Ժամանակայարմար Թագաւորութեան Լուրեր Որ Համայն Աշխարհի Մէջ Պիտի Բաշխուի
1 Կիրակի՝ Ապրիլ 23–ին, հանրային մասնաւոր դասախօսութիւն մը պիտի ներկայացուի սա գրաւիչ նիւթին մասին. «Սուտ Կրօնքին Վախճանը Մօտ Է»։ Այդ օրը ժողովին աւարտին, միտք գրգռող չորս էջնոց Թագաւորութեան Լուրեր լոյս պիտի տեսնէ։ Անոր բովանդակած Ժամանակայարմար պատգամը համայն աշխարհի մէջ պիտի բաշխուի երեք շաբթուայ ընթացքին՝ Ապրիլ 24–էն Մայիս 14։
2 Աշխարհի բոլոր մասերուն մէջ, մարդիկ շփոթած են։ Ուր որ ալ կ’ապրին, անոնք խնդիրներով ծանրաբեռնուած են։ Թագաւորութեան Լուրերը իսկապէս պիտի հետաքրքրէ զանոնք որոնք անկեղծօրէն մտահոգ են պատահածներուն նկատմամբ, քանի որ իրենց ուշադրութեան պիտի յանձնէ Աստուծոյ Խօսքը որպէս առաջնորդութեան անսխալական աղբիւրը մարդուն համար։ (Սաղմ. 119։105) Բոլորս ալ հաճոյքով կը սպասենք ստանալ Թագաւորութեան Լուրերը երբ Ապրիլ 23–ին լոյս տեսնէ։ Մինչ այդ, ընելիք շատ բան կայ որպէսզի պատրաստուինք այս երեք շաբթուայ ընդարձակ արշաւին համար։
3 Բոլորը Քաջալերենք որ Նախանձախնդրաբար Բաժին Բերեն. Ո՞վ կրնայ բաժին մը բերել այս գործին մէջ։ Վստահաբար ամէն անհատ որ արդէն հրատարակիչ մըն է մեծապէս պիտի փափաքի մասնակցիլ։ Ի՞նչ ըսել Աստուածաշունչի աշակերտներուն մասին որոնք ժողովքային հանդիպումներուն կանոնաւորաբար կը յաճախեն։ Ոմանք երկար ժամանակէ ի վեր մեզի հետ ընկերակցած են եւ հաստատօրէն կը յառաջդիմեն։ Եթէ իրենց կեանքը Սուրբ Գրային սկզբունքներուն հետ ներդաշնակ ըրած են, արդեօք որակելի՞ են Թագաւորութեան հրատարակողներ ըլլալու։ Աստուածաշունչի ուսումնասիրութիւնը վարող հրատարակիչը կրնայ հարցը նկատի առնել աշակերտին հետ, եւ եթէ աշակերտը կը փափաքի դաշտի ծառայութեան մասնակցիլ, երկու երէցներ անոր հետ վերաքաղ պիտի ընեն Մեր Ծառայութիւնը Կատարելու Համար Կազմակերպուած գրքին էջ 98 եւ 99–ի տեղեկութիւնները։ Ասիկա կարելի եղածին չափ շուտով պէտք է ընել, որպէսզի որակելի եղողները որպէս չմկրտուած հրատարակիչներ կարենան լման բաժին բերել արշաւին մէջ։ Կարելի է քաջալերել այն Աստուածաշունչի աշակերտները որոնք չմկրտուած հրատարակիչներ ըլլալու դեռ որակելի չեն, որ բաժնեն այս ժամանակայարմար Թագաւորութեան Լուրերը ծանօթներուն կամ ընտանիքի անդամներուն հետ։—Տես Դիտարան Մայիս 1, 1989–ի թիւը, էջ 26, պարբերութիւն 8։
4 Այս գործը դժուար չէ. ամէն անհատ կրնայ բաժին մը բերել։ Ծնողներ կրնան Թագաւորութեան Լուրերուն նկատմամբ փորձի նիստեր պարփակել իրենց Աստուածաշունչի շաբաթական ընտանեկան ուսումնասիրութեան մէջ, այնպէս որ ընտանիքի բոլոր անդամները լաւ պատրաստուած պիտի ըլլան զանիկա տունէ–տուն ներկայացնելու։ Պարզ ներկայացում մը սովորաբար լաւագոյն բանն է։ Հակիրճ բացումէ մը ետք, Թագաւորութեան Լուրերը տանտիրոջ ներկայացուցէք եւ քաջալերեցէք որ զանիկա կարդայ։ Նոթագրեցէք երբ տանտէրները հետաքրքրութիւն կը ցուցաբերեն, որպէսզի կարենաք վերադառնալ հետաքրքրութիւնը մշակելու համար։ (Ա. Կորն. 3։6, 7) Պարզ, լաւ պատրաստուած ներկայացում մը ունենալը յաջողութեան բանալին է։
5 ‘Ընելիք շատ բան կայ’ Ապրիլ եւ Մայիս ամիսներուն ընթացքին։ Մեր Թագաւորութեան Ծառայութիւն թերթիկին յաջորդ ամսուայ թիւին մէջ, յաւելեալ տեղեկութիւններ պիտի հայթայթուին յաւելուածականին մէջ, հետեւեալ խորագրով՝ «Աւելցէ՛ք Տէրոջը Գործին մէջ»։—Ա. Կորն. 15։58, ՆԱ