Պարբերաթերթի Ձեր Անհատական Ներկայացումները Պատրաստեցէք

¹ Դիտարան ու Զարթի՛ր պարբերաթերթերը կը գնահատենք իրենց այժմէական ու տեղեկատուական յօդուածներուն համար, որոնք ամէն տեսակ նիւթեր կը ծածկեն, միջազգային հարցերէն մինչեւ «Աստուծոյ խորունկ բաներ»ը։ (Ա. Կորն. 2։10) Բոլորս ալ կը վերյիշենք բազմաթիւ նոր ու կերտիչ նիւթեր, զորս կարդացած ենք այս պարբերաթերթերուն մէջ, զորս Եհովա կը գործածէ ճշմարտութիւնը աստիճանաբար յայտնելու։ (Առ. 4։18) Կ’ուզենք ջանալ զանոնք ցրուել կարելի եղածին չափ շատ մարդոց։

² Ձեր Թաղամասը Վերլուծեցէք. Ձեր շրջանին մէջ ի՞նչ տեսակ մարդիկ կ’ապրին։ Եթէ անոնք միշտ աճապարանօք են, հարկ է որ հակիրճ ու շեշտակի ներկայացում մը պատրաստէք։ Եթէ թաղամաս մը ունիք ուր մարդիկ նուազ աճապարանօք են, կրնաք յաւելեալ բաներ խօսիլ։ Եթէ տանտէրներուն մեծամասնութիւնը ցերեկը կ’աշխատի, կրնաք աւելի յաջողութիւն գտնել անոնց այցելելով կէսօրէ ետք կամ երեկոյեան ժամերուն։ Կրնաք ցերեկը ոմանց հետ խօսիլ, փողոցի վկայութեան միջոցաւ կամ վաճառատունէ վաճառատուն ծառայելով։ Կարգ մը հրատարակիչներ հոյակապ արդիւնքներ ձեռք կը ձգեն անպաշտօն կերպով մարդոց մօտենալով կառատուներուն եւ զբօսավայրերուն մէջ։

³ Պարբերաթերթերուն Քաջածանօթ Եղէք. Իւրաքանչիւր թիւ կարդացէք զայն ստանալէն անմիջապէս ետք։ Ընտրեցէք այն յօդուածները որոնք կը խորհիք որ կրնան կոչ ընել ձեր թաղամասի մարդոց։ Ի՞նչ նիւթեր կը հետաքրքրեն զանոնք։ Փնտռեցէք մասնայատուկ կէտ մը, զոր կրնաք մէջբերել այն յօդուածէն զոր կը ծրագրէք ներկայացնել։ Պատրաստեցէք հարցում մը որ կրնայ հետաքրքրութիւն շարժել։ Ընտրեցէք յարմար համար մը, որպէսզի տանտիրոջ կարդաք եթէ առիթը ներկայանայ։ Մտածեցէք ի՛նչպէս յիշել նուիրատուութիւն ընելու կարգադրութիւնը եւ ի՛նչպէս ճամբան հարթել վերայցելութեան մը համար։

⁴ Ձեր Բացման Խօսքերը Պատրաստեցէք. Ուշադրութեամբ ընտրեցէք այն խօսքերը որով դուք ձեզ պիտի ծանօթացնէք ու խօսակցութիւն մը սկսիք։ Ոմանք հետեւեալ բացման խօսքերով յաջողութիւն գտած են. «Այս պարբերաթերթին մէջ սքանչելի յօդուած մը կարդացի ու կը փափաքիմ զայն բաժնել ուրիշներու հետ»։ Շատեր կը սկսին հարցումով մը որ անոնց ծրագրած խօսակցական կէտին վրայ կը կեդրոնանայ։ Օրինակի համար.

⁵ Եթէ ուշագրաւ կը դարձնէք յօդուած մը որ նկատի կ’առնէ ոճիրին տիրական ըլլալը, կրնաք հարց տալ.

◼ «Ի՞նչ բանի հարկը կայ որպէսզի կարենանք գիշերը քնանալ առանց վախնալու որ կողոպտուինք կամ վնասուինք»։ Բացատրեցէք որ այս խնդրին լուծման մասին որոշ տեղեկութիւններ ունիք։ Այս լուծումը նաեւ շուտով պիտի ջնջէ մնացեալ բոլոր ընկերային խնդիրները։ Ակնարկեցէք պարբերաթերթին մէջ այսպիսի յոյս մը ներկայացնող կէտի մը։ Երբ կը վերայցելէք, կրնաք Գիտութիւն գրքին գլուխ 1–ը տանտիրոջ ուշադրութեան յանձնել։

⁶ Երբ ընտանեկան կեանքի մասին յօդուած մը կը ներկայացնէք, կրնաք հետեւեալը ըսել.

