Julaĩ

Maũndũ-inĩ mothe marĩa Jesu ooigaga na ageka hamwe na ciama iria aaringire, nĩ eegerekanirie biũ na mwĩcirĩrie wa Ithe na mwĩkĩre wake wa maũndũ. (Joh. 14:9) Tũngĩĩruta atĩa kuumana na ciama cia Jesu? Jesu na Ithe nĩ matwendete mũno. Rĩrĩa Jesu aarĩ gũkũ thĩ, nĩ oonanirie atĩ nĩ endete andũ mũno na njĩra ya kũhũthĩra hinya wake wa kũringa ciama kũmehereria mĩnyamaro yao. Hĩndĩ ĩmwe, arũme erĩ arĩa maarĩ atumumu nĩ maamũthaithire amateithie. (Mat. 20:​30-34) Ta rora wone atĩ Jesu ‘aaringirũo nĩ tha’ na akĩmahonia. Kiugo gĩa Kĩngiriki kĩrĩa gĩtaũrĩtwo “akĩringwo nĩ tha” kĩonanagia tha nyingĩ iria mũndũ aiguaga na kũu thĩinĩ. Tha ta icio nyingĩ iria Jesu oonanagia nĩ ũndũ wa wendo, ningĩ nĩ ciamũtindĩkire kũhe andũ irio na kũhonia mũndũ ũmwe mangũ. (Mat. 15:32; Mar. 1:41) No tũkorũo na ma atĩ Jehova, Ngai ũrĩ “ũcayanĩri mũingĩ,” marĩ na Mũrũwe nĩ matwendete mũno na nĩ maiguaga ũũru rĩrĩa tũranyamarĩka. (Luk. 1:78; 1 Pet. 5:7) No mũhaka makorũo nĩ meriragĩria mũno kwehereria andũ mathĩna mao mothe. w23.04 3 ¶4-5

No twĩke ũrĩa wothe tũngĩhota nĩguo twĩtheme gũthoma na gũthikĩrĩria mawoni moru marĩa marĩ thĩinĩ wa thĩ ĩno ya Shaitani. No tũiyũrie meciria maitũ maũndũ mega na njĩra ya gũthoma na kwĩruta Bibilia. Gũthiĩ mĩcemanio na kũnyita itemi ũtungata-inĩ o nakuo nĩ kũgitagĩra mwĩcirĩrie witũ. Na Jehova atwĩrĩire atĩ ndangĩreka tũgerio ũndũ tũtangĩhota gwĩtiiria. (1 Kor. 10:​12, 13) O ũmwe witũ nĩ arabatara kũhoyaga kaingĩ nĩguo atũũrie wĩhokeku harĩ Jehova mahinda-inĩ maya maritũ ma kũrigĩrĩria. Jehova endaga ‘tũmũitũrũragĩre ngoro citũ’ kũgerera mahoya. (Thab. 62:8) Goocaga Jehova na ũmũcokagĩrie ngatho nĩ ũndũ wa maũndũ mothe marĩa ekaga. Mũhoe agũteithie gũkoragwo na ũmĩrĩru ũtungata-inĩ. Mũthaithe agũteithie gũkirĩrĩria mathĩna na kũregana na magerio o mothe marĩa ũngĩcemania namo. Ndũkareke kĩndũ o gĩothe kana mũndũ o wothe akũgirĩrĩrie kũhoyaga Jehova kaingĩ. w23.05 7 ¶17-18

Tũthiaga mĩcemanio-inĩ ya kĩũngano nĩkĩ? Gĩtũmi kĩrĩa kĩnene nĩ kũgooca Jehova. (Thab. 26:12; 111:1) Ningĩ nĩ tũthiaga mĩcemanio-inĩ nĩguo twĩkĩrane ngoro mahinda maya maritũ. (1 Thes. 5:11) Rĩrĩa tuoya guoko na twaruta macokio, nĩ tũhotaga kũhingia maũndũ macio merĩ. No rĩrĩa tũraruta macokio, no tũcemanie na moritũ. No tũigue guoya kũruta macokio, kana twĩrirĩrie mũno kũruta macokio ĩndĩ twage kũheo mĩeke mĩingĩ ta ũrĩa tũngĩenda. Tũngĩhota atĩa kũhiũrania na moritũ macio? Mũtũmwo Paulo aaugire twĩrutanagĩrie ‘gwĩkĩranaga ngoro.’ Tũngĩmenya atĩ arĩa angĩ no mekĩrũo ngoro nĩ macokio maitũ makuhĩ, tũtirĩtigagĩra kuoya guoko. Na tũngĩaga kũheo mĩeke mĩingĩ ya gũcokia, nĩ twagĩrĩirũo gũkena tondũ arĩa angĩ thĩinĩ wa kĩũngano nĩ mekũgĩa na mĩeke ya kũruta macokio.—1 Pet. 3:8. w23.04 20 ¶1-3

Ayahudi maakoretwo marĩ mĩgwate bũrũri-inĩ wa Babuloni kwa ihinda ta rĩa mĩaka 70, na mũthamaki agĩathana akiuga atĩ rĩu nĩ mangĩacokire bũrũri-inĩ wao wa Isiraeli. (Ezar. 1:​2-4) Jehova nowe tu ũngĩatũmire ũndũ ũcio wĩkĩke, tondũ nĩ kuoĩkaine atĩ itũũra rĩa Babuloni rĩtiarekagĩrĩria andũ arĩa rĩanyita mĩgwate. (Isa. 14:​4, 17) No itũũra rĩu rĩakoretwo rĩahootwo, na mũthamaki mwerũ ũrĩa waathanaga akĩra Ayahudi atĩ nĩ mangĩaumire kuo. Ayahudi othe, na makĩria ciongo cia famĩlĩ, nĩ maabataraga gũtua itua rĩa kuuma Babuloni kana gũikara kuo. Itua rĩu no kũhoteke rĩtiarĩ ihũthũ gũtua. Andũ amwe no kũhoteke maarĩ akũrũ mũno na matingĩahotire gũthiĩ thabarĩ ĩyo ndaihu. Na tondũ Ayahudi aingĩ maaciarĩirũo kũu Babuloni, kũu nĩkuo mangĩetire mũciĩ. Harĩ o, bũrũri wa Isiraeli warĩ wa maithe mao ma tene. Ningĩ Ayahudi amwe no makorũo nĩ maagaacĩrĩte mũno kũu Babuloni, kwoguo nĩ ũngĩarĩ ũndũ mũritũ harĩ o gũtiga mĩciĩ yao mĩega kana biacara ciao mathiĩ bũrũri matoĩ. w23.05 14 ¶1-2

