ỌNYANO

1 Whaọ enana họ edẹ emezae Izrẹl nọ a lele Jekọp ziọ Ijipti, ọzae kpobi avọ ekru riẹ a gbẹ nyaze:+ 2 Rubẹn, Simiọn, Livae, gbe Juda;+ 3 Isaka, Zẹbulọn, gbe Bẹnjamin; 4 Dan avọ Naftalae; Gad avọ Asha.+ 5 Enọ* a yẹ kẹ Jekọp* kpobi ahwo* udhosa-gbikpe, rekọ oke nana yọ Josẹf ọ rrọ obọ Ijipti no.+ 6 Josẹf o te ti whu,+ te inievo riẹ kpobi gbe oge yena kpobi re. 7 Ahwo Izrẹl* a te ti vihọ je muhọ ebu gaga, a te je yẹ gaga je bi wo ogaga thesiwa, fikiere a tẹ te da otọ na fia.+

8 Nọ oke o be nyaharo na, ovie ọkpokpọ o te ti mu Ijipti họ esuo, ọnọ ọ riẹ Josẹf ho. 9 Fikiere ọ tẹ ta kẹ ahwo riẹ nọ: “Rri! Ahwo Izrẹl a bu vi omai je wo ogaga vi omai.+ 10 Joma rehọ areghẹ ru ai oware jọ. O gbẹ rrọ ere he, kọ enẹ ọvo a ti vihọ, yọ ẹmo o te du lahwe, a ti kuomagbe ewegrẹ mai, a vẹ te họre omai, a ve ti no orẹwho na.”

11 Fikiere a tẹ rọ iletu nọ e rẹ rehọ ae ru iruo ọgbahọ* mu kẹ ae re a rehọ iruo egaga gboja kẹ ae,+ a tẹ bọ ikpewho nọ a rẹ jọ sẹro eware kẹ Fẹro, nọ a re se Paetọm avọ Ramesis.+ 12 Rekọ epanọ a je gboja kẹ ae te, ere a je yẹ bu te, yọ ere a jẹ vaha ruọ oria kpobi te, fikiere ozọ u te je mu ai gaga fiki ahwo Izrẹl.+ 13 O tẹ whae ze nọ ahwo Ijipti a rọ gba ahwo Izrẹl họ igbo egaga.+ 14 A rehọ iruo egaga ru akpọ bẹ ae onọ a jẹ rọ rehọ ọviẹ gbe ibriki ru iruo yọ a je ru koghẹrẹ koghẹrẹ iruo ọrigbo kpobi evaọ obọ ẹwọ. Ẹhẹ, a jẹ rehọ ae ru koghẹrẹ koghẹrẹ iruo ọrigbo kpobi avọ oja-oriọ.+

15 Uwhremu na ovie Ijipti ọ tẹ ta ẹme kẹ Shifra avọ Pua eyae nọ i re yẹ eyae Hibru na, 16 ọ ta kẹ ae nọ: “Okenọ wha bi yẹ eyae Hibru na,+ nọ wha tẹ ruẹ e rai evaọ akpala nọ a re jo yẹ ọmọ* na, wha re kpe ọmọ na hrọ otẹrọnọ ọmọzae; rekọ otẹrọnọ ọmọtẹ, jọ ọ jọ uzuazọ.” 17 Rekọ eyae nọ i re yẹ eyae na a dhozọ Ọghẹnẹ uzẹme na, a ru oware nọ ovie Ijipti ọ ta kẹ ae na ha. Ukpoye a jẹ siọ emezae na ba uzuazọ.+ 18 Nọ oke jọ o vrẹ no, ovie Ijipti o te se eyae nọ i re yẹ eyae na ọ tẹ ta kẹ ae nọ: “Fikieme wha jẹ be siọ emezae na ba uzuazọ?” 19 Eyae nọ i re yẹ eyae na a tẹ ta kẹ Fẹro nọ: “Eyae Hibru na a wọhọ eyae Ijipti hi. A rrọ jajaja yọ a re yẹ no taure aye nọ o re yẹ eyae o te ti te etẹe.”

20 Fikiere Ọghẹnẹ o te ru ewoma kẹ eyae nọ i re yẹ eyae na, ahwo na a te je dhe ebuebu je bi dhe ẹgẹga. 21 Yọ fikinọ eyae nọ i re yẹ eyae na a dhozọ Ọghẹnẹ uzẹme na, ọ tẹ kẹ ae iviuwou uwhremu na. 22 Ukuhọ riẹ, Fẹro o te jie uzi kẹ ahwo riẹ kpobi nọ: “Wha re gbolo ọmọzae ahwo Hibru kpobi nọ a yẹ obọ fihọ Ethẹ Naele, rekọ wha rẹ nyasiọ ọmọtẹ kpobi ba uzuazọ.”+

2 Evaọ oke yena, ọzae jọ evaọ uwou Livae ọ tẹ rehọ ọmọtẹ jọ evaọ orua Livae.+ 2 Aye na o te dihọ o te yẹ ọmọzae. Nọ ọ ruẹ epanọ o wo erru te, ọ tẹ ko ẹe dhere emerae esa.+ 3 Nọ ọ gbẹ jẹ sae ko ẹe dhere he,+ ọ tẹ rehọ ekete* papirọs* ọ tẹ rehọ bitumẹn* avọ ikota ralọ iẹe, ọ tẹ wọ ọmọ na fihọ iẹe, ọ tẹ wọ ekete na fihọ udevie ikpoko evaọ akotọ Ethẹ Naele. 4 Rekọ oniọvo-ọmọtẹ riẹ+ o dikihẹ ugbo jọ no etẹe re ọ ruẹ oware nọ o te via kẹe.

5 Nọ ọmọtẹ Fẹro ọ nyaze te họ evaọ Ethẹ Naele, idibo-emetẹ riẹ a jẹ nya akotọ Ethẹ Naele na. Ọ tẹ kparo ruẹ ekete na evaọ udevie ikpoko na. Ọ tẹ nwani vi odibo-ọmọtẹ riẹ nyae wọe ze.+ 6 Nọ o rovie iei, ọ tẹ ruẹ ọmọ na, yọ ọmọzae na ọ jẹ viẹ. Ohrọ riẹ o tẹ re iẹe,* rekọ ọ tẹ ta nọ: “Ọnana yọ ọjọ evaọ usu emọ ahwo Hibru na.” 7 Kẹsena oniọvo-ọmọtẹ riẹ ọ tẹ ta kẹ ọmọtẹ Fẹro nọ: “Kọ mẹ nyai se aye Hibru jọ ze re ọ yọrọ ọmọ na kẹ owhẹ?” 8 Ọmọtẹ Fẹro ọ tẹ ta kẹe nọ: “Nya!” Ọmọtẹ na ọ tẹ nwane nya o te se oni ọmọ na ze.+ 9 Ọmọtẹ Fẹro ọ tẹ ta kẹe nọ: “Rehọ ọmọ nana vrẹ re whọ yọrọ iẹe kẹ omẹ, mẹ te hwosa kẹ owhẹ.” Fikiere aye na ọ tẹ rehọ ọmọ na ọ tẹ yọrọ iẹe. 10 Nọ ọmọ na ọ rro no, ọ tẹ rehọ iẹe bru ọmọtẹ Fẹro, o te zihe ruọ ọmọ riẹ.+ O te mu odẹ na Mosis* kẹe jẹ ta nọ: “Keme me si rie no evaọ ame ze.”+

11 Whaọ evaọ oke yena, nọ Mosis o te ohwo no,* ọ tẹ nyabru inievo riẹ re ọ ruẹ owha nọ a be wha,+ ọ tẹ kparo ruẹ ohwo Ijipti jọ nọ o je kpe ohwo Hibru jọ, omọvo inievo riẹ. 12 Fikiere o te rri tofẹ tofẹ, nọ ọ ruẹ ohwo ọvo ho, o te kpe ohwo Ijipti na no, o te si ei no fihọ ẹkpẹ.+

13 Rekọ ọ tẹ nya ẹdẹ nọ o lele i rie, ọ tẹ ruẹ ezae Hibru ivẹ nọ e be họre. Fikiere ọ tẹ nọ ọnọ o ru thọ na nọ: “Fikieme whọ be rọ họre ọrivẹ ra?”+ 14 Ọ tẹ kpahe kẹe nọ: “Ono ọ rehọ owhẹ mu osu gbe obruoziẹ kẹ omai? Kọ whọ gwọlọ kpe omẹ no epanọ who kpe ohwo Ijipti na?”+ Ozọ u te mu Mosis, ọ tẹ ta nọ: “Koyehọ ahwo a riẹ kpahe oware na no!”

15 Fẹro o te ti yo kpahe iẹe, o te ru epanọ o re ro kpe Mosis no; rekọ Mosis ọ tẹ dhẹ siọ Fẹro ba nyae rria ẹkwotọ Midian,+ ọ tẹ keria akotọ oza. 16 Whaọ ozerẹ Midian+ o wo emetẹ ihrẹ, yọ a nyaze ti vo ame fihọ ido ame kẹ uthuru erao ọsẹ rai re a da. 17 Rekọ, ithuru-igodẹ na a tẹ nyaze a te le ai vrẹ wọhọ epaọ anwẹdẹ. Mosis ọ tẹ kpama o te fiobọhọ kẹ* eyae na vo ame kẹ uthuru erao rai da. 18 Nọ a kpo bru ọsẹ rai Ruẹl* ze,+ o te bo nọ: “Ẹvẹ wha rọ kaki kpozi nẹnẹ ere?” 19 A te yo nọ: “Ohwo Ijipti jọ+ ọ thọ omai no obọ ithuru-igodẹ na, o tube si ame kẹ omai jẹ kẹ uthuru erao mai ame da.” 20 Ọ tẹ nọ emetẹ riẹ nọ: “Kọ ọzae na ọ rrọ? Fikieme wha jẹ nyasiọ ọzae na ba? Wha sei ze re o lele omai re emu.” 21 Kẹsena Mosis ọ tẹ rọwo nọ o re lele ọzae na rria, ọ tẹ rehọ ọmọtẹ riẹ Zipora+ kẹ Mosis re ọ jọ aye riẹ. 22 Uwhremu na aye na o te yẹ ọmọzae, Mosis o te mu odẹ kẹe nọ Gẹshọm,*+ keme ọ ta nọ, “Me zihe ruọ ọrara nọ ọ be rria orẹwho ọfa no.”+

23 Nọ oke krẹkri* o vrẹ no, ovie Ijipti o te whu,+ rekọ ahwo Izrẹl a gbe je dimẹ fiki igbo na jẹ viẹ je bi bo, oviẹ rai kẹ obufihọ fiki igbo na u te je do te Ọghẹnẹ uzẹme na oma.+ 24 Kẹsena Ọghẹnẹ o te yo imẹ-idio rai,+ Ọghẹnẹ ọ tẹ kareghẹhọ ọvọ riẹ kugbe Abraham, Aiziki, gbe Jekọp.+ 25 Fikiere Ọghẹnẹ ọ tẹ rẹriẹ ovao rri ahwo Izrẹl; Ọghẹnẹ o te muẹrohọ uye rai.

3 Mosis o te zihe ruọ othuru-igodẹ ọrọ uthuru Jẹtro ọgọ riẹ,+ ozerẹ Midian. Nọ o je su uthuru erao na kpobọ ofẹ ukiediwo-ọre udhude na, o te te ugbehru Ọghẹnẹ uzẹme na, evaọ Horẹb.+ 2 Kẹsena ukọ-odhiwu Jihova ọ tẹ romavia kẹe evaọ erae evaọ udevie ure inwe.+ Nọ o gbe je rri, ọ tẹ ruẹ nọ erae e be ware evaọ ure inwe na, rekọ ure inwe na o be to ho. 3 Fikiere Mosis ọ tẹ ta nọ: “Mẹ rẹ nya re mẹ romatotọ rri oware igbunu nana re mẹ ruẹ oware nọ ure inwe na o gbẹ be rọ to ho.” 4 Nọ Jihova ọ ruẹ nọ o go kẹle re o rri, Ọghẹnẹ o te sei no ure inwe na ze inọ: “Mosis! Mosis!” o te yo nọ: “Mẹ na.” 5 Kẹsena ọ tẹ ta nọ: “Who gbe go kẹle he. Ba eviẹ ra no awọ ra, keme oria nọ who dikihẹ na yọ otọ ọrẹri.”

6 Ọ tẹ ta kẹe nọ: “Mẹ họ Ọghẹnẹ ọsẹ ra, Ọghẹnẹ Abraham,+ Ọghẹnẹ Aiziki,+ gbe Ọghẹnẹ Jekọp.”+ Kẹsena Mosis ọ tẹ kuọ ovao riẹ dhere, keme ozọ u je mu ei re o rri Ọghẹnẹ uzẹme na. 7 Jihova o te fibae nọ: “Mẹ ruẹ oja nọ ahwo mẹ nọ a rrọ obọ Ijipti a be re no, me te je yo oviẹ rai no, onọ a be viẹ fiki enọ e be gba ae họ ru iruo; mẹ riẹ edada nọ a be ruẹ uye rai vevẹ.+ 8 Mẹ te nya* re me siwi ai no obọ ahwo Ijipti+ re mẹ rehọ ae no ẹkwotọ oyena ze kpohọ ẹkwotọ nọ o rrọ wowoma jẹ rrọ ruaro, ẹkwotọ nọ ame-ivie gbe ọnyọ i bi jo su,+ ẹkwotọ ahwo Kenan, ahwo Hit, ahwo Amọ, ahwo Pẹriz, ahwo Hiv, gbe ahwo Jebus.+ 9 Rri! Ubo oviẹ ahwo Izrẹl u do te omẹ oma no, mẹ tẹ jẹ ruẹ obọ ogaga nọ ahwo Ijipti a bi ro kienyẹ ae no.+ 10 Fikiere nyaze, re me vi owhẹ bru Fẹro, re whọ rehọ ahwo mẹ ahwo Izrẹl no Ijipti ze.”+

11 Rekọ Mosis ọ tẹ ta kẹ Ọghẹnẹ uzẹme na nọ: “Mẹ yọ ono nọ ọ rẹ nyabru Fẹro re ọ rehọ ahwo Izrẹl no Ijipti ze?” 12 Ọ tẹ kpahe kẹe nọ: “Mẹ te jọ kugbe owhẹ,+ yọ onana họ oka rọkẹ owhẹ inọ mẹ họ ọnọ o vi owhẹ: Nọ whọ tẹ rehọ ahwo na no Ijipti ze no, wha rẹ te gọ* Ọghẹnẹ uzẹme na evaọ ugbehru nana.”+

13 Rekọ Mosis ọ tẹ ta kẹ Ọghẹnẹ uzẹme na nọ: “Otẹrọnọ mẹ nyabru ahwo Izrẹl mẹ jẹ ta kẹ ae nọ, ‘Ọghẹnẹ esẹ-esẹ rai o vi omẹ bru owhai ze,’ kọ a jẹ nọ omẹ nọ, ‘Didi odẹ riẹ?’+ Eme mẹ rẹ ta kẹ ae?” 14 Fikiere Ọghẹnẹ ọ tẹ ta kẹ Mosis nọ: “Me ti Zihe Ro Oghẹrẹ Kpobi nọ Mẹ Gwọlọ* Zihe Ro.”*+ O te fibae nọ: “Enẹ whọ rẹ ta kẹ ahwo Izrẹl, ‘Me ti Zihe Ro o vi omẹ bru owhai ze.’”+ 15 Kẹsena Ọghẹnẹ ọ tẹ wariẹ ta kẹ Mosis nọ:

“Enẹ whọ rẹ ta kẹ ahwo Izrẹl, ‘Jihova Ọghẹnẹ esẹ-esẹ rai, Ọghẹnẹ Abraham,+ Ọghẹnẹ Aiziki,+ gbe Ọghẹnẹ Jekọp,+ o vi omẹ bru owhai ze.’ Onana họ odẹ mẹ bẹdẹ bẹdẹ,+ yọ enẹ a rẹ rọ kareghẹhọ omẹ no oge te oge. 16 Fikiere nya, re who koko ekpako Izrẹl họ re whọ ta kẹ ae nọ, ‘Jihova Ọghẹnẹ esẹ-esẹ rai ọ romavia kẹ omẹ, Ọghẹnẹ Abraham, Aiziki, gbe Jekọp, yọ ọ ta nọ: “Me gine muẹrohọ owhai no+ gbe oware nọ a bi ru owhai evaọ Ijipti. 17 Fikiere mẹ tẹ ta nọ, Me ti si owhai no oja-oriọ+ evaọ obọ ahwo Ijipti kpohọ ẹkwotọ ahwo Kenan, ahwo Hit, ahwo Amọ,+ ahwo Pẹriz, ahwo Hiv, gbe ahwo Jebus,+ kpohọ ẹkwotọ nọ ame-ivie gbe ọnyọ i bi jo su.”’+

18 “A te gaviezọ kẹ urru ra hrọ,+ whọ vẹ te nyabru ovie Ijipti, whẹ avọ ekpako Izrẹl, wha vẹ ta kẹe nọ: ‘Jihova Ọghẹnẹ ahwo Hibru+ ọ ta ẹme kẹ omai. Fikiere, ivie, joma nya ugbo edẹ esa kpobọ udhude na re ma ruẹsi dhe idhe kẹ Jihova Ọghẹnẹ mai.’+ 19 Rekọ mẹ riẹ vevẹ nọ ovie Ijipti ọ te kẹ owhai uvẹ nyavrẹ hẹ ajokpanọ obọ ogaga o gba riẹ họ.+ 20 Fikiere mẹ vẹ te rriẹ obọ mẹ, mẹ vẹ te tehe Ijipti avọ iruo urirẹ mẹ kpobi nọ me ti ru evaọ eva riẹ, kẹsena o ve ti siobọno owhai vrẹ.+ 21 Me ti ru ahwo Ijipti rri ahwo nana aro, yọ okenọ wha te nyavrẹ, wha ti kpo ababọ vievie he.+ 22 Aye kpobi o re mi ọrivẹ riẹ gbe aye nọ ọ be rria uwou riẹ ekwakwa isiliva gbe erọ igoru gbe iwu, yọ wha re fi ai họ emezae rai gbe emetẹ rai; wha te kwa eware ahwo Ijipti.”+

4 Rekọ Mosis ọ tẹ ta nọ: “Kọ otẹrọnọ a gbẹ rọwo ẹme mẹ hẹ yọ a gaviezọ kẹ urru mẹ hẹ,+ keme a te ta nọ, ‘Jihova ọ romavia kẹ owhẹ hẹ.’” 2 Jihova ọ tẹ ta kẹe nọ: “Eme ọ rrọ obọ ra na?” O te yo nọ: “Ọkpọ.” 3 Ọ tẹ ta nọ: “Gbolo iei fihọ otọ.” Fikiere o te gbolo iei fihọ otọ, u te zihe ruọ araomuomu;+ Mosis ọ tẹ dhẹ no etẹe. 4 Jihova ọ tẹ ta kẹ Mosis nọ: “Rriẹ obọ ra re who kru uweli riẹ.” Ọ tẹ rriẹ obọ riẹ o te kru ei, u te zihe ruọ ọkpọ evaọ obọ riẹ. 5 Kẹsena Ọghẹnẹ ọ tẹ ta nọ: “Ẹjiroro onana họ re a ruẹse rọwo nọ Jihova, Ọghẹnẹ esẹ-esẹ rai, Ọghẹnẹ Abraham, Ọghẹnẹ Aiziki, gbe Ọghẹnẹ Jekọp,+ ọ romavia kẹ owhẹ.”+

6 Jihova ọ tẹ wariẹ ta kẹe nọ: “Ivie, thọrọ obọ ra họ igbama ewu ra.” Ọ tẹ thọrọ obọ riẹ họ igbama ewu riẹ. Nọ o yolo iei ze, rri, oti ọ ruọ obọ riẹ no, yọ o be fo wọhọ ekpalekpa-ame!+ 7 Kẹsena ọ tẹ ta nọ: “Zihe obọ ra fihọ igbama ewu ra.” O te zihe obọ riẹ fihọ ewu riẹ. Nọ o yolo iei no ewu na ze, o ruẹrẹhọ no wọhọ abọ oma riẹ nọ o kiọkọ! 8 Ọ tẹ ta nọ: “A gbẹ rọwo ẹme ra ha hayo daezọ oka ọsosuọ na ha, a te daezọ oka avọ ivẹ na hrọ.+ 9 Ghele na, a gbẹ make rọwo eka ivẹ nana ha yọ a rọwo gaviezọ kẹ urru ra ha, who ve vo ame jọ no Ethẹ Naele na ze who ve ku ei fihọ otọ oyaya, ame nọ who vo no Ethẹ Naele ze na o ve ti zihe ruọ azẹ evaọ otọ oyaya na.”+

10 Mosis ọ tẹ ta kẹ Jihova nọ: “Rọvrẹ omẹ, Jihova, rekọ mẹ yọ ohwo nọ ọ riẹ ẹme ẹta vievie he, makọ anwẹdẹ hayo anwọ ẹsiẹe nọ whọ be rọ ta ẹme kẹ odibo ra na, keme mẹ rẹ ta ẹme kpẹlẹ kpẹlẹ* yọ ẹrọo mẹ ọ rrọ gbẹgbẹdẹ.”+ 11 Jihova ọ tẹ ta kẹe nọ: “Ono ọ ma unu kẹ ohwo, hayo ono o re ru ai dienu, diezọ, ruẹ ude ziezi, hayo tuaro? Kọ ogbẹrọnọ mẹ, Jihova? 12 Fikiere nya obọnana, mẹ te jọ kugbe owhẹ nọ whọ te ta ẹme,* yọ me ti wuhrẹ owhẹ oware nọ whọ rẹ ta.”+ 13 Rekọ ọ tẹ ta nọ: “Rọvrẹ omẹ, Jihova, ivie vi ohwo ọfa kpobi nọ whọ gwọlọ vi.” 14 Ofu o te mu Jihova gaga kẹ Mosis, ọ tẹ ta nọ: “Kọ ẹvẹ kpahe Erọn+ oniọvo-ọmọzae ra ohwo Livae na? Mẹ riẹ nọ ọ rẹ sae ta ẹme ziezi. Yọ obọnana ọ rrọ edhere be nyabru owhẹ ze. Nọ ọ tẹ ruẹ owhẹ, udu riẹ o te ghọghọ.+ 15 Fikiere whọ rẹ ta ẹme kẹe hrọ je fi eme na họ unu riẹ,+ yọ mẹ te jọ kugbe owhẹ gbe ọyomariẹ nọ wha te ta ẹme,+ yọ me ti wuhrẹ owhai oware nọ wha re ru. 16 Ọ te ta ẹme kẹ ahwo na kẹ owhẹ, ọ te jọ ọtota ra, yọ whọ te jọ wọhọ Ọghẹnẹ kẹe.*+ 17 Whọ rẹ rehọ ọkpọ nana fihọ obọ ra jẹ rehọ iẹe ru eware eka na.”+

18 Fikiere Mosis o te zihe bru Jẹtro ọgọ riẹ,+ ọ tẹ ta kẹe nọ: “Ivie, mẹ gwọlọ kpo, re me zihe bru inievo mẹ nọ e rrọ obọ Ijipti re mẹ ruẹ sọ a gbẹ rrọ uzuazọ.” Jẹtro ọ tẹ ta kẹ Mosis nọ: “Nya tou.” 19 Kẹsena Jihova ọ tẹ ta kẹ Mosis evaọ Midian nọ: “Nya, zihe kpobọ Ijipti, keme ezae kpobi nọ e jẹ gwọlọ kpe owhẹ* a whu no.”+

20 Mosis ọ tẹ rehọ aye riẹ gbe emezae riẹ ọ tẹ wọ ae họ eketekete, ọ tẹ ruọ edhere bi zihe kpobọ ẹkwotọ Ijipti. Yọ Mosis ọ tọlọ ọkpọ Ọghẹnẹ uzẹme na fihọ obọ. 21 Kẹsena Jihova ọ tẹ ta kẹ Mosis nọ: “Nọ who te zihe te obọ Ijipti no, ruẹ nọ whọ jọ aro Fẹro ru iruo igbunu kpobi nọ mẹ kẹ owhẹ ogaga nọ who ru na.+ Rekọ mẹ te kuvẹ re udu riẹ o jọ gaga,+ yọ o ti siobọno ahwo na vrẹ hẹ.+ 22 Whọ rẹ ta kẹ Fẹro hrọ inọ, ‘Enẹ Jihova ọ ta: “Izrẹl yọ ọmọzae mẹ, ọmọ ọsosuọ mẹ.+ 23 Mẹ be ta kẹ owhẹ nọ, Siobọno ọmọzae mẹ vrẹ re ọ ruẹse gọ omẹ. Rekọ whọ tẹ se nọ who re siobọnoi vrẹ hẹ, me ti kpe ọmọzae ra, ọmọ ọsosuọ ra.”’”+

24 Whaọ evaọ edhere, evaọ oria nọ a wohọ, Jihova+ o te zere iei ọ tẹ jẹ gwọlọ kpei no.+ 25 Ukuhọ riẹ, Zipora+ ọ tẹ tọlọ utho odada,* ọ tẹ yawo ọmọzae riẹ je ru uwoliwo* riẹ te awọ riẹ* jẹ ta nọ: “Keme whẹ yọ ọva azẹ kẹ omẹ.” 26 Fikiere Ọ tẹ kẹe uvẹ. Evaọ oke yena, ọ* ta nọ, “ọva azẹ,” fiki oyawo na.

27 Kẹsena Jihova ọ tẹ ta kẹ Erọn nọ: “Nya kpobọ udhude na nyai zere Mosis.”+ Fikiere ọ tẹ nya, o te zere iei evaọ ugbehru Ọghẹnẹ uzẹme na+ o te yere iei avọ ẹviọlọ. 28 Mosis ọ tẹ vuẹ Erọn eme Jihova kpobi, ọnọ o vi rie na,+ gbe eware eka kpobi nọ o jie uzi kẹe nọ o ru.+ 29 Kẹsena Mosis avọ Erọn a tẹ nya a te koko ekpako ahwo Izrẹl na kpobi họ.+ 30 Erọn ọ tẹ vuẹ ae eme kpobi nọ Jihova ọ ta kẹ Mosis na, yọ o ru eware eka+ na evaọ aro ahwo na. 31 Fiki onana, ahwo na a rọwo.+ Nọ a yo nọ Jihova ọ rẹriẹ ovao riẹ rri ahwo Izrẹl no+ gbe nọ ọ ruẹ oja-oriọ rai+ no, a te guzou kpotọ je kiẹzẹ vovao tuotọ.

5 Kẹsena Mosis avọ Erọn a tẹ nya a jẹ ta kẹ Fẹro nọ: “Enẹ Jihova Ọghẹnẹ Izrẹl ọ ta, ‘Siobọno ahwo mẹ vrẹ re a ruẹsi ru ehaa kẹ omẹ evaọ obọ udhude na.’” 2 Rekọ Fẹro ọ tẹ ta nọ: “Ono họ Jihova,+ nọ me re yoẹme kẹ urru riẹ re me siobọno ahwo Izrẹl vrẹ?+ Mẹ riẹ Jihova vievie he, yọ me ti siobọno ahwo Izrẹl vrẹ hẹ.”+ 3 Rekọ a tẹ ta nọ: “Ọghẹnẹ ahwo Hibru ọ ta ẹme kẹ omai. Ivie, ma gwọlọ nya ugbo edẹ esa kpobọ udhude na re ma dhe idhe kẹ Jihova Ọghẹnẹ mai;+ o gbẹ rrọ ere he, ọ vẹ te rehọ ẹyao tehe omai hayo rọ ọgbọdọ kpe omai.” 4 Ovie Ijipti o te yo kẹ ae nọ: “Mosis avọ Erọn, fikieme wha be rọ rehọ ahwo na no iruo rai? Wha zihe kpohọ iruo* rai!”+ 5 Fẹro ọ tẹ ta haro nọ: “Rri epanọ ahwo ẹkwotọ na a bu te, yọ whọ be gwọlọ ru re a serihọ no iruo rai.”

6 Evaọ ẹdẹdẹ yena, Fẹro o te jie uzi kẹ isu-iruo na gbe esẹro rai nọ: 7 “Wha rẹ gbẹ kẹ ahwo na eta* nọ a rẹ rọ ma ibriki ofa ha.+ Jọ a nyae gwọlọ eta* kẹ omarai. 8 Rekọ wha rẹ gbẹ vuẹ ae nọ a ma unu ibriki nọ a be ma anwẹdẹ. Wha si no unu na kẹ ae he, keme a bi ru iruo ho.* Oyejabọ nọ a bi ro bo nọ, ‘Ma gwọlọ nya, ma gwọlọ dhe idhe kẹ Ọghẹnẹ mai!’ 9 Wha rehọ ai ru iruo ga vi epaọ anwẹdẹ, wha kwa iruo vọ ae abọ re a gbẹ gaviezọ kẹ erue he.”

10 Fikiere isu-iruo na+ gbe esẹro rai a tẹ nya, a tẹ vuẹ ahwo na nọ: “Enẹ Fẹro ọ ta, ‘Mẹ gbẹ be kẹ owhai eta* ofa ha. 11 Wha nyae gwọlọ eta* obọrai kẹ omarai evaọ oria kpobi nọ wha rẹ sae jọ ruẹ e rai, rekọ a bi si no iruo rai vievie he.’” 12 Kẹsena ahwo na a tẹ vaha ruọ ẹkwotọ Ijipti soso re a gwọlọ igbe ekakọ nọ e ya no nọ a re ro ru eta.* 13 Isu-iruo na a tẹ jẹ kpakpa ae oma nọ: “Whai omomọvo o re ru iruo okpẹdẹ riẹ re hrọ, wọhọ epaọ okenọ a jẹ kẹ owhai eta.” 14 Yọ a je kpe esẹro ahwo Izrẹl na, enọ isu-iruo Fẹro a ro mu kẹ ae na.+ A nọ rai nọ: “Fikieme wha gbẹ ma bu te unu ibriki nọ wha be hae ma vẹre na ha? Onana o via odẹnukpo gbe inẹnẹ na.”

15 Fikiere esẹro ahwo Izrẹl na a te bo bru Fẹro nọ: “Fikieme who bi ro ru idibo ra enẹ? 16 A be kẹ idibo ra eta* ha, ghele na, a be ta kẹ omai nọ, ‘Wha ma ibriki!’ A bi kpe idibo ra, rekọ ahwo ra họ enọ i ru thọ.” 17 Rekọ ọ tẹ ta nọ: “Wha bi ruiruo ho,* wha bi ru iruo ho!*+ Oyejabọ nọ wha be rọ ta nọ, ‘Ma gwọlọ nya, ma gwọlọ dhe idhe kẹ Jihova.’+ 18 Fikiere wha nya, wha zihe kpohọ iruo! A te kẹ owhai eta* evuevo ho, rekọ wha rẹ gbẹ ma unu ibriki nọ wha be ma anwẹdẹ na hrọ.”

19 Esẹro ahwo Izrẹl na a tẹ ruẹ nọ a kie ruọ ẹbẹbẹ ologbo no fiki uzi na, inọ: “Wha rẹ ma kpotọ vi unu ibriki nọ wha rẹ ma okpẹdẹ na vievie he.” 20 Kẹsena a te zere Mosis avọ Erọn nọ a dikihẹ etẹe re a ruẹ e rai nọ a bi no aro Fẹro ze na. 21 A tẹ nwane ta kẹ ae nọ: “Jọ Jihova o rri owhai re o bruoziẹ, keme wha ru nọ Fẹro avọ idibo riẹ a bi ro rri omai yoyoma,* yọ wha fi ọgbọdọ họ obọ rai no re a ro kpe omai.”+ 22 Kẹsena Mosis ọ tẹ rẹriẹ ovao rri Jihova ọ tẹ ta nọ: “Jihova, fikieme who bi ro gboja kẹ ahwo nana? Fikieme who ro vi omẹ ze? 23 Anwọ okenọ mẹ rọ nyabru Fẹro jẹ rọ odẹ ra ta ẹme kẹe na,+ o bi gboja kẹ ahwo nana vi epaọ anwẹdẹ,+ yọ who ri siwi ahwo ra ha.”+

6 Fikiere Jihova ọ tẹ ta kẹ Mosis nọ: “Obọnana whọ te ruẹ oware nọ me ti ru Fẹro.+ Obọ ogaga mẹ te rọ gbae họ re o siobọno ai vrẹ, yọ obọ ogaga mẹ te rọ gbae họ re o le ai no ẹkwotọ riẹ.”+

2 Ọghẹnẹ ọ tẹ ta kẹ Mosis nọ: “Mẹ họ Jihova. 3 Yọ mẹ jẹ hae romavia kẹ Abraham, Aiziki, gbe Jekọp wọhọ Ọghẹnẹ Erumeru na,+ rekọ kpahe odẹ mẹ Jihova,+ me dhesẹ omamẹ kẹ ae he.+ 4 Mẹ tẹ jẹ re ọvọ mẹ kugbe ai inọ mẹ te kẹ ae ẹkwotọ Kenan, ẹkwotọ nọ a rria wọhọ erara na.+ 5 Whaọ mẹ omamẹ me yo imẹ-idio ahwo Izrẹl no, enọ ahwo Ijipti na a bi ro ru erigbo, yọ mẹ kareghẹhọ ọvọ mẹ.+

6 “Fikiere ta kẹ ahwo Izrẹl nọ: ‘Mẹ họ Jihova, me ti si owhai no uye nọ ahwo Ijipti a be rọ bẹ owhai je siwi owhai no igbo rai,+ yọ mẹ te rehọ ugbobọ mẹ nọ mẹ rriẹ* avọ ẹdhoguo ologbo rọ rehọ owhai zihe ze.+ 7 Yọ mẹ te rehọ owhai re wha jọ ahwo mẹ, mẹ vẹ te jọ Ọghẹnẹ rai,+ wha vẹ te ginẹ riẹ nọ mẹ họ Jihova Ọghẹnẹ rai ọnọ ọ be rehọ owhai no otọ uye Ijipti. 8 Mẹ vẹ te rehọ owhai ziọ ẹkwotọ nọ mẹ ya eyaa avọ iyei iduwu* inọ mẹ te kẹ Abraham, Aiziki, gbe Jekọp; yọ mẹ te rehọ iẹe kẹ owhai re o jọ orai.+ Mẹ họ Jihova.’”+

9 Kẹsena Mosis ọ tẹ vuẹ ahwo Izrẹl eme nana, rekọ a gaviezọ kẹ Mosis hi fiki elọhoma rai gbe fiki igbo egaga nọ a rrọ na.+

10 Jihova ọ tẹ ta ẹme kẹ Mosis, inọ: 11 “Nya re whọ ta kẹ Fẹro, ovie Ijipti inọ o siobọno ahwo Izrẹl no ẹkwotọ riẹ.” 12 Rekọ Mosis ọ tẹ ta kẹ Jihova nọ: “Rri! Ahwo Izrẹl a gaviezọ kẹ omẹ hẹ;+ kọ ẹvẹ Fẹro ọ te rọ gaviezọ kẹ omẹ, nọ orọnọ me wo ẹbẹbẹ ẹmeọta na?”*+ 13 Rekọ Jihova ọ tẹ wariẹ vuẹ Mosis avọ Erọn oware nọ a rẹ ta kẹ ahwo Izrẹl gbe Fẹro ovie Ijipti, re a ruẹsi si ahwo Izrẹl no ẹkwotọ Ijipti.

14 Enana họ enọ i wuzou uwou esẹ rai: Emezae Rubẹn ọmọ ọsosuọ Izrẹl+ họ Henọk, Palu, Hẹzrọn, gbe Kamae.+ Enana họ iviuwou Rubẹn.

15 Emezae Simiọn họ Jẹmuẹl, Jemin, Ohad, Jekin, Zoha, gbe Sheọl ọmọzae nọ aye Kenan o yẹ kẹe.+ Enana họ iviuwou Simiọn.

16 Enana họ edẹ emezae Livae,+ lele ọvuọ inuwou rai: Gẹshọn, Kohat, gbe Mẹrarae.+ Ikpe uzuazọ Livae nọ ọ rria họ ikpe udhozeza gbe ikpegbihrẹ (137).

17 Emezae Gẹshọn họ Libnae avọ Shimia, lele ọvuọ iviuwou rai.+

18 Emezae Kohat họ Amram, Izha, Hebrọn, gbe Uziẹl.+ Ikpe uzuazọ Kohat nọ ọ rria họ ikpe udhozeza gbe ikpegbesa (133).

19 Emezae Mẹrarae họ Mahlae avọ Mushae.

Enana họ iviuwou ahwo Livae, lele ọvuọ inuwou rai.+

20 Whaọ Amram ọ tẹ rehọ Jokebẹd, oniọvo-ọmọtẹ ọsẹ riẹ re ọ jọ aye riẹ.+ O te yẹ Erọn avọ Mosis kẹe.+ Ikpe uzuazọ Amram nọ ọ rria họ ikpe udhozeza gbe ikpegbihrẹ (137).

