Անոնց Օգնենք Որ Գործի Լծուին Պատգամին Համաձայն
1 Մեր քարոզչական գործը մարդոց պատեհութիւն կու տայ որ ‘լսեն Յայտնութեան խօսքերը’։ (Յայտ. 1։3) Բայց որպէսզի անոնք «մեծ նեղութենէն» վերապրին, պէտք է անոնց համաձայն գործի լծուին։ (Յայտ. 7։14) Կեանքեր պարփակուած են։ Ուստի վստահ եղէք վերայցելելու բոլոր զանոնք որոնք այս ամիս ձեր գործածած ներկայացումներէն մէկուն հանդէպ սկզբնական հետաքրքրութիւն յայտնեցին։
2 Եթէ ի մտի ունիք «Յայտնութեան Յանգումը» գիրքը տեղաւորել, կրնաք ըսել.
◼ «Ուրախ ենք ձեզ կրկին տեսնելով։ Վերջին անգամ երբ խօսակցեցանք, Յայտնութեան գրքին մարգարէութիւններէն մէկուն մասին նիւթ ըրինք։ Այսօր ձեզի բերած եմ այն գիրքը որ զայն կը բացատրէ։ Թերեւս նկատեցիք որ թէեւ Յայտնութեան գիրքը խոր է, զանիկա կարելի է հասկնալ ներկայ դէպքերուն լոյսով, կիրարկելով սուրբ գրային կարգ մը հիմնական ճշմարտութիւններ։ Կը փափաքիմ մի քանի վայրկեան առնել աչքառու դարձնելու համար մի քանի բաներ զորս Աստուածաշունչը մեզի կ’ըսէ մեր ժամանակներուն մասին»։ Ապա բացէք առնչութիւն ունեցող գլուխը, տան սուրբ գրային ուսումնասիրութիւն մը սկսելու համար։
3 Կամ կրնաք ըսել.
◼ «Ուրախ եմ որ այսօր տունը կը գտնուիք։ Վերջերս խօսակցեցանք նշան մը կազմող դէպքերու մասին, որոնք տեղի պիտի ունենային աշխահրի վախճանէն ճիշդ առաջ։ [Վերաքաղ ըրէք նշանէն յարմար երեսակներ Մատթէոս 24։3-14–ին մէջ։] Նկատա՞ծ էք որեւէ դէպք որ տեղի ունեցած է վերջերս աշխարհի մէջ կամ մեր ընկերութեան մէջ որ կը խորհիք թէ կրնայ կատարում մը ըլլալ այդ նշանին մէկ մասին»։ Յայտնութեան Յանգումը գրքին 16–րդ գլուխի լուսաբանութիւնները գործածելով, մեկնեցէք Աստուածաշունչի այս կարգ մը մարգարէութիւններուն կատարումը։ Այցելութեան վերջաւորութեան, ջերմօրէն քաջալերեցէք որ անհատը օգտուի մարգարէութիւններուն լման նշանակութենէն։
4 Եթէ տանուտէրը հրաւիրած էք որ Յիշատակատօնին ներկայ ըլլայ, ըսէք.
◼ «Երբ վերջին անգամ ձեզ այցելեցի, խօսակցեցանք թէ որքա՜ն կարեւոր է Յիսուսի մահը մարդկութեան համար։ Նաեւ ձեզ հրաւիրեցի անոր մահուան Յիշատակատօնին ներկայ գտնուելու, որ Մարտ 26–ին պիտի տօնակատարուի Քրիստոնեաներու կողմէ համայն աշխարհի մէջ։ Այսօր եկած եմ ձեզ վերյիշեցնելու թէ հրաւիրուած էք այդ կարեւոր առիթին։ [Նշեցէք տօնակատարութեան ժամանակն ու վայրը։] Ա՛լ աւելի պիտի գնահատէք առիթին կարեւորութիւնը եթէ վերաքաղ ընենք կարգ մը օրհնութիւններ զորս հիմա կը վայելենք որպէս հետեւանք Յիսուսի ըրածին մարդկութեան համար, ինչպէս նաեւ գալիք օրհնութիւնները»։ Ապա ջանացէք նկատի առնել յարմար կէտեր ընթացիկ պարբերաթերթէ մը կամ Յայտնութեան Յանգումը գրքին 41–րդ գլուխէն։ Նաեւ կրնաք ցցուն ընել էջ 294, 299 եւ 308–ի վրայ եղած լուսաբանութիւնները։ Եթէ կարելի է, կարգադրեցէք հետաքրքրուող անհատին օգնել որ Յիշատակատօնին ներկայ ըլլայ։
5 Եթէ անհատը պարզապէս բարեհաճ ունկնդիր մըն էր, ասիկա կրնայ ազդեցիկ ըլլալ.
◼ «Շատ հաճելի էր մեր վերջին խօսակցութիւնը Աստուածաշունչին մասին։ Վերադարձայ քանի որ կը փափաքիմ վայելէք ինչ որ Աստուած խոստացած է անոնց համար որոնք կ’ուզեն իր մասին աւելի սորվիլ»։ Կարդացէք Յովհաննու 17։3, ապա ակնարկեցէք Խաղաղ Կեանք՝ Նոր Աշխարհի մը մէջ թերթիկին։
6 Թող ձեր սէրը կեանքի հանդէպ եւ գնահատանքը՝ փրկագինին, մղեն ձեզ հետաքրքրուող անհատները վերայցելելու։ Անոնց օգնեցէք որ գործի լծուին Յայտնութեան խայտալի պատգամին համաձայն։ Յիշեցէք, «ժամանակը մօտ է»։—Յայտ. 1։3