Kiugo kĩa Ngai gĩtwĩkĩraga ngoro tũthiĩ na mbere gũkũria ũkirĩrĩria, ũcayanĩri, na wendo. Luka 21:19 yugaga: “Na mwakirĩrĩria nĩ mũkaahonokia mĩoyo yanyu.” Akolosai 3:12 yugaga: “Mwĩhumbei . . . ũcayanĩri.” Na 1 Athesalonike 4:​9, 10 yugaga: “Inyuĩ ene nĩ mũrutagwo kwendana nĩ Ngai. . . . No rĩu ariũ a Ithe witũ tũramũringĩrĩria mũthiĩ na mbere gwĩka ũguo na gĩkĩro kĩnene o na makĩria.” Mĩhari ĩyo yothe yaandĩkĩirũo arutwo arĩa maakoretwo makĩonania ũkirĩrĩria, ũcayanĩri, na wendo. O na kũrĩ ũguo, no maabataraga gũthiĩ na mbere kuonania ngumo icio. O na ithuĩ nĩ twagĩrĩirũo gwĩka ũguo. Nĩguo ũhote gwĩka ũguo, wĩcirie ũrĩa Akristiano a tene moonanirie ngumo icio. Ũcoke ũrore ũrĩa ũngĩĩgerekania na arutwo acio, na njĩra ĩyo wonanie atĩ nĩ wĩhaarĩirie nĩ ũndũ wa thĩna ũrĩa mũnene. Na rĩrĩa thĩna ũrĩa mũnene ũkaambĩrĩria, nĩ ũgaakorũo wĩrutĩte gũkirĩrĩria na nĩ ũgaakorũo wĩhotorete gũthiĩ na mbere gũkirĩrĩria. w23.07 3 ¶4, 8

Tũkorũo tũrĩ aitĩrĩrie maguta kana tũrĩ a “ngʼondu ingĩ,” nĩ tũrabatara gũthiĩ na mbere kũgerera ‘Barabara-inĩ ya Ũtheru,’ tondũ gwĩka ũguo nĩ gũtũteithagia gũthiĩ na mbere gũtungatĩra Jehova mahinda-inĩ maya, na nĩ gũgaatũteithia kũmũtungatĩra mahinda mokĩte rĩrĩa Ũthamaki ũkaarehe irathimo gũkũ thĩ. (Joh. 10:16) Kuuma mwaka wa 1919 M.M., andũ milioni nyingĩ, arũme, atumia, na ciana, nĩ maumĩte thĩinĩ wa Babuloni Ũrĩa Mũnene, na nĩwe ndini ciothe cia maheeni, na makambĩrĩria kũgerera barabara-inĩ ĩyo ya mũhaano. Hĩndĩ ĩrĩa Ayahudi maacokaga kuuma Babuloni, Jehova nĩ aatigĩrĩire atĩ mĩhĩnga yothe ĩrĩa yarĩ barabara-inĩ nĩ yeherio. (Isa. 57:14) Ĩ ũhoro wĩgiĩ “Barabara ya Ũtheru” mahinda-inĩ maya? Mĩaka magana maingĩ mbere ya 1919, Jehova nĩ aahũthĩrire arũme meetigĩrĩte Ngai gũteithĩrĩria harĩ kũhaarĩria barabara ya kuuma thĩinĩ wa Babuloni Ũrĩa Mũnene. (Ringithania Isaia 40:3.) Nĩ maarutire wĩra ũrĩa wabataranagia wa kũhaarĩria barabara ĩyo ya mũhaano, nĩguo thutha-inĩ andũ arĩa marĩ na ngoro njega makaahota kuuma thĩinĩ wa ndini cia maheeni na mambĩrĩrie gũthathaiya Jehova hamwe na andũ ake. w23.05 15-16 ¶8-9

Jehova endaga tũmũtungatĩre tũrĩ na gĩkeno na twĩyendeire. (2 Kor. 9:7) Kwoguo-rĩ, hihi nĩ twagĩrĩirũo gũthiĩ na mbere kũrutĩra muoroto witũ wĩra angĩkorũo nĩ tũraigua tũtirĩ na wendi? Wĩcirie ngerekano ya mũtũmwo Paulo. Aaugire ũũ: “Nĩ kũhũũra hũũraga mwĩrĩ wakwa na ngaũtongoria ta ngombo.” (1 Kor. 9:​25-27) O na rĩrĩa Paulo aaiguaga atarĩ na wendi wa gwĩka ũrĩa Jehova eendaga eke, nĩ eeringagĩrĩria gwĩka ũguo. Hihi Jehova nĩ aakenagio nĩ ũtungata wa Paulo? Hatarĩ nganja nĩ aakenagio. Na Jehova nĩ aamũrathimire nĩ ũndũ wa kĩyo gĩake. (2 Tim. 4:​7, 8) Ũndũ ũmwe na ũcio, Jehova nĩ akenaga rĩrĩa ona tũkĩĩrutanĩria gũkinyĩra muoroto witũ o na rĩrĩa tũtaraigua tũrĩ na wendi wa gwĩka ũguo. Nĩ akenaga tondũ o na gũtuĩka tũtireka ũndũ ũcio tondũ nĩ tũwendete, nĩ amenyaga tũrawĩka tondũ nĩ tũmwendete. O ta ũrĩa Jehova aarathimire Paulo, nĩ arĩtũrathimaga nĩ ũndũ wa kĩyo gitũ. (Thab. 126:5) Na tuona irathimo cia Jehova, o na no twambĩrĩrie kũigua tũrĩ na wendi. w23.05 29 ¶9-10

Mũtũmwo Paulo aaringithanirie arĩa matakaahonoka mũthenya wa Jehova na andũ arĩa marĩ toro. Mũndũ ũrĩ toro ndamenyaga maũndũ marĩa marekĩka kana mahinda magĩthiĩ. Ndamenyaga rĩrĩa maũndũ ma bata marekĩka, na kwoguo ndangĩhota kuoya makinya marĩa marabatarania. Andũ aingĩ ũmũthĩ marĩ toro wa kĩĩroho. (Rom. 11:8) Nĩ mareganaga na ũira ũrĩa wonanagia atĩ tũratũũra “matukũ-inĩ ma kũrigĩrĩria,” na atĩ thĩna ũrĩa mũnene wĩ hakuhĩ gũka. (2 Pet. 3:​3, 4) No o ũrĩa matukũ marathiĩ, noguo tũrabatara gwathĩkĩra o na makĩria ũtaaro wa gũikara twĩiguĩte. (1 Thes. 5:6) Kwoguo tũrabatara gũikara tũhooreire na tũrĩ na mwĩcirĩrie ũrĩa wagĩrĩire. Nĩkĩ? Nĩguo tũtikeingĩranie na maũndũ ma thĩ ĩno kana ma gĩũteti. O ũrĩa mũthenya wa Jehova ũrakuhĩrĩria, noguo tũrĩhatĩkagwo makĩria kwĩingĩrania na maũndũ macio. O na kũrĩ ũguo, tũtiagĩrĩirũo gũtangĩka tũkĩĩyũria ũrĩa tũrabatara gwĩka. Roho wa Ngai no ũtũteithie gũikara tũhooreire tũrĩ na mwĩcirĩrie ũrĩa wagĩrĩire na tũhote gũtua matua ma ũũgĩ.—Luk. 12:​11, 12. w23.06 10 ¶6-7

