“Thiang Thlarau A Halmi” Kha Jehovah Nih A Pek Hna
“Hi tluk i nan ṭhalo ko na hin nan fale kha thil ṭha pek cu nan hngalh ahcun, vancung i a ummi nan Pa nih cun amah kha thiang thlarau a halmi cu zeitluk in dah a pek chinchin hna lai.”—LUKA 11:13.
1. Zeitik caan ah dah thiang thlarau bawmhnak a hlei in kan herh?
‘THIANG thlarau bawmhnak cu um hlah sehlaw hi thil hi ka tei kho hnga lo!’ Lungtak tein cuticun na chim bal maw? Khrihfa a tam deuh nih cun an chim bal. Zawtnak ṭhalo ka ngei ti na hngalh lio ah cuticun na chim men lai. Asiloah na innchung hawi nih an thihtak lio caan ah a si men lai. Asiloah naa lawmhnak a tlau i hnabeidong in na um lio caan ah a si kho men. Nunnak i a harmi caan hna na in khawh cu Jehovah thiang thlarau nih “a hleikhunmi ṭhawnnak” a ka pek caah a si tiah na ruah ko lai.—2 Korin 4:7-9; Salm 40:1, 2.
2. (a) A hmaanmi Khrihfa hna nih zei zuamcawhnak dah an ton? (b) Hi capar ah zei biahalnak hna dah kan i ruah lai?
2 A hmaanmi Khrihfa hna cu nihin Pathian zei i a rel lomi vawlei ah a karh chin lengmangmi hneknak le ralchannak hna kha an tong. (1 Johan 5:19) Cuhleiah, Khrih zultu hna cu, “Pathian nawlbia a ngai i Jesuh nih a phuanmi biatak, zumhawktlak tein aa tlaihmi” hna kha fakpi in a ralchanhtu Satan Khuachia i dohnak an tong. (Biathlam 12:12, 17) Cucaah, Pathian thiang thlarau bawmhnak kha zei lionak hmanh in atu ah kan herh deuh cu khuaruahhar awk a si lo. Pathian thiang thlarau tampi kan hmuh kha a fian nakhnga zeidah tuah khawh a si? Hneksaknak kan ton tik caan hna ah Jehovah nih thazang pek a kan duh ti kha zeiruang-ah kan zumh khawh? Hi biahalnak hna i a lehnak kha Jesuh i bianabia pahnih ah kan hmuh lai.
Lungdong Loin Thlacam
3, 4. Zei bianabia dah Jesuh nih a rak chim i thlacamnak he zeitindah aa pehtlaih?
3 Voikhat cu Jesuh zultu pakhat nih “Bawipa, . . . thlacan kan cawnpiak” tiah a rak nawl. (Luka 11:1) Cu tikah Jesuh nih a zultu pawl kha pehtlaihnak a ngeimi bianabia pahnih a rak chimh hna. A pakhatnak cu khualtlung a dawmi inntekpa kong a si i a pahnihnak cu a fa bia a ngaimi pa kong a si. Mah bianabia pakhat cio a kong kha i ruah hna u sih.
4 Jesuh nih hitin a chim: “A biana ah nannih lak i pakhatkhat cu zanṭim ah a hawipa inn ah a va kal i, ‘Ka kawi, changreu hlum thum in ka cawi ta ko. Ka kawipa pakhat khual a tlawng i ka inn ah atute ah khan a ra chuak i pek awk zeihmanh ka ngei lo,’ tiah a va ti. Cun a hawipa nih cun a inn chung cun, ‘Hna ka hnawh hlah. Innka ka hrenh cang i ka fale he kan it cang, nangmah thil pek awkah ka tho kho ti lo,’ ti sehlaw, a si kun ah cun zeitindah a tuah lai? Amah cu na hawi a si ruangah a tho in na herhmi changreu kha an pe lai lo nain ningzak [“lungdong,” NW] loin na hal peng hrat caah khan na herhmi paohpaoh cu an pek ko lai.” Hi cu thlacamnak he zeitindah aa pehtlaih kha hitin a rak fianter: “Cucaah hihi kan chimh hna: Hal u law pek nan si lai; kawl u law nan hmuh lai; king u law innka cu hunpiak nan si lai. Zeicahtiah a halmi paoh cu pek an si lai i a kawlmi paoh nih cun an hmuh lai, a kingmi paoh cu innkhar kha hunpiak an si lai.”—Luka 11:5-10.
