A PHAW CAPAR | VANCUNGMI—AN UM TAKTAK MAW? MAH KONG HNGALH CU ZEICAH A BIAPIT?

Vancungmi Kong Biatak

Vancungmi kong biatak kha hngalh na duh maw? Vancungmi cu ahote dah an si, khoika in dah an rat i zeidah an tuah? Pathian Bia, Baibal ah a phi kawl cu a ṭha bikmi a si. (2 Timote 3:16) Baibal nih zeidah a kan cawnpiak?

Pathian cu thlarau pum a si bantukin vancungmi zong ‘ruh le sa a ngei lomi,’ mit in hmuh khawh lomi thlarau pum an si ve. Zumhawktlakmi vancungmi hna cu van ah an um i Pathian sinah dairek in an naih khawh.—Luka 24:39; Matthai 18:10; Johan 4:24.
Vancungmi cu vawleicung i Pathian pekmi rian ṭuan awkah a caan ah minung pum kha an i lak. An rian a dih tikah minung pum kha an kaltak i van ah an kai ṭhan tawn.—Biaceihtu 6:11-23; 13:15-20.
Baibal ah vancungmi cu pa bantukin langhter an si tawn nain an lakah nu le pa timi thleidannak a um lo. Annih cu ṭhitumnak an ngei lo i fa zong an ngei lo. Mah lengah vancungmi cu vawleicung mi bantukin bawhte, ngakchia le a cuza cangmi tiin an um lo. Jehovah nih a sermi an si caah Baibal nih “Pathian fapa hna” tiah a auh hna.—Job 1:6; Salm 148:2, 5.
Baibal nih ‘minung holh le vanmi holh’ tiah a ti caah thlarau minung hna nih holh an ngei ti cu a fiang. Pathian nih minung he pehtlaihnak ah vancungmi a hman ko hna nain anmah biak le an sin i thlacam kha cu a awnh lo.—1 Korin 13:1; Biathlam 22:8, 9.
Vancungmi cu a rel in rel cawk lo an si i billion tampi an si kho men.—Daniel 7:10; Biathlam 5:11.
Vancungmi cu minung nakin “a ṭhawng i a liannganmi” le fimnak a ngei deuhmi an si. Minung nih kan ruah khawhmi nakin khulrang deuhpi in an kal-um kho.—Salm 103:20; Daniel 9:20-23.
Vancungmi cu a ṭhawngmi le fimnak a ngeimi an si ko nain ri an ngei ve i an hngalh lomi thil cheukhat zong a um ve.—Matthai 24:36; 1 Peter 1:12.
Vancungmi cu anmah pumpak sining, Pathian ngeihmi sining le zalong tein thimnak nawl a ngeimi in ser an si. Cucaah minung bantukin a hmaanmi asiloah a hmaan lomi thil kha tuah awkah an i thim kho. Ngaihchiat awk ngai a simi cu vancungmi cheukhat nih Pathian kha ralchanh awkah an i thim.—Judas 6.

Pathian Vancungmi Hna Cu Zeitindah Dirh An Si?

Vancungmi bawi bik Mikhael cu vancungmi hna lakah a ṭhawng bikmi le nawl a ngei bikmi a si. Baibal nih Mikhael cu Jesuh Khrih i a min dang a si ti kha fiang tein a langhter.—1 Thesalon 4:16; Judas 9.

Seraph timi thilnung hna cu vancungmi lakah a hleikhunmi tinvo sung le upatnak a hmumi an si. Annih cu Pathian bawiṭhutdan pawngah rian a ṭuanmi an si.—Isaiah 6:1-3.

Cherubim pawl zong an reng a sang ve i a Ṭhawng Bikmi le a lianngan bikmi he aa tlaimi a hleikhunmi rian kha an ṭuan. Annih cu Pathian sinah a ummi in langhter an si tawn.—Genesis 3:24; Ezekiel 9:3; 11:22.

A dang vancungmi rel cawk lo cu a Sang Bikmi Pathian aiawh in a duhnak a tuahmi kha an si.a—Hebru 1:7, 14.

a Vancungmi kong tam deuh in hngalh awkah Jehovah Tehte Hna chuahmi Baibal Cawnpiakmi Taktak Cu Zeidah A Si? timi cauk, ṭhen 10nak le mah he aa tlaimi thleihhlei “Vancungmi Bawi Bik Mikhael Cu Ahodah A Si?” timi capar ah zoh. Cun www.pr418.com/cnh zongah zoh khawh a si.