Kovasio Ne Distrik 1999 Ne La Itre Temoë i Iehova, “Itre Ewekë Hna Thingehnaeane Hnei Akötresie”
1 Ame ngöne lo kola tro hnei angetre Isaraela ngöne la hnapapa, hnei Iehova hna upi Mose troa kuca la lue trutru sileva. Maine caasi hi la trutru hna uf, haawe, troa tro hnene la itre joxu, tane la itre tribu, me icasikeu qëmekene la uma ne heta. Nge maine kola ce ufe asë la lue trutru, haawe, troa traqa itronyi asë angetre Isaraela. (Num. 10:1-4) Tuneka së enehila, hane fe kö së madrine ngöne la easë a drenge la itre hna amekötin, ceitune memine la itre mejene trutru, kola hë së troa icasikeu ngöne la itre ijine kovasio ne distrik ne la macatre? Easë a kapa ngöne la itre ijine kovasio la itre ini hna hamëne hnei Iehova me itre mekune qa ngöne la Tusi Hmitrötre nyine troa eatrongë së, nge easë fe a madrine troa ce memine la itre trejine hna acile hnei Iehova troa hane wai së ngöne la ijine cili. Itre ewekë lai ka xatua së troa cile catre pala hi ngöne la huliwa i Akötresie. Hapeu, hetre madrine së kö ngöne la easë a öhne la itre thauzan—maine jë treene thauzan—lao atr ka traqa troa ce hmi me easë ngöne la ihnimi me tingeting? Eje hi laka, thatreine kö tro sa thaa madrine ngöne la ijine cili!—Sal. 122:1, 7, 8.
2 Ame ngöne lo treu ogas koi semitrepa 1998, kola e asë la köni kovasio ne distrik “Gojenyine Mele Qa Thei Akötresie” hna kuca e Port-Vila me Numea. Hetrenyi mina fe la itre xane hna kuca e cailo fene hnengödrai, hetrenyi itre eje hna hnëkëne thatraqane la itre trejine ne la itre nöje asë. Hna sine la itre kovasio ka tru cili hnene la itre trejine trahmanyi me föe ne Montreal (Kanada), Brisbane me Sydney (Osetralia); hnei angatre hna kapa la 100 lao délégués qaa celë e Kaledonia me Tas, me itre xane ju kö ka traqa qa ngöne la itre xaa nöj. Kola mama hnyawa laka, ngacama nyimutre la itre pengöne qene hlapa, ngo thaa jole kö e troa ifekeune la ihnimi nyipici ngöne lai itre ijine kovasio. Nyimutre la itre mesinare me itre trejine ka nyihlue ngöne la itre xaa nöj, matre troa hane sine la itre kovasio. Atraqatre la madrinene la itre trejine troa iöhnyi hmaca me angatr, nge ketre ixatua ka tru lai kowe la itre trejine asë.
3 Ame la ketre ewekë hne së hna madrine e celë e Kaledonia, ke, ene lo kola nue troa löthe la Uma ne Asabele ne Normandie, memine lo Bethela së. Drei kö la madrine së ngöne lo easë a drei Lloyd Barry, trejine me easë, nyidrëti a kuca lo cainöje hna hnëkëne thatraqane la ijine cili, nge tune mina fe lo drai ne asabele ka ketre pengön, lo nyidrëti a kuca la lue xaa cainöje ju kö! Ketre, thatreine kö tro së a qaja la madrine ka eje thene lo itre trejine ka kapa ngöne la itre hnalapa i angatre lo itre délégués ka traqa qa ngöne la itre xaa nöj. Maine tro së a thele troa hane ce sine memine la itre trejine me easë la kovasio ne distrik 1999, eje hi laka, tro hë së a hane amamane fe la ihnimi së kowe la itre xan, me olene koi Iehova la aqane acaasi së hnei Nyidrë.
4 Ame koi macatre 1999, troa hnen la Kovasio ne Distrik i angetre Tas, e Luganville Santo, e drai 20-22 ogas 1999. Ngacama hna amekötine hë troa hnen la kovasio ngöne la Uma ne Baselaia ne Luganville, nge hna sa draine fe hë, ngo atreine hi troa saze me ithuemacanyine hmaca la hnen me ijin. Tro pë hë a kapa hnene la itre ekalesia ne Tas, la itre xaa ithuemacany. Ame koi angetre Kaledonia, troa hnen la lue kovasio ne distrik, ngöne la Iuma ne Asabele ne Normandie, nge troa kuca lue eje e 3-5 me 10-12 semitrepa 1999. Tro pë hë a isa ithuemacanyi kowe la itre ekalesia göi kovasio hnei angatre hna troa hane sin.
5 Loi e tro së a isa nyiqaane hnëkë enehila, matre troa hane sine asë lai köni drai ne kovasio ne distrik 1999, hna hape, “Itre ewekë hna thingehnaeane hnei Akötresie.” Easë a lapa treqene la itre ijine kovasio, ijine troa drenge ngöne la götrane la ua la “aqan’ewekë ne madine me atrun” ne la itretre hmi koi Akötresie, laka, ala nyimu nge kola caas. (Sal. 42:4) Epi tro Iehova a amanathithine la nöjei ewekë asë hna amekötin, matre troa hetre thangane ka lolo pala hi kowe la mele së ngöne la götrane la ua!
[Hna eköhagen götran 3]
Hawa
Drai ka tru me Mecixen
9 h 30 – 17 h
Sabath
9 h 30 – 16 h