Օգոստոս՝ ծառայութեան պատմական ամիս
Աշխարհի տարածքին նոր թերթիկ մը պիտի բաշխուի
1. Մինչ Թագաւորութեան 100–ամեակին կը մօտենանք, աշխարհի տարածքին ի՞նչ մասնայատուկ արշաւ մը տեղի պիտի ունենայ։
1 Աստուծոյ Թագաւորութեան 100–ամեակը կը մօտենայ։ Ի՜նչ յարմար է որ Եհովան պատուենք մասնայատուկ արշաւի մը միջոցաւ։ Օգոստոսին, աշխարհի տարածքին պիտի բաշխենք նոր թերթիկ մը, որուն խորագիրն է՝ Ո՞ւր կրնանք գտնել կեանքի կարեւոր հարցումներուն պատասխանները։ Այս թերթիկը ընթերցողները կը քաջալերէ, որ պատասխաններ առնելու համար Աստուածաշունչին դիմեն, եւ կը բացատրէ թէ jw.org կայքը ինչպէ՛ս կրնայ իրենց օգնել։
2. Ինչպէ՞ս կրնանք Եհովան փառաբանել՝ միանալով օգոստոսին տեղի ունենալիք «մեծաձայն աղաղակին»։
2 Փառաբանութեան մեծաձայն աղաղակ։ Որպէսզի հրատարակիչները կարենան իրենց ծառայութիւնը ընդարձակել, մասնայատուկ կարգադրութիւն մը եղած է բոլոր անոնց համար, որոնք կը փափաքին օգոստոսին օժանդակ ռահվիրայութեան մասնակցիլ։ Այդ ամսուան ընթացքին, մկրտուած հրատարակիչներուն առիթ պիտի տրուի օժանդակ ռահվիրայութիւն ընելու 30 ժամով։ Քանի որ օգոստոսը ունի 5 ուրբաթ, 5 շաբաթ եւ 5 կիրակի, շաբթուան ընթացքին աշխատող կամ դպրոց յաճախող հրատարակիչներէն շատեր պիտի կարենան օժանդակ ռահվիրայութեան մասնակցիլ։ Եթէ ունիս Աստուածաշունչի յառաջդիմող աշակերտ մը կամ զաւակ մը, որ կը փափաքի հրատարակիչ դառնալ, անմիջապէս երէցներու մարմինի համակարգողին հետ խօսէ։ Այսպիսիներ շա՜տ պիտի քաջալերուին, այս յատկանշական ամսուան ընթացքին մեզի հետ ուս–ուսի ծառայելով որպէս հրատարակիչներ։ Թէեւ բազմաթիւ կանոնաւոր ռահվիրաներ արձակուրդ կ’առնեն օգոստոսին,– իրենց տարեկան ժամերու պահանջը ապահովելէ ետք,– բայց թերեւս կարենան իրենց յայտագիրը ճշդել, որպէսզի այս մասնայատուկ արշաւին մէջ լիովին բաժին բերեն։ Հիմա է ժամանակը որ ընտանիքներ քննարկեն, թէ ինչպէ՛ս Եհովան պիտի փառաբանեն՝ միանալով օգոստոսին տեղի ունենալիք «մեծաձայն աղաղակ»ին (Եզր. 3։11. Առ. 15։22)։
3. Այս մասնայատուկ արշաւին նկատմամբ ի՞նչ կը յուսանք։
3 Թէեւ անցեալին համանման արշաւներու մասնակցած ենք, բայց կը յուսանք որ ասիկա պատմական պիտի ըլլայ։ Օգոստոս ամսուան ընթացքին, կարելի՞ է որ մեր ծառայութեան ժամերը, հրատարակիչներուն եւ օժանդակ ռահվիրաներուն թիւերը աննախընթաց կերպով բարձրանան։ Մինչ 2014–ի ծառայութեան տարին իր աւարտին կը հասնի, թող Եհովան օրհնէ իր ժողովուրդին աշխարհածաւալ ջանքերը, որոնք պիտի թափուին՝ օգոստոս ամիսը ցարդ վկայութեան մեծագոյն ամիսը դարձնելու համար (Մատ. 24։14)։