Nĩ kĩĩ gĩũkaga meciria-inĩ maku rĩrĩa waigua rĩĩtwa Samsoni? No gũkorũo wĩciragia ũhoro wa mũndũ warĩ na hinya mũingĩ. Ũguo nĩ ma. No Samsoni nĩ aatuire itua rĩũru rĩarehire maumĩrĩro matarĩ mega. O na kũrĩ ũguo, Jehova ndaariganĩirũo nĩ ciĩko ciothe cia Samsoni cia wĩhokeku, na nĩkĩo aandĩkithirie rũgano rwake thĩinĩ wa Bibilia nĩguo twĩrute naruo. Jehova nĩ aahũthĩrire Samsoni gwĩka maũndũ manene nĩguo ateithie andũ ake Isiraeli. Mĩaka magana maingĩ thutha wa Samsoni gũkua, Jehova nĩ aatongoririe mũtũmwo Paulo kwandĩka rĩĩtwa rĩa Samsoni hamwe na marĩĩtwa ma arũme arĩa moonanirie wĩtĩkio mũnene. (Ahib. 11:​32-34) Kĩonereria kĩa Samsoni no gĩtwĩkĩre ngoro. Nĩ eehokaga Jehova o na rĩrĩa aacemanagia na maũndũ maritũ. Harĩ o na maũndũ mangĩ ma gũtwĩkĩra ngoro tũngĩĩruta kuumana na kĩonereria gĩa Samsoni. w23.09 2 ¶1-2

No twĩkĩre hinya ũkirĩrĩria witũ na njĩra ya kũhoyaga Jehova kaingĩ na kũmwĩra maũndũ marĩa maratũma tũtangĩke. (1 Thes. 5:17) No kũhoteke ihinda-inĩ rĩrĩ ndũrĩ na ũndũ mũritũ ũrahiũrania naguo. No hihi nĩ ũhoyaga Jehova agũtongorie rĩrĩa ũraigua ũrakarĩte, ũtukanĩirũo, o na kana ũritũhĩirũo? Ũngĩhoyaga Jehova kaingĩ agũteithie rĩrĩa ũrahiũrania na moritũ matarĩ manene, nĩ ũkaahota kũmũhoya agũteithie ihinda-inĩ rĩũkĩte ũngĩgacemania na moritũ manene. Hĩndĩ ĩyo nĩ ũgaakorũo na ma atĩ nĩ amenyaga rĩrĩa ũrabatara ũteithio na ũrĩa angĩgũteithia. (Thab. 27:​1, 3) Nĩ ũgaakorũo ũrĩ ũndũ mũhũthũ harĩ ithuĩ gũkirĩrĩria magerio ihinda-inĩ rĩũkĩte hĩndĩ ya thĩna ũrĩa mũnene, angĩkorũo nĩ tũrĩkiragĩrĩria magerio ũmũthĩ. (Rom. 5:3) Nĩ kĩĩ kĩngĩtũma tuuge ũguo? Aarĩ na ariũ a Ithe witũ aingĩ nĩ monete atĩ rĩrĩa rĩothe makirĩrĩria igerio rĩna, ũndũ ũcio nĩ ũmateithagia gũkirĩrĩria igerio rĩngĩ mangĩcemania narĩo. Rĩrĩa makirĩrĩria igerio rĩmwe magĩteithio nĩ Jehova, nĩ magĩaga na wĩtĩkio makĩria atĩ Jehova nĩ akoragwo ehaarĩirie kũmateithia. Wĩtĩkio ũcio nĩ ũmateithagia gũkirĩrĩria igerio rĩrĩa rĩngĩ mangĩcemania narĩo.—Jak. 1:​2-4. w23.07 3 ¶7-8

Wĩnyihia wa Jehova na ũcayanĩri wake nĩ imũtindĩkaga gũkorũo na ũigananĩru. Kwa ngerekano, wĩnyihia wa Jehova nĩ woonekire wega rĩrĩa eendaga kũniina andũ aganu a itũũra rĩa Sodomu. Kũgerera araika ake, Jehova eerire ndungata yake Loti orĩre irĩma-inĩ. Loti nĩ eetigagĩra gũthiĩ kuo. Kwoguo agĩthaitha Jehova nĩguo we na famĩlĩ yake metĩkĩrio kũũrĩra Zoaru, gataũni karĩa Jehova aabangĩte kũniina. Jehova nĩ angĩerire Loti atĩ no mũhaka arũmĩrĩre ũrĩa aamwĩrĩte. No Jehova nĩ eetĩkĩririe Loti athiĩ Zoaru na ndaaniinire gataũni kau. (Kĩam. 19:​18-22) Mĩaka mĩingĩ thutha ũcio, Jehova nĩ oonirie aikari a Nineve ũcayanĩri. Aatũmire mũnabii Jona akeere andũ acio a Nineve arĩa maarĩ aganu atĩ nĩ mangĩaniinirũo o hamwe na itũũra rĩao. No rĩrĩa aikari a Nineve meeririre, Jehova nĩ aamaiguĩrĩire tha na ndaaniinire itũũra rĩu.—Jona 3:​1, 10; 4:​10, 11. w23.07 21 ¶5

Tũreruta atĩa kuumana na kĩonereria kĩa Jehoashu? Aatariĩ o ta mũtĩ ũtarĩ na mĩri mĩrikĩru ũrĩa wabataraga kũnyitĩrĩrũo nĩ gĩkĩngĩ. Rĩrĩa Jehoiada ũrĩa watariĩ ta gĩkĩngĩ gĩa kũmũtiirĩrĩra aakuire, Jehoashu nĩ aambĩrĩirie gũthikĩrĩria aregenyũki, agĩtiga gwĩtigĩra Jehova. Ngerekano ĩyo ĩratũruta atĩ tũtiagĩrĩirũo gwĩtigĩra Ngai no ũndũ tu wa atĩ andũ a famĩlĩ na andũ arĩa angĩ kĩũngano-inĩ nĩ maratwĩkĩra ngoro gwĩka ũguo. Nĩguo tũikare tũrĩ na hinya kĩĩroho, no mũhaka twĩkĩre hinya wendo witũ harĩ Jehova na guoya witũ kũmwerekera, na njĩra ya kwĩrutaga hingo ciothe, gwĩcũrania, na kũhoyaga. (Jer. 17:​7, 8; Kol. 2:​6, 7) Jehova nderĩgagĩrĩra maũndũ maingĩ kuuma kũrĩ ithuĩ. Ũndũ ũrĩa endaga twĩke nĩ ũrĩa wonanĩtio thĩinĩ wa Kohelethu 12:​13, ĩrĩa yugaga ũũ: “Wĩtigĩre Ngai ũrĩa wa ma na wathĩkagĩre maathani make, nĩ gũkorũo gwĩka ũguo nĩ kũhingia maũndũ mothe marĩa mũndũ agĩrĩirũo nĩ gwĩka.” Tũngĩĩtigĩra Ngai, nĩ tũrĩhotaga gũkirĩrĩria moritũ marĩa tũrĩcemanagia namo, na tũgaikara twĩhandĩte. Gũtirĩ ũndũ ũngĩthũkia ũrata witũ na Jehova. w23.06 18-19 ¶17-19

