Kụnye n’Ime Ndị Ọzọ Olileanya nke Ndụ Ebighị Ebi
1 Ọ bụ ezie na mmadụ achọwo ụzọ isi kwụsịlata usoro ịka nká na ime ka oge ndụ ya ka ogologo, ịka nká na ọnwụ ka bụ ihe ndị a na-apụghị izere ezere. Lee ka anyị si nwee ekele na Bible na-akọwa ihe mere ụmụ mmadụ ji na-aka nká, na-anwụkwa anwụ, tinyere otú a ga-esi mezie ihe nile ịka nká kpatara, wepụkwa ọnwụ. A kọwara eziokwu ndị a n’ụzọ na-eju afọ n’akwụkwọ bụ́ Ihe Ọmụma nke Na-eduba ná Ndụ Ebighị Ebi. Akwụkwọ ahụ na-aza ajụjụ ndị na-agbagwoju anya metụtara ọnwụ na ndụ, na-adọrọ uche onye na-agụ ya gaa n’oge a ga-eweghachite Paradaịs.
2 Na March anyị ga-enyefe akwụkwọ Ihe Ọmụma ahụ ná nzube nke ịmalite ọmụmụ Bible ebe obibi. (Mat. 28:19, 20) Mgbe ahụ anyị ga-eme nletaghachi na nke ndị nile gosiri mmasị n’ozi Alaeze ahụ. N’ụzọ dị otú a anyị pụrụ ịkụnye n’ime ndị ọzọ olileanya nke ndụ ebighị ebi. (Taịtọs 1:2) Iji mezuo nke a, ị pụrụ ịhụ na aro ndị na-esonụ na-enye aka.
3 Mgbe ị na-eme nleta mbụ, ị pụrụ ịjụ ajụjụ a:
◼ “Ọ̀ dịwo mgbe i chere banyere ihe kpatara ụmụ mmadụ ji achọ ịdị ndụ ka ogologo? [Nye ohere maka nzaghachi.] Ndị Buddha, ndị Kraịst, ndị Hindu, ndị Alakụba, na ndị ọzọ, ha nile nwere olileanya ịdị ndụ mgbe a nwụsịrị.” Sapeta akwụkwọ Ihe Ọmụma n’isi nke 6, “N’ihi Gịnị Ka Anyị Ji Aka Nká, Na-anwụkwa Anwụ?,” ma gụọ paragraf nke 3. Tụgharịa uche n’akụkụ akwụkwọ nsọ ndị e zoro aka na ha. N’ịtụ aka n’ajụjụ abụọ dị ná ngwụsị nke paragraf ahụ, jụọ onye nwe ụlọ ma ọ̀ ga-achọ ịhụ azịza ndị ahụ n’onwe ya. Ọ bụrụ na ọ chọrọ nke ahụ, gaa n’ihu n’ịtụle paragraf ole na ole sonụ. Ọ bụ ọmụmụ ihe ka a na-amalite ihe ahụ! Ma ọ bụghị ya, tụọ aro ka ị hapụrụ ya akwụkwọ ahụ n’ụtụ e ji enye ya ka ọ gụọ, meekwa ndokwa ịgaghachi, ọ ka mma ka ọ bụrụ otu ụbọchị ma ọ bụ abụọ mgbe ọ gasịrị, iji tụlee azịza ndị ahụ.
4 Mgbe ị na-esochi ntinye nke akwụkwọ “Ihe Ọmụma,” ị pụrụ ịsị:
◼ “Abịaghachiwo m ịtụle ajụjụ abụọ ahụ anyị na-azaghị banyere ọnwụ.” Chetara onye nwe ụlọ ajụjụ ndị ahụ. Mgbe ahụ tụlee ihe ọmụma dị n’isi nke 6 n’okpuru isiokwu nta bụ́ “Nkata Arụrụala.” Dabere n’ọnọdụ e nwere, gaa n’ihụ n’ọmụmụ ihe ahụ ma ọ bụ jiri ajụjụ ikpeazụ dị ná ngwụsị paragraf nke 7 tọọ ntọala maka nnọkọ ọzọ. Mee ndokwa doro anya ịgaghachi. Nye onye nwe ụlọ otu mpempe akwụkwọ, kọwaakwa ná mkpirikpi otú e si enwe nzukọ ọgbakọ. Kpọọ ya òkù n’ụzọ na-ekpo ọkụ ịbịa.
