Ànyị Ga-eme Ya Ọzọ?—Òkù Ọzọ Maka Ndị Ọsụ Ụzọ Inyeaka
1 Ànyị ga-eme gịnị ọzọ? Ànyị ga-asụ ụzọ inyeaka n’oge Ememe Ncheta? Ihe ntinye Ozi Alaeze Anyị nke February 1997 ji isiokwu gbara okpotokpo bụ́: “A Chọrọ—Ndị Ọsụ Ụzọ Inyeaka 30,000” dọrọ uche anyị. Obi siri anyị ike na unu ga-eji òkù ahụ kpọrọ mkpa. Mgbe a chịkọtara akụkọ ozi March 1997, ọ bụ ezie na anyị apụghị iru ihe mgbaru ọsọ ahụ nke 30,000, obi dị anyị ụtọ ịmata na 19,218 debanyere aha n’ije ozi ọsụ ụzọ inyeaka! Ọ bụrụ na anyị agbakọnye n’ọnụ ọgụgụ ahụ ndị ọsụ ụzọ oge nile dị 19,295 na ndị ọsụ ụzọ pụrụ iche dị 398 bụ́ ndị nyere akụkọ ozi n’ọnwa ahụ, anyị na-achọpụta na ihe fọrọ nke nta ka ọ bụrụ pasent 20 nke ndị nkwusa nile nọ n’ozi ọsụ ụzọ.
2 Anyị ji obi ụtọ na-aja ndị nile tinyekwuru mgbalị ahụ iji mụbaa ije ozi ubi ha n’afọ gara aga mma. N’ụzọ doro anya, ịhụnanya achọghị ọdịmma onwe onye nanị maka Jehova Chineke na maka ndị agbata obi unu kpaliri unu nile. (Luk 10:27; 2 Pita 1:5-8) Ndị nkwusa nọ n’ọnọdụ dị iche iche ná ndụ mere ohere maka ịsụ ụzọ inyeaka. N’otu ọgbakọ, ndị nkwusa 51 sụkọrọ ụzọ ọnụ n’otu ọnwa, gụnyere ihe ka ukwuu ná ndị okenye, otu nne nwere nwa nwanyị dị ọnwa 15, otu nwanna nwanyị hapụrụ ọrụ ya ma chọta ọrụ nwa oge iji mee ka o nwee ike ịsụ ụzọ, na otu nwanna nwanyị meworo agadi onye na-asụtụbeghị ụzọ mbụ. Onye nlekọta sekit dere, sị: “A na-etinye mgbalị dị egwu n’ọrụ nkwusa. . . . Ọ bụghị nanị na nke a na-enwe mmetụta n’ókèala kama ọgbakọ nile jupụtara n’ịnụ ọkụ n’obi. Ọ na-atọ ụmụnna ụtọ ịmata ibe ha nke ọma karị nakwa ịhụ ihe ọma ndị ozi ahụ na-arụpụta.”
3 A hapụghị ndị na-eto eto n’afọ gara aga. Otu onye nkwusa a na-emebeghị baptism dị afọ 13 anọwo na-atụ anya oge ọ pụrụ igosipụta nrara ọ raara onwe ya nye Jehova. Ka e mesịrị ya baptism na February, o dere banyere ọchịchọ ya ịsụ ụzọ inyeaka na March, sị: “N’enweghị ihe ga-ejighachi m azụ ugbu a, etinyere m akwụkwọ m ozugbo. . . . Ọtụtụ ahụmahụ magburu onwe ha anyị nwetara agaraghị ekwe nnweta ma e wezụga òkù ịhụnanya unu kpọrọ ịsụ ụzọ. Ana m ekele Jehova maka inwe ihe ùgwù nke iso ná ndị zara.” O setịpụwo ihe mgbaru ọsọ ime ya ọzọ.