Mũhari ũcio wambagĩrĩria na ciugo ici: “Ũrĩa waikarĩire gĩtĩ kĩrĩa kĩa ũnene akiuga.” (Kũg. 21:5a) Ciugo icio nĩ cia mwanya tondũ rĩrĩ nĩ rita rĩmwe harĩ maita matatũ tu marĩa Jehova we mwene arĩtie thĩinĩ wa ibuku rĩa Kũguũrĩrio. Kwoguo kĩĩranĩro kĩu gĩtiekĩrirũo mũkonde nĩ mũraika kana Jesu, no nĩ Jehova we mwene! Ũndũ ũcio no ũtũme tũkorũo na ma biũ na ciugo iria aacokire kuuga. Gĩtũmi nĩ tondũ Jehova ‘ndangĩheenania.’ (Tit. 1:2) Kwoguo no tũkorũo na ma atĩ ciugo iria tũthomaga thĩinĩ wa Kũguũrĩrio 21:​5, 6 nĩ cia kwĩhokeka biũ. Ta wĩcirie kiugo “Atĩrĩrĩ.” Kiugo gĩa Kĩngiriki kĩrĩa gĩtaũrĩtwo “atĩrĩrĩ,” nĩ kĩhũthĩrĩtwo kaingĩ ibuku-inĩ rĩa Kũguũrĩrio. Thutha wa Ngai kuuga kiugo kĩu, aacokire akiuga ũũ: “Nĩ kwerũhia ndĩrerũhia maũndũ mothe.” Haha Jehova araria ũhoro wĩgiĩ mogarũrũku ma ihinda rĩũkĩte, no tondũ arĩ na ma biũ atĩ nĩ akaahingia kĩĩranĩro kĩu, araria ta mogarũrũku macio mambĩrĩirie gwĩkĩka.—Isa. 46:10. w23.11 3-4 ¶7-8

Mũtũmwo Petero nĩ aahiũranagia na mawathe ma kwaga gũkinyanĩra. Ta wĩcirie ngerekano ici. Hĩndĩ ĩrĩa Jesu aataarĩirie ũrĩa angĩanyamarĩkire na akue nĩguo ahingie ũrathi wa Bibilia, Petero nĩ aamũkaanirie. (Mar. 8:​31-33) Petero na atũmwo arĩa angĩ nĩ maakararanagia maita maingĩ igũrũ rĩgiĩ nũũ mũnene gũkĩra arĩa angĩ. (Mar. 9:​33, 34) Ũtukũ wa mũico Jesu atanakua, Petero nĩ aatharĩkĩire mũndũ na akĩmũtinia gũtũ. (Joh. 18:10) Ũtukũ o ro ũcio, Petero nĩ eetigĩrire andũ, na agĩkaana mũratawe Jesu maita matatũ. (Mar. 14:​66-72) Ũndũ ũcio watũmire Petero arĩre arĩ na ruo rũnene. Jesu ndaatiganĩirie mũtũmwo ũcio wake wakuĩte ngoro. Thutha wa Jesu kũriũkio, nĩ aaheire Petero mweke wa kũmuonia atĩ no aamwendete. Aaheire Petero wĩra wa kũrĩithia ngʼondu ciake. (Joh. 21:​15-17) Petero nĩ eetĩkĩrire wĩra ũcio. Na kwoguo aarĩ Jerusalemu mũthenya wa Pentekoste, na agĩkorũo gatagatĩ-inĩ ka andũ a mbere arĩa maaitĩrĩirio maguta kũgerera roho mũtheru. w23.09 21-22 ¶6-7

Mũtũmwo Petero nĩ eekĩrire ngoro athuri arĩa angĩ a kĩũngano ‘marĩithagie rũũru rwa Ngai.’ (1 Pet. 5:​1-4) Angĩkorũo ũrĩ mũthuri wa kĩũngano, nĩ tũĩ nĩ wendete aarĩ na ariũ a Ithe witũ na nĩ wendete kũmarũmbũiya. O na kũrĩ ũguo, rĩmwe no ũigue ũrĩ na maũndũ maingĩ kana ũnogete mũno nginya ũkaigua ta ũtangĩhota kũruta wĩra ũcio. Ũngĩka atĩa hĩndĩ ta ĩyo? Itũrũrĩra Jehova ngoro yaku. Petero aandĩkire: “Mũndũ o wothe angĩtungata, nĩ eke ũguo ta arehoka hinya ũrĩa Ngai aheanaga.” (1 Pet. 4:11) Aarĩ na ariũ a Ithe witũ no makorũo magĩcemania na moritũ matangĩthira mũtabarĩre-inĩ ũyũ wa maũndũ. No ririkanaga atĩ “mũrĩithi ũrĩa mũnene,” Jesu Kristo, no amateithie gũkĩra ũrĩa wee ũngĩhota gwĩka. No eke ũguo mahinda-inĩ maya na thĩinĩ wa thĩ njerũ. Ũndũ ũrĩa tu Jehova endaga athuri a kĩũngano meke, nĩ mende aarĩ na ariũ a Ithe wao, mamarũmbũiye, na matuĩke “cionereria harĩ rũũru.” w23.09 29-30 ¶13-14

No mũhaka twĩtheme kũhũthĩra mwĩcirĩrie wa andũ. Tũngĩambĩrĩria kuona maũndũ kũringana na mwĩcirĩrie wa andũ no twĩkore tũgĩtiganĩria Jehova na ithimi ciake. (1 Kor. 3:19) “Ũũgĩ wa thĩ ĩno” kaingĩ ũtũmaga andũ matigathĩkĩre Ngai. Akristiano amwe thĩinĩ wa kĩũngano kĩa Perigamo na gĩa Thiatira nĩ maakũrĩtie muonere wa andũ arĩa maamathiũrũrũkĩirie wĩgiĩ kũhoya mĩhianano na ngomanio itagĩrĩire. Jesu nĩ aaheire ciũngano icio cierĩ ũtaaro mũritũ nĩ ũndũ wa gũkirĩrĩria ngomanio itagĩrĩire. (Kũg. 2:​14, 20) Ũmũthĩ, nĩ tũhatĩkagwo gwĩtĩkĩra mawoni matagĩrĩire ma andũ arĩa matũthiũrũrũkĩirie. Andũ a famĩlĩ na arata no matwĩre atĩ nĩ tũnyitagĩrĩra mũno mũrũgamo witũ makĩenda tũũregerie. Kwa ngerekano, no matwĩre atĩ ti ũndũ wa bata gũtũũria ũtheru wa kĩĩmĩtugo na atĩ ithimi cia Bibilia nĩ hĩtũke nĩ mahinda. Rĩmwe na rĩmwe no tuone ũtongoria ũrĩa Jehova atũheaga ta ũtarĩ mũiganu. Rĩmwe o na no tũgucĩrĩrio “[kwagarara] maũndũ marĩa maandĩke.”—1 Kor. 4:6. w23.07 16 ¶10-11

