ԵՀՈՎԱՅԻ ԳՈՐԾԵՐԸ ՃԱՆՉՑՈՒՑԷՔ
1 ‘‘Անոր գործերը ազգերուն մէջ [ճանչցուցէ՛ք], յիշեցէ՛ք թէ անոր անունը բարձր է . . . , վասնզի անիկա մեծամեծ բաներ ըրաւ’’։ (Եսա. 12։4, 5) Ինչպէ՞ս կ’ընդառաջէք այս յորդորանքին։ Երբ կը խոկանք Եհովայի գործառնութիւններուն վրայ մեզի հետ, որպէս ժողովուրդ մը եւ որպէս անհատներ, մեր սրտերը չե՞ն մղուիր ուրիշներու պատմելու։ Շուրջ 73 տարի առաջ, Եհովա ազատագրեց իր ժողովուրդը Բաբելոնական գերութենէն։ 1919–էն ի վեր ճշմարիտ պաշտամունքը անխախտօրէն հաստատուած է եւ ներկայիս տարածուած է երկրին բոլոր մասերը։ Այն չափը որով Եհովա կատարած է այս բաները կը գերազանցէ մեր ակնկալութիւնները։ Որպէս անհատ մը, ո՞րքան խորապէս կը գնահատէք Աստուծոյ առաջնորդութիւնը, պաշտպանութիւնը, եւ օրհնութիւնը։ Կրնա՞ք աւելին ընել իր գործերը ճանչցնելու ու իր անունը բարձրացնելու։
2 Յիշատակատօնի եղանակը կը վերյիշեցնէ աստուածային արարք մը որու համար յաւիտենապէս երախտապարտ պիտի ըլլանք։ Ապրիլ ամիսը յատկապէս յարմար ժամանակ մը պիտի ըլլայ Եհովային ցոյց տալու մեր երախտապարտութիւնն ու գնահատանքը մասնակցելով օժանդակ ռահվիրայութեան։ Նաեւ, եթէ ծառայէք որպէս օժանդակ ռահվիրաներ շրջանային տեսուչի այցելութեան ընթացքին, ա՛լ աւելի պիտի օգտուիք անոր օգնութենէն ու քաջալերանքէն ծառայութեան մէջ։
3 Յաճախ, կարգադրութիւնները յաջողութիւն կը գտնեն երբ հրատարակիչներու խումբեր օժանդակ ռահվիրայութեան կը մասնակցին։ Լաւ յայտագիր մը կարելի է ծրագրել այնպէս որ բոլորն ալ ունենան մէկը որու հետ աշխատին, եւ այն քոյրերը որոնք մանուկներ ունին կրնան կարգադրել որ իրարու օգնեն։ Լաւ ծրագրելով, շատեր գտած են թէ շատ դժուար չէ 60 ժամ պահանջքին գոհացում տալը։ Ասիկա կը նշանակէ ծառայութեան յատկացնել որպէս միջին միայն 2 ժամ օրը կամ 15 ժամ շաբաթը։ Կարգ մը օժանդակ ռահվիրաներ կը վկայեն մէկ կամ երկու ժամ իրենց աշխարհային գործէն առաջ կամ վերջ եւ շաբաթավերջերուն աւելի երկար ժամանակ ծառայութեան կը յատկացնեն։
4 Նոյնիսկ եթէ անկարող էք օժանդակ ռահվիրայութեան մասնակցիլ, թերեւս կարող էք ձեր դաշտի ծառայութեան գործունէութիւնը աւելցնել։ Նաեւ, օգնելով փոխադրութեամբ կամ աշխատելով անոնց հետ որոնք ռահվիրայութիւն կ’ընեն, քաջալերանք մը պիտի ըլլաք անոնց։ Որեւէ բան որ կրնանք ընել Եհովայի անունն ու գործերը ճանչցնելու, մեր գնահատող Աստուածը պիտի նկատէ զայն։—Մաղ. 3։16