5. A lung a dong lomi pa bianabia nih thlacam tikah ngeih awk a simi lungput he aa tlai in zeidah a kan cawnpiak?
5 Hi a lung a dong lomipa bianabia nih thla kan cam tikah ngeih awk a simi lungput kha a langhter. A herhmi a hmuh cu ‘lungdong loin a hal peng’ caah a si tiah Jesuh nih a timi kha i cinken. (Luka 11:8) Vawlei Thar lehnak Baibal ah ‘lungdong loin’ timi biafang cu voi khat lawng aa tel. “Ningzak loin” ti sullam a ngeimi Grik biafang in lehmi a si. Ningzah lo ti cu ziaza ṭhalo in langhter a si tawn. Asinain, ningzak loin asiloah lungdong loin ti cu a ṭhatnak lei in hman a si tikah thangṭhat awk tlakmi sining pakhat a si kho. Bianabia i mipa cu cu bantuk minung a si. A herhmi kha lungdong loin a halnak ah a ning a zak hrimhrim lo. Mah pa kha kan ca zohchunhawk in Jesuh nih a langhter caah kannih zong thla kan cam tikah kan lung a dongh awk a si lo. Jehovah nih ‘hal peng, kawl peng, king peng’ hna seh i a kan duh. Cuti tuah ahcun Pathian nih “thiang thlarau a halmi” kha a pek hna lai.
6. Jesuh chan lio ah khualtlung dawt kha zeitindah an rak hmuh?
6 Jesuh nih lungdong loin thlacam awk a si ti lawng si loin zeiruangah thlacam awk a si ti zong kha a langhter. Mah i cawn awk kha fiangte in hngalhthiam awkah a lung a dong lomi inntekpa kong a ngaimi hna nih khual dawtnak he aa tlaimi phung zeitindah an hmuh kha kan ruah awk a si. Baibal chan ah a hlei in Pathian salle nih khual zohkhenhnak phung a biapi tukmi in an hmuh kha Cathiang chung i ṭialmi a kong tampi nih a langhter. (Genesis 18:2-5; Hebru 13:2) Khualtlung zohkhenh lo cu ningzak ngai a si. (Luka 7:36-38, 44-46) Mah khakha kan lung chungah i chingchiah in Jesuh bianabia kha ruat ṭhan hna u sih.
7. Jesuh chimmi bianabia i inntekpa nih a hawipa kha ningzak loin zeicah a va ṭhangh?
7 Bianabia i inntekpa sinah zanṭim khuamui ah khual a ra chuak. Khual zohkhenh ding a si kha a hngalh ko nain ‘pek awk zeihmanh a ngei lo.’ Khual zohkhenh kha biapi in a hmuh caah zei a si hmanh ah changreu tlawmpal a herh. Cucaah ningzak loin a hawipa kha a va ṭhangh i “ka kawi, changreu hlum thum in ka cawi ta ko” tiah a va ti. A herhmi kha a hmuh hlan lo lungdong loin a hal. Kha changreu a hmuh lawngah khual a dawmi inntek pa a si a lang lai?.
Tam Deuh Herh ah—Tam Deuh In Hal
8. Thiang thlarau hmuh awkah lungdong loin thlacam peng awkah zei nih dah a kan forh lai?
8 Hi bianabia nih lungdong loin thlacam a sinak a ruang he aa tlai in zeidah a langhter? Mah pa nih changreu a hal pengnak cu kha changreu a ngeih lawngah inntek pakhat in a tuah awk rian a lim lai caah a si. (Isaiah 58:5-7) Changreu a um lo ahcun a tuah awk rian kha a tlolh lai. Cu bantukin a hmaanmi Khrihfa in kan phungchim rianṭuannak kha kan lim khawh nakhnga Pathian thiang thlarau a herh tuk ti kha kan hngalh caah cu thlarau cu hmuh awkah Pathian sinah thla kan cam peng. (Zekhariah 4:6) Thiang thlarau a um lo ahcun kan rian kan lim kho lai lo. (Matthai 26:41) Mah bianabia in a biapimi biakhiahnak tuah khawh a si kha na hngal maw? Pathian thlarau a herh tuk hringhran ti kan hngalh a si ahcun mah kha hmuh awkah lungdong loin kan hal peng awk a si.