Mariamu, nyina wa Jesu, nĩ aabataraga gwĩkĩrũo hinya. Eerirũo atĩ nĩ angĩagĩire nda o na gũtuĩka ndaarĩ mũhiku. Aabataraga kũrera mwana ũrĩa ũngĩatuĩkire Mesia o na gũtuĩka ndaarĩ na ũmenyeru wa kũrera ciana. Na tondũ Mariamu ndaakomanĩtie na mũndũrũme, ndũngĩarĩ ũndũ mũhũthũ harĩ we gũtaarĩria Jusufu ũrĩa maarĩ mahikanie nake ũrĩa gwathiĩte. (Luk. 1:​26-33) Mariamu eekĩrirũo hinya atĩa? Aacaririe ũteithio kuuma kũrĩ arĩa angĩ. Kwa ngerekano, nĩ eerire Gaburieli amũhe ũhoro makĩria wĩgiĩ wĩra ũcio. (Luk. 1:34) Ihinda inini thutha ũcio, nĩ aathiire rũgendo rũraihu “bũrũri-inĩ ũrĩ irĩma” gĩcigo-inĩ kĩa Juda, gũceerera Elizabethi ũrĩa warĩ wa mbarĩ ciao. Elizabethi nĩ aagaathĩrĩirie Mariamu, na agĩtongorio nĩ roho wa Jehova kũmwĩra ũhoro wa ũrathi wa gwĩkĩra ngoro wĩgiĩ mwana ũrĩa Mariamu angĩaciarire. (Luk. 1:​39-45) Mariamu aaugire atĩ Jehova nĩ “ekĩte maũndũ manene na guoko gwake.” (Luk. 1:​46-51) Jehova nĩ aahũthĩrire Gaburieli na Elizabethi gwĩkĩra Mariamu hinya. w23.10 14-15 ¶10-12

Mũigana mũnini wa arutwo a Kristo nĩ makoragwo marĩ aitĩrĩrie maguta kũgerera roho mũtheru na magakorũo na ũrata wa mwanya hamwe na Jehova. Arutwo acio 144,000 magaatungata marĩ athĩnjĩri-Ngai kũrĩa igũrũ hamwe na Jesu. (Kũg. 14:1) Harĩa Hatheru gĩikaro-inĩ kĩrĩa kĩamũre, harũgamĩrĩire gũkorũo marĩ ariũ a Ngai a kĩĩroho marĩ o gũkũ thĩ. (Rom. 8:​15-17) Harĩa Hatheru Mũno gĩikaro-inĩ kĩrĩa kĩamũre, harũgamĩrĩire kũrĩa igũrũ kũrĩa Jehova aikaraga. “Gĩtaama” kĩrĩa kĩahakanĩtie Harĩa Hatheru na Harĩa Hatheru Mũno, kĩrũgamĩrĩire mwĩrĩ wa Jesu wa nyama na thakame ũrĩa ũngĩamũgirĩrĩirie gũtonya igũrũ arĩ Mũthĩnjĩri-Ngai Ũrĩa Mũnene makĩria wa hekarũ ya kĩĩroho. Rĩrĩa Jesu aarutire mwĩrĩ wake ũrĩ igongona rĩa gũkũũra andũ, nĩ aahingũrĩire Akristiano othe aitĩrĩrie maguta njĩra ya kũgĩa na muoyo kũrĩa igũrũ. Ningĩ no mũhaka makorũo mehaarĩirie gũtiga mĩĩrĩ yao ya nyama na thakame nĩguo mamũkĩre ngerenwa yao kũrĩa igũrũ.—Ahib. 10:​19, 20; 1 Kor. 15:50. w23.10 28 ¶13

Gideoni aaikarire ahooreire akĩrutwo mahĩtia nĩ arũme a Efiraimu. (Atiir. 8:​1-3) Ndaamacokeirie arakarĩte. Nĩ oonanirie wĩnyihia na njĩra ya gũthikĩrĩria mateta mao na kũmaarĩria na njĩra ya wendo, na ũndũ ũcio ũgĩtũma mahoorere. Athuri a kĩũngano nĩ monanagia ũũgĩ rĩrĩa megerekania na Gideoni harĩ gũthikĩrĩria na kinyi na gũcokia mahooreire rĩrĩa marutwo mahĩtia. (Jak. 3:13) Na njĩra ĩyo, nĩ mateithagia kĩũngano gĩkorũo na thayũ. Rĩrĩa Gideoni aagaathĩrĩirio nĩ ũndũ wa kũhoota Amidiani, eerekeirie meciria ma andũ kũrĩ Jehova. (Atiir. 8:​22, 23) Arũme arĩa mamũrĩtwo mangĩĩgerekania atĩa na Gideoni? Na njĩra ya kwerekagĩria Jehova rũgooco nĩ ũndũ wa maũndũ marĩa marahingia. (1 Kor. 4:​6, 7) Kwa ngerekano, mũthuri wa kĩũngano angĩgaathĩrĩrio nĩ ũndũ wa ũhoti wake wa kũrutana, no erekerie meciria ma andũ harĩ kĩhumo kĩa ũrutani ũcio na nĩkĩo Kiugo kĩa Ngai, kana harĩ kũmenyerio kũrĩa tũmenyeragio nĩ ithondeka rĩa Jehova. Rĩmwe na rĩmwe athuri nĩ magĩrĩirũo kwĩyũria kana nĩ marerekeria meciria harĩ o ene rĩrĩa mararutana. w23.06 4 ¶7-8

