Tera Aron Nenen Onimakinan Te Atua Iroum?
“Ma kam na ukoukora moa uean te Atua.”—MATAIO 6:33.
1, 2. Tera te bwai are e karaoia te rorobuaka n ataei ni kaineti ma ana mwakuri ao bukin tera?
E TANGIRIA te rorobuaka n ataei temanna ni karaoa riki ae manena n ana ekaretia. Ma te kangaanga bwa e rotaki buaka rokona n te botaki ni katoa tai, n ana mwakuri ni kareke-tianti. E a kanga ni kaangaraoa arona aei? E kabebetea aroni maiuna, e buutiaina man ana mwakuri, ao e waekoa n reke ana mwakuri teuana are e a aki rota buaka aron ana waaki ni Kristian. E a uarereke riki ana kareke-mwane nakon are mai mwaina, ma e bon teimatoa naba n tabeakina kainnanoia kaain ana utu, ao e a nakoraoi riki arona ni boutokaa te ekaretia.
2 Ko ataia bwa bukin tera ngke e bita arona te rorobuaka n ataei anne? N am iango ko kona ni karaoa naba aekakin anne ngkana titeboo aroarom ma ngaia? E kakukurei bwa a mwaiti Kristian aika a a tia ni karaoa anne, ao a kaotia n aia mwakuri bwa a onimakina ana berita Iesu ae kangai: “Ma kam na ukoukora moa uean te Atua ma ana raoiroi; ao a na bane n raonaki baikai nako imi.” (Mataio 6:33) A onimakina riki Iehova ibukin mweeraoia, nakon are a na onimakina te mwakuri ni kareke-tianti.—Taeka N Rabakau 3:23, 26.
3. Bukin tera bwa a kona n iango tabeman bwa e manena moanibwaian te Tautaeka n Uea ni boong aikai ke e aki?
3 Ni kaineti ma taai aika kangaanga aika ti a maeka i nanona ngkai, a kona n iangoia tabeman bwa e raoiroi ana motinnano te mwaane arei, ke e aki. Ni boong aikai, a rangi ni maiu ni kainnano aomata tabeman, e ngae ngke iai aomata aika a rangi ni kaubwai. Angiina n aaba aika aki-kaubwai, a rangi n ingainga ni karekei taai ake e na kona ni kabebeteaki iai aroni maiuiia. Ma a mwaiti aomata aika maeka n aaba aika kaubwai ake a korakai ni kateimatoaa aroni maiuiia ni kaitaraa aki taun te mwane, bibitakin te mwakuri, ao tangiran riki te tai ae bati mairouia taani kammwakuri. A kona n iango ni kangai tabeman, ni kaineti ma kakorakain kateimatoan te maiu: ‘E boni manena moanibwaian te Tautaeka n Uea?’ Ni kaekaana, iangoia taan ongora ake e taetae nakoia Iesu.
‘Tai Iango n Raraoma’
4, 5. E kanga Iesu ni kaota ae a na aki rangi n tabeaianga ana aomata te Atua ni bwaikorakin te maiu?
4 E mena i Kariraia Iesu ngke e taetae nakoia aomata aika bati ake a roko man taabo aika mwaiti. (Mataio 4:25) A karako aika kaubwai mai buakoia aomata akekei. Tao a maiu ni kainnano angiina i buakoia. Ma e kaumakiia Iesu bwa a na aki karimoai bwaikorakin te maiu, ma a na kaikoi baika a kakawaki riki, are te kaubwai n taamnei. (Mataio 6:19-21, 24) E taku: “Tai iangoi maiumi n raraomaeakini kanami, ma nimami; ao tai iangoi naba rabatami n raraomaeakini karabami. Tiaki e bongana riki te maiu nakon te amarake, ao te rabata nakoni karabana?”—Mataio 6:25.
5 A bati ake a ongora ae tao a taku i nanoia bwa a aki manena ana taeka Iesu. A ataia bwa ngkana a aki mwakuri korakora, ao a na rotaki buaka kaain aia utu. Ma e kauringia Iesu taekaia mannikiba. A kakaaei kanaia mannikiba ni katoa bong ao katanaia, ma e teimatoa Iehova n tabeakinia. E kauringia naba Iesu taekan Iehova n tabeakin ueen aroka aika kantara aika a riki i bon irouia, aika tamaroa riki nakon tamaroan aroaron Toromon ma kakannatona. Ngkana e tabeakinia mannikiba ma uee Iehova, e na mwaiti ra riki ngkanne tabeakinara irouna? (Mataio 6:26-30) N aron are e taekinna Iesu, a rangi ni kakawaki riki maiura ma rabwatara, nakon te amwarake are ti kabooa ibukin kateimatoan maiura ao te kunnikai are ti karekea ibukin karabara. Ngkana ti kabanea korakorara tii ibukin kanara ma karabara, n akea ara tai ae reke ibukin Iehova, ti a kabuaa iai ngkanne te bwai ae rangi ni kakawaki ni maiura.—Te Minita 12:13.