21 Emezae Izha họ Kora,+ Nifẹg, gbe Zikrae.

22 Emezae Uziẹl họ Mishẹl, Ẹlzefan,+ gbe Sitrae.

23 Erọn ọ tẹ rehọ Elaesheba, ọmọtẹ Aminadab oniọvo-ọmọtẹ Nashọn+ re ọ jọ aye riẹ. O te yẹ Nedab, Abaihu, Ẹlieza, gbe Itama kẹe.+

24 Emezae Kora họ Assiọ, Ẹlkena, gbe Abayasa.+ Enana họ iviuwou emọ Kora.+

25 Ẹlieza+ ọmọzae Erọn ọ tẹ rehọ ọmọtẹ Putiẹl jọ re ọ jọ aye riẹ. O te yẹ Finihas kẹe.+

Enana họ enọ i wuzou inuwou abọ esẹ erọ ahwo Livae, lele ọvuọ iviuwou rai.+

26 Erọn avọ Mosis nana Jihova ọ ta kẹ nọ: “Rehọ ahwo Izrẹl no ẹkwotọ Ijipti ze, ẹkuẹko.”*+ 27 Ae họ enọ e ta ẹme kẹ Fẹro ovie Ijipti, re a si ahwo Izrẹl no Ijipti ze. Mosis nana avọ Erọn.+

28 Evaọ ẹdẹ yena nọ Jihova ọ ta ẹme kẹ Mosis evaọ ẹkwotọ Ijipti, 29 Jihova ọ ta kẹ Mosis nọ: “Mẹ họ Jihova. Vuẹ Fẹro ovie Ijipti oware kpobi nọ mẹ be ta kẹ owhẹ.” 30 Mosis ọ tẹ ta kẹ Jihova nọ: “Rri! Me wo ẹbẹbẹ ẹmeọta,* ẹvẹ Fẹro ọ te rọ gaviezọ kẹ omẹ?”+

7 Kẹsena Jihova ọ tẹ ta kẹ Mosis nọ: “Rri, me ru owhẹ wọhọ Ọghẹnẹ* kẹ Fẹro no, yọ Erọn oniọvo ra ọ te jọ ọruẹaro ra.+ 2 Whọ rẹ wariẹ oware kpobi nọ mẹ te ta kẹ owhẹ kẹe, yọ Erọn oniọvo ra ọ te ta ẹme kẹ Fẹro, o ve ti siobọno ahwo Izrẹl no ẹkwotọ riẹ. 3 Rọkẹ omẹ, mẹ te kuvẹ re udu Fẹro o jọ gaga,+ me ve ti ru eware eka gbe iruo igbunu mẹ vihọ evaọ ẹkwotọ Ijipti.+ 4 Rekọ Fẹro ọ te gaviezọ kẹ owhẹ hẹ, obọ mẹ u ve ti te Ijipti, mẹ vẹ te rehọ ogbotu mẹ,* ahwo mẹ, ahwo Izrẹl no ẹkwotọ Ijipti avọ ẹdhoguo ologbo.+ 5 Ahwo Ijipti a vẹ te ginẹ riẹ nọ mẹ họ Jihova+ okenọ mẹ tẹ rriẹ obọ mẹ wọso Ijipti jẹ rehọ ahwo Izrẹl na no udevie rai no.” 6 Mosis avọ Erọn a te ru oware nọ Jihova ọ ta kẹ ae; nwanọ ere a ru. 7 Mosis ọ jọ ikpe udhone yọ Erọn ọ jọ ikpe udhone-gbesa okenọ a rọ ta ẹme kẹ Fẹro.+

8 Jihova ọ tẹ ta kẹ Mosis avọ Erọn nọ: 9 “Otẹrọnọ Fẹro ọ ta kẹ owhai nọ, ‘Ru iruo igbunu,’ whọ vẹ ta kẹ Erọn nọ, ‘Rehọ ọkpọ ra re who gbolo iei fihọ otọ evaọ aro Fẹro.’ U ti zihe ruọ araomuomu ologbo.”+ 10 Fikiere Mosis avọ Erọn a tẹ nyabru Fẹro a te ru epanọ Jihova ọ ta kẹ ae na dẹẹ. Erọn o gbolo ọkpọ riẹ fihọ otọ evaọ aro Fẹro avọ idibo riẹ, u te zihe ruọ araomuomu ologbo. 11 Rekọ Fẹro o te se ezae iwareghẹ gbe egbẹva na ze, kẹsena izerẹ Ijipti nọ i re ru emajiki+ a tẹ rọ emajiki* rai ru oware ovona.+ 12 Ae omomọvo o gbolo ọkpọ riẹ fihọ otọ, i te zihe ruọ eraomuomu ilogbo; rekọ ọkpọ Erọn ọ tẹ lọ ekpọ rai no. 13 Ghele na, udu Fẹro o jọ gaga,+ fikiere ọ gaviezọ kẹ ae he nwane wọhọ epanọ Jihova ọ ta na.

14 Kẹsena Jihova ọ tẹ ta kẹ Mosis nọ: “Udu Fẹro o rrọ gaga.+ Ọ se nọ o re siobọno ahwo na vrẹ hẹ. 15 Nyabru Fẹro evaọ ohiohiẹ. Rri! O bi kpobọ ame na! Who re dikihẹ oria nọ who re jo zere iei evaọ akọ Ethẹ Naele na; yọ whọ rẹ wha ọkpọ nọ o zihe ruọ araomuomu na lele oma, ọ rẹ jọ obọ ra.+ 16 Yọ whọ rẹ ta kẹe hrọ inọ, ‘Jihova Ọghẹnẹ ahwo Hibru o vi omẹ bru owhẹ ze,+ yọ ọ ta nọ: “Siobọno ahwo mẹ vrẹ re a ruẹse gọ omẹ evaọ obọ udhude na,” rekọ who bi yo ho rite enẹna. 17 Enẹ Jihova ọ ta: “Onana whọ te rọ riẹ nọ mẹ họ Jihova.+ Mẹ be rọ ọkpọ nọ ọ rrọ obọ mẹ na fa ame nọ ọ rrọ Ethẹ Naele na, o ve ti zihe ruọ azẹ. 18 Yọ iyei nọ e rrọ Ethẹ Naele na i ti whu, Ethẹ Naele na o ve ti gbo, ahwo Ijipti a te sae da ame Ethẹ Naele na ha.”’”

19 Kẹsena Jihova ọ tẹ ta kẹ Mosis nọ: “Ta kẹ Erọn nọ, ‘Rehọ ọkpọ ra re whọ rriẹ obọ ra rri ame Ijipti,+ ithẹ riẹ, ekame riẹ,* etẹre riẹ,+ gbe eria riẹ nọ a koko ame họ kpobi, re i zihe ruọ azẹ.’ Azẹ ọ te jọ ẹkwotọ Ijipti soso, makọ evaọ ikoko-ame ire gbe erọ itho.” 20 Evaọ okioke yena, Mosis avọ Erọn a tẹ nwani ru epanọ Jihova ọ ta na. Ọ kpare ọkpọ na ọ tẹ rehọ iẹe fa ame nọ ọ rrọ Ethẹ Naele na evaọ iraro Fẹro avọ idibo riẹ, ame nọ ọ rrọ ethẹ na kpobi o te zihe ruọ azẹ.+ 21 Iyei nọ e jọ ethẹ na i te whu,+ ethẹ na o te muhọ egbo, ahwo Ijipti a gbẹ jẹ sae da ame Ethẹ Naele na ha,+ yọ azẹ ọ jọ ẹkwotọ Ijipti soso.

22 Rekọ izerẹ Ijipti nọ i re ru emajiki a tẹ rọ iruẹru ebi rai ru oware ovona,+ u te ru nọ udu Fẹro o gbẹ rọ jọ gaga, fikiere ọ gaviezọ kẹ ae he nwane wọhọ epanọ Jihova ọ ta na.+ 23 Kẹsena Fẹro o te zihe kpobọ uwou riẹ, o se onana gboware ovo gbe he. 24 Fikiere ahwo Ijipti kpobi a tẹ jẹ tọ eria nọ e wariẹ Ethẹ Naele na họ be gwọlọ ame nọ a rẹ da, keme a gbẹ jẹ sae da ame Ethẹ Naele na ha. 25 Edẹ ihrẹ soso e tẹ vrẹ no umuo oke nọ Jihova ọ rọ tehe Ethẹ Naele na.

8 Kẹsena Jihova ọ tẹ ta kẹ Mosis nọ: “Nyabru Fẹro re whọ ta kẹe nọ, ‘Enẹ Jihova ọ ta: “Siobọno ahwo mẹ vrẹ re a ruẹse gọ omẹ.+ 2 Otẹrọnọ whọ gbẹ be se inọ who re siobọno ai vrẹ hẹ, me ti vi ikere ruọ otọ ra soso rọ kẹ owhai uye.+ 3 Yọ Ethẹ Naele na ọ te vọ avọ ikere, e vẹ te nyaze te ruọ evaọ uwou ra, evaọ ukpẹ ra, evaọ ehwa ra, evaọ iwou idibo ra je bru ahwo ra, e te ruọ ovini ra,* gbe iwho* nọ whọ rẹ jọ gua eka nọ a wuhu.+ 4 Ikere na i ti bru owhẹ ze, te ahwo ra, gbe idibo ra kpobi.”’”

5 Kẹsena Jihova ọ tẹ ta kẹ Mosis nọ: “Ta kẹ Erọn nọ, ‘Rriẹ obọ ra avọ ọkpọ ra rri ithẹ na, ekame Ethẹ Naele, gbe etẹre na, re who ru ikere na nyaze te ruọ ẹkwotọ Ijipti soso.’” 6 Fikiere Erọn ọ tẹ rriẹ obọ riẹ rri ame Ijipti, ikere na i te muhọ ẹnyaze be vọ ẹkwotọ Ijipti soso. 7 Rekọ izerẹ nọ i re ru emajiki na a tẹ rehọ iruẹru ebi rai ru oware ovona, ae omarai re a te ru ikere na nyaze te ruọ ẹkwotọ Ijipti.+ 8 Fẹro o te se Mosis avọ Erọn ọ tẹ ta nọ: “Lẹ Jihova re o si ikere na no kẹ omẹ gbe ahwo mẹ,+ keme mẹ gwọlọ siobọno ahwo na vrẹ re a ruẹsi dhe idhe kẹ Jihova.” 9 Mosis ọ tẹ ta kẹ Fẹro nọ: “Mẹ be kẹ owhẹ ọghọ na inọ vuẹ omẹ oke nọ mẹ rẹ lẹ nọ a ro si ikere na no kẹ owhẹ, idibo ra, ahwo ra, je no iwou rai. Evaọ Ethẹ Naele na ọvo i ti gbe kiọkọ.” 10 Ọ tẹ ta nọ: “Odẹnotha.” Fikiere ọ* tẹ ta nọ: “O te jọ epanọ whọ ta na re whọ riẹ nọ omọfa ọ rrọ họ nọ ọ wọhọ Jihova Ọghẹnẹ mai.+ 11 A ti si ikere na no kẹ owhẹ, no iwou ra, je si ai no kẹ idibo ra, gbe ahwo ra. Ethẹ Naele na ọvo a te siọ ae ba.”+

12 Fikiere Mosis avọ Erọn a tẹ nyavrẹ no aro Fẹro, Mosis ọ tẹ lẹ Jihova kpahe ikere nọ o vi bru Fẹro ze na.+ 13 Jihova o te ru epanọ Mosis ọ yare na, ikere na i te muhọ ewhu evaọ iwou na, ighẹ na, gbe obọ ẹwọ. 14 A jẹ kwa ai kokohọ ekueko nọ a rẹ sai kele he, otọ na u te muhọ egbo. 15 Nọ Fẹro ọ ruẹ nọ uye na u no otọ no, o te ru udu riẹ gaga,+ ọ gbẹ rọwo gaviezọ kẹ ae he nwane wọhọ epanọ Jihova ọ ta na.

16 Jihova ọ tẹ ta kẹ Mosis nọ: “Ta kẹ Erọn nọ, ‘Rriẹ ọkpọ ra re whọ rehọ iẹe fa ẹkpẹ* otọ na, ẹkpẹ* na o ti zihe ruọ etọle evaọ ẹkwotọ Ijipti soso.’” 17 A te ru ere. Erọn ọ rriẹ obọ riẹ avọ ọkpọ riẹ, ọ tẹ rehọ iẹe fa ẹkpẹ* otọ na, etọle na e tẹ tafru ahwo gbe erao. Ẹkpẹ* otọ na kpobi o te zihe ruọ etọle evaọ ẹkwotọ Ijipti soso.+ 18 Izerẹ nọ i re ru emajiki na a tẹ daoma re a ru oware ovona re a rehọ iruẹru ebi rai ru etọle ze,+ rekọ a sai ru ei hi. Etọle na e tẹ tafru ahwo gbe erao. 19 Fikiere izerẹ nọ i re ru emajiki na a tẹ ta kẹ Fẹro nọ: “Nọ uziobọ Ọghẹnẹ!”+ Rekọ udu Fẹro o tẹ gbẹ jọ gaga, fikiere ọ gaviezọ kẹ ae he nwane wọhọ epanọ Jihova ọ ta na.

20 Kẹsena Jihova ọ tẹ ta kẹ Mosis nọ: “Kpama evaọ irioke frifri re whọ nyai dikihẹ aro Fẹro. Rri! Ọ be nyaze obọ ame na! Yọ whọ rẹ ta kẹe hrọ inọ, ‘Enẹ Jihova ọ ta: “Siobọno ahwo mẹ vrẹ re a ruẹse gọ omẹ. 21 Rekọ otẹrọnọ who gbe siobọno ahwo mẹ vrẹ hẹ, me ti vi ọre-eni* se owhẹ, idibo ra, gbe ahwo ra jẹ ziọ iwou ra; ere-eni e te vọ iwou Ijipti, yọ i ti tube ruru otọ nọ a* dikihẹ dede. 22 Evaọ ẹdẹ yena, me ti ru ẹkwotọ Goshẹn nọ ahwo mẹ a be rria wo ohẹriẹ. Ere-eni evuevo e te jọ etẹe he,+ yọ onana whọ te rọ riẹ nọ mẹ, Jihova, mẹ rrọ ẹkwotọ na.+ 23 Me ti fi ohẹriẹ họ udevie ahwo mẹ avọ ahwo ra. Odẹnotha oka nana o te romavia.”’”

24 Jihova o te ru ere, owa ere-eni gbidi gbidi i te muhọ ẹvẹruọ uwou Fẹro gbe iwou idibo riẹ gbe ẹkwotọ Ijipti kpobi.+ Ere-eni na e tẹ raha otọ na.+ 25 Ukuhọ riẹ, Fẹro o te se Mosis avọ Erọn ọ tẹ ta nọ: “Wha nya, wha dhe idhe kẹ Ọghẹnẹ rai evaọ ẹkwotọ na.” 26 Rekọ Mosis ọ tẹ ta nọ: “U kiehọ re ma ru ere he, keme eware nọ ma ti ro dhe idhe kẹ Jihova Ọghẹnẹ mai i ti tu ahwo Ijipti oma.+ Otẹrọnọ ma dhe idhe nọ i re tu ahwo Ijipti oma evaọ aro rai, kọ a gbẹ te rọ itho fi omai? 27 Ma te nya ugbo edẹ esa kpobọ udhude na, ma vẹ jọ obei dhe idhe kẹ Jihova Ọghẹnẹ mai, nwane wọhọ epanọ ọ ta kẹ omai na.”+

28 Fẹro ọ tẹ ta nọ: “Me ti siobọno owhai vrẹ nyai dhe idhe kẹ Jihova Ọghẹnẹ rai evaọ obọ udhude na. Rekọ, wha thakpe nya thabọ hrọ họ. Wha lẹ kẹ omẹ.”+ 29 Mosis ọ tẹ ta nọ: “Obọnana mẹ be nyavrẹ no aro ra, mẹ te lẹ Jihova, yọ ere-eni na i ti no otọ kẹ Fẹro, idibo riẹ, gbe ahwo riẹ odẹnotha. Rekọ jọ Fẹro ọ gbẹ viẹ omai họ họ,* nọ ọ be rọ se inọ o re siobọno ahwo na vrẹ nyai dhe idhe kẹ Jihova ha.”+ 30 Kẹsena Mosis ọ tẹ nyavrẹ no aro Fẹro ọ tẹ lẹ Jihova.+ 31 Fikiere Jihova o te ru epanọ Mosis ọ ta na, ere-eni na i te no otọ kẹ Fẹro, idibo riẹ, gbe ahwo riẹ. Ọvo o kiọkọ họ. 32 Ghele na, Fẹro ọ tẹ wariẹ ru udu riẹ gaga, o siobọno ahwo na vrẹ hẹ.

9 Fikiere Jihova ọ tẹ ta kẹ Mosis nọ: “Nyabru Fẹro re whọ ta kẹe nọ, ‘Enẹ Jihova Ọghẹnẹ ahwo Hibru ọ ta: “Siobọno ahwo mẹ vrẹ re a ruẹse gọ omẹ.+ 2 Rekọ whọ tẹ se nọ who re siobọno ai vrẹ hẹ, who je kru rai fihọ otọ, 3 rri! obọ+ Jihova u ti mu erao ra evaọ obọ ẹwọ. Ẹyao ọgaga ọ te tehe enyenya na, eketekete na, ekamẹle na, owa erao na, gbe uthuru erao na.+ 4 Yọ Jihova o ti fi ohẹriẹ họ udevie erao Izrẹl avọ erao Ijipti hrọ, ọrọ ahwo Izrẹl ọvuọvo o ti whu hu.”’”+ 5 U te no ere no, Jihova o fi oke họ, inọ: “Odẹnotha Jihova o ti ru onana evaọ ẹkwotọ na.”

6 Jihova o ru onana evaọ ẹdẹ nọ ọ nwani lele iei, koghẹrẹ koghẹrẹ erao Ijipti kpobi i te muhọ ewhu,+ rekọ arao Izrẹl ọvo o whu hu. 7 Nọ Fẹro ọ nọ, rri! makọ arao Izrẹl ọvo o whu hu. Ghele na, udu Fẹro o gbẹ jọ gaga, o siobọno ahwo na vrẹ hẹ.+

8 Kẹsena Jihova ọ tẹ ta kẹ Mosis avọ Erọn nọ: “Whẹ iwizi nọ a si no ovini* ze vọ abọ ivẹ, Mosis o ve gbolo ai fihọ ofou evaọ aro Fẹro. 9 U ve ti zihe ruọ ovu owuwuru evaọ ẹkwotọ Ijipti soso, yọ u ti zihe ruọ eruẹso nọ i ti ru ela fihọ oma ahwo gbe erao evaọ ẹkwotọ Ijipti soso.”

10 Fikiere a tẹ whẹ iwizi no ovini* ze a te dikihẹ aro Fẹro, Mosis o te gbolo ai fihọ ofou, u te zihe ruọ eruẹso nọ i bi ru ela fihọ oma ahwo gbe erao. 11 Izerẹ nọ i re ru emajiki na a sai dikihẹ aro Mosis hi fiki eruẹso na, keme i mu izerẹ nọ i re ru emajiki na gbe ahwo Ijipti kpobi.+ 12 Rekọ Jihova ọ kuvẹ re udu Fẹro o jọ gaga, fikiere ọ gaviezọ kẹ ae he nwane wọhọ epanọ Jihova ọ ta kẹ Mosis na.+

13 Kẹsena Jihova ọ tẹ ta kẹ Mosis nọ: “Kpama evaọ irioke frifri re whọ nyai dikihẹ aro Fẹro, re whọ ta kẹe nọ, ‘Enẹ Jihova Ọghẹnẹ ahwo Hibru ọ ta: “Siobọno ahwo mẹ vrẹ re a ruẹse gọ omẹ. 14 Obọnana me bi vi iye mẹ kpobi ze rọ tehe udu ra, idibo ra, gbe ahwo ra, re whọ ruẹse riẹ nọ ohwo ọvo ọ rrọ họ nọ ọ wọhọ omẹ evaọ otọakpọ na soso.+ 15 Keme enẹ yọ mẹ rriẹ obọ mẹ rọ uye ogaga tehe owhẹ avọ ahwo ra no, yọ a hai ti voro owhẹ no otọakpọ na no. 16 Rekọ fiki ugogo ẹjiroro nana me ro vu owhẹ wa uzuazọ: re me dhesẹ ogaga mẹ kẹ owhẹ, je ru re a jọ otọakpọ na soso whowho odẹ mẹ.+ 17 Kọ who gbe bi ru oma oruoro kẹ ahwo mẹ nọ whọ gbẹ be rọwo siobọno ai vrẹ hẹ? 18 Me bi ti ru oso-itho ologbo rrọ odẹnotha evaọ oke utiona, onọ ọkpọ riẹ ọ re rrọ evaọ Ijipti hi no anwọ okenọ a rọ fae rite enẹna. 19 Fikiere vi ahwo nyae rehọ erao ra kpobi gbe eware ra kpobi* nọ e rrọ obọ ẹwọ ziọ evaọ uwou. Ohwo gbe arao kpobi nọ oso na o kohọ obọ ẹwọ nọ ọ ziọ uwou hu o ti whu okenọ oso-itho na ọ te rrọ ku ae.”’”

20 Ohwo kpobi evaọ udevie idibo Fẹro nọ ọ dhozọ ẹme Jihova ọ rehọ idibo riẹ gbe erao riẹ ziọ evaọ iwou vẹrẹ vẹrẹ, 21 rekọ ohwo kpobi nọ ọ daezọ ẹme Jihova ha ọ nyase idibo riẹ gbe erao riẹ ba obọ ẹwọ.

22 Kẹsena Jihova ọ tẹ ta kẹ Mosis nọ: “Rriẹ obọ ra rri obọ idhiwu na, re oso-itho ọ rrọ ku ẹkwotọ Ijipti kpobi,+ re ọ rrọ ku ohwo gbe arao gbe ẹbe ẹwọ kpobi evaọ ẹkwotọ Ijipti.”+ 23 Fikiere Mosis ọ tẹ rriẹ ọkpọ riẹ rri obọ idhiwu na, Jihova o te vi egbrara gbe oso-itho ze, erae* i te kie ziọ otọakpọ na, Jihova o te ru nọ oso-itho ọ jẹ rọ rrọ ku ẹkwotọ Ijipti. 24 Oso-itho ọ jẹ rrọ, yọ erae e be ware evaọ udevie oso-itho na. Ọ ga thesiwa; ọkpọ riẹ ọ re romavia ẹdẹvo ho evaọ ẹkwotọ na anwọ okenọ Ijipti o ro zihe ruọ orẹwho.+ 25 Oso-itho na ọ raha oware kpobi nọ o jọ ẹwọ evaọ ẹkwotọ Ijipti soso, no ohwo rite arao, ọ raha ẹbe kpobi jẹ raha ire ẹwọ kpobi.+ 26 Ẹkwotọ Goshẹn nọ ahwo Izrẹl a jọ ọvo oso-itho na o te he.+

27 Fikiere Fẹro o te vi uwou nyai se Mosis avọ Erọn ze ọ tẹ ta kẹ ae nọ: “Mẹ raha uzi no evaọ onana. Jihova o kiẹrẹe, mẹ avọ ahwo mẹ ma ru thọ. 28 Lẹ Jihova re egbrara gbe oso-itho Ọghẹnẹ na i serihọ. Kẹsena u ve ti no omẹ eva ze re me siobọno owhai vrẹ, wha te gbẹ jọ etenẹ ofa ha.” 29 Mosis ọ tẹ ta kẹe nọ: “Nọ mẹ tẹ nwani no okpẹwho na ruọ otafe, mẹ te kpare abọ mẹ rri Jihova. Egbrara na i ti serihọ yọ oso-itho na ọ te gbẹ rrọ họ, re whọ ruẹse riẹ nọ Jihova o wo otọakpọ na.+ 30 Rekọ rọkẹ owhẹ avọ idibo ra, mẹ riẹ vevẹ nọ makọ oke yena dede wha te dhozọ Jihova Ọghẹnẹ hẹ.”

31 Whaọ oso-itho na ọ raha eflase* avọ ebali na, keme ebali na e so emọ họ uke no yọ eflase na e whẹ ivo họ no. 32 Rekọ ọraha na o te iwhiti avọ espẹte* na ha, keme enana yọ ekakọ nọ ezi rai o ri te he. 33 Mosis o te no okpẹwho na ruọ otafe no aro Fẹro ọ tẹ kpare abọ riẹ rri Jihova, egbrara avọ oso-itho na i te serihọ, oso na ọ tẹ siọ otọ na ba ẹrrọ fihọ.+ 34 Nọ Fẹro ọ ruẹ nọ oso na, oso-itho na, gbe egbrara na i serihọ no, ọ tẹ wariẹ raha uzi je ru udu riẹ gaga,+ tei te idibo riẹ. 35 Udu Fẹro o tẹ gbẹ jọ gaga, o siobọno ahwo Izrẹl vrẹ hẹ, nwane wọhọ epanọ Jihova ọ ta ẹkwoma Mosis na.+

10 Kẹsena Jihova ọ tẹ ta kẹ Mosis nọ: “Nyabru Fẹro, keme mẹ kuvẹ no re udu riẹ avọ udu idibo riẹ e jọ gaga,+ re mẹ ruẹsi ru eware eka mẹ nana evaọ aro riẹ,+ 2 gbe re whọ ruẹsi gbiku kẹ emọ* ra avọ emọ-iruọmọ* ra epanọ mẹ rọ rehọ obọ ogaga tehe Ijipti gbe eware eka nọ me ru evaọ udevie rai;+ wha vẹ te ginẹ riẹ nọ mẹ họ Jihova.”

3 Fikiere Mosis avọ Erọn a tẹ nyabru Fẹro a tẹ ta kẹe nọ: “Enẹ Jihova Ọghẹnẹ ahwo Hibru ọ ta, ‘Ẹvẹ whọ rẹ se kri te inọ whọ rẹ romakpotọ kẹ omẹ hẹ?+ Siobọno ahwo mẹ vrẹ re a ruẹse gọ omẹ. 4 Keme whọ tẹ gbẹ be se inọ who re siobọno ahwo mẹ vrẹ hẹ, me bi vi ebaka-ẹkpẹ ze ẹkwotọ* ra odẹnotha. 5 Yọ i ti ruru otọ na, a te sae ruẹ otọ na ha. A te re eware nọ oso-itho na ọ raha ha nọ i kiọkọ kẹ owhẹ, yọ a te re ire ra kpobi nọ e be rro ze evaọ obọ ẹwọ.+ 6 E te vọ iwou ra, iwou idibo ra kpobi, gbe iwou Ijipti kpobi evaọ oghẹrẹ nọ esẹ ra gbe esẹ-ilogbo ra a ruẹ vievie he anwọ oke nọ a rọ rrọ ẹkwotọ nana ze rite inẹnẹ na.’”+ Kẹsena o te kuomarẹriẹ ọ tẹ nyavrẹ no aro Fẹro.

7 Idibo Fẹro a tẹ ta kẹe nọ: “Ẹvẹ ọzae nana o ti si uye bẹ* omai kri te? Siobọno ezae na vrẹ re a ruẹse gọ Jihova Ọghẹnẹ rai. Kọ whọ re ruẹ nọ Ijipti ọ raha kpobi no?” 8 Fikiere a te se Mosis avọ Erọn zihe bru Fẹro ze, ọ tẹ ta kẹ ae nọ: “Wha nya, wha nyae gọ Jihova Ọghẹnẹ rai. Rekọ amono dẹẹ a be te nya?” 9 Mosis ọ tẹ ta nọ: “Te emoha mai ma te gbẹ nya, ekpako-soso mai, emezae mai, emetẹ mai, igodẹ mai, gbe iruẹ mai,+ keme ma ti ru ehaa kẹ Jihova.”+ 10 Ọ tẹ ta kẹ ae nọ: “Mẹ tẹ dawo iẹe siobọno owhai avọ emọ rai vrẹ, kiyọ Jihova ọ ginẹ rrọ kugbe owhai!+ U muẹro nọ umuomu jọ wha be gwọlọ ru na. 11 Ijo! Ezae rai ọvo a sae nya re a gọ Jihova, keme oware nọ wha yare oye.” Kẹsena a te le ai ruọ otafe no aro Fẹro.

12 Jihova ọ tẹ ta kẹ Mosis nọ: “Rriẹ obọ ra rri ẹkwotọ Ijipti re ebaka-ẹkpẹ na e nyaze, re e nyaze ẹkwotọ Ijipti re e re ẹbe ẹkwotọ na kpobi no, oware kpobi nọ oso-itho na ọ nyaseba.” 13 Mosis ọ tẹ nwane rriẹ ọkpọ riẹ rri ẹkwotọ Ijipti, Jihova o te ru ofou no obọ ovatha-ọre ze fou ẹkwotọ na ẹdẹ yena soso gbe aso yena soso. Nọ ohiohiẹ o te, ofou nọ o no obọ ovatha-ọre ze na ọ tẹ wọ ebaka-ẹkpẹ na ze. 14 Ebaka-ẹkpẹ na e tẹ ziọ ẹkwotọ Ijipti soso i te kiemu ẹkwotọ Ijipti soso.+ O ga thesiwa;+ ebaka-ẹkpẹ i ri bu tere ẹdẹvo vievie he, yọ e te gbẹ wariẹ bu tere ofa vievie he. 15 Ebaka-ẹkpẹ na i ruru ẹkwotọ na kpobi, ẹkwotọ na o muebi fiki rai; e re ẹbe ẹkwotọ na kpobi gbe ibi-ire erọ ire kpobi nọ oso-itho na ọ nyaseba; ẹbe ọrọrọ ọvuọvo o gbe kiọkọ ire na hayo ẹbe otọ na ha evaọ ẹkwotọ Ijipti soso.

16 Fikiere Fẹro o te se Mosis avọ Erọn kpata kpata ọ tẹ ta nọ: “Mẹ raha uzi Jihova Ọghẹnẹ rai je ru owhai thọ no. 17 Ivie, rọ uzioraha mẹ rọvrẹ omẹ ẹsiẹvo nana ọvo, re wha lẹ Jihova Ọghẹnẹ rai inọ o si uye ọraha ologbo nana no kẹ omẹ.” 18 Ọ* tẹ nyavrẹ no aro Fẹro ọ tẹ lẹ Jihova.+ 19 Jihova o te ku ofou na rẹriẹ, o te zihe ruọ ofou ọgaga nọ o bi no ofẹ ukiediwo-ọre ze, o tẹ wọ ebaka-ẹkpẹ na vrẹ nyai fihọ Abade Ọwawae na. Abaka-ẹkpẹ ọvo dede o kiọkọ ẹkwotọ Ijipti soso ho. 20 Rekọ Jihova ọ tẹ kuvẹ re udu Fẹro o jọ gaga,+ o siobọno ahwo Izrẹl vrẹ hẹ.

21 Jihova ọ tẹ ta kẹ Mosis nọ: “Rriẹ obọ ra rri obọ idhiwu na, re ebi ọ ziọ ẹkwotọ Ijipti soso, ebi ọlala nọ o re mu oma.” 22 Mosis ọ tẹ nwane rriẹ obọ riẹ rri idhiwu na, ebi ọlala ọ tẹ jọ ẹkwotọ Ijipti soso edẹ esa.+ 23 A ruẹ ohwohwo ho, yọ ọvuọvo rai ọ kpama no oria nọ ọ jọ họ evaọ edẹ esa; rekọ ahwo Izrẹl kpobi a wo elo evaọ eria nọ a jẹ rria.+ 24 Kẹsena Fẹro o te se Mosis ọ tẹ ta nọ: “Wha nyae gọ Jihova.+ Igodẹ rai avọ iruẹ rai ọvo i ti kiọkọ obonẹ. Makọ emọ rai dede a sai lele owhai nya.” 25 Rekọ Mosis ọ tẹ ta nọ: “Whẹ omara whọ te kẹ omai* idhe avọ idhe emahọ re, re ma rehọ ae dhe idhe kẹ Jihova Ọghẹnẹ mai.+ 26 Erao mai i ti lele omai nya re. Makọ arao* ọvo dede ma be nyaseba ha, keme ma te jarai rehọ ejọ rọ gọ Jihova Ọghẹnẹ mai, yọ ma riẹ eware nọ ma ti ro dhe idhe rọ gọ Jihova ha bẹsenọ ma re te obei no.” 27 Fikiere Jihova ọ tẹ kuvẹ re udu Fẹro o jọ gaga, ọ rọwo siobọno ai vrẹ hẹ.+ 28 Fẹro ọ tẹ ta kẹe nọ: “Nya no aro mẹ no! Whọ gbẹ dawo iẹe nyaze te ruẹ ovao mẹ ofa ha, keme evaọ ẹdẹ nọ whọ ruẹ ovao mẹ, who ti whu.” 29 Mosis ọ tẹ ta nọ: “Nwanọ epanọ whọ ta na, mẹ te gbẹ dawo iẹe nyaze te ruẹ ovao ra ofa ha.”

11 Jihova ọ tẹ ta kẹ Mosis nọ: “Uye ọvo u kiọkọ nọ mẹ te kẹ Fẹro avọ Ijipti. Kẹsena o ve ti siobọno owhai vrẹ no etenẹ no.+ Okenọ o ti siobọno owhai vrẹ, ele o ti le owhai no otọ na.+ 2 Obọnana ta kẹ ahwo na inọ jọ ezae na gbe eyae na kpobi a mi erivẹ rai ekwakwa isiliva gbe erọ igoru.”+ 3 Jihova o ru ahwo Ijipti rri ahwo na aro. U te no ere no, Mosis omariẹ o zihe ruọ ohwo nọ a je rri ruaro gaga no evaọ ẹkwotọ Ijipti evaọ udevie idibo Fẹro gbe udevie ahwo na.

4 Kẹsena Mosis ọ tẹ ta nọ: “Enẹ Jihova ọ ta, ‘Evaọ obọ udevie aso mẹ te nyaruọ evaọ Ijipti,+ 5 yọ ọmọ ọsosuọ kpobi evaọ ẹkwotọ Ijipti o ti whu,+ no ọmọ ọsosuọ Fẹro nọ ọ keria agbara-uvie na rite ọmọ ọsosuọ ọrigbo ọmọtẹ nọ o bi ru iruo evaọ oria nọ a rẹ jọ rọ obọ* wuhu eware, gbe ọmọ ọsosuọ kpobi ọrọ erao na.+ 6 Evaọ ẹkwotọ Ijipti soso, oviẹ ogaga o te jariẹ, utionọ o re via ẹdẹvo ho yọ o te gbẹ wariẹ via ofa ha.+ 7 Rekọ makọ arakọ dede ọ te gbọ ku* ahwo Izrẹl he, ezae rai hayo erao rai, re wha riẹ nọ Jihova ọ rẹ sai fi ohẹriẹ họ udevie ahwo Ijipti avọ ahwo Izrẹl.’+ 8 Idibo ra kpobi a vẹ te nyabru omẹ ze je kiẹzẹ vovao tuotọ kẹ omẹ, a vẹ te ta nọ, ‘Nya, te owhẹ te ahwo kpobi nọ a bi lele owhẹ.’+ Nọ onana o tẹ vrẹ no, mẹ vẹ te nyavrẹ.” Kẹsena ọ tẹ nyavrẹ no aro Fẹro avọ ofu.

