E Kaotaraeaki te Tia Tautaekana te Aonnaba ae Raba

E TAKU Iesu nakoia aomata n te tai teuana: “E na kabwakaaki te tia tautaeka i aoia kaain te aonnaba aei.” E a manga taekinna riki imwina bwa ‘akea mwaakan te tia tautaekania kaain te aonnaba i aona’ ao e na “motikaki taekan te tia tautaekania kaain te aonnaba aei.” (Ioane 12:31; 14:30; 16:11) Antai ae e nanonna Iesu?

Ngkana ti iangoa ae e taekinna Iesu ibukin “te tia tautaekania kaain te aonnaba aei” ao e teretere iai bwa e aki nanona Tamana ae Iehova ae te Atua. Antai ngkanne te “tia tautaekania kaain te aonnaba”? E na kanga ni “kabwakaaki” ao ni ‘motikaki taekana’?

E Kaotaraea i Bon Irouna “te Tia Tautaekania Kaain te Aonnaba Aei”

E aki toki ni kamoamoa ibukini mwaakana aia mataniwi taani kakeru ao ai aron naba te Riaboro ngke e kariria Iesu ae Natin te Atua. Imwini kaotan “tautaekan nako” te aonnaba nakon Iesu ao e taku Tatan: “N na anganiko te mwiokoaki i aoni baikai ni kabane ma tamaroaia, bwa I a tia n anganaki, ao N na angan ane I kan anganna. Mangaia ae ngkana ko bon taromauriai naba tii teuana te tai, ao ai bon am bwai naba baikai ni kabane.”—Ruka 4:5-7.

Ngkana bon tii te buakaka te Riaboro n aron ae a iangoia tabeman, e na kanga ngkanne ni kabwarabwaraaki te kaririaki? E kaririaki Iesu ni baika e tangiri ke kauntaban nanona ma ana iango ake a riki imwini bwabetitoana? Ngkana ngaia anne, e aera ngkai e taekinaki bwa “bon akea te bure i nanona”? (1 Ioane 3:5) E aki kakeweaki ae iai mwaakan te Riaboro i aoia aomata bwa e kamatoaa n taekina te Riaboro Iesu bwa bon te “tia tautaekania kaain te aonnaba,” ma ni kabwarabwaraa bwa te “tia kamamate” ao te “tia kewe.”—Ioane 14:30; 8:44.

Tao 60 te ririki imwini aitarani Kristo ma te Riaboro, ao e kauringia Kristian te abotoro Ioane ibukin ana kariri ae korakora te Riaboro bwa “a bane kaain te aonnaba ni mena i aani mwaakan teuare buakaka.” N aron anne, e taekinna naba Ioane bwa “e burebureiia kaain te aonnaba ni kabutaa” te Riaboro. (1 Ioane 5:19; Te Kaotioti 12:9) E teretere bwa e taekinaki n te Baibara ae bon “te tia tautaekania kaain te aonnaba” te anera ae aki nonoraki. Ma tera aron raababan ana kariri te Riaboro nakon te botannaomata?

E Anga te Mwaaka te Tia Tautaekana te Aonnaba Nakoia Tabonibaina

Ngke e korea taekan aia buaka Kristian ibukin aia onimaki te abotoro Bauro, e a katereterea iai aroaron teuare karoton aia kairiribai. E taku: “Ti aki kaunrabwata ma te iriko ao te raraa ma ti kaunrabwata ma taian tautaeka, mwaaka n tautaeka, taan tautaekana te aonnaba ae rotongitong aei, ao taanga n taamnei aika buakaka i karawa.” (I-Ebeto 6:12) Mangaia are e riaon aia kona aomata te buaka aio kioina ngkai tiaki te kaunrabwata ma “te iriko ao te raraa” ma te aitara ma “taamnei aika buakaka.”

