Վայելուչ հագուստով ցույց ենք տալիս մեր հարգանքը Աստծո հանդեպ
1. Ինչպե՞ս կարող ենք մեր երախտագիտությունը ցույց տալ գալիք մարզային համաժողովի համար։
1 Շուտով մենք հնարավորություն կունենանք հյուրընկալվել Եհովայի կողմից 2003 թ. «Փառք տվեք Աստծուն» անվանումը կրող մարզային համաժողովին։ Որքա՜ն շնորհակալ ենք Եհովայից, որ մեզ հրավիրել է այս հոգևոր ճոխ խնջույքին։ Մեր հագուստով ու հարդարանքով կարող ենք Աստծո հանդեպ մեր հարգանքը և նրա մատուցած հոգևոր միջոցառումների համար մեր երախտագիտությունը ցույց տալ (Սաղ. 116։12, 17)։
2. Ինչո՞ւ է մեզ համար կարևոր մաքուր լինել և կոկիկ հագուկապ ունենալ։
2 Մաքուր և կարգապահ։ Մեր արտաքինը պետք է արտացոլի մեր Աստծո չափանիշները, քանի որ նա ինքը մաքրության և կարգ ու կանոնի Աստված է (Ա Կորնթ. 14։33; Բ Կորնթ. 7։1)։ Մեր մարմինը, մազերը և եղունգները պետք է մաքուր վիճակում լինեն, ու մեր հագուստը պետք է կոկիկ լինի։ Այսօր անփույթ հագուկապը սովորական բան է։ Սակայն քրիստոնյան չպետք է անփույթ արտաքին ունենա այն պատճառով, որ կինոաստղերը կամ հայտնի մարզիկները այդպես են հագնվում։ Եթե մենք հետևենք նորաձևության ճիչերին, մարդիկ հազիվ թե տարբերեն նրանց, ովքեր ծառայում են ճշմարիտ Աստծուն, այն անհատներից, ովքեր չեն ծառայում նրան (Մաղ. 3։18)։
3. Ինչպե՞ս կարող ենք համոզվել, որ մեր արտաքին տեսքը ներդաշնակ է Ա Տիմոթէոս 2։9, 10 համարներում արձանագրված խորհրդին։
3 Հագվելակերպ, որ վայել է քրիստոնյա ծառայողներին։ Քրիստոնյա վերակացու Տիմոթեոսին ուղղած նամակում Պողոս առաքյալը հորդորեց կանանց, որ «վայելուչ հագուստով ամօթխածութիւնով եւ պարկեշտութիւնով իրանց անձերը զարդարեն, .... ինչպէս կ’վայելէ աստուածպաշտութիւնը յանձն առած կանանց՝ բարի գործերով» (Ա Տիմոթ. 2։9, 10)։ Համոզվելու համար, որ մեր հագուստը վայելուչ է, կշռադատություն է հարկավոր։ Մեր հագուստը պետք է լինի մաքուր, կոկիկ և համեստ, ոչ անճաշակ, ոչ ցանկություններ գրգռող (Ա Պետ. 3։3)։
4, 5. Ի՞նչ զգուշացումների պետք է ուշադրություն դարձնեն քրիստոնյա տղամարդիկ և կանայք։
4 Պողոսը նաև զգուշացրեց, որ մենք ծայրահեղությունների մեջ չընկնենք «հիւսուածներով, կամ ոսկիով կամ մարգարիտներով կամ թանգագին հանդերձներով» զարդարվելիս (Ա Տիմոթ. 2։9)։ Թանկարժեք զարդեր, կոսմետիկա կամ արդուզարդի այլ առարկաներ օգտագործելու հարցում հավասարակշռված լինելը իմաստության դրսևորում է քրիստոնյա կանանց կողմից (Առակ. 11։2, ՆԱ)։
5 Պողոսի՝ քրիստոնյա կանանց ուղղված խորհրդում ամփոփված սկզբունքը կիրառելի է նաև քրիստոնյա տղամարդկանց համար։ Եղբայրները պետք է խուսափեն այնպիսի ոճերից, որոնք այս աշխարհի մտածելակերպն են արտացոլում (Ա Յովհ. 2։16)։ Օրինակ՝ որոշ երկրներում շատ տարածված է պարկանման, չափից դուրս լայն հագուստը, բայց նման հագուստը պատշաճ չէ Աստծո ծառայի համար։
6. Ինչո՞ւ մենք պետք է բարձր չափանիշներ պահպանենք հագուստի ու հարդարանքի հարցում, երբ գնում ենք համաժողովի կամ տուն վերադառնում, համաժողովի ժամանակ և յուրաքանչյուր օրվա ծրագրից հետո։
6 Ազատ ժամերին։ Համաժողովի ժամանակ եղբայրների ու քույրերի մեծամասնությունը հրաշալի օրինակ է ցույց տալիս իր հագուկապով։ Սակայն համաձայն որոշ տեղեկությունների՝ ոմանք անփույթ արտաքին են դրսևորել համաժողովի գնալիս և տուն վերադառնալիս կամ ծրագրից հետո ազատ ժամերին։ Իրականում մեր արտաքին տեսքից՝ լինի դա ծրագրի ժամանակ թե այլ ժամերի, կախված է այն, թե մարդիկ ինչ կարծիք կկազմեն Աստծո ժողովրդի մասին։ Քանի որ մենք կրում ենք համաժողովի պլակետկաները, մեր հագուստը միշտ պետք է քրիստոնեավայել լինի։ Մեր արտաքին տեսքին նայելով՝ հաճախ մարդիկ հաճելի խոսքեր են ասում մեզ, և այդպիսով նրանց վկայություն տալու դուռ է բացվում մեր առջև (Ա Կորնթ. 10։31–33)։
7 Ինչպես որ բարյացակամ ժպիտն է գրավիչ դարձնում մարդու դեմքը, այնպես էլ վայելուչ հագուստն ու հարդարանքն է բարձրացնում մեր հաղորդած պատգամի, ինչպես նաև մեր կազմակերպության արժեքը։ Գուցե այս տարվա «Փառք տվեք Աստծուն» անվանումը կրող մարզային համաժողովի ժամանակ ոմանք, տեսնելով մեր վարքը, ցանկանան իմանալ, թե ինչու ենք մենք տարբերվում մյուսներից, և հետո գուցե ասեն. «Գնանք ձեզ հետ, որովհետեւ լսել [և տեսել] ենք որ Աստուած ձեզ հետ է» (Զաք. 8։23)։ Եկեք բոլորս մեր հագուստով ու հարդարանքով ցույց տանք Եհովայի հանդեպ մեր հարգանքը։
7. Ի՞նչ ազդեցություն կարող է մարդկանց վրա թողնել մեր վայելուչ հագուստն ու հարդարանքը։
[Շրջանակ 5–րդ էջի վրա]
Արժանավայել արտաքին ունեցիր
▪ Համաժողովի գնալիս կամ տուն վերադառնալիս
▪ Համաժողովի ժամանակ
▪ Ծրագրից հետո ազատ ժամերին