Tũngĩona mahoya maitũ matiracokio, no twĩyũrie, ‘Hihi nĩ ndĩrahoya ũndũ ũrĩa wagĩrĩire?’ Kaingĩ twĩciragia nĩ tũĩ nĩ ũndũ ũrĩkũ mwega harĩ ithuĩ. No rĩngĩ ũndũ ũrĩa tũrahoya ndũngĩtũguna. Rĩrĩa tũrahoya igũrũ rĩgiĩ thĩna mũna, no gũkorũo na kĩhonia kĩega gĩa thĩna ũcio gũkĩra kĩrĩa tũrerĩgĩrĩra. Na ningĩ maũndũ mamwe tũngĩhoya igũrũ rĩamo no makorũo matekũringana na wendi wa Jehova. (1 Joh. 5:14) Kwa ngerekano, ta wĩcirie ũhoro wĩgiĩ aciari marahoya nĩguo mwana wao ndakanatige ũhoro wa ma. Ũcio no woneke ta arĩ ũndũ mwagĩrĩru kũhoya. O na kũrĩ ũguo, Jehova ndatindĩkagĩrĩria mũndũ kũmũtungatĩra. Endaga ithuothe, nginya ciana citũ, twĩtuĩre itua rĩa kũmũthathaiya. (Gũcok. 10:​12, 13; 30:​19, 20) Kwoguo ũndũ ũrĩa ũngĩkorũo ũrĩ mwagĩrĩru harĩ aciari acio, nĩ kũhoya Jehova amateithie gũkinyĩra ngoro ya mwana wao nĩgetha mamũteithie kwenda Jehova na atuĩke mũrata wake.—Thim. 22:6; Ef. 6:4. w23.11 21 ¶5; 23 ¶12

Nĩkĩ no tuuge atĩ kũũmanĩrĩria nĩ njĩra ĩmwe ya bata ya kuonania wendo? Ibuku rĩmwe rĩa gũtaarĩria Bibilia rĩonanagia atĩ kiugo kĩrĩa Paulo aahũthĩrire gĩa ‘kũũmanĩrĩria’ kiugĩte “kũrũgama hakuhĩ na mũndũ nĩguo ũmwĩkĩre hinya rĩrĩa aragerera igerio iritũ.” Kwoguo rĩrĩa tuomĩrĩria Mũkristiano ũragerera ũndũ mũritũ, tũkoragwo tũkĩmwĩkĩra hinya nĩguo ahote gũthiĩ na mbere kũgerera njĩra-inĩ ya muoyo. Nĩ ũndũ ũcio, rĩrĩa rĩothe twatiirĩrĩra mũrũ kana mwarĩ wa Ithe witũ, tũkoragwo tũkĩonania atĩ nĩ tũmwendete. (2 Kor. 7:​6, 7, 13) Gũkorũo na ũcayanĩri nĩ gũkonainie na kũũmanĩrĩria. Na njĩra ĩrĩkũ? Mũndũ ũrĩ na ũcayanĩri nĩ atindĩkagwo kũũmĩrĩria arĩa angĩ na kũmahe ũteithio ũrĩa marabatara. Kwoguo nĩguo tũũmĩrĩrie mũndũ twambaga tũkamũcaĩra. Paulo oonanirie atĩ ũcayanĩri wa Jehova nĩ ũmũtindĩkaga kũũmĩrĩria andũ. Aaugire atĩ Jehova nĩ “Ithe witũ ũrĩ tha njororo na Ngai mwene ũhoro wothe wa kũũmanĩrĩria.”—2 Kor. 1:3. w23.11 9-10 ¶8-10

Arũmĩrĩri othe a Kristo no merĩgĩrĩre gũcemania na mathĩna. Ta wĩcirie kĩonereria kĩa mũtũmwo Paulo. Eerire Akristiano a Thesalonike ũũ: “Hĩndĩ ĩrĩa twarĩ hamwe na inyuĩ, nĩ twamwĩraga o mbere atĩ nĩ tũngĩkaanyarirũo, na ũndũ ũcio nĩguo wĩkĩkĩte rĩu.” (1 Thes. 3:4) Ningĩ akĩra Akristiano a Korintho ũũ: “Ariũ a Ithe witũ, tũtikwenda mwage kũmenya ũhoro wĩgiĩ thĩna ũrĩa twacemanirie naguo . . . Tũtiarĩ na ũũma kana nĩ tũgũtũũra muoyo.” (2 Kor. 1:8; 11:​23-27) O na Akristiano ũmũthĩ no merĩgĩrĩre gũcemania na mathĩna ma mĩthemba ĩtiganĩte. (2 Tim. 3:12) Nĩ ũndũ wa gwĩtĩkia Jesu na gũtuĩka mũrũmĩrĩri wake, arata na andũ a famĩlĩ no magwĩke maũndũ moru. Hihi itua rĩaku rĩa gũkorũo ũrĩ mwĩhokeku maũndũ-inĩ mothe nĩ rĩtũmĩte ũcemanie na mathĩna wĩra-inĩ? (Ahib. 13:18) Hihi wanokĩrĩrũo nĩ thirikari nĩ ũndũ wa kũhunjĩria andũ igũrũ rĩgiĩ kĩĩrĩgĩrĩro gĩaku? O na kũhaana ũguo, Paulo aratwĩra atĩ tũbatiĩ gũkena, gũtekũmakania mathĩna marĩa tũracemania namo. w23.12 10-11 ¶9-10

Jakubu nĩ aacemanirie na mathĩna maingĩ. Ariũ erĩ ake, nĩo Simeoni na Lawii, nĩ maareheire famĩlĩ ĩyo gĩconoko na magĩcambithia rĩĩtwa rĩa Jehova. Makĩria ma ũguo, Rakeli, mũtumia wa Jakubu ũrĩa eendete, nĩ aakuire akĩheo mwana wao wa kerĩ. Na nĩ ũndũ wa ngʼaragu nene ĩrĩa yarĩ kuo, Jakubu nĩ aabatarire gũthamĩra bũrũri-inĩ wa Misiri o na gũtuĩka aarĩ mũkũrũ. (Kĩam. 35:​16-19; 37:28; 45:​9-11, 28) O na Jakubu akĩgeragĩra magerio macio mothe, ndaatigire kwĩhoka Jehova na ciĩranĩro ciake. Nake Jehova nĩ oonirie Jakubu atĩ nĩ eetĩkĩrĩkĩte harĩ we. Kwa ngerekano, Jehova nĩ aarathimire Jakubu akĩmũhe indo nyingĩ. Ningĩ no mũhaka akorũo Jakubu nĩ aacokeirie Jehova ngatho mũno rĩrĩa maacokanirũo na mũrũwe Jusufu ũrĩa eeciragia atĩ nĩ aakuĩte. Gũkorũo na ũrata wa hakuhĩ hamwe na Jehova, nĩ gwateithirie Jakubu gũkirĩrĩria magerio. (Kĩam. 30:43; 32:​9, 10; 46:​28-30) Tũngĩtũũria ũrata wa hakuhĩ hamwe na Jehova, o na ithuĩ no tũhote gũtooria magerio marĩa tũngĩcemania namo tũterĩgĩrĩire. w23.04 15 ¶6-7