9, 10. (a) Pathian thlarau hmuh awkah ngol loin thlacam zeiruangah a herh ti kha tahchunhnak in fianter. (b) Zei biahalnak dah kanmah le kanmah kan i hal awk a si, zeiruangah?
9 Mah kong he aa tlai in tuchan tahchunhnak pakhat hi ruat hmanh. Zanṭim cingling ah na innchungkhar mi pakhat a zaw hei ti u sih. Bawmhnak hmuh dingah sibawi na va ṭhang lai maw? Cumpit le lufah sawhsawh men a si ahcun na ṭhang lai lo. Asinain, lung zawtnak puan a si ahcun sibawi va auh kha na ning a zak lai lo. Zeiruangah? Nunnak thihnak he aa tlaimi a si caah a si. Thiamnak a ngeimi i bawmhnak a herh tuk ti kha na hngalh. Bawmhnak na hal lo ahcun a thi kho. Cu bantukin, a hmaanmi Khrihfa hna nih nunnak le thihnak he aa tlaimi thil an ton. Satan cu kanmah kha seh awkah a hukmi “chiandeuh” bangin a vak cuahmah ko. (1 Piter 5:8) Thlarau lei i hliphlau awkah Pathian thlarau bawmhnak a herh hringhran. Pathian bawmhnak a um lo ahcun thihnak ton khawh a si. Cucaah, Pathian thiang thlarau kha lungdong loin kan hal lai. (Efesa 3:14-16) Cu lawngah “a dongh tiangin a fekmi” si awkah a herhmi thazang kan ngei lai.—Matthai 10:22; 24:13.
10 Cucaah ‘zeitluk in dah lungdong loin thla ka cam’ tiah mahle mah i hal ding a si. Pathian bawmhnak a herh kha tling cikcek in na hngalh a si ahcun thiang thlarau hmuh awkah lungdong loin hal chinchin ding a si.
Zei nih dah Zumhnak In Thlacam Awkah A Kan Forh?
11. Jesuh nih pa le fa bianabia kha thlacamnak he zeitindah a pehtlaihter?
11 Jesuh chimmi a lung a dong lomi pa bianabia nih thla a cammi zumtu pakhat i a lungput kha a langhter. A hun changtu bianabia nih thlacamnak a ngaimi Jehovah Pathian i lungput kha a langhter. Jesuh nih hitin biahalnak a tuah: “Nannih pa hna lakah, nan fale nih nga an in hal hna ah rul a pemi nan um hnga maw? Arti an in hal hna ah tah tlang-ngaikuang nan pe hna hnga maw?” Aa pehtlaihnak kha hitin a chim nolh: “Hi tluk i nan ṭhalo ko na hin nan fale kha thil ṭha pek cu nan hngalh ahcun, vancung i a ummi nan Pa nih cun amah kha thiang thlarau a halmi cu zeitluk in dah a pek chinchin hna lai.”—Luka 11:11-13.
12. Fa nih halmi a pemi pa bianabia nih thlacamnak leh awkah biatak tein Jehovah nih duhnak a ngeih kha zeitindah a langhter?
12 Jehovah nih thlacamnak in amah a fuhmi kha zeitindah a hmuh hna ti kha pafa bianabia in Jesuh nih a rak langhter. (Luka 10:22) Hmasa bik ah bianabia pahnih an i dannak kha i chingchiah. A hmasa bianabia i bawmhnak pek a duh lomi pa bantuk si loin Jehovah cu a fa nih halmi kha tlinter a duhmi zawnruahnak a ngeimi pa bantuk a si. (Salm 50:15) Minung pa le vancung pa kong ruahnak in Jehovah i duhnak taktak a ngeihmi lungput kha a rak langhter nolh. Minung pa cu sualnak ro a co ruangah a “ṭhalo ko” nain a fa kha thil ṭha a pek ahcun a let tampi in a siang deuhmi vancung kan Pa nih amah a biami hna kha thiang thlarau zeitluk in dah a kan pek chinchin lai tiah a rak ti.—Jeim 1:17.