Ni kaineti ma angiin rairai ni Baibara ni boong aikai, te taeka ae “te taanga n taamnei aika buakaka” e aki nanonaki te buakaka ae aki noraki ma e nanonaki iai taimonio aika mwaaka. E rairaki bwa “botaki n anera aika mwaitikurikuri aika buakaka i karawa,” n te (Revised Standard Version) ao n (The Jerusalem Bible) bwa te “taanga n anera aika buakaka i karawa” ao te “taanga n anera ae riao korakoraia aika buakaka i karawa” n (The New English Bible). Mangaia are e a tia ni kabongana mwaakana te Riaboro rinanoia anera aika karitei ake a a tia ni kitana “oini mwengaia” i karawa.—Iuta 6.

E kaotaki n te taetae ni burabeti n te boki ae Taniera aroia “taan tautaekania kaain te aonnaba” ni kakorakoraa aia kairiri n taua taekan te aonnaba ma rimoa. E tabeakinia raona n Iutaia te burabeti ae Taniera ake a okira Ierutarem n 537 B.C.E., imwini kainaomataakia man te taenikai i Baburon n te aro are e a tataro ibukia i nanon tenua te wiki. E kanakoa te anera temanna te Atua bwa e na karaua nanon te burabeti n tuangnga bukin iremwen rokona. E taku: “E tei te anera are mataniwin te aba are Botia n ekai nako uangauni ma te bongina.”—Taniera 10:2, 13, BG.

Antai “te anera are mataniwini Botia” aei? E kona n ae tabonibain te Riaboro ae “te anera are mataniwini Botia” ae kairiribai are te taimonio ae taua taekan te Embwaea ni Botia. N te rongorongo ae i mwina riki, e taekinna ana anera te Atua bwa e na manga buaka riki ni kaitaraa “te anera are mataniwini Botia” ao te taimonio temanna riki ae “te anera are mataniwini Kuriiti.”—Taniera 10:20, BG.

Tera ae ti kona n iangoia man aei? Ni koauana, bon iai “taan tautaekana te aonnaba” aika a aki nonoraki, ao mataniwia taimonio ake a uaia n tautaekana te aonnaba i aani mwaakan aia mataniwi ae Tatan te Riaboro. Ma tera tiaia ni karokoa ngkai?

E Kaota Arona te Tia Tautaekana te Aonnaba

E taekinna te abotoro Ioane ni kabaneani bokin te Baibara ae Te Kaotioti aron Iesu are Mikaere ae te akanera, ni kataea ana kai te Riaboro ma ana taimonio ao e taekini naba karawawata aika korakora ake a riki imwin tewenakoaia mai karawa. Ti wareka ae kangai: “E na reke kain aon te aba . . . bwa e a tia n ruo te Riaboro nakoimi, ao e korakora unna ngkai e ataia bwa e a kimototo ana tai.”—Te Kaotioti 12:9, 12.

E kanga te Riaboro ni kaota unna ae korakora? A a bati taani kakeru ake a kani karaoi oin nanoia. N aron anne, e a tia naba te Riaboro ma ana taimonio ni motinnanoia bwa a na kairiia kaain te aonnaba bwa a na kamaunaaki ma ngaiia. Ngkai e ataia te Riaboro bwa e a kimototo ana tai, e a tia ngkanne ni kamanena te anga teuana ae kakawaki iroun te botannaomata ae mena i aani mwaakana, n aron te bitineti ae bubura ibukini karikirakean te nano n aki kan tautaekanaki ni kaineti ma te waaki ni bitineti, are e kairiri nakoni kerikaakini kaubwain te aba ao uruakakin te otabwanin ni katobibia te aonnaba, ike a a ruanikai iai maiuia aomata.—Te Kaotioti 11:18; 18:11-17.