Te Iango ae Riai
6. (a) Tera tabeia Kristian? (b) Antai ae a onimakinna raoi Kristian?
6 Ni koauana, e aki kaungaia taan ongora Iesu bwa a na katoka aia mwakuri ao n tataningaa te Atua bwa e na katauraoi baike a kainnanoi kaain aia utu. Mannikiba naba, a kakaaei kanaia ibukiia ma natiia. Mangaia are a riai naba Kristian ni mwakuri korakora ngkana a kan amwarake. A riai n tobwai nako tabeia n aia utu. A riai Kristian aika tooro n taningamarau ni mwakuri ibukia aia toka. (2 I-Tetaronike 3:10-12; 1 Timoteo 5:8; 1 Betero 2:18) E mwamwakuri te abotoro Bauro bwa te tia karaoi uumwa-n-rianna ibukin karekean oin maiuna. (Mwakuri 18:1-4; 1 I-Tetaronike 2:9) Ma a aki iangoa te mwakuri ni kareke-tianti Kristian akanne ibukin mweeraoia. A onimakina Iehova. Anne bukina ae a karekea iai te raunnano ae a aki ataia tabeman. E taku te tia areru: “Akana onimakina Iehova ai aron te maunga are Tion, are aki kona ni mwemwe, are tei matoa n aki toki.”—Taian Areru 125:1.
7. Tao tera ana iango te aomata are e aki nene onimakinan Iehova irouna?
7 E kona ni kaokoro ana iango te aomata are e aki nene onimakinan Iehova irouna. Angiia aomata a iangoa te kaubwai bwa boni kiingin reken te mweeraoi. Mangaia are a a tia kaaro ni kaungaia natiia bwa a na kabanea riki angiin aia tai n te reirei ae rietata, bwa a kaantaningaia bwa anne are e na kataubobongaia nakon mwakuri ake a bubura booia iai. E kananokawaki bwa a a tia tabeua utu ni Kristian n namakina mwin kabatiaan te tai n reirei aika rietata, bwa e a tia ni bua tangiran bwaai n taamnei irouia natiia ao a a uaiakin riki bwaikorakin te maiu.
8. Tera te iango ae riai ae a kateimatoaa Kristian?
8 Mangaia are a ataia Kristian aika wanawana bwa e rangi ni kaineti ana reirei Iesu nakon taai aikai, n arona naba ni kaineti nakon taai ake ngkoa n te moan tienture, ao a kataia ni kateimatoaa iangoan ae riai. E ngae naba ngkana a kabanea aia tai ae bati n aia mwakuri ni kareke-tianti bwa a aonga ni kona n tobwai nako mwiokoaia are e taekinaki n te Baibara, ma a na aki kariaia te karekemwane bwa e na kamatakia nakon bwaai aika kakawaki riki aika irekereke ma aia onimaki.—Te Minita 7:12.
“Tai Iango n Raraoma”
9. E kanga Iesu ni karaui nanoia te koraki ake e nene onimakinan Iehova irouia?
9 E kaumakiia taan ongora Iesu n ana Kabwarabwara i aon te Maunga ni kangai: “Tai iango n raraoma, ni kangai, Tera karara? ao, Tera nimara? ao, Tera karabara? Ba a ukoukori baikai ni kabane Tientaire; ba E ataingkami Tamami are i karawa ba a kai nanomi ngkana akea baikai i roumi.” (Mataio 6:31, 32) Ai kaunganano ra taeka aikai! Ngkana ti onimakina raoi Iehova, e na boni boutokaira n taai nako. Ma ana taeka Iesu aikai, a kauka te iango. Ti kauringaki iai bwa ngkana ti “ukoukori” bwaikoraki, ao e na titeboo ara iango ma “tientaire,” ake tiaki Kristian ni koaua.
