‚Byggðu upp heimili þitt‘
1 Á því leikur enginn vafi að fjölskyldulífi fer mjög hrakandi í öllum menningarsamfélögum heims. Heimur Satans er á kafi í blekkingum og siðleysi. (1. Jóh. 5:19) Það sýnir okkur hve mikilvægt það er að ‚byggja upp heimili okkar‘ og kenna öðrum að gera það líka. — Orðskv. 24:3, 27, NW.
2 Meginreglur Biblíunnar eru vernd: Leyndardómurinn að baki hamingjusömu fjölskyldulífi er sá að fara eftir meginreglum Biblíunnar. Kröftug sannindi hennar eru gagnleg á öllum sviðum lífsins fyrir alla í fjölskyldunni. Sú fjölskylda, sem fer eftir þeim, er hamingjusöm og nýtur friðar Guðs. — Samanber Jesaja 32:17, 18.
3 Unglingsárin eru oft erfiður tími, bæði fyrir unglingana sjálfa og foreldra þeirra. Bókin Spurningar unga fólksins — svör sem duga var gefin út til að hjálpa fjölskyldum að takast farsællega á við þetta erfiða tímabil og greiða fyrir góðum tjáskiptum milli foreldra og unglinga. Hverjum kafla lýkur með ‚Spurningum til umræðu‘ sem ætlað er að glæða samræður þeirra í milli og minna á mikilvæg atriði. Einnig er þeim ætlað að beina athyglinni að viðhorfum Guðs þannig að við tileinkum okkur afstöðu hans til þess máls sem er til umfjöllunar. — Jes. 48:17.
4 Kynntu þér bókina vel. Lærðu að finna meginreglur sem geta reynst gagnlegar þegar ýmis vandamál koma upp. Bókin fjallar um umgengni við fjölskylduna (1. til 7. kafli), samskipti við kunningjana (8. og 9. kafli), útlit og klæðnað (10. og 11. kafli), ýmis tilfinningavandamál (12. til 16. kafli), skólanám og atvinnu (17. til 22. kafli), heilbrigð viðhorf í siðferðismálum (23. til 27. kafli), samskiptin við hitt kynið, (28. til 32. kafli), áfengi og fíkniefni (33. og 34. kafli), og að lokum um frístundirnar og framtíðina (35. til 39. kafli).
5 Notfærðu þér bókina sem best: Ef fjölskyldan er ekki nú þegar að fara sameiginlega yfir bókina Spurningar unga fólksins, hví þá ekki að byrja núna? Og þegar ný vandamál eða erfiðleikar skjóta upp kollinum er gott að rifja upp viðeigandi kafla í bókinni, hugleiða hvernig nota megi efnið og biðja Jehóva hjálpar í bæn. Taktu þér líka góðan tíma fyrir boðunarstarfið í marsmánuði og leitastu við að koma Spurningum unga fólksins í hendur eins margra og þú getur.
6 Fjölskyldur, sem leggja stund á guðrækni, sameinast og styrkjast andlega og eru vel í stakk búnar til að standast árásir Satans. (1. Tím. 4:7, 8; 1. Pét. 5:8, 9) Við getum verið mjög þakklát fyrir þá leiðsögn sem höfundur fjölskyldunnar lætur okkur í té!