Ni moa man rongorongon rimoa, e korakora tangiran te mwaaka iroun te Riaboro ao e kaotiotaki naba ni waaki n tautaeka ao Aaro. E kaotaki n te boki ae Te Kaotioti bwa a tei taan tautaeka ibukin te man ae tiritiri are e a tia n anganaki “mwaakana n tautaeka ae korakora.” E kaotaki naba iai bwa e boni kamaama irouia Aaro bwa a na irekereke ma taan tautaeka ao e taekinaki iai bwa bon te aro ni kammaira te reitaki aei. (Te Kaotioti 13:2; 17:1, 2) Iangoa te karawawataaki, te tautoronaki, taiani buaka ao bobuaka i marenaia aomata aika kakaokoro i nanon tienture aika bati, ike a a kabuanibwai iai maiuia aomata aika mirion ma mirion. E kona temanna n taekinna raoi bwa baika riiriki aika kammaira ao ni kakamaaku ake a a tia ni kabarekaa rongorongoia aomata, boni baika a taneiai ni kakaraoi aomata? Ke a bon riki imwin aia kairoro anera aika buakaka aika a aki noraki?

E kaotaki raoi ao ni kaotaraeaki n te Baibara teuare e a tia ni karaoa ana kunemwaan nakoia taani kairiri ao tautaeka aika korakora. E ngae ngkana a namakinna botannaomata ke a aki ma a boni kaotiota aron aia tia tautaeka ao baike e kani karaoi. Ma e na maanra karawawataaia botannaomata i aan ana tautaeka te Riaboro?

Kabaneani Kamaunaakin te Riaboro

E taekinna Kristo i nanon ana tai ni mwakuri i aon te aba n te moan tienture, bwa e na tiringaki te Riaboro ma ana taimonio n te tai ae waekoa. Ngke a taekina aroia ni kanakoia taimonio taan rimwin Iesu ao e taku nakoia: “I nora Tatan bwa e bwaka n ai aron te itirua mai karawa.” (Ruka 10:18) N ana taeka Iesu aikai, e boni kimwareirei n ana tokanikai i aon te tia tautaekania kaain te aonnaba ngkana e a okira karawa bwa ai Mikaere ae te Akanera. (Te Kaotioti 12:7-9) N reiakinan raoi taetae ni burabeti aika n te Baibara, e kaotaki iai bwa e riki te tokanikai aei i karawa n te 1914 ke teutana te tai imwina.a

Man te tai anne, e a tia n ataia te Riaboro bwa e a kimototo ngkai ana tai imwaini kamaunaakina. E ngae ngke ‘a bane kaain te aonnaba ni mena i aani mwaakana’ ma a aki anaaki nanoia aomata aika mirion ma mirion n ana kakorakora ni kairiia ni boong aikai. A a tia ni kanorabaaki n te Baibara bwa a na kinaa raoi ma ana kunemwaan nako. (2 I-Korinto 2:11) A karekea te kantaninga ae raoiroi nakoia raoia aika Kristian man ana taeka Bauro ae kangai: “E a kaan ana tai te Atua are e anganga te rau, ni kamanatuaa Tatan i aani waemi.”b—I-Rom 16:20.

E a kaani kabaneani kamaunaakin te Riaboro! A na bita nneni katokaani waen te Atua ae kaikonakaki bwa te aonnaba nakon te Bwaretaiti, aomata aika raoiroi i aan ana tautaeka ae tatangira Kristo. E nang toki te tiritiri, te riribai ao te nanonrang. E taekinaki ae kangai n te Baibara: “A na aki uringaki baike rimoa, ao a na aki manga rin n te nano.” (Itaia 65:17, BG) Ai te kukurei tera irouia aomata ni kabane aika kainaomataaki mairoun te tia tautaekana te aonnaba ae raba ao mwaakana ni kairiri!

[Kabwarabwara ae nano]

[Kabwarabwaraan n iteraniba 9]

A na bita te aonnaba nakon te bwaretaiti aomata aika raoiroi i aan ana tautaeka ae tatangira Kristo