9 Jihova ọ tẹ ta kẹ Mosis nọ: “Fẹro ọ te gaviezọ kẹ owhẹ hẹ,+ re iruo igbunu mẹ e ruẹsi vihọ evaọ ẹkwotọ Ijipti.”+ 10 Mosis avọ Erọn a ru iruo igbunu nana kpobi evaọ aro Fẹro,+ rekọ Jihova ọ kuvẹ re udu Fẹro o jọ gaga, o gbe siobọno ahwo Izrẹl no ẹkwotọ riẹ hẹ.+

12 Jihova ọ tẹ ta kẹ Mosis avọ Erọn evaọ ẹkwotọ Ijipti nọ: 2 “Amara nana ọ rẹ jọ emuhọ emerae kẹ owhai. Ọ rẹ jọ ọrọ ọsosuọ evaọ usu emerae ukpe na kẹ owhai.+ 3 Ta kẹ ogbotu Izrẹl soso inọ, ‘Evaọ ẹdẹ avọ ikpe amara nana, ae omomọvo ọ rẹ rehọ ogodẹ+ kẹ omarai rọkẹ uwou ọsẹ rai, ogodẹ ọvo rọkẹ uwou ovuovo. 4 Rekọ otẹrọnọ ahwo uwou na a kawo hrọ rọkẹ ogodẹ na, ae omarai avọ ọrivẹ rai* nọ ọ mae kẹle ae a rẹ ghale iẹe evaọ uwou rai lele epaọ unu ahwo* na. Okenọ a ti roro unu ahwo na, a re roro kpahe utho nọ omomọvo ọ te re evaọ ogodẹ na. 5 Ogodẹ rai ọ rẹ jọ omakọkọ,+ ọrọ ọzae nọ o te ẹgbukpe no. Wha sae jọ usu imigbo hayo ewe salọ. 6 Wha rẹ rẹrotei rite ẹdẹ avọ ikpegbene amara nana,+ uviuwou kpobi evaọ Izrẹl* u re kpei hrọ nọ ọre o te kiediwi no.*+ 7 A rẹ rehọ azẹ riẹ jọ hrọ a vẹ frẹ riẹ ku tofẹ tofẹ unuẹthẹ na gbe ehru unuẹthẹ iwou nọ a te jọ re iẹe na.+

8 “‘A rẹ re arao na evaọ aso nana hrọ.+ A rẹ rọ erae tọe a vẹ re iẹe kugbe ebrẹdi nọ ọ kare ẹvi*+ gbe ẹbe ọyayare.+ 9 Wha rẹ re abọ riẹ ọvuọvo ọkpokpọ họ hayo kaka iẹe he, wha rẹ rọ ame there iei hi, rekọ wha rẹ rọ erae tọe, uzou riẹ kugbe awọ riẹ gbe ekwakwa obeva riẹ. 10 Wha rẹ nyasiọ abọ riẹ ọvuọvo ba te ohiohiẹ vievie he, rekọ onọ o jariẹ kiọkọ te ohiohiẹ kpobi, wha rẹ rọ erae mahe iẹe.+ 11 Yọ enẹ wha rẹ rọ re iẹe, avọ umueku rai nọ wha gbamu,* eviẹ nọ e rrọ awọ rai, gbe ọkpọ rai nọ ọ rrọ obọ rai; yọ ovovẹrẹ wha rẹ rọ re iẹe. Onana yọ Ọnyavrẹ Jihova. 12 Keme mẹ te nya eva Ijipti vrẹ evaọ aso nana, me ve ti kpe ọmọ ọsosuọ kpobi evaọ ẹkwotọ Ijipti, no ohwo rite arao;+ me ve ti bruoziẹ kpe* eghẹnẹ Ijipti kpobi.+ Mẹ họ Jihova. 13 Azẹ na ọ te jọ oka rai evaọ iwou nọ wha rrọ; mẹ vẹ te ruẹ azẹ na mẹ vẹ nyavrẹ owhai, fikiere ọraha na o ti bru owhai ze ti kpe owhai hi okenọ me ti kpe ikpakpe evaọ ẹkwotọ Ijipti.+

14 “‘Ẹdẹ nana ọ rẹ jọ ẹdẹ ekareghẹhọ kẹ owhai, yọ o rẹ jọ ẹdẹ nọ wha re ro ru ehaa kẹ Jihova hrọ evaọ ige rai kpobi. O rẹ jọ uzi nọ o rẹ jọ ribri nọ wha re ru ehaa riẹ. 15 Edẹ ihrẹ wha rẹ re ebrẹdi nọ ọ kare ẹvi.+ Ẹhẹ, evaọ ẹdẹ ọsosuọ na wha re si ukulu nọ u wo ẹvi no iwou rai, keme ohwo kpobi nọ ọ re oware nọ u wo ẹvi no ẹdẹ ọsosuọ na rite ẹdẹ avọ ihrẹ na, a re kpe ohwo* yena no Izrẹl hrọ. 16 Evaọ ẹdẹ ọsosuọ na wha re ru okokohọ ọrẹri, yọ evaọ ẹdẹ avọ ihrẹ wha ve je ru okokohọ ọrẹri ọfa. A re ru iruo evuevo evaọ edẹ nana ha.+ Utho oware nọ ohwo* kpobi ọ rẹ re ọvo, oye ọvo a rẹ sae ruẹrẹhọ kẹ owhai.

17 “‘Wha re ru Ehaa Ebrẹdi nọ Ọ Kare Ẹvi na hrọ,+ keme evaọ ugogo ẹdẹ nana mẹ te rọ rehọ ogbotu* rai no ẹkwotọ Ijipti. Yọ wha re koko ẹdẹ nana hrọ evaọ ige rai kpobi wọhọ uzi nọ o rẹ jọ ribri. 18 Evaọ amara ọsosuọ na, evaọ ẹdẹ avọ ikpegbene amara na, evaọ owọwọ, wha rẹ re ebrẹdi nọ ọ kare ẹvi rite ẹdẹ avọ udhegbọvo amara na, evaọ owọwọ.+ 19 Ukulu nọ u wo ẹvi o rẹ jọ iwou rai vievie he evaọ edẹ ihrẹ, keme ohwo jọ ọ tẹ re oware nọ u wo ẹvi, te ọ rrọ ọrara hayo ọmotọ,+ a re kpe ohwo* yena no ogbotu Izrẹl hrọ.+ 20 Wha rẹ re oware ovo nọ u wo ẹvi hi. Evaọ iwou rai kpobi, ebrẹdi nọ ọ kare ẹvi wha rẹ re.’”

21 Mosis ọ tẹ nwani se ekpako Izrẹl kpobi+ ọ tẹ ta kẹ ae nọ: “Wha nya re wha salọ erao eboba* rọkẹ iviuwou rai ọvuọvo, re wha kpe arao idhe Ọnyavrẹ na. 22 Kẹsena wha ve duwu ekru igbe hisọp fihọ azẹ nọ ọ rrọ odhe, wha vẹ rehọ azẹ na fa ehru unuẹthẹ gbe tofẹ tofẹ unuẹthẹ na; yọ ohwo ọvo evaọ usu rai ọ rẹ ruọ otafe uwou riẹ hẹ ri bọo ohiohiẹ. 23 Kẹsena nọ Jihova ọ te nyavrẹ re o kpe ahwo Ijipti, nọ ọ jẹ ruẹ azẹ na evaọ ehru unuẹthẹ na gbe tofẹ tofẹ unuẹthẹ na, Jihova ọ vẹ te nyavrẹ aro unu-uwou rai, ọ te kuvẹ re ọraha uwhu na ọ ruọ eva iwou rai hi.+

24 “Wha re koko oware nana hrọ wọhọ ujaje nọ o rẹ jọ ribri kẹ owhai gbe emezae rai.+ 25 Yọ okenọ wha tẹ ruọ eva ẹkwotọ nọ Jihova ọ te kẹ owhai na no wọhọ epanọ ọ ta na, wha re koko ekareghẹhọ nana hrọ.+ 26 Nọ emezae rai a tẹ nọ owhai nọ, ‘Eme họ otofa ekareghẹhọ nana kẹ owhai?’+ 27 wha rẹ ta nọ, ‘Nọ idhe Ọnyavrẹ kẹ Jihova, ọnọ ọ nyavrẹ iwou ahwo Izrẹl evaọ Ijipti okenọ ọ kẹ ahwo Ijipti uye, rekọ ọ nyasiọ iwou mai ba.’”

Ahwo na a te guzou kpotọ je kiẹzẹ vovao tuotọ. 28 Fikiere ahwo Izrẹl a tẹ nya a tẹ nwani ru epanọ Jihova ọ ta kẹ Mosis avọ Erọn na.+ Nwanọ ere a ru.

29 Kẹsena evaọ udevie aso, Jihova o te kpe ọmọ ọsosuọ kpobi evaọ ẹkwotọ Ijipti,+ no ọmọ ọsosuọ Fẹro nọ ọ keria agbara-uvie na rite ọmọ ọsosuọ ohwo nọ a mu ziọ igbo nọ ọ jọ uwou-odi,* gbe ọmọ ọsosuọ kpobi ọrọ erao na.+ 30 Fẹro ọ tẹ kpama evaọ aso yena avọ idibo riẹ kpobi gbe ahwo Ijipti nọ a kiọkọ kpobi, ubo oviẹ ogaga o tẹ romavia evaọ udevie ahwo Ijipti, keme uwou ovuọvo o jariẹ hẹ nọ ohwo ọ jọ whu hu.+ 31 Ọ tẹ nwani se Mosis avọ Erọn+ evaọ aso na ọ tẹ ta nọ: “Wha kpama, wha no udevie ahwo mẹ, te owhai te ahwo Izrẹl nọ a kiọkọ. Wha nyae gọ Jihova, wọhọ epanọ wha ta na.+ 32 Wha rehọ ithuru erao rai gbe ewa erao rai re wha nya nwane wọhọ epanọ wha ta na.+ Rekọ wha rẹ jẹ ghale omẹ hrọ.”

33 Ahwo Ijipti a te mu ahwo na oma họ ẹkpakpa inọ a no ẹkwotọ na no kpata kpata,+ be ta nọ, “Keme ewhu mai kpobi ma bi ti whu na!”+ 34 Fikiere ahwo na a tẹ wọ eflawa rai nọ a gua no nọ a ri fi ẹvi họ họ, avọ iwho* rai nọ a rẹ jọ gua eflawa, a tẹ variẹ ae fihọ iwu rai wọ fihọ ẹkoko rai. 35 Ahwo Izrẹl na a ru oware nọ Mosis ọ ta kẹ ae na, a mi ahwo Ijipti ekwakwa isiliva gbe erọ igoru gbe iwu.+ 36 Jihova o ru ahwo Ijipti rri ahwo na aro, a tẹ kẹ ae eware nọ a ta nọ a kẹ ae na, a kwa eware ahwo Ijipti.+

37 Kẹsena ahwo Izrẹl a tẹ wọ no Ramesis+ bi kpohọ Sọkọt,+ oware wọhọ ezae idu egba ezeza (600,000) nọ e be nya owotọ, yọ a kele emaha na ha.+ 38 Yọ ogbotu ahwo sa-sa*+ a lele i rai nya re, te ithuru erao gbe ewa erao, erao buobu gbidi gbidi. 39 A te mu eflawa nọ a gua nọ a wha no obọ Ijipti ze na họ ebeki, a ru rai fihọ ikulu igheghelie erọ ebrẹdi nọ ọ kare ẹvi. A fi ẹvi họ ai hi, keme idudhe a ro le ai no Ijipti fikiere a sae ruẹrẹ ekwakwa emu ọvuọvo họ kẹ omarai hi.+

40 Ahwo Izrẹl nọ a jẹ rria Ijipti na,+ a jọ erara ikpe egba ene gbe ọgba (430).+ 41 Evaọ ekuhọ ikpe egba ene gbe ọgba (430) na, evaọ ugogo ẹdẹ nana, ogbotu* Jihova kpobi a tẹ nyavrẹ no ẹkwotọ Ijipti. 42 Onana yọ aso nọ a te hai ro ru ehaa epanọ Jihova ọ rọ rehọ ae no ẹkwotọ Ijipti ze. Ahwo Izrẹl kpobi a re koko aso nana kẹ Jihova evaọ ige rai kpobi.+

43 Kẹsena Jihova ọ tẹ ta kẹ Mosis avọ Erọn nọ, “Onana họ uzi Ọnyavrẹ na: Ọrara ọvuọvo ọ rẹ jariẹ re he.+ 44 Rekọ otẹrọnọ ohwo jọ o wo ọrigbo ọzae ọnọ ọ rehọ ugho dẹ, whọ rẹ yawo iẹe.+ Ẹsiẹe ọvo ọ jẹ sae jariẹ re. 45 Ohwo nọ ọ ziọ ukane gbe ohwo nọ a rehọ iruo ọ rẹ jariẹ re he. 46 Evaọ uwou ovo a rẹ jọ re iẹe. Wha rẹ rehọ abọ arao na ọvuọvo ruọ otafe uwou na vievie he, yọ wha re wiri ugbonwa riẹ ọvuọvo vievie he.+ 47 Ogbotu ahwo Izrẹl kpobi a re ru ehaa riẹ. 48 Otẹrọnọ ọrara jọ ọ be rria kugbe owhai yọ ọ gwọlọ ru ehaa Ọnyavrẹ na kẹ Jihova, ọzae kpobi nọ ọ rrọ uwou riẹ ọ rẹ yawo hrọ. Kẹsena ọ vẹ sae nyaze ti ru ehaa na, ọ vẹ te jọ wọhọ ọmotọ. Rekọ ọzae nọ ọ yawo ho ọ rẹ jariẹ re he.+ 49 Uzi ovona o rẹ jọ kẹ ọmotọ gbe ọrara nọ ọ be rria udevie rai.”+

50 Fikiere ahwo Izrẹl kpobi a tẹ nwani ru epanọ Jihova ọ ta kẹ Mosis avọ Erọn na. Nwanọ ere a ru. 51 Evaọ ugogo ẹdẹ nana, Jihova ọ rehọ ahwo Izrẹl kugbe ogbotu* rai no ẹkwotọ Ijipti ze.

13 Jihova ọ tẹ gbẹ ta kẹ Mosis nọ: 2 “Rọ ọmọzae ọsosuọ kpobi* evaọ udevie ahwo Izrẹl mudhe* kẹ omẹ. Ọmọzae ọsosuọ nọ a yẹ, te ọrọ ohwo te ọrọ arao yọ ọmẹ.”+

3 Kẹsena Mosis ọ tẹ ta kẹ ahwo na nọ: “Wha kareghẹhọ ẹdẹ nana nọ wha rọ nya no Ijipti na,+ no oria nọ wha jẹ jọ igbo,* keme obọ ogaga Jihova ọ rọ rehọ owhai no etenẹ.+ Fikiere wha rẹ re oware ovo nọ u wo ẹvi* hi. 4 Ẹdẹ nana wha bi ro kpo evaọ amara Ebib* na.+ 5 Nọ Jihova ọ tẹ rehọ owhẹ ziọ ẹkwotọ ahwo Kenan, ahwo Hit, ahwo Amọ, ahwo Hiv, gbe ahwo Jebus no,+ onọ o duwu iyei kẹ esẹ-esẹ ra nọ ọ te kẹ owhẹ,+ ẹkwotọ nọ ame-ivie gbe ọnyọ i bi jo su na,+ who re ru ekareghẹhọ nana hrọ evaọ amara nana. 6 Edẹ ihrẹ whọ rẹ re ebrẹdi nọ ọ kare ẹvi,+ yọ evaọ ẹdẹ avọ ihrẹ na who re ru ehaa kẹ Jihova. 7 Ebrẹdi nọ ọ kare ẹvi whọ rẹ re evaọ edẹ ihrẹ na;+ yọ oware ovo nọ u wo ẹvi o rẹ jọ obọ ra ha,+ ukulu nọ u wo ẹvi o rẹ jọ kugbe owhẹ hẹ evaọ ẹkwotọ* ra soso. 8 Yọ whọ rẹ ta kẹ ọmọzae ra hrọ evaọ ẹdẹ yena inọ, ‘Fiki oware nọ Jihova o ru kẹ omẹ nọ me je no Ijipti.’+ 9 Yọ onana o rẹ te jọ kẹ owhẹ wọhọ oka evaọ obọ ra jẹ wọhọ ekareghẹhọ evaọ aruezo* ra,+ re uzi Jihova o ruẹse jọ evaọ unu ra, keme obọ ogaga Jihova ọ rọ rehọ owhẹ no Ijipti ze. 10 Who re koko uzi nana hrọ evaọ oke riẹ nọ a fihọ no ukpe te ukpe.+

11 “Nọ Jihova ọ tẹ rehọ owhẹ ziọ ẹkwotọ ahwo Kenan no, onọ o duwu iyei kẹ owhẹ gbe esẹ-esẹ ra inọ ọ te kẹ owhẹ na,+ 12 whọ rẹ rehọ ọmọzae ọsosuọ* kpobi kẹ Jihova hrọ, jegbe ọmọ ọsosuọ arao kpobi nọ ọ rrọ ọrọ ọzae nọ who wo. Erọ ezae na yọ erọ Jihova.+ 13 Whọ rẹ rehọ ogodẹ rọ dẹ ọmọ ọsosuọ eketekete kpobi zihe ze, rekọ otẹrọnọ whọ dẹ riẹ zihe ze he, who re wiri uriohọ riẹ hrọ. Yọ whọ rẹ dẹ ọmọzae ọsosuọ kpobi evaọ usu emezae ra zihe ze.+

14 “Otẹrọnọ ọmọzae ra ọ nọ owhẹ ẹdẹfa nọ, ‘Eme họ otofa onana?’ whọ vẹ ta kẹe nọ, ‘Obọ ogaga Jihova ọ rọ rehọ omai no Ijipti ze, oria nọ ma jẹ jọ igbo.+ 15 Nọ Fẹro ọ se thahe thahe nọ o re siobọno omai vrẹ hẹ,+ Jihova o te kpe ọmọ ọsosuọ kpobi evaọ ẹkwotọ Ijipti, no ọmọ ọsosuọ ohwo rite ọmọ ọsosuọ arao.+ Oyejabọ nọ mẹ be rọ rehọ ọrọ ọzae ọsosuọ kpobi* dhe idhe kẹ Jihova na, yọ mẹ be dẹ ọmọzae ọsosuọ kpobi ọrọ emezae mẹ zihe ze.’ 16 Onana o rẹ jọ wọhọ oka hrọ evaọ obọ ra jẹ wọhọ oware nọ a rọ gba uzou evaọ aruezo* ra,+ keme obọ ogaga Jihova ọ rọ rehọ omai no Ijipti ze.”

17 Whaọ nọ Fẹro o siobọno ahwo na vrẹ, Ọghẹnẹ o su rai nya edhere ẹkwotọ ahwo Filistia ha, dede nọ oye o kẹle. Keme Ọghẹnẹ ọ ta nọ: “Ahwo na a sai nwene iroro rai nọ a tẹ rẹriẹ ovao ku ẹmo a ve ti zihe kpobọ Ijipti.” 18 Fikiere Ọghẹnẹ o te ru ahwo na nya wariẹ evaọ edhere udhude orọ Abade Ọwawae na.+ Rekọ uhie ẹmo* ahwo Izrẹl a dhe họ nya no ẹkwotọ Ijipti. 19 Mosis ọ rehọ igbenwa Josẹf lele oma re, keme Josẹf o ru emezae Izrẹl duwu iyei egaga, inọ: “Ọghẹnẹ ọ te rẹriẹ ovao rri owhai hrọ, yọ wha rẹ rehọ igbenwa mẹ lele oma no etenẹ hrọ.”+ 20 A te no Sọkọt a te wohọ Itham, evaọ akọ udhude na.

21 Jihova ọ jẹ karo kẹ ae evaọ oke uvo ẹkwoma* ukulu ẹgho* re o su ae evaọ edhere na,+ gbe ukulu erae* evaọ aso re ọ kẹ ae elo, re a sae nya evaọ uvo gbe aso.+ 22 Ukulu ẹgho* na ọ rẹ nya no aro ahwo na ha evaọ oke uvo, ere ukulu erae* na re evaọ aso.+

14 Jihova ọ tẹ ta kẹ Mosis nọ: 2 “Vuẹ ahwo Izrẹl inọ a kuomarẹriẹ re a wohọ aro Paehaharọt, evaọ udevie Migdọl avọ abade na, nọ o rrọ aro Bale-zifọn.+ Wha re wohọ rẹriẹ ovao ku ei evaọ akotọ abade na. 3 Kẹsena Fẹro ọ vẹ te ta kpahe ahwo Izrẹl na nọ, ‘A bi ghoro kpenẹ avọ enẹ evaọ ẹkwotọ na. A vru họ udhude na no.’ 4 Mẹ te kuvẹ re udu Fẹro o jọ gaga,+ o ve ti le ae, mẹ vẹ te rọ ẹkwoma Fẹro avọ egbaẹmo riẹ kpobi wha orro se omamẹ;+ ahwo Ijipti na a vẹ te ginẹ riẹ nọ mẹ họ Jihova.”+ Kọ ere a ru.

5 A tẹ te ta kẹ ovie Ijipti nọ ahwo na a dhẹ no. Iroro* Fẹro avọ idibo riẹ e tẹ nwani nwene kpahe ahwo na,+ a tẹ ta nọ: “Fikieme ma ro ru oware nana nọ ma ro siobọno ahwo Izrẹl erigbo nọ i bi ru iruo kẹ omai?” 6 Fikiere ọ tẹ ruẹrẹ ekẹkẹ ẹmo riẹ họ, ọ tẹ rehọ ahwo riẹ kugbe oma.+ 7 Ọ rehọ ekẹkẹ egba ezeza (600) nọ a salọ gbe ekẹkẹ Ijipti nọ i kiọkọ kpobi, avọ egbaẹmo nọ e rrọ ọvuọvo rai kpobi. 8 Jihova ọ tẹ kuvẹ re udu Fẹro ovie Ijipti o jọ gaga, o te mu ahwo Izrẹl na họ ele, yọ ahwo Izrẹl a be nyavrẹ ududu.*+ 9 Ahwo Ijipti a te je le ai,+ enyenya ekẹkẹ ẹmo Fẹro kpobi gbe egbaẹmo riẹ nọ e be dhẹ enyenya avọ ogbaẹmo riẹ a tẹ be kẹle ae oma no okenọ a je wohọ akotọ abade na, evaọ Paehaharọt, nọ o rẹriẹ ovao ku Bale-zifọn.

10 Nọ Fẹro ọ kẹle ai no, ahwo Izrẹl a tẹ kpare aro rai a tẹ ruẹ ahwo Ijipti na nọ a bi le ai. Ozọ u te mu ahwo Izrẹl na a te mu Jihova họ ebo se.+ 11 A tẹ ta kẹ Mosis nọ: “Kọ fikinọ eria nọ a re ki ahwo họ e rrọ obọ Ijipti hi o soriẹ nọ whọ rọ rehọ omai ziọ etenẹ re ma whu evaọ udhude na?+ Kinọ eme na who ru omai na nọ who ro su omai no Ijipti ze? 12 Kọ ogbẹrọnọ uzedhe oware nana ma vuẹ owhẹ evaọ obọ Ijipti nọ ma ta nọ, ‘Kẹ omai uvẹ, re ma gbodibo kẹ ahwo Ijipti’? Keme o mai woma re ma gbodibo kẹ ahwo Ijipti viukpenọ ma re whu evaọ udhude na.”+ 13 Mosis ọ tẹ ta kẹ ahwo na nọ: “Jọ ozọ u mu owhai hi.+ Wha dikihẹ ga re wha ruẹ esiwo Jihova nọ o ti siwi owhai nẹnẹ na.+ Keme ahwo Ijipti nọ wha be ruẹ nẹnẹ na, wha te gbẹ ruẹ e rai ofa vievie he.+ 14 Jihova omariẹ ọ te họre kẹ owhai,+ yọ wha te fọ ọvo.”

15 Kẹsena Jihova ọ tẹ ta kẹ Mosis nọ: “Fikieme who bi ro bo se omẹ? Ta kẹ ahwo Izrẹl nọ a wọ onya. 16 Rọkẹ owhẹ, kpare ọkpọ ra kpehru re whọ rriẹ obọ ra rri abade na re whọ hẹriẹ iẹe, re ahwo Izrẹl a nya udevie abade na vrẹ evaọ otọ oyaya. 17 Rọkẹ omẹ, mẹ be kuvẹ re udu ahwo Ijipti na o jọ gaga, re a ruọ eva bru rai; mẹ vẹ te wha orro se omamẹ ẹkwoma Fẹro avọ egbaẹmo riẹ kpobi, te ekẹkẹ ẹmo riẹ, gbe egbaẹmo riẹ nọ e be dhẹ enyenya.+ 18 Ahwo Ijipti na a vẹ te ginẹ riẹ nọ mẹ họ Jihova okenọ mẹ te wha orro se omamẹ ẹkwoma Fẹro, te ekẹkẹ ẹmo riẹ, gbe egbaẹmo riẹ nọ e be dhẹ enyenya.”+

19 Kẹsena ukọ-odhiwu Ọghẹnẹ uzẹme na+ nọ ọ jẹ karo kẹ utu* ahwo Izrẹl na o te no etẹe o te kpobọ emu rai, ukulu ẹgho* nọ o jọ aro rai na u te kpobọ emu je dikihẹ emu rai.+ 20 Fikiere o tẹ ziọ udevie evuẹ ahwo Ijipti avọ evuẹ ahwo Izrẹl.+ Evaọ ofẹ jọ, o jọ ẹgho obiebi. Evaọ ofẹ odekọ, o jẹ kẹ elo evaọ aso na.+ Fikiere utu* jọ o nya kẹle utu* ọdekọ họ evaọ aso na soso.

21 Mosis ọ tẹ rriẹ obọ riẹ rri abade na;+ Jihova ọ tẹ rehọ ofou ọgaga no obọ ovatha-ọre ze ro tunye ame abade na kpemu aso na soso, u te ru otọ abade na zihe ruọ otọ oyaya,+ ame na ọ tẹ hẹriẹ.+ 22 Fikiere ahwo Izrẹl a tẹ nya udevie abade na vrẹ evaọ otọ oyaya,+ yọ ame na o ru ugbẹhẹ fihọ obọze rai gbe ẹkpẹlobọ rai.+ 23 Ahwo Ijipti a te je le ai, enyenya Fẹro kpobi, ekẹkẹ ẹmo riẹ, gbe egbaẹmo riẹ nọ e be dhẹ enyenya a te mu ai họ elele ruọ udevie abade na.+ 24 Evaọ irioke ilogbo,* Jihova o te rri evuẹ ahwo Ijipti na no evaọ ukulu erae* avọ ẹgho na ze,+ ọ tẹ wha ozighi fihọ evuẹ ahwo Ijipti na. 25 O te je si etẹ no ekẹkẹ rai nọ o soriẹ nọ e jẹ rọ bẹ ae ẹdhẹ, ahwo Ijipti na a tẹ jẹ ta nọ: “Joma dhẹ kẹnoma kẹ ahwo Izrẹl, keme Jihova ọ be họre kẹ ae rọsuọ ahwo Ijipti.”+

26 Jihova ọ tẹ ta kẹ Mosis nọ: “Rriẹ obọ ra rri abade na re ame na o zihe ze ti hwẹ ruru ahwo Ijipti na, te ekẹkẹ ẹmo rai, gbe egbaẹmo rai nọ e be dhẹ enyenya.” 27 Mosis ọ tẹ nwane rriẹ obọ riẹ rri abade na, nọ oke o be ke na, abade na o te zihe kpohọ epanọ ọ jọ vẹre. Nọ ahwo Ijipti na a be dhẹ noi na, Jihova o te nuhu ahwo Ijipti na fihọ udevie abade na.+ 28 Ame nọ o bi hwẹ zihe ze na o te ruru ekẹkẹ ẹmo na gbe egbaẹmo nọ e be dhẹ enyenya na gbe egbaẹmo Fẹro kpobi nọ i le rai ruọ abade na.+ A kẹ makọ ọvo evaọ usu rai uvẹ re ọ zọ họ.+

29 Rekọ ahwo Izrẹl a nya otọ oyaya vrẹ evaọ udevie otọ abade na,+ yọ ame na o ru ugbẹhẹ fihọ obọze rai gbe ẹkpẹlobọ rai.+ 30 Ere Jihova o ro siwi Izrẹl evaọ ẹdẹ yena no obọ ahwo Ijipti,+ Izrẹl ọ ruẹ ahwo Ijipti nọ a whu evaọ akotọ abade na. 31 Izrẹl ọ tẹ jẹ ruẹ ogaga* ulogbo nọ Jihova o ro dhesẹ oware kẹ ahwo Ijipti, ahwo na a te mu ozọ Jihova họ ẹdhẹ je fi ẹrọwọ họ Jihova avọ odibo riẹ Mosis.+

15 Evaọ oke yena Mosis avọ ahwo Izrẹl a tẹ so ole nana kẹ Jihova:+

“Jomẹ so ole kẹ Jihova, keme ọ kpare omariẹ kpehru gaga no.+

O gbolo anyenya na avọ ọnọ ọ be dhẹe fihọ abade na no.+

 2 Jah* họ ẹgba mẹ gbe ogaga mẹ, nọ orọnọ o zihe ruọ osiwi*+ mẹ no na.

Ọghẹnẹ mẹ ọna, me re jiri ei;+ Ọghẹnẹ ọsẹ mẹ,+ mẹ rẹ kẹe orro.+

 3 Jihova yọ ọgbaẹmo ọgaga.+ Jihova họ odẹ riẹ.+

 5 Ame nọ o bi fi ẹkporo na o ruru i rai; a kiediwi kpobọ otọ edidi na wọhọ utho.+

 9 Ọwegrẹ na ọ ta nọ: ‘Me re le ai! Me ti le ai mu!

Mẹ te ghale egbo-ẹmo bẹsenọ o rẹ bẹ omẹ!*

Me ti yolo ọgbọdọ mẹ lahwe! Obọ mẹ o te ga vi ai!’+

11 Ono evaọ usu eghẹnẹ na ọ wọhọ owhẹ, O Jihova?+

Ono ọ wọhọ owhẹ, whẹ nọ o bi dhesẹ via nọ whẹ ọ mae rrọ ọrẹri?+

Ọnọ a rẹ dhozọ riẹ avọ ile ujiro nọ a rẹ so kẹe, Ọnọ o bi ru eware igbunu.+

12 Whọ rriẹ obọze ra, otọakpọ na o tẹ lọ ai no.+

Udu u ti no ahwo nọ a be rria Kenan kpobi awọ.+

16 Ozọ avọ idudu e te ruọ ae oma.+

18 Jihova họ ovie nọ o ti su bẹdẹ bẹdẹ.+

20 Kẹsena Miriam ọruẹaro-aye na, oniọvo-ọmọtẹ Erọn, ọ tẹ tọlọ ojẹjẹ họ obọ, eyae na kpobi a tẹ rọ kpahe iẹe avọ ejẹjẹ yọ a bi gbile. 21 Miriam ọ tẹ so ozaa lele ezae na nọ:

“So ile kẹ Jihova, keme ọ kpare omariẹ kpehru gaga no.+

O gbolo anyenya na avọ ọnọ ọ be dhẹe fihọ abade na no.”+

22 Kẹsena Mosis o te su Izrẹl vrẹ no Abade Ọwawae na, a tẹ nyavrẹ kpobọ udhude Shọ, a tẹ nya edẹ esa evaọ udhude na, rekọ a ruẹ ame he. 23 A te te Mara,*+ rekọ a sae da ame Mara ha, keme ọ jẹ yare. Oyejabọ nọ o ro se odẹ riẹ Mara. 24 Fikiere ahwo na a te muhọ ẹgo kpahe Mosis,+ be ta nọ: “Eme ma te da?” 25 O te bo se Jihova,+ Jihova o te dhesẹ ure jọ kẹe. Nọ o gbolo iei fihọ ame na, ame na ọ tẹ were.

Ọ jọ etẹe fi ujaje gbe otọhotọ ẹdhoguo họ otọ kẹ ae, yọ ọ jọ etẹe dawo ae.+ 26 Ọ ta nọ: “Otẹrọnọ wha rẹ gaviezọ kẹ urru Jihova Ọghẹnẹ rai evaọ oware kpobi je ru oware nọ u kiehọ evaọ aro riẹ jẹ kezọ kẹ izi riẹ je koko ijaje riẹ kpobi,+ mẹ te rehọ ẹyao ọvuọvo nọ me ro te ahwo Ijipti na te owhai hi,+ keme mẹ Jihova me bi siwi owhai.”+

27 Nọ oyena o vrẹ no, a tẹ nyate Ilim, oria nọ iyeri-ame ikpegbivẹ gbe iriẹ udhosa-gbikpe e jọ. Fikiere a te wohọ etẹe kẹle ame na.

16 Nọ a wọ no Ilim no, ogbotu ahwo Izrẹl kpobi a te ti te udhude Sin,+ nọ o rrọ udevie Ilim avọ Saena, evaọ ẹdẹ avọ ikpegbisoi amara avọ ivẹ nọ a no ẹkwotọ Ijipti no.

2 Kẹsena ogbotu ahwo Izrẹl kpobi a te muhọ ẹgo kpahe Mosis avọ Erọn evaọ udhude na.+ 3 Ahwo Izrẹl a jẹ ta kẹ ae nọ: “O hae mai woma orọnọ ma whu evaọ obọ Jihova evaọ obọ ẹkwotọ Ijipti okenọ ma jẹ keria akotọ ebẹro erao,+ nọ ma jẹ re ebrẹdi bẹ. Whaọ obọnana wha rehọ omai ziọ udhude nana no re wha rọ ohọo kpe ukoko nana soso whu.”+

4 Jihova ọ tẹ ta kẹ Mosis nọ: “Me bi ru ebrẹdi rrọ no obọ idhiwu na ze kẹ owhai,+ yọ ohwo kpobi ọ rẹ nyae kwa utho riẹ kẹdẹ kẹdẹ,+ re mẹ dawo ae sọ a te nya evaọ uzi mẹ hayo a ti ru ere he.+ 5 Rekọ evaọ ẹdẹ avọ ezeza+ nọ a te ruẹrẹ enọ a kwa kpahe, enọ a rẹ kwa e rẹ jọ akuava enọ a rẹ kwa ẹdẹ ọvuọvo evaọ edẹ edekọ na.”+

6 Fikiere Mosis avọ Erọn a tẹ ta kẹ ahwo Izrẹl kpobi nọ: “Evaọ owọwọ wha te ginẹ riẹ nọ Jihova họ ọnọ ọ rehọ owhai no ẹkwotọ Ijipti ze.+ 7 Evaọ ohiohiẹ wha te ruẹ oruaro Jihova, keme o yo eguago nọ wha be go kpahe Jihova no. Mai yọ amono nọ wha rẹ rọ go kpahe omai?” 8 Mosis ọ tẹ gbẹ ta nọ: “Nọ Jihova ọ te kẹ owhai erao nọ wha rẹ re evaọ owọwọ gbe ebrẹdi evaọ ohiohiẹ nọ wha te re bẹ, wha te ruẹ nọ Jihova o yo eguago rai nọ wha be go kpahe iẹe no. Kọ mai yọ amono? Orọnikọ mai wha be go kpahe na ha rekọ Jihova.”+

9 Kẹsena Mosis ọ tẹ ta kẹ Erọn nọ: “Ta kẹ ogbotu ahwo Izrẹl kpobi nọ, ‘Wha go ziọ aro Jihova, keme o yo eguago rai no.’”+ 10 Nọ Erọn ọ nwane ta ẹme kẹ ogbotu ahwo Izrẹl kpobi no, a te kuomarẹriẹ rọ ovao rri udhude na, rri! oruaro Jihova o tẹ romavia evaọ ẹgho na.+

11 Jihova ọ tẹ gbẹ ta kẹ Mosis nọ: 12 “Me yo eguago ahwo Izrẹl no.+ Ta kẹ ae nọ, ‘Nọ ọre o te kiediwi no* wha te re arao, yọ evaọ ohiohiẹ wha te re ebrẹdi bẹ,+ wha vẹ te ginẹ riẹ nọ mẹ họ Jihova Ọghẹnẹ rai.’”+

13 Fikiere evaọ owọwọ yena ikueli* e tẹ ze e tẹ vọ evuẹ na,+ evaọ ohiohiẹ igrigri e tẹ vọ otọ wariẹ evuẹ na soso họ. 14 Nọ igrigri nọ e vọ otọ na e hiẹ no, eware ekakao iwuwuru jọ e tẹ jọ otọ udhude na yoyoyo+ wọhọ ekpalekpa-ame nọ i kie fihọ otọ. 15 Nọ ahwo Izrẹl a ruẹ e riẹ, a te mu ohwohwo họ ẹta kẹ nọ, “Nọ eme?” keme a riẹ oware nọ o rrọ họ. Mosis ọ tẹ ta kẹ ae nọ: “Onana yọ ebrẹdi nọ Jihova ọ kẹ owhai re o jọ emu kẹ owhai.+ 16 Onana họ uzi nọ Jihova o jie, ‘Omomọvo ọ rẹ kwa utho nọ ọ rẹ sae re. Wha rẹ rehọ owawọ omar*+ wawọ orọ omomọvo wọhọ epaọ unu ahwo* nọ omomọvo rai o wo evaọ uwou-udhu riẹ.’” 17 Ahwo Izrẹl a te mu ere họ eruo; a tẹ jẹ kwa ae, ejọ e jẹ kwa buobu ejọ e jẹ kwa umutho. 18 Nọ a jẹ rehọ owawọ omar na wawọ iẹe, ohwo nọ ọ kwa buobu o wo bu hrọ họ yọ ohwo nọ ọ kwa umutho o wo kawo hrọ họ.+ Ae omomọvo ọ kwa utho nọ a rẹ sae re.

19 Kẹsena Mosis ọ tẹ ta kẹ ae nọ: “Ohwo ọvuọvo ọ rẹ nyasiọ ọvuọvo ba te ohiohiẹ hẹ.”+ 20 Rekọ a gaviezọ kẹ Mosis hi. Nọ ezae jọ a nyasiọ ejọ ba te ohiohiẹ, i te wo ihoi je bi gbo, eva rai e tẹ dha Mosis. 21 A jẹ hae kwa ae kohiohiẹ kohiohiẹ, omomọvo utho nọ ọ rẹ sae re. Nọ uvo o tẹ ga no, o vẹ ghra no.

22 Evaọ ẹdẹ avọ ezeza na, a tẹ kwa akuava ebrẹdi na,+ owawọ omar ivẹ rọkẹ omomọvo. Fikiere enọ i wuzou kpobi evaọ ogbotu na a tẹ nyaze ti gu onana kẹ Mosis. 23 Ọ tẹ ta kẹ ae nọ: “Ere Jihova ọ ta. Odẹnotha na o te jọ ẹdẹ eriosehọ riẹriẹriẹ,* ẹdijala ọrẹri kẹ Jihova.+ Wha beki utho nọ o gwọlọ nọ wha re beki, je there utho nọ o gwọlọ nọ wha re there;+ kẹsena wha ve fi onọ u kiọkọ họ obei re wha sẹro riẹ te ohiohiẹ.” 24 Fikiere a tẹ sẹro riẹ te ohiohiẹ, wọhọ epanọ Mosis ọ ta na, u gbo ho yọ u wo ihoi hi. 25 Kẹsena Mosis ọ tẹ ta nọ: “Wha re iẹe nẹnẹ, keme nẹnẹ yọ ẹdijala kẹ Jihova. Nẹnẹ na wha te ruẹ e riẹ evaọ otọ na ha. 26 Wha rẹ kwa ae edẹ ezeza, rekọ evaọ ẹdẹ avọ ihrẹ na, Ẹdijala na,+ ovuovo o te jariẹ hẹ.” 27 Dede na, ahwo na jọ a tẹ nya re a kwa evaọ ẹdẹ avọ ihrẹ na, rekọ a ruẹ ovuovo ho.

