Պարբերաթերթերու կանոնաւոր տեղաւորումը օգտակար է՝ Աստուածաշունչի ուսումնասիրութիւններ սկսելու համար
1. Ինչո՞ւ Եհովայի կազմակերպութիւնը երկար ատենէ ի վեր հրատարակիչները քաջալերած է՝ որ կանոնաւորաբար պարբերաթերթեր տեղաւորեն։
1 Շատեր չեն ուզեր մեզի հետ Աստուածաշունչը սերտել, սակայն մեր պարբերաթերթերը հաճոյքով կը կարդան։ Ուստի Եհովայի կազմակերպութիւնը երկար ատենէ ի վեր հրատարակիչները քաջալերած է որ կանոնաւորաբար պարբերաթերթեր տեղաւորեն։ Երբ մարդիկ մեր պարբերաթերթերը կանոնաւորաբար կը կարդան, յաճախ Աստուծոյ խօսքին հանդէպ փափաք կը զարգացնեն (Ա. Պետ. 2։2)։ Ի վերջոյ, նիւթերէն մէկը կրնայ իրենց ուշադրութիւնը գրաւել, պատճառ դառնալով որ Աստուածաշունչի ուսումնասիրութիւն մը ընդունին։
2. Ինչպէ՞ս կրնանք կանոնաւորաբար պարբերաթերթ ստացողներուն հետաքրքրութիւնը մշակել։
2 Ճշմարտութեան սերմերը ‘ջրէ’։ Փոխանակ պարբերաթերթերը պարզապէս տեղաւորելու, տանտիրոջ հետ խօսակցութիւն մը սկսիր եւ փորձէ կապ հաստատել։ Այս բանը քեզի պիտի օգնէ որ գիտնաս իր պարագաները, հետաքրքրութիւնները եւ հաւատալիքները, ինչ որ քեզ կարող պիտի դարձնէ որ իմաստութեամբ խօսիս (Առ. 16։23)։ Իւրաքանչիւր այցելութեան համար պատրաստուէ՛։ Եթէ կարելի է, հակիրճ կերպով պարբերաթերթերուն մէջէն աչքառու դարձուր կէտ մը եւ անոր հետ առնչուող համար մը, իր սրտին մէջ գտնուող որեւէ ճշմարտութեան սերմ ջրելով (Ա. Կոր. 3։6)։ Գրի առ իւրաքանչիւր այցելութեան թուականը, տեղաւորուած պարբերաթերթերը, եւ քննարկուած նիւթերն ու համարները։
3. Որքա՞ն յաճախ պէտք է այցելենք անոնց, որոնց կանոնաւորաբար պարբերաթերթեր կը տեղաւորենք։
3 Որքա՞ն յաճախ պէտք է վերադառնաս։ Պէտք է ամիսը անգամ մը վերադառնաս, որպէսզի կանոնաւորաբար պարբերաթերթեր ստացողներուն բերես վերջին թիւերը։ Սակայն, պարագաներդ ու անհատին հետաքրքրութիւնը նկատի առնելով, թերեւս որոշես աւելի յաճախ այցելել։ Օրինակ, պարբերաթերթերը տեղաւորելէն մէկ կամ երկու շաբաթ անց, կրնաս վերադառնալ եւ ըսել. «Ուզեցի վայրկեան մը հանդիպիլ, որ ձեզի տուած պարբերաթերթերէս կէտ մը ցոյց տամ»։ Ասիկա անհատին ախորժակը պիտի սրէ որ որոշ յօդուած մը կարդայ։ Եթէ ան արդէն զայն կարդացած է, կրնաս հարցնել թէ յօդուածը ինչպէ՛ս գտաւ եւ զայն հակիրճ կերպով քննարկել։ Կամ եթէ անհատը մեր հրատարակութիւնները կարդալը հաճելի կը գտնէ, կրնաս վերադառնալ իրեն առաջարկելով այդ ամսուան մէջ ներկայացուելիք թերթիկը, գրքոյկը, կամ գիրքը։
4. Ատեն–ատեն ի՞նչ կրնանք ընել գիտնալու համար, թէ կանոնաւորաբար պարբերաթերթեր ստացողները կ’ուզե՛ն Աստուածաշունչը սերտել կամ ոչ։
4 Մի՛ սպասեր որ տանտէրը քեզմէ խնդրէ որ իրեն հետ ուսումնասիրես։ Նախաձեռնութիւնը դուն առ։ Նոյնիսկ եթէ անցեալին ան մերժած է Աստուածաշունչը սերտել, կրնաս իրեն ատեն–ատեն Դիտարան–ի «Աստուածաշունչին պատասխանները» յօդուածը ներկայացնել եւ տեսնել եթէ ան կը փափաքի զայն քննարկել։ Թերեւս կարենաս դրան առջեւ ուսումնասիրութիւն մը սկսիլ։ Իսկ եթէ չկրցար այդ մէկը ընել, կրնաս շարունակել իրեն պարբերաթերթերը բերել, հետաքրքրութիւնը մշակելու համար։