5 N’ọrụ ụlọ n’ụlọ ma ọ bụ n’ịgba àmà mberede, ị pụrụ ịmalite mkparịta ụka site n’ikwu, sị:
◼ “Ọ̀ dịwo mgbe i chere banyere ihe ọdịnihu nwere maka anyị na maka ụwa? [Nye ohere maka nzaghachi.] Bible chịkọtara ọdịnihu n’otu okwu—Paradaịs! Ọ na-akọwa na ná mmalite, Chineke mere otu akụkụ nke ụwa ka ọ ghọọ paradaịs mara mma bụ́ ebe o tinyere di na nwunye ahụ bụ́ mmadụ ndị o keworo. Ha gaje ịmụjupụta ụwa dum, jiri nwayọọ nwayọọ na-eme ka ọ ghọọ paradaịs. Lee nkọwa a nke ihe ọ na-aghaghị iyiwo.” Sapeta akwụkwọ Ihe Ọmụma na peji nke 8, ma gụọ paragraf nke 9, n’okpuru isiokwu nta bụ́ “Ndụ n’Ime Paradaịs.” Mgbe ahụ tụlee isi ihe ndị dị na paragraf nke 10, ma gụọ akụkụ akwụkwọ nsọ e zoro aka na ya, Aịsaịa 55:10, 11. Tụọ aro ka ị gaa n’ihu ná mkparịta ụka ahụ nke ihe ndụ ga-adị ka ya na Paradaịs ahụ e weghachiri ma tụlezukọta paragraf nke 11-16. Ma ọ bụ gbaa onye ahụ ume ka ọ gụọ ya n’onwe ya, meekwa ndokwa izute ọzọ iji tụlee ya.
6 Ọ bụrụ na a maliteghị ọmụmụ ihe na mbụ, ị pụrụ ịgbalị ime nke ahụ ná nletaghachi site n’ịsị:
◼ “Dị ka anyị tụlere ná mkparịta ụka ikpeazụ anyị, ọ bụ nzube Chineke ka e mee ka ụwa dum ghọọ paradaịs. Nke a na-ewelite ajụjụ bụ́, Olee ihe Paradaịs ga-adị ka ya?” Sapeta akwụkwọ Ihe Ọmụma n’isi nke 1, ma mụọ paragraf nke 11-16, n’okpuru isiokwu nta bụ́ “Ndụ n’Ime Paradaịs ahụ E Weghachiri.” Nke ahụ gasịa gosi ihe osise ahụ dị na peji nke 4-5, ma jụọ onye ahụ ma ọ ga-achọ ibi na gburugburu ebe mara mma dị otú ahụ. Mgbe ahụ gụpụta ahịrịokwu mbụ dị na paragraf nke 17 na peji nke 10. Dabere n’ọnọdụ e nwere, gaa n’ihu n’ọmụmụ ihe ahụ ma ọ bụ kwuo na ná nleta gị ọzọ na ị ga-akọwa ihe a chọrọ n’aka mmadụ iji biri na Paradaịs ahụ e weghachiri. Nyefee otu mpempe akwụkwọ, kọwaa ndokwa maka nzukọ, kpọọkwa onye ahụ òkù n’ụzọ na-ekpo ọkụ ịbịa n’Ụlọ Nzukọ Alaeze.
7 Akwụkwọ Ihe Ọmụma bụ ngwá ọrụ magburu onwe ya iji kpugheere ndị ọzọ “ndụ ebighị ebi” nke Chineke kwere ná nkwa. Gị iduziri ndị ọzọ ọmụmụ Bible pụrụ ịkụnye n’ime ha olileanya a dị ebube nke sitere n’aka Chineke “Onye na-apụghị ikwu okwu ụgha.”