Thĩinĩ wa Thaburi 23, Daudi nĩ oonanirie aarĩ na ma atĩ Jehova nĩ aamwendete na nĩ aamũrũmbũyagia. Nĩ aataarĩirie ũrata mũnene ũrĩa maarĩ naguo hamwe na Jehova Mũrĩithi wake. Daudi nĩ aaiguaga arĩ na ũgitĩri nĩ ũndũ wa kũreka Jehova amũtongorie, na akĩĩneana biũ moko-inĩ make. Nĩ aamenyaga atĩ Jehova nĩ angĩamuonirie wendo matukũ-inĩ mothe ma ũtũũro wake. Nĩ kĩĩ gĩatũmaga akorũo na ũũma ũcio? Daudi nĩ oonaga atĩ Jehova nĩ aamũrũmbũyagia tondũ hingo ciothe nĩ aamũheaga kĩrĩa aabataraga. Ningĩ Daudi nĩ eetĩkĩrĩkĩte harĩ Jehova na maarĩ na ũrata wa hakuhĩ nake. Nĩkĩo gĩatũmaga akorũo na ma atĩ o na angĩacemanirie na maũndũ mahaana atĩa ihinda rĩũkĩte, Jehova nĩ angĩathiire na mbere kũmũrũmbũiya. Tondũ Daudi aarĩ na ma atĩ Jehova nĩ aamwendete na nĩ aamũrũmbũyagia, nĩ aahotaga kũhiũrania na mĩtangĩko, agakorũo na gĩkeno na akaiganĩra.—Thab. 16:11. w24.01 29 ¶12-13

Kuuma hĩndĩ ya Mbaara ya Kerĩ ya Thĩ, andũ a Jehova mabũrũri-inĩ maingĩ nĩ makeneire thayũ na wĩyathi wa gũthiĩ na mbere na wĩra wa kũhunjia. Hatarĩ nganja wĩra ũcio nĩ ũgaacĩrĩte mũno. Ũmũthĩ ũyũ, ariũ a Ithe witũ a Kĩama Kĩrĩa Gĩtongoragia no mathiaga na mbere gũcaria ũtongoria wa Kristo. Mendaga gũtigĩrĩra atĩ ũtongoria ũrĩa marahe aarĩ na ariũ a Ithe witũ nĩ ũratwarana na mawoni ma Jehova na Kristo. Ũtongoria ũcio ũgacoka ũgakinyĩrio ciũngano kũgerera harĩ arori a mũthiũrũrũko na athuri a ciũngano. Athuri a ciũngano arĩa aitĩrĩrie maguta, o hamwe na arĩa matarĩ aitĩrĩrie maguta, makoragwo ‘guoko-inĩ kwa ũrĩo’ gwa Kristo. (Kũg. 2:1) Ma nĩ atĩ athuri acio matikoragwo marĩ akinyanĩru, na kwoguo no mahĩtie. O na Musa, Joshua, na nginya atũmwo, rĩmwe nĩ maahĩtagia. (Ndar. 20:12; Josh. 9:​14, 15; Rom. 3:23) Ĩndĩ nĩ tuonaga wega Kristo agĩtongoria ngombo ĩrĩa njĩhokeku na athuri acio mamũrĩtwo, na nĩ egũthiĩ na mbere gwĩka ũguo. Kwoguo twĩ na itũmi njega cia kwĩhoka ũtongoria ũrĩa aheanaga kũgerera athuri acio mamũrĩtwo. w24.02 23-24 ¶13-14

Ũmũthĩ no tũkenie Jehova na njĩra ya kwaragia ũhoro wake tũcanjamũkĩte, na tũkonania atĩ tũrĩ na ngatho harĩ we na nĩ tũmwendete. Rĩrĩa tũrĩ ũtungata, twagĩrĩirũo kũririkana atĩ muoroto witũ mũnene nĩ gũteithia andũ gũkuhĩrĩria Jehova na kũmateithia kuona Ithe witũ ta ũrĩa tũmuonaga. (Jak. 4:8) Nĩ tũkenagĩra kuonia andũ ũrĩa Bibilia ĩguũragia igũrũ rĩgiĩ Jehova, ngumo ciake ta wendo, kĩhooto, ũũgĩ, hinya, na ingĩ nyingĩ itũgucagĩrĩria. Ningĩ nĩ tũgoocaga Jehova na tũkamũkenia rĩrĩa twerutanĩria kwĩgerekania nake. Rĩrĩa tweka ũguo, andũ no mone atĩ tũrĩ ngũrani na andũ arĩa angĩ thĩinĩ wa thĩ ĩno ĩiyũire waganu na mende kũmenya gĩtũmi. (Mat. 5:​14-16) Na rĩrĩa twagĩa na mweke wa kwaranĩria nao twĩ mĩhangʼo-inĩ ya o mũthenya, no tũmataarĩrie kĩrĩa gĩtũmaga tũkorũo tũrĩ ngũrani. Tweka ũguo, andũ a ngoro njega nĩ marĩgucagĩrĩrio harĩ Ngai witũ. Rĩrĩa twagooca Jehova na njĩra ta icio, nĩ tũkenagia ngoro yake.—1 Tim. 2:​3, 4. w24.02 10 ¶7

Nĩguo mũrũ wa Ithe witũ atuĩke Mũkristiano mũgimaru kĩĩroho, nĩ arabatara kwĩruta maũndũ mangĩmũteithia ũtũũro-inĩ. Maũndũ macio no mamũteithie kũhingia mawĩra marĩa angĩĩhokerũo kĩũngano-inĩ, kuona wĩra ũngĩmũteithia kwĩrũgamĩrĩra kana kũrũmbũiya famĩlĩ yake na ahote kũũtũũria, na gũkorũo na ũrata mwega hamwe na andũ arĩa angĩ. Kwa ngerekano, no erute gũthoma na kwandĩka. Bibilia yugaga atĩ mũndũ ũrĩa ũkoragwo na gĩkeno na ũgaacĩrĩte, nĩ ũrĩa ũthomaga Kiugo kĩa Ngai o mũthenya na agecũrania ũhoro wakĩo. (Thab. 1:​1-3) Mũrũ wa Ithe witũ ũrĩa ũthomaga Bibilia o mũthenya nĩ ahotaga kũmenya mwĩcirĩrie wa Jehova, ũndũ ũrĩa ũmũteithagia gwĩciria na njĩra njega na kuona ũrĩa angĩhũthĩra Maandĩko. (Thim. 1:​3, 4) Aarĩ na ariũ a Ithe witũ nĩ mabataraga ũteithio wa ariũ a Ithe witũ arĩa makoragwo na ũhoti wa kũrutana na kũheana ũtaaro kuuma Bibilia-inĩ. Angĩkorũo nĩ wĩrutĩte gũthoma na kwandĩka, nĩ ũrĩhotaga kũhaarĩria mĩario na macokio mangĩguna andũ arĩa angĩ na mekĩre wĩtĩkio wao hinya. Ningĩ nĩ ũrĩhotaga kwandĩka maũndũ ma bata marĩa marĩgũteithagia gwĩkĩra hinya wĩtĩkio waku na gwĩkĩra arĩa angĩ ngoro. w23.12 26-27 ¶9-11

