Նրանք հարստացրին իրենց կյանքը. իսկ դու կարո՞ղ ես

ՄԱՐԿԸ՝ կանադացի մի եղբայր, աշխատում էր մի ընկերությունում, որտեղ արտադրում էին բարդ ռոբոտային համակարգեր։ Դրանք օգտագործվում էին տիեզերքի ուսումնասիրությամբ զբաղվող կազմակերպությունների կողմից։ Նա աշխատում էր կես դրույքով և ծառայում էր որպես ընդհանուր ռահվիրա։ Որոշ ժամանակ անց Մարկի գործատերը նրան առաջարկեց պաշտոնի բարձրացում լրիվ աշխատանքային օրով և բարձր աշխատավարձով։ Ինչպե՞ս վարվեց Մարկը։

Էմին՝ Ֆիլիպիններում ապրող մի քույր, դպրոցն ավարտելուն մոտ ժամանակներում ծառայում էր որպես ընդհանուր ռահվիրա։ Դպրոցն ավարտելուց հետո նրան առաջարկեցին լավ վարձատրվող լրիվ աշխատանքային օրով մի գործ, որը, սակայն, խլելու էր նրա ժամանակի մեծ մասը։ Ի՞նչ որոշում կայացրեց Էմին։

Մարկն ու Էմին տարբեր որոշումներ կայացրեցին, և դրանց բերած արդյունքները արտացոլում են հին Կորնթոսի քրիստոնյաներին տրված խորհրդի իմաստությունը։ Պողոս առաքյալը գրեց. «Թող.... նրանք, ովքեր օգտվում են աշխարհից, լինեն ինչպես լիովին չօգտվողներ» (1 Կորնթ. 7։29–31)։

Օգտվիր աշխարհից, բայց ոչ լիովին

Նախքան կիմանանք, թե ինչ պատահեց Մարկին ու Էմիին, համառոտ քննեք «աշխարհ» (հունարեն՝ կո՛սմոս) բառի իմաստը, որը Պողոսն օգտագործեց կորնթացիներին ուղղած իր նամակում։ Աստվածաշնչի այդ հաղորդագրության մեջ կո՛սմոս բառը վերաբերում է այն համակարգին, որում ապրում ենք՝ մարդկային հասարակությանը ընդհանուր առմամբ, և ներառում է տարրական բաներ, որոնք մեր առօրյայի մի մասն են, ինչպես օրինակ՝ կացարան, սնունդ և հագուստa։ Ամենօրյա այս անհրաժեշտ բաները ձեռք բերելու համար մեզնից շատերը պետք է աշխատեն։ Իրականում մենք ստիպված ենք օգտվել աշխարհից մեր աստվածաշնչյան պարտականությունը կատարելու համար, որն է՝ հոգ տանել մեզ և մեր ընտանիքներին (1 Տիմոթ. 5։8)։ Սակայն միևնույն ժամանակ գիտակցում ենք, որ «աշխարհն անցնում է» (1 Հովհ. 2։17)։ Այդ իսկ պատճառով մենք օգտվում ենք աշխարհից անհրաժեշտ չափով, բայց ոչ «լիովին» (1 Կորնթ. 7։31)։

Հետևելով Աստվածաշնչի այդ խորհրդին, այսինքն՝ հնարավորին չափով քիչ օգտվել աշխարհից՝ բազմաթիվ եղբայրներ ու քույրեր վերանայել են իրենց հանգամանքները, նվազեցրել են աշխատանքային ժամերը և պարզեցրել իրենց կյանքը։ Այդպիսի քայլ կատարելուց հետո նրանք շուտով հայտնաբերել են, որ իրականում հարստացրել են իրենց կյանքը, քանի որ սկսել են ավելի շատ ժամանակ անցկացնել իրենց ընտանիքի հետ և ավելի շատ ծառայել։ Դեռ ավելին, իրենց պարզ կյանքի շնորհիվ նրանք ավելի քիչ կախում են ունեցել աշխարհից և ավելի շատ Եհովայից։ Իսկ դու կարո՞ղ ես այդպես վարվել՝ պարզեցնել քո կյանքը Թագավորության շահերն առաջ տանելու համար (Մատթ. 6։19–24, 33)։

«Մեզ ավելի մոտ ենք զգում Եհովային, քան նախկինում»