28 Fikiere Jihova ọ tẹ ta kẹ Mosis nọ: “Ẹvẹ wha rẹ se kri te inọ wha re koko ijaje mẹ avọ izi mẹ hẹ?+ 29 Wha muẹrohọ nọ Jihova ọ kẹ owhai Ẹdijala na.+ Oyejabọ nọ ọ be rọ kẹ owhai ebrẹdi edẹ ivẹ evaọ ẹdẹ avọ ezeza na. Ohwo kpobi ọ rẹ jọ oria nọ ọ rrọ hrọ; ohwo ọvo o re no okegbe riẹ hẹ evaọ ẹdẹ avọ ihrẹ na.” 30 Fikiere ahwo na a te koko Ẹdijala na* evaọ ẹdẹ avọ ihrẹ na.+

31 Ahwo Izrẹl a mu odẹ kẹ ebrẹdi na nọ “emana.”* O jọ fuafo wọhọ ubi korianda, yọ awere riẹ o wọhọ ikeki ekpakpala nọ a fi ọnyọ họ.+ 32 Kẹsena Mosis ọ tẹ ta nọ: “Enẹ Jihova o jie uzi, ‘Wawọ owawọ omar ososo re o jọ oware nọ a rẹ sẹro riẹ evaọ ige rai kpobi,+ re a ruẹse ruẹ ebrẹdi nọ mẹ kẹ owhai nọ wha re evaọ udhude na okenọ mẹ jẹ rehọ owhai no ẹkwotọ Ijipti ze.’” 33 Fikiere Mosis ọ tẹ ta kẹ Erọn nọ: “Rehọ omothẹ re who fi owawọ omar ọrọ emana họ iẹe re who fi ei họ aro Jihova re o jọ oware nọ a rẹ sẹro riẹ evaọ ige rai kpobi.”+ 34 Nwane wọhọ epanọ Jihova o jie uzi kẹ Mosis na, Erọn o fi rie họ aro Isẹri+ na re a ruẹse sẹro riẹ. 35 Ahwo Izrẹl a re emana na ikpe udhuvẹ,+ bẹsenọ a rọ ziọ ẹkwotọ nọ ahwo a be rria.+ A re emana na bẹsenọ a ro te ughe ẹkwotọ Kenan.+ 36 Whaọ omar yọ abọvo abakpe owawọ ifa.*

17 Ogbotu Izrẹl kpobi a te no udhude Sin+ be nya je bi wohọ eria avọ eria lele epanọ Jihova ọ jẹ ta kẹ ae,+ a te wohọ Rẹfidim.+ Rekọ ame ọ jariẹ hẹ nọ ahwo na a rẹ da.

2 Fikiere ahwo na a te mu Mosis họ elele whọ+ be ta nọ: “Kẹ omai ame ma da.” Rekọ Mosis ọ tẹ ta kẹ ae nọ: “Fikieme wha bi ro lele omẹ whọ? Fikieme wha be hae rọ dawo Jihova?”+ 3 Rekọ uruame u je kpe ahwo na gaga evaọ etẹe, a tẹ jẹ go kpahe Mosis+ be ta nọ: “Fikieme whọ rọ rehọ omai no obọ Ijipti ze re whọ rọ uruame kpe omai avọ emezae mai gbe erao mai whu?” 4 Kẹsena Mosis o te bo se Jihova nọ: “Ẹvẹ me ti ru ahwo nana? U ti viemenẹ a vẹ te rọ itho fi omẹ!”

5 Jihova ọ tẹ ta kẹ Mosis nọ: “Nyavrẹ siọ ahwo na ba, yọ whọ rẹ rehọ ekpako Izrẹl jọ lele oma gbe ọkpọ ra nọ whọ rọ fa Ethẹ Naele na.+ Tọlọ iẹe fihọ obọ re whọ hae nya. 6 Rri! Me ti dikihẹ aro ra evaọ etẹe evaọ utho nọ o rrọ Horẹb na. Whọ rẹ fa utho na hrọ, ame o ti noi ze, re ahwo na a da.”+ Mosis o te ru ere evaọ aro ekpako Izrẹl na. 7 Fikiere o te se odẹ oria na Masah*+ avọ Mẹriba,*+ fiki ẹwhọ ahwo Izrẹl na gbe fikinọ a dawo Jihova+ nọ a ta nọ: “Kọ Jihova ọ rrọ udevie mai manikọ ọ rrọ udevie mai hi?”

8 Kẹsena ahwo Amalẹk+ a tẹ nyaze te họre ahwo Izrẹl evaọ Rẹfidim.+ 9 Fikiere Mosis ọ tẹ ta kẹ Joshua+ nọ: “Salọ ezae kẹ omai re wha nyae họre ahwo Amalẹk na. Odẹnotha me ti dikihẹ ehru ukpehru na avọ ọkpọ Ọghẹnẹ uzẹme na nọ ọ rrọ obọ mẹ.” 10 Joshua o te ru epanọ Mosis ọ ta kẹe na dẹẹ,+ ọ tẹ họre ahwo Amalẹk na. Mosis, Erọn, gbe Họr+ a te kpobọ ehru ukpehru.

11 Nọ Mosis ọ tẹ nyasiọ abọ riẹ ba epanọ ọ rọ kpare ai kpehru na, ahwo Izrẹl a ve bi fi kparobọ, rekọ nọ ọ tẹ nwane rọ abọ riẹ ziọ otọ, ahwo Amalẹk a ve bi fi kparobọ. 12 Nọ abọ ọ rrọ Mosis no, a tẹ wọ utho fihọ etẹe kẹe, ọ tẹ keria ehru riẹ. Kẹsena Erọn avọ Họr, a tẹ ruọ tabọ tabọ riẹ, a te kru* abọ riẹ, abọ riẹ ọ tẹ daji oria ovo bẹsenọ ọre na o ro kiediwi. 13 Fikiere Joshua ọ tẹ rọ ọgbọdọ fi Amalẹk avọ ahwo riẹ kparobọ.+

14 Jihova ọ tẹ ta kẹ Mosis nọ: “Kere onana fihọ obe re o jọ oware ekareghẹhọ,* whọ vẹ jẹ wariẹe kẹ Joshua inọ, ‘Me ti voro Amalẹk no otọ idhiwu na no riẹriẹriẹ, a gbẹ te kareghẹhọ iẹe he.’”+ 15 Kẹsena Mosis ọ tẹ bọ agbada-idhe o te se odẹ riẹ Jihova-nisae,* 16 inọ: “Fikinọ obọ riẹ o rọsuọ agbara-uvie Jah,+ Jihova o ti lele Amalẹk fi ẹmo no oge te oge.”+

18 Jẹtro ozerẹ Midian, ọgọ Mosis+ o te yo kpahe eware kpobi nọ Ọghẹnẹ o ru kẹ Mosis gbe ahwo riẹ Izrẹl, epanọ Jihova ọ rọ rehọ Izrẹl no Ijipti ze.+ 2 Jẹtro ọgọ Mosis o dede Zipora aye Mosis rehọ okenọ o vi ei zihe sei, 3 kugbe emezae ivẹ riẹ.+ Odẹ ọmọzae jọ Gẹshọm,*+ keme Mosis ọ ta nọ, “Me zihe ruọ ọrara nọ ọ be rria orẹwho ọfa no,” 4 yọ odẹ ọnọ o kiọkọ Ẹli-iza,* keme ọ ta nọ, “Ọghẹnẹ ọsẹ mẹ họ ofiobọhọ mẹ, ọnọ o siwi omẹ no ọgbọdọ Fẹro.”+

5 Fikiere Jẹtro, ọgọ Mosis kugbe emezae Mosis avọ aye riẹ, a tẹ nyabru Mosis ziọ udhude na evaọ oria nọ ọ fa evuẹ riẹ họ evaọ obọ ugbehru Ọghẹnẹ uzẹme na.+ 6 O te vi uwou se Mosis inọ: “Mẹ, ọgọ ra Jẹtro,+ avọ aye gbe emezae ivẹ ra ma be nyabru owhẹ ze.” 7 Mosis ọ tẹ nwane ruọ otafe nyai zere ọgọ riẹ, o te guzou kpotọ jẹ viọlọ iẹe. Aimava a tẹ nọ ohwohwo kpahe epanọ eware e rrọ, kẹsena a tẹ nyaziọ obọ uwou-udhu na.

8 Mosis o te gbiku kẹ ọgọ riẹ kpahe eware kpobi nọ Jihova o ru Fẹro gbe Ijipti fiki Izrẹl,+ ebẹbẹ kpobi nọ i te rai evaọ edhere+ gbe epanọ Jihova o ro siwi ai. 9 Eva e were Jẹtro fiki emamọ eware kpobi nọ Jihova o ru kẹ Izrẹl nọ o ro siwi ai no obọ Ijipti ze. 10 Kẹsena Jẹtro ọ tẹ ta nọ: “Ujiro u te Jihova, ọnọ o siwi owhai no obọ Ijipti ze je no obọ Fẹro, ọnọ o siwi ahwo na no otọ obọ ogaga Ijipti. 11 Obọnana mẹ riẹ nọ Jihova ọ rro vi eghẹnẹ nọ i kiọkọ kpobi,+ fiki oware nọ o ru enọ i je ru oma oruoro kẹ ahwo riẹ.” 12 Kẹsena Jẹtro ọgọ Mosis ọ tẹ rehọ idhe emahọ gbe idhe efa ze kẹ Ọghẹnẹ, Erọn avọ ekpako Izrẹl kpobi a tẹ nyaze ti lele ọgọ Mosis re emu evaọ aro Ọghẹnẹ uzẹme na.

13 Evaọ ẹdẹ nọ o lele i rie, Mosis ọ tẹ keria re ọ jọ obruoziẹ kẹ ahwo na wọhọ epanọ ọ be hai ru vẹre, ahwo na a te je dikihẹ aro Mosis no ohiohiẹ rite owọwọ. 14 Nọ ọgọ Mosis ọ ruẹ oware kpobi nọ o je ru kẹ ahwo na, ọ tẹ ta nọ: “Kinọ eme who bi ru kẹ ahwo na? Fikieme whẹ ọvo ọ rọ keria etenẹ yọ ahwo na kpobi a dikihẹ aro ra no ohiohiẹ rite owọwọ?” 15 Mosis ọ tẹ ta kẹ ọgọ riẹ nọ: “Keme ahwo na a be nyabru omẹ ze ọvo te nọ oware nọ Ọghẹnẹ ọ ta. 16 Nọ ẹdhọ ọ tẹ romavia, a rẹ rehọ iẹe bru omẹ ze yọ me re bruoziẹ hrọ evaọ udevie ohwo jọ avọ ọdekọ, mẹ vẹ ta iziẹibro Ọghẹnẹ uzẹme na gbe izi riẹ via.”+

17 Ọgọ Mosis ọ tẹ ta kẹe nọ: “Oware nọ who bi ru na u woma ha. 18 Who ti kpe omara no, te owhẹ te ahwo nana nọ a rrọ kugbe owhẹ na, keme owha nana o rro hrọ kẹ owhẹ, whẹ ọvo whọ sae wọe he. 19 Fikiere gaviezọ kẹ omẹ. Mẹ te kẹ owhẹ ohrẹ, yọ Ọghẹnẹ ọ te jọ kugbe owhẹ.+ Jọ ohwo nọ o re dikihẹ kẹ ahwo na evaọ aro Ọghẹnẹ uzẹme na,+ yọ whọ rẹ wha edhọ na se Ọghẹnẹ uzẹme na hrọ.+ 20 Whọ rẹ vẹvẹ ai unu kpahe oware nọ ijaje na gbe izi na e ta+ je dhesẹ kẹ ae edhere nọ u fo nọ a rẹ nya gbe iruo nọ u fo nọ a re ru. 21 Rekọ whọ rẹ jọ udevie ahwo na salọ ezae nọ i te+ nọ e be dhozọ Ọghẹnẹ, ezae nọ a re fievahọ nọ i mukpahe erere ewhariọ,+ re whọ rehọ ai mu iletu itu ahwo idu, iletu itu ahwo udhusoi, iletu itu ahwo udhuvẹ-gbikpe gbe iletu itu ahwo ikpe.+ 22 A re bruoziẹ ahwo na nọ edhọ e tẹ romavia,* a vẹ wọ ẹdhọ nọ ọ ga kpobi se owhẹ+ rekọ ae omarai a re bruoziẹ ẹdhọ ọsese kpobi. Ru owha na vori kẹ omara re whọ kẹ ai uvẹ re a lele owhẹ ghale owha na.+ 23 Who te ru onana, yọ Ọghẹnẹ ọ whobọhọ iẹe, whọ te sae wọ owha na yọ eva e te were ohwo kpobi kpobọ uwou riẹ.”

24 Mosis ọ tẹ nwani yo ẹme ọgọ riẹ je ru oware kpobi nọ ọ ta. 25 Mosis ọ tẹ salọ ezae nọ i te no udevie Izrẹl soso ze jẹ rehọ ai mu enọ i wuzou ahwo na, re a jọ iletu itu ahwo idu, iletu itu ahwo udhusoi, iletu itu ahwo udhuvẹ-gbikpe gbe iletu itu ahwo ikpe. 26 A te je bruoziẹ ahwo na nọ edhọ e tẹ romavia. A jẹ rehọ ẹdhọ nọ ọ ga se Mosis,+ rekọ a ve bruoziẹ ẹdhọ ọsese kpobi. 27 Uwhremu na, Mosis o te su ọgọ riẹ ruọ edhere,+ o te kpo kpobọ ẹkwotọ riẹ.

19 Evaọ amara avọ esa nọ ahwo Izrẹl a nya no ẹkwotọ Ijipti no, evaọ ẹdẹ ọvona, a tẹ ziọ udhude Saena. 2 A wọ no Rẹfidim,+ a tẹ ziọ udhude Saena jẹ fa evuẹ họ udhude na. Izrẹl ọ fa evuẹ họ etẹe evaọ aro ugbehru na.+

3 Kẹsena Mosis ọ tẹ gadiẹ bru Ọghẹnẹ uzẹme na, Jihova ọ tẹ ta ẹme kẹe no ugbehru na ze,+ inọ: “Oware nana whọ rẹ ta kẹ uwou Jekọp, ta kẹ ahwo Izrẹl nọ, 4 ‘Whai ọvo wha rọ ẹro ruẹ oware nọ me ru ahwo Ijipti,+ re mẹ ruẹse wọ owhai họ ibekpe ugo jẹ rehọ owhai bru omamẹ ze.+ 5 Otẹrọnọ wha re yoẹme kẹ urru mẹ evaọ oware kpobi je koko ọvọ mẹ, wha ti zihe ruọ okwakwa obọdẹ* mẹ hrọ evaọ usu ahwo na kpobi,+ keme otọakpọ na soso ọmẹ.+ 6 Wha ti zihe ruọ uvie izerẹ gbe orẹwho ọrẹri kẹ omẹ.’+ Eme nana whọ rẹ ta kẹ ahwo Izrẹl.”

7 Fikiere Mosis ọ tẹ nya o te se ekpako ahwo na, ọ tẹ ta eme nana kpobi nọ Jihova ọ ta kẹe na kẹ ae.+ 8 Ahwo na kpobi a tẹ rọ unu ovo yo nọ: “Eware kpobi nọ Jihova ọ ta na, u no omai eva ze nọ ma re ru ai.”+ Mosis ọ tẹ nwane rehọ uyo ahwo na se Jihova. 9 Jihova ọ tẹ ta kẹ Mosis nọ: “Rri! Mẹ be nyabru owhẹ ze evaọ ẹgho obiebi, re ahwo na a ruẹsi yo okenọ me ti lele owhẹ ta ẹme re a fi ẹrọwọ họ owhẹ re evaọ ẹsikpobi.” Kẹsena Mosis ọ tẹ vuẹ Jihova ẹme ahwo na.

10 Jihova ọ tẹ ta kẹ Mosis nọ: “Nyabru ahwo na re who ru ai fo nẹnẹ gbe odẹnotha, yọ a rẹ fọrọ iwu rai hrọ. 11 A rẹ ruẹrẹ oma kpahe hrọ kẹ ẹdẹ avọ esa na, keme evaọ ẹdẹ avọ esa na Jihova o ti nwrotọ ziọ Ugbehru Saena evaọ aro ahwo na kpobi. 12 Who re fi uwhru wariẹe họ kẹ ahwo na hrọ whọ vẹ vuẹ ae nọ, ‘Wha yọroma re wha gbẹ gadiẹ kpobọ ehru ugbehru na ha hayo rọ obọ te akọ riẹ hẹ. Ohwo kpobi nọ ọ rọ obọ te ugbehru na a ti kpei no hrọ. 13 A rẹ rọ obọ te ohwo na ha, rekọ a rẹ rọ itho fi ei hayo a rẹ sae lafi.* Te ọ rrọ arao hayo ohwo, ọ rẹ jọ uzuazọ họ.’+ Rekọ a te yo edo uzei egbo na,+ ahwo na a rẹ nyaze obọ ugbehru na.”

14 Mosis o te nwrotọ no ugbehru na ze bru ahwo na, o te mu ahwo na họ eru fo, a tẹ fọrọ iwu rai.+ 15 Ọ tẹ ta kẹ ahwo na nọ: “Wha ruẹrẹ oma kpahe kẹ ẹdẹ avọ esa na. Wha siomano owezẹ ọzae-avọ-aye.”*

16 Evaọ ohiohiẹ ẹdẹ avọ esa na, egbrara e tẹ jẹ va avọ elo egbrara, ẹgho ọlala+ o te ruru ehru ugbehru na avọ edo onware nọ o bi do gaga, ahwo kpobi nọ a rrọ evuẹ na a te muhọ enuhu.+ 17 Mosis ọ tẹ rehọ ahwo na no evuẹ na ze re a nyabru Ọghẹnẹ uzẹme na, a te dikihẹ obotọ ugbehru na. 18 Ugbehru Saena soso u je kuye iwiri, keme Jihova o nwrotọ ziọ iẹe evaọ erae;+ iwiri riẹ i je kuye wọhọ iwiri ovini,* yọ ugbehru na soso u je nuhu zighi zighi.+ 19 Nọ edo onware na o bi dhe ẹgẹga na, Mosis ọ tẹ ta ẹme, urru Ọghẹnẹ uzẹme na o tẹ kpahe kẹe.

20 Jihova o nwrotọ ziọ Ugbehru Saena ziọ ehru ugbehru na. Kẹsena Jihova o te se Mosis inọ ọ ziọ obehru ugbehru na, Mosis ọ tẹ gadiẹ kpehru.+ 21 Jihova ọ tẹ ta kẹ Mosis nọ: “Nwrotọ nyae vẹvẹ ahwo na unu inọ a yiwi thuẹthuẹ oma ze ti rri Jihova ha, a tẹ dawo iẹe, ibuobu rai a ti whu. 22 Yọ izerẹ nọ e rẹ nyaze kẹle Jihova kẹse kẹse na, jọ a ru omarai fo, re Jihova o gbe kpe* ai hi.”+ 23 Mosis ọ tẹ ta kẹ Jihova nọ: “Ahwo na a rẹ sae nyaze ehru Ugbehru Saena ha keme whọ vẹvẹ omai unu no vẹre, inọ, ‘Fi uwhru wariẹ ugbehru na họ, re who ru ei ọrẹri.’”+ 24 Rekọ, Jihova ọ tẹ ta kẹe nọ: “Nya, nwrotọ, re whọ gadiẹ zihe ziọ obọ ehru, whẹ avọ Erọn, rekọ whọ jọ izerẹ na avọ ahwo na a yiwi thuẹthuẹ oma ziọ obọ ehru bru Jihova ze he, re o gbe kpe ai hi.”+ 25 Fikiere Mosis o te nwrotọ bru ahwo na ọ tẹ vuẹ ae.

20 Kẹsena Ọghẹnẹ ọ tẹ ta eme nana kpobi:+

2 “Mẹ họ Jihova Ọghẹnẹ ra, ọnọ ọ rehọ owhẹ no ẹkwotọ Ijipti ze, oria nọ whọ jẹ jọ igbo.+ 3 Who re wo eghẹnẹ efa vievie he u te no omẹ no.*+

4 “Who re wo ẹmema nọ a kare kẹ omara vievie he hayo uwoho* jọ nọ o wọhọ oware jọ evaọ obọ idhiwu na, hayo evaọ otọakpọ na hayo evaọ ame nọ ọ rrọ obotọ otọakpọ na.+ 5 Who re guzou kpotọ kẹ ae vievie he hayo wo isiuru inọ whọ rẹ gọ ae he,+ keme mẹ, Jihova Ọghẹnẹ ra, mẹ yọ Ọghẹnẹ nọ ọ gwọlọ omarọkẹ riẹriẹriẹ,+ ọnọ ọ rẹ rehọ uye oruthọ esẹ te emọ, rọkẹ oge avọ esa gbe oge avọ ene ọrọ ahwo nọ a mukpahe omẹ, 6 rekọ me re dhesẹ uyoyou nọ o rẹ hiẹ hẹ rite oge avọ odu (1,000) rọkẹ enọ i you omẹ je bi koko izi mẹ.+

7 “Whọ rẹ rehọ odẹ Jihova Ọghẹnẹ ra ru ugberuo vievie he,+ keme Jihova ọ rẹ siọ ohwo nọ ọ rehọ odẹ riẹ ru ugberuo uye ba ẹkẹ hẹ.+

8 “Kareghẹhọ ẹdẹ Ẹdijala na re who ru ei ọrẹri.+ 9 Who re ru iruo je ru eware ra kpobi edẹ ezeza,+ 10 rekọ ẹdẹ avọ ihrẹ na yọ ẹdijala kẹ Jihova Ọghẹnẹ ra. Who re ru iruo evuevo vievie he, te owhẹ hayo ọmọzae ra hayo ọmọtẹ ra hayo ọrigbo ọzae ra hayo ọrigbo ọmọtẹ ra hayo arao uwou ra hayo ọrara nọ ọ be rria eria nọ whọ be rria.*+ 11 Keme evaọ edẹ ezeza Jihova ọ rọ ma idhiwu na gbe otọakpọ na, abade na, gbe eware kpobi nọ e rrọ eva rai, o te mu eriosehọ họ evaọ ẹdẹ avọ ihrẹ na.+ Oyejabọ nọ Jihova ọ rọ ghale ẹdẹ Ẹdijala na je ru ei fihọ ọrẹri.

12 “Rọ ọghọ kẹ ọsẹ ra avọ oni ra,+ re whọ ruẹse rria oke krẹkri evaọ ẹkwotọ nọ Jihova Ọghẹnẹ ra ọ be kẹ owhẹ na.+

13 “Who re kpe ohwo vievie he.+

14 “Who re bruẹnwae vievie he.+

15 “Who re tho uji vievie he.+

16 “Who re se isẹri ọrue vievie he nọ whọ tẹ rrọ osẹri evaọ ẹme ọrivẹ ra.+

17 “Who re siuru uwou ọrivẹ ra vievie he. Who re siuru aye ọrivẹ ra vievie he+ hayo ọrigbo ọzae riẹ hayo ọrigbo ọmọtẹ riẹ hayo eruẹ riẹ hayo eketekete riẹ hayo oware kpobi nọ o rrọ orọ ọrivẹ ra.”+

18 Whaọ ahwo na kpobi a jẹ ruẹ egbrara nọ e be va avọ elo egbrara na, edo onware na, gbe ugbehru nọ u je kuye iwiri na; yọ onana nọ a jẹ ruẹ na u ru rai je nuhu, a te dikihẹ ugbo.+ 19 Fikiere a tẹ ta kẹ Mosis nọ: “Whẹ ọvo ta ẹme kẹ omai, ma te gaviezọ, rekọ jọ Ọghẹnẹ ọ ta ẹme kẹ omai hi, keme ozọ u bi mu omai nọ ma ti whu.”+ 20 Fikiere Mosis ọ tẹ ta kẹ ahwo na nọ: “Jọ ozọ u mu owhai hi, keme Ọghẹnẹ uzẹme na ọ nyaze te dawo owhai,+ re ozọ riẹ o ruẹse jọ owhai oma ẹsikpobi re wha gbẹ raha uzi hi.”+ 21 Fikiere ahwo na a te gbe dikihẹ ugbo, rekọ Mosis ọ tẹ nya kẹle ẹgho obiebi na, oria nọ Ọghẹnẹ uzẹme na ọ jọ na.+

22 Kẹsena Jihova ọ tẹ ta kẹ Mosis nọ: “Enẹ whọ rẹ ta kẹ ahwo Izrẹl, ‘Whai ọvo wha ruẹ no inọ mẹ ta ẹme kẹ owhai no odhiwu ze.+ 23 Wha re ru eghẹnẹ isiliva kugbe omẹ vievie he, yọ wha re ru eghẹnẹ igoru kẹ omarai vievie he.+ 24 Agbada-idhe ẹkpẹ wha rẹ bọ kẹ omẹ, wha rẹ jariẹ dhe idhe emahọ rai, idhe ọriẹyeri* rai, erọ uthuru erao rai, gbe owa erao rai. Evaọ oria kpobi nọ me ru re a jọ kareghẹhọ odẹ mẹ,+ mẹ te nyabru owhai ze yọ mẹ te ghale owhai. 25 Wha tẹ be bọ agbada-idhe itho kẹ omẹ, wha rẹ rehọ itho nọ a rehọ ekwakwa bru* rọ bọe vievie he.+ Keme wha tẹ rehọ ichizo* rai ro tei, yọ wha zue rie no. 26 Wha rẹ rọ istẹpo gadiẹ ruọ agbada-idhe mẹ vievie he, re ẹba rai o gbe kpefihọ evaọ ehru riẹ hẹ.’

21 “Enana họ izi oziẹobro nọ whọ rẹ rọ kẹ ae:+

2 “Whọ tẹ dẹ ọrigbo nọ ọ rrọ ohwo Hibru,+ ọ rẹ gbodibo kẹ owhẹ wọhọ ọrigbo ikpe ezeza, rekọ evaọ ukpe avọ ihrẹ, a re siobọnoi kpo ababọ oware ovo nọ ọ rẹ hwa.+ 3 Otẹrọnọ ọye ọvo ọ nyaze, ọye ọvo o re kpo. Otẹrọnọ ọzae nọ o wo aye, aye riẹ o re lele iei kpo hrọ. 4 Otẹrọnọ olori riẹ ọ kẹ riẹ aye yọ aye na o yẹ emezae hayo emetẹ kẹe, aye na avọ emọ riẹ a re zihe ruọ erọ olori riẹ, ọye ọvo o ve kpo.+ 5 Rekọ otẹrọnọ ọrigbo na ọ gbẹ rọwo ho ọ jẹ ta nọ, ‘Me you olori mẹ, aye mẹ, gbe emezae mẹ; mẹ gwọlọ nọ a siobọno omẹ kpo ho,’+ 6 olori riẹ ọ rẹ rehọ iẹe ziọ aro Ọghẹnẹ uzẹme na hrọ. Kẹsena ọ vẹ rehọ iẹe ziọ ẹthẹ hayo unuẹthẹ na, olori riẹ ọ vẹ rehọ ododo* duwu ozọ riẹ lafi, ọ vẹ jọ ọrigbo riẹ evaọ edẹ uzuazọ riẹ kpobi.

7 “Otẹrọnọ ọzae ọ zẹ ọmọtẹ riẹ wọhọ ọrigbo, a re siobọno ọmọtẹ na kpo evaọ oghẹrẹ ovo nọ a re ro siobọno ọrigbo ọzae kpo ho. 8 Otẹrọnọ ọ were olori riẹ hẹ yọ ọ rehọ e riẹ wọhọ ọse* riẹ hẹ rekọ ọ gwọlọ nọ omọfa ọ dẹe rehọ,* o wo udu nọ ọ rẹ rọ zẹe kẹ ahwo erẹwho efa ha, keme yọ o si ọghọ noi oma no. 9 Otẹrọnọ ọ salọ e riẹ kẹ ọmọzae riẹ, o re ru kẹe wọhọ epanọ o re ru kẹ ọmọtẹ obọriẹ.* 10 Ọ tẹ rehọ aye ọfa kẹ omariẹ, o re si no emu, iwu, gbe ẹgwọlọ orọo*+ orọ aye ọsosuọ na ha. 11 Otẹrọnọ o re ru eware esa nana kẹe he, ọ rẹ kẹe uvẹ kpo ababọ ugho nọ ọ rẹ hwa.

12 “Ohwo kpobi nọ ọ tehe ohwo kpe, a re kpei no hrọ.+ 13 Rekọ otẹrọnọ o keke aro fihọ ru ei hi, yọ Ọghẹnẹ uzẹme na ọ kuvẹ nọ onana o via, me ti dhesẹ oria jọ kẹ owhai nọ ọ rẹ sae dhẹ nya.+ 14 Otẹrọnọ ohwo ọ be dha eva gaga kẹ ọrivẹ riẹ o je keke aro fihọ kpei,+ ohwo na o re whu hrọ o tẹ make gwọlọ nọ wha rẹ rehọ iẹe no agbada-idhe mẹ ze.+ 15 Ohwo nọ ọ tehe ọsẹ riẹ hayo oni riẹ, a re kpei no hrọ.+

16 “Otẹrọnọ ohwo jọ o mu ohwo rehọ+ jẹ zẹe hayo a ruẹ e riẹ evaọ obọ riẹ,+ a re kpei no hrọ.+

17 “Ohwo kpobi nọ ọ la ọsẹ riẹ hayo oni riẹ eka,* a re kpei no hrọ.+

18 “Oware nọ a re ru ona, otẹrọnọ ezae a be whọ ọjọ ọ jẹ rehọ utho fi hayo rọ obọ bọwo* ọzae ibe riẹ, rekọ o whu hu ghele na yọ ọ be sae kpama no ehwa ha: 19 Otẹrọnọ ọ sae kpama jẹ be sae rehọ ọkpọ nya evaọ otafe, a rẹ gbẹ kẹ ọnọ ọ nwa riẹ oma na uye he. Rekọ ọ rẹ hwa osa fihọ oke nọ ohwo nọ ọ nwoma na o bi ro ru iruo ho na bẹsenọ oma riẹ u re kpo kpobi no.

20 “Otẹrọnọ ọzae ọ rehọ ure fa ọrigbo ọzae hayo ọrigbo ọmọtẹ riẹ o je whu fihọ iẹe obọ, a rẹ kioja ohwo yena hrọ.+ 21 Rekọ ọ tẹ rria ẹdẹ ọvo hayo ivẹ, a rẹ kioja riẹ hẹ, keme yọ ohwo nọ ọnọ o wo rie ọ rehọ ugho riẹ dẹ.

22 “Otẹrọnọ ezae ivẹ a bi lele ohwohwo hrowo oma nọ a jẹ nwa aye nọ o dihọ oma o je yẹ yọ emerae riẹ e re gba ha*+ rekọ ohwo ọvo o whu hu,* ọnọ o ru thọ na ọ rẹ hwa oware nọ ọzae aye na ọ ta kẹe; yọ ọ rẹ hwae ẹkwoma ibruoziẹ na.+ 23 Rekọ otẹrọnọ ohwo jọ o whu,* a rẹ rehọ uzuazọ hwosa uzuazọ,*+ 24 ubiẹro rọkẹ ubiẹro, ubiakọ rọkẹ ubiakọ, obọ rọkẹ obọ, owọ rọkẹ owọ,+ 25 ẹmahe rọkẹ ẹmahe, omonwa rọkẹ omonwa, ẹbọwo rọkẹ ẹbọwo.

26 “Ọzae ọ tẹ tehe ubiẹro ọrigbo ọzae riẹ hayo ubiẹro ọrigbo ọmọtẹ riẹ nọ u je tu, ọ rẹ kẹ ọrigbo na uvẹ kpo wọhọ osohwa kẹ ubiẹro riẹ.+ 27 Yọ otẹrọnọ ọ kpare ubiakọ ọrigbo ọzae riẹ hayo ubiakọ ọrigbo ọmọtẹ riẹ, ọ rẹ kẹ ọrigbo na uvẹ kpo wọhọ osohwa kẹ ubiakọ riẹ.

28 “Otẹrọnọ eruẹ o duwu* ọzae hayo aye yọ ohwo na o whu,+ a rẹ rehọ itho fi eruẹ na kpe hrọ yọ a rẹ re arao na ha; rekọ a rẹ kẹ ọnọ o wo eruẹ na uye he. 29 Rekọ otẹrọnọ eruẹ ọ be hai duwu* vẹre yọ a vẹvẹ ọnọ o wo rie unu no rekọ o bi thuru iei fihọ oria ha* nọ o te kpe ọzae hayo aye, a rẹ rehọ itho fi eruẹ na a ve je kpe ohwo nọ o wo rie na. 30 Otẹrọnọ a ta kẹe nọ ọ hwa osa rọ ta uzuazọ riẹ,* ọ rẹ hwa osa kpobi nọ a ta kẹe wọhọ ẹtanigbo kẹ uzuazọ* riẹ. 31 O tẹ make rọnọ ọmọzae hayo ọmọtẹ o duwu,* uzi nana a re ro bruoziẹ ohwo nọ o wo eruẹ na. 32 Eruẹ na o te duwu* ọrigbo ọzae hayo ọrigbo ọmọtẹ, ohwo nọ o wo eruẹ na ọ rẹ hwa shẹkẹl* ọgba kẹ olori ọrigbo na, yọ a rẹ rehọ itho fi eruẹ na kpe.

33 “Otẹrọnọ ọzae o rovie hayo tọ ọgọdọ o gbe ruru iei hi, eruẹ hayo eketekete o te kie fihọ iẹe, 34 ohwo nọ o wo ọgọdọ na ọ rẹ hwa osa fihọ iẹe.+ Ọ rẹ hwa osa na kẹ ọnọ o wo arao na, arao owhuowhu na o ve zihe ruọ ọriẹ. 35 Otẹrọnọ eruẹ ọzae jọ ọ nwa eruẹ omọfa oma o je whu, a rẹ zẹ eruẹ nọ ọ rrọ uzuazọ na a vẹ ghale ugho nọ a zẹ riẹ na; a vẹ jẹ ghale arao owhuowhu na. 36 Hayo otẹrọnọ a riẹ nọ eruẹ na ọ be hai duwu* vẹre rekọ ọnọ o wo rie na o bi thuru iei fihọ oria ha,* ọ rẹ hwa osa fihọ iẹe, eruẹ rọkẹ eruẹ, owhuowhu na o ve zihe ruọ ọriẹ.

22 “Ohwo o te tho eruẹ hayo ogodẹ o je kpei hayo zẹe, ọ rẹ rehọ iruẹ isoi hwa eruẹ na zihe jẹ rehọ igodẹ ene hwa ogodẹ na zihe.+

2 (“Nọ a tẹ ruẹ oji+ nọ ọ be bẹre ruọ uwou nọ a tẹ fae kpe, a reabe azẹ hẹ. 3 Rekọ otẹrọnọ o via evaọ okenọ ọre ọ tẹ va ze no, a rẹ reabe.)

“Ọ rẹ hwa osa fihọ iẹe hrọ. Otẹrọnọ o wo oware ovo ho, a rẹ zẹe hrọ rọkẹ eware nọ o tho na. 4 Otẹrọnọ a ruẹ oware nọ o tho na evaọ obọ riẹ nọ o gbẹ rrọ uzuazọ, te o rrọ eruẹ hayo eketekete hayo ogodẹ, ọ rẹ hwae zihe akuava.

5 “Otẹrọnọ ohwo jọ ọ rehọ erao riẹ ruọ otafe nyae re ẹbe evaọ udhu hayo ọgbọ evaene ọ jẹ kẹ ae uvẹ re a re ẹbe evaọ udhu omọfa, ọ rẹ rehọ udhu riẹ nọ o mai woma hayo ọgbọ evaene riẹ nọ o mai woma hwa zihe.

6 “Otẹrọnọ erae i muhọ ẹto e jẹ to ruọ ituetue e jẹ mahe ikru ekakọ hayo ekakọ* nọ i gbe dikihẹ hayo udhu, ohwo nọ o tu erae na họ na ọ rẹ hwa eware nọ e to na zihe.

