Ձեր Ժամանակը Ազդու Կերպով Գործածեցէք

¹ Բոլորս ալ ամէն շաբաթ մեր տրամադրութեան տակ միեւնոյն քանակութեամբ ժամեր ունինք։ Մասնաւորաբար թանկագին է բարի լուրը տարածելու համար մեր յատկացուցած ժամանակը, քանի որ անիկա կեանք փրկելու գործին համար տրամադրուած ժամանակ է։ (Հռովմ. 1։16) Ասոր հանդէպ մեր գնահատութիւնը կը ցուցաբերենք, ծառայութեան համար լաւ պատրաստուելով, ծառայութեան հաւաքավայրերուն որոշուած ժամանակին հասնելով, եւ շուտով թաղամաս ուղղուելով։ Նախընտրելի է հաւաքավայրին մէջ առանց տնտնալու՝ քարոզելու սկսինք։ Քանի որ Եհովայէ սորված ենք թէ «ամէն բանի ատենը կայ», հարկ է որ ծառայութեան համար մեր յատկացուցած ժամանակը ազդու կերպով գործածենք։—Ժող. 3։1

² Ձեր Ժամանակը Իմաստութեամբ Գործածեցէք. Բազմաթիւ օրհնութիւններ կը վայելենք, երբ դաշտի ծառայութեան կանոնաւորաբար մասնակցելու յայտագրի մը կառչած մնանք։ Սովորաբար, ծառայութեան մէջ մեր իրագործումները կախեալ պէտք է ըլլան մեր յատկացուցած ժամանակէն։ Մեր առօրեայ ռուդին–ին մէջ պզտիկ բարեճշդումներ ընելով, կրնա՞նք դաշտի ծառայութեան աւելի ժամանակ տրամադրել։ Օրինակի համար, Շաբաթ օր մը պարբերաթերթ բաշխելու գործունէութենէն ետք, կրնա՞նք յաւելեալ ժամանակ յատկացնել վերայցելութիւններու համար։ Եթէ Կիրակի օր մը դաշտի ծառայութեան կը մասնակցինք, կրնա՞նք նաեւ որոշ ժամանակ տրամադրել վերայցելութիւններու եւ Աստուածաշունչի ուսումնասիրութիւն մը վարելու համար։ Կարելի՞ է տունէ–տուն մեր գործունէութենէն զատ, փողոցի վկայութեան ալ մասնակցիլ։ Այս եւ ուրիշ կերպերով, թերեւս կարենանք մեր ծառայութիւնը բարելաւել։

³ Երբ ծառայութեան ելած ենք, կրնանք այդ թանկարժէք ժամանակը կորսնցնել, եթէ զգոյշ չըլլանք։ Անշուշտ, երբ օդը աննպաստ է, կարճ դադար մը ունենալը մեզ պիտի թարմացնէ եւ պիտի օգնէ որ շարունակենք։ Սակայն, հաւասարակշռուած ըլլանք, քանի որ այսպիսի դադարներ միշտ անհրաժեշտ չեն։

⁴ Վերջին տարիներու ընթացքին, հետզհետէ աւելի դժուար եղած է մարդիկ տունը գտնել։ Այս կացութեան հետ գլուխ ելլելու համար, հրատարակիչներէն շատեր դռնէ–դուռ իրենց ծառայութիւնը օրուան տարբեր ժամերուն կ’ընեն։ Ինչո՞ւ դուք ալ չփորձէք երեկոյեան ժամերուն ընել ձեր ծառայութիւնը։

⁵ Երբ փողոցի վկայութեան կը մասնակցինք, նախընտրելի է իրարու հետ չխօսակցիլ։ Ընդհակառակը, իրարմէ հեռու կայնինք եւ մարդոց մօտենանք, որպէսզի անոնց հետ խօսակցութիւններ սկսիք։ Այս կերպով ժամանակը աւելի ազդու կերպով գործածած պիտի ըլլանք եւ այս գործունէութենէն աւելի ուրախութիւն պիտի քաղենք։

