Ազդեցիկ Անպաշտօն Վկայութեան Միջոցաւ Հետաքրքրուող Անհատներ Գտնենք

¹ Յիսուս իր աշակերտներուն պատուիրեց որ փնտռեն Թագաւորութեան բարի լուրը լսելու արժանի եղողները։ (Մատթ. 10։11) Սակայն, շատ մը շրջաններու մէջ այսօր, երթալով աւելի դժուար կ’ըլլայ մարդոց հանդիպիլ իրենց տուներուն մէջ։ Ուստի, ի՞նչ կարելի է ընել արժանի եղողներուն հասնելու համար։

² Անպաշտօն վկայութիւնը կրնայ ազդեցիկ կերպ մը ըլլալ այն անհատները գտնելու որոնց չենք հանդիպած տունէ–տուն ծառայութեամբ։ Կրնանք անպաշտօն վկայութիւնը ընել հանրային պարտէզներու մէջ եւ ուրիշ վայրերու մէջ ուր մարդիկ իրենց առօրեայ գործառնութիւններով կը զբաղին։

³ Երբ անպաշտօն վկայութիւնը կը յիշուի, ոմանք կ’երկչոտին։ Անոնք թերեւս կը վարանին այդ գործին մասնակցելու քանի որ հակում ունին ամչկոտ ըլլալու կամ կ’ակնկալեն արհամարհօրէն մերժուիլ անոնց կողմէ որոնք Թագաւորութեան պատգամէն կը դժգոհին։ Այս մտահոգութիւնները սովորաբար հիմ չունին։ Այս գործունէութեան մէջ փորձառու եղողները կը տեղեկագրեն որ անիկա դռնէ–դուռի վկայութենէն աւելի դժուար չէ։ Իրականութեան մէջ, անոնք նկատած են որ մարդոց մեծամասնութիւնը վարժուած են որ ուրիշներ իրենց հետ խօսին այլազան պատճառներու համար, եւ ոմանք կրնան աւելի հակամէտ ըլլալ խօսակցելու կամ լսելու քան եթէ իրենց դուռը զարկած ըլլայինք։ Ուստի եթէ ‘համարձակութիւն ունենանք’, կրնանք հաճելի անակնկալներ վայելել։—Ա. Թես. 2։2

⁴ Անպաշտօն վկայութիւնը ինչպէ՞ս կարելի է ազդուօրէն ընել։ Լաւ պատրաստուիլը կարեւոր է։ Պարբերաթերթերը առաջուընէ կարդացէք եւ մէկ կամ երկու խօսակցական կէտեր ընտրեցէք որոնք կը զգաք որ պիտի հետաքրքրեն ձեր հանդիպած անհատները։ 30 երկվայրկեաննոց ներկայացում մը յարմար է։

⁵ Այն բանը որու իսկապէս պէտք ունինք նախաձեռնութիւն առնելն է անհատներու մօտենալու։ Փորձեցէք աչքի հաղորդակցութիւն հաստատել։ Ջերմ, բարեկամական եւ շեշտակի եղէք մինչ կը ջանաք խօսակցութիւն մը սկսիլ։ Կարգ մը պարագաներուն, թերեւս հարկ ըլլայ որ քիչ մը քալէք անհատին հետ մինչ կը խօսակցիք իր հետ։

⁶ Սովորաբար լաւագոյն բանն է պատրաստել կարճ ներկայացում մը որ հարցում մը կը յարուցանէ կամ արտայայտութիւն մը կ’ընէ որ հետաքրքրութիւն պիտի շարժէ։ Եթէ յարմար ընդառաջում կայ, փորձեցէք ստանալ անհատին անունը, հասցէն եւ նոյնիսկ իր հեռաձայնին թիւը, որպէսզի կարենաք հետաքրքրութիւնը հետապնդել։ Կրնաք ըսել. «Եթէ կը փափաքիք աւելի գիտնալ, ուրախ պիտի ըլլամ ձեզ այցելելով ձեր տունը կամ կարգադրելով որ ուրիշ Վկայ մը ձեզ այցելէ»։

⁷ Անպաշտօն վկայութեան միջամուխ եղած երէց մը կնոջ մը հետ խօսեցաւ եւ իմացաւ որ ան երբեք պատեհութիւն չէ ունեցած Վկաներուն հետ խօսակցելու իր տան մէջ։ Ան գիրք մը ընդունեց եւ յօժարեցաւ որ քոյր մը յարմար ժամանակի մը զինք այցելէ իր տան մէջ։ Վստահաբար կրնանք արժանի եղողներէն շատեր գտնել ու օժանդակել եթէ ազդեցիկ ենք անպաշտօն վկայութեան մէջ։—Գործք 17։17