◼ «Այս օրերուն ծնողներուն մեծամասնութիւնը զաւակներ մեծցնելը իրական մարտահրաւէր մը կը նկատէ։ Բազմաթիւ գրքեր գրուած են այս նիւթին մասին, սակայն նոյնիսկ մասնագէտները համաձայն չեն։ Կա՞յ մէկը որ կրնայ վստահելի առաջնորդութիւն հայթայթել»։ Պարբերաթերթէն մասնայատուկ մեկնաբանութիւն մը բաժնեցէք որ ցոյց կու տայ Աստուածաշունչի իմաստուն խրատը։ Երբ կը վերայցելէք, նկատի առէք Սուրբ Գրային գաղափարները զաւակներ մեծցնելու մասին, որոնք յիշուած են Գիտութիւն գրքին մէջ, էջ 145–148։

⁷ Երբ ընկերային խնդրի մը մասին յօդուած մը կը ներկայացնէք, կրնաք ըսել.

◼ «Բազմաթիւ մարդիկ ճնշուած կը զգան, մեր ապրած դժուարին ժամանակներուն պատճառաւ։ Կը խորհի՞ս որ Աստուած մտադրած էր որ այս կերպով ապրինք»։ Ցոյց տուէք յօդուած մը որ կը բացատրէ ի՛նչպէս գլուխ ելլել ներկայ խնդիրներուն հետ կամ ալ պատճառներ կու տայ մտահոգութենէ զերծ ապագայ մը ակնկալելու։ Յաջորդ այցելութեան, նկատի առէք Գիտութիւն գրքին 4–5–րդ էջերուն պատկերը ու անոր խորագիրը, ապա ջանացէք ուղղակիօրէն տան սուրբ գրային ուսումնասիրութիւն մը սկսիլ։

⁸ Ներկայացումը Տանտիրոջ Յարմարցուցէք. Պիտի հանդիպիք այնպիսի մարդոց որոնք այլազան հետաքրքրութիւններ ունին ու տարբեր միջավայրերէ եկած են։ Հիմնական ներկայացում մը պատրաստեցէք, զոր կրնաք իւրաքանչիւր տանտիրոջ յարմարցնել։ Պատրաստ եղէք ձեր խօսածը յարմարցնելու այր մարդու մը, կնոջ մը, տարեցի մը կամ պատանիի մը։ Անթեք կանոններ չկան թէ ի՛նչ պէտք է ըսէք։ Ըսէք ի՛նչ որ ձեզի յարմար է ու արդիւնք կու տայ։ Սակայն, խանդավառ եղէք, սրտանց խօսեցէք ու լաւ ունկնդրող մը եղէք։ «Յաւիտենական կեանքի սահմանուած» եղողները ձեր անկեղծութիւնը պիտի զգան ու նպաստաւոր կերպով պիտի ընդառաջեն։—Գործք 13։48

⁹ Իրարու Օգնեցէք. Իրարու հետ գաղափարներ բաժնելով, մենք մեզ արտայայտելու նոր կերպեր կը սորվինք։ Մեր ներկայացումները միասնաբար փորձ ընելը փորձառութիւն եւ ինքնավստահութիւն կու տայ մեզի։ (Առ. 27։17) Եթէ ձեր ըսելիքը փորձ ընէք, դռներուն առջեւ աւելի հանդարտ ու հանգիստ պիտի զգաք։ Կենսական է որ ծնողներ ժամանակ տրամադրեն իրենց զաւակներուն օգնելու որ իրենց ներկայացումները պատրաստեն, մտիկ ընեն երբ անոնք փորձ կ’ընեն ու բարելաւման համար թելադրութիւններ տան։ Նորեկները կրնան օգտուիլ աւելի փորձառու հրատարակիչներու հետ աշխատելով։

¹⁰ Պարբերաթերթի ձեր անհատական ներկայացումները պատրաստելը դժուար պէտք չէ ըլլայ։ Ձեր մտքին մէջ ըսելիք մասնայատուկ բան մը ունեցէք, ապա կոչ ընող կերպով զայն արտայայտեցէք։ Նախաձեռնութեամբ ու կանխամտածութեամբ, կրնաք ընտիր ներկայացում մը պատրաստել որ նպաստաւոր ընդառաջում պիտի գտնէ։

¹¹ Պարբերաթերթի ցրուումը Թագաւորութեան պատգամը համայն աշխարհի մէջ տարածելու գլխաւոր կերպերէն մէկն է։ Եթէ կարենաք Դիտարանն ու Զարթի՛րը անկեղծ մարդոց մատչելի դարձնել, պարբերաթերթերը կրնան խօսիլ անոնց։ Միշտ յիշեցէք անոնց արժէքը ու կեանք փրկող պատգամը։ Եհովա այս ‘բարերարութեան ու կարօտեալներուն ողորմութեան’ շատ կը հաւնի։—Եբր. 13։16