13. Jehovah sin thla kan cam tikah zeidah fekte in kan zumh khawh?
13 Zeidah kan i cawn awk a si? Vancung kan Pa sinah thiang thlarau kan hal tikah pek duhnak a kan ngeih zia kha fekte in kan zumh khawh? (1 Johan 5:14) Jehovah sinah lungdong loin thla kan cam tikah “Hna ka hnawh hlah. Innka ka hrenh cang,” tiah zeitikhmanh ah a kan ti lai lo. (Luka 11:7) Mah can ah, Jesuh nih hitin a ti: “Hal u law pek nan si lai; kawl u law nan hmuh lai; king u law innka cu hunpiak nan si lai.” (Luka 11:9, 10) A si ko, Jehovah nih “kan auh tikah . . . a kan leh lai.”—Salm 20:9; 145:18.
14. (a) Hneksaknak a tongmi cheukhat kha zei a palhmi ruahnak nih dah hnahnawh a pek hna? (b) Hneksaknak kan ton tikah zeiruangah zumhnak in Jehovah sinah thla kan cam khawh?
14 Jesuh chimmi zawnruahnak a ngeimi pa bianabia nih Jehovah ṭhatnak cu zei bantuk minung pale nak hmanh in a ngan deuh kha a langhter. Cucaah, Pathian nih a kan dawt lo caah hneksaknak kan ton tiah kan ruah awk a si lo. Kan ral ngan bik Satan nih cuticun ruat hna seh ti a duh. (Job 4:1, 7, 8; Johan 8:44) Cuti mahle mah sual i phawt cu Cathiang he aa tlak lo. Jehovah nih “ṭhatlonak” in mi a tukforh lo. (Jeim 1:13) Rul asiloah tlang-ngaikuang bantuk ṭihnungmi tukforhnak kha umnak nawl a pe lai lo. Vancung kan Pa nih ‘thil ṭha a halmi kha a pek hna.’ (Matthai 7:11; Luka 11:13) A hmaan ko, Jehovah ṭhatnak le bawmh a kan duhnak kan hngalh deuhdeuh tikah zumhnak in a sin thlacam awkah forh deuhdeuh kan si ve. Cuti a si ahcun, salm ca ṭialtupa bantukin “Pathian nih cun a ka theih piak i ka thlacamnak cu a ka ngeih piak” tiah kan ti khawh ve lai.—Salm 10:17; 66:19.
Thiang Thlarau A Kan Bawmtu A Sinak
15. (a) Thiang thlarau he aa tlai in Jesuh nih zei bia dah a rak i kam? (b) Thiang thlarau nih a kan bawmhnak lam pakhat cu zeidah a si?
15 Jesuh nih a thih laite ah bianabia in aamah a khanmi kong kha a chim ṭhan. Lamkaltu pawl kha thiang thlarau he aa tlai in hitin a rak ti hna: “Ka Pa kha ka hal lai i bawmtu a dang, biatak thlarau cu an pek hna lai i nan sinah a zungzal in a um lai.” (Johan 14:16) Cucaah bawmtu asiloah thiang thlarau cu kanmah chan i tel in hmalei ah a zultu a si hnga dingmi hna sinah a um lai tiah Jesuh nih bia a rak i kam. Nihin ah zei a biapimi lam pakhat in dah mah bawmhnak cu kan hmuh? Thiang thlarau nih hneksaknak a phunphun kha in khawhnak a kan ngeihternak thawngin a si. Zeiti lam in dah? Hneksaknak a tongmi lamkaltu Paul nih Korin Khrihfa hna sin i ṭialmi a cakuat ah Pathian thlarau nih zeitindah a bawmh kha a rak langhter. Mah kong kha a tawinak in i ruah hna u sih.
