સેવાકાર્યમાં આપણી આવડત વધારે કેળવીએ—ગુસ્સે થયેલા ઘરમાલિક સાથે શાંતિ જાળવીએ

કેમ મહત્ત્વનું: આપણને પ્રચારમાં ઘણા નમ્ર લોકો મળે છે. જોકે, ઈસુએ પહેલેથી જણાવ્યું હતું કે, અમુક લોકો આપણને ધિક્કારશે. (યોહા. ૧૭:૧૪) એટલે, કોઈ ઘરમાલિક ગુસ્સે થાય તો, આપણને નવાઈ લાગતી નથી. એવું બને ત્યારે, આપણે યહોવાને પસંદ પડે એ રીતે વર્તવા ચાહીએ છીએ. (રોમ. ૧૨:૧૭-૨૧; ૧ પીત. ૩:૧૫) એનાથી પરિસ્થિતિ વધારે બગડશે નહિ. તેમ જ, ઘરમાલિક અને આપણા પર નજર રાખનારને સારી સાક્ષી આપી શકીશું. એટલું જ નહિ, યહોવાના સાક્ષીઓ બીજી વાર તેઓને મળવા જશે તો, કદાચ તેઓ સાંભળશે.—૨ કોરીં. ૬:૩.

કઈ રીતે કરી શકીએ:

શાંત રહો અને સારાં વાણી-વર્તન રાખો. એમ કરવાથી બોલાચાલી આગળ વધતી અટકી જશે. ઘરમાલિક કંઈ કહે તો એને દિલ પર ન લો. (સભા. ૭:૯) કદાચ તે કોઈ મુશ્કેલીના લીધે ઉદાસ હોય. અથવા આપણે ખોટા સમયે ગયા હોઈએ. આપણા સંદેશાને લીધે ગુસ્સે થયા હોય તોપણ, ભૂલીએ નહિ કે તેઓને ગેરમાર્ગે દોરવામાં આવ્યા છે.—૨ કોરીં. ૪:૪.
નમ્રતા અને પ્રેમથી જવાબ આપો. (નીતિ. ૧૫:૧) શું તમે ઘરમાલિકને ઊંઘમાંથી જગાડ્યા હતા કે તેમના કામમાં ખલેલ પહોંચાડી હતી? જોકે, આપણા પ્રચારકામ માટે આપણે માફી નથી માંગતા. પરંતુ, ખોટા સમયે ગયા હોવાને લીધે નમ્રતાથી માફી માંગી શકીએ. શું આપણા વિશે કોઈ અફવા સાંભળી હોવાને લીધે તે ગુસ્સે છે? એમ હોય તો, તમે આવું કહી શકો: “તમારા ગુસ્સાનું કારણ હું સમજી શકું છું. જોકે, લાગે છે કે અમારા વિશે તમે ખોટું સાંભળ્યું છે. શું એ વિશે હું તમને સમજાવી શકું?” અમુક લોકો કદાચ કહેશે: “તમે પ્રચાર કરીને લોકોનો ધર્મ બદલાવો છો.” તમે કહી શકો: “હું સમજી શકું છું કે તમને એવું કેમ લાગે છે. પણ, અમે કેમ પ્રચાર કરીએ છીએ એ તમને જાણવું છે?” ચર્ચમાં જતી વ્યક્તિ કદાચ આવું કહે: “તમે ઈસુમાં નથી માનતા.” તમે કહી શકો: “ઘણાને એવું લાગે છે. પણ, અમે ઈસુમાં માનીએ છીએ એની સાબિતી આપતી એક કલમ બતાવી શકું?”
જો વ્યક્તિ ખૂબ જ ગુસ્સે હોય, તો સારું રહેશે કે તેને સામે જવાબ આપવાનો પ્રયત્ન ન કરીએ. અને ત્યાંથી નીકળી જઈએ. જો વ્યક્તિ કહે કે યહોવાના સાક્ષીઓ બીજી વાર એના ઘરે ન આવે, તો ખાતરી કરાવો કે તે ચાહે છે એવું જ થશે.

આ મહિને આમ કરો:

કુટુંબ તરીકે ભક્તિ કરતી વખતે પ્રૅક્ટિસ કરો.
ગુસ્સે ભરાયેલા ઘરમાલિકના ઘરમાંથી નીકળ્યા પછી, તમારા સાથીદાર સાથે ચર્ચા કરો કે હજી કઈ રીતે વધારે સારી વાતચીત કરી શક્યા હોત.