7 “Otẹrọnọ ohwo ọ rehọ ugho hayo eware kẹ ọrivẹ riẹ kru a je tho eware nana no uwou ọrivẹ riẹ na, a tẹ ruẹ oji na, ọ rẹ hwa ai zihe akuava.+ 8 A gbẹ ruẹ oji na ha, a rẹ rehọ ọnọ o wo uwou na ziọ aro Ọghẹnẹ uzẹme na hrọ+ re a ruẹse riẹ sọ ọ rọ obọ riẹ te eware ọrivẹ riẹ. 9 Evaọ ẹdhọ oware omọfa kpobi nọ o rrọ ohwo obọ,* te eruẹ, eketekete, ogodẹ, ewu, hayo oware kpobi nọ u vru nọ ọ be ta kpahe inọ, ‘Onana omẹ!’ aimava na a rẹ wọ ẹdhọ rai ziọ aro Ọghẹnẹ uzẹme na.+ Ọnọ Ọghẹnẹ ọ ta nọ ọ reabe ọ rẹ hwa zihe akuava kẹ ọrivẹ riẹ.+

10 “Otẹrọnọ ohwo jọ ọ kẹ ọrivẹ riẹ eketekete hayo eruẹ hayo ogodẹ hayo arao ẹwho jọ kru rekọ o te whu hayo nwoma ulogbo hayo a su rie vrẹ okenọ ohwo ọvo o je rri hi, 11 aimava na a re duwu iyei evaọ aro Jihova, inọ ọ rọ obọ riẹ te eware ọrivẹ riẹ hẹ; yọ ọnọ o wo eware na ọ rẹ rehọ iẹe ere hrọ. Ohwo ọdekọ na ọ rẹ hwa zihe he.+ 12 Rekọ otẹrọnọ a tho arao na mi ei ọ rẹ hwa zihe kẹ ọnọ o wo rie. 13 Otẹrọnọ arao ojihẹ jọ ọ za riẹ ekekẹ, ọ rẹ rehọ iẹe ze* rọ kẹ imuẹro. Ọ rẹ hwa oware nọ arao ojihẹ ọ za ekekẹ zihe he.

14 “Rekọ otẹrọnọ ohwo jọ ọ rehọ* arao mi ọrivẹ riẹ nọ arao na ọ jẹ nwoma gaga hayo whu okenọ ọnọ o wo rie ọ jọ kugbei hi, ohwo nọ ọ rehọ e riẹ* na ọ rẹ hwa osa fihọ iẹe hrọ. 15 Otẹrọnọ ọnọ o wo rie ọ rrọ kugbei, ọ rẹ hwa osa fihọ iẹe he. Otẹrọnọ a haya riẹ, ugho nọ a rọ haya riẹ na họ osa nọ a rẹ hwa zihe na.

16 “Otẹrọnọ ọzae ọ lẹliẹ ọmọtẹ-kọkọ nọ a re sahotọ họ o je lele iei wezẹ, o re ru igho fihọ iẹe hrọ* o ve zihe ruọ aye riẹ.+ 17 Otẹrọnọ ọsẹ ọmọtẹ na ọ se thahe thahe nọ ọ rẹ rehọ iẹe kẹe he, ọzae na ọ rẹ gbẹ hwa unuigho nọ a rẹ hwa fihọ ọmọtẹ ghele.

18 “Wha rẹ kẹ ọgbẹva aye uvẹ re ọ jọ uzuazọ vievie he.+

19 “Ohwo kpobi nọ o lele arao wezẹ a re kpei no hrọ.+

20 “Ohwo kpobi nọ o dhe idhe kẹ eghẹnẹ efa u te no Jihova ọvo no a re kpei kufiẹ.+

21 “Who re ru ọrara nọ ọ be rria udevie rai yoyoma hayo kienyẹe vievie he,+ keme wha jọ erara evaọ ẹkwotọ Ijipti.+

22 “Wha rẹ rọ oja re aye-uku hayo ọmọ nọ o wo ọsẹ hẹ* vievie he.+ 23 Wha te yiwi rọ oja re iẹe nọ ọ jẹ viẹ se omẹ, me ti yo oviẹ riẹ hrọ;+ 24 eva e te dha omẹ gaga, mẹ vẹ te rọ ọgbọdọ kpe owhai, eyae rai a ve ti zihe ruọ eyae-uku, emọ rai a ve ti zihe ruọ emọ nọ i wo esẹ hẹ.

25 “Who te bi momo ugho kẹ oyogbe* kpobi evaọ usu ahwo mẹ, ọnọ ọ be rria kugbe owhẹ, who re ru ei epaọ ohwo nọ o re momo igho kẹ ahwo ho.* Who re mi ei isuo ho.+

26 “Otẹrọnọ who kru ewu ọrivẹ ra nọ o ro viowa* fihọ oware nọ o momo,+ who re zihe iei kẹe nọ ọre o te bi kiediwi. 27 Keme oye ọvo o wo nọ o re ro ruru, ewu* riẹ nọ o re ro ruru oma* riẹ; kọ eme o ti ro kiẹzẹ?+ Nọ ọ tẹ viẹ se omẹ, me ti yo hrọ, keme me wo ọdawẹ.*+

28 “Whọ rẹ la Ọghẹnẹ eka* vievie he+ yọ whọ rẹ la ọnọ o wuzou* evaọ udevie ahwo ra eka vievie he.+

29 “Who re si uke kpemu vievie he kpahe okẹ nọ whọ rẹ kẹ evaọ usu ivuẹvu ibuobu ra gbe eware nọ i hwẹ no egọdọ udi-uruo gbe egọdọ nọ whọ rẹ jọ ru ewhri ze.+ Whọ rẹ rehọ ọmọ ọsosuọ evaọ usu emezae ra kẹ omẹ.+ 30 Enẹ who re ru kpahe eruẹ ra gbe ogodẹ ra:+ Edẹ ihrẹ ọ rẹ rria kugbe oni riẹ. Evaọ ẹdẹ avọ eree whọ vẹ rehọ iẹe kẹ omẹ.+

31 “Wha re ru omarai fihọ ahwo ọrẹri kẹ omẹ,+ yọ wha rẹ re uwo arao ọvuọvo nọ arao ojihẹ ọ za ekekẹ hẹ.+ Wha re gbolo iei kẹ erakọ na.

23 “Whọ rẹ vaha* iku nọ e rrọ uzẹme he vievie he.+ Whọ jọ abọ ohwo omuomu hu nọ who re ro se osẹri omuomu.+ 2 Who lele ogbotu ru umuomu vievie he, yọ whọ rẹ vẹ ẹdhọ* tu vievie he ẹkwoma isẹri nọ who re se re whọ jọ abọ ogbotu.* 3 Who re dhesẹ ọriẹwẹ vievie he evaọ ẹme oyogbe.+

4 “Whọ tẹ nyaku eruẹ hayo eketekete ọwegrẹ ra nọ o bi ghoro vrẹ, who re zihe iei sei hrọ.+ 5 Whọ tẹ ruẹ eketekete ohwo nọ o mukpahe owhẹ nọ o kie fihọ otọ avọ owha nọ o rrọ ehru riẹ, who re gbolaro kufiẹ nyavrẹ vievie he. Who re fiobọhọ kẹe rra owha no arao na hrọ.+

6 “Whọ rẹ vẹ ẹdhọ oyogbe nọ ọ rrọ udevie rai tu hu nọ o te wo ẹme.+

7 “Who wo obọ kpahe eku nọ a rẹ wọ họ ohwo uzou* vievie he, who kpe ohwo nọ ọ kare abe avọ ohwo okiẹrẹe he, keme me ti kuenu kẹ ohwo omuomu inọ o kiẹrẹe he.*+

8 “Whọ rẹ re udi vievie he, keme udi-oriọ u re tu ahwo nọ a wo orimuo aro yọ o rẹ sae lẹliẹ ahwo okiẹrẹe jẹlẹ ẹme.+

9 “Who re kienyẹ ọrara nọ ọ be rria udevie rai vievie he. Wha riẹ epanọ o rẹ jọ ohwo oma nọ ọ tẹ rrọ ọrara,* keme wha jọ erara evaọ ẹkwotọ Ijipti.+

10 “Whọ rẹ kọ ibi họ otọ ra je vu* eware nọ o mọ ikpe ezeza.+ 11 Rekọ evaọ ukpe avọ ihrẹ na whọ rẹ kọ oware họ otọ na ha whọ rẹ nyase iẹe ba re o who, iyogbe nọ e rrọ udevie ahwo ra a vẹ jariẹ re, yọ onọ a nyaseba, erao ẹwọ na a vẹ re. Ere who re ru ọgbọ evaene ra gbe ọgbọ olivi ra.

12 “Edẹ ezeza who re ru iruo ra; rekọ evaọ ẹdẹ avọ ihrẹ, whọ rẹ siọ iruo ra ba, re eruẹ ra gbe eketekete ra a ruẹsi serihọ, re ọmọzae ọrigbo ọmọtẹ ra gbe ọrara nọ ọ be rria udevie rai a ruẹsi ru omarai sasa.+

13 “Wha re muẹrohotọ re wha ru eware kpobi nọ mẹ ta kẹ owhai,+ wha rẹ fodẹ edẹ eghẹnẹ efa vievie he; a rẹ jọ unu rai yo ai hi.+

14 “Isiasa ẹgbukpe who re ru ehaa kẹ omẹ.+ 15 Who re koko Ehaa Ebrẹdi nọ Ọ Kare Ẹvi na.+ Whọ rẹ re ebrẹdi nọ ọ kare ẹvi edẹ ihrẹ, nwane wọhọ epanọ me jie uzi kẹ owhẹ na, evaọ oke nọ a fihọ na evaọ amara Ebib,*+ keme evaọ oke yena who ro no Ijipti ze. Ohwo ọvo ọ rẹ nya ababọ ziọ aro mẹ hẹ.+ 16 U te no ere no, who re koko Ehaa Ivuẹvu* na orọ ibi ọsosuọ ra nọ e ware evaọ usu iruo ra, orọ eware nọ whọ kọ họ obọ ẹwọ;+ gbe Ehaa Ẹkwa Kokohọ* evaọ urere ukpe na, okenọ who re ro koko ibi iruo abọ ra họ no obọ ẹwọ ze.+ 17 Isiasa ẹgbukpe ezae* rai kpobi a rẹ nyaziọ aro Olori uzẹme na, Jihova.+

18 “Who re fi oware ovo nọ a fi ẹvi họ ba idhe azẹ nọ who re dhe kẹ omẹ vievie he. Yọ idhe iwhri nọ a dhe evaọ ehaa mẹ e rẹ rria asohẹrioke te ohiohiẹ hẹ.

19 “Whọ rẹ rehọ ibi ọsosuọ ra nọ e ware nọ e mai woma evaọ otọ ra ziọ uwou Jihova Ọghẹnẹ ra.+

“Whọ rẹ rọ ame-ivie oni ẹwe there ọmọ riẹ vievie he.+

20 “Me bi vi ukọ-odhiwu karo kẹ owhẹ+ re ọ sẹro ra evaọ edhere na jẹ rehọ owhẹ ziọ oria nọ mẹ ruẹrẹ kpahe no.+ 21 Whọ rẹ gaviezọ kẹe je yoẹme kẹ urru riẹ. Whọ kpareso ẹe he, keme ọ te rọ iruthọ ra vrẹ owhẹ hẹ,+ keme odẹ mẹ o rrọ uzou riẹ. 22 Rekọ otẹrọnọ who yoẹme kẹ urru riẹ evaọ oware kpobi je ru oware kpobi nọ mẹ ta, me ti dhuaro kẹ ewegrẹ ra jẹ wọso enọ e be wọso owhẹ. 23 Keme ukọ-odhiwu mẹ ọ te karo kẹ owhẹ jẹ rehọ owhẹ bru ahwo Amọ, ahwo Hit, ahwo Pẹriz, ahwo Kenan, ahwo Hiv, gbe ahwo Jebus, mẹ vẹ te raha ai no.+ 24 Who re guzou kpotọ kẹ eghẹnẹ rai vievie he hayo rọwo nọ whọ rẹ gọ ai hi, yọ whọ rẹ rọ aro kele iruemu rai vievie he.+ Ukpoye, who re kporo ai no jẹ whọlọ ipila ọrẹri* rai no.+ 25 Whọ rẹ gọ Jihova Ọghẹnẹ ra hrọ,+ yọ ọ te ghale ebrẹdi ra gbe ame ra.+ Me ti si ẹyao no udevie rai.+ 26 Eva i ti no eyae nọ e rrọ ẹkwotọ ra ha, yọ a te jọ ega ha,+ me ti ru owhẹ rria edẹ uzuazọ ra gba.*

27 “Me ti vi ozọ mẹ karo kẹ owhẹ,+ me ti reghe ahwo kpobi nọ whọ te nyaku, yọ me ti ru ewegrẹ ra kpobi dhẹ kẹ owhẹ.*+ 28 Me ti vi elọhoma* karo kẹ owhẹ,+ u ve ti le ahwo Hiv, ahwo Kenan, gbe ahwo Hit no kẹ owhẹ.+ 29 Me ti le ai no kẹ owhẹ evaọ ẹgbukpe ọvo ho, re ẹkwotọ na o siọ ofofe ba ẹjọ, re erao ijihẹ i gbe vihọ kẹ owhẹ hẹ.+ 30 Ẹmẹrera me ti ro le ai no kẹ owhẹ, bẹsenọ who re ro vihọ jẹ rehọ ẹkwotọ na no.+

31 “Me ti fi uwhru ra họ no Abade Ọwawae na rite abade ahwo Filistia je no udhude na rite Ethẹ na;*+ keme mẹ te rehọ ahwo nọ a be rria ẹkwotọ na họ obọ ra, who ve ti le ai no aro ra.+ 32 Whọ rẹ re ọvọ kugbe ae hayo eghẹnẹ rai vievie he.+ 33 A rẹ rria evaọ otọ ra ha, re a gbe ru owhẹ raha uzi wọso omẹ hẹ. Whọ tẹ gọ eghẹnẹ rai, u ti zihe ruọ agbefẹ kẹ owhẹ hrọ.”+

24 Kẹsena ọ tẹ ta kẹ Mosis nọ: “Gadiẹ kpehru bru Jihova, whẹ avọ Erọn, Nedab gbe Abaihu,+ gbe ekpako udhosa-gbikpe Izrẹl, re wha guzou kpotọ evaọ ugbo. 2 Mosis ọvo ọ rẹ nya kẹle Jihova; rekọ ezae edekọ na a rẹ nya kẹle he, yọ ahwo na a re lele iei kpobọ ehru hu.”+

3 Kẹsena Mosis ọ tẹ nyaze ọ tẹ vuẹ ahwo na eme Jihova kpobi gbe izi oziẹobro na kpobi,+ ahwo na kpobi a tẹ rọ unu ovo yo nọ: “Eme kpobi nọ Jihova ọ ta na, u no omai eva ze nọ ma re ru ai.”+ 4 Fikiere Mosis o te kere eme kpobi nọ Jihova ọ ta fihotọ.+ Ọ tẹ kpama evaọ irioke frifri ọ tẹ bọ agbada-idhe fihọ obotọ ugbehru na jẹ wọ itho* ikpegbivẹ fihọ etẹe rọwokugbe erua ikpegbivẹ Izrẹl. 5 Kẹsena o te vi emoha ahwo Izrẹl, a te dhe idhe emahọ jẹ rehọ iruẹ dhe idhe ọriẹyeri+ kẹ Jihova. 6 Mosis ọ tẹ rehọ abọvo azẹ na o te ku ei họ imidhe ikokodo, ọ tẹ frẹ abọvo azẹ na ku agbada-idhe na. 7 Kẹsena ọ tẹ rehọ obe ọvọ na o te sei do via kẹ ahwo na.+ A tẹ ta nọ: “Eware kpobi nọ Jihova ọ ta na, u no omai eva ze nọ ma re ru ai, yọ ma ti yoẹme.”+ 8 Fikiere Mosis ọ tẹ rehọ azẹ na ọ tẹ frẹ riẹ ku ahwo na,+ ọ tẹ ta nọ: “Onana họ azẹ ọvọ nọ Jihova ọ re kugbe owhai rọwokugbe eme nana kpobi.”+

9 Mosis avọ Erọn, Nedab gbe Abaihu, gbe ekpako udhosa-gbikpe Izrẹl a tẹ gadiẹ kpehru, 10 yọ a ruẹ Ọghẹnẹ Izrẹl.+ Evaọ otọ awọ riẹ, oware nọ o wọhọ otọ nọ a rehọ safaya ru o jariẹ, yọ o jẹ fo kokoko wọhọ idhiwu na omarai.+ 11 Ọ nwa ahwo ologbo* Izrẹl+ na oma ha, yọ a jọ eruẹaruẹ ruẹ Ọghẹnẹ uzẹme na a tẹ re jẹ da.

12 Kẹsena Jihova ọ tẹ ta kẹ Mosis nọ: “Nyabru omẹ ziọ obọ ehru ugbehru na re whọ jọ etẹe. Mẹ te kẹ owhẹ ewẹ-itho ekpakpala erọ uzi gbe ujaje nọ me ti kere ro wuhrẹ ai.”+ 13 Fikiere Mosis ọ tẹ kpama avọ ọgbodibo riẹ Joshua,+ Mosis ọ tẹ gadiẹ kpobọ ehru ugbehru Ọghẹnẹ uzẹme na.+ 14 Rekọ ọ ta kẹ ekpako na nọ: “Wha jọ etenẹ hẹrẹ omai bẹsenọ ma re zihe bru owhai ze.+ Erọn avọ Họr+ a rrọ kugbe owhai. Ohwo kpobi nọ o wo ẹdhọ ọ sae nyabru rai.”+ 15 Kẹsena Mosis ọ tẹ gadiẹ kpobọ ehru ugbehru nọ ẹgho o ruru na.+

16 Oruaro Jihova+ o tẹ daji Ugbehru Saena,+ yọ ẹgho na o ruru i rie edẹ ezeza. Evaọ ẹdẹ avọ ihrẹ o te se Mosis no udevie ẹgho na ze. 17 Rọkẹ ahwo Izrẹl nọ a je rri, oruaro Jihova o wọhọ ebruerae nọ e be to evaọ ehru ugbehru na. 18 Mosis ọ tẹ ruọ evaọ ẹgho na ọ tẹ gadiẹ kpobọ ehru ugbehru na.+ Mosis ọ tẹ rria ugbehru na edẹ udhuvẹ gbe eso udhuvẹ.+

25 Jihova ọ tẹ ta kẹ Mosis nọ: 2 “Ta kẹ ahwo Izrẹl nọ a rehọ okẹ ze kẹ omẹ; ohwo kpobi nọ udu riẹ o wọ who re mi okẹ mẹ.+ 3 Onana họ okẹ nọ whọ rẹ rehọ mi ai: igoru,+ isiliva,+ ekọpa,+ 4 olulu iburu, iwhulu ogorurẹ,* ilulu ewawae egbagba,* emamọ ohọ-olọlọhọ, eto ẹwe, 5 oviẹ egbo nọ a rehọ ame ọwawae gbe, oviẹ isili,* ure akasha,+ 6 ewhri rọkẹ ikpẹ na,+ balsam rọkẹ ewhri eromuo*+ na jẹ rọkẹ insẹnse nọ i re gbo ore awere,+ 7 gbe itho oniks avọ itho efa nọ a ti fihọ ẹfọd*+ na gbe ẹwẹ-ohọ igbama+ na. 8 A re ru oria aruẹri kẹ omẹ, mẹ vẹ te rria* udevie rai.+ 9 Wha re ru uwou-udhu na avọ eware riẹ kpobi lele oriruo* nọ me bi dhesẹ kẹ owhẹ na dẹẹ.+

10 “A rẹ rehọ ure akasha ru etehe,* uthethei riẹ ikiubiti* ivẹ gbe ubro, okẹkẹe riẹ ikiubiti ọvo gbe ubro, yọ ekpehru riẹ ikiubiti ọvo gbe ubro.+ 11 Kẹsena whọ vẹ rehọ emamọ igoru*+ tamu oma riẹ soso. Te obeva te otafe riẹ whọ rẹ rehọ igoru na tamu, yọ who re ru ogbẹ igoru wariẹe họ.+ 12 Whọ rẹ ghra igoru ro ru emero ene kẹe, whọ vẹ ta ae mu obehru awọ ene riẹ, emero ivẹ evaọ abọjọ, emero ivẹ evaọ abọdekọ. 13 Whọ rẹ rehọ ure akasha ru ekpọ, whọ vẹ rehọ igoru tamu oma rai soso.+ 14 Whọ rẹ thọrọ ekpọ na fihọ evaọ emero na nọ e rrọ tabọ tabọ Etehe na re a ruẹse rehọ ae wọ Etehe na. 15 Ekpọ na e rẹ jọ emero Etehe na; a re si ai noi hi.+ 16 Who re fi Isẹri nọ mẹ te kẹ owhẹ na họ evaọ Etehe na.+

17 “Whọ rẹ rehọ emamọ igoru ru ururu, uthethei riẹ ikiubiti ivẹ gbe ubro, okẹkẹe riẹ ikiubiti ọvo gbe ubro.+ 18 Who re ru chẹrub igoru ivẹ; ehama who re ro ru ai fihọ ehru oka avọ oka ururu na.+ 19 Ru chẹrub ivẹ na fihọ ehru eka ivẹ na, chẹrub ọvo ọ rẹ jọ oka jọ ururu na ọnọ o kiọkọ ọ vẹ jọ oka odekọ. 20 Chẹrub ivẹ na e rẹ bẹre ibekpe ivẹ rai kpehru, rọ ibekpe rai ruru ururu na,+ yọ a rẹ rẹriẹ ovao ku ohwohwo. A re ru ovao chẹrub ivẹ na rri ururu na. 21 Whọ rẹ wọ ururu+ na họ Etehe na, yọ who re fi Isẹri nọ mẹ te kẹ owhẹ na họ evaọ Etehe na. 22 Me ti dhesẹ omamẹ via kẹ owhẹ evaọ etẹe jẹ ta ẹme kẹ owhẹ no ehru ururu na ze.+ Mẹ te jọ udevie chẹrub ivẹ nọ e rrọ ehru etehe Isẹri na ru owhẹ riẹ eware kpobi nọ me ti jie uzi rai kẹ owhẹ rọkẹ ahwo Izrẹl.

23 “Whọ rẹ jẹ rehọ ure akasha ru emẹjẹ,+ uthethei riẹ ikiubiti ivẹ, okẹkẹe riẹ ikiubiti ọvo, yọ ekpehru riẹ ikiubiti ọvo gbe ubro.+ 24 Whọ rẹ rehọ emamọ igoru tamu oma riẹ soso je ru ogbẹ igoru wariẹe họ. 25 Who re ru akọ wariẹe họ nọ o rẹ kẹre te okẹkẹe iziabọ ene,* who ve je ru ogbẹ igoru nya akọ na wariẹ họ. 26 Who re ru emero igoru ene kẹe, who ve fi emero na họ ibiezọ ene na, oria nọ a ru awọ ene na fihọ. 27 Emero na e rẹ kẹle akọ na re e jọ obọ nọ a rẹ thọrọ ekpọ nọ a rẹ rọ wọ emẹjẹ na họ. 28 Whọ rẹ rehọ ure akasha ru ekpọ na, whọ vẹ rehọ igoru tamu oma rai soso, kọ eye a rẹ rọ wọ emẹjẹ na.

29 “Who re je ru imidhe riẹ, igho riẹ, gbe ikoko-ame avọ imidhe ikokodo riẹ nọ a re ro ku idhe udi. Emamọ igoru who re ro ru ai.+ 30 Who re fi ebrẹdi udhesẹ na họ ehru emẹjẹ na evaọ aro mẹ kẹse kẹse.+

31 “Who re ru ọkpọ-edada ukpẹ+ ọrọ emamọ igoru. Ehama whọ rẹ rọ tehe ọkpọ-edada ukpẹ na lahwe. Ẹwẹ igoru ọvo who re ro ru obotọ riẹ, ugbe riẹ, edada riẹ, igho riẹ, ezo riẹ, gbe idodo riẹ.+ 32 Edada ezeza e rẹ jọ abọ ivẹ ọkpọ-edada ukpẹ na, edada esa e rẹ jọ abọjọ, edada esa e rẹ jọ abọ nọ o kiọkọ. 33 Igho esa nọ a ru wọhọ idodo almọnd e rẹ jọ ẹko edada esa jọ, avọ ezo gbe idodo nọ i re lele ohwohwo, yọ igho esa nọ a ru wọhọ idodo almọnd e rẹ jọ ẹko edada esa nọ o kiọkọ, avọ ezo gbe idodo nọ i re lele ohwohwo. Enẹ edada ezeza na i re ro no ugbe ọkpọ-edada ukpẹ na ze. 34 Evaọ ugbe ọkpọ-edada ukpẹ na, igho ene nọ a ru wọhọ idodo almọnd e rẹ jariẹ, avọ ezo riẹ gbe idodo riẹ nọ i re lele ohwohwo. 35 Ẹzo ọ rẹ jọ otọ edada ivẹ ọsosuọ nọ i no ugbe na ze, ẹzo ọ rẹ jọ otọ edada ivẹ nọ i lele i rie, yọ ẹzo ọ rẹ jọ otọ edada ivẹ edekọ nọ i lele i rie, ere o rẹ jọ kẹ egha ezeza nọ i no ugbe na ze na. 36 Ẹwẹ emamọ igoru ọvo nọ a rọ ehama tehe a re ro ru ezo na avọ edada na, gbe ọkpọ-edada ukpẹ na soso.+ 37 Who re ru ikpẹ ihrẹ fihọ iẹe, nọ a tẹ rọ ikpẹ na tu i ve lo fihọ aro oria nọ o rrọ.+ 38 Emamọ igoru a re ro ru eware nọ a re ro kru iwhiki* riẹ gbe imidhe erae riẹ.+ 39 Etalẹnte* ọvo ọrọ emamọ igoru a re ro ru ei avọ ekwakwa nana. 40 Ruẹ nọ who re ru ai lele oriruo* nọ a dhesẹ kẹ owhẹ evaọ ugbehru na.+

26 “Whọ rẹ rehọ ehọ uwou-udhu ikpe nọ a rehọ emamọ ohọ-olọlọhọ nọ a zuo ziezi, avọ olulu iburu, iwhulu ogorurẹ, gbe ilulu ewawae egbagba ru ro ru uwou-udhu na.+ Who re zuo iwoho chẹrub+ fihọ ai ro ru onaa+ họ ae. 2 Ohọ uwou-udhu ovuọvo u re theri te ikiubiti* udhegberee, jẹ kẹre te ikiubiti ene. Ehọ uwou-udhu na kpobi e rẹ jọ ẹrẹrẹe.+ 3 A rẹ zuẹ ehọ uwou-udhu isoi kugbe re e jọ ẹko ọvo, a vẹ jẹ zuẹ ehọ uwou-udhu isoi nọ i kiọkọ kugbe re e jọ ẹko ọvo re. 4 Whọ rẹ rehọ olulu iburu ru ighogho fihọ akọ ohọ uwou-udhu ovo evaọ obọ oka ẹko ọvo jọ, yọ epọvo na who re ru fihọ obọ oka ọrọ ẹko ọdekọ na evaọ oria nọ a te jọ jẹ ae họ kugbe. 5 Who re ru ighogho udhuvẹ-gbikpe fihọ akọ ohọ uwou-udhu ovo jọ je ru ighogho udhuvẹ-gbikpe fihọ akọ ohọ uwou-udhu ọdekọ na re e rẹriẹ ovao ku ohwohwo evaọ oria nọ a te jọ jẹ ae họ kugbe. 6 Who re ru ejẹhọ igoru udhuvẹ-gbikpe whọ vẹ rehọ ejẹhọ na rọ jẹ ehọ uwou-udhu na họ kugbe, uwou-udhu na o vẹ jọ ọvo.*+

7 “Who re je ru ehọ eto ẹwe+ rọkẹ uwou-udhu na nọ a re ro ruru uwou-udhu na. Ehọ uwou-udhu ikpegbọvo who re ru.+ 8 Ohọ uwou-udhu ovuọvo u re theri te ikiubiti ọgba jẹ kẹre te ikiubiti ene. Ehọ uwou-udhu ikpegbọvo na kpobi e rẹ jọ ẹrẹrẹe. 9 Whọ rẹ zuẹ ehọ uwou-udhu isoi kugbe jẹ zuẹ ehọ uwou-udhu ezeza edekọ na kugbe, yọ who re kpiri umuo ohọ uwou-udhu avọ ezeza na họ aro uwou-udhu na. 10 Who re ru ighogho udhuvẹ-gbikpe fihọ akọ ohọ uwou-udhu ovo jọ, onọ o rrọ obọ oka evaọ ẹko na, je ru ighogho udhuvẹ-gbikpe fihọ akọ ohọ uwou-udhu odekọ evaọ oria nọ a te jọ jẹ ae họ kugbe na. 11 Who re ru ejẹhọ ekọpa udhuvẹ-gbikpe who ve fi ejẹhọ na họ ighogho na, whọ vẹ jẹ ehọ uwou-udhu na họ kugbe, ohọ uwou-udhu na o vẹ jọ ọvo. 12 Abọ ehọ uwou-udhu na nọ u theri vrẹ* o rẹ jọ onọ u re kuwhrẹrẹ. Abọvo ohọ uwou-udhu nọ o kiọkọ na u re kuwhrẹrẹ ruru obemu uwou-udhu na. 13 Abọ ehọ uwou-udhu na nọ u theri vrẹ evaọ ofẹ uthethei na o rẹ jọ onọ o rẹ rehọ ikiubiti ovo kuwhrẹrẹ fihọ uwou-udhu na evaọ tabọ tabọ riẹ, re o ruẹsi ruru iei.

14 “Whọ rẹ jẹ rehọ oviẹ egbo nọ a rehọ ame ọwawae gbe ro ru ohọ nọ a re ro ruru uwou-udhu na, jẹ rehọ oviẹ isili* ru ohọ nọ a re ro ruru ọyena.+

15 “Whọ rẹ rehọ ure akasha ru ifremu+ uwou-udhu na nọ i re dikihẹ kpọvi.+ 16 Ifremu ọvuọvo o re kpehru te ikiubiti ikpe jẹ kẹre te ikiubiti ọvo gbe ubro. 17 Ifremu ọvuọvo o re wo ezo* ivẹ nọ a ru fihọ ae nọ e jẹhọ ohwohwo. Ere who re ru ifremu uwou-udhu na kpobi. 18 Who re ru ifremu udhe rọkẹ abọ obọze ovatha-ọre uwou-udhu na nọ o rẹriẹ ovao ku obọze ovatha-ọre.

19 “Who re ru awọ isiliva udhuvẹ+ fihọ otọ ifremu udhe na: awọ ivẹ e rẹ jọ otọ ifremu ọvo nọ a re dhe ezo ivẹ riẹ fihọ yọ awọ ivẹ e rẹ jọ otọ ifremu kpobi nọ u bi lele iei nọ a re dhe ezo ivẹ ifremu na fihọ.+ 20 Rọkẹ abọdekọ uwou-udhu na, abọ ẹkpẹlobọ ovatha-ọre na, ru ifremu udhe kẹe 21 gbe awọ isiliva udhuvẹ rai, awọ ivẹ e rẹ jọ otọ ifremu ọvo, yọ awọ ivẹ e rẹ jọ otọ ifremu kpobi nọ u bi lele iei. 22 Rọkẹ abọ obemu uwou-udhu na nọ u rri obọ ukiediwo-ọre na, who re ru ifremu ezeza kẹe.+ 23 Who re ru ifremu ivẹ re e jọ ifremu ibienẹ ivẹ obemu uwou-udhu na. 24 A re ru ivẹ kugbe re e jọ ovo no otọ duwu ehru, rite oria ẹmẹro ọsosuọ na. Ere a re ru ivẹ na, e vẹ jọ ifremu ibienẹ ivẹ na. 25 Who re ru ifremu eree avọ awọ isiliva ikpegbezeza rai, awọ ivẹ e rẹ jọ otọ ifremu ọvo, yọ awọ ivẹ e rẹ jọ otọ ifremu kpobi nọ u bi lele iei.

26 “Whọ rẹ rehọ ure akasha ru ire nọ a re ro where, isoi rọkẹ ifremu abọjọ uwou-udhu na,+ 27 gbe ire nọ a re ro where isoi rọkẹ ifremu abọdekọ uwou-udhu na, gbe ire nọ a re ro where isoi rọkẹ ifremu abọ uwou-udhu na nọ o rẹriẹ ovao ku obọ ukiediwo-ọre na, ofẹ obemu na. 28 Ure nọ a re ro where udevie na nọ o rẹ nya udevie ifremu na vrẹ na u re no oka te oka.

29 “Whọ rẹ rehọ igoru tamu oma ifremu na soso,+ whọ rẹ rehọ igoru ru emero rai nọ e rẹ jọ abọ nọ a rẹ thọrọ ire nọ a re ro where na họ, yọ whọ rẹ rehọ igoru tamu oma ire nọ a re ro where na soso. 30 Whọ rẹ whẹ uwou-udhu na họ lele omaa riẹ hrọ onọ a dhesẹ kẹ owhẹ evaọ ugbehru na.+

31 “Whọ rẹ rehọ olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi ro ru ekọtini.+ A re zuo iwoho chẹrub fihọ iẹe. 32 Whọ rẹ jẹ ekọtini na họ ipila ene nọ a rọ ure akasha ru nọ a rehọ igoru tamu oma rai soso. Igoru a re ro ru ejẹhọ rai. A re dhe ipila na họ awọ isiliva ene. 33 Whọ rẹ jẹ ekọtini na họ otọ ejẹhọ na whọ vẹ wọ etehe Isẹri na+ fihọ etẹe evaọ obemu ekọtini na. Ekọtini na o rẹ hẹriẹ Oria Ọrẹri na+ no Ọrẹri Erẹri na kẹ owhai.+ 34 Whọ rẹ wọ ururu na họ etehe Isẹri na hrọ evaọ Ọrẹri Erẹri na.

35 “Whọ rẹ wọ emẹjẹ na fihọ obọ otafe ekọtini na, avọ ọkpọ-edada ukpẹ na+ nọ o rẹriẹ ovao ku emẹjẹ na evaọ abọ obọze ovatha-ọre uwou-udhu na; yọ whọ rẹ wọ emẹjẹ na fihọ abọ ẹkpẹlobọ ovatha-ọre na. 36 Whọ rẹ rehọ olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo kugbe ro ru ekọtini nọ a re ro gbere* unuẹthẹ uwou-udhu na.+ 37 Whọ rẹ rehọ ure akasha ru ipila isoi nọ a rẹ jẹ ekọtini nọ a re ro gbere* na họ, yọ whọ rẹ rehọ igoru tamu oma rai soso. Igoru a re ro ru ejẹhọ rai, yọ whọ rẹ ghra ekọpa ro ru awọ isoi rọkẹ ae.

27 “Whọ rẹ rọ ure akasha ru agbada-idhe na;+ uthethei riẹ o rẹ jọ ikiubiti* isoi, okẹkẹe riẹ ikiubiti isoi. Agbada-idhe na o re wo abọ ene nọ e rẹ jọ ẹrẹrẹe yọ o re kpehru te ikiubiti esa.+ 2 Who re ru izei+ họ ibienẹ ene riẹ; izei na e rẹ jọ abọjọ agbada-idhe na, yọ whọ rẹ rọ ekọpa tamu oma agbada-idhe na soso.+ 3 Who re ru ibokiti nọ a rẹ rọ whẹ enwo* riẹ kufiẹ, kugbe eshọvẹle, imidhe ikokodo, efọko, gbe imidhe erae, yọ ekọpa who re ro ru ekwakwa riẹ kpobi.+ 4 Who re ru ẹfẹ kẹ agbada-idhe na, ibiekpọ ekọpa a re ro where ohwohwo ro ru ei, yọ emero ene nọ a rehọ ekọpa ru e rẹ jọ akotọ ibienẹ ene ẹfẹ na. 5 Who re ru ei re o jọ otọ akọ agbada-idhe na, yọ ẹfẹ na o re kpotọ ruọ obeva agbada-idhe na. 6 Whọ rẹ rọ ure akasha ru ekpọ kẹ agbada-idhe na, jẹ rọ ekọpa tamu oma rai soso. 7 A rẹ thọrọ ekpọ na họ emero na re ekpọ na e jọ abọ ivẹ agbada-idhe na okenọ a te wọe.+ 8 Who re ru agbada-idhe na wọhọ etehe nọ a rehọ eplanke ru nọ obotọ avọ obehru riẹ i rovie fihọ. A re ru ei nwane wọhọ epanọ o dhesẹ kẹ owhẹ evaọ ugbehru na.+

9 “Who re ru ighẹ+ fihọ uwou-udhu na wariẹ họ. Evaọ abọ obọze ovatha-ọre na, nọ o rẹriẹ ovao ku obọze ovatha-ọre, ighẹ na o re wo ehọ nọ a jẹhọ, e rẹ jọ emamọ ehọ-elọlọhọ nọ a zuo ziezi, uthethei riẹ o rẹ jọ ikiubiti udhusoi (100) evaọ abọ nana.+ 10 O re wo ipila udhe avọ awọ ekọpa udhe. Isiliva a re ro ru ighele* ipila na gbe eware* nọ a re ro thuru ipila na si ae. 11 Ehọ nọ a rẹ jẹhọ abọ ẹkpẹlobọ ovatha-ọre na i re theri te ikiubiti udhusoi (100) re, avọ ipila udhe riẹ gbe awọ ekọpa udhe rai, avọ ighele gbe eware nọ a re ro thuru ipila na si ae nọ a rọ isiliva ru. 12 A rẹ jẹ ehọ fihọ abọ ukiediwo-ọre na nọ u re theri te ikiubiti udhuvẹ-gbikpe nọ o rẹ jọ okẹkẹe ighẹ na, avọ ipila ikpe gbe awọ ikpe. 13 Okẹkẹe ighẹ na evaọ abọ ovatha-ọre, ofẹ nọ ọre ọ rẹ va no ze na o rẹ jọ ikiubiti udhuvẹ-gbikpe. 14 Ehọ nọ a rẹ jẹhọ i re theri te ikiubiti ikpegbisoi evaọ ofẹ riẹ jọ, avọ ipila esa gbe awọ esa.+ 15 Yọ evaọ ofẹ riẹ odekọ, ehọ nọ a rẹ jẹhọ i re theri te ikiubiti ikpegbisoi, avọ ipila esa gbe awọ esa.