10. Ngke e kawara Iesu te rorobuaka n ataei ibukin taeka-n-reirei, e kanga Iesu ni kaotaraea te bwai are e tangiria riki te rorobuaka arei?
10 N te tai teuana, e titirakina Iesu temanna te rorobuaka n ataei ae rangi ni kaubwai, bwa tera ae e riai ni karaoia bwa e aonga n reke irouna te maiu are aki toki. E kauringnga Iesu taekan baike a kainnanoaki n te Tua, are e teimatoa ni manena n te tai arei. E karaua nanon Iesu te rorobuaka arei n taku: “I tou mwin taeka akanne ni kabane: tera ae I tuai ni koro raoi iai?” Tao e kona n iangoaki ana kaeka Iesu irouia aomata aika bati bwa e aki manena. E taku: “Ngkana ko kan riki ni moan te raoiroi, ao ko na nako ni kabo am bwai nako n angania akana aki kaubwai, ao e na reke am bwai i karawa iai: ao nako mai n irirai.” (Mataio 19:16-21) E taonnako te rorobuaka arei ma te nanokawaki bwa e aki kona n anga nako kaubwaina. E korakora riki tangiran kaubwaina nakon tangiran Iehova.
11, 12. (a) Baikara taeka aika kautinano ake e taekin Iesu ni kaineti ma te kaubwai? (b) E na kanga n tutuki te kaubwai nakon te beku iroun Iehova?
11 Te rongorongo anne are e a kaira Iesu bwa e na taekina ae aki-kaantaningaki aei: “Ane kaubwai ao e roko maaki n uean te Atua. . . . E kai rin nako riki te kamero ni bangabangan te neiran nakon ane kaubwai, ngkana e kan rin n uean te Atua.” (Mataio 19:23, 24) E nanonna Iesu bwa akea te aomata ae kaubwai ae e na karekea Uean te Atua? Tiaki ngaia anne bwa e a manga taku: “A konaki bwaai nako iroun te Atua.” (Mataio 19:25, 26) Man ana ibuobuoki Iehova, a a tia n riki tabeman aomata aika kaubwai n taai akekei bwa Kristian aika kabiraki. (1 Timoteo 6:17) Ma e taekin taeka akana kamimi akanne Iesu bwa iai bukina ae kakawaki. E bon anga ana kauring iai.
12 Ngkana e a rangi n taonaki nako ana iango te aomata ni kaubwaina n aron te rorobuaka are kaubwai arei, ao a nang kona ngkanne kaubwaia akanne n riki bwa bwaai n tutuki nakon kabanean nanona ni beku iroun Iehova. E kona ni koaua anne nakon te aomata ae e a kamani kaubwai ao te aomata are e “kani kaubai.” (1 Timoteo 6:9, 10, BK) Kabatiaan onimakinan te kaubwai e kona ni kaira te aomata bwa e na karako ‘kainnanoakin bwaai n taamnei irouna.’ (Mataio 5:3, NW) Uaan anne e kona n aki tabe ma ana boutoka Iehova. (Te Tua-Kaua 6:10-12) E kona ni kariaa bwa e na kakarineaki irouia kaain te ekaretia. (Iakobo 2:1-4) Ao e kona ni kabanea riki angiin ana tai ni kukurei ni kaubwaina nakon te beku iroun Iehova.
Karekean te Iango ae Eti
13. Tera kairuan aia iango kaain Raorikeia?
13 Te kurubu teuana ae kairua aia iango ni kaineti ma te kaubwai, boni kaain te ekaretia n te moan tienture are i Raorikeia. E taku Iesu nakoia: “Ko kangai, I kaubwai, ao a kabatiaki au bwai, ao I aki ititi n te bwai teuana; ao ko aki ataiko ba te aomata are e kai nanona ngkoe, ao ko kananoanga, ao ko aki kaubwai, ao ko mataki, ao akea karabam.” Bon tiaki kaubwaia kaain Raorikeia are e a kamamaraa aia onimaki. Ma bon nanoia n onimakina riki te kaubwai nakon Iehova. Ibukin anne a a riki n aabuee n te aro ni kaikonaki, ao a a kuri ni ‘mumutaki nako mai win’ Iesu.—Te Kaotioti 3:14-17.
