sa pagpakigsulti sa katawhan bahin kang Jehova. Kita migahin ug panahon sa pormal nga pagpamatuod sa balay ug balay, paghimog mga balikduaw, ug pagdumalag mga pagtuon sa Bibliya. Adunay daghan nga uban pang dili kaayo pormal nga mga higayon, hinunoa, sa dihang kita makasulti sa katawhan bahin sa kamatuoran. Atong gitawag kining pagwaliha ingon nga impormal nga pagpamatuod.
2 Ang pipila ka magmamantala nakakaplag ug daghang kahigayonan sa pag-apil niining matanga sa ministeryo. Kitang tanan makapanlimbasog nga magmaalisto sa maong mga okasyon samtang kita nagabiyahe, moadto sa tunghaan o trabaho, ug moduaw sa mga kabanay. Pahimuslan mo ba kining mga kahigayonana niining bulana?
3 Himoa ang Abanteng mga Plano: Ang pagpangandam ug pasiunang pamalandong makapahimo natong makapamatuod sa impormal diha sa epektibong paagi. Paneguroang makadala ka ug mga basahon. Dugang pa sa Ang Bantayanang Torre ug Pagmata!, aduna kitay pipila ka ‘tract’ nga nagapakitag makapalihok-hunahunang mga ulohan nga makapukaw sa interes. Adunay mga brosyur nga makapadani sa katawhan sa lainlaing mga kagikan ug relihiyon. Aduna usab kitay mga debulsang libro nga nagakobre sa mga ulohan nga makapaikag karong panahona. Haing basahona ang gipalabi nimong gamiton? Hunahunaa kini ingon nga usa ka pamilya. Unya bansaya kon unsay imong isulti sa dihang motungha ang nahiangay nga okasyon.
4 Samtang Nagabiyahe: Usa ka ekselenteng panahon sa impormal nga pagpamatuod maoy samtang nagabiyahe paingon sa trabaho o tunghaan. Pagdalag Bibliya ug usa sa mga basahon nga gihisgotan sa itaas. Ang pagbasa sa maong mga basahon diha sa publikong sakyanan sagad makamugnag panaghisgot. Batoni ang gamayng suplay sa ‘tracts’ nga daling ikahatag sa mga interesadong tawo.
5 Sa Trabaho o Tunghaan: Makaplagan usab nato ang mga higayon sa impormal nga pagpamatuod sa trabahoan o tunghaan sa panahon sa tingpahulay. Ang pagbaton lamang ug usa ka libro o ‘tract’ sa imong lamesa sagad makaaghat sa pagtagad ug mobukas sa dalan sa panagsultihanay. Ilabina kining tinuod sa librong Creation tungod sa daghang mga ilustrasyon niini ug maayong pangatarongan. Maayo gayod nga magdala ta ug usa niana niining bulana. Kini mahimong motultol sa paghatag nimo ug maayong pagpamatuod.
6 Dili nato sayloan ang daghang mga kahigayonan nga anaa kanato nga makahatag ug impormal nga pagpamatuod sa matag adlaw. Kining paagiha sa pagsangyaw maoy mabungahon, ug ang mga alagad ni Jehova angayng makig-ambit niini. Sama kang Jesus, hinaot ang atong gugma sa isigkatawo mopalihok nato nga mosulti sa tanang nahiangay nga okasyon!—Mat. 5:14-16.