16 “Unu ighẹ na u re wo ekọtini nọ a re ro gbere iei* nọ u re theri te ikiubiti udhe, eware nọ a re ro ru ei họ olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo kugbe,+ avọ ipila ene gbe awọ ene rai.+ 17 Ipila kpobi nọ e wariẹ ighẹ na họ i re wo eware isiliva nọ a re ro kru rai dikihẹ gbe ighele isiliva, rekọ ekọpa a re ro ru awọ rai.+ 18 Uthethei ogba ighẹ na o rẹ jọ ikiubiti udhusoi (100),+ okẹkẹe riẹ ikiubiti udhuvẹ-gbikpe, yọ u re kpehru te ikiubiti isoi, emamọ ehọ-elọlọhọ nọ a zuo ziezi a re ro ru ei, yọ u re wo awọ ekọpa. 19 Ekwakwa gbe eware kpobi nọ a re ro ru iruẹru uwou-udhu na, gbe ighele ehọ uwou-udhu na avọ ighele ighẹ na kpobi, ekọpa a re ro ru ai.+

20 “Whọ rẹ ta kẹ ahwo Izrẹl nọ a rehọ obọdẹ ewhri ibi olivi* nọ a duwu se owhẹ nọ a re ro tu ikpẹ na, re a ro ru ikpẹ na lo kẹse kẹse.+ 21 Evaọ uwou-udhu omakugbe na, otafe ekọtini nọ o kẹle Isẹri* na,+ Erọn avọ emezae riẹ a re ru ọruẹrẹfihotọ nọ ikpẹ na i re ro lo no owọwọ rite ohiohiẹ evaọ aro Jihova.+ Onana yọ uzi nọ o rẹ jọ ribri kẹ ige rai kpobi nọ ahwo Izrẹl a re lele.+

28 “Whọ rẹ rehọ Erọn oniọvo ra avọ emezae riẹ no udevie ahwo Izrẹl ze re ọ jọ ozerẹ kẹ omẹ:+ Erọn,+ jegbe Nedab avọ Abaihu,+ Ẹlieza avọ Itama,+ emezae Erọn.+ 2 Who re ru iwu ọrẹri kẹ Erọn oniọvo ra, nọ i re wo orro avọ erru.+ 3 Whọ rẹ ta kẹ ahwo kpobi nọ a wo onaa iruo,* enọ mẹ kẹ ẹzi areghẹ no,+ re a ru iwu Erọn na nọ i re ru ei fo,* re ọ ruẹse jọ ozerẹ kẹ omẹ.

4 “Enana họ iwu nọ a re ru: ẹwẹ-ohọ igbama,+ ẹfọd,*+ ukotu nọ u wo abọ họ,+ ewu othethei echẹke,* etu-udhọfọ,+ gbe umueku;+ a re ru iwu ọrẹri nana kẹ Erọn oniọvo ra avọ emezae riẹ, re ọ ruẹse jọ ozerẹ kẹ omẹ. 5 Ahwo nọ a wo onaa iruo na a rẹ rehọ eware nana ru iruo na: igoru, olulu iburu, iwhulu ogorurẹ, ilulu ewawae egbagba, gbe emamọ ehọ-elọlọhọ na.

6 “Eware nọ a re ro ru ẹfọd na họ igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi, yọ a re zuo ai kugbe ro ru ei.+ 7 U re wo abọ ikoko ivẹ nọ a kugbe evaọ oka avọ oka ivẹ na. 8 Eware nana evona a re ro zuo umueku*+ nọ a re ru fihọ ẹfọd na nọ a re ro mu ei ga na: igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi.

9 “Whọ rẹ rehọ itho oniks ivẹ+ whọ vẹ kare edẹ emezae Izrẹl fihọ ae,+ 10 edẹ ezeza evaọ utho ọvo jọ, edẹ ezeza nọ i kiọkọ evaọ utho odekọ, lele othotha nọ a ro yẹ ai. 11 Ọwena nọ ọ rẹ kare itho ọ rẹ kare edẹ emezae Izrẹl fihọ itho ivẹ na oghẹrẹ nọ ọ rẹ kare oka fihọ oware.+ Kẹsena who ve fi ai họ tamu emeware igoru. 12 Who re fi itho ivẹ na họ abọ ikoko erọ ẹfọd na re e jọ itho ekareghẹhọ kẹ emezae Izrẹl,+ yọ Erọn ọ rẹ wha edẹ rai hrọ evaọ aro Jihova evaọ abọ ikoko ivẹ riẹ na wọhọ oware ekareghẹhọ. 13 Who re ru emeware igoru 14 gbe icheni ivẹ erọ emamọ igoru* nọ a thahe wọhọ ufi,+ yọ whọ rẹ jẹ icheni nọ a thahe wọhọ ufi na mu emeware igoru na.+

15 “Whọ rẹ ta kẹ ohwo nọ o re zuo iwu re o ru ẹwẹ-ohọ igbama oziẹobro na.+ Wọhọ ẹfọd na, eware nọ a re ro ru ei họ: igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi.+ 16 Abọ ene riẹ e rẹ jọ ẹrẹrẹe nọ a te kpiri ei ibro ivẹ, u re theri te okẹkẹe evabọ* jẹ kẹre te okẹkẹe evabọ. 17 Whọ rẹ ta itho mu ei, itho na e rẹ jọ ihie ene. Itho uhie ọsosuọ họ rubi, topaz, gbe ẹmerald. 18 Itho uhie avọ ivẹ họ tọkwọes, safaya, gbe jaspa. 19 Itho uhie avọ esa họ leshẹm,* ageti, gbe ametist. 20 Itho uhie avọ ene họ krisolaet, oniks, gbe jed. A rẹ ta ai mu emeware igoru. 21 Unu itho na o rẹ rọwokugbe edẹ emezae ikpegbivẹ Izrẹl. A rẹ kare odẹ fihọ ọvuọvo wọhọ epanọ a rẹ kare oka fihọ oware, odẹ ọvuọvo u re dikihẹ kẹ erua ikpegbivẹ na ọvuọvo.

22 “Who re ru icheni nọ a zuo wowoma fihọ ẹwẹ-ohọ igbama na, wọhọ ifi emamọ igoru.+ 23 Who re ru emero igoru ivẹ kẹ ẹwẹ-ohọ igbama na, whọ vẹ ta emero ivẹ na mu oka avọ oka ẹwẹ-ohọ igbama na. 24 Whọ rẹ thọrọ ifi igoru ivẹ na họ emero ivẹ na nọ e rrọ oka avọ oka ẹwẹ-ohọ igbama na. 25 Whọ rẹ thọrọ eka ivẹ erọ ifi ivẹ na họ emeware igoru ivẹ na, yọ who re kru rai kugbe abọ ikoko ẹfọd na hrọ, evaọ obaro riẹ. 26 Who re ru emero igoru ivẹ whọ vẹ ta ai mu oka avọ oka obeva ẹwẹ-ohọ igbama na, rẹriẹ ovao ku ẹfọd na.+ 27 Who re ru emero igoru ivẹ efa fihọ aro ẹfọd na, evaọ obotọ abọ ikoko ivẹ na, kẹle oria nọ a jọ zuẹe kugbe na, evaọ ehru umueku* ẹfọd na nọ a zuo na.+ 28 A rẹ rehọ ufi iburu kru ẹwẹ-ohọ igbama na, a rẹ thọrọ ufi na họ emero riẹ lafi emero ẹfọd na a ve thuru iei. Onana u re kru ẹwẹ-ohọ igbama na fihọ ẹfọd na, evaọ obehru umueku* nọ a zuo na.

29 “Erọn ọ rẹ wha edẹ emezae Izrẹl hrọ evaọ ẹwẹ-ohọ igbama oziẹobro na evaọ udu riẹ okenọ ọ te nyaze Oria Ọrẹri na wọhọ oware ekareghẹhọ kẹse kẹse evaọ aro Jihova. 30 Who re fi Yurim avọ Tumim* na+ họ ẹwẹ-ohọ igbama oziẹobro na, e rẹ jọ udu Erọn hrọ okenọ ọ te nyaze aro Jihova, Erọn ọ rẹ wha eware nọ a re ro bruoziẹ ahwo Izrẹl hrọ evaọ udu riẹ evaọ aro Jihova kẹse kẹse.

31 “Olulu iburu ọvo who re ro ru ukotu nọ u wo abọ họ orọ ẹfọd na.+ 32 U re wo oria nọ u rovie fihọ evaọ obehru riẹ evaọ udevie.* Oria nọ u rovie fihọ na u re wo akọ nọ a zuo wariẹe họ nọ ohwo nọ o re fi ilulu họ ekpọ ro zuo ehọ o re zuo fihọ iẹe. O rẹ jọ wọhọ uriohọ ewu-ẹmo, re o gbẹ bẹre he. 33 Whọ rẹ rehọ olulu iburu, iwhulu ogorurẹ, gbe ilulu ewawae egbagba ro ru pọmegranet* wariẹ akọ obotọ riẹ họ, avọ igogo igoru evaọ ududevie rai. 34 Who re fi ẹgogo igoru avọ pọmegranet họ lele ohwohwo, ẹgogo igoru ọvo avọ pọmegranet ọvo nọ o re lele iei, wariẹ akọ obotọ ukotu nọ u wo abọ họ na kpobi. 35 Erọn o re ku ei họ hrọ re ọ ruẹse gbodibo, yọ a re yo edo riẹ hrọ nọ ọ tẹ be ruọ eva aruẹri na evaọ aro Jihova gbe okenọ ọ be ruọ otafe, re o gbe whu hu.+

36 “Who re ru ẹwẹ-odhe ọnwranwra ọrọ emamọ igoru, whọ vẹ kare eme nana fihọ iẹe epanọ a rẹ kare oka fihọ oware: ‘Jihova họ ọrẹri.’+ 37 Whọ rẹ rehọ ufi iburu thuru iei fihọ etu-udhọfọ na hrọ;+ o rẹ jọ aro etu-udhọfọ na ẹsikpobi. 38 O rẹ jọ aruezo Erọn, abe-ọriọ ọ rẹ jọ uzou Erọn nọ ohwo jọ ọ tẹ thọ uzi kpahe eware ọrẹri na,+ enọ ahwo Izrẹl a re ru fihọ ọrẹri evaọ okenọ a tẹ rehọ ae kẹ ekẹ ọrẹri. O rẹ jọ aruezo riẹ hrọ ẹsikpobi, re a ruẹsi wo ọjẹrehọ Jihova.

39 “Whọ rẹ rehọ emamọ ehọ-elọlọhọ zuo ewu othethei echẹke* na, rọ emamọ ohọ-olọlọhọ ru etu-udhọfọ, je zuo umueku.+

40 “Who re je ru iwu ithethei, imueku, gbe itu kẹ emezae Erọn,+ nọ i re wo orro avọ erru.+ 41 Who re ku ai họ Erọn oniọvo ra avọ emezae riẹ, who ve wholo ai+ jẹ rehọ ae mu*+ je ru ai fo,* a vẹ jọ izerẹ kẹ omẹ. 42 Whọ rẹ jẹ rehọ ohọ-olọlọhọ ru ehọ nọ a rẹ rọ gba-ọgọdọ* kẹ ae re a ro ruru ẹba rai.+ Enana i re theri no eku te obọ ikpekpawọ. 43 Erọn avọ emezae riẹ a re ku ai họ hrọ nọ a tẹ be nyaziọ uwou-udhu omakugbe na hayo nọ a tẹ be nyaziọ agbada-idhe na te gbodibo evaọ oria ọrẹri na, re a gbẹ reabe he re a seba ewhu. Onana yọ ujaje nọ o rẹ jọ ribri kẹe avọ emọ* riẹ nọ i ti lele iei nọ u te noi no.

29 “Onana họ oware nọ who re ru ro ru ai fo* re a jọ izerẹ kẹ omẹ: Rehọ eruẹ ọsese ọvo, igbo ivẹ nọ oware ovo o jọ oma rai thọ họ,+ 2 ebrẹdi nọ ọ kare ẹvi, ikulu ebrẹdi nọ ọ kare ẹvi nọ a rọ ewhri gua nọ a ru wọhọ ẹmẹro, gbe ebrẹdi ekpakpala nọ e kare ẹvi nọ a gbe ewhri họ.+ Whọ rẹ rehọ emamọ eflawa iwhiti iwuwuru ro ru ai 3 who ve fi ai họ evaọ ekete jẹ rehọ ekete na wọ ae ze,+ kugbe eruẹ avọ igbo ivẹ na.

4 “Whọ rẹ rehọ Erọn avọ emezae riẹ ze aro unuẹthẹ uwou-udhu omakugbe na+ whọ vẹ rehọ ame họ ae.+ 5 Kẹsena whọ vẹ rehọ iwu na+ who ve ku ewu othethei na họ Erọn, ukotu nọ u wo abọ họ orọ ẹfọd na, ẹfọd na, gbe ẹwẹ-ohọ igbama na, whọ vẹ gba umueku* ẹfọd na nọ a zuo na wariẹ eku riẹ họ ziezi.+ 6 Who re ku etu-udhọfọ na họ uzou riẹ je fi oka omauromudhe ọrẹri* na họ etu-udhọfọ na;+ 7 whọ vẹ rehọ ewhri eromuo na+ who ve ku ei họ uzou riẹ who ve wholo iei.+

8 “Kẹsena whọ vẹ rehọ emezae riẹ ziọ aro who ve ku iwu ithethei na họ ae,+ 9 who ve thuru imueku na mu ai wariẹ, te Erọn te emezae riẹ, je ku itu rai họ ae; ọkwa-ozerẹ na o ve zihe ruọ ọrai wọhọ ujaje nọ o rẹ jọ ribri.+ Enẹ whọ rẹ rọ rehọ Erọn avọ emezae riẹ mu re a jọ izerẹ.*+

10 “Kọ oke nana whọ rẹ rọ rehọ eruẹ na ziọ aro uwou-udhu omakugbe na, Erọn avọ emezae riẹ a vẹ rọ abọ rai kpahe uzou eruẹ na.+ 11 Kpe eruẹ na evaọ aro Jihova, evaọ aro unuẹthẹ uwou-udhu omakugbe na.+ 12 Dhe uziobọ ra họ azẹ eruẹ na re who su ei fihọ izei agbada-idhe na,+ who ve ku azẹ nọ o kiọkọ kpobi họ otọ agbada-idhe na.+ 13 Kẹsena whọ vẹ rehọ iwhri kpobi+ nọ e tamu ivu na, iwhri nọ e tamu edhẹ na, gbe ibieku ivẹ na avọ iwhri nọ e tamu ae, whọ vẹ mahe ae re i kuye iwiri evaọ agbada-idhe na.+ 14 Rekọ uwo eruẹ na gbe ohọrọ riẹ gbe isọ riẹ, whọ rẹ rọ erae mahe ae evaọ obọ otafe evuẹ na. Onana yọ idhe uzioraha.

15 “Kẹsena whọ vẹ rehọ egbo ọvo jọ, Erọn avọ emezae riẹ a vẹ rọ abọ rai kpahe uzou egbo na.+ 16 Kpe egbo na re whọ rehọ azẹ riẹ whọ vẹ frẹ riẹ fihọ tabọ tabọ agbada-idhe na kpobi wariẹ họ.+ 17 Va egbo na fihọ abọ sa-sa riẹ, whọ vẹ wozẹ ivu riẹ+ gbe awọ riẹ, whọ vẹ ruẹrẹ abọ sa-sa riẹ na họ te uzou riẹ. 18 Whọ rẹ mahe ọsoso egbo na, re who ru ei kuye iwiri evaọ agbada-idhe na. Onana yọ idhe emahọ kẹ Jihova, nọ u re gbo ore awere.*+ Onana yọ idhe nọ a rẹ rọ erae mahe kẹ Jihova.

19 “Kẹsena whọ vẹ rehọ egbo nọ o kiọkọ na, Erọn avọ emezae riẹ a vẹ rọ abọ rai kpahe uzou egbo na.+ 20 Kpe egbo na re whọ rehọ azẹ riẹ jọ ro te ẹroro-ozọ obọze Erọn gbe ẹroro-ozọ obọze emezae riẹ gbe uziobọ-uzou obọze rai gbe uziowọ-uzou obọze rai, whọ vẹ frẹ azẹ na fihọ tabọ tabọ agbada-idhe na kpobi wariẹ họ. 21 Kẹsena whọ vẹ rehọ azẹ jọ nọ ọ rrọ agbada-idhe na gbe ewhri eromuo na jọ+ whọ vẹ salọ iẹe ku Erọn avọ iwu riẹ gbe emezae riẹ avọ iwu rai, re ọyomariẹ avọ iwu riẹ gbe emezae riẹ avọ iwu rai a ruẹse jọ erẹri.+

22 “Kẹsena whọ vẹ rehọ eware nana no egbo na ze, iwhri na, uweli nọ o rrọ iwhriwhri na, iwhri nọ e tamu ivu na, iwhri nọ e tamu edhẹ na, ibieku ivẹ na avọ iwhri nọ e tamu ai,+ gbe owọ obọze na, keme ọnana yọ egbo eromuo.+ 23 Whọ vẹ jẹ rehọ ebrẹdi ogheghelie ọvo gbe ukulu ebrẹdi nọ a ru wọhọ ẹmẹro nọ a rọ ewhri gua ọvo gbe ebrẹdi ọkpakpala ọvo rono ekete ebrẹdi nọ e kare ẹvi nọ ọ rrọ aro Jihova na ze. 24 Who re fi aikpobi họ abọ Erọn avọ abọ emezae riẹ hrọ, yọ who re veghe ai kpemu kparo wọhọ idhe iveghe evaọ aro Jihova. 25 Kẹsena whọ vẹ rehọ ai no abọ rai whọ vẹ mahe ae evaọ agbada-idhe na, evaọ ehru idhe emahọ na, wọhọ idhe nọ i re gbo ore awere* evaọ aro Jihova. Onana yọ idhe nọ a rẹ rọ erae mahe kẹ Jihova.

26 “Kẹsena whọ vẹ rehọ ẹkpudu egbo eromuo na,+ ọnọ a bi ro dhe idhe kẹ Erọn na, who ve veghe iei kpemu kparo evaọ aro Jihova, o vẹ jọ ẹkẹ ra. 27 Whọ rẹ hẹriẹ eware nana fihọ akotọ,* ẹkpudu idhe iveghe na gbe owọ ẹkẹ ọrẹri nọ a veghe nọ a si no egbo eromuo na ze na,+ enọ a rehọ no usu eware nọ a bi ro dhe idhe kẹ Erọn gbe emezae riẹ ze na. 28 U re zihe ruọ orọ Erọn avọ emezae riẹ wọhọ uzi nọ o rẹ jọ ribri nọ ahwo Izrẹl a re lele, keme ẹkẹ ọrẹri ọ rrọ, yọ u re zihe ruọ ẹkẹ ọrẹri nọ ahwo Izrẹl a te hae rọ ze.+ Onana yọ ẹkẹ ọrẹri rai nọ a rẹ rọ kẹ Jihova evaọ idhe ọriẹyeri rai.+

29 “Emezae Erọn+ nọ e te rọ kpahe iẹe nọ u te noi no a re ku iwu ọrẹri+ Erọn na họ evaọ okenọ a ti wholo ai jẹ rehọ ai mu izerẹ. 30 Ozerẹ nọ ọ te rehọ ẹta riẹ evaọ usu emezae riẹ nọ ọ te nyaziọ uwou-udhu omakugbe na te gbodibo evaọ oria ọrẹri na o re ku iwu na họ edẹ ihrẹ.+

31 “Whọ rẹ rehọ egbo eromuo na who ve there uwo riẹ evaọ oria ọrẹri.+ 32 Erọn avọ emezae riẹ a rẹ re+ uwo egbo na avọ ebrẹdi nọ e rrọ ekete na evaọ aro unuẹthẹ uwou-udhu omakugbe na. 33 A rẹ re eware nọ a ro ru omavoro nọ a rọ rehọ ae mu izerẹ* je ru ai fo* na. Rekọ ohwo nọ a kẹ udu hu* ọ rẹ re ae he, keme enana yọ eware ọrẹri.+ 34 Otẹrọnọ abọjọ uwo arao idhe eromuo na gbe ebrẹdi na u kiọkọ te ohiohiẹ, whọ rẹ rehọ erae mahe onọ u kiọkọ na.+ A rẹ re iẹe vievie he, keme onana yọ oware ọrẹri.

35 “Enẹ who re ru kẹ Erọn avọ emezae riẹ, lele eware kpobi nọ me jie uzi rai kẹ owhẹ na. Edẹ ihrẹ whọ rẹ rọ rehọ ae mu izerẹ.*+ 36 Whọ rẹ rehọ eruẹ idhe uzioraha na dhe idhe kẹdẹ kẹdẹ rọkẹ omavoro, yọ who re ru agbada-idhe na fo* rono uzioraha ẹkwoma omavoro nọ who re ru kẹe, yọ who re ku ewhri họ iẹe* hrọ ro ru ei fo.*+ 37 Whọ rẹ rehọ edẹ ihrẹ ro ru omavoro kẹ agbada-idhe na, yọ who re ru ei fo* hrọ re o ruẹse jọ agbada-idhe nọ ọ mae rrọ ọrẹri.+ Ohwo kpobi nọ ọ rẹ rọ obọ te agbada-idhe na ọ rẹ jọ ọrẹri.

38 “Eware nana who re ro dhe idhe evaọ agbada-idhe na: igbo ivẹ nọ e rrọ ẹgbukpe kẹdẹ kẹdẹ, ẹsikpobi.+ 39 Rehọ egbo ọsese ọvo jọ dhe idhe evaọ ohiohiẹ kẹsena whọ vẹ rehọ egbo ọdekọ na dhe idhe nọ ọre o te kiediwi no.*+ 40 Abọvo abakpe owawọ ifa* orọ emamọ eflawa iwuwuru nọ a rọ abọvo abane ihini* orọ ewhri nọ a duwu ze rọ gua, gbe idhe udi orọ abọvo abane ihini orọ enwaene, enana a re kugbe egbo ọsese ọsosuọ na. 41 Whọ rẹ rehọ egbo ọsese avọ ivẹ na dhe idhe nọ ọre o te kiediwi no,* kugbe idhe ibi ekakọ avọ idhe udi evona nọ a ro kugbe dhe idhe ohiohiẹ na. Who re dhe idhe nana re i gbo ore awere,* idhe nọ a rẹ rọ erae mahe kẹ Jihova. 42 O rẹ jọ idhe emahọ ikẹse kẹse evaọ ige rai kpobi evaọ aro unuẹthẹ uwou-udhu omakugbe na evaọ aro Jihova, oria nọ me ti jo dhesẹ omamẹ via kẹ owhẹ nọ mẹ te jọ ta ẹme kẹ owhẹ.+

43 “Me ti dhesẹ omamẹ via kẹ ahwo Izrẹl evaọ etẹe, yọ oruaro mẹ u ti ru ei fo.*+ 44 Me ti ru uwou-udhu omakugbe na avọ agbada-idhe na fo,* yọ me ti ru Erọn avọ emezae riẹ fo*+ re a ruẹse jọ izerẹ kẹ omẹ. 45 Mẹ te rria* udevie ahwo Izrẹl, yọ mẹ te jọ Ọghẹnẹ rai.+ 46 A vẹ te ginẹ riẹ nọ mẹ họ Jihova Ọghẹnẹ rai, ọnọ ọ rehọ e rai no ẹkwotọ Ijipti ze re mẹ ruẹse rria udevie rai.+ Mẹ họ Jihova Ọghẹnẹ rai.

30 “Who re ru agbada-idhe re o jọ oria nọ a rẹ jọ mahe insẹnse;+ ure akasha who re ro ru ei.+ 2 Abọ ene riẹ e rẹ jọ ẹrẹrẹe, uthethei riẹ ikiubiti* ọvo, okẹkẹe riẹ ikiubiti ọvo, ekpehru riẹ ikiubiti ivẹ. Who re ru izei riẹ no uzedhe oma agbada-idhe na ze.+ 3 Whọ rẹ rọ emamọ igoru* tamu oma riẹ soso: obehru riẹ, tabọ tabọ riẹ kpobi wariẹ họ, gbe izei riẹ; yọ who re ru ogbẹ igoru wariẹe họ. 4 Who re je ru emero igoru ivẹ fihọ tabọ tabọ ivẹ riẹ evaọ otọ ogbẹ riẹ na, kọ eye a rẹ thọrọ ekpọ nọ a rẹ rọ wọe fihọ. 5 Rehọ ure akasha ru ekpọ na, whọ vẹ rehọ igoru tamu oma rai soso. 6 Whọ rẹ wọe fihọ aro ekọtini na nọ o kẹle etehe Isẹri na,+ evaọ aro ururu nọ o rrọ ehru Isẹri na, oria nọ me ti jo dhesẹ omamẹ via kẹ owhẹ.+

7 “Erọn+ ọ rẹ jariẹ+ mahe insẹnse nọ i re gbo ore awere,+ ru ei kuye iwiri evaọ ehru agbada-idhe na evaọ okenọ ọ be rẹrote ikpẹ na+ kohiohiẹ kohiohiẹ. 8 Yọ okenọ Erọn ọ tẹ be rọ ikpẹ na tu nọ ọre o te kiediwi no,* ọ rẹ mahe insẹnse na. Onana yọ insẹnse nọ a rẹ mahe kẹse kẹse evaọ aro Jihova evaọ ige rai kpobi. 9 Wha rẹ jariẹ mahe insẹnse nọ e rọwokugbe uzi hi vievie he+ hayo dhe idhe emahọ hayo idhe ibi ekakọ họ, yọ wha re ku idhe udi fihọ iẹe vievie he. 10 Erọn o re ru omavoro hrọ evaọ izei riẹ ẹsiẹvo ẹgbukpe.+ Ọ rẹ rehọ abọjọ azẹ idhe uzioraha orọ omavoro na+ ru omavoro kẹ agbada-idhe na ẹsiẹvo ẹgbukpe evaọ ige rai kpobi. Yọ oware nọ o mae rrọ ọrẹri kẹ Jihova.”

11 Kẹsena Jihova ọ tẹ ta kẹ Mosis nọ: 12 “Oke kpobi nọ who te bi kele ahwo, nọ who te bi kele emezae Izrẹl,+ omomọvo ọ rẹ kẹ Jihova osa ẹtanigbo uzuazọ riẹ hrọ evaọ okenọ a te bi kele ahwo na. Ẹjiroro onana họ re a gbẹ rehọ uye te ai hi okenọ a te bi kere edẹ rai fihotọ. 13 Onana họ oware nọ ohwo kpobi nọ a bi kere odẹ riẹ fihotọ ọ rẹ kẹ: abọvo shẹkẹl* lele epaọ shẹkẹl oria ọrẹri na.*+ Gira* udhe avọ shẹkẹl ọvo ẹrẹrẹe. Abọvo shẹkẹl họ azọhọ nọ a rẹ jẹ kẹ Jihova.+ 14 Ohwo kpobi nọ a kere odẹ riẹ fihotọ nọ ọ rrọ umuo ikpe udhe kpohọ ehru ọ rẹ jẹ azọhọ Jihova.+ 15 Ọdafe ọ rẹ kẹ bu vi ere he yọ oyogbe ọ rẹ kẹ kawo vi abọvo shẹkẹl* na ha evaọ azọhọ Jihova nọ a bi ro ru omavoro kẹ uzuazọ rai na. 16 Who re mi ahwo Izrẹl ugho isiliva orọ omavoro na whọ vẹ rehọ iẹe ze rọkẹ iruẹru uwou-udhu omakugbe na, re o ruẹse jọ oware ekareghẹhọ evaọ aro Jihova rọkẹ ahwo Izrẹl, onọ a re ro ru omavoro kẹ uzuazọ rai.”

17 Jihova ọ tẹ gbẹ ta kẹ Mosis nọ: 18 “Ru odhe ekọpa avọ oware nọ a rẹ wọe fihọ re a hae jariẹ rehọ ame wozẹ abọ gbe awọ;+ whọ vẹ wọe fihọ udevie uwou-udhu omakugbe na avọ agbada-idhe na who ve ku ame họ iẹe.+ 19 Erọn avọ emezae riẹ a rẹ jọ etẹe rehọ ame wozẹ abọ rai gbe awọ rai.+ 20 Okenọ a te ruọ eva uwou-udhu omakugbe na hayo nọ a te nyaziọ agbada-idhe na te gbodibo je dhe idhe erae gbe iwiri kẹ Jihova, a rẹ rọ ame ru oma rai fo re a seba ewhu. 21 A rẹ wozẹ abọ rai gbe awọ rai hrọ re a seba ewhu, yọ o rẹ jọ uzi nọ o rẹ jọ ribri rọkẹ ae, rọkẹ ọyomariẹ gbe emọ riẹ, evaọ ige rai kpobi.”+

22 Jihova ọ tẹ gbẹ jẹ ta kẹ Mosis inọ: 23 “U te no ere no, rehọ eware nọ e rẹ mai gbo ore awere: owawọ egba isoi (500) orọ mọr nọ e yamu, gbe abọvo unu yena, owawọ egba ivẹ gbe udhuvẹ-gbikpe (250) orọ sinamọn nọ i re gbo ore awere, owawọ egba ivẹ gbe udhuvẹ-gbikpe (250) orọ kalamọs nọ i re gbo ore awere, 24 gbe owawọ egba isoi (500) orọ kasia, yọ epaọ shẹkẹl oria ọrẹri na*+ a rẹ rọ wawọ ae, gbe ihini* ọvo orọ ewhri olivi. 25 Whọ vẹ rehọ iẹe ru ewhri eromuo ọrẹri; a rẹ rọ onaa wuhu ai kugbe ziezi.*+ O rẹ jọ ewhri eromuo ọrẹri.

26 “Who re ku ewhri na ku uwou-udhu omakugbe na+ avọ etehe Isẹri na rọ rehọ ae mudhe, 27 gbe emẹjẹ na avọ ekwakwa riẹ kpobi, ọkpọ-edada ukpẹ na avọ ekwakwa riẹ, gbe agbada-idhe insẹnse na, 28 agbada-idhe idhe emahọ na avọ ekwakwa riẹ kpobi, gbe odhe na avọ oware nọ a rẹ wọe fihọ na. 29 Who re ru ai fo hrọ re e ruẹse jọ eware nọ e mae rrọ ọrẹri.+ Ohwo kpobi nọ ọ rẹ rọ obọ te ai ọ rẹ jọ ọrẹri.+ 30 Yọ who re wholo Erọn+ avọ emezae riẹ+ je ru ai fo re a ruẹse jọ izerẹ kẹ omẹ.+

31 “Whọ rẹ ta kẹ ahwo Izrẹl nọ, ‘Onana o rẹ jọ ewhri eromuo ọrẹri kẹ omẹ evaọ ige rai kpobi.+ 32 A rẹ rehọ iẹe te ugboma ahwo-akpọ họ, yọ wha re ru ọkpọ riẹ vievie he. Onana yọ oware ọrẹri. O rẹ jọ oware ọrẹri kẹ owhai ribri. 33 Ohwo kpobi nọ o ru udẹ nọ o wọhọ e riẹ ọ jẹ rọ ojọ riẹ te ohwo nọ a kẹ udu hu,* a re kpe ohwo yena no udevie ahwo riẹ hrọ.’”+

34 Kẹsena Jihova ọ tẹ ta kẹ Mosis nọ: “Rehọ ẹkuẹko ẹrẹrẹe orọ eware nana nọ i re gbo ore awere na:+ ame ure stakti, onika, galbanọm nọ u re gbo ore awere, gbe emamọ frankinsẹns.* 35 Rehọ ai ru insẹnse;+ a rẹ rọ onaa wuhu eware nana nọ i re gbo ore awere na kugbe ziezi,* a re fi uwhei họ iẹe,+ oware ofa o rẹ gua ai hi, o rẹ jọ ọrẹri. 36 Who re duwu abọjọ riẹ whowhowho ziezi who ve fi abọjọ riẹ họ aro Isẹri* na evaọ uwou-udhu omakugbe na, oria nọ me ti jo dhesẹ omamẹ via kẹ owhẹ. O rẹ jọ oware nọ o mae rrọ ọrẹri kẹ owhai. 37 Wha re ru insẹnse nana nọ whọ rehọ eware nana ru na kẹ omarai vievie he.+ Wha rẹ rehọ iẹe fihọ oware ọrẹri kẹ Jihova. 38 Ohwo kpobi nọ o ru ọkpọ riẹ re o se ore riẹ, a re kpe ohwo yena no udevie ahwo riẹ hrọ.”

31 Jihova ọ tẹ gbẹ jẹ ta kẹ Mosis nọ: 2 “Rri, mẹ salọ* Bẹzalẹl+ ọmọzae Yurae ọmọzae Họr ọrọ orua Juda no.+ 3 Me ti ku ẹzi Ọghẹnẹ ku ei, mẹ te kẹe areghẹ, otoriẹ, avọ eriariẹ oghoghẹrẹ iruo ọwena kpobi, 4 nọ o re ro ru eware onaa sa-sa, nọ ọ rẹ rọ rehọ igoru, isiliva, gbe ekọpa ru eware, 5 nọ o re ro bru itho je fi itho họ eware,+ je ku oghoghẹrẹ eware ire kpobi.+ 6 Yọ mẹ rehọ Oholiab+ ọmọzae Ahisamak ọrọ orua Dan mu no re o fiobọhọ kẹe, yọ me bi fi areghẹ họ udu ahwo kpobi nọ a wo onaa iruo,* re a ruẹsi ru eware kpobi nọ mẹ ta kẹ owhẹ na:+ 7 uwou-udhu omakugbe na,+ etehe Isẹri na+ avọ ururu+ nọ o rẹ jọ ehru riẹ, ekwakwa uwou-udhu na kpobi, 8 emẹjẹ na+ avọ ekwakwa riẹ, ọkpọ-edada ukpẹ ọrọ emamọ igoru* na avọ ekwakwa riẹ kpobi,+ agbada-idhe insẹnse na,+ 9 agbada-idhe idhe emahọ na+ avọ ekwakwa riẹ kpobi, odhe na avọ oware nọ a rẹ wọe fihọ,+ 10 emamọ iwu nọ a zuo ziezi na, iwu ọrẹri rọkẹ Erọn ozerẹ na, iwu emezae riẹ nọ a re ro ru iruo izerẹ,+ 11 ewhri eromuo na, gbe insẹnse nọ i re gbo ore awere rọkẹ aruẹri na.+ A re ru eware kpobi nọ mẹ ta kẹ owhẹ na.”

