‘Առատաձեռն՝ եւ Ձեր Ունեցածով Ուրիշներուն Օգնելու Պատրաստ Եղէք’
1 Դարեր առաջ, Պօղոս առաքեալ հրահանգ տուաւ Տիմոթէոսի, որ քաջալերէ իր հաւատակիցները, որպէսզի «բարիք գործեն, լաւ գործերով հարստանան, եւ ըլլան առատաձեռն, սիրալիր եւ իրենց ունեցածով ուրիշներուն օգնելու պատրաստ»։ (Ա. Տիմ. 6։18, Անթիլիաս) Պօղոս նաեւ Եբրայեցի Քրիստոնեաներուն յիշեցուց որ չմոռնան «բարերարութիւնը ու կարօտեալներուն ողորմութիւնը»։ (Եբր. 13։16) Պօղոս ինչո՞ւ այս ցուցմունքները տուաւ։ Քանի որ ան գիտէր թէ «փառք ու պատիւ եւ խաղաղութիւն» պիտի ըլլար «բոլոր անոնց՝ որոնք բարիք կը գործեն»։—Հռովմ. 2։10, Անթիլիաս
2 Որպէս Ստեղծիչ, Եհովա Աստուած ամէն բանի Տէրն ու Տիրականն է։ (Յայտ. 4։10բ) Մենք անշուշտ կը գնահատենք մեզի ի նպաստ իր ըրած բաները։ Հակառակ շատերուն ունեցած ապերախտ կեցուածքին, Բարձրեալը կը շարունակէ բոլորին թոյլ տալ որ օգտուին կեանքի պահպանման համար իր ըրած առատաձեռն հայթայթումներէն։ (Մատթ. 5։45) Ան նոյնիսկ իր ամենէն սիրելի Որդին որպէս զոհ տուաւ, որպէսզի կարենանք յաւիտենական կեանք ունենալ։ Մեզի հանդէպ ցուցաբերուած այս սէրը, պէտք չէ՞ մղէ մեզ որ շնորհապարտ ըլլանք, մեր կարգին առատաձեռն ըլլալով մեր ընկեր արարածներուն հետ։—Բ. Կորն. 5։14, 15
3 Ի՞նչ Կրնանք Բաժնել. Պատշաճ է որ մեր ունեցած բոլոր արժէքաւոր ստացուածքները գործածենք Աստուծոյ աչքին հաճելի եղող կերպով մը։ Վստահաբար կ’ուզենք Թագաւորութեան համաշխարհային գործին նիւթական եւ հոգեւոր գետնի վրայ թիկունք կանգնիլ։ Անշուշտ, բարի լուրը մեր ունեցած ամենէն արժէքաւոր գանձն է, քանի որ անիկա «Աստուծոյ զօրութիւնն է . . . փրկութեան համար»։ (Հռովմ. 1։16) Ամէն ամիս քարոզչութեան եւ աշակերտելու գործին մասնակցելու համար, մեր ժամանակն ու ստացուածքը առատաձեռնօրէն գործածելով, կարող կ’ըլլանք այս հոգեւոր գանձը բաժնել ուրիշներու հետ, որպէսզի անոնք յաւիտենական կեանք ձեռք ձգեն։
4 Եհովա շատ կը հաճի երբ կարօտեալներուն կ’օգնենք։ Ան օրհնութիւններ կը խոստանայ, նաեւ մեզի կը յիշեցնէ որ «բարկութեան օրը հարստութիւնը օգուտ մը չ’ըներ, բայց արդարութիւնը մահուանէ կ’ազատէ»։ (Առ. 11։4. 19։17) Թագաւորութեան գործունէութեան նիւթապէս թիկունք կանգնիլը եւ բարի լուրի քարոզչութեան մէջ լիովին բաժին բերելը, հոյակապ կերպեր են ցոյց տալու համար թէ մենք առատաձեռն ենք եւ՝ օգնելու պատրաստ։