‘Bọ Uviuwou Ra Ga’
1 Ababọ avro, evaọ iruemu-ẹwho akpọ soso, uzuazọ uviuwou o be raha. Akpọ Setan o bi vighi evaọ eviẹhọ gbe ọfariẹ-ogbe. (1 Jọn 5:19) Onana o tẹ suẹe ze nọ ma rẹ rọ ‘bọ uviuwou mai ga’ avọ ovẹrẹ je wuhrẹ amọfa epanọ a sai ro ru epọvo na kẹ iviuwou rai.—Itẹ 24:3, 27.
2 Ehri-Izi Ebaibol yọ Ọthuke: A re duku edidi emamọ evawere uviuwou evaọ efihiruo ehri-izi Ebaibol. Uzẹme nana nọ u w’ẹgba na o rẹ kẹ omomọvo uviuwou na erere evaọ kabọ kabọ uzuazọ. Uviuwou nọ o fi rai họ iruo o re wo evawere ọ vẹ jẹ reawere udhedhẹ Ọghẹnẹ.—Wawo Aizaya 32:17, 18.
3 Ehri-izi nọ e rẹ sae fiobọhọ k’omai bọ uviuwou mai ga a kere i rai vevẹ fihọ obe okpokpọ na, Edidi Evawere Uviuwou. Uzou ovuovo u kuhọ avọ etehe ewuhrẹ obufihọ nọ u fiẹgba họ ehri-izi nọ o gwọlọ nọ ahwo uviuwou a rẹ kareghẹhọ. Itehe enana buobu i muhọ avọ onọ na, “Ẹvẹ izi Ebaibol enana i re ro fiobọhọ . . . ?” Onana o rẹ rẹriẹ iroro kpohọ ẹjiroro Ọghẹnẹ re ma wo iroro riẹ kpahe uzoẹme nọ a be t’ẹme kpahe na.—Aiz. 48:17.
4 Ru re whọ riẹ obe na. Wuhrẹ re whọ riẹ epanọ a re ro duku ehri-izi nọ e rẹ sai fiobọhọ evaọ okenọ ebẹbẹ sa-sa e tẹ roma via. Obe na o ta kpahe eme wọhọ enana: eware nọ ohwo o re muẹrohọ okenọ ọ tẹ be jiroro kpahe ọrivẹ orọo (uzou avọ 2), isiavẹ nọ i wuzou nọ i re rovie ẹthẹ kpohọ orọo evawere nọ o rẹ tọ (uzou avọ 3), epanọ esẹ gbe ini a rẹ rọ yọrọ emoha rai re a te ekpako nọ a re fievahọ, jẹ dhẹ-ozọ Ọghẹnẹ (uzou avọ 6), epanọ a rẹ rọ thọ uviuwou na no ọwhẹruọ ọraha (uzou avọ 8), ehri-izi nọ i re fiobọhọ kẹ iviuwou ọyewọ-ọvo kparobọ (uzou avọ 9), obufihọ ẹzi kẹ iviuwou nọ ẹdareria gbe ozighi e be kẹ uye (uzou avọ 12), oware nọ a re ru nọ ọgbakugbe orọo o tẹ whoma te ẹfa no (uzou avọ 13), oware nọ a rẹ sai ru rọ kẹ esẹ gbe ini nọ e kpako no adhẹẹ (uzou avọ 15), gbe epanọ a rẹ rọ gbobọkru obaro nọ o rẹ tọ kẹ uviuwou obọ ohwo (uzou avọ 16).
5 Rehọ Obe Kpokpọ na Ruiruo Ziezi: Otẹrọnọ who ri ru ere vẹre he, kemejabọ who gbe wuhrẹ obe ọ Evawere Uviuwou na kugbe wọhọ uviuwou hu? Ofariẹ, oke kpobi nọ ẹbẹbẹ ọkpokpọ hayo use-abọ o tẹ rẹriẹ ova dhe uviuwou ra, kiẹ izou nọ e t’ẹme kpahe enana evaọ obe na riwi, jẹ rehọ olẹ roro kpahe epanọ a re ro fi ehrẹ na h’iruo. Fiba oyena, evaọ etoke March, ruẹrẹ oke họ kẹ usiuwoma ota re whọ daoma fi obe ọ Edidi Evawere Uviuwou na họ ada kẹ ahwo buobu te epanọ o sae lọhọ te kpobi.
6 Iviuwou nọ e be nya lele omarọkẹ Ọghẹnẹ a re wo ọbọga ẹzi jẹ jọ okugbe a vẹ jẹ ruẹrẹ oma họ ziezi re a yeri kugbe ọwọsuọ Setan. (1 Tim. 4:7, 8; 1 Pita 5:8, 9) Ẹvẹ eva e rẹ were omai te inọ ma wo uthubro Ọghẹnẹ no obọ Ọnọ o mu uviuwou na họ ze!