Na-eru n’Obi Ndị Ị Na-akụziri Ihe
1. Gịnị ka iji Okwu Chineke akụzi ihe nke ọma mgbe anyị nọ n’ozi pụtara?
1 Ndị maara ka e si ezi ozi ọma nke ọma, dị ka Pọl onyeozi, maara na ‘ijizi okwu nke eziokwu ahụ ejizi’ apụtaghị naanị ịgụpụtara mmadụ ihe Akwụkwọ Nsọ kwuru. (2 Tim. 2:15) Mgbe anyị na-akụziri ndị mmadụ Okwu Chineke, olee otú anyị nwere ike isi kwuo okwu ‘ga-eru ha n’obi’?—Ọrụ 28:23.
2. Olee otú anyị nwere ike isi mee ka onye anyị na-ezi ihe jirikwuo Okwu Chineke kpọrọ ihe?
2 Gosi Ha Ihe Okwu Chineke Kwuru: Nke mbụ, gosi ha ihe Baịbụl kwuru otú ga-eme ka ha na-akwanyere Baịbụl ùgwù ma ghọta na ihe ndị e dere na ya bụ amamihe si n’aka Chineke. Otú anyị si kwenyesie ike n’Okwu Chineke nwere ike ime ka onye anyị na-agwa okwu na-ege ntị nke ọma mgbe anyị na-agụrụ ya otu ebe na Baịbụl. (Hib. 4:12) Anyị nwere ike ịsị: “Achọpụtala m na ọ bara uru ịmata otú Chineke si ele ihe a mụ na gị na-ekwu anya. Legodị ihe Baịbụl kwuru.” Mgbe ọ bụla o kwere mee, si na Baịbụl gụpụtara onye ị na-ezi ihe ihe Okwu Chineke kwuru.
3. Ị gụchaa otu ebe n’Akwụkwọ Nsọ, gịnị ka i nwere ike ime iji nyere onye ị na-agwa okwu aka ka ọ ghọta ihe ebe ahụ ị gụrụ na-ekwu?
3 Nke abụọ, kọwaa amaokwu Baịbụl ị gụrụ. Ọ na-esiri ọtụtụ ndị ike ịghọta ihe otu amaokwu Baịbụl a gụụrụ ha pụtara mgbe mbụ ha nụrụ ya. Ọ na-adịkarị mkpa na a ga-akọwa ya akọwa tupu ha aghọta ihe mere e ji gụọ ya. (Luk 24:26, 27) Mee ka isi ihe dị n’ebe ahụ ị gụrụ doo anya. I nwere ike ịjụ onye ahụ ajụjụ iji mara ma ọ̀ ghọtala ihe ebe ahụ na-ekwu nke ọma.—Ilu 20:5; Ọrụ 8:30.
4. Olee ihe ikpeazụ dị mkpa ka anyị mee iji ruo n’obi ndị anyị na-akụziri ihe?
4 Mee Ka O Chebara Ihe Baịbụl Kwuru Echiche: Nke atọ, gbalịsie ike iru n’obi onye nwe ụlọ site n’inyere ya aka ịhụ otú amaokwu Baịbụl ị gụrụ si gbasa ya. Isi otú ahụ nyere ya aka ịghọta ihe Akwụkwọ Nsọ kwuru ga-eme ka anyị nwee ike ịgwa ya okwu ndị ga-eru ya n’obi, nke ga-emekwa ka ọ gbanwee otú o si eche echiche. (Ọrụ 17:2-4; 19:8) Dị ka ihe atụ, anyị gụọrọ mmadụ Abụ Ọma 83:18, anyị nwere ike ime ka onye ahụ ghọta otú ịma aha mmadụ si dị mkpa ma ọ bụrụ na ọ chọrọ ka ya na onye ọzọ bụrụ enyi. Anyị nweziri ike ịjụ ya, sị, “Ì chere na ịma aha Chineke ga-eme ka obi sikwuo gị ike na Chineke ga-aza ekpere gị?” Isi otú a mee ka onye nwe ụlọ hụ otú amaokwu Baịbụl a gụrụ si gbasa ya ga-eme ka ọ hụ uru Okwu Chineke bara. Ọ bụrụ na anyị esi otú a na-eru n’obi ndị anyị na-akụziri Okwu Chineke, ọ ga-eme ka ndị nwere obi eziokwu bịa fewe ezi Chineke dị ndụ bụ́ Jehova.—Jere. 10:10.