Մարկը, որի մասին նշվեց հոդվածի սկզբում, հետևեց աշխարհից լիովին չօգտվելու վերաբերյալ Աստվածաշնչի խորհրդին։ Նա մերժեց եկամտաբեր աշխատանքի առաջարկը։ Մի քանի օր անց Մարկի գործատերն առաջարկեց ավելի բարձր աշխատավարձ, որպեսզի համոզեր նրան ընդունել նոր աշխատանքի առաջարկը։ «Դա փորձություն էր,— ասում է Մարկը,— բայց ես դարձյալ մերժեցի»։ Նա բացատրում է, թե ինչու այդպես վարվեց. «Կինս՝ Պաուլան, և ես ցանկանում էինք որքան հնարավոր էր լիարժեքորեն կառուցել մեր կյանքը Եհովայի ծառայության շուրջ։ Ուստի որոշեցինք պարզեցնել մեր ապրելակերպը։ Մենք Եհովայից իմաստություն խնդրեցինք մեր նպատակին հասնելու համար և կոնկրետ ամսաթիվ նշանակեցինք, թե երբ պետք է սկսեինք ավելի շատ ծառայել Եհովային»։

Պաուլան պատմում է. «Ես աշխատում էի հիվանդանոցում որպես քարտուղար շաբաթական երեք օր և լավ աշխատավարձ էի ստանում։ Նաև ծառայում էի որպես ընդհանուր ռահվիրա։ Սակայն Մարկի պես՝ ես էլ էի ուզում ծառայել այնտեղ, որտեղ Թագավորության քարոզիչների ավելի շատ կարիք կար։ Երբ աշխատանքից ազատվելու դիմում ներկայացրեցի, գործատիրուհիս ասաց, որ ես կարող եմ զբաղեցնել պատասխանատու քարտուղարի պաշտոնը, որը այդ պահին ազատ էր։ Դա ամենաբարձր վարձատրվող քարտուղարի աշխատանքն էր այդ հիվանդանոցում, բայց ես հավատարիմ մնացի իմ կայացրած որոշմանը։ Երբ բացատրեցի գործատիրուհուս, թե ինչու եմ հրաժարվում այդ գործից, նա գովեց ինձ իմ հավատի համար»։

Կարճ ժամանակ անց Մարկն ու Պաուլան նշանակում ստացան ծառայելու որպես հատուկ ռահվիրաներ Կանադայի հեռավոր տարածքում գտնվող մի փոքր ժողովում։ Ի՞նչ օգուտներ ստացան նրանք այնտեղ տեղափոխվելուց։ Մարկն ասում է. «Ես վախով լցվեցի ֆինանսապես կայուն աշխատանքից հրաժարվելուց հետո, որով զբաղվել էի իմ կյանքի գրեթե կեսը, բայց Եհովան օրհնեց մեր ծառայությունը։ Չափազանց մեծ ուրախություն ենք ապրում այն բանից, որ հոգևոր պարգևներ ենք տալիս ուրիշներին։ Լիաժամ ծառայությունը նաև օգնեց մեզ մեր ամուսնության մեջ։ Մեր զրույցները կենտրոնանում են այնպիսի բաների վրա, որոնք իսկապես կարևոր են՝ հոգևոր թեմաների։ Մենք մեզ ավելի մոտ ենք զգում Եհովային, քան նախկինում» (Գործ. 20։35)։ Պաուլան ավելացնում է. «Երբ թողնում ես աշխատանքդ և քեզ հարազատ տան հարմարավետությունը, դու պետք է ամբողջովին ապավինես Եհովային։ Մենք այդպես էլ վարվեցինք, և Եհովան օրհնեց մեզ։ Մեր նոր ժողովի սիրելի եղբայրներն ու քույրերը ցույց էին տալիս, որ սիրում են մեզ և ունեն մեր կարիքը։ Այժմ ես իմ ողջ ուժերը, որ նախկինում ներդնում էի աշխատանքիս մեջ, օգտագործում եմ մարդկանց հոգևորապես օգնելու համար։ Մեծ ուրախություն եմ ստանում այս նշանակման մեջ ծառայելուց»։