4 Ikekwe i so n’ime mmadụ 19,218 so rụọ ọrụ ọsụ ụzọ inyeaka na March gara aga, ma ọ bụ 18,662 n’April, ma ọ bụ 13,434 na May. Ị̀ ga-eme ya ọzọ n’afọ a? Ọ bụrụ na i nweghị ike ịsụ ụzọ n’afọ gara aga, ị̀ pụrụ ime ya n’afọ a? Ànyị pụrụ ịgafe 22,199, bụ́ ọnụ ọgụgụ ndị sụrụ ụzọ inyeaka n’April 1990 na ma eleghị anya ruo ihe mgbaru ọsọ nke 30,000 n’afọ a? Ọnụ ọgụgụ nke 1990 bụ ọnụ ọgụgụ kasịnụ nke ndị ọsụ ụzọ inyeaka n’ime otu ọnwa ọ bụla na Nigeria.
5 Tụkwasị Uche n’April na May: N’afọ a, Ememe Ncheta dabara na Saturday, April 11, na-eme April ọnwa magburu onwe ya maka ọrụ ka ukwuu n’ozi. (2 Kọr. 5:14, 15) N’ime ụbọchị 11 mbụ nke ọnwa ahụ, anyị ga-etinye uche n’ịkpọ ọtụtụ ndị nwere mmasị dị ka o kwere omume òkù ịbịa Ememe Ncheta. Ọ bụrụ na ị na-eme atụmatụ ịsụ ụzọ inyeaka, biko tinye nnọọ akwụkwọ gị n’oge tupu ụbọchị ị chọrọ ịmalite.—1 Kọr. 14:40.
6 Ebe May nwere ngwụsị izu ise zuru ezu, ọ pụrụ ịkara ndị nkwusa na-aga akwụkwọ ma ọ bụ ndị na-arụ ọrụ ego oge nile mfe ịsụ ụzọ inyeaka n’ọnwa ahụ. Site n’ịhazi hour iri n’ozi ubi na nke ọ bụla ná ngwụsị izu ise ndị ahụ, ọ ga-adị gị mkpa ime nhazi maka nanị hour iri ọzọ n’ọnwa ahụ iji ruo hour 60 a chọrọ.
7 N’ime ma April ma May, anyị ga na-eche ụtụ Ụlọ Nche na Teta! n’ihu mmadụ dị ka akwụkwọ a na-enyefe. Nke a kwesịrị ịgba ọbụna ọtụtụ n’ime anyị karị ume iru eru ịsụ ụzọ. N’ihi gịnị ka anyị ji ekwu nke ahụ? Magazin ndị ahụ na-adị mfe iche n’ihu mmadụ, ha na-atọkwa ụtọ iji rụọ ọrụ n’ozi. Ha na-adaba n’akụkụ nile nke ije ozi—ọrụ ụlọ n’ụlọ na ụlọ ahịa ruo n’ụlọ ahịa, nakwa mgbe anyị na-ejekwuru ndị mmadụ n’okporo ámá, n’ebe ndọba ụgbọala, na n’ogige ntụrụndụ na n’ọnọdụ ndị ọzọ a na-akwadoghị akwado. Nke kasị mkpa, Ụlọ Nche na Teta! na-akpọsa eziokwu Alaeze. Ha na-adọrọ uche gaa ná mmezu nke amụma Bible, na-anwapụta na Alaeze Chineke na-achị achị. Ha na-emetụtakwa ndụ ndị na-agụ ha site n’ikwu banyere ihe ndị bụ mkpa ụmụ mmadụ n’ezie. Ọ bụrụ na anyị echee banyere otú akwụkwọ ndị a dị oké ọnụ ahịa siworo metụta ndụ anyị, a ga-akwali anyị ikere òkè n’ikesa ha n’ụzọ kasị saa mbara a pụrụ ikesa ha n’April na May na ịgba ọtụtụ ndị dị ka o kwere omume ume ịtụ ụtụ.