⁶ Վկայելու Պատեհութիւնները Օգտագործեցէք. Երբ տանտիրուհի մը ըսաւ թէ ինք հետաքրքրուած չէր, Վկայ քոյր մը հարցուց թէ տան մէջ իրմէ զատ ուրիշ մէկը կա՞ր որու հետ կրնար խօսիլ։ Ասիկա պատճառ եղաւ որ տան գլուխին հետ խօսակցութիւն մը սկսուի, որ տարիներէ ի վեր հիւանդ էր ու մեծաւ մասամբ իր ժամանակը անկողնին մէջ կ’անցընէր։ Աստուծոյ Խօսքին մէջ գտնուած յոյսը կեանքի հանդէպ մարդուն հետաքրքրութիւնը վերարծարծեց։ Շատ չանցած ան ապաքինելով սկսաւ Թագաւորութեան Սրահին մէջ ժողովներու յաճախել եւ իր ձեռք ձգած նոր յոյսը ուրիշներու հետ բաժնել։

⁷ Պատանուհի մը Ժողովքի Գրքի Ուսումնասիրութենէն ժամ մը առաջ դաշտի ծառայութեան մասնակցելու մասին տրուած թելադրութիւնը կիրարկեց։ Առաջին դռան առջեւ, ան հանդիպեցաւ 13 տարեկան աղջնակի մը, որ ուշի ուշով մտիկ ըրաւ ու գրականութիւն մը ընդունեց։ Յաջորդ օր, դպրոցին մէջ պատանուհի քոյրը միեւնոյն աղջիկը տեսաւ։ Շատ չանցած, ան աղջնակին Աստուածաշունչի ուսումնասիրութիւն մը առաջարկեց, զոր ան ընդունեց։

⁸ Ժամանակը Արժեւորեցէք. Դաշտի ծառայութեան մէջ կանոնաւորաբար մասնակցիլը, բարի լուրը ներկայացնելու մեր հմտութիւնները զարգացնելու կը նպաստէ։ Դրան առջեւ խօսակցութիւն մը սկսելու ձեր կարողութիւնը կրնա՞ք բարելաւել, աւելի ազդու բացում մը գործածելով։ Տան սուրբ գրային ուսումնասիրութիւն մը աւելի հմտօրէն վարող ուսուցիչ մը կրնա՞ք ըլլալ։ Այսպէս ընելով, ծառայութեան մէջ ձեր ժամանակը իրապէս կրնաք ազդու կերպով գործածել եւ ձեր ծառայութիւնը աւելի արդիւնաբեր դարձնել։—Ա. Տիմ. 4։16

⁹ Քանի որ մնացած «ժամանակը կարճցած է», մեր կեանքը քրիստոնէական գործերով լեցուն պէտք է ըլլայ։ (Ա. Կորն. 7։29) Քարոզչութեան ժամանակ յատկացնելուն նախապատուութիւն պէտք է տրուի։ Ծառայութեան մէջ արդիւնաբեր ու նախանձախնդիր բաժին բերենք։ Ժամանակը՝ Եհովայի կողմէ մեզի տրուած հոյակապ հարստութիւն մըն է. հետեւաբար միշտ զայն իմաստութեամբ եւ ազդու կերպով գործածենք։

[Նկար՝ էջ 4]

Հետեւեալ Թելադրութիւնները Նկատի Առէք.

◼ Դաշտի ծառայութեան ժողովներուն ժամանակին հասէք։

◼ Կարելի եղածին չափ, թաղամաս ուղղուող խումբերը փոքր պահեցէք։

◼ Թաղամաս ուշ հասնելէ խուսափեցէք։

◼ Թաղամասին մէջ աշխատեցէք, երբ մարդոց մեծամասնութիւնը տունը կը գտնուին։

◼ Երբեմն առանձին քարոզեցէք, եթէ ասիկա ընելը ապահով է։

◼ Տունէ–տուն ընելիք ձեր թաղամասին մօտ եղող վերայցելութիւնները ըրէք։

◼ Երբ խումբին միւս անդամները դրան մը առջեւ ուշանան, դուք ձեր ծառայութիւնը շարունակեցէք։

◼ Երբ պարագաները ներեն, մէկ ժամէն աւելի ծառայեցէք։