14. Bukin tera bwa a bon tau ni kamoamoaki Kristian ake i Ebera, iroun Bauro?
14 Ma e kamoamoaia kaain Ebera Bauro ake Kristian ibukin aroaroia n te tai are e moan ueke iai bwainikirinaia. E taku: “Kam nanoangaiia ake a kabaeaki, ao kam kimareirei naba ni katau kurian ami bwai, ngkai kam ataingkami ba bon iai ami bwai aika raraoi riki aika aki mauna.” (Ebera 10:34) A aki rotaki buaka Kristian akanne ni buan aia bwai. A kateimatoaa kimwareireia ibukina bwa a kawakin riki aia bwai aika rangi ni kakawaki, aika bwaai “aika raraoi riki.” N aron te tia iokinibwai are n ana kaikonaki Iesu are e anganako ana bwai ni kabane ibukin momin-te-bwaeao ae kakawaki ae tii teuana, Kristian aikai a kananomwaakaia naba n aki kabuaa aia kaantaninga ibukin te Tautaeka n Uea, n aki ongea te bwai are riki nakoia. (Mataio 13:45, 46) Ai raoiroi ra te aroaro anne!
15. E kanga te ataeinnaine ae te Kristian i Liberia, ni moanibwaia Uean te Atua?
15 A mwaiti ni boong aikai aika a karikirakea te aroaro naba ae tamaroa n aron anne. N te katoto, i aon Liberia, iai temanna te ataeinnaine ae te Kristian are e anganaki ana tai n reirei n te reirei ae rietata. N te aba anne, e iangoaki te aeka ni kaniwanga anne bwa ngaia reken te mweeraoi ibukin taai aika a na roko. Ma bon te bwaiania neiei, ae kabwanina ana tai n uarongorongo, ao e a tia naba ni kaoaki bwa e na beku bwa te special pioneer i nanon tabeua te tai. Ma e motinnanoia neiei bwa e na moanibwaia Uean te Atua ao n teimatoa n tiku n ana mwakuri ni kabwanina ana tai n uarongorongo. E a mwananga nakon te tabo are e mwiokoaki bwa e na mwakuri iai, ao e kairi reirei n te Baibara ma aomata aika 21, i nanon tenua namwakaina. Te ataeinnaine aei n ikotaki ma ngaa ma ngaa riki n ai arona, a moanibwaia riki Uean te Atua, e ngae ngke nanon anne, e na aki reke kaubwaia n te maiu aei. A kanga ni kateimatoaa aroia anne n te aonnaba ae bati te kanibwaibwai iai aei? A a tia ni karikirakei aroaro aika tamaroa, ao ti na maroroakin tabeua mai iai.
16, 17. (a) Bukin tera bwa e kakawaki bwa ti na karinanoira ngkana ti na onimakina Iehova? (b) Bukin tera bwa ti riai ni karikirakea onimakinan ana berita te Atua?
16 Te Nanorinano. E taku te Baibara: “Ko na onimakina Iehova n nanom ni kabanea, ao tai mwiokoa oin am ataibwai. Ko na ataia n nakonakom ni kabane, ao E na kaeti kawaim. Tai bakanrabakau i matam.” (Taeka N Rabakau 3:5-7) N tabetai, e kona n iangoaki te waaki teuana irouia aomata bwa e manena. (Ieremia 17:9) Ma te Kristian ni koaua, e onimakina Iehova ibukin kairirana. (Taian Areru 48:14) E kakarinanoa n ukoukora ana reirei Iehova ‘n nakonakona ni kabane’ ni kaineti ma te ekaretia, te reirei ke te mwakuri ni kareke-tianti, te kakibotu, ke te bwai riki teuana.—Taian Areru 73:24.
17 Onimakini ana berita Iehova: E taku Bauro: “E riai ba ane nako n te Atua ao e na kakoaua ba bon iai, ao ba bon te tia kabo aia onimaki akana kakorakoraia n ukoukoria.” (Ebera 11:6) Ngkana ti a nanokokoraki ni kaineti ma Iehova ni kakoroi bukin ana berita, e a taraa ngkanne n ae ti a “tabe ma bain aon te aba aei.” (1 I-Korinto 7:31, BK) Ma ngkana e nene ara onimaki, ti na bae n nanomwaaka ngkanne ni moanibwaia Uean te Atua. E na kanga ni karikirakeaki te onimaki ae nene? Ngkana ti teimatoa ni kaanira ma Iehova, n tatataro mai nanora ao ni katoa tai ni karaoa ara ukeuke n reirei i bon iroura. (Taian Areru 1:1-3; I-Biribi 4:6, 7; Iakobo 4:8) Ti kona n tataro n aron te Uea are Tawita, ni kangai: “I onimakiniko, Iehova: I taku, Bon Atuau Ngkoe. Ai bati ra raoiroim!”—Taian Areru 31:14, 19.