8 Ná nkwadebe maka ọrụ magazin a e mesiwanyere ike, ị ga-erite uru site n’ịtụleghachi isiokwu ndị a: “Ụlọ Nche na Teta!—Akwụkwọ Eziokwu Ndị Na-abịa n’Oge Ha” (Ụlọ Nche, January 1, 1994), “Jiri Magazin Anyị Mee Ihe n’Ụzọ Kasị Mma” (Ozi Alaeze Anyị nke March 1996), na “Kwadebe Ụzọ Iche Magazin n’Ihu Mmadụ nke Gị” (Ozi Alaeze Anyị nke October 1996).
9 Ndị Okenye Butenụ Ụzọ: Iji hụ maka ọtụtụ ndị nkwusa na-asụ ụzọ n’afọ gara aga, ndị okenye nọ n’otu ọgbakọ kwalitere otu Saturday n’ọnwa ahụ dị ka ụbọchị ije ozi pụrụ iche maka ọgbakọ dum. E mere ndokwa izukọ n’ọtụtụ oge dị iche iche n’ime ụbọchị ahụ, na-enye ọgbakọ ahụ dum ohere ikere òkè n’ụdị dị iche iche nke ịgba àmà. Ndị a gụnyere ịrụ ọrụ n’ógbè achụmnta ego, ịgba àmà n’okporo ámá, ịga site n’ụlọ ruo n’ụlọ, na ime nletaghachi. Nzaghachi e nwetara dị ịrịba ama, na-enwe ndị nkwusa 117 keere òkè n’ije ozi ubi n’ime ụbọchị ahụ. Ha gbakọtara hour 521 e tinyere n’ozi na magazin, broshuọ, na akwụkwọ 617 e tinyere! Mkpali e nwere na Saturday ahụ gafeere Sunday, na-enwe ọnụ ọgụgụ fọrọ nke nta ka o ruo ihe a na-enwetụbeghị nke ndị bịara Nzukọ Ihu Ọha na Ọmụmụ Ihe Ụlọ Nche.
10 Ná Nzukọ Ije Ozi nke ọ bụla n’April na May, e kwesịrị ichetara ọgbakọ mgbe na ebe a ga-enwe nzukọ maka ije ozi ubi n’ime izu na-esonụ, karịsịa ma ọ bụrụ na e mere ndokwa ndị ọzọ e wezụga ndị a na-ahazibu. A na-agba ndị ọsụ ụzọ oge nile nakwa ndị nkwusa na-abụghị ndị ọsụ ụzọ inyeaka ume ịkwado ndokwa ìgwè ndị a dị ka ọnọdụ ha nyere ohere ya.
11 Ọ ga-adị onye nlekọta ije ozi mkpa iso nwanna na-ekenye ókèala nọkọọ iji mee ndokwa maka ịrụ ọrụ ná ndị a na-adịghị arụzukarị. A pụrụ ilekwasịkwu anya n’ebe ndị na-anọghị n’ụlọ nọ na n’ịgba àmà n’okporo ámá na site n’ụlọ ahịa ruo n’ụlọ ahịa. A pụrụ imesi ịgba àmà uhuruchi ike n’April. E kwesịrị ịtụ ọda magazin zuru ezu maka ma April ma May n’ịtụ anya ọrụ ahụ ka ukwuu.
12 Ọtụtụ Ndị Nkwusa Pụrụ Iru Eru: Ahịrịokwu mbụ n’akwụkwọ ndejupụta ọsụ ụzọ inyeaka na-agụ, sị: “N’ihi ịhụnanya m maka Jehova na ọchịchọ m inyere ndị ọzọ aka ịmụta banyere ya na nzube ịhụnanya ya, m ga-achọ ịmụba òkè m n’ije ozi ubi site n’idebanye aha dị ka ọsụ ụzọ inyeaka.” Ịhụ Jehova n’anya na ịchọ inyere ndị ọzọ aka n’ụzọ ime mmụọ dị oké mkpa ná nraranye anyị. (1 Tim. 4:8, 10) Iji ruo eru maka ịsụ ụzọ inyeaka, mmadụ aghaghị ịbụ onye e mere baptism, nwee omume ọma, nọrọkwa n’ọnọdụ itinye hour 60 n’ozi n’ime ọnwa ahụ. Ka anyị nile na-atụle ọnọdụ anyị, ụfọdụ n’ime anyị na-asụtụbeghị ụzọ mbụ hà pụrụ ime otú ahụ n’afọ a n’April ma ọ bụ May?