Rĩrĩa waigua guoya, wĩcũranagie maũndũ marĩa Jehova ageeka ihinda rĩũkĩte rĩrĩa Shaitani atagaakorũo kuo. Kĩgomano-inĩ gĩa thikũ ithatũ kĩa mwaka wa 2014, nĩ kwarĩ na kĩonereria kĩoonanirie mũrũ wa Ithe witũ na famĩlĩ yake makĩarĩrĩria ũrĩa rĩandĩko rĩa 2 Timotheo 3:​1-5 rĩngĩkorũo rĩrĩ korũo rĩrarĩrĩria ũhoro wĩgiĩ Paradiso. Rĩngĩkorũo rĩkiuga ũũ: “Thĩinĩ wa thĩ njerũ nĩ gũkaagĩa mahinda ma gĩkeno mũno. Nĩ gũkorũo andũ magaakorũo mendete arĩa angĩ, mendete maũndũ ma kĩĩroho, mateganaga, mategaathaga, magoocaga Ngai, mathĩkagĩra aciari, marĩ ngatho, ehokeku, mendete famĩlĩ ciao mũno, mendete ũiguano, maragia maũndũ mega megiĩ arĩa angĩ hingo ciothe, megiragĩrĩria, ahooreri, mendete maũndũ mega, a kwĩhokeka, mathikagĩrĩria arĩa angĩ, enyihia, mendete Ngai handũ ha kwenda ikeno, meyamũrĩire Ngai kuuma ngoro; nyitana na andũ acio biũ.” Hihi nĩ mwaragĩrĩria na famĩlĩ yanyu kana na Akristiano arĩa angĩ ũrĩa ũtũũro ũgaakorũo ũhaana thĩinĩ wa thĩ njerũ? w24.01 6 ¶13-14

Nĩ ũndũ wa gwĩkĩra ngoro kũmenya atĩ nĩ twĩtĩkĩrĩkaga harĩ Jehova tũrĩ gĩkundi. Bibilia yugaga ũũ: “Jehova nĩ akenagio nĩ andũ ake.” (Thab. 149:4) O na kũrĩ ũguo, rĩmwe na rĩmwe athathaiya amwe a Jehova nĩ maiguaga makuĩte ngoro mũno, nginya makagĩa nganja kana o ene nĩ metĩkĩrĩkĩte harĩ Jehova. O na mahinda-inĩ ma Bibilia, kũrĩ hĩndĩ ndungata njĩhokeku cia Jehova ciakoragwo na nganja ta icio. (1 Sam. 1:​6-10; Ayub. 29:​2, 4; Thab. 51:11) Bibilia nĩ yonanagia wega atĩ andũ matarĩ akinyanĩru no metĩkĩrĩke harĩ Jehova. Nĩguo twĩtĩkĩrĩke nĩwe, no mũhaka tuonanagie wĩtĩkio harĩ Jesu Kristo na tũbatithio. (Joh. 3:16) Rĩrĩa tweka ũguo tuonagia arĩa angĩ atĩ nĩ twĩrirĩte mehia maitũ, na tũkerĩra Ngai atĩ tũrĩkaga wendi wake. (Atũm. 2:38; 3:19) Jehova nĩ akenaga rĩrĩa tuoya makinya macio marĩa matũteithagia gũkũria ũrata hamwe nake. Tũngĩthiĩ na mbere kwĩrutanĩria gũtũũra kũringana na wĩyamũrĩri witũ, nĩ tũrĩtĩkĩrĩkaga harĩ Jehova na agatuona tũrĩ arata ake a hakuhĩ.—Thab. 25:14. w24.03 26 ¶1-2

No twĩgerekanie na arutwo a Jesu na njĩra ya gũthiĩ na mbere kũhunjia o na rĩrĩa thirikari yatwatha tũtige kũhunjia. No tũkorũo na ma atĩ Jehova nĩ arĩtũteithagia kũhingia ũtungata witũ. Kwoguo hoya Jehova akũhe ũmĩrĩru na ũũgĩ na agũteithie kũhiũrania na mathĩna. Aingĩ aitũ nĩ tũragerera moritũ, ta mathĩna ma mwĩrĩ kana ma kĩĩmeciria, gũkuĩrũo nĩ mũndũ twendete, kũhiũrania na ũndũ mũritũ thĩinĩ wa famĩlĩ, kũnyarirũo, kana thĩna ũngĩ. Na maũndũ ta kĩngʼũki na mbaara nĩ matũmĩte mathĩna ta macio maritũhe o na makĩria. Itũrũragĩra Jehova ngoro yaku. Mũtaarĩrie igũrũ rĩgiĩ maũndũ marĩa ũragerera o ta ũrĩa ũngĩtaarĩria mũrata waku wa hakuhĩ. Korũo na ma atĩ Jehova “nĩ arĩgũteithagia.” (Thab. 37:​3, 5) Kũhoya tũtegũtigithĩria no gũtũteithie ‘gũkiragĩrĩria rĩrĩa tũrĩ na mathĩna.’ (Rom. 12:12) Jehova nĩ oĩ maũndũ marĩa athathaiya ake maragerera, na “nĩ aiguaga kĩrĩro kĩao gĩa kũhoya ũteithio.”—Thab. 145:​18, 19. w23.05 5-6 ¶12-15

Rĩrĩa tũrenda gũtua matua ma bata ũtũũro-inĩ, tũbatiĩ kwamba gũtaũkĩrũo “wendi wa Jehova nĩ ũrĩkũ” tũcoke twĩke kũringana naguo. (Ef. 5:17) Rĩrĩa twacaria motaaro ma Bibilia marĩa tũrabatara, tũkoragwo tũkĩenda gũtaũkĩrũo nĩ mwĩcirĩrie wa Ngai ũndũ-inĩ ũcio. Na rĩrĩa twarũmĩrĩra motaaro make, nĩ tũrĩhotaga gũtua matua mega. “Ũrĩa mũũru,” o we thũ itũ Shaitani, no atũme tũhũthagĩre mahinda maingĩ tũgĩthingata maũndũ ma thĩ ĩno nginya twage mahinda ma gũtungatĩra Ngai. (1 Joh. 5:19) Mũkristiano no ekore agĩkĩrĩra mũno indo cia kĩĩmwĩrĩ, gĩthomo, kana wĩra, handũ ha gũcaria mĩeke ya kwandandũra ũtungata wake harĩ Jehova. Gwĩkĩrĩra maũndũ macio kuonanagia atĩ mũndũ nĩ ahutĩtio nĩ mwĩcirĩrie wa thĩ. Ma nĩ atĩ, maũndũ macio mo mene ti moru, no tũtiagĩrĩirũo kũmaiga mbere ũtũũro-inĩ witũ. w24.03 24 ¶16-17