12 Jihova ọ tẹ gbẹ ta kẹ Mosis nọ: 13 “Ta kẹ ahwo Izrẹl nọ, ‘Maero, wha re koko edijala mẹ,+ keme onana yọ oka evaọ udevie mẹ avọ owhai evaọ ige rai kpobi re wha ruẹse riẹ nọ mẹ, Jihova, me bi ru owhai fo.* 14 Wha re koko Ẹdijala na hrọ, keme oware ọrẹri o rrọ kẹ owhai.+ Ohwo kpobi nọ o zue rie, a re kpei no hrọ. Ohwo jọ ọ tẹ jariẹ ru oghẹrẹ iruo jọ kpobi, a re kpe ohwo* yena no udevie ahwo riẹ hrọ.+ 15 Edẹ ezeza a sai ro ru iruo, rekọ ẹdẹ avọ ihrẹ na yọ ẹdijala eriosehọ riẹriẹriẹ.+ Yọ oware ọrẹri kẹ Jihova. Ohwo kpobi nọ o bi ru iruo evaọ ẹdẹ Ẹdijala na, a re kpei no hrọ. 16 Ahwo Izrẹl a re koko Ẹdijala na hrọ; a re koko Ẹdijala na hrọ evaọ ige rai kpobi. Onana yọ ọvọ nọ ọ rẹ jọ ribri. 17 Onana yọ oka nọ o rẹ jọ ribri evaọ udevie mẹ avọ ahwo Izrẹl,+ keme evaọ edẹ ezeza Jihova ọ rọ ma idhiwu na gbe otọakpọ na, evaọ ẹdẹ avọ ihrẹ o te serihọ, yọ eva e were riẹ.’”+

18 Nọ ọ nwani lele iei ta ẹme kuhọ no evaọ Ugbehru Saena, ọ tẹ kẹ Mosis ewẹ-itho ekpakpala ivẹ erọ Isẹri na,+ ewẹ-itho ekpakpala nọ uziobọ Ọghẹnẹ u kere eme fihọ.+

32 Evaọ oke oyena, ahwo na a tẹ ruẹ nọ Mosis o kri no, ọ be kaki no obọ ugbehru na ziọ otọ họ.+ Fikiere ahwo na a te koko wariẹ Erọn họ a tẹ ta kẹe nọ: “Kpama, re who ru ọghẹnẹ kẹ omai nọ ọ rẹ karo kẹ omai,+ keme ma riẹ oware nọ o via kẹ Mosis ọnana ha, ọzae nọ o su omai no ẹkwotọ Ijipti ze na.” 2 Kẹsena Erọn ọ tẹ ta kẹ ae nọ: “Wha si emero-ezọ igoru+ nọ e rrọ ezọ eyae rai, emezae rai, gbe emetẹ rai no re wha rehọ ai se omẹ.” 3 Fikiere ahwo na kpobi a te mu emero-ezọ igoru nọ e rrọ ezọ rai họ esino jẹ be rehọ ai se Erọn. 4 Ọ tẹ rehọ igoru na mi ai, ọ tẹ rehọ okwakwa nọ a rẹ rọ kare oware ro ru ei, o te ru ei fihọ ẹmema* ọmọ-eruẹ.+ A te muhọ ẹta nọ: “Ọna họ Ọghẹnẹ ra, O Izrẹl, nọ o su owhẹ no ẹkwotọ Ijipti ze.”+

5 Nọ Erọn ọ ruẹ onana, ọ tẹ bọ agbada-idhe fihọ aro riẹ. Kẹsena Erọn o te bo nọ: “Ehaa kẹ Jihova e te jariẹ odẹnotha.” 6 Fikiere a tẹ kake kpama evaọ okiokiọ riẹ a te mu idhe emahọ họ edhe je bi dhe idhe ọriẹyeri. Nọ a ru oyena no, ahwo na a tẹ keria jẹ re jẹ da. Kẹsena a tẹ kpama re a re omaweromẹ.+

7 Jihova ọ tẹ ta kẹ Mosis nọ: “Nya, nwrotọ, keme ahwo ra, enọ who su no ẹkwotọ Ijipti ze, a gbe omarai ku no.+ 8 A rọ ovovẹrẹ no edhere nọ me jie uzi riẹ kẹ ae nọ a nya na no.+ A ru ẹmema* ọmọ-eruẹ kẹ omarai no, yọ a bi guzou kpotọ kẹe je bi dhe idhe kẹe be ta nọ, ‘Ọna họ Ọghẹnẹ ra, O Izrẹl, nọ o su owhẹ no ẹkwotọ Ijipti ze.’” 9 Jihova ọ tẹ gbẹ ta kẹ Mosis nọ: “Mẹ ruẹ no nọ ahwo nana a rrọ udu gaga.*+ 10 Fikiere kẹ omẹ uvẹ, re me kpe ai kpobi no evaọ ofu ọgaga mẹ, re me dhugbe ru orẹwho ulogbo no omara ze.”+

11 Kẹsena Mosis ọ tẹ lẹ Jihova Ọghẹnẹ riẹ nọ,+ “Fikieme, O Jihova, who re ro mu ofu ọgaga ra kẹ ahwo ra kpakiyọ whọ rehọ ogaga ulogbo avọ obọ ulogbo rehọ ae no ẹkwotọ Ijipti ze no?+ 12 Kọ ahwo Ijipti a gbẹ te ta nọ, ‘O wo iroro iyoma họ eva ro su ai vrẹ. Ọ gwọlọ kpe ai evaọ obọ igbehru na je kpe ai kpobi no otọakpọ na no’?+ Siọ ofu ọgaga na ba re whọ wariẹ roro* kpahe uye nana nọ whọ jiroro nọ whọ rẹ kẹ ahwo ra na. 13 Kareghẹhọ idibo ra Abraham, Aiziki, gbe Izrẹl, enọ whọ rọ omara duwu iyei kẹ, inọ: ‘Me ti ru emọ* ra vihọ wọhọ isi obọ ehru* na,+ yọ mẹ te rọ ẹkwotọ nana kpobi nọ mẹ ta na kẹ emọ* ra, re o jọ orai nọ a rẹ rọ reuku ribri.’”+

14 Fikiere Jihova ọ tẹ wariẹ roro* kpahe uye nọ ọ ta nọ ọ te rehọ te ahwo riẹ na.+

15 Kẹsena Mosis o te kuomarẹriẹ o te nwrotọ no ugbehru na ze avọ ewẹ-itho ekpakpala ivẹ erọ Isẹri na+ nọ e rrọ obọ riẹ.+ A kere eme fihọ tabọ tabọ ewẹ-itho ekpakpala na; a kere eme fihọ obaro gbe obemu rai. 16 Ọghẹnẹ họ ọnọ o ru ewẹ-itho ekpakpala na, yọ eme na yọ eme nọ Ọghẹnẹ o bru* fihọ ewẹ-itho ekpakpala na.+ 17 Nọ Joshua o mu edo ahwo na họ eyo fikinọ a jẹ koyẹ, ọ tẹ ta kẹ Mosis nọ: “Edo ẹmo ọ rrọ evuẹ na.” 18 Rekọ Mosis ọ tẹ ta nọ:

19 Nọ Mosis ọ nwane nya kẹle evuẹ na jẹ ruẹ ọmọ-eruẹ na+ gbe ile-igbe na, ofu o te mu ei gaga, o te gbolo ewẹ-itho ekpakpala na no abọ riẹ fihọ otọ e tẹ bẹre fihotọ evaọ obotọ ugbehru na.+ 20 Ọ tẹ rehọ ọmọ-eruẹ nọ a ru na ọ tẹ rọ erae mahe iẹe je wuhu iei whowhowho;+ ọ tẹ vaha iẹe fihọ ame na je ru ahwo Izrẹl na dae.+ 21 Mosis ọ tẹ ta kẹ Erọn nọ: “Eme ahwo nana a ru owhẹ nọ whọ rọ wha uzioraha ulogbo ziọ uzou rai?” 22 Erọn o te yo nọ: “Ofu o mu owhẹ hẹ, olori mẹ. Whọ riẹ vevẹ nọ ahwo na a rẹ gwọlọ ru umuomu.+ 23 A tẹ ta kẹ omẹ nọ, ‘Ru ọghẹnẹ kẹ omai nọ ọ rẹ karo kẹ omai, keme ma riẹ oware nọ o via kẹ Mosis ọnana ha, ọzae nọ o su omai no ẹkwotọ Ijipti ze na.’+ 24 Fikiere mẹ tẹ ta kẹ ae nọ, ‘Ohwo kpobi nọ o wo igoru ọ rẹ bae no hrọ ọ vẹ rehọ iẹe kẹ omẹ.’ Kẹsena me te gbolo ai fihọ erae, ọmọ-eruẹ nana o te noi ze.”

25 Mosis ọ ruẹ nọ ahwo na a je ru ugberuo, keme Erọn ọ kẹ rai uvẹ re a ru ugberuo, fikiere a tẹ wha omovuọ se omarai evaọ aro enọ e wọso ae. 26 Kẹsena Mosis o te dikihẹ unuẹthẹ evuẹ na ọ tẹ ta nọ: “Ono ọ rrọ abọ Jihova? Jọ ọ nyabru omẹ ze!”+ Ahwo Livae na kpobi a te koko wariẹe họ. 27 Ọ tẹ ta kẹ ae nọ: “Enẹ Jihova Ọghẹnẹ Izrẹl ọ ta, ‘Jọ whai omomọvo ọ thọrọ ọgbọdọ riẹ họ re ọ nya evuẹ na soso duwu no unuẹthẹ te unuẹthẹ, re o kpe oniọvo riẹ, ọrivẹ riẹ, gbe ogbẹnyusu ọkpekpe riẹ.’”+ 28 Ahwo Livae na a te ru oware nọ Mosis ọ ta na. Fikiere a kpe ezae nọ i bu te oware wọhọ idu esa (3,000) evaọ ẹdẹ yena. 29 Kẹsena Mosis ọ tẹ ta nọ: “Wha hẹriẹ omarai no* kẹ Jihova nẹnẹ na, keme whai omomọvo ọ kpare obọ rọsuọ ọmọzae obọriẹ gbe oniọvo obọriẹ;+ nẹnẹ na ọ te kẹ owhai oghale.”+

30 Evaọ ẹdẹ nọ ọ nwani lele iei, Mosis ọ tẹ ta kẹ ahwo na nọ: “Uzioraha ulogbo gaga wha raha na, mẹ te gadiẹ bru Jihova re mẹ ruẹ sọ mẹ sae lẹ rọkẹ erọvrẹ* uzioraha rai na.”+ 31 Fikiere Mosis o te zihe bru Jihova ọ tẹ ta nọ: “Uzioraha ulogbo gaga ahwo nana a raha na! A ru ọghẹnẹ igoru kẹ omarai!+ 32 Rekọ otẹrọnọ o ruọ owhẹ, rehọ uzioraha rai rọvrẹ rai;+ o gbẹ rrọ ere he, ivie voro omẹ no obe ra nọ who kere na no.”+ 33 Rekọ Jihova ọ tẹ ta kẹ Mosis nọ: “Ohwo kpobi nọ ọ raha uzi mẹ, me re voro iei no obe mẹ no. 34 Nya enẹna, re who su ahwo na kpohọ oria nọ mẹ ta kẹ owhẹ na. Rri! ukọ-odhiwu mẹ ọ te karo kẹ owhẹ,+ yọ evaọ ẹdẹ nọ me ti guẹdhọ, mẹ te kẹ ae uye fiki uzioraha rai.” 35 Kẹsena Jihova o te mu ahwo na uye họ ẹkẹ fiki ọmọ-eruẹ nọ a ru na, onọ Erọn o ru na.

33 Jihova ọ tẹ gbẹ ta kẹ Mosis nọ: “Wọ no etenẹ whẹ avọ ahwo nọ who su no ẹkwotọ Ijipti ze na. Wha ruọ edhere kpobọ ẹkwotọ nọ me duwu iyei riẹ kẹ Abraham, Aiziki, gbe Jekọp inọ, ‘Mẹ te rehọ iẹe kẹ emọ* ra.’+ 2 Me ti vi ukọ-odhiwu karo kẹ owhẹ+ je le ahwo Kenan, ahwo Amọ, ahwo Hit, ahwo Pẹriz, ahwo Hiv, gbe ahwo Jebus no.+ 3 Wha kpohọ ẹkwotọ nọ ame-ivie gbe ọnyọ i bi jo su.+ Rekọ me ti lele owhai evaọ udevie rai hi, keme whai yọ ahwo nọ a rrọ udu gaga,*+ yọ mẹ sai kpe owhai kpobi no evaọ edhere.”+

4 Nọ ahwo na a yo ẹme ọgaga nana, a te muhọ eweri, ọvuọvo rai ọ whẹ eware osẹ riẹ họ họ. 5 Jihova ọ tẹ ta kẹ Mosis nọ: “Ta kẹ ahwo Izrẹl nọ, ‘Whai yọ ahwo nọ a rrọ udu gaga.*+ Mẹ sae ruọ udevie rai ẹsiẹvo me ve kpe owhai kpobi no.+ Fikiere wha whẹ eware osẹ rai họ họ bẹsenọ me re roro oware nọ me re ru owhai no.’” 6 Fikiere no Ugbehru Horẹb vrẹ, ahwo Izrẹl a whẹ eware osẹ rai họ họ.*

7 Kẹsena Mosis ọ tẹ rehọ uwou-udhu riẹ ọ tẹ rehọ iẹe vi otafe evuẹ na, thabọ no evuẹ na omojọ, o te sei uwou-udhu omakugbe. Ohwo kpobi nọ ọ gwọlọ nekpẹ oware jọ mi Jihova+ o ve kpobọ uwou-udhu omakugbe na, onọ o jọ otafe evuẹ na. 8 Nọ Mosis ọ tẹ be nwani kpobọ uwou-udhu na, ahwo na kpobi a vẹ kpama a ve dikihẹ aro unuẹthẹ uwou-udhu rai, a ve mu Mosis họ eriwi bẹsenọ ọ rẹ ruọ eva uwou-udhu na. 9 Nọ Mosis ọ tẹ nwane ruọ eva uwou-udhu na, ukulu ẹgho* na+ ọ vẹ ziọ otọ u ve dikihẹ aro unuẹthẹ uwou-udhu na nọ Ọghẹnẹ ọ be ta ẹme kẹ Mosis na.+ 10 Nọ ahwo na kpobi a tẹ ruẹ ukulu ẹgho* na nọ o dikihẹ aro unuẹthẹ uwou-udhu na, omomọvo rai ọ vẹ kpama o ve guzou kpotọ evaọ aro unuẹthẹ uwou-udhu riẹ. 11 Jihova ọ jẹ ta ẹme kẹ Mosis ovao dhe ovao,+ nwane wọhọ epanọ ohwo ọ rẹ ta ẹme kẹ ohwo na. Nọ o te zihe ziọ evuẹ na, Joshua+ ọmọzae Nọn ọgbodibo riẹ gbe ọnọ o re fiobọhọ kẹe+ o re no uwou-udhu na ha.

12 Kẹsena Mosis ọ tẹ ta kẹ Jihova nọ: “Rri, whọ be ta kẹ omẹ nọ, ‘Su ahwo nana vrẹ,’ rekọ whọ re vuẹ omẹ ohwo nọ who ti vi lele omẹ hẹ. U te no ere no, whọ ta nọ, ‘Mẹ riẹ odẹ ra,* yọ mẹ jẹ owhẹ rehọ.’ 13 Ivie, otẹrọnọ whọ jẹ omẹ rehọ, ru omẹ riẹ idhere ra,+ re mẹ ruẹse riẹ owhẹ jẹ ruabọhọ wo ọjẹrehọ ra. Kareghẹhọ re, inọ orẹwho nana yọ ahwo ra.”+ 14 Fikiere ọ tẹ ta nọ: “Mẹ omamẹ me ti lele owhẹ nya,*+ yọ mẹ te kẹ owhẹ eriosehọ.”+ 15 Kẹsena Mosis ọ tẹ ta kẹe nọ: “Otẹrọnọ whẹ omara who bi lele omai nya ha,* who su omai no etenẹ hẹ. 16 Ẹvẹ a rẹ rọ riẹ nọ whọ jẹ omẹ rehọ, mẹ avọ ahwo ra? Kọ ogbẹrọnọ who te lele omai nya,+ re a ruẹ nọ mẹ avọ ahwo ra a wo ohẹriẹ no ahwo ọfa kpobi evaọ otọakpọ na?”+

17 Jihova ọ tẹ gbẹ ta kẹ Mosis nọ: “Me ti ru oware nana nọ whọ yare na re, keme mẹ jẹ owhẹ rehọ yọ mẹ riẹ odẹ ra.”* 18 Kẹsena ọ tẹ ta nọ: “Ivie, dhesẹ oruaro ra kẹ omẹ.” 19 Rekọ ọ tẹ ta nọ: “Me ti ru ewoma mẹ kpobi nya aro ra vrẹ, yọ me ti whowho odẹ Jihova evaọ aro ra;+ me ti dhesẹ aruoriwo kẹ ohwo nọ me ti dhesẹ aruoriwo kẹ, yọ mẹ te re ohrọ ohwo nọ mẹ te re ohrọ.”+ 20 Rekọ o te fibae nọ: “Whọ sae ruẹ ovao mẹ hẹ, keme ohwo ọvo ọ sae ruẹ ovao mẹ re ọ jọ uzuazọ họ.”

21 Jihova ọ tẹ gbẹ ta nọ: “Oria jọ o kẹle omẹ evaọ etenẹ. Dikihẹ ugbehru-utho na. 22 Nọ oruaro mẹ o te nyavrẹ, me ti fi owhẹ họ unu ugbehru-utho na, yọ mẹ te rọ obọ mẹ ruru owhẹ bẹsenọ mẹ rẹ nyavrẹ no. 23 Kẹsena me ve ti si obọ mẹ no, whọ vẹ ruẹ uke mẹ. Rekọ a rẹ ruẹ ovao mẹ hẹ.”+

34 Jihova ọ tẹ ta kẹ Mosis nọ: “Kare ewẹ-itho ekpakpala ivẹ wọhọ erọ ọsosuọ na kẹ omara,+ me ti kere eme nọ e jọ ewẹ-itho ekpakpala ọsosuọ+ nọ who kpe na fihọ ewẹ-itho ekpakpala na.+ 2 Ruẹrẹ oma kpahe kẹ ohiohiẹ, keme evaọ ohiohiẹ whọ te gadiẹ kpohọ Ugbehru Saena who ve dikihẹ etẹe evaọ aro mẹ evaọ ehru ugbehru na.+ 3 Rekọ ohwo ọvo o re lele owhẹ gadiẹ hẹ, yọ a rẹ ruẹ omọfa ha evaọ oria jọ ugbehru na. Makọ ithuru hayo ewa erao a rẹ re ẹbe evaọ aro ugbehru yena ha.”+

4 Fikiere Mosis ọ tẹ kare ewẹ-itho ekpakpala wọhọ erọ ọsosuọ na ọ tẹ kpama evaọ irioke frifri ọ tẹ gadiẹ Ugbehru Saena, wọhọ epanọ Jihova ọ ta kẹe, yọ ọ tọlọ ewẹ-itho ekpakpala ivẹ na fihọ obọ riẹ. 5 Kẹsena Jihova o te nwrotọ ze+ evaọ ẹgho o te dikihẹ kugbei evaọ etẹe je whowho odẹ Jihova via.+ 6 Jihova ọ jẹ nya aro riẹ vrẹ je bi whowho nọ: “Jihova, Jihova, Ọghẹnẹ nọ o wo ohrọ-oriọ+ gbe ọdawẹ,*+ nọ ọ rẹ kaki mu ofu hu+ yọ ọ vọ avọ uyoyou nọ o rẹ hiẹ hẹ*+ gbe uzẹme,*+ 7 nọ o re dhesẹ uyoyou nọ o rẹ hiẹ hẹ kẹ idu ahwo,+ ọnọ ọ rẹ rehọ oruthọ gbe uzioraha gbe umuomu rọvrẹ,+ rekọ ọ rẹ siọ enọ e reabe uye ba ẹkẹ hẹ,+ ọnọ ọ rẹ rehọ uye oruthọ esẹ te emọ* gbe emọ-iruọmọ,* rọkẹ oge avọ esa gbe oge avọ ene.”+

8 Mosis ọ tẹ rọ ovovẹrẹ kigwẹ guzou kpotọ je kiẹzẹ vovao tuotọ. 9 Kẹsena ọ tẹ ta nọ: “Otẹrọnọ whọ jẹ omẹ rehọ, O Jihova, ivie Jihova, jọ udevie mai lele omai nya+ dede nọ mai yọ ahwo nọ a rrọ udu gaga,*+ re whọ rehọ oruthọ mai gbe uzioraha mai rọvrẹ omai,+ re whọ rehọ omai wọhọ okwakwa obọra.” 10 Ọ tẹ kpahe nọ: “Mẹ be re ọvọ: Evaọ iraro ahwo ra kpobi, me ti ru eware igbunu nọ a ri ru* evaọ otọakpọ na soso ho hayo evaọ udevie erẹwho na kpobi hi,+ yọ ahwo kpobi nọ wha be rria udevie rai a te ruẹ iruo Jihova, keme oware nọ u re mu ọwhewhe me bi ru kẹ owhai na.+

11 “Gaviezọ ziezi kẹ oware nọ me bi jie uzi riẹ kẹ owhẹ nẹnẹ na.+ Me bi le ahwo Amọ, ahwo Kenan, ahwo Hit, ahwo Pẹriz, ahwo Hiv, gbe ahwo Jebus no kẹ owhai.+ 12 Wha yọroma re wha gbẹ re ọvọ kugbe ahwo nọ a be rria otọ nọ wha bi kpohọ na ha,+ o gbẹ rrọ ere he o vẹ te jọ agbefẹ evaọ udevie rai.+ 13 Rekọ wha re kporo egbada-idhe rai fihọ otọ, wha re kporo ipila ọrẹri* rai, je ko ekpọ ọrẹri* rai fihọ otọ.+ 14 Who re guzou kpotọ kẹ ọghẹnẹ ọfa vievie he,+ keme a riẹ Jihova inọ yọ* ọnọ ọ gwọlọ omarọkẹ riẹriẹriẹ.* Ẹhẹ, yọ Ọghẹnẹ nọ ọ gwọlọ omarọkẹ riẹriẹriẹ.+ 15 Yọroma re whọ gbẹ re ọvọ kugbe ahwo nọ a be rria otọ na ha, keme okenọ a ti lele eghẹnẹ rai bru igberẹ je dhe idhe kẹ eghẹnẹ rai,+ ohwo jọ o ti zizie owhẹ whọ vẹ te jọ idhe riẹ re.+ 16 Wha vẹ te rehọ emetẹ rai jọ kẹ emezae rai,+ emetẹ rai a ve ti lele eghẹnẹ rai bru igberẹ je ru emezae rai lele eghẹnẹ rai bru igberẹ.+

17 “Whọ rẹ ghra ayọno ro ru eghẹnẹ vievie he.+

18 “Who re koko Ehaa Ebrẹdi nọ Ọ Kare Ẹvi na.+ Whọ rẹ re ebrẹdi nọ ọ kare ẹvi, nwane wọhọ epanọ me jie uzi kẹ owhẹ na; ru onana edẹ ihrẹ evaọ oke nọ a fihọ na evaọ amara Ebib*+ keme evaọ amara Ebib who ro no Ijipti ze.

19 “Ọmọzae ọsosuọ kpobi* yọ ọmẹ,+ te erọ erao rai kpobi, makọ eruẹ ọzae ọsosuọ hayo ogodẹ ọzae ọsosuọ.+ 20 Whọ rẹ rehọ ogodẹ rọ dẹ* ọmọ ọsosuọ eketekete kpobi zihe ze. Rekọ otẹrọnọ whọ dẹ riẹ zihe ze he, who re wiri uriohọ riẹ hrọ. Whọ rẹ dẹ ọmọ ọsosuọ kpobi evaọ usu emezae ra zihe ze.+ Ohwo ọvo ọ rẹ nya ababọ ziọ aro mẹ hẹ.

21 “Edẹ ezeza who re ro ru iruo, rekọ ẹdẹ avọ ihrẹ who re serihọ.*+ Makọ evaọ oke nọ a re ro kporo udhu gbe oke ivuẹvu, who re serihọ.

22 “Yọ whọ rẹ rehọ ibi ọsosuọ ra nọ e ware erọ ivuẹvu iwhiti ro ru Ehaa Ekpoka na, gbe Ehaa Ẹkwa Kokohọ* na evaọ urere ukpe na.+

23 “Isiasa ẹgbukpe ezae* rai kpobi a rẹ nyaziọ aro Olori uzẹme na, Jihova, Ọghẹnẹ Izrẹl.+ 24 Keme me ti le erẹwho na no kẹ owhẹ,+ me ti ru ẹkwotọ ra rro, yọ ohwo ọvo o ti siuru otọ ra ha okenọ whọ te nyae ruẹ ovao Jihova Ọghẹnẹ ra isiasa ẹgbukpe na.

25 “Who re fi oware ovo nọ a fi ẹvi họ ba idhe azẹ nọ who re dhe kẹ omẹ vievie he.+ A rẹ kẹ idhe ehaa Ọnyavrẹ na uvẹ re e rria asohẹrioke te ohiohiẹ hẹ.+

26 “Whọ rẹ rehọ ibi ọsosuọ ra nọ e ware nọ e mai woma evaọ otọ ra ziọ uwou Jihova Ọghẹnẹ ra.+

“Whọ rẹ rọ ame-ivie oni ẹwe there ọmọ riẹ vievie he.”+

27 Jihova ọ tẹ gbẹ ta kẹ Mosis nọ: “Who re kere eme nana fihotọ,+ keme eme nana mẹ be rọ re ọvọ kugbe owhẹ avọ Izrẹl.”+ 28 Ọ tẹ jọ etẹe kugbe Jihova edẹ udhuvẹ gbe eso udhuvẹ. Ọ re ebrẹdi hi yọ ọ da ame he.+ O te kere eme ọvọ na, Izi Ikpe na,* fihọ ewẹ-itho ekpakpala na.+

29 Kẹsena Mosis o te nwrotọ no Ugbehru Saena ze, yọ ewẹ-itho ekpakpala ivẹ Isẹri na e rrọ obọ riẹ.+ Nọ o nwrotọ no ugbehru na ze, Mosis ọ riẹ hẹ inọ ovao riẹ u bi lo nwranwranwra fikinọ o je lele Ọghẹnẹ ta ẹme. 30 Nọ Erọn avọ ahwo Izrẹl kpobi a ruẹ Mosis, a tẹ ruẹ nọ ovao riẹ u bi lo nwranwranwra, ozọ u te je mu ai re a nya kẹle iẹe.+

31 Rekọ Mosis o te se ai, fikiere Erọn avọ enọ i wuzou kpobi evaọ ogbotu na a tẹ nyabru ei ze, Mosis o te lele ai ta ẹme. 32 Kẹsena ahwo Izrẹl kpobi a tẹ nyaze kẹle iẹe, ọ tẹ kẹ ae izi kpobi nọ Jihova ọ kẹ riẹ evaọ Ugbehru Saena na.+ 33 Nọ Mosis ọ tẹ ta ẹme kẹ ai re no, o ve fi ohọ ruru ovao riẹ.+ 34 Rekọ nọ Mosis ọ tẹ be ruọ eva kpohọ aro Jihova re o lele iei ta ẹme, o ve si ohọ na no bẹsenọ ọ rẹ ziọ otafe.+ Kẹsena ọ vẹ nya o ve dhesẹ izi nọ a kẹ riẹ na kẹ ahwo Izrẹl.+ 35 Ahwo Izrẹl a ruẹ nọ ovao Mosis u bi lo nwranwranwra; Mosis ọ tẹ wariẹ fi ohọ na họ ruru ovao riẹ bẹsenọ ọ rẹ ruọ eva nyai lele Ọghẹnẹ* ta ẹme.+

35 Uwhremu na, Mosis o te koko ogbotu ahwo Izrẹl soso họ ọ tẹ ta kẹ ae nọ: “Enana họ eware nọ Jihova o jie uzi nọ a re ru:+ 2 Edẹ ezeza a sai ro ru iruo, rekọ ẹdẹ avọ ihrẹ na ọ rẹ jọ oware ọrẹri kẹ owhai, ẹdijala eriosehọ riẹriẹriẹ kẹ Jihova.+ Ohwo kpobi nọ o bi ru iruo evaọ ẹdẹ yena, a re kpei no hrọ.+ 3 Wha re koko erae họ vievie he evaọ oria kpobi nọ wha be rria evaọ ẹdẹ Ẹdijala na.”

4 Mosis ọ tẹ ta kẹ ogbotu ahwo Izrẹl soso nọ: “Enẹ Jihova ọ ta, 5 ‘Wha rehọ okẹ ze kẹ Jihova no udevie rai ze.+ Jọ ohwo kpobi nọ u no udu ze+ ọ rehọ okẹ ze kẹ Jihova: igoru, isiliva, ekọpa, 6 olulu iburu, iwhulu ogorurẹ, ilulu ewawae egbagba, emamọ ohọ-olọlọhọ, eto ẹwe,+ 7 oviẹ egbo nọ a rehọ ame ọwawae gbe, oviẹ isili,* ure akasha, 8 ewhri rọkẹ ikpẹ na, balsam rọkẹ ewhri eromuo* na jẹ rọkẹ insẹnse nọ i re gbo ore awere,+ 9 itho oniks, gbe itho efa nọ a re ru fihọ ẹfọd na+ gbe ẹwẹ-ohọ igbama na.+

10 “‘Jọ ahwo kpobi nọ a wo onaa iruo*+ evaọ udevie rai a nyaze re a ru eware kpobi nọ Jihova ọ ta nọ a ru na, 11 koyehọ, uwou-udhu na avọ oma riẹ gbe ehọ nọ a re ro ruru iei, ejẹhọ riẹ gbe ifremu riẹ, ire nọ a re ro where iei, ipila riẹ, gbe awọ riẹ; 12 Etehe na+ avọ ekpọ riẹ,+ ururu na,+ gbe ekọtini+ nọ a re ro gbere iei;* 13 emẹjẹ na+ gbe ekpọ riẹ avọ ekwakwa riẹ kpobi gbe ebrẹdi udhesẹ na;+ 14 ọkpọ-edada ukpẹ+ na rọkẹ elo avọ ekwakwa riẹ gbe ikpẹ riẹ gbe ewhri nọ a re ro tu ikpẹ na;+ 15 agbada-idhe insẹnse na+ gbe ekpọ riẹ; ewhri eromuo na gbe insẹnse nọ i re gbo ore awere na;+ ekọtini* nọ a re ro gbere unuẹthẹ uwou-udhu na; 16 agbada-idhe idhe emahọ na+ avọ ẹfẹ ekọpa nọ ọ rẹ jọ eva riẹ, ekpọ riẹ avọ ekwakwa riẹ kpobi; odhe na avọ oware nọ a rẹ wọe fihọ;+ 17 ehọ ighẹ na nọ a rẹ jẹhọ ohwohwo,+ ipila riẹ gbe awọ riẹ; ekọtini* nọ a re ro gbere unuẹthẹ ighẹ na; 18 ighele uwou-udhu na gbe ighele ighẹ na gbe ifi riẹ;+ 19 emamọ iwu nọ a zuo ziezi+ nọ a rẹ rọ gbodibo evaọ aruẹri na, iwu ọrẹri rọkẹ Erọn+ ozerẹ na, gbe iwu emezae riẹ nọ a re ro ru iruo izerẹ.’”

20 Fikiere ogbotu ahwo Izrẹl na kpobi a tẹ nya no aro Mosis. 21 Kẹsena ohwo kpobi nọ udu riẹ o wọ riẹ+ gbe ohwo kpobi nọ ẹzi riẹ ọ wọ riẹ ọ tẹ nyaze, a tẹ rehọ okẹ rai se Jihova re a ro ru uwou-udhu omakugbe na, rọkẹ iruẹru riẹ kpobi, jẹ rọkẹ iwu ọrẹri na. 22 A tẹ be nyaze ọvo, te ezae na te eyae na, omomọvo nọ u no udu ze, be rehọ eware osẹ nọ a rẹ sa mu ewu ze, emero-ezọ, emero, gbe eware osẹ efa, jegbe oghẹrẹ ekwakwa igoru kpobi. Aikpobi a tẹ rehọ ekẹ* igoru rai kẹ Jihova.+ 23 Ahwo kpobi nọ a wo olulu iburu, iwhulu ogorurẹ, ilulu ewawae egbagba, emamọ ohọ-olọlọhọ, eto ẹwe, oviẹ egbo nọ a rehọ ame ọwawae gbe, gbe oviẹ isili* a tẹ rehọ ae ze. 24 Ahwo kpobi nọ a be rọ ekọpa gbe isiliva kẹ okẹ a tẹ rehọ okẹ Jihova ze, yọ ahwo kpobi nọ a wo ure akasha rọkẹ oware jọ kpobi evaọ iruo na a rehọ e riẹ ze.

25 Eyae kpobi nọ i wo onaa iruo+ a rehọ abọ rai thahe ilulu, a tẹ rehọ eware nọ a thahe na ze: olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ. 26 Eyae kpobi nọ i wo onaa iruo, nọ udu rai o wọ rai a tẹ thahe eto ẹwe na ro ru ilulu.

27 Enọ i wuzou na a rehọ itho oniks gbe itho efa nọ a re ru fihọ ẹfọd na gbe ẹwẹ-ohọ igbama na ze,+ 28 gbe balsam avọ ewhri nọ a re ro tu ikpẹ na, je ro ru ewhri eromuo na+ avọ insẹnse nọ i re gbo ore awere na.+ 29 Ezae kpobi gbe eyae kpobi nọ udu rai o wọ rai a rehọ oware jọ ze rọkẹ iruo nọ Jihova ọ rọ ẹkwoma Mosis ta nọ a ru na; ahwo Izrẹl a rehọ e rai ze wọhọ okẹ unevaze rọkẹ Jihova.+

30 Kẹsena Mosis ọ tẹ ta kẹ ahwo Izrẹl nọ: “Rri, Jihova ọ salọ Bẹzalẹl ọmọzae Yurae ọmọzae Họr ọrọ orua Juda no.+ 31 O ku ẹzi Ọghẹnẹ ku ei no, ọ kẹ riẹ areghẹ, otoriẹ, avọ eriariẹ oghoghẹrẹ iruo ọwena kpobi 32 nọ o re ro ru eware onaa sa-sa, nọ ọ rẹ rọ rehọ igoru, isiliva, gbe ekọpa ru eware, 33 nọ o re ro bru itho je fi itho họ eware, je ku oghoghẹrẹ eware ire kpobi nọ a re ru onaa họ. 34 Yọ o fi rie họ udu riẹ no re o wuhrẹ ahwo, te ọyomariẹ gbe Oholiab+ ọmọzae Ahisamak ọrọ orua Dan. 35 Ọ kẹ rai onaa iruo*+ nọ a re ro ru oghoghẹrẹ iruo ọwena kpobi, iruo ọnọ o re zuo onaa họ iwu, ọnọ o re zuo eware, nọ ọ rẹ rehọ olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ ro zuo eware, te iruo ohwo nọ o re fi ilulu họ ekpọ ro zuo ehọ. Ezae nana a ti ru oghoghẹrẹ iruo kpobi je ru oghoghẹrẹ onaa kpobi.

36 “Bẹzalẹl o ti ru iruo kugbe Oholiab avọ ohwo kpobi nọ o wo onaa iruo* nọ Jihova ọ kẹ areghẹ gbe otoriẹ nọ ọ rẹ rọ riẹ oghẹrẹ nọ a re ru eware iruo ọrẹri na kpobi nwane wọhọ epanọ Jihova ọ ta.”+

2 Kẹsena Mosis o te se Bẹzalẹl avọ Oholiab gbe ohwo kpobi nọ o wo onaa iruo nọ Jihova o fi areghẹ họ udu riẹ,+ ohwo kpobi nọ udu riẹ o wọ riẹ rọ unevaze nyaze ti ru iruo na.+ 3 A tẹ rehọ ekẹ kpobi+ nọ ahwo Izrẹl a rehọ ze re a ro ru eware iruo ọrẹri na mi Mosis. Rekọ ahwo na a gbẹ jẹ rehọ ekẹ unevaze ro sei, kohiohiẹ kohiohiẹ.

4 Kẹsena nọ a mu iruo ọrẹri na họ no, ahwo nọ a wo onaa iruo kpobi na a tẹ jẹ nyaze, unọjọ utọjọ, 5 a tẹ jẹ ta kẹ Mosis nọ: “Ahwo na a be rọ eware buobu gaga ze nọ i bu vi eware nọ a gwọlọ rọkẹ iruo nọ Jihova ọ ta nọ a ru na.” 6 Fikiere Mosis ọ tẹ ta nọ a woro nya evuẹ na soso duwu inọ: “Whai ezae gbe whai eyae, wha gbẹ rọ eware efa ze kẹ okẹ ọrẹri na ha.” Kọ enẹ a rọ whaha ahwo na nọ a gbẹ rọ eware efa ze he. 7 Eware na i bu te epanọ i re ro te iruo na kpobi ru, tube te kiọkọ dede.

8 Ahwo nọ a wo onaa iruo kpobi+ na a tẹ rehọ emamọ ohọ-olọlọhọ nọ a zuo ziezi, avọ olulu iburu, iwhulu ogorurẹ, gbe ilulu ewawae egbagba ru ehọ uwou-udhu ikpe erọ uwou-udhu na;+ o* zuo iwoho chẹrub fihọ ai.+ 9 Ohọ uwou-udhu ovuọvo u theri te ikiubiti* udhegberee, jẹ kẹre te ikiubiti ene. Ehọ uwou-udhu na kpobi ẹrẹrẹe. 10 Kẹsena ọ tẹ zuẹ ehọ uwou-udhu isoi kugbe, jẹ zuẹ ehọ uwou-udhu isoi nọ i kiọkọ kugbe. 11 Nọ o ru oyena no, ọ tẹ rehọ olulu iburu ru ighogho fihọ akọ ohọ uwou-udhu ovo evaọ oria nọ a te jọ jẹ ae họ kugbe. O ru epọvo na re fihọ akọ ohọ uwou-udhu nọ o rrọ oka orọ ohọ uwou-udhu odekọ na evaọ oria nọ a te jọ jẹ ae họ kugbe. 12 O ru ighogho udhuvẹ-gbikpe fihọ akọ ohọ uwou-udhu ovo jọ je ru ighogho udhuvẹ-gbikpe fihọ akọ ohọ uwou-udhu ọdekọ na evaọ oria nọ a te jọ jẹ ae họ kugbe re ighogho na e rẹriẹ ovao ku ohwohwo. 13 Kẹsena o te ru ejẹhọ igoru udhuvẹ-gbikpe, ọ tẹ rọ ejẹhọ na rọ jẹ ehọ uwou-udhu na họ kugbe, uwou-udhu na o tẹ jọ ọvo.*

14 Kẹsena o te ru ehọ eto ẹwe rọkẹ uwou-udhu na nọ a re ro ruru uwou-udhu na. O ru ehọ uwou-udhu ikpegbọvo.+ 15 Ohọ uwou-udhu ovuọvo u theri te ikiubiti ọgba jẹ kẹre te ikiubiti ene. Ehọ uwou-udhu ikpegbọvo na ẹrẹrẹe. 16 Kẹsena ọ tẹ zuẹ ehọ uwou-udhu isoi kugbe, ọ tẹ jẹ zuẹ ehọ uwou-udhu ezeza edekọ na kugbe. 17 Nọ o ru oyena no, o te ru ighogho udhuvẹ-gbikpe fihọ akọ ohọ uwou-udhu ovo jọ evaọ oria nọ a te jọ jẹ ae họ kugbe, o te je ru ighogho udhuvẹ-gbikpe fihọ akọ ohọ uwou-udhu odekọ nọ a te jẹhọ kugbei na. 18 O te ru ejẹhọ ekọpa udhuvẹ-gbikpe nọ a rẹ rọ jẹ uwou-udhu* na họ kugbe re o jọ ọvo.