18, 19. (a) E kanga te mwakuri korakora ni kakorakoraa onimakinan Iehova iroura? (b) Bukin tera bwa e riai te Kristian n tatauraoi n anga ngaia?
18 Te botumwaaka n ana mwakuri Iehova: E kairekerekea onimakinan ana berita Iehova Bauro ma te mwakuri korakora ngke e korea ae kangai: “Ti bati n tangiringkami ba kam na bane ni kaota te kakorakoraingkami anne nakon atakin raoi ami kaantaninga ni karokoa te toki.” (Ebera 6:11) Ngkana ti tatabetabe n ana mwakuri Iehova, ao e na boni boutokaira. Ni katoai taai ake ti namakina iai te boutoka anne, ai aron ae e a korakora riki iai onimakinana iroura, ao ti “na teimatoa n aki kaingingaki.” (1 I-Korinto 15:58, BK) E a manga kaboouaki iai ara onimaki ao ni kamatoaki ara kaantaninga.—I-Ebeto 3:16-19.
19 Te tatauraoi n anga ngkoe: E kaaki ana mwakuri ae moan te tamaroa Bauro bwa e aonga n rimwin Iesu. E teretere bwa e karaoa te motinnano ae eti, e ngae ngke e rawawata maiuna ni karakon ana bwai. (1 I-Korinto 4:11-13) E aki berita Iehova bwa e na karekea nakoira te maiu ni kaubwai, ao a na bae n rinanon kataaki n taai tabetai ana toro. Tatauraoira ni kabebetea aroni maiura ao n anga boni ngaira, e kakorakoraa nanomwaakara ni kani beku iroun Iehova.—1 Timoteo 6:6-8.
20. Bukin tera bwa e kakawaki te taotaonakinnano iroun te aomata are e moanibwaia Uean te Atua?
20 Te taotaonakinnano: E kaumakiia raona ni Kristian te tia rimwin Kristo are Iakobo ni kangai: “Ma ngaia ae taotaon nanomi, tari, n ua rokon te Uea.” (Iakobo 5:7, BK) N te aonnaba ae katabetabe aei, e a kangaanga bwainan te taotaonakinnano. Ti tangiria bwa a na waekoa ni karaoaki baike ti tangiri. Ma e kaumakira Bauro bwa ti na kakairi irouia te koraki ake “a kareke mwin taeka n akoi n te onimaki ma te taotaonaki n nano.” (Ebera 6:12) Tauraoi n tataningaa Iehova. E kamateraoa te tataninga, te maiu n aki toki n te aonnaba ae baretaiti!
21. (a) Tera ae ti kaotia ngkana ti moanibwaia Uean te Atua? (b) Tera ae e na maroroakinaki n te kaongora ae imwina?
21 Eng, e boni manena ana taeka n reirei Iesu ibukin moanibwaian Uean te Atua. Ngkana ti karaoa anne, ti kaotia iai bwa ti onimakina raoi Iehova, ao n rinea iai te anga ae tii ngaia ae karekea te mweeraoi nakon te Kristian. Ma e reireinira Iesu bwa ti na “ukoukora moa . . . ana raoiroi [te Atua].” N te kaongora ae imwina, ti na noria bwa bukin tera bwa e a rangi ni kainnanoaki riki te kaunganano anne n taai aikai.
Ko Kona ni Kabwarabwaraa?
• Tera te iango ae riai are e kaungaira Iesu bwa ti na bwainna ni kaineti ma mwaitin ara bwai?
• Tera reireiara man ana kabotau Iesu ibukin te kamero ao bwangabwangan te neiran?
• Baikara aroaro ni Kristian aika a buokira ni moanibwaia Uean te Atua?
[Taamnei n iteraniba 23]
E tangiri riki kaubwaina te rorobuaka n ataei are kaubwai nakon tangiran te Atua
[Taamnei n iteraniba 23]
Te tia bobwai are n ana kaikonaki Iesu e anganako ana bwai ni kabane ibukin momin-te-bwaeao ae bobuaka ae tii teuana
[Taamnei n iteraniba 23]
E na boutokaira Iehova ngkana ti tatabetabe n ana mwakuri