តើជោគជ័យក្នុងជីវិតពឹងផ្អែកលើអ្វី?
លោកចេស៊ី លីវើម័រមានឈ្មោះល្បីជាមនុស្សដែលចេះធ្វើការសម្រេចចិត្តយ៉ាងល្អក្នុងផ្នែកពាណិជ្ជកម្ម។ ក្នុងផ្សារលក់ភាគហ៊ុននៅសហរដ្ឋអាម៉េរិក មនុស្សខ្លះចាត់ទុកគាត់ជាអ្នកដែលមានជោគជ័យបំផុតក្នុងការទិញលក់ភាគហ៊ុន។ ជាលទ្ធផល គាត់ក្លាយជាអ្នកមានស្តុកស្តម្ភណាស់! គាត់ពាក់អាវធំមានគុណភាពល្អបំផុត មានវិមានដ៏ស្កឹមស្កៃដែលមានបន្ទប់២៩ ហើយក៏ជិះឡានថ្លៃៗផង។
បុរសម្នាក់ឈ្មោះដាវីឌaក៏មានគោលដៅដូចគ្នាដែរ។ គាត់ជាប្រធានស្តីទីនិងប្រធានគ្រប់គ្រងទូទៅក្នុងក្រុមហ៊ុនដែលផលិតរូបភាព ហើយមើលទៅដូចជាគាត់អាចក្លាយជាប្រធានធំជាងនោះទៅទៀត។ ដាវីឌសង្ឃឹមថានឹងក្លាយជាអ្នកមានហើយមានមុខមាត់។ ប៉ុន្តែ គាត់ធ្វើការសម្រេចចិត្តមួយដែលក្រោយមកជំរុញឲ្យគាត់លាឈប់ពីតំណែង។ ដាវីឌមានប្រសាសន៍ថា៖ «ខ្ញុំដឹងថាខ្ញុំមិនអាចមានមុខតំណែងធំ[ដូចនោះ]ម្ដងទៀតទេ»។ តើអ្នកគិតថា គាត់ធ្វើការសម្រេចចិត្តខុសឬ?
មនុស្សជាច្រើនជឿថា យើងត្រូវមានទ្រព្យសម្បត្ដិស្តុកស្តម្ភ ឈ្មោះល្បីហើយមានគេស្រឡាញ់រាប់អានច្រើនទើបអាចចាត់ទុកថាបានទទួលជោគជ័យក្នុងជីវិត។ ក៏ប៉ុន្តែ ជីវិតរបស់មនុស្សដែលមានភាពរុងរឿងប្រហែលជាគ្មានខ្លឹមសារឬក៏ជីវិតពួកគេគ្មានន័យទេ។ តាមមើលទៅ លោកលីវើម័រមានអារម្មណ៍បែបនេះ។ ទោះជាគាត់មានទ្រព្យសម្បត្ដិច្រើនក្ដី ជីវិតគាត់ពោរពេញទៅដោយការក្រៀមក្រំចិត្ត រឿងខ្លោចផ្សានិងការខូចចិត្តផងដែរ។ ប៉ុន្មានដងហើយក្រុមគ្រួសារគាត់ចេះតែបែកបាក់គ្នា រីឯកូនប្រុសវិញក៏មិនសូវជិតស្និទ្ធជាមួយគាត់ ហើយគាត់តែងតែធ្លាក់ទឹកចិត្ត។ ក្រោយៗមក លោកលីវើម័របានបាត់បង់ទ្រព្យសម្បត្ដិភាគច្រើនរបស់គាត់ ហើយនៅថ្ងៃមួយបានទៅរង្គសាលក្នុងសណ្ឋាគារធំនិងអង្គុយគិតអំពីអ្វីៗដែលគាត់បាត់បង់។ លោកបានកុម្ម៉ង់ភេសជ្ជៈមួយកែវ ព្រមទាំងយកសៀវភៅកំណត់ដែលមានក្របស្បែកសរសេរសំបុត្រផ្ដែផ្ដាំភរិយា។ ពេលពិសាអស់មួយកែវ គាត់ចូលទៅក្នុងបន្ទប់ដែលឥតសូវមានពន្លឺ(ជាកន្លែងគេផ្ញើអាវធំ) ហើយគួរសោកស្ដាយណាស់ គាត់ក៏បានសម្លាប់ខ្លួន។
តាមពិត មូលហេតុដែលមនុស្សធ្វើអត្តឃាត នោះស្មុគស្មាញណាស់! ប៉ុន្តែបទពិសោធន៍នេះផ្ដល់ទីសំអាងពីសច្ចភាពនៃអ្វីដែលចែងទុកក្នុងព្រះគម្ពីរថា៖ «ពួកអ្នកដែលចង់ធ្វើជាអ្នកស្តុកស្តម្ភ . . . ចាក់ទំលុះខ្លួនគេដោយសេចក្ដីព្រួយលំបាកជាច្រើន»។—ធីម៉ូថេទី១ ៦:៩, ១០
ពេលមនុស្សគិតថាជោគជ័យក្នុងជីវិតពឹងផ្អែកលើទ្រព្យសម្បត្ដិ មុខមាត់ធំឬឈ្មោះល្បី តើគេមានគំនិតខុសឆ្គងឬ? តើអ្នកចាត់ទុកខ្លួនជាមនុស្សដែលមានជោគជ័យក្នុងជីវិតឬទេ? ហេតុអ្វីបានជាអ្នកគិតដូច្នេះ? តើគំនិតគិតថាខ្លួនទទួលជោគជ័យក្នុងជីវិតពឹងផ្អែកលើអ្វី? តើអ្វីមានឥទ្ធិពលលើទស្សនៈរបស់អ្នកស្តីអំពីការជោគជ័យក្នុងជីវិត? អត្ថបទបន្ទាប់នឹងពិចារណាឱវាទល្អៗដែលជួយមនុស្សរាប់លាននាក់ទទួលជោគជ័យក្នុងជីវិត។ សូមពិនិត្យមើលអំពីរបៀបដែលអ្នកអាចទទួលជោគជ័យក្នុងជីវិតបានដែរ។
[កំណត់សម្គាល់]
a នេះមិនមែនជាឈ្មោះពិត។