19 Ọ rehọ oviẹ egbo nọ a rehọ ame ọwawae gbe ro ru ohọ nọ a re ro ruru uwou-udhu na, jẹ rehọ oviẹ isili* ru ohọ nọ a re ro ruru ọyena.+

20 Kẹsena ọ tẹ rehọ ure akasha+ ru ifremu uwou-udhu na nọ i dikihẹ kpọvi.+ 21 Ifremu ọvuọvo o kpehru te ikiubiti ikpe jẹ kẹre te ikiubiti ọvo gbe ubro. 22 Ifremu ọvuọvo o wo ezo ivẹ* nọ e jẹhọ ohwohwo. Ere o ru ifremu uwou-udhu na kpobi. 23 Ere o ro ru ifremu rọkẹ abọ obọze ovatha-ọre uwou-udhu na, ifremu udhe nọ e rẹriẹ ovao ku obọze ovatha-ọre. 24 Kẹsena o te ru awọ isiliva udhuvẹ nọ a re fihọ otọ ifremu udhe na, awọ ivẹ rọkẹ otọ ifremu ọvo nọ a re dhe ezo ivẹ riẹ fihọ gbe awọ ivẹ rọkẹ otọ ifremu kpobi nọ u bi lele iei nọ a re dhe ezo ivẹ ifremu na fihọ.+ 25 Rọkẹ abọdekọ uwou-udhu na, abọ ẹkpẹlobọ ovatha-ọre na, o ru ifremu udhe kẹe 26 gbe awọ isiliva udhuvẹ rai, awọ ivẹ e jọ otọ ifremu ọvo, yọ awọ ivẹ e jọ otọ ifremu nọ i kiọkọ na ọvuọvo.

27 Rọkẹ abọ obemu uwou-udhu na nọ u rri obọ ukiediwo-ọre na, o ru ifremu ezeza kẹe.+ 28 O ru ifremu ivẹ re e jọ ifremu ibienẹ uwou-udhu na evaọ ibienẹ ivẹ obemu na. 29 O ru ivẹ kugbe re e jọ ovo no otọ duwu ehru, rite oria ẹmẹro ọsosuọ na. Ere o ru ifremu ibienẹ ivẹ na. 30 Fikiere aikpobi e jọ ifremu eree avọ awọ isiliva ikpegbezeza rai, awọ ivẹ rọkẹ otọ ifremu ọvuọvo.

31 Kẹsena ọ tẹ rehọ ure akasha ru ire nọ a re ro where, ire nọ a re ro where isoi rọkẹ ifremu abọjọ uwou-udhu na+ 32 gbe ire nọ a re ro where isoi rọkẹ ifremu abọdekọ uwou-udhu na gbe isoi rọkẹ ifremu ofẹ obemu uwou-udhu na nọ o rẹriẹ ovao ku obọ ukiediwo-ọre na. 33 O te ru ure nọ a re ro where udevie na nọ o nya udevie ifremu na vrẹ no oka te oka. 34 Ọ rehọ igoru tamu oma ifremu na soso, yọ ọ rehọ igoru ru emero rai nọ e rẹ jọ abọ nọ a rẹ thọrọ ire nọ a re ro where na họ, yọ ọ rehọ igoru tamu oma ire nọ a re ro where na soso.+

35 Kẹsena ọ tẹ rehọ olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi ro ru ekọtini.+ O zuo iwoho chẹrub+ fihọ iẹe.+ 36 Ọ tẹ rehọ ure akasha ru ipila ene kẹe jẹ rehọ igoru tamu oma rai soso, jegbe ejẹhọ nọ a rọ igoru ru, ọ tẹ jẹ ghra isiliva ro ru awọ isiliva ene rọkẹ ae. 37 Kẹsena ọ tẹ rehọ olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo kugbe ro ru ekọtini nọ a re ro gbere* unuẹthẹ uwou-udhu na,+ 38 jegbe ipila isoi riẹ avọ ejẹhọ rai. Ọ rọ igoru tamu obọ ehru rai gbe eware* nọ a re thuru ipila na si, rekọ ekọpa o ro ru awọ isoi rai.

37 Kẹsena Bẹzalẹl+ ọ tẹ rehọ ure akasha ru Etehe na.+ Uthethei riẹ ikiubiti* ivẹ gbe ubro, okẹkẹe riẹ ikiubiti ọvo gbe ubro, yọ ekpehru riẹ ikiubiti ọvo gbe ubro.+ 2 Ọ rọ emamọ igoru* tamu oma riẹ soso te obeva te otafe, o te ru ogbẹ igoru wariẹe họ.+ 3 Kẹsena ọ tẹ ghra igoru ro ru emero ene kẹe, fihọ obehru awọ ene riẹ, emero ivẹ evaọ abọjọ, emero ivẹ evaọ abọdekọ. 4 Nọ o ru oyena no, ọ tẹ rehọ ure akasha ru ekpọ jẹ rọ igoru tamu oma rai soso.+ 5 Kẹsena ọ tẹ thọrọ ekpọ na fihọ evaọ emero na nọ e rrọ tabọ tabọ Etehe na re a rehọ ae wọ Etehe na.+

6 Ọ rehọ emamọ igoru ru ururu na.+ Uthethei riẹ ikiubiti ivẹ gbe ubro, okẹkẹe riẹ ikiubiti ọvo gbe ubro.+ 7 Kẹsena ọ tẹ rọ ehama ru chẹrub igoru ivẹ+ fihọ ehru oka avọ oka ururu na.+ 8 Chẹrub ọvo jọ ọ jọ oka ururu na jọ, chẹrub nọ o kiọkọ ọ jọ oka odekọ. O ru chẹrub ivẹ na fihọ ehru oka avọ oka ururu na. 9 Chẹrub ivẹ na e bẹre ibekpe rai kpehru, rọ ibekpe rai ruru ururu na.+ A rẹriẹ ovao ku ohwohwo, yọ a rọ ovao rai rri ururu na.+

10 Kẹsena ọ tẹ rehọ ure akasha ru emẹjẹ na.+ Uthethei riẹ ikiubiti ivẹ, okẹkẹe riẹ ikiubiti ọvo, yọ ekpehru riẹ ikiubiti ọvo gbe ubro.+ 11 Ọ rehọ emamọ igoru tamu oma riẹ soso je ru ogbẹ igoru wariẹe họ. 12 Nọ o ru oyena no, o te ru akọ wariẹe họ nọ o kẹre te okẹkẹe iziabọ ene,* je ru ogbẹ igoru nya akọ na wariẹ họ. 13 Nọ o ru oyena no, ọ tẹ ghra igoru ro ru emero ene kẹe, je fi emero na họ ibiezọ ene na, oria nọ a ru awọ ene na fihọ. 14 Emero na e kẹle akọ na re e jọ obọ nọ a rẹ thọrọ ekpọ nọ a rẹ rọ wọ emẹjẹ na họ. 15 Kẹsena ọ tẹ rehọ ure akasha ru ekpọ jẹ rọ igoru tamu oma rai soso re a rehọ ae wọ emẹjẹ na. 16 Nọ o ru oyena no, ọ tẹ rehọ emamọ igoru ru ekwakwa nọ e rẹ jọ ehru emẹjẹ na: imidhe riẹ, igho riẹ, gbe imidhe ikokodo riẹ avọ ikoko-ame riẹ nọ a re ro ku idhe udi.+

17 Kẹsena o te ru ọkpọ-edada ukpẹ+ ọrọ emamọ igoru na. Ehama ọ rọ tehe ọkpọ-edada ukpẹ na lahwe. Ẹwẹ igoru ọvo o ro ru obotọ riẹ, ugbe riẹ, igho riẹ, ezo riẹ, gbe idodo riẹ.+ 18 Edada ezeza e jọ ugbe riẹ, edada esa e jọ abọjọ ọkpọ-edada ukpẹ na, edada esa e jọ abọ nọ o kiọkọ. 19 Igho esa nọ a ru wọhọ idodo almọnd e jọ ẹko edada esa jọ, avọ ezo gbe idodo nọ i lele ohwohwo, yọ igho esa nọ a ru wọhọ idodo almọnd e jọ ẹko edada esa nọ o kiọkọ, avọ ezo gbe idodo nọ i lele ohwohwo. Enẹ a ru edada ezeza nọ e jọ ugbe ọkpọ-edada ukpẹ na. 20 Yọ evaọ ugbe ọkpọ-edada ukpẹ na, igho ene nọ a ru wọhọ idodo almọnd e jariẹ, avọ ezo gbe idodo nọ i lele ohwohwo. 21 Ẹzo ọ jọ otọ edada ivẹ ọsosuọ nọ i no ugbe na ze, ẹzo ọ jọ otọ edada ivẹ nọ i lele i rie, yọ ẹzo ọ jọ otọ edada ivẹ edekọ nọ i lele i rie, ere o jọ kẹ egha ezeza nọ i no ugbe ọkpọ-edada ukpẹ na ze na. 22 Ẹwẹ emamọ igoru ọvo nọ a rọ ehama tehe a ro ru ezo na avọ edada na gbe ọkpọ-edada ukpẹ na soso. 23 Kẹsena ọ tẹ rehọ emamọ igoru ru ikpẹ ihrẹ riẹ,+ eware nọ a re ro kru iwhiki* riẹ gbe imidhe erae riẹ. 24 Etalẹnte* ọvo ọrọ emamọ igoru o ro ru ei avọ ekwakwa riẹ kpobi.

25 Kẹsena ọ tẹ rehọ ure akasha ru agbada-idhe insẹnse na.+ Abọ ene riẹ e jọ ẹrẹrẹe, uthethei riẹ ikiubiti ọvo, okẹkẹe riẹ ikiubiti ọvo, ekpehru riẹ ikiubiti ivẹ. O ru izei riẹ no uzedhe oma agbada-idhe na ze.+ 26 Ọ rehọ emamọ igoru tamu oma riẹ soso, obehru riẹ gbe tabọ tabọ riẹ kpobi wariẹ họ gbe izei riẹ, yọ o ru ogbẹ igoru wariẹe họ. 27 O ru emero igoru ivẹ kẹe fihọ otọ ogbẹ riẹ evaọ tabọ tabọ ivẹ riẹ nọ a rẹ thọrọ ekpọ nọ a rẹ rọ wọe fihọ. 28 Nọ o ru oyena no, ọ tẹ rehọ ure akasha ru ekpọ na jẹ rọ igoru tamu oma rai soso. 29 O te je ru ewhri eromuo ọrẹri na+ avọ emamọ insẹnse* nọ i re gbo ore awere na,+ nọ a rọ onaa wuhu kugbe ziezi.*

38 Ọ rehọ ure akasha ru agbada-idhe idhe emahọ na. Abọ ene riẹ e jọ ẹrẹrẹe, uthethei riẹ ikiubiti* isoi, okẹkẹe riẹ ikiubiti isoi yọ ekpehru riẹ ikiubiti esa.+ 2 Kẹsena o te ru izei riẹ họ ibienẹ ene riẹ. Uzedhe oma agbada-idhe na o ru izei na no ze. Ọ tẹ rọ ekọpa tamu oma riẹ soso.+ 3 Nọ o ru oyena no, o te ru ekwakwa agbada-idhe na kpobi, ibokiti na, eshọvẹle na, imidhe ikokodo na, efọko na, gbe imidhe erae na. Ekọpa o ro ru ekwakwa riẹ kpobi. 4 O te je ru ẹfẹ kẹ agbada-idhe na, ibiekpọ ekọpa o ro where ohwohwo ro ru ei, fihọ otọ akọ riẹ, kpobọ otọ kẹle udevie riẹ. 5 O ru emero ene họ ibienẹ ene na kẹle ẹfẹ ekọpa na re o jọ obọ nọ a rẹ thọrọ ekpọ na họ. 6 Nọ o ru oyena no, ọ tẹ rehọ ure akasha ru ekpọ na jẹ rọ ekọpa tamu oma rai soso. 7 Ọ tẹ thọrọ ekpọ na họ emero na evaọ abọ ivẹ agbada-idhe na re a rọ wọe. O ru agbada-idhe na wọhọ etehe eplanke nọ obotọ avọ obehru riẹ i rovie fihọ.

8 Kẹsena o te ru odhe ekọpa na+ avọ oware nọ a rẹ wọe fihọ orọ ekọpa; ighẹgbe* eyae nọ a ruẹrẹ fihọ re a gbodibo evaọ unuẹthẹ uwou-udhu omakugbe na o ro ru ei.

9 Kẹsena o te ru ighẹ uwou-udhu na.+ Evaọ abọ obọze ovatha-ọre ighẹ na, nọ o rẹriẹ ovao ku obọze ovatha-ọre, ọ rehọ emamọ ehọ-elọlọhọ nọ a zuo ziezi ro ru ehọ nọ a rẹ jẹhọ na, nọ u theri te ikiubiti udhusoi (100).+ 10 U wo ipila udhe avọ awọ ekọpa udhe, yọ isiliva a ro ru ighele* ipila na gbe eware* nọ a re ro thuru ipila na si ae. 11 Yọ evaọ abọ ẹkpẹlobọ ovatha-ọre na, ehọ nọ a rẹ jẹhọ nọ i theri te ikiubiti udhusoi (100) e jariẹ. Ekọpa a ro ru ipila udhe rai avọ awọ udhe rai. Isiliva a ro ru ighele ipila na gbe eware* nọ a re ro thuru ipila na si ae. 12 Rekọ evaọ abọ ukiediwo-ọre na, ehọ nọ a rẹ jẹhọ na i theri te ikiubiti udhuvẹ-gbikpe. Ipila ikpe gbe awọ ikpe e jariẹ, yọ isiliva a ro ru ighele ipila na gbe eware* nọ a re ro thuru ipila na si ae. 13 Okẹkẹe abọ ovatha-ọre na, nọ o rẹriẹ ovao ku ofẹ nọ ọre ọ rẹ va no ze, o jọ ikiubiti udhuvẹ-gbikpe. 14 Ehọ nọ a rẹ jẹhọ nọ i theri te ikiubiti ikpegbisoi e jọ ofẹ jọ, avọ ipila esa gbe awọ esa. 15 Rọkẹ ofẹ odekọ nọ o rrọ abọdekọ unu ighẹ na, ehọ nọ a rẹ jẹhọ nọ i theri te ikiubiti ikpegbisoi e jariẹ, avọ ipila esa gbe awọ esa. 16 Ehọ nọ a jẹhọ kpobi wariẹ ighẹ na họ, emamọ ehọ-elọlọhọ nọ a zuo ziezi a ro ru ai. 17 Ekọpa a ro ru awọ ipila na, isiliva a ro ru ighele ipila na gbe eware* nọ a re ro thuru ipila na si ae, a rọ isiliva tamu ehru rai, yọ ipila ighẹ na kpobi i wo eware isiliva nọ a ro kru rai dikihẹ.+

18 Eware nọ a ro zuo ekọtini nọ a re ro gbere* unu ighẹ na họ olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi. Uthethei riẹ ikiubiti udhe, ekpehru riẹ ikiubiti isoi, yọ ekpehru riẹ avọ ehọ ighẹ na nọ a rẹ jẹhọ ohwohwo na ẹrẹrẹe.+ 19 Ekọpa a ro ru ipila ene rai avọ awọ ene rai. Isiliva a ro ru ighele rai gbe eware* nọ a re ro thuru ipila na si ae, yọ a rọ isiliva tamu ehru rai. 20 Ighele uwou-udhu na kpobi gbe enọ e wariẹ ighẹ na họ kpobi, ekọpa a ro ru ai.+

21 Enana họ unu eware nọ a ro ru uwou-udhu na, uwou-udhu Isẹri na,+ nọ a kele wọhọ epanọ Mosis o jie uzi nọ a ru, ahwo Livae a mu iruo na họ obọ+ yọ Itama+ ọmọzae Erọn ozerẹ na ọ jẹ kpọ ae. 22 Bẹzalẹl+ ọmọzae Yurae ọmọzae Họr ọrọ orua Juda o ru eware kpobi nọ Jihova ọ ta kẹ Mosis nọ o ru. 23 Oholiab+ ọmọzae Ahisamak ọrọ orua Dan ọ jọ kugbei, ọwena gbe ọnọ o re zuo onaa họ iwu gbe ọnọ o re zuo eware, nọ ọ rẹ rehọ olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ ro zuo eware.

24 Igoru kpobi nọ a ro ru iruo oria ọrẹri na kpobi avọ unu igoru idhe iveghe na ẹrẹrẹe,+ etalẹnte* udhegbizii avọ shẹkẹl* egba ihrẹ gbe ọgba (730) lele epaọ shẹkẹl oria ọrẹri na.* 25 Yọ isiliva erọ ahwo nọ a kere odẹ rai fihotọ evaọ ogbotu na e jọ etalẹnte udhusoi (100) gbe shẹkẹl odu ọvo gbe egba ihrẹ gbe udhosa gbe ikpegbisoi (1,775) lele epaọ shẹkẹl oria ọrẹri na.* 26 Abọvo shẹkẹl omomọvo o jọ ẹrẹrẹe kugbe abọvo shẹkẹl lele epaọ shẹkẹl oria ọrẹri na,* oye ọzae kpobi nọ ọ jọ usu enọ a kere edẹ rai fihotọ nọ ọ rrọ umuo ikpe udhe kpohọ ehru ọ rehọ ze,+ unu rai u bu te idu egba ezeza gbe esa gbe egba isoi gbe udhuvẹ-gbikpe (603,550).+

27 Unu eware nọ a ghra ro ru awọ oria ọrẹri na gbe awọ ekọtini na etalẹnte udhusoi (100); etalẹnte udhusoi (100) a ro ru awọ udhusoi (100), etalẹnte ọvo rọkẹ owọ ọvo.+ 28 Evaọ shẹkẹl odu ọvo gbe egba ihrẹ gbe udhosa gbe ikpegbisoi (1,775) na o jo ru ighele ipila na jẹ rọ tamu ehru rai je ku ai kugbe.

29 Ekọpa nọ a rọ kẹ okẹ* na o jọ etalẹnte udhosa-gbikpe gbe shẹkẹl idu ivẹ gbe egba ene (2,400). 30 Eye o ro ru awọ unuẹthẹ uwou-udhu omakugbe na, agbada-idhe ekọpa na gbe ẹfẹ ekọpa riẹ, ekwakwa agbada-idhe na kpobi, 31 awọ nọ e wariẹ ighẹ na họ, awọ unu ighẹ na, gbe ighele uwou-udhu na kpobi avọ ighele kpobi+ nọ e wariẹ ighẹ na họ.

39 A tẹ jọ olulu iburu na, iwhulu ogorurẹ na, gbe ilulu ewawae egbagba na+ ru emamọ iwu nọ a zuo ziezi nọ a rẹ rọ gbodibo evaọ oria ọrẹri na. A ru iwu ọrẹri na rọkẹ Erọn,+ nwane wọhọ epanọ Jihova ọ ta kẹ Mosis nọ o ru.

2 Eware nọ o ro ru ẹfọd+ na họ, igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi. 3 A rọ ehama tehe ewẹ igoru fihọ vẹvẹvẹ, o te bru rai wọhọ ifi re ọ ruẹsi zuo ai kugbe olulu iburu na, iwhulu ogorurẹ na, ilulu ewawae egbagba na, gbe emamọ ehọ-elọlọhọ na, a te zuo ai kugbe. 4 A ru abọ ikoko ivẹ kẹe nọ a kugbe evaọ oka avọ oka ivẹ riẹ. 5 Eware nana evona a ro zuo umueku* nọ a ru fihọ ẹfọd na nọ a re ro mu ei ga na:+ igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi, nwane wọhọ epanọ Jihova ọ ta kẹ Mosis nọ o ru.

6 Kẹsena a te fi itho oniks na họ tamu emeware igoru, a tẹ kare edẹ emezae Izrẹl fihọ ae, oghẹrẹ nọ a rẹ kare oka fihọ oware.+ 7 O te fi ai họ abọ ikoko erọ ẹfọd na re e jọ itho ekareghẹhọ kẹ emezae Izrẹl,+ nwane wọhọ epanọ Jihova ọ ta kẹ Mosis nọ o ru. 8 Kẹsena o te ru ẹwẹ-ohọ igbama na+ wọhọ epaọ ohwo nọ o re zuo onaa họ iwu, wọhọ oghẹrẹ nọ a ru ẹfọd na, eware nọ a ro ru ei họ, igoru, olulu iburu, iwhulu ogorurẹ, ilulu ewawae egbagba, gbe emamọ ohọ-olọlọhọ nọ a zuo ziezi.+ 9 Abọ ene riẹ e jọ ẹrẹrẹe nọ a te kpiri ei ibro ivẹ. A ru ẹwẹ-ohọ igbama na, onọ a te kpiri ei, uthethei gbe okẹkẹe riẹ o rẹ jọ okẹkẹe evabọ.* 10 A ta ihie ene erọ itho mu ei. Itho uhie ọsosuọ họ rubi, topaz, gbe ẹmerald. 11 Itho uhie avọ ivẹ họ tọkwọes, safaya, gbe jaspa. 12 Itho uhie avọ esa họ leshẹm,* ageti, gbe ametist. 13 Yọ itho uhie avọ ene họ krisolaet, oniks, gbe jed. A ta rai mu emeware igoru. 14 Unu itho na o rọwokugbe edẹ emezae ikpegbivẹ Izrẹl, yọ a kare edẹ na fihọ ai wọhọ epanọ a rẹ kare oka fihọ oware, odẹ ọvuọvo u dikihẹ kẹ erua ikpegbivẹ na ọvuọvo.

15 Kẹsena a te ru icheni nọ a zuo wowoma fihọ ẹwẹ-ohọ igbama na, wọhọ ifi emamọ igoru.*+ 16 A te ru emeware igoru ivẹ gbe emero igoru ivẹ, a tẹ ta emero ivẹ na mu ibiezọ ivẹ ẹwẹ-ohọ igbama na. 17 Nọ a ru oyena no, a tẹ thọrọ ifi igoru ivẹ na họ emero ivẹ na nọ e rrọ ibiezọ ẹwẹ-ohọ igbama na. 18 Kẹsena a tẹ thọrọ eka ivẹ erọ ifi ivẹ na họ emeware igoru ivẹ na, a te kru rai kugbe abọ ikoko na evaọ obaro ẹfọd na. 19 Nọ a ru oyena no, a te ru emero igoru ivẹ a tẹ ta ai mu oka avọ oka obeva ẹwẹ-ohọ igbama na, rẹriẹ ovao ku ẹfọd na.+ 20 Kẹsena a te ru emero igoru ivẹ efa a te fi ai họ aro ẹfọd na, evaọ obotọ abọ ikoko ivẹ na, kẹle oria nọ a jọ zuẹe kugbe na, evaọ ehru umueku* nọ a zuo kẹ ẹfọd na. 21 Ukuhọ riẹ, a tẹ thọrọ ufi iburu họ emero ẹwẹ-ohọ igbama na a te thuru iei si emero ẹfọd na, re u kru ẹwẹ-ohọ igbama na fihọ ẹfọd na, evaọ obehru umueku* nọ a zuo na, nwane wọhọ epanọ Jihova ọ ta kẹ Mosis nọ o ru.

22 Kẹsena o te ru ukotu nọ u wo abọ họ orọ ẹfọd na, onọ ohwo nọ o re fi ilulu họ ekpọ ro zuo ehọ o zuo, yọ olulu iburu a ro zuo omariẹ kpobi.+ 23 Ukotu nọ u wo abọ họ na u wo oria nọ u rovie fihọ evaọ udevie riẹ, wọhọ uriohọ ewu-ẹmo. Oria nọ u rovie fihọ na u wo akọ nọ a zuo wariẹe họ re o gbẹ bẹre he. 24 Nọ a ru oyena no, a tẹ rehọ olulu iburu, iwhulu ogorurẹ, gbe ilulu ewawae egbagba nọ a zuo kugbe ru pọmegranet* họ akọ obotọ ukotu nọ u wo abọ họ na. 25 A te ru igogo emamọ igoru a te fi igogo na họ ududevie pọmegranet na wariẹ akọ obotọ ukotu nọ u wo abọ họ na evaọ ududevie pọmegranet na; 26 a fi ẹgogo avọ pọmegranet họ lele ohwohwo, ẹgogo ọvo avọ pọmegranet ọvo, wariẹ akọ obotọ ukotu nọ u wo abọ họ na kpobi, onọ a rẹ rọ gbodibo, nwane wọhọ epanọ Jihova ọ ta kẹ Mosis nọ o ru.

27 A rọ emamọ ehọ-elọlọhọ ru iwu ithethei na, ohwo nọ o re fi ilulu họ ekpọ ro zuo ehọ o zuo rai, rọkẹ Erọn avọ emezae riẹ,+ 28 gbe etu-udhọfọ+ emamọ ohọ-olọlọhọ na, itu erru+ nọ a rọ emamọ ohọ-olọlọhọ ru, ehọ nọ a rẹ rọ gba-ọgọdọ*+ nọ a rọ emamọ ohọ-olọlọhọ nọ a zuo ziezi ru, 29 gbe umueku nọ a rọ emamọ ohọ-olọlọhọ nọ a zuo ziezi, avọ olulu iburu, iwhulu ogorurẹ, gbe ilulu ewawae egbagba nọ a zuo kugbe ro ru, nwane wọhọ epanọ Jihova ọ ta kẹ Mosis nọ o ru.

30 Ukuhọ riẹ, a tẹ rọ emamọ igoru ru ẹwẹ-odhe ọnwranwra na, oka omauromudhe ọrẹri* na jẹ kare eme nana fihọ iẹe epanọ a rẹ kare oka fihọ oware: “Jihova họ ọrẹri.”+ 31 A thuru ufi nọ a rọ olulu iburu ru si ei re a ro thuru iei si etu-udhọfọ na, nwane wọhọ epanọ Jihova ọ ta kẹ Mosis nọ o ru.

32 A te ti ku iruo uwou-udhu na kpobi họ, uwou-udhu omakugbe na, ahwo Izrẹl na a ru oware kpobi nọ Jihova ọ ta kẹ Mosis nọ o ru.+ Nwanọ ere a ru.

33 Kẹsena a tẹ rọ uwou-udhu na+ bru Mosis ze, uwou-udhu na+ avọ ekwakwa riẹ kpobi: ejẹhọ riẹ,+ ifremu riẹ,+ ire riẹ nọ a re ro where,+ gbe ipila riẹ avọ awọ riẹ;+ 34 ohọ oviẹ egbo nọ a rehọ ame ọwawae gbe nọ a re ro ruru iei,+ ohọ oviẹ isili* nọ a re ro ruru iei, ekọtini nọ a re ro gbere* na;+ 35 etehe Isẹri na avọ ekpọ riẹ+ gbe ururu na;+ 36 emẹjẹ na, ekwakwa riẹ kpobi+ gbe ebrẹdi udhesẹ na; 37 ọkpọ-edada ukpẹ ọrọ emamọ igoru na, ikpẹ riẹ,+ ikpẹ nọ e rrọ uhie na, avọ ekwakwa riẹ kpobi+ gbe ewhri nọ a re ro tu ikpẹ na;+ 38 agbada-idhe+ igoru na, ewhri eromuo* na,+ insẹnse nọ i re gbo ore awere na,+ ekọtini*+ nọ a re ro gbere unuẹthẹ uwou-udhu na; 39 agbada-idhe ekọpa na+ avọ ẹfẹ ekọpa riẹ, ekpọ riẹ,+ avọ ekwakwa riẹ kpobi,+ odhe na avọ oware nọ a rẹ wọe fihọ;+ 40 ehọ ighẹ na nọ a rẹ jẹhọ ohwohwo na, ipila riẹ avọ awọ riẹ,+ ekọtini* nọ a re ro gbere+ unu ighẹ na, ifi uwou-udhu na avọ ighele uwou-udhu na+ gbe ekwakwa kpobi rọkẹ iruẹru uwou-udhu na, rọkẹ uwou-udhu omakugbe na; 41 emamọ iwu nọ a zuo ziezi nọ a rẹ rọ gbodibo evaọ aruẹri na, iwu ọrẹri rọkẹ Erọn ozerẹ na,+ gbe iwu emezae riẹ nọ a re ro ru iruo izerẹ.

42 Ahwo Izrẹl a ru eware kpobi nọ Jihova ọ ta kẹ Mosis nọ o ru, ere a ru iruo na kpobi.+ 43 Nọ Mosis ọ kiẹ iruo rai na kpobi riwi, ọ ruẹ nọ a ru rai nwane wọhọ epanọ Jihova ọ ta; kẹsena Mosis ọ tẹ lẹ ẹro eghale kẹ ae.

40 Kẹsena Jihova ọ tẹ ta kẹ Mosis nọ: 2 “Evaọ ẹdẹ ọsosuọ amara ọsosuọ na, whọ rẹ whẹ uwou-udhu na họ, uwou-udhu omakugbe na.+ 3 Wọ etehe Isẹri na fihọ eva riẹ,+ jẹ rehọ ekọtini na gbere* aro Etehe na.+ 4 Whọ rẹ wọ emẹjẹ na+ fihọ iẹe eva whọ vẹ ruẹrẹ eware emẹjẹ na fihọ ehru riẹ, whọ vẹ jẹ rehọ ọkpọ-edada ukpẹ na ziọ eva riẹ+ jẹ rehọ ikpẹ riẹ tu.+ 5 Kẹsena whọ vẹ wọ agbada-idhe igoru ọrọ insẹnse na+ fihọ aro etehe Isẹri na who ve fi ekọtini* nọ a re ro gbere unuẹthẹ uwou-udhu na họ oria riẹ.+

6 “Whọ rẹ wọ agbada-idhe idhe emahọ na+ fihọ aro unuẹthẹ uwou-udhu na, uwou-udhu omakugbe na, 7 wọ odhe na fihọ udevie uwou-udhu omakugbe na avọ agbada-idhe na who ve ku ame fihọ iẹe.+ 8 Kẹsena who ve di ighẹ na+ wariẹe họ je fi ekọtini* nọ a re ro gbere+ unu ighẹ na fihọ. 9 Kẹsena whọ vẹ rehọ ewhri eromuo na+ who ve wholo uwou-udhu na gbe eware kpobi nọ e rrọ eva riẹ,+ re who ru ei fo avọ ekwakwa riẹ kpobi, re o jọ oware ọrẹri. 10 Who re wholo agbada-idhe idhe emahọ na avọ ekwakwa riẹ kpobi re who ru agbada-idhe na fo, re o jọ agbada-idhe nọ o rrọ ọrẹri gaga.+ 11 Who ve wholo odhe na avọ oware nọ a rẹ wọe fihọ re who ru ei fo.

12 “Kẹsena whọ vẹ rehọ Erọn avọ emezae riẹ ze kẹle aro unuẹthẹ uwou-udhu omakugbe na, whọ vẹ rehọ ame họ ae.+ 13 Yọ who re ku iwu ọrẹri na+ họ Erọn who ve wholo iei+ je ru ei fo, ọ vẹ te jọ ozerẹ kẹ omẹ. 14 Kẹsena whọ vẹ rehọ emezae riẹ ze who ve ku iwu ithethei na họ ae.+ 15 Who re wholo ai wọhọ epanọ who wholo ọsẹ rai na,+ re a jọ izerẹ kẹ omẹ, yọ eromuo* rai o te jọ ribri re o jọ ọkwa-ozerẹ nọ o rẹ jọ ribri rọkẹ ae evaọ ige rai kpobi.”+

16 Mosis o ru eware kpobi nọ Jihova ọ ta kẹe.+ Nwanọ ere o ru.

17 Evaọ amara ọsosuọ, evaọ ukpe avọ ivẹ, evaọ ẹdẹ ọsosuọ amara na a rọ whẹ uwou-udhu na họ.+ 18 Nọ Mosis ọ jẹ whẹ uwou-udhu na họ, o fi awọ riẹ+ họ otọ, ọ whẹ ifremu riẹ+ họ, fi ire nọ a re ro where na+ họ, jẹ whẹ ipila riẹ họ. 19 Ọ rriẹ ohọ uwou-udhu na+ fihọ ehru uwou-udhu na je fi ohọ nọ a re ro ruru+ ọyena họ ehru riẹ, nwane wọhọ epanọ Jihova ọ ta kẹ Mosis nọ o ru.

20 Kẹsena ọ tẹ rehọ Isẹri* na+ o te fi ai họ evaọ Etehe na+ ọ tẹ thọrọ ekpọ na+ họ Etehe na je fi ururu+ Etehe na+ họ ehru riẹ. 21 Ọ wọ Etehe na họ eva uwou-udhu na je fi ekọtini*+ nọ a re ro gbere na họ oria riẹ ro gbere* aro etehe Isẹri na,+ nwane wọhọ epanọ Jihova ọ ta kẹ Mosis nọ o ru.

22 Kẹsena ọ tẹ wọ emẹjẹ na+ fihọ evaọ uwou-udhu omakugbe na, fihọ abọ ẹkpẹlobọ ovatha-ọre uwou-udhu na evaọ otafe ekọtini na, 23 ọ tẹ ruẹrẹ ebrẹdi na fihọ ehru ohwohwo+ evaọ ehru riẹ evaọ aro Jihova, nwane wọhọ epanọ Jihova ọ ta kẹ Mosis nọ o ru.

24 O fi ọkpọ-edada ukpẹ na+ họ evaọ uwou-udhu omakugbe na evaọ aro emẹjẹ na, evaọ abọ obọze ovatha-ọre uwou-udhu na. 25 Ọ rehọ ikpẹ na tu+ evaọ aro Jihova, nwane wọhọ epanọ Jihova ọ ta kẹ Mosis nọ o ru.

26 Kẹsena ọ tẹ wọ agbada-idhe igoru na+ họ eva uwou-udhu omakugbe na fihọ aro ekọtini na, 27 re ọ jariẹ mahe insẹnse nọ i re gbo ore awere+ re i kuye iwiri evaọ ehru riẹ,+ nwane wọhọ epanọ Jihova ọ ta kẹ Mosis nọ o ru.

28 Kẹsena o te fi ekọtini*+ nọ a re ro gbere unuẹthẹ uwou-udhu na họ oria riẹ.

29 Ọ wọ agbada-idhe idhe emahọ na+ fihọ aro unuẹthẹ uwou-udhu na, uwou-udhu omakugbe na, re ọ ruẹse jariẹ dhe idhe emahọ+ gbe idhe ibi ekakọ, nwane wọhọ epanọ Jihova ọ ta kẹ Mosis nọ o ru.

30 Ọ tẹ wọ odhe na fihọ udevie uwou-udhu omakugbe na avọ agbada-idhe na, o te ku ame fihọ iẹe nọ a rẹ rọ wozẹ abọ gbe awọ.+ 31 Mosis avọ Erọn gbe emezae riẹ a jọ etẹe rehọ ame wozẹ abọ rai gbe awọ rai. 32 Oke kpobi nọ a tẹ ruọ eva uwou-udhu omakugbe na hayo nọ a tẹ nyaziọ agbada-idhe na, a rẹ rọ ame ru oma rai fo,+ nwane wọhọ epanọ Jihova ọ ta kẹ Mosis.

33 Ukuhọ riẹ o te di ighẹ na+ wariẹ uwou-udhu na avọ agbada-idhe na họ, o te fi ekọtini* nọ a re ro gbere unu ighẹ na họ.+

Enẹ Mosis o ro ru iruo na re. 34 Ẹgho na o te mu uwou-udhu omakugbe na họ eruru, oruaro Jihova o tẹ vọ uwou-udhu na.+ 35 Mosis ọ sae nyaruọ eva uwou-udhu omakugbe na ha keme ẹgho na ọ daji ehru riẹ evaọ etẹe, yọ oruaro Jihova o vọ uwou-udhu na.+

36 Nọ ẹgho na ọ tẹ wọ kpehru no uwou-udhu na, ahwo Izrẹl a vẹ wọ re a ruọ edhere evaọ onya erẹ rai kpobi.+ 37 Rekọ ẹgho na ọ gbẹ wọ kpehru hu, a rẹ wọ ruọ edhere he bọo ẹdẹ nọ ọ rẹ wọ kpehru.+ 38 Keme ẹgho Jihova ọ jẹ jọ ehru uwou-udhu na evaọ uvo, yọ erae e jẹ jọ ehru riẹ evaọ aso evaọ aro ahwo Izrẹl kpobi evaọ onya erẹ rai kpobi.+