13 Ọtụtụ ndị n’ọgbakọ pụrụ ịchọpụta na ha onwe ha kwa pụrụ ịsụ ụzọ mgbe ha hụrụ ka ndị ọzọ na-edebanye aha bụ́ ndị nwere ọnọdụ yiri nke ha. Ụmụ akwụkwọ, ndị agadi, ndị na-arụ ọrụ ego oge nile, tinyere ndị okenye na ndị ohu na-eje ozi, na ndị ọzọ enwewo ihe ịga nke ọma n’ịsụ ụzọ inyeaka. Otu odozi akụ̀ na nne nke ụmụ abụọ bụ́ onye nwere ọrụ oge nile rụtazuru hour 60, tinye magazin 108, ma malite ọmụmụ Bible 3 n’ime otu ọnwa nke ịsụ ụzọ inyeaka. Ò si aṅaa mee ya? O jiri oge nri ehihie ya n’ụlọ ọrụ gbaa àmà n’ókèala dị nso, ọ gbara àmà site n’ide akwụkwọ ozi, o kerekwaara òkè n’ịgba àmà n’ebe ndọba ụgbọala na n’okporo ámá. O jikwara ụbọchị ọ na-adịghị aga ọrụ kwa izu mee ihe nke ọma site n’iso ọgbakọ kere òkè n’ije ozi ubi. Ọ bụ ezie na o chere na mbụ na ịsụ ụzọ inyeaka bụ ihe mgbaru ọsọ a na-apụghị iru eru, site n’agbamume sitere n’aka ndị ọzọ na usoro ihe omume dị irè, o meriri ihe mgbochi ndị ahụ.
14 Jisọs mesiri ndị na-eso ụzọ ya obi ike, sị: “Yoke nke m adịghị egbu mgbu, ibu m dịkwa mfe.” (Mat. 11:30) Nke ahụ bụ ihe a kpọrọ otu isiokwu na-agba ume nke dị n’Ụlọ Nche, August 15, 1995. Ọ na-ekwu banyere otu nwanna nwanyị nwere ọrụ ego oge nile, nke na-achọ oké ihe. Ò chere na ịsụ ụzọ inyeaka adịghịrị ya? Ee e. N’ezie, o nwere ike ịrụ ọrụ ọsụ ụzọ inyeaka kwa ọnwa. N’ihi gịnị? N’ihi na o chere na ịsụ ụzọ na-enyere ya aka n’ezie ịkwụsi ike. Inyere ndị mmadụ aka ka ha na-amụta eziokwu Bible na ịhụ ka ha na-eme mgbanwe ná ndụ ha iji nweta nnwapụta Chineke bụ isi iyi kasịnụ nke ọṅụ ná ndụ ya jupụtara n’ihe omume.—Ilu 10:22.
15 Ngọzi ndị a na-enweta na-akwụ nnọọ ụgwọ maka ịchụ àjà na ndozigharị ihe nile ọ bụla ọ dị mmadụ mkpa ime n’onwe ya iji sụọ ụzọ. Otu nwanna nwanyị dere banyere ahụmahụ ya n’ịsụ ụzọ inyeaka, sị: “O nyeere m aka iwepụ uche m n’onwe m na ilekwasịkwu anya n’inyere ndị ọzọ aka. . . . M na-atụ aro ya maka ndị nwere ike ime ya.”
16 Ọ Na-ewe Usoro Ihe Omume Dị Mma: Na peji ikpeazụ nke ihe ntinye a, anyị ebipụtaghachiwo usoro ihe omume ihe atụ pụtara n’Ozi Alaeze Anyị nke February 1997. Ikekwe otu n’ime ndị a kwekọrọ n’ọnọdụ gị. Ka ị na-atụleghachi ha, chee echiche banyere usoro ihe omume ị na-enwekarị kwa ọnwa. Olee ọrụ ndị e nwere gburugburu ụlọ gị bụ́ ndị a pụrụ ịrụ tupu ịsụ ụzọ gị ma ọ bụ ndị a pụrụ ịhapụgodị ruo mgbe ọ gasịrị? Ị̀ pụrụ iwepụ oge ụfọdụ ị na-etinye n’egwuregwu, ntụrụndụ, ma ọ bụ n’ụdị ihe ntụsara ahụ ndị ọzọ? Kama ilekwasị anya na hour 60 dum ahụ a chọrọ, hazie usoro ihe omume gị n’ọnọdụ nke kwa ụbọchị ma ọ bụ kwa izu. Nanị hour 2 kwa ụbọchị ma ọ bụ hour 15 kwa izu dị mkpa iji sụọ ụzọ inyeaka. Lee usoro ihe omume ihe atụ ndị ahụ, n’ijikwa pensịl n’aka, chọpụta ihe ị pụrụ ịhazi dị ka usoro ihe omume onwe onye maka ije ozi bụ́ nke ga-ekwesịkarị ekwesị nye gị na ezinụlọ gị.
17 Nzaghachi ọma na nkwado ọgbakọ gosikwuru n’ozi ahụ n’afọ gara aga mụbara ịnụ ọkụ n’obi nke otu ọsụ ụzọ oge nile bụ́ onye dere, sị: “Ekele dịrị unu maka agbamume ịhụnanya unu nke itinyekwu mgbalị iji kwadoo ịsụ ụzọ inyeaka. . . . Usoro ihe omume unu tụrụ aro ha nyeere ọtụtụ ndị na-asụtụbeghị ụzọ mbụ aka ịhụ na ha pụrụ ime ya. . . . Obi dị m ụtọ nke ukwuu ịbụ akụkụ nke nzukọ Jehova na ịgbaso nduzi ịhụnanya, nke obi ụtọ, nke ohu ahụ kwesịrị ka a tụkwasị ya obi, nke nwekwara uche.”
18 Ilu 21:5 na-emesi anyị obi ike, sị: “Echiche nile nke onye dị nkọ na-eduba nanị n’uru.” Ilu 16:3 na-agba anyị ume, sị: “Tụrụ ọrụ gị nile ruo Jehova ahụ, echiche gị nile ewee guzosie ike.” Ee, site n’iji ekpere webata Jehova ná mkpebi anyị na ịdaberesi ike n’ebe ọ nọ inyere anyị aka inwe ihe ịga nke ọma, anyị pụrụ inwe echiche ziri ezi banyere atụmatụ anyị ịsụ ụzọ inyeaka. Ọ pụrụ ịbụ na mgbe anyị hụsịrị otú usoro ihe omume anyị si dị irè n’otu ọnwa ma ọ bụ abụọ nke ịsụ ụzọ inyeaka, anyị ga-enwe ike ịkanye akara n’igbe dị n’akwụkwọ ndejupụta ọsụ ụzọ inyeaka nke na-agụ, sị: “Kanye akara n’ebe a ma ọ bụrụ na ị chọrọ ịnọgide na-eje ozi dị ka ọsụ ụzọ inyeaka ruo mgbe i nyere ozi ọzọ.” Ka o sina dị, anyị pụrụ ịtụ anya ịsụ ụzọ inyeaka ọzọ n’August, mgbe a ga-enwe ngwụsị izu ise zuru ezu. Ka anyị na-emechi afọ ije ozi a n’August, a ga-eme mgbalị siri ike ka onye ọ bụla kerezuo òkè otú o kwere omume n’ozi.
19 Jisọs buru amụma, sị: “Onye na-ekwere na Mụ, ọrụ Mụ onwe na-arụ ka onye ahụ ga-arụkwa; ọrụ ka ndị a ukwuu ka ọ ga-arụkwa.” (Jọn 14:12) Ọ bụ ihe ùgwù anyị na-enye ọṅụ ije ozi dị ka ndị ha na Chineke na-arụkọ ọrụ mgbe amụma a na-enwe mmezu ya dị ebube. Ugbu a bụ oge ikwusa ozi ọma ahụ n’ụzọ kasị ukwuu karịa mgbe ọ bụla ọzọ, na-azụchapụta oge ịrụ ọrụ a. (1 Kọr. 3:9; Kọl. 4:5) Ikere òkè ọtụtụ mgbe dị ka o kwere omume n’ije ozi ọsụ ụzọ inyeaka bụ ụzọ magburu onwe ya isi mee òkè anyị dị ka ndị mkpọsa Alaeze. Anyị ji oké mmasị na-ele anya ịhụ otú abụ otuto ahụ ga-adaru ụda n’oge Ememe Ncheta a site n’ọnụ ndị ọsụ ụzọ inyeaka. (Abụ Ọma 27:6) N’ịtụgharị uche banyere ihe a rụpụtara n’afọ gara aga, anyị na-ajụ sị, ‘Ànyị ga-eme ya n’afọ a?’ Obi siri anyị ike na anyị ga-eme ya!
[Igbe dị na peeji nke 3]
Ị̀ Pụrụ Ịsụ Ụzọ Inyeaka?
“N’agbanyeghị ọnọdụ gị ná ndụ, ọ bụrụ na i mewo baptism, nweekwa omume dị mma, nweekwa ike idokwa maka iru ihe a na-achọ n’aka mmadụ nke itinye 60 hour n’otu ọnwa n’ozi ubi, kwerekwa na ị pụrụ ije ozi otu ọnwa ma ọ bụ karịa dị ka ọsụ ụzọ inyeaka, ndị okenye ọgbakọ ga-enwe obi ụtọ ịtụle akwụkwọ i tinyere maka ihe ùgwù ije ozi nke a.”—Nhazi E Mere Iji Jezuo Ozi Anyị, peji nke 114.
[Igbe dị na peeji nke 6]
Usoro Ihe Omume Ọsụ Ụzọ Inyeaka
Ụzọ Ihe Atụ Isi Hazie Hour 15 nke Ozi Ubi Kwa Izu
Ụtụtụ—Monday ruo Saturday
A pụrụ iji Sunday dochie ụbọchị ọ bụla
Ụbọchị Oge Hour
Monday Ụtụtụ 2 1⁄2
Tuesday Ụtụtụ 2 1⁄2
Wednesday Ụtụtụ 2 1⁄2
Thursday Ụtụtụ 2 1⁄2
Friday Ụtụtụ 2 1⁄2
Saturday Ụtụtụ 2 1⁄2
Ngụkọta Hour: 15
Ụbọchị Abụọ Zuru Ezu
A pụrụ ịhọrọ ụbọchị abụọ ọ bụla n’ime izu
Ụbọchị Oge Hour
Wednesday Ụbọchị Dum 7 1⁄2
Saturday Ụbọchị Dum 7 1⁄2
Ngụkọta Hour: 15
Uhuruchi Abụọ na Ngwụsị Izu
A pụrụ ịhọrọ uhuruchi abụọ ọ bụla n’ime izu
Ụbọchị Oge Hour
Monday Uhuruchi 1 1⁄2
Wednesday Uhuruchi 1 1⁄2
Saturday Ụbọchị Dum 8
Sunday Ọkara Ụbọchị 4
Ngụkọta Hour: 15
Ehihie n’Ime Izu na Saturday
A pụrụ iji Sunday dochie ụbọchị ọ bụla
Ụbọchị Oge Hour
Monday Ehihie 2
Tuesday Ehihie 2
Wednesday Ehihie 2
Thursday Ehihie 2
Friday Ehihie 2
Saturday Ụbọchị Dum 5
Ngụkọta Hour: 15
Usoro Ije Ozi Onwe M
Kpebie hour ole maka oge ọ bụla
Ụbọchị Oge Hour
Monday
Tuesday
Wednesday
Thursday
Friday
Saturday
Sunday
Ngụkọta Hour: 15