Usoro Ihe Omume Ọhụrụ Maka Mgbakọ Sekit

“Debe Ihe Nile Chineke Nyere n’Iwu, Wee Dị Ndụ” bụ isiokwu nke usoro ihe omume mgbakọ sekit ụbọchị abụọ ga-amalite na January. (Ilu 4:4) Ọ ga-emesi ike ihe mere irubere iwu Chineke isi na-ejighị bụrụ ibu arọ. Ọzọkwa, ọ ga-egosi otú ime uche Chineke si enye ume ọhụrụ na ezi obi ụtọ nakwa olileanya maka ọdịnihu.—Mat. 11:28-30; Jọn 13:17.

Ndị chọrọ ka e mee ha baptism ná mgbakọ ahụ n’irubere iwu Kraịst isi kwesịrị ịgwa onyeisi oche ndị nlekọta, ọ ga-emekwa ndokwa ndị dị mkpa.—Mat. 28:19, 20.

Otu usoro isiokwu ga-akọwa ụzọ ndị dị irè anyị pụrụ isi gosi ịhụnanya anyị nwere maka Chineke na ụmụnna anyị. (Jọn 13:34, 35; 1 Jọn 5:3) Ndụmọdụ na-emetụ n’obi nke sitere n’Abụ Ọma nke 19 na 119 ga-eso n’usoro ihe omume ahụ. Ọ bụ ezie na e dere ndụmọdụ ahụ sitere n’ike mmụọ nsọ ndị dị n’abụ ọma ndị a ọtụtụ puku afọ gara aga, anyị ga-ahụ otú o si abara anyị uru n’otu n’otu taa.

Isiokwu nke okwu ihu ọha nke onye nlekọta distrikti ga-ekwu bụ “Tụọ Egwu Chineke, Debekwa Ihe Nile O Nyere n’Iwu.” (Ekli. 12:13) Okwu ikpeazụ nke onye nlekọta sekit ga-ekwu ga-egosi otú ndị ntorobịa pụrụ isi nweta ihe kasị mma ná ndụ ugbu a na ihe mere ha pụrụ iji nwee ntụkwasị obi inweta ọdịnihu ebighị ebi. Onye nlekọta distrikti ga-eweta usoro ihe omume ahụ ná njedebe site n’ịgụpụtasị ọtụtụ uru ndị a na-enweta site n’ibi ndụ kwekọrọ ‘n’iwu Eze’ ahụ nke bụ ịhụnanya. (Jes. 2:8) N’ezie, nke a bụ usoro ihe omume mgbakọ nke ọ na-adịghị onye ga-achọ ka ọ kwaa ya!