Ապահովված, բայց ոչ երջանիկ

Էմին, որի մասին նշվեց սկզբում, ուրիշ ընթացք բռնեց։ Նա ընդունեց լրիվ աշխատանքային օրով եկամտաբեր աշխատանքի առաջարկը։ Նա ասում է. «Առաջին տարին ես շարունակում էի ակտիվորեն մասնակցել ծառայությանը, սակայն նկատեցի, որ աստիճանաբար ուշադրությունս շեղվում է Թագավորության շահերից և կենտրոնանում է կարիերայի վրա։ Գայթակղիչ առաջարկներ էի ստանում պաշտոնս բարձրացնելու հետ կապված, ու սկսեցի ողջ ուժերս ներդնել բարձր դիրքի հասնելու համար։ Քանի որ աշխատանքի մեջ պատասխանատվություններս շատանում էին, ավելի ու ավելի քիչ ժամանակ էի տրամադրում ծառայությանը։ Ի վերջո, դադարեցի ծառայելուց»։

Վերհիշելով այդ ժամանակը՝ Էմին նշում է. «Ես ֆինանսապես ապահովված էի։ Շատ էի ճանապարհորդում և մեծ հեղինակություն էի վայելում իմ զբաղեցրած պաշտոնի շնորհիվ։ Սակայն երջանիկ չէի։ Չնայած շատ փող ունենալուն՝ ես բազմաթիվ խնդիրներ ունեի։ Ուզում էի իմանալ, թե ինչու է այդպես։ Վերջապես հասկացա, որ այս աշխարհում կարիերայի ձգտելով՝ ես գրեթե «շեղվել էի հավատից»։ Եվ հետևանքը եղավ ճիշտ այն, ինչ որ ասում է Աստծու Խոսքը. ես «շատ ցավերով խոցվեցի»» (1 Տիմոթ. 6։10)։

Ինչպե՞ս վարվեց Էմին։ Նա պատմում է. «Ես խնդրեցի երեցներին օգնել ինձ վերականգնել հոգևոր առողջությունս և սկսեցի հաճախել հանդիպումներին։ Երգի ժամանակ լաց էի լինում։ Հիշում էի, թե որքան երջանիկ էի այն հինգ տարիների ընթացքում, երբ մասնակցում էի հնձի գործին՝ ծառայելով որպես ռահվիրա, թեև այն ժամանակ աղքատ էի։ Ես գիտեի, որ այլևս չպետք է ժամանակս վատնեմ գումար ձեռք բերելու վրա, և որ պետք է Թագավորության շահերն առաջին տեղում դնեմ։ Անցա ավելի ցածր պաշտոնի, ինչը նշանակում էր, որ կորցնելու էի աշխատավարձիս հիսուն տոկոսը։ Նորից սկսեցի մասնակցել քարոզչական գործին»։ Էմին ուրախությամբ ավելացնում է. «Մի քանի տարի է արդեն, ինչ ուրախություն եմ ստանում ռահվիրայական ծառայությունից։ Այժմ բավարարվածության զգացում ունեմ, որը երբեք չեմ ունեցել այն տարիների ընթացքում, երբ ժամանակիս մեծ մասն անցկացնում էի աշխատանքի մեջ»։

Կարո՞ղ ես փոփոխել հանգամանքներդ և պարզեցնել կյանքդ։ Եթե ժամանակդ օգտագործես այնպես, որ Թագավորության շահերն առաջ տանես, դու նույնպես կհարստացնես քո կյանքը (Առակ. 10։22)։

[ծանոթագրություն]

[մեջբերում 19–րդ էջի վրա]

Կարո՞ղ ես փոփոխել հանգամանքներդ և պարզեցնել կյանքդ

[Շրջանակ/նկար 19–րդ էջի վրա]

«Ես արդեն սիրում եմ այդ ծառայությունը»

Դեյվիդը, որը ծառայում է որպես երեց Միացյալ Նահանգներում, ուզում էր միանալ իր կնոջն ու երեխաներին լիաժամ ծառայության մեջ։ Նա կարողացավ կես դրույքի անցնել այն ընկերությունում, որտեղ աշխատում էր, և սկսեց ծառայել որպես ընդհանուր ռահվիրա։ Այս փոփոխությունը հարստացրե՞ց նրա կյանքը։ Մի քանի ամիս անց Դեյվիդը իր ընկերներից մեկին գրեց. «Ավելի մեծ բավականություն պատճառող բան չկա, քան ընտանիքիդ հետ լիարժեքորեն Եհովային ծառայելը։ Մտածում էի, որ ժամանակ է պետք, որ ընտելանայի ռահվիրայական ծառայությանը, սակայն ես արդեն սիրում եմ այդ ծառայությունը։ Այն իսկապես թարմություն է պարգևում»։

[նկար 18–րդ էջի վրա]

Մարկն ու Պաուլան ծառայության ժամանակ