16. Paul he zeitindah kan umtuning aa khah khawh?
16 Hmasa bik ah, hneksaknak phunkhat a simi “fahnak” a inmi kha Paul nih zumtu hawi hna sinah phehthuhlo tein a rak chim. Cun hitin a chim, “voi thum thliahmah Bawipa [Jehovah] sinah thla ka cam i ka lakpiak ko tiah ka nawl.” (2 Korin 12:7, 8) Paul nih ka fahnak hi ka lakpiak tiah Pathian a nawl ko nain a dam hlei lo. Nihin ah cu bantuk thil umtuning cu na ton ve men lai. Paul bantukin hneksaknak hi ka lakpiak tiah Jehovah sinah zumhnak he lungdong loin thla na cam men ko lai. Asinain, atu le atu thla na cam ko nain harnak na tong ṭhiamṭhiam rih. Cucu na thlacamnak Jehovah nih a ngai lo, Pathian thlarau nih an bawm lo tinak a si maw? Si hrimhrim hlah! (Salm 10:1, 17) Lamkaltu Paul nih zeidah a chim chap ti kha i chingchiah.
17. Jehovah nih Paul thlacamnak kha zeitindah a rak leh?
17 Paul a thlacamnak kha hitin Pathian nih a leh: “Ka vel hi na caah a za ko, zeicahtiah ka ṭhawnnak cu derthawmnak ah hin a lang.” Paul nih hitin a rak ti: “Cucaah cun Khrih ṭhawnnak nih [“thlam bantukin,” NW] a ka huhphenh ti kha ka hngalh nakhnga, ka derthawmnak ah hin lunglawmte in kaa porhlaw cang.” (2 Korin 12:9; Salm 147:5) Cucaah Khrih thawngin Pathian ṭhawnnak i huhphenhnak cu a cungah thlam bantuk a si tiah Paul nih a rak ruah. Nihin ah kan thlacamnak kha cu bantukin Jehovah nih a kan leh. A salle cungah dornak hmun bantukin aa samh i a huhphenh hna.
18. Zeiruangah hneksaknak kha kan in khawh?
18 A hmaan ko, thlam nih thli le ruah kha a daihter kho lo nain mah nih khan zeimaw zat tiang thli le ruah in a huhphenh. Cu bantukin “Khrih ṭhawnnak” thawngin hmuhmi dornak hmun nih kan cungah a tlungmi hneksaknak le harnak hna kha a dihter lo. Asinain, hi vawlei i ṭihnungmi thil hna le vawlei uktu Satan i dohnak hna in thlarau lei himnak a kan pek. (Biathlam 7:9, 15, 16) Cucaah, ‘na sinin aa ṭhen kho lomi’ hneksaknak hna na ton hmanh ah tei awk fakpi in naa zuam kha Jehovah nih a hngalh i ‘na auhnak’ an leh lai kha na zumh khawh. (Isaiah 30:19; 2 Korin 1:3, 4) Paul nih hitin a rak ṭial: “Pathian nih a biakamnak cu a zulh ko lai i nan in khawh leng tiangin tukforhnak cu nan cungah a tlunter lai lo. Tukforhnak nan in tikah in khawhnak an pek hna lai i chuah khawhnak lam zong an serpiak hna lai.”—1 Korin 10:13; Filipi 4:6, 7.
19. Zei tuah awk dah biakhiahnak na tuah, zeiruangah?
19 Pathian zei ah a rellomi hi vawlei i “ni hmanung bik” caan cu “tawnghtham awk a harmi caan” in langhter a si. (2 Timote 3:1, NW) Asinain, Pathian salle caah cun tawngh-tham khawh lomi caan a si lo. Zeicah a si lo? Pathian thiang thlarau nih bawmhnak le huhphenhnak a pek hna caah a si. Zumhnak he lungdong loin thla a cammi hna kha Jehovah nih lunglawm tein tampi a pek hna. Cucaah, thiang thlarau hmuh awkah nifate thlacam peng dingin biakhiahnak tuah hna u sih.—Salm 34:6; 1 Johan 5:14, 15.
Zeitindah Na Leh Lai?
• Pathian thiang thlarau hmuh awkah zeidah kan tuah a herh?
• Thla kan cam i thiang thlarau kan hal tikah Jehovah nih a kan pek lai tiah zeiruangah kan zumh khawh?
• Hneksaknak kan tonmi kha in khawh awkah thiang